3. bhagnacikitsitam

Adhikarana 1 (1-2) · Śloka 2

ಅಥಾತೋ ಭಗ್ನಾನಾಂ ಚಿಕಿತ್ಸಿತಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಅಲ್ಪಾಶಿನೋಽನಾತ್ಮವತೋ ಜನ್ತೋರ್ವಾತಾತ್ಮಕಸ್ಯ ಚ | ಉಪದ್ರವೈರ್ವಾ ಜುಷ್ಟಸ್ಯ ಭಗ್ನಂ ಕೃಚ್ಛ್ರೇಣ ಸಿಧ್ಯತಿ ||೩||

Adhikarana 3 (4) · Śloka 4

ಲವಣಂ ಕಟುಕಂ ಕ್ಷಾರಮಮ್ಲಂ ಮೈಥುನಮಾತಪಮ್ | ವ್ಯಾಯಾಮಂ ಚ ನ ಸೇವೇತ ಭಗ್ನೋ ರೂಕ್ಷಾನ್ನಮೇವ ಚ ||೪||

Adhikarana 4 (5) · Śloka 5

ಶಾಲಿರ್ಮಾಂಸರಸಃ ಕ್ಷೀರಂ ಸರ್ಪಿರ್ಯೂಷಃ ಸತೀನಜಃ | ಬೃಂಹಣಂ ಚಾನ್ನಪಾನಂ ಸ್ಯಾದ್ದೇಯಂ ಭಗ್ನಾಯ ಜಾನತಾ ||೫||

Adhikarana 5 (6) · Śloka 6

ಮಧೂಕೋದುಮ್ಬರಾಶ್ವತ್ಥಪಲಾಶಕಕುಭತ್ವಚಃ | ವಂಶಸರ್ಜವಟಾನಾಂ ಚ ಕುಶಾರ್ಥಮುಪಸಂಹರೇತ್ ||೬||

Adhikarana 6 (7) · Śloka 7

ಆಲೇಪನಾರ್ಥಂ ಮಞ್ಜಿಷ್ಠಾಂ ಮಧುಕಂ ರಕ್ತಚನ್ದನಮ್ | ಶತಧೌತಘೃತೋನ್ಮಿಶ್ರಂ ಶಾಲಿಪಿಷ್ಟಂ ಚ ಸಂಹರೇತ್ ||೭||

Adhikarana 7 (8) · Śloka 9

ಸಪ್ತಾಹಾದಥ ಸಪ್ತಾಹಾತ್ ಸೌಮ್ಯೇಷ್ವೃತುಷು ಬನ್ಧನಮ್ | ಸಾಧಾರಣೇಷು ಕರ್ತವ್ಯಂ ಪಞ್ಚಮೇ ಪಞ್ಚಮೇಽಹನಿ ||೮|| ಆಗ್ನೇಯೇಷು ತ್ರ್ಯಹಾತ್ ಕುರ್ಯಾದ್ಭಗ್ನದೋಷವಶೇನ ವಾ |೯|

Adhikarana 8 (9-10) · Śloka 10

ತತ್ರಾತಿಶಿಥಿಲಂ ಬದ್ಧೇ ಸನ್ಧಿಸ್ಥೈರ್ಯಂ ನ ಜಾಯತೇ ||೯|| ಗಾಢೇನಾಪಿ ತ್ವಗಾದೀನಾಂ ಶೋಫೋ ರುಕ್ ಪಾಕ ಏವ ಚ | ತಸ್ಮಾತ್ ಸಾಧಾರಣಂ ಬನ್ಧಂ ಭಗ್ನೇ ಶಂಸನ್ತಿ ತದ್ವಿದಃ ||೧೦||

Adhikarana 9 (11) · Śloka 11

ನ್ಯಗ್ರೋಧಾದಿಕಷಾಯಂ ತು ಸುಶೀತಂ ಪರಿಷೇಚನೇ | ಪಞ್ಚಮೂಲೀವಿಪಕ್ವಂ ತು ಕ್ಷೀರಂ ಕುರ್ಯಾತ್ ಸವೇದನೇ ||೧೧||

