60. amānuṣōpasargapratiṣēdhādhyāyaḥ

Adhikarana 1 (1-2) · Śloka 2

ಅಥಾತೋಽಮಾನುಷೋಪಸರ್ಗಪ್ರತಿಷೇಧಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ನಿಶಾಚರೇಭ್ಯೋ ರಕ್ಷ್ಯಸ್ತು ನಿತ್ಯಮೇವ ಕ್ಷತಾತುರಃ | ಇತಿ ಯತ್ ಪ್ರಾಗಭಿಹಿತಂ ವಿಸ್ತರಸ್ತಸ್ಯ ವಕ್ಷ್ಯತೇ ||೩||

Adhikarana 3 (4) · Śloka 4

ಗುಹ್ಯಾನಾಗತವಿಜ್ಞಾನಮನವಸ್ಥಾಽಸಹಿಷ್ಣುತಾ | ಕ್ರಿಯಾ ವಾಽಮಾನುಷೀ ಯಸ್ಮಿನ್ ಸಗ್ರಹಃ ಪರಿಕೀರ್ತ್ಯತೇ ||೪||

Adhikarana 4 (5) · Śloka 5

ಅಶುಚಿಂ ಭಿನ್ನಮರ್ಯಾದಂ ಕ್ಷತಂ ವ ಯದಿ ವಾಽಕ್ಷತಮ್ | ಹಿಂಸ್ಯುರ್ಹಿಂಸಾವಿಹಾರಾರ್ಥಂ ಸತ್ಕಾರಾರ್ಥಮಥಾಪಿ ವಾ ||೫||

Adhikarana 5 (6) · Śloka 6

ಅಸಙ್ಖ್ಯೇಯಾ ಗ್ರಹಗಣಾ ಗ್ರಹಾಧಿಪತಯಸ್ತು ಯೇ | ವ್ಯಜ್ಯನ್ತೇ ವಿವಿಧಾಕಾರಾ ಭಿದ್ಯನ್ತೇ ತೇ ತಥಾಽಷ್ಟಧಾ ||೬||

Adhikarana 6 (7) · Śloka 7

ದೇವಾಸ್ತಥಾ ಶತ್ರುಗಣಾಶ್ಚ ತೇಷಾಂ ಗನ್ಧರ್ವಯಕ್ಷಾಃ ಪಿತರೋ ಭುಜಙ್ಗಾಃ | ರಕ್ಷಾಂಸಿ ಯಾ ಚಾಪಿ ಪಿಶಾಚಜಾತಿರೇಷೋಽಷ್ಟಕೋ ದೇವಗಣೋ ಗ್ರಹಾಖ್ಯಃ ||೭||

Adhikarana 7 (8) · Śloka 8

ಸನ್ತುಷ್ಟಃ ಶುಚಿರಪಿ ಚೇಷ್ಟಗನ್ಧಮಾಲ್ಯೋ ನಿಸ್ತನ್ದ್ರೀ ಹ್ಯವಿತಥಸಂಸ್ಕೃತಪ್ರಭಾಷೀ | ತೇಜಸ್ವೀ ಸ್ಥಿರನಯನೋ ವರಪ್ರದಾತಾ ಬ್ರಹ್ಯಣ್ಯೋ ಭವತಿ ನರಃ ಸ ದೇವಜುಷ್ಟಃ ||೮||

Adhikarana 8 (9) · Śloka 9

ಸಂಸ್ವೇದೀ ದ್ವಿಜಗುರುದೇವದೋಷವಕ್ತಾ ಜಿಹ್ಮಾಕ್ಷೋ ವಿಗತಭಯೋ ವಿಮಾರ್ಗದೃಷ್ಟಿಃ | ಸನ್ತುಷ್ಟೋ ಭವತಿ ನ ಚಾನ್ನಪಾನಜಾತೈರ್ದುಷ್ಟಾತ್ಮಾ ಭವತಿ ಚ ದೇವಶತ್ರುಜುಷ್ಟಃ ||೯||

Adhikarana 9 (10) · Śloka 10

ಹೃಷ್ಟಾತ್ಮಾ ಪುಲಿನವನಾನ್ತರೋಪಸೇವೀ ಸ್ವಾಚಾರಃ ಪ್ರಿಯಪರಿಗೀತಗನ್ಧಮಾಲ್ಯಃ | ನೃತ್ಯನ್ ವೈ ಪ್ರಹಸತಿ ಚಾರು ಚಾಲ್ಪಶಬ್ದಂ ಗನ್ಧರ್ವಗ್ರಹಪರಿಪೀಡಿತೋ ಮನುಷ್ಯಃ ||೧೦||

Adhikarana 10 (11) · Śloka 11

ತಾಮ್ರಾಕ್ಷಃ ಪ್ರಿಯತನುರಕ್ತವಸ್ತ್ರಧಾರೀ ಗಮ್ಭೀರೋ ದ್ರುತಮತಿರಲ್ಪವಾಕ್ ಸಹಿಷ್ಣುಃ | ತೇಜಸ್ವೀ ವದತಿ ಚ ಕಿಂ ದದಾಮಿ ಕಸ್ಮೈ ಯೋ ಯಕ್ಷಗ್ರಹಪರಿಪೀಡಿತೋ ಮನುಷ್ಯಃ ||೧೧||

Adhikarana 11 (12) · Śloka 12

ಪ್ರೇತೇಭ್ಯೋ ವಿಸೃಜತಿ ಸಂಸ್ತರೇಷು ಪಿಣ್ಡಾನ್ ಶಾನ್ತಾತ್ಮಾ ಜಲಮಪಿ ಚಾಪಸವ್ಯವಸ್ತ್ರಃ | ಮಾಂಸೇಪ್ಸುಸ್ತಿಲಗುಡಪಾಯಸಾಭಿಕಾಮಸ್ತದ್ಭುಕ್ತೋ ಭವತಿ ಪಿತೃಗ್ರಹಾಭಿಭೂತಃ ||೧೨||

Adhikarana 12 (13) · Śloka 13

ಭೂಮೌ ಯಃ ಪ್ರಸರತಿ ಸರ್ಪವತ್ ಕದಾಚಿತ್ ಸೃಕ್ಕಿಣ್ಯೌ ವಿಲಿಖತಿ ಜಿಹ್ವಯಾ ತಥೈವ | ನಿದ್ರಾಲುರ್ಗಡಮಧುದುಗ್ಧಪಾಯಸೇಪ್ಸುರ್ವಿಜ್ಞೇಯೋ ಭವತಿ ಭುಜಙ್ಗಮೇನ ಜುಷ್ಟಃ ||೧೩||

Adhikarana 13 (14) · Śloka 14

ಮಾಂಸಾಸೃಗ್ವಿವಿಧಸುರಾವಿಕಾರಲಿಪ್ಸುರ್ನಿರ್ಲಜ್ಜೋ ಭೃಶಮತಿನಿಷ್ಠುರೋಽತಿಶೂರಃ | ಕ್ರೋಧಾಲುರ್ವಿಪುಲಬಲೋ ನಿಶಾವಿಹಾರೀ ಶೌಚದ್ವಿಡ್ ಭವತಿ ಚ ರಕ್ಷಸಾ ಗೃಹೀತಃ ||೧೪||

Adhikarana 14 (15) · Śloka 15

ಉದ್ಧಸ್ತಃ ಕೃಶಪರುಷಶ್ಚಿರಪ್ರಲಾಪೀ ದುರ್ಗನ್ಧೋ ಭೃಶಮಶುಚಿಸ್ತಥಾಽತಿಲೋಲಃ | ಬಹ್ವಾಶೀ ವಿಜನಹಿಮಾಮ್ಬುರಾತ್ರಿಸೇವೀ ವ್ಯಾವಿಗ್ನೋ ಭ್ರಮತಿ ರುದನ್ ಪಿಶಾಚಜುಷ್ಟಃ ||೧೫||

Adhikarana 15 (16) · Śloka 16

ಸ್ಥೂಲಾಕ್ಷಸ್ತ್ವರಿತಗತಿಃ ಸ್ವಫೇನಲೇಹೀ ನಿದ್ರಾಲುಃ ಪತತಿ ಚ ಕಮ್ಪತೇ ಚ ಯೋಽತಿ | ಯಶ್ಚಾದ್ರಿದ್ವಿರದನಗಾದಿವಿಚ್ಯುತಃ ಸನ್ ಸಂಸೃಷ್ಟೋ ನ ಭವತಿ ವಾರ್ಧಕೇನ ಜುಷ್ಟಃ ||೧೬||

Adhikarana 16 (17-18) · Śloka 18

ದೇವಗ್ರಹಾಃ ಪೌರ್ಣಮಾಸ್ಯಾಮಸುರಾಃ ಸನ್ಧ್ಯಯೋರಪಿ | ಗನ್ಧರ್ವಾಃ ಪ್ರಾಯಶೋಽಷ್ಟಮ್ಯಾಂ ಯಕ್ಷಾಶ್ಚ ಪ್ರತಿಪದ್ಯಥ ||೧೭|| ಕೃಷ್ಣಕ್ಷಯೇ ಚ ಪಿತರಃ ಪಞ್ಚಮ್ಯಾಮಪಿ ಚೋರಗಾಃ | ರಕ್ಷಾಂಸಿ ನಿಶಿ ಪೈಶಾಚಾಶ್ಚತುರ್ದಶ್ಯಾಂ ವಿಶನ್ತಿ ಚ ||೧೮||

Adhikarana 17 (19) · Śloka 19

ದರ್ಪಣಾದೀನ್ ಯಥಾ ಛಾಯಾ ಶೀತೋಷ್ಣಂ ಪ್ರಾಣಿನೋ ಯಥಾ | ಸ್ವಮಣಿಂ ಭಾಸ್ಕರಸ್ಯೋಸ್ರಾ ಯಥಾ ದೇಹಂ ಚ ದೇಹಧೃಕ್ | ವಿಶನ್ತಿ ಚ ನ ದೃಶ್ಯನ್ತೇ ಗ್ರಹಾಸ್ತದ್ವಚ್ಛರೀರಿಣಮ್ ||೧೯||

Adhikarana 18 (20) · Śloka 20

ತಪಾಂಸಿ ತೀವ್ರಾಣಿ ತಥೈವ ದಾನಂ ವ್ರತಾನಿ ಧರ್ಮೋ ನಿಯಮಾಶ್ಚ ಸತ್ಯಮ್ | ಗುಣಾಸ್ತಥಾಽಷ್ಟಾವಪಿ ತೇಷು ನಿತ್ಯಾ ವ್ಯಸ್ತಾಃ ಸಮಸ್ತಾಶ್ಚ ಯಥಾಪ್ರಭಾವಮ್ ||೨೦||

Adhikarana 19 (21) · Śloka 21

ನ ತೇ ಮನುಷ್ಯೈಃ ಸಹ ಸಂವಿಶನ್ತಿ ನ ವಾ ಮನುಷ್ಯಾನ್ ಕ್ವಚಿದಾವಿಶನ್ತಿ | ಯೇ ತ್ವಾವಿಶನ್ತೀತಿ ವದನ್ತಿ ಮೋಹಾತ್ತೇ ಭೂತವಿದ್ಯಾವಿಷಯಾದಪೋಹ್ಯಾಃ ||೨೧||

Adhikarana 20 (22) · Śloka 22

ತೇಷಾಂ ಗ್ರಹಾಣಾಂ ಪರಿಚಾರಕಾ ಯೇ ಕೋಟೀಸಹಸ್ರಾಯುತಪಹ್ಮಸಙ್ಖ್ಯಾಃ | ಅಸೃಗ್ವಸಾಮಾಂಸಭುಜಃ ಸುಭೀಮಾ ನಿಶಾವಿಹಾರಾಶ್ಚ ತಮಾವಿಶನ್ತಿ ||೨೨||

Adhikarana 21 (23) · Śloka 23

ನಿಶಾಚರಾಣಾಂ ತೇಷಾಂ ಹಿ ಯೇ ದೇವಗಣಮಾಶ್ರಿತಾಃ | ತೇ ತು ತತ್ಸತ್ತ್ವಸಂಸರ್ಗಾದ್ವಿಜ್ಞೇಯಾಸ್ತು ತದಞ್ಜನಾಃ ||೨೩||

Adhikarana 22 (24) · Śloka 24

ದೇವಗ್ರಹಾ ಇತಿ ಪುನಃ ಪ್ರೋಚ್ಯನ್ತೇಽಶುಚಯಶ್ಚ ಯೇ | ದೇವವಚ್ಚ ನಮಸ್ಯನ್ತೇ ಪ್ರತ್ಯರ್ಥ್ಯನ್ತೇ ಚ ದೇವವತ್ ||೨೪||

Adhikarana 23 (25) · Śloka 25

ಸ್ವಾಮಿಶೀಲಕ್ರಿಯಾಚಾರಾಃ ಕ್ರಮ ಏಷ ಸುರಾದಿಷು | ನಿರೃತೇರ್ಯಾ ದುಹಿತರಸ್ತಾಸಾಂ ಸ ಪ್ರಸವಃ ಸ್ಮೃತಃ ||೨೫||

Adhikarana 24 (26) · Śloka 26

ಸತ್ಯತ್ವಾದಪವೃತ್ತೇಷು ವೃತ್ತಿಸ್ತೇಷಾಂ ಗಣೈಃ ಕೃತಾ |೨೬|

Adhikarana 25 (26) · Śloka 27

ಹಿಂಸಾವಿಹಾರಾ ಯೇ ