Adhikarana 1 (1-3) · Śloka 3
ಅಥಾತೋ ವಿದ್ರಧೀನಾಂ ಚಿಕಿತ್ಸಿತಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨|| ಉಕ್ತಾ ವಿದ್ರಧಯಃ ಷಡ್ಯೇ ತೇಷ್ವಸಾಧ್ಯಸ್ತು ಸರ್ವಜಃ | ಶೇಷೇಷ್ವಾಮೇಷು ಕರ್ತವ್ಯಾ ತ್ವರಿತಂ ಶೋಫವತ್ ಕ್ರಿಯಾ ||೩||
अथातो विद्रधीनां चिकित्सितं व्याख्यास्यामः ||१|| यथोवाच भगवान् धन्वन्तरिः ||२|| उक्ता विद्रधयः षड्ये तेष्वसाध्यस्तु सर्वजः | शेषेष्वामेषु कर्तव्या त्वरितं शोफवत् क्रिया ||३||
🔊 Audio coming soon
Adhikarana 2 (4-9) · Śloka 9
ವಾತಘ್ನಮೂಲಕಲ್ಕೈಸ್ತು ಘೃತತೈಲವಸಾಯುತೈಃ | ಸುಖೋಷ್ಣೋ ಬಹಲೋ ಲೇಪಃ ಪ್ರಯೋಜ್ಯೋ ವಾತವಿದ್ರಧೌ ||೪|| ಸಾನೂಪೌದಕಮಾಂಸಸ್ತು ಕಾಕೋಲ್ಯಾದಿಃ ಸತರ್ಪಣಃ | ಸ್ನೇಹಾಮ್ಲಸಿದ್ಧೋ ಲವಣಃ ಪ್ರಯೋಜ್ಯಶ್ಚೋಪನಾಹನೇ ||೫|| ವೇಶವಾರೈಃ ಸಕೃಶರೈಃ ಪಯೋಭಿಃ ಪಾಯಸೈಸ್ತಥಾ | ಸ್ವೇದಯೇತ್ ಸತತಂ ಚಾಪಿ ನಿರ್ಹರೇಚ್ಚಾಪಿ ಶೋಣಿತಮ್ ||೬|| ಸ ಚೇದೇವಮುಪಕ್ರಾನ್ತಃ ಪಾಕಾಯಾಭಿಮುಖೋ ಯದಿ | ತಂ ಪಾಚಯಿತ್ವಾ ಶಸ್ತ್ರೇಣ ಭಿನ್ದ್ಯಾದ್ಭಿನ್ನಂ ಚ ಶೋಧಯೇತ್ ||೭|| ಪಞ್ಚಮೂಲಕಷಾಯೇಣ ಪ್ರಕ್ಷಾಲ್ಯ ಲವಣೋತ್ತರೈಃ | ತೈಲೈರ್ಭದ್ರಾದಿಮಧುಕಸಂಯುಕ್ತೈಃ ಪ್ರತಿಪೂರಯೇತ್ ||೮|| ವೈರೇಚನಿಕಯುಕ್ತೇನ ತ್ರೈವೃತೇನ ವಿಶೋಧ್ಯ ಚ | ಪೃಥಕ್ಪರ್ಣ್ಯಾದಿಸಿದ್ಧೇನ ತ್ರೈವೃತೇನ ಚ ರೋಪಯೇತ್ ||೯||
वातघ्नमूलकल्कैस्तु घृततैलवसायुतैः | सुखोष्णो बहलो लेपः प्रयोज्यो वातविद्रधौ ||४|| सानूपौदकमांसस्तु काकोल्यादिः सतर्पणः | स्नेहाम्लसिद्धो लवणः प्रयोज्यश्चोपनाहने ||५|| वेशवारैः सकृशरैः पयोभिः पायसैस्तथा | स्वेदयेत् सततं चापि निर्हरेच्चापि शोणितम् ||६|| स चेदेवमुपक्रान्तः पाकायाभिमुखो यदि | तं पाचयित्वा शस्त्रेण भिन्द्याद्भिन्नं च शोधयेत् ||७|| पञ्चमूलकषायेण प्रक्षाल्य लवणोत्तरैः | तैलैर्भद्रादिमधुकसंयुक्तैः प्रतिपूरयेत् ||८|| वैरेचनिकयुक्तेन त्रैवृतेन विशोध्य च | पृथक्पर्ण्यादिसिद्धेन त्रैवृतेन च रोपयेत् ||९||
