14. śōṇitavarṇanīyādhyāyaḥ

Adhikarana 1 (1-2) · Śloka 2

ಅಥಾತಃ ಶೋಣಿತವರ್ಣನೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ತತ್ರ ಪಾಞ್ಚಭೌತಿಕಸ್ಯ ಚತುರ್ವಿಧಸ್ಯ ಷಡ್ರಸಸ್ಯ ದ್ವಿವಿಧವೀರ್ಯಸ್ಯಾಷ್ಟವಿಧವೀರ್ಯಸ್ಯ ವಾಽನೇಕಗುಣಸ್ಯೋಪಯುಕ್ತಸ್ಯಾಹಾರಸ್ಯ ಸಮ್ಯಕ್ಪರಿಣತಸ್ಯ ಯಸ್ತೇಜೋಭೂತಃ ಸಾರಃ ಪರಮಸೂಕ್ಷ್ಮಃ ಸ `ರಸಃ’ ಇತ್ಯುಚ್ಯತೇ, ತಸ್ಯ ಹೃದಯಂ ಸ್ಥಾನಂ, ಸ ಹೃದಯಾಚ್ಚತುರ್ವಿಂಶತಿಧಮನೀರನುಪ್ರವಿಶ್ಯೋರ್ಧ್ವಗಾದಶ ದಶಾಧೋಗಾಮಿನ್ಯಶ್ಚತಸ್ರಶ್ಚ ತಿರ್ಯಗ್ಗಾಃ ಕೃತ್ಸ್ನಂ ಶರೀರಮಹರಹಸ್ತರ್ಪಯತಿ ವರ್ಧಯತಿ ಧಾರಯತಿ ಯಾಪಯತಿ ಚಾದೃಷ್ಟಹೇತುಕೇನ ಕರ್ಮಣಾ | ತಸ್ಯ ಶರೀರಮನುಸರತೋಽನುಮಾನಾದ್ಗತಿರುಪಲಕ್ಷಯಿತವ್ಯಾ ಕ್ಷಯವೃದ್ಧಿವೈಕೃತೈಃ | ತಸ್ಮಿನ್ ಸರ್ವಶರೀರಾವಯವದೋಷಧಾತುಮಲಾಶಯಾನುಸಾರಿಣಿ ರಸೇ ಜಿಜ್ಞಾಸಾ- ಕಿಮಯಂ ಸೌಮ್ಯಸ್ತೈಜಸ? ಇತಿ | ಅತ್ರೋಚ್ಯತೇ- ಸ ಖಲು ದ್ರವಾನುಸಾರೀ ಸ್ನೇಹನಜೀವನತರ್ಪಣಧಾರಣಾದಿಭಿರ್ವಿಶೇಷೈಃ ಸೌಮ್ಯ ಇತ್ಯವಗಮ್ಯತೇ ||೩||

Adhikarana 3 (4) · Śloka 4

ಸ ಖಲ್ವಾಪ್ಯೋ ರಸೋ ಯಕೃತ್ಪ್ಲೀಹಾನೌ ಪ್ರಾಪ್ಯ ರಾಗಮುಪೈತಿ ||೪||

Adhikarana 4 (5) · Śloka 5

ಶ್ಲೋಕೌ ಚಾತ್ರ ಭವತಃ- ರಞ್ಜಿತಾಸ್ತೇಜಸಾ ತ್ವಾಪಃ ಶರೀರಸ್ಥೇನ ದೇಹಿನಾಮ್ | ಅವ್ಯಾಪನ್ನಾಃ ಪ್ರಸನ್ನೇನ ರಕ್ತಮಿತ್ಯಭಿಧೀಯತೇ ||೫||

Adhikarana 5 (6) · Śloka 6

ರಸಾದೇವ ಸ್ತ್ರಿಯಾ ರಕ್ತಂ ರಜಃಸಞ್ಜ್ಞಂ ಪ್ರವರ್ತತೇ | ತದ್ವರ್ಷಾದ್ದ್ವಾದಶಾದೂರ್ಧ್ವಂ ಯಾತಿ ಪಞ್ಚಾಶತಃ ಕ್ಷಯಮ್ ||೬||