Adhikarana 10 (12) · Śloka 12

ಸುಖೋಷ್ಣಮವಚಾರ್ಯಂ ವಾ ಚಕ್ರತೈಲಂ ವಿಜಾನತಾ |೧೨|

Adhikarana 11 (12) · Śloka 13

ವಿಭಜ್ಯ ಕಾಲಂ ದೋಷಂ ಚ ದೋಷಘ್ನೌಷಧಸಂಯುತಮ್ ||೧೨|| ಪರಿಷೇಕಂ ಪ್ರದೇಹಂ ಚ ವಿದಧ್ಯಾಚ್ಛೀತಮೇವ ಚ |೧೩|

Adhikarana 12 (13) · Śloka 14

ಗೃಷ್ಟಿಕ್ಷೀರಂ ಸಸರ್ಪಿಷ್ಕಂ ಮಧುರೌಷಧಸಾಧಿತಮ್ ||೧೩|| ಶೀತಲಂ ಲಾಕ್ಷಯಾ ಯುಕ್ತಂ ಪ್ರಾತರ್ಭಗ್ನಃ ಪಿಬೇನ್ನರಃ |೧೪|

Adhikarana 13 (14) · Śloka 15

ಸವ್ರಣಸ್ಯ ತು ಭಗ್ನಸ್ಯ ವ್ರಣಂ ಸರ್ಪಿರ್ಮಧೂತ್ತರೈಃ ||೧೪|| ಪ್ರತಿಸಾರ್ಯ ಕಷಾಯೈಸ್ತು ಶೇಷಂ ಭಗ್ನವದಾಚರೇತ್ |೧೫|

Adhikarana 14 (15) · Śloka 16

ಪ್ರಥಮೇ ವಯಸಿ ತ್ವೇವಂ ಭಗ್ನಂ ಸುಕರಮಾದಿಶೇತ್ ||೧೫|| ಅಲ್ಪದೋಷಸ್ಯ ಜನ್ತೋಸ್ತು ಕಾಲೇ ಚ ಶಿಶಿರಾತ್ಮಕೇ |೧೬|

Adhikarana 15 (16) · Śloka 17

ಪ್ರಥಮೇ ವಯಸಿ ತ್ವೇವಂ ಮಾಸಾತ್ ಸನ್ಧಿಃ ಸ್ಥಿರೋ ಭವೇತ್ ||೧೬|| ಮಧ್ಯಮೇ ದ್ವಿಗುಣಾತ್ ಕಾಲಾದುತ್ತರೇ ತ್ರಿಗುಣಾತ್ ಸ್ಮೃತಃ |೧೭|

Adhikarana 16 (17) · Śloka 18

ಅವನಾಮಿತಮುನ್ನಹ್ಯೇದುನ್ನತಂ ಚಾವಪೀಡಯೇತ್ ||೧೭|| ಆಞ್ಛೇದತಿಕ್ಷಿಪ್ತಮಧೋ ಗತಂ ಚೋಪರಿ ವರ್ತಯೇತ್ |೧೮|

Adhikarana 17 (18-19) · Śloka 19

ಆಞ್ಛ್ನೈಃ ಪೀಡನೈಶ್ಚೈವ ಸಙ್ಕ್ಷೇಪೈರ್ಬನ್ಧನೈಸ್ತಥಾ ||೧೮|| ಸನ್ಧೀಞ್ಛರೀರೇ ಸರ್ವಾಂಸ್ತು ಚಲಾನಪ್ಯಚಲಾನಪಿ | ಏತೈಸ್ತು ಸ್ಥಾಪನೋಪಾಯೈಃ ಸ್ಥಾಪಯೇನ್ಮತಿಮಾನ್ ಭಿಷಕ್ ||೧೯||

Adhikarana 18 (20-21) · Śloka 22

ಉತ್ಪಿಷ್ಟಮಥ ವಿಶ್ಲಿಷ್ಟಂ ಸನ್ಧಿಂ ವೈದ್ಯೋ ನ ಘಟ್ಟಯೇತ್ | ತಸ್ಯ ಶೀತಾನ್ ಪರೀಷೇಕಾನ್ ಪ್ರದೇಹಾಂಶ್ಚಾವಚಾರಯೇತ್ ||೨೦|| ಅಭಿಘಾತೇ ಹೃತೇ ಸನ್ಧಿಃ ಸ್ವಾಂ ಯಾತಿ ಪ್ರಕೃತಿಂ ಪುನಃ | ಘೃತದಿಗ್ಧೇನ ಪಟ್ಟೇನ ವೇಷ್ಟಯಿತ್ವಾ ಯಥಾವಿಧಿ ||೨೧|| ಪಟ್ಟೋಪರಿ ಕುಶಾನ್ ದತ್ತ್ವಾ ಯಥಾವದ್ಬನ್ಧಮಾಚರೇತ್ |೨೨|

Adhikarana 19 (22) · Śloka 22

ಪ್ರತ್ಯಙ್ಗಭಗ್ನಸ್ಯ ವಿಧಿರತ ಊರ್ಧ್ವಂ ಪ್ರವಕ್ಷ್ಯತೇ ||೨೨||

Adhikarana 20 (23) · Śloka 23

ನಖಸನ್ಧಿಂ ಸಮುತ್ಪಿಷ್ಟಂ ರಕ್ತಾನುಗತಮಾರಯಾ | ಅವಮಥ್ಯ ಸ್ರುತೇ ರಕ್ತೇ ಶಾಲಿಪಿಷ್ಟೇನ ಲೇಪಯೇತ್ ||೨೩||

Adhikarana 21 (24) · Śloka 24

ಭಗ್ನಾಂ ವಾ ಸನ್ಧಿಮುಕ್ತಾಂ ವಾ ಸ್ಥಾಪಯಿತ್ವಾಽಙ್ಗುಲೀಂ ಸಮಾಮ್ | ಅಣುನಾಽಽವೇಷ್ಟ್ಯ ಪಟ್ಟೇನ ಘೃತಸೇಕಂ ಪ್ರದಾಪಯೇತ್ ||೨೪||

Adhikarana 22 (25) · Śloka 25

ಅಭ್ಯಜ್ಯ ಸರ್ಪಿಷಾ ಪಾದಂ ತಲಭಗ್ನಂ ಕುಶೋತ್ತರಮ್ | ವಸ್ತ್ರಪಟ್ಟೇನ ಬಧ್ನೀಯಾನ್ನ ಚ ವ್ಯಾಯಾಮಮಾಚರೇತ್ ||೨೫||

Adhikarana 23 (26) · Śloka 26

ಅಭ್ಯಜ್ಯಾಯಾಮಯೇಜ್ಜಙ್ಘಾಮೂರುಂ ಚ ಸುಸಮಾಹಿತಃ | ದತ್ತ್ವಾ ವೃಕ್ಷತ್ವಚಃ ಶೀತಾ ವಸ್ತ್ರಪಟ್ಟೇನ ವೇಷ್ಟಯೇತ್ ||೨೬||

Adhikarana 24 (27) · Śloka 27

ಮತಿಮಾಂಶ್ಚಕ್ರಯೋಗೇನ ಹ್ಯಾಞ್ಛೇದೂರ್ವಸ್ಥಿ ನಿರ್ಗತಮ್ | ಸ್ಫುಟಿತಂ ಪಿಚ್ಚಿತಂ ಚಾಪಿ ಬಧ್ನೀಯಾತ್ ಪೂರ್ವವದ್ಭಿಷಕ್ ||೨೭||

Adhikarana 25 (28) · Śloka 28

ಆಞ್ಛೇದೂರ್ಧ್ವಮಧೋ ವಾಽಪಿ ಕಟಿಭಗ್ನಂ ತು ಮಾನವಮ್ | ತತಃ ಸ್ಥಾನಸ್ಥಿತೇ ಸನ್ಧೌ ಬಸ್ತಿಭಿಃ ಸಮುಪಾಚರೇತ್ ||೨೮||

Adhikarana 26 (29-30) · Śloka 30

ಪರ್ಶುಕಾಸ್ವಥ ಭಗ್ನಾಸು ಘೃತಾಭ್ಯಕ್ತಸ್ಯ ತಿಷ್ಠತಃ | ದಕ್ಷಿಣಾಸ್ವಥವಾ ವಾಮಾಸ್ವನುಮೃಜ್ಯ ನಿಬನ್ಧನೀಃ ||೨೯|| ತತಃ ಕವಲಿಕಾಂ ದತ್ತ್ವಾ ವೇಷ್ಟಯೇತ್ ಸುಸಮಾಹಿತಃ | ತೈಲಪೂರ್ಣೇ ಕಟಾಹೇ ವಾ ದ್ರೋಣ್ಯಾಂ ವಾ ಶಾಯಯೇನ್ನರಮ್ ||೩೦||

Adhikarana 27 (31) · Śloka 31

ಮುಸಲೇನೋತ್ಕ್ಷಿಪೇತ್ ಕಕ್ಷಾಮಂಸಸನ್ಧೌ ವಿಸಂಹತೇ | ಸ್ಥಾನಸ್ಥಿತಂ ಚ ಬಧ್ನೀಯಾತ್ ಸ್ವಸ್ತಿಕೇನ ವಿಚಕ್ಷಣಃ ||೩೧||

Adhikarana 28 (32) · Śloka 33

ಕೌರ್ಪರಂ ತು ತಥಾ ಸನ್ಧಿಮಙ್ಗುಷ್ಠೇನಾನುಮಾರ್ಜಯೇತ್ | ಅನುಮೃಜ್ಯ ತತಃ ಸನ್ಧಿಂ ಪೀಡಯೇತ್ ಕೂರ್ಪರಾಚ್ಚ್ಯುತಮ್ ||೩೨|| ಪ್ರಸಾರ್ಯಾಕುಞ್ಚಯೇಚ್ಚೈನಂ ಸ್ನೇಹಸೇಕಂ ಚ ದಾಪಯೇತ್ |೩೩|

Adhikarana 29 (33) · Śloka 33

ಏವಂ ಜಾನುನಿ ಗುಲ್ಫೇ ಚ ಮಣಿಬನ್ಧೇ ಚ ಕಾರಯೇತ್ ||೩೩||

Adhikarana 30 (34-35) · Śloka 35

ಉಭೇ ತಲೇ ಸಮೇ ಕೃತ್ವಾ ತಲಭಗ್ನಸ್ಯ ದೇಹಿನಃ | ಬಧ್ನೀಯಾದಾಮತೈಲೇನ ಪರಿಷೇಕಂ ಚ ಕಾರಯೇತ್ ||೩೪|| ಮೃತ್ಪಿಣ್ಡಂ ಧಾರಯೇತ್ ಪೂರ್ವಂ ಲವಣಂ ಚ ತತಃ ಪರಮ್ | ಹಸ್ತೇ ಜಾತಬಲೇ ಚಾಪಿ ಕುರ್ಯಾತ್ ಪಾಷಾಣಧಾರಣಮ್ ||೩೫||

Adhikarana 31 (36) · Śloka 36

ಸನ್ನಮುನ್ನಮಯೇತ್ ಸ್ವಿನ್ನಮಕ್ಷಕಂ ಮುಸಲೇನ ತು | ತಥೋನ್ನತಂ ಪೀಡಯೇಚ್ಚ ಬಧ್ನೀಯಾದ್ಗಾಢಮೇವ ಚ ||೩೬||

Adhikarana 32 (37) · Śloka 37

ಊರುವಚ್ಚಾಪಿ ಕರ್ತವ್ಯಂ ಬಾಹುಭಗ್ನಚಿಕಿತ್ಸಿತಮ್ |೩೭|

Adhikarana 33 (37-38) · Śloka 39

ಗ್ರೀವಾಯಾಂ ತು ವಿವೃತ್ತಾಯಾಂ ಪ್ರವಿಷ್ಟಾಯಾಮಧೋಽಪಿ ವಾ ||೩೭|| ಅವಟಾವಥ ಹನ್ವೋಶ್ಚ ಪ್ರಗೃಹ್ಯೋನ್ನಮಯೇನ್ನರಮ್ | ತತಃ ಕುಶಾಂ ಸಮಂ ದತ್ತ್ವಾ ವಸ್ತ್ರಪಟ್ಟೇನ ವೇಷ್ಟಯೇತ್ ||೩೮|| ಉತ್ತಾನಂ ಶಾಯಯೇಚ್ಚೈನಂ ಸಪ್ತರಾತ್ರಮತನ್ದ್ರಿತಃ |೩೯|

Adhikarana 34 (39-40) · Śloka 40

ಹನ್ವಸ್ಥಿನೀ ಸಮಾನೀಯ ಹನುಸನ್ಧೌ ವಿಸಂಹತೇ ||೩೯|| ಸ್ವೇದಯಿತ್ವಾ ಸ್ಥಿತೇ ಸಮ್ಯಕ್ ಪಞ್ಚಾಙ್ಗೀಂ ವಿತರೇದ್ಭಿಷಕ್ | ವಾತಘ್ನಮಧುರೈಃ ಸರ್ಪಿಃ ಸಿದ್ಧಂ ನಸ್ಯೇ ಚ ಪೂಜಿತಮ್ ||೪೦||

Adhikarana 35 (41-42) · Śloka 43

ಅಭಗ್ನಾಂಶ್ಚಲಿತಾನ್ ದನ್ತಾನ್ ಸರಕ್ತಾನವಪೀಡಯೇತ್ | ತರುಣಸ್ಯ ಮನುಷ್ಯಸ್ಯ ಶೀತೈರಾಲೇಪಯೇದ್ಬಹಿಃ ||೪೧|| ಸಿಕ್ತ್ವಾಽಮ್ಬುಭಿಸ್ತತಃ ಶೀತೈಃ ಸನ್ಧಾನೀಯೈರುಪಾಚರೇತ್ | ಉತ್ಪಲಸ್ಯ ಚ ನಾಲೇನ ಕ್ಷೀರಪಾನಂ ವಿಧೀಯತೇ ||೪೨|| ಜೀರ್ಣಸ್ಯ ತು ಮನುಷ್ಯಸ್ಯ ವರ್ಜಯೇಚ್ಚಲಿತಾನ್ ದ್ವಿಜಾನ್ |೪೩|

Adhikarana 36 (43-44) · Śloka 44

ನಾಸಾಂ ಸನ್ನಾಂ ವಿವೃತ್ತಾಂ ವಾ ಋಜ್ವೀಂ ಕೃತ್ವಾ ಶಲಾಕಯಾ ||೪೩|| ಪೃಥಙ್ಗಾಸಿಕಯೋರ್ನಾಡ್ಯೌ ದ್ವಿಮುಖ್ಯೌ ಸಮ್ಪ್ರವೇಶಯೇತ್ | ತತಃ ಪಟ್ಟೇನ ಸಂವೇಷ್ಟ್ಯ ಘೃತಸೇಕಂ ಪ್ರದಾಪಯೇತ್ ||೪೪||

Adhikarana 37 (45) · Śloka 45

ಭಗ್ನಂ ಕರ್ಣಂ ತು ಬಧ್ನೀಯಾತ್ ಸಮಂ ಕೃತ್ವಾ ಘೃತಪ್ಲುತಮ್ | ಸದ್ಯಃಕ್ಷತವಿಧಾನಂ ಚ ತತಃ ಪಶ್ಚಾತ್ ಸಮಾಚರೇತ್ ||೪೫||

Adhikarana 38 (46) · Śloka 46

ಮಸ್ತುಲುಙ್ಗಾದ್ವಿನಾ ಭಿನ್ನೇ ಕಪಾಲೇ ಮಧುಸರ್ಪಿಷೀ | ದತ್ತ್ವಾ ತತೋ ನಿಬಧ್ನೀಯಾತ್ ಸಪ್ತಾಹಂ ಚ ಪಿಬೇದ್ಧೃತಮ್ ||೪೬||

Adhikarana 39 (47) · Śloka 47

ಪತನಾದಭಿಘಾತಾದ್ವಾ ಶೂನಮಙ್ಗಂ ಯದಕ್ಷತಮ್ | ಶೀತಾನ್ ಪ್ರದೇಹಾನ್ ಸೇಕಾಂಶ್ಚ ಭಿಷಕ್ ತಸ್ಯಾವಚಾರಯೇತ್ ||೪೭||

Adhikarana 40 (48-49) · Śloka 49

ಅಥ ಜಙ್ಘೋರುಭಗ್ನಾನಾಂ ಕಪಾಟಶಯನಂ ಹಿತಮ್ | ಕೀಲಕಾ ಬನ್ಧನಾರ್ಥಂ ಚ ಪಞ್ಚ ಕಾರ್ಯಾ ವಿಜಾನತಾ ||೪೮|| ಯಥಾ ನ ಚಲನಂ ತಸ್ಯ ಭಗ್ನಸ್ಯ ಕ್ರಿಯತೇ ತಥಾ | ಸನ್ಧೇರುಭಯತೋ ದ್ವೌ ದ್ವೌ ತಲೇ ಚೈಕಶ್ಚ ಕೀಲಕಃ ||೪೯||

Adhikarana 41 (50) · Śloka 50

ಶ್ರೋಣ್ಯಾಂ ವಾ ಪೃಷ್ಠವಂಶೇ ವಾ ವಕ್ಷಸ್ಯಕ್ಷಕಯೋಸ್ತಥಾ | ಭಗ್ನಸನ್ಧಿವಿಮೋಕ್ಷೇಷು ವಿಧಿಮೇನಂ ಸಮಾಚರೇತ್ ||೫೦||

Adhikarana 42 (51) · Śloka 51

ಸನ್ಧೀಂಶ್ಚಿರವಿಮುಕ್ತಾಂಸ್ತು ಸ್ನಿಗ್ಧಾನ್ ಸ್ವಿನ್ನಾನ್ ಮೃದೂಕೃತಾನ್ ಉಕ್ತೈರ್ವಿಧಾನೈರ್ಬುದ್ಧ್ಯಾ ಚ ಸಮ್ಯಕ್ ಪ್ರಕೃತಿಮಾನಯೇತ್ ||೫೧||

Adhikarana 43 (52) · Śloka 52

ಕಾಣ್ಡಭಗ್ನೇ ಪ್ರರೂಢೇ ತು ವಿಷಮೋಲ್ಬಣಸಂಹಿತೇ | ಆಪೋಥ್ಯ ಸಮಯೇದ್ಭಗ್ನಂ ತತೋ ಭಗ್ನವದಾಚರೇತ್ ||೫೨||

Adhikarana 44 (53) · Śloka 53

ಕಲ್ಪಯೇನ್ನಿರ್ಗತಂ ಶುಷ್ಕ್ರಂ ವ್ರಣಾನ್ತೇಽಸ್ಥಿ ಸಮಾಹಿತಃ | ಸನ್ಧ್ಯನ್ತೇ ವಾ ಕ್ರಿಯಾಂ ಕುರ್ಯಾತ್ ಸವ್ರಣೇ ವ್ರಣಭಗ್ನವತ್ ||೫೩||

Adhikarana 45 (54) · Śloka 54

ಊರ್ಧ್ವಕಾಯೇ ತು ಭಗ್ನಾನಾಂ ಮಸ್ತಿಷ್ಕ್ಯಂ ಕರ್ಣಪೂರಣಮ್ | ಘೃತಪಾನಂ ಹಿತಂ ನಸ್ಯಂ ಪ್ರಶಾಖಾಸ್ವನುವಾಸನಮ್ ||೫೪||

Adhikarana 46 (55-66) · Śloka 66

ಅತ ಊರ್ಧ್ವಂ ಪ್ರವಕ್ಷ್ಯಾಮಿ ತೈಲಂ ಭಗ್ನಪ್ರಸಾಧಕಮ್ | ರಾತ್ರೌ ರಾತ್ರೌ ತಿಲಾನ್ ಕೃಷ್ಣಾನ್ ವಾಸಯೇದಸ್ಥಿರೇ ಜಲೇ ||೫೫|| ದಿವಾ ದಿವಾ ಶೋಷಯಿತ್ವಾ ಗವಾಂ ಕ್ಷೀರೇಣ ಭಾವಯೇತ್ | ತೃತೀಯಂ ಸಪ್ತರಾತ್ರಂ ತು ಭಾವಯೇನ್ಮಧುಕಾಮ್ಬುನಾ ||೫೬|| ತತಃ ಕ್ಷೀರಂ ಪುನಃ ಪೀತಾನ್ ಸುಶುಷ್ಕಾಂಶ್ಚೂರ್ಣಯೇದ್ಭಿಷಕ್ | ಕಾಕೋಲ್ಯಾದಿಂ ಸಯಷ್ಟ್ಯಾಹ್ವಂ ಮಞ್ಜಿಷ್ಠಾಂ ಸಾರಿವಾಂ ತಥಾ ||೫೭|| ಕುಷ್ಠಂ ಸರ್ಜರಸಂ ಮಾಂಸೀಂ ಸುರದಾರು ಸಚನ್ದನಮ್ | ಶತಪುಷ್ಪಾಂ ಚ ಸಞ್ಚೂರ್ಣ್ಯ ತಿಲಚೂರ್ಣೇನ ಯೋಜಯೇತ್ ||೫೮|| ಪೀಡನಾರ್ಥಂ ಚ ಕರ್ತವ್ಯಂ ಸರ್ವಗನ್ಧಶೃತಂ ಪಯಃ | ಚತುರ್ಗುಣೇನ ಪಯಸಾ ತತ್ತೈಲಂ ವಿಪಚೇದ್ಭಿಷಕ್ ||೫೯|| ಏಲಾಮಂಶುಮತೀಂ ಪತ್ರಂ ಜೀವಕಂ ತಗರಂ ತಥಾ | ರೋಧ್ರಂ ಪ್ರಪೌಣ್ಡರೀಕಂ ಚ ತಥಾ ಕಾಲಾನುಸಾರಿ(ವಾ)ಣಮ್ ||೬೦|| ಸೈರೇಯಕಂ ಕ್ಷೀರಶುಕ್ಲಾಮನನ್ತಾಂ ಸಮಧೂಲಿಕಾಮ್ | ಪಿಷ್ಟ್ವಾ ಶೃಙ್ಗಾಟಕಂ ಚೈವ ಪೂರ್ವೋಕ್ತಾನ್ಯೌಷಧಾನಿ ಚ ||೬೧|| ಏಭಿಸ್ತದ್ವಿಪಚೇತ್ತೈಲಂ ಶಾಸ್ತ್ರವಿನ್ಮೃದುನಾಽಗ್ನಿನಾ | ಏತತ್ತೈಲಂ ಸದಾ ಪಥ್ಯಂ ಭಗ್ನಾನಾಂ ಸರ್ವಕರ್ಮಸು ||೬೨|| ಆಕ್ಷೇಪಕೇ ಪಕ್ಷಘಾತೇ ತಾಲುಶೋಷೇ ತಥಾಽರ್ದಿತೇ | ಮನ್ಯಾಸ್ತಮ್ಭೇ ಶಿರೋರೋಗೇ ಕರ್ಣಶೂಲೇ ಹನುಗ್ರಹೇ ||೬೩|| ಬಾಧಿರ್ಯೇ ತಿಮಿರೇ ಚೈವ ಯೇ ಚ ಸ್ತ್ರೀಷು ಕ್ಷಯಂ ಗತಾಃ | ಪಥ್ಯಂ ಪಾನೇ ತಥಾಽಭ್ಯಙ್ಗೇ ನಸ್ಯೇ ಬಸ್ತಿಷು ಭೋಜನೇ ||೬೪|| ಗ್ರೀವಾಸ್ಕನ್ಧೋರಸಾಂ ವೃದ್ಧಿರಮುನೈವೋಪಜಾಯತೇ | ಮುಖಂ ಚ ಪದ್ಮಪ್ರತಿಮಂ ಸಸುಗನ್ಧಿಸಮೀರಣಮ್ ||೬೫|| ಗನ್ಧತೈಲಮಿದಂ ನಾಮ್ನಾ ಸರ್ವವಾತವಿಕಾರನುತ್ | ರಾಜಾರ್ಹಮೇತತ್ ಕರ್ತವ್ಯಂ ರಾಜ್ಞಾಮೇವ ವಿಚಕ್ಷಣೈಃ ||೬೬||

Adhikarana 47 (67-68) · Śloka 68

ತ್ರಪುಸಾಕ್ಷಪ್ರಿಯಾಲಾನಾಂ ತೈಲಾನಿ ಮಧುರೈಃ ಸಹ | ವಸಾಂ ದತ್ತ್ವಾ ಯಥಾಲಾಭಂ ಕ್ಷೀರೇ ದಶಗುಣೇ ಪಚೇತ್ ||೬೭|| ಸ್ನೇಹೋತ್ತಮಮಿದಂ ಚಾಶು ಕುರ್ಯಾದ್ಭಗ್ನಪ್ರಸಾಧನಮ್ | ಪಾನಾಭ್ಯಞ್ಜನನಸ್ಯೇಷು ಬಸ್ತಿಕರ್ಮಣಿ ಸೇಚನೇ ||೬೮||

Adhikarana 48 (69) · Śloka 69

ಭಗ್ನಂ ನೈತಿ ಯಥಾಪಾಕಂ ಪ್ರಯತೇತ ತಥಾ ಭಿಷಕ್ | ಪಕ್ವಮಾಂಸಸಿರಾಸ್ನಾಯು ತದ್ಧಿ ಕೃಚ್ಛ್ರೇಣ ಸಿಧ್ಯತಿ ||೬೯||

Adhikarana 49 (70) · Śloka 70

ಭಗ್ನಂ ಸನ್ಧಿಮನಾವಿದ್ಧಮಹೀನಾಙ್ಗಮನುಲ್ಬಣಮ್ | ಸುಖಚೇಷ್ಟಾಪ್ರಚಾರಂ ಚ ಸಂಹಿತಂ ಸಮ್ಯಗಾದಿಶೇತ್ ||೭೦||

Adhikarana puShpikA · Śloka 3

ಇತಿ ಸುಶ್ರುತಸಂಹಿತಾಯಾಂ ಚಿಕಿತ್ಸಾಸ್ಥಾನೇ ಭಗ್ನಚಿಕಿತ್ಸಿತಂ ನಾಮ ತೃತೀಯೋಽಧ್ಯಾಯಃ ||೩||