🔊 Audio coming soon
Adhikarana 3 (10-15) · Śloka 16
ಪೈತ್ತಿಕಂ ಶರ್ಕರಾಲಾಜಾಮಧುಕೈಃ ಸಾರಿವಾಯುತೈಃ | ಪ್ರದಿಹ್ಯಾತ್ ಕ್ಷೀರಪಿಷ್ಟೈರ್ವಾ ಪಯಸ್ಯೋಶೀರಚನ್ದನೈಃ ||೧೦|| ಪಾಕ್ಯೈಃ ಶೀತಕಷಾಯೈರ್ವಾ ಕ್ಷೀರೈರಿಕ್ಷುರಸೈಸ್ತಥಾ | ಜೀವನೀಯಘೃತೈರ್ವಾಽಪಿ ಸೇಚಯೇರ್ಚ್ಛ್ಕರಾಯುತೈಃ ||೧೧|| ತ್ರಿವೃದ್ಧರೀತಕೀನಾಂ ಚ ಚೂರ್ಣಂ ಲಿಹ್ಯಾನ್ಮಧುದ್ರವಮ್ | ಜಲೌಕೋಭಿರ್ಹರೇಚ್ಚಾಸೃಕ್ ಪಕ್ವಂ ಚಾಪಾಟ್ಯ ಬುದ್ಧಿಮಾನ್ ||೧೨|| ಕ್ಷೀರವೃಕ್ಷಕಷಾಯೇಣ ಪ್ರಕ್ಷಾಲ್ಯೌದಕಜೇನ ವಾ | ತಿಲೈಃ ಸಯಷ್ಟೀಮಧುಕೈಃ ಸಕ್ಷೌದ್ರೈಃ ಸರ್ಪಿಷಾ ಯುತೈಃ ||೧೩|| ಉಪದಿಹ್ಯ ಪ್ರತನುನಾ ವಾಸಸಾ ವೇಷ್ಟಯೇದ್ವ್ರಣಮ್ | ಪ್ರಪೌಣ್ಡರೀಕಮಞ್ಜಿಷ್ಠಾಮಧುಕೋಶೀರಪದ್ಮಕೈಃ ||೧೪|| ಸಹರಿದ್ರೈಃ ಕೃತಂ ಸರ್ಪಿಃ ಸಕ್ಷೀರಂ ವ್ರಣರೋಪಣಮ್ | ಕ್ಷೀರಶುಕ್ಲಾಪೃಥಕ್ಪರ್ಣೀಸಮಙ್ಗಾರೋಧ್ರಚನ್ದನೈಃ ||೧೫|| ನ್ಯಗ್ರೋಧಾದಿಪ್ರವಾಲೇಷು ತೇಷಾಂ ತ್ವಕ್ಷ್ವಥವಾ ಕೃತಮ್ |೧೬|
पैत्तिकं शर्करालाजामधुकैः सारिवायुतैः | प्रदिह्यात् क्षीरपिष्टैर्वा पयस्योशीरचन्दनैः ||१०|| पाक्यैः शीतकषायैर्वा क्षीरैरिक्षुरसैस्तथा | जीवनीयघृतैर्वाऽपि सेचयेर्च्छ्करायुतैः ||११|| त्रिवृद्धरीतकीनां च चूर्णं लिह्यान्मधुद्रवम् | जलौकोभिर्हरेच्चासृक् पक्वं चापाट्य बुद्धिमान् ||१२|| क्षीरवृक्षकषायेण प्रक्षाल्यौदकजेन वा | तिलैः सयष्टीमधुकैः सक्षौद्रैः सर्पिषा युतैः ||१३|| उपदिह्य प्रतनुना वाससा वेष्टयेद्व्रणम् | प्रपौण्डरीकमञ्जिष्ठामधुकोशीरपद्मकैः ||१४|| सहरिद्रैः कृतं सर्पिः सक्षीरं व्रणरोपणम् | क्षीरशुक्लापृथक्पर्णीसमङ्गारोध्रचन्दनैः ||१५|| न्यग्रोधादिप्रवालेषु तेषां त्वक्ष्वथवा कृतम् |१६|
🔊 Audio coming soon
Adhikarana 4 (16-21) · Śloka 22