Adhikarana 6 (7) · Śloka 7

ಆರ್ತವಂ ಶೋಣಿತಂ ತ್ವಾಗ್ನೇಯಮ್, ಅಗ್ನೀಷೋಮೀಯತ್ವಾದ್ಗರ್ಭಸ್ಯ ||೭||

Adhikarana 7 (8) · Śloka 8

ಪಾಞ್ಚಭೌತಿಕಂ ತ್ವಪರೇ ಜೀವರಕ್ತಮಾಹುರಾಚಾರ್ಯಾಃ ||೮||

Adhikarana 8 (9) · Śloka 9

ವಿಸ್ರತಾ ದ್ರವತಾ ರಾಗಃ ಸ್ಪನ್ದನಂ ಲಘುತಾ ತಥಾ | ಭೂಮ್ಯಾದೀನಾಂ ಗುಣಾ ಹ್ಯೇತೇ ದೃಶ್ಯನ್ತೇ ಚಾತ್ರ ಶೋಣಿತೇ ||೯||

Adhikarana 9 (10) · Śloka 10

ರಸಾದ್ರಕ್ತಂ ತತೋ ಮಾಂಸಂ ಮಾಂಸಾನ್ಮೇದಃ ಪ್ರಜಾಯತೇ | ಮೇದಸೋಽಸ್ಥಿ ತತೋ ಮಜ್ಜಾ ಮಜ್ಜ್ಞಃ ಶುಕ್ರಂ ತು ಜಾಯತೇ ||೧೦||

Adhikarana 10 (11-12) · Śloka 12

ತತ್ರೈತೇಷಾಂ ಧಾತೂನಾಮನ್ನಪಾನರಸಃ ಪ್ರೀಣಯಿತಾ ||೧೧|| ರಸಜಂ ಪುರುಷಂ ವಿದ್ಯಾದ್ರಸಂ ರಕ್ಷೇತ್ ಪ್ರಯತ್ನತಃ | ಅನ್ನಾತ್ಪಾನಾಞ್ಚ ಮತಿಮಾನಾಚಾರಾಞ್ಚಾಪ್ಯತನ್ದ್ರಿತಃ ||೧೨||

Adhikarana 11 (13) · Śloka 13

ತತ್ರ ‘ರಸ’ ಗತೌ ಧಾತುಃ, ಅಹರಹರ್ಗಚ್ಛತೀತ್ಯತೋ ರಸಃ ||೧೩||

Adhikarana 12 (14-15) · Śloka 15

ಸ ಖಲು ತ್ರೀಣಿ ತ್ರೀಣಿ ಕಲಾಸಹಸ್ರಾಣಿ ಪಞ್ಚದಶ ಚ ಕಲಾ ಏಕೈಕಸ್ಮಿನ್ ಧಾತಾವವತಿಷ್ಠತೇ; ಏವಂ ಮಾಸೇನ ರಸಃ ಶುಕ್ರಂ ಸ್ತ್ರೀಣಾಂ ಚಾರ್ತವಂ ಭವತಿ ||೧೪|| ಭವತಿ ಚಾತ್ರ- ಅಷ್ಟಾದಶಸಹಸ್ರಾಣಿ ಸಙ್ಖ್ಯಾ ಹ್ಯಸ್ಮಿನ್ ಸಮುಚ್ಚಯೇ | ಕಲಾನಾಂ ನವತಿಃ ಪ್ರೋಕ್ತಾ ಸ್ವತನ್ತ್ರಪರತನ್ತ್ರಯೋಃ ||೧೫||

Adhikarana 13 (16) · Śloka 16

ಸ ಶಬ್ದಾರ್ಚಿರ್ಜಲಸನ್ತಾನವದಣುನಾ ವಿಶೇಷೇಣಾನುಧಾವತ್ಯೇವಂ ಶರೀರಂ ಕೇವಲಮ್ ||೧೬||

Adhikarana 14 (17) · Śloka 17

ವಾಜೀಕರಣ್ಯಸ್ತ್ವೋಷಧಯಃ ಸ್ವಬಲಗುಣೋತ್ಕರ್ಷಾದ್ವಿರೇಚನವದುಪಯುಕ್ತಾಃ ಶುಕ್ರಂ ಶೀಘ್ರಂ ವಿರೇಚಯನ್ತಿ ||೧೭||

Adhikarana 15 (18) · Śloka 18

ಯಥಾಹಿ ಪುಷ್ಪಮುಕುಲಸ್ಥೋ ಗನ್ಧೋ ನ ಶಕ್ಯಮಿಹಾಸ್ತೀತಿ ವಕ್ತುಂ, ನೈವ ನಾಸ್ತೀತಿ; ಅಥ ಚಾಸ್ತಿ, ಸತಾಂ ಭಾವಾನಾಮಭಿವ್ಯಕ್ತಿರಿತಿ ಜ್ಞಾತ್ವಾ , ಕೇವಲಂ ಸೌಕ್ಷ್ಮ್ಯಾನ್ನಾಭಿವ್ಯಜ್ಯತೇ; ಸ ಏವ ವಿವೃತಪತ್ರಕೇಶರೇ ಪುಷ್ಪೇ ಕಾಲಾನ್ತರೇಣಾಭಿವ್ಯಕ್ತಿಂ ಗಚ್ಛತಿ; ಏವಂ ಬಾಲಾನಾಮಪಿ ವಯಃಪರಿಣಾಮಾಚ್ಛುಕ್ರಪ್ರಾದುರ್ಭಾವೋ ಭವತಿ, ರೋಮರಾಜ್ಯಾದಯಶ್ಚ ವಿಶೇಷಾ ನಾರೀಣಾಮ್ ||೧೮||

Adhikarana 16 (19) · Śloka 19

ಸ ಏವಾನ್ನರಸೋ ವೃದ್ಧಾನಾಂ (ಜರಾ) ಪರಿಪಕ್ವಶರೀರತ್ವಾದಪ್ರೀಣನೋ ಭವತಿ ||೧೯||

Adhikarana 17 (20) · Śloka 20

ತ ಏತೇ ಶರೀರಧಾರಣಾದ್ಧಾತವ ಇತ್ಯುಚ್ಯನ್ತೇ ||೨೦||

Adhikarana 18 (21) · Śloka 21

ತೇಷಾಂ ಕ್ಷಯವೃದ್ಧೀ ಶೋಣಿತನಿಮಿತ್ತೇ, ತಸ್ಮಾತ್ತದಧಿಕೃತ್ಯ ವಕ್ಷ್ಯಾಮಃ | ತತ್ರ, ಫೇನಿಲಮರುಣಂ ಕೃಷ್ಣಂ ಪರುಷಂ ತನು ಶೀಘ್ರಗಮಸ್ಕನ್ದಿ ಚ ವಾತೇನ ದುಷ್ಟಂ; ನೀಲಂ ಪೀತಂ ಹರಿತಂ ಶ್ಯಾವಂ ವಿಸ್ರಮನಿಷ್ಟಂ ಪಿಪೀಲಿಕಾಮಕ್ಷಿಕಾಣಾಮಸ್ಕನ್ದಿ ಚ ಪಿತ್ತೇನ ದುಷ್ಟಂ; ಗೈರಿಕೋದಕಪ್ರತೀಕಾಶಂ ಸ್ನಿಗ್ಧಂ ಶೀತಲಂ ಬಹಲಂ ಪಿಚ್ಛಿಲಂ ಚಿರಸ್ರಾವಿ ಮಾಂಸಪೇಶೀಪ್ರಭಂ ಚ ಶ್ಲೇಷ್ಮದುಷ್ಟಂ; ಸರ್ವಲಕ್ಷಣಸಂಯುಕ್ತಂ ಕಾಞ್ಜಿಕಾಭಂ ವಿಶೇಷತೋ ದುರ್ಗನ್ಧಿ ಚ ಸನ್ನಿಪಾತದುಷ್ಟಂ; ದ್ವಿದೋಷಲಿಙ್ಗಂ ಸಂಸೃಷ್ಟಮ್ ||೨೧||

Adhikarana 19 (22) · Śloka 22

ಇನ್ದ್ರಗೋಪಕಪ್ರತೀಕಾಶಮಸಂಹತಮವಿವರ್ಣಂ ಚ ಪ್ರಕೃತಿಸ್ಥಂ ಜಾನೀಯಾತ್ ||೨೨||

Adhikarana 20 (23) · Śloka 23

ವಿಸ್ರಾವ್ಯಾಣ್ಯನ್ಯತ್ರ ವಕ್ಷ್ಯಾಮಃ ||೨೩||

Adhikarana 21 (24) · Śloka 24

ಅಥಾವಿಸ್ರಾವ್ಯಾಃ- ಸರ್ವಾಙ್ಗಶೋಫಃ, ಕ್ಷೀಣಸ್ಯ ಚಾಮ್ಲಭೋಜನನಿಮಿತ್ತಃ, ಪಾಣ್ಡುರೋಗ್ಯರ್ಶಸೋದರಿಶೋಷಿಗರ್ಭಿಣೀನಾಂ ಚ ಶ್ವಯಥವಃ ||೨೪||

Adhikarana 22 (25) · Śloka 25

ಶಸ್ತ್ರವಿಸ್ರಾವಣಂ ದ್ವಿವಿಧಂ- ಪ್ರಚ್ಛಾನಂ , ಸಿರಾವ್ಯಧನಂ ಚ ||೨೫||

Adhikarana 23 (26) · Śloka 26

ತತ್ರ, ಋಜ್ವಸಙ್ಕೀರ್ಣಂ ಸೂಕ್ಷ್ಮಂ ಸಮಮನವಗಾಢಮನುತ್ತಾನಮಾಶು ಚ ಶಸ್ತ್ರಂ ಪಾತಯೇನ್ಮರ್ಮಸಿರಾಸ್ನಾಯುಸನ್ಧೀನಾಂ ಚಾನುಪಘಾತಿ ||೨೬||

Adhikarana 24 (27-28) · Śloka 28

ತತ್ರ, ದುರ್ದಿನೇ ದುರ್ವಿದ್ಧೇ ಶೀತವಾತಯೋರಸ್ವಿನ್ನೇ ಭುಕ್ತಮಾತ್ರೇ ಸ್ಕನ್ದತ್ವಾಚ್ಛೋಣಿತಂ ನ ಸ್ರವತ್ಯಲ್ಪಂ ವಾ ಸ್ರವತಿ ||೨೭|| ಮದಮೂರ್ಚ್ಛಾಶ್ರಮಾರ್ತಾನಾಂ ವಾತವಿಣ್ಮೂತ್ರಸಙ್ಗಿನಾಮ್ | ನಿದ್ರಾಭಿಭೂತಭೀತಾನಾಂ ನೃಣಾಂ ನಾಸೃಕ್ ಪ್ರವರ್ತತೇ ||೨೮||

Adhikarana 25 (29) · Śloka 29

ತದ್ದುಷ್ಟಂ ಶೋಣಿತಮನಿರ್ಹ್ರಿಯಮಾಣಂ ಶೋಫದಾಹರಾಗಪಾಕವೇದನಾ ಜನಯೇತ್ ||೨೯||

Adhikarana 26 (30) · Śloka 30

ಅತ್ಯುಷ್ಣೇಽತಿಸ್ವಿನ್ನೇಽತಿವಿದ್ಧೇಽಜ್ಞೈರ್ವಿಸ್ರಾವಿತಮತಿಪ್ರವರ್ತತೇ ; ತದತಿಪ್ರವೃತ್ತಂ ಶಿರೋಽಭಿತಾಪಮಾನ್ಧ್ಯಮಧಿಮನ್ಥತಿಮಿರಪ್ರಾದುರ್ಭಾವಂ ಧಾತುಕ್ಷಯಮಾಕ್ಷೇಪಕಂ ದಾಹಂ ಪಕ್ಷಾಘಾತಮೇಕಾಙ್ಗವಿಕಾರಂ ಹಿಕ್ಕಾಂ ಶ್ವಾಸಕಾಸೌ ಪಾಣ್ಡುರೋಗಂ ಮರಣಂ ಚಾಪಾದಯತಿ ||೩೦||

Adhikarana 27 (31) · Śloka 31

ತಸ್ಮಾನ್ನ ಶೀತೇ ನಾತ್ಯುಷ್ಣೇ ನಾಸ್ವಿನ್ನೇ ನಾತಿತಾಪಿತೇ | ಯವಾಗೂಂ ಪ್ರತಿ ಪೀತಸ್ಯ ಶೋಣಿತಂ ಮೋಕ್ಷಯೇದ್ಭಿಷಕ್ ||೩೧||

Adhikarana 28 (32) · Śloka 32

ಸಮ್ಯಗ್ಗತ್ವಾ ಯದಾ ರಕ್ತಂ ಸ್ವಯಮೇವಾವತಿಷ್ಠತೇ | ಶುದ್ಧಂ ತದಾ ವಿಜಾನೀಯಾತ್ ಸಮ್ಯಗ್ವಿಸ್ರಾವಿತಂ ಚ ತತ್ ||೩೨||

Adhikarana 29 (33) · Śloka 33

ಲಾಘವಂ ವೇದನಾಶಾನ್ತಿರ್ವ್ಯಾಘೇರ್ವೇಗಪರಿಕ್ಷಯಃ | ಸಮ್ಯಗ್ವಿಸ್ರಾವಿತೇ ಲಿಙ್ಗಂ ಪ್ರಸಾದೋ ಮನಸಸ್ತಥಾ ||೩೩||

Adhikarana 30 (34) · Śloka 34

ತ್ವಗ್ದೋಷಾ ಗ್ರನ್ಥಯಃ ಶೋಫಾ ರೋಗಾಃ ಶೋಣಿತಜಾಶ್ಚ ಯೇ | ರಕ್ತಮೋಕ್ಷಣಶೀಲಾನಾಂ ನ ಭವನ್ತಿ ಕದಾಚನ ||೩೪||

Adhikarana 31 (35) · Śloka 35

ಅಥ ಖಲ್ವಪ್ರವರ್ತಮಾನೇ ರಕ್ತೇ ಏಲಾಶೀತಶಿವಕುಷ್ಠತಗರಪಾಠಾಭದ್ರದಾರುವಿಡಙ್ಗಚಿತ್ರಕತ್ರಿಕಟುಕಾಗಾರಧೂಮಹರಿದ್ರಾರ್ಕಾಙ್ಕುರನಕ್ತಮಾಲಫಲೈರ್ಯಥಾಲಾಭಂ ತ್ರಿಭಿಶ್ಚತುರ್ಭಿಃ ಸಮಸ್ತೈರ್ವಾ ಚೂರ್ಣೀಕೃತೈರ್ಲವಣತೈಲಪ್ರಗಾಢೈರ್ವ್ರಣಮುಖಮವಘರ್ಷಯೇತ್, ಏವಂ ಸಮ್ಯಕ್ ಪ್ರವರ್ತತೇ ||೩೫||

Adhikarana 32 (36-38) · Śloka 38

ಅಥಾತಿಪ್ರವೃತ್ತೇ ರೋಧ್ರಮಧುಕಪ್ರಿಯಙ್ಗುಪತ್ತಙ್ಗುಪತ್ತಙ್ಗಗೈರಿಕಸರ್ಜರಸರಸಾಞ್ಜನಶಾಲ್ಮಲೀಪುಷ್ಪಶಙ್ಖಶುಕ್ತಿಮಾಷಯವಗೋಧೂಮಚೂರ್ಣೈಃ ಶನೈಃ ಶನೈರ್ವ್ರಣಮುಖಮವಚೂರ್ಣ್ಯಾಙ್ಗುಲ್ಯಗ್ರೇಣಾವಪೀಡಯೇತ್ ಸಾಲಸರ್ಜಾರ್ಜುನಾರಿಮೇದಮೇಷಶೃಙ್ಗಧವಧನ್ವನತ್ವಗ್ಭಿ ರ್ವಾ ಚೂರ್ಣಿತಾಭಿಃ ಕ್ಷೌಮೇಣ ವಾ ಧ್ಮಾಪಿತೇನ ಸಮುದ್ರಫೇನಲಾಕ್ಷಾಚೂರ್ಣೈರ್ವಾ, ಯಥೋಕ್ತರ್ವ್ರಣಬನ್ಧನದ್ರವ್ಯೈರ್ಗಾಢಂ ಬಧ್ನೀಯಾತ್, ಶೀತಾಚ್ಛಾದನಭೋಜನಾಗಾರೈಃ ಶೀತೈಃ ಪ್ರದೇಹಪರಿಷೇಕೈಶ್ಚೋಪಚರೇತ್, ಕ್ಷಾರೇಣಾಗ್ನಿನಾ ವಾ ದಹೇದ್ಯಥೋಕ್ತಂ, ವ್ಯಧಾದನನ್ತರಂ ತಾಮೇವಾತಿಪ್ರವೃತ್ತಾಂ ಸಿರಾಂ ವಿಧ್ಯೇತ್; ಕಾಕೋಲ್ಯಾದಿಕ್ವಾಥಂ ವಾ ಶರ್ಕರಾಮಧುಮಧುರಂ ಪಾಯಯೇತ್, ಏಣಹರಿಣೋರಭ್ರಶಶಮಹಿಷವರಾಹಾಣಾಂ ವಾ ರುಧಿರಂ; ಕ್ಷೀರಯೂಷರಸೈಃ ಸುಸ್ನಿಗ್ಧೈಶ್ಚಾಶ್ನೀಯಾತ್; ಉಪದ್ರವಾಂಶ್ಚ ಯಥಾಸ್ವಮುಪಚರೇತ್ ||೩೬|| ಭವನ್ತಿ ಚಾತ್ರ- ಧಾತುಕ್ಷಯಾತ್ ಸ್ರುತೇ ರಕ್ತೇ ಮನ್ದಃ ಸಞ್ಜಾಯತೇಽನಲಃ | ಪವನಶ್ಚ ಪರಂ ಕೋಪಂ ಯಾತಿ ತಸ್ಮಾತ್ ಪ್ರಯತ್ನತಃ ||೩೭|| ತಂ ನಾತಿಶೀತೈರ್ಲಘುಭಿಃ ಸ್ನಿಗ್ಧೈಃ ಶೋಣಿತವರ್ಧನೈಃ | ಈಷದಮ್ಲೈರನಮ್ಲೈರ್ವಾ ಭೋಜನೈಃ ಸಮುಪಾಚರೇತ್ ||೩೮||

Adhikarana 33 (39-40) · Śloka 40

ಚತುರ್ವಿಧಂ ಯದೇತದ್ಧಿ ರುಧಿರಸ್ಯ ನಿವಾರಣಮ್ | ಸನ್ಧಾನಂ ಸ್ಕನ್ದನಂ ಚೈವ ಪಾಚನಂ ದಹನಂ ತಥಾ ||೩೯|| ವ್ರಣಂ ಕಷಾಯಃ ಸನ್ಧತ್ತೇ ರಕ್ತಂ ಸ್ಕನ್ದಯತೇ ಹಿಮಮ್ | ತಥಾ ಸಮ್ಪಾಚಯೇದ್ಭಸ್ಮ ದಾಹಃ ಸಙ್ಕೋಚಯೇತ್ ಸಿರಾಃ ||೪೦||

Adhikarana 34 (41-42) · Śloka 42

ಅಸ್ಕನ್ದಮಾನೇ ರುಧಿರೇ ಸನ್ಧಾನಾನಿ ಪ್ರಯೋಜಯೇತ್ | ಸನ್ಧಾನೇ ಭ್ರಶ್ಯಮಾನೇ ತು ಪಾಚನೈಃ ಸಮುಪಾಚರೇತ್ ||೪೧|| ಕಲ್ಪೈರೇತೈಸ್ತ್ರಿಭಿರ್ವೈದ್ಯಃ ಪ್ರಯತೇತ ಯಥಾವಿಧಿ | ಅಸಿದ್ಧಿಮತ್ಸು ಚೈತೇಷು ದಾಹಃ ಪರಮ ಇಷ್ಯತೇ ||೪೨||

Adhikarana 35 (43) · Śloka 43

ಶೇಷದೋಷೇ ಯತೋ ರಕ್ತೇ ನ ವ್ಯಾಧಿರತಿವರ್ತತೇ | ಸಾವಶೇಷೇ ತತಃ ಸ್ಥೇಯಂ ನ ತು ಕುರ್ಯಾದತಿಕ್ರಮಮ್ ||೪೩||

Adhikarana 36 (44) · Śloka 44

ದೇಹಸ್ಯ ರುಧಿರಂ ಮೂಲಂ ರುಧಿರೇಣೈವ ಧಾರ್ಯತೇ | ತಸ್ಮಾದ್ಯತ್ನೇನ ಸಂರಕ್ಷ್ಯಂ ರಕ್ತಂ ಜೀವ ಇತಿ ಸ್ಥಿತಿಃ ||೪೪||

Adhikarana 37 (45) · Śloka 45

ಸ್ರುತರಕ್ತಸ್ಯ ಸೇಕಾದ್ಯೈಃ ಶೀತೈಃ ಪ್ರಕುಪಿತೇಽನಿಲೇ | ಶೋಫಂ ಸತೋದಂ ಕೋಷ್ಣೇನ ಸರ್ಪಿಷಾ ಪರಿಷೇಚತ್ ||೪೫||

Adhikarana puShpikA · Śloka 14

ಇತಿ ಸುಶ್ರುತಸಂಹಿತಾಯಾಂ ಸೂತ್ರಸ್ಥಾನೇ ಶೋಣಿತವರ್ಣನೀಯೋ ನಾಮ ಚತುರ್ದಶೋಽಧ್ಯಾಯ ||೧೪||