ನಕ್ತಮಾಲಸ್ಯ ಪತ್ರಾಣಿ ತರುಣಾನಿ ಫಲಾನಿ ಚ ||೧೬|| ಸುಮನಾಯಾಶ್ಚ ಪತ್ರಾಣಿ ಪಟೋಲಾರಿಷ್ಟಯೋಸ್ತಥಾ | ದ್ವೇ ಹರಿದ್ರೇ ಮಧೂಚ್ಛಿಷ್ಟಂ ಮಧುಕಂ ತಿಕ್ತರೋಹಿಣೀ ||೧೭|| ಪ್ರಿಯಙ್ಗುಃ ಕುಶಮೂಲಂ ಚ ನಿಚುಲಸ್ಯ ತ್ವಗೇವ ಚ | ಮಞ್ಜಿಷ್ಠಾಚನ್ದನೋಶೀರಮುತ್ಪಲಂ ಸಾರಿವೇ ತ್ರಿವೃತ್ ||೧೮|| ಏತೇಷಾಂ ಕಾರ್ಷಿಕೈರ್ಭಾಗೈರ್ಘೃತಪ್ರಸ್ಥಂ ವಿಪಾಚಯೇತ್ | ದುಷ್ಟವ್ರಣಪ್ರಶಮನಂ ನಾಡೀವ್ರಣವಿಶೋಧನಮ್ ||೧೯|| ಸದ್ಯಶ್ಛಿನ್ನವ್ರಣಾನಾಂ ಚ ಕರಞ್ಜಾದ್ಯಮಿದಂ ಶುಭಮ್ | ದುಷ್ಟವ್ರಣಾಶ್ಚ ಯೇ ಕೇಚಿದ್ಯೇ ಚೋತ್ಸೃಷ್ಟಕ್ರಿಯಾ ವ್ರಣಾಃ ||೨೦|| ನಾಡ್ಯೋ ಗಮ್ಭೀರಿಕಾ ಯಾಶ್ಚ ಸದ್ಯಶ್ಛಿನ್ನಾಸ್ತಥೈವ ಚ | ಅಗ್ನಿಕ್ಷಾರಕೃತಾಶ್ಚೈವ ಯೇ ವ್ರಣಾ ದಾರುಣಾ ಅಪಿ ||೨೧|| ಕರಞ್ಜಾದ್ಯೇನ ಹವಿಷಾ ಪ್ರಶಾಮ್ಯನ್ತಿ ನ ಸಂಶಯಃ |೨೨|
नक्तमालस्य पत्राणि तरुणानि फलानि च ||१६|| सुमनायाश्च पत्राणि पटोलारिष्टयोस्तथा | द्वे हरिद्रे मधूच्छिष्टं मधुकं तिक्तरोहिणी ||१७|| प्रियङ्गुः कुशमूलं च निचुलस्य त्वगेव च | मञ्जिष्ठाचन्दनोशीरमुत्पलं सारिवे त्रिवृत् ||१८|| एतेषां कार्षिकैर्भागैर्घृतप्रस्थं विपाचयेत् | दुष्टव्रणप्रशमनं नाडीव्रणविशोधनम् ||१९|| सद्यश्छिन्नव्रणानां च करञ्जाद्यमिदं शुभम् | दुष्टव्रणाश्च ये केचिद्ये चोत्सृष्टक्रिया व्रणाः ||२०|| नाड्यो गम्भीरिका याश्च सद्यश्छिन्नास्तथैव च | अग्निक्षारकृताश्चैव ये व्रणा दारुणा अपि ||२१|| करञ्जाद्येन हविषा प्रशाम्यन्ति न संशयः |२२|
🔊 Audio coming soon
Adhikarana 5 (22-33) · Śloka 33
ಇಷ್ಟಕಾಸಿಕತಾಲೋಷ್ಟಗೋಶಕೃತ್ತುಷಪಾಂಶುಭಿಃ ||೨೨|| ಮೂತ್ರೈರುಷ್ಣೈಶ್ಚ ಸತತಂ ಸ್ವೇದಯೇಚ್ಛ್ಲೇಷ್ಮವಿದ್ರಧಿಮ್ | ಕಷಾಯಪಾನೈರ್ವಮನೈರಾಲೇಪೈರುಪನಾಹನೈಃ ||೨೩|| ಹರೇದ್ದೋಷಾನಭೀಕ್ಷ್ಣಂ ಚಾಪ್ಯಲಾಬ್ವಾಽಸೃಕ್ ತಥೈವ ಚ | ಆರಗ್ವಧಕಷಾಯೇಣ ಪಕ್ವಂ ಚಾಪಾಟ್ಯ ಧಾವಯೇತ್ ||೨೪|| ಹರಿದ್ರಾತ್ರಿವೃತಾಶಕ್ತುತಿಲೈರ್ಮಧುಸಮಾಯುತೈಃ | ಪೂರಯಿತ್ವಾ ವ್ರಣಂ ಸಮ್ಯಗ್ಬಧ್ನೀಯಾತ್ ಕೀರ್ತಿತಂ ಯಥಾ ||೨೫|| ತತಃ ಕುಲತ್ಥಿಕಾದನ್ತೀತ್ರಿವೃಚ್ಛ್ಯಾಮಾರ್ಕತಿಲ್ವಕೈಃ | ಕುರ್ಯಾತ್ತೈಲಂ ಸಗೋಮೂತ್ರಂ ಹಿತಂ ತತ್ರ ಸಸೈನ್ಧವಮ್ ||೨೬|| ಪಿತ್ತವಿದ್ರಧಿವತ್ ಸರ್ವಾಃ ಕ್ರಿಯಾ ನಿರವಶೇಷತಃ | ವಿದ್ರಧ್ಯೋಃ ಕುಶಲಃ ಕುರ್ಯಾದ್ರಕ್ತಾಗನ್ತುನಿಮಿತ್ತಯೋಃ ||೨೭|| ವರುಣಾದಿಗಣಕ್ವಾಥಮಪಕ್ವೇಽಭ್ಯನ್ತರೋತ್ಥಿತೇ | ಊಷಕಾದಿಪ್ರತೀವಾಪಂ ಪಿಬೇತ್ ಸುಖಕರಂ ನರಃ ||೨೮|| ಅನಯೋರ್ವರ್ಗಯೋಃ ಸಿದ್ಧಂ ಸರ್ಪಿರ್ವೈರೇಚನೇನ ಚ | ಅಚಿರಾದ್ವಿದ್ರಧಿಂ ಹನ್ತಿ ಪ್ರಾತಃ ಪ್ರಾತರ್ನಿಷೇವಿತಮ್ ||೨೯|| ಏಭಿರೇವ ಗಣೈಶ್ಚಾಪಿ ಸಂಸಿದ್ಧಂ ಸ್ನೇಹಸಂಯುತಮ್ | ಕಾರ್ಯಮಾಸ್ಥಾಪನಂ ಕ್ಷಿಪ್ರಂ ತಥೈವಾಪ್ಯನುವಾಸನಮ್ ||೩೦|| ಪಾನಾಲೇಪನಭೋಜ್ಯೇಷು ಮಧುಶಿಗ್ರುದ್ರುಮೋಽಪಿ ವಾ | ದತ್ತಾವಾಪೋ ಯಥಾದೋಷಮಪಕ್ವಂ ಹನ್ತಿ ವಿದ್ರಧಿಮ್ ||೩೧|| ತೋಯಧಾನ್ಯಾಮ್ಲಮೂತ್ರೈಸ್ತು ಪೇಯೋ ವಾಽಪಿ ಸುರಾದಿಭಿಃ | ಯಥಾದೋಷಗಣಕ್ವಾಥೈಃ ಪಿಬೇದ್ವಾಽಪಿ ಶಿಲಾಜತು ||೩೨|| ಪ್ರಧಾನಂ ಗುಗ್ಗುಲಂ ಚಾಪಿ ಶುಣ್ಠೀಂ ಚ ಸುರದಾರು ಚ | ಸ್ನೇಹೋಪನಾಹೌ ಕುರ್ಯಾಚ್ಚ ಸದಾ ಚಾಪ್ಯನುಲೋಮನಮ್ ||೩೩||
इष्टकासिकतालोष्टगोशकृत्तुषपांशुभिः ||२२|| मूत्रैरुष्णैश्च सततं स्वेदयेच्छ्लेष्मविद्रधिम् | कषायपानैर्वमनैरालेपैरुपनाहनैः ||२३|| हरेद्दोषानभीक्ष्णं चाप्यलाब्वाऽसृक् तथैव च | आरग्वधकषायेण पक्वं चापाट्य धावयेत् ||२४|| हरिद्रात्रिवृताशक्तुतिलैर्मधुसमायुतैः | पूरयित्वा व्रणं सम्यग्बध्नीयात् कीर्तितं यथा ||२५|| ततः कुलत्थिकादन्तीत्रिवृच्छ्यामार्कतिल्वकैः | कुर्यात्तैलं सगोमूत्रं हितं तत्र ससैन्धवम् ||२६|| पित्तविद्रधिवत् सर्वाः क्रिया निरवशेषतः | विद्रध्योः कुशलः कुर्याद्रक्तागन्तुनिमित्तयोः ||२७|| वरुणादिगणक्वाथमपक्वेऽभ्यन्तरोत्थिते | ऊषकादिप्रतीवापं पिबेत् सुखकरं नरः ||२८|| अनयोर्वर्गयोः सिद्धं सर्पिर्वैरेचनेन च | अचिराद्विद्रधिं हन्ति प्रातः प्रातर्निषेवितम् ||२९|| एभिरेव गणैश्चापि संसिद्धं स्नेहसंयुतम् | कार्यमास्थापनं क्षिप्रं तथैवाप्यनुवासनम् ||३०|| पानालेपनभोज्येषु मधुशिग्रुद्रुमोऽपि वा | दत्तावापो यथादोषमपक्वं हन्ति विद्रधिम् ||३१|| तोयधान्याम्लमूत्रैस्तु पेयो वाऽपि सुरादिभिः | यथादोषगणक्वाथैः पिबेद्वाऽपि शिलाजतु ||३२|| प्रधानं गुग्गुलं चापि शुण्ठीं च सुरदारु च | स्नेहोपनाहौ कुर्याच्च सदा चाप्यनुलोमनम् ||३३||
🔊 Audio coming soon
Adhikarana 6 (34) · Śloka 34
ಯಥೋದ್ದಿಷ್ಟಾಂ ಸಿರಾಂ ವಿಧ್ಯೇತ್ ಕಫಜೇ ವಿದ್ರಧೌ ಭಿಷಕ್ | ರಕ್ತಪಿತ್ತಾನಿಲೋತ್ಥೇಷು ಕೇಚಿದ್ಬಾಹೌ ವದನ್ತಿ ತು ||೩೪||
यथोद्दिष्टां सिरां विध्येत् कफजे विद्रधौ भिषक् | रक्तपित्तानिलोत्थेषु केचिद्बाहौ वदन्ति तु ||३४||
🔊 Audio coming soon
Adhikarana 7 (35-37) · Śloka 38
ಪಕ್ವಂ ವಾ ಬಹಿರುನ್ನದ್ಧಂ ಭಿತ್ತ್ವಾ ವ್ರಣವದಾಚರೇತ್ | ಸ್ರುತೇಷೂರ್ಧ್ವಮಧೋ ವಾಽಪಿ ಮೈರೇಯಾಮ್ಲಸುರಾಸವೈಃ ||೩೫|| ಪೇಯೋ ವರುಣಕಾದಿಸ್ತು ಮಧುಶಿಗ್ರುದ್ರುಮೋಽಪಿ ವಾ | ಶಿಗ್ರುಮೂಲಜಲೇ ಸಿದ್ಧಂ ಸಸಿದ್ಧಾರ್ಥಕಮೋದನಮ್ ||೩೬|| ಯವಕೋಲಕುಲತ್ಥಾನಾಂ ಯೂಷೈರ್ಭುಞ್ಜೀತ ಮಾನವಃ | ಪ್ರಾತಃ ಪ್ರಾತಶ್ಚ ಸೇವೇತ ಮಾತ್ರಯಾ ತೈಲ್ವಕಂ ಘೃತಮ್ ||೩೭|| ತ್ರಿವೃತಾದಿಗಣಕ್ವಾಥಸಿದ್ಧಂ ವಾಽಪ್ಯುಪಶಾನ್ತಯೇ |೩೮|
पक्वं वा बहिरुन्नद्धं भित्त्वा व्रणवदाचरेत् | स्रुतेषूर्ध्वमधो वाऽपि मैरेयाम्लसुरासवैः ||३५|| पेयो वरुणकादिस्तु मधुशिग्रुद्रुमोऽपि वा | शिग्रुमूलजले सिद्धं ससिद्धार्थकमोदनम् ||३६|| यवकोलकुलत्थानां यूषैर्भुञ्जीत मानवः | प्रातः प्रातश्च सेवेत मात्रया तैल्वकं घृतम् ||३७|| त्रिवृतादिगणक्वाथसिद्धं वाऽप्युपशान्तये |३८|
🔊 Audio coming soon
Adhikarana 8 (38) · Śloka 39
ನೋಪಗಚ್ಛೇದ್ಯಥಾಪಾಕಂ ಪ್ರಯತೇತ ತಥಾ ಭಿಷಕ್ ||೩೮|| ಪರ್ಯಾಗತೇ ವಿದ್ರಧೌ ತು ಸಿದ್ಧಿರ್ನೈಕಾನ್ತಿಕೀ ಸ್ಮೃತಾ |೩೯|
नोपगच्छेद्यथापाकं प्रयतेत तथा भिषक् ||३८|| पर्यागते विद्रधौ तु सिद्धिर्नैकान्तिकी स्मृता |३९|
🔊 Audio coming soon
Adhikarana 9 (39-43) · Śloka 43
ಪ್ರತ್ಯಾಖ್ಯಾಯ ತು ಕುರ್ವೀತ ಮಜ್ಜಜಾತೇ ತು ವಿದ್ರಧೌ ||೩೯|| ಸ್ನೇಹಸ್ವೇದೋಪಪನ್ನಾನಾಂ ಕುರ್ಯಾದ್ರಕ್ತಾವಸೇಚನಮ್ | ವಿದ್ರಧ್ಯುಕ್ತಾಂ ಕ್ರಿಯಾಂ ಕುರ್ಯಾತ್ ಪಕ್ವೇ ವಾಽಸ್ಥಿ ತು ಭೇದಯೇತ್ ||೪೦|| ನಿಃಶಲ್ಯಮಥ ವಿಜ್ಞಾಯ ಕರ್ತವ್ಯಂ ವ್ರಣಶೋಧನಮ್ | ಧಾವೇತ್ತಿಕ್ತಕಷಾಯೇಣ ತಿಕ್ತಂ ಸರ್ಪಿಸ್ತಥಾ ಹಿತಮ್ ||೪೧|| ಯದಿ ಮಜ್ಜಪರಿಸ್ರಾವೋ ನ ನಿವರ್ತೇತ ದೇಹಿನಃ | ಕುರ್ಯಾತ್ ಸಂಶೋಧನೀಯಾನಿ ಕಷಾಯಾದೀನಿ ಬುದ್ಧಿಮಾನ್ ||೪೨|| ಪ್ರಿಯಙ್ಗುಧಾತಕೀರೋಧ್ರಕಟ್ಫಲಂ ತಿನಿಸೈನ್ಧವಮ್ | ಏತೈಸ್ತೈಲಂ ವಿಪಕ್ತವ್ಯಂ ವಿದ್ರಧಿವ್ರಣರೋಪಣಮ್ ||೪೩||
प्रत्याख्याय तु कुर्वीत मज्जजाते तु विद्रधौ ||३९|| स्नेहस्वेदोपपन्नानां कुर्याद्रक्तावसेचनम् | विद्रध्युक्तां क्रियां कुर्यात् पक्वे वाऽस्थि तु भेदयेत् ||४०|| निःशल्यमथ विज्ञाय कर्तव्यं व्रणशोधनम् | धावेत्तिक्तकषायेण तिक्तं सर्पिस्तथा हितम् ||४१|| यदि मज्जपरिस्रावो न निवर्तेत देहिनः | कुर्यात् संशोधनीयानि कषायादीनि बुद्धिमान् ||४२|| प्रियङ्गुधातकीरोध्रकट्फलं तिनिसैन्धवम् | एतैस्तैलं विपक्तव्यं विद्रधिव्रणरोपणम् ||४३||
🔊 Audio coming soon
Adhikarana puShpikA · Śloka 16
ಇತಿ ಸುಶ್ರುತಸಂಹಿತಾಯಾಂ ಚಿಕಿತ್ಸಾಸ್ಥಾನೇ ವಿದ್ರಧಿಚಿಕಿತ್ಸಿತಂ ನಾಮ ಷೋಡಶೋಽಧ್ಯಾಯಃ ||೧೬||
इति सुश्रुतसंहितायां चिकित्सास्थाने विद्रधिचिकित्सितं नाम षोडशोऽध्यायः ||१६||
🔊 Audio coming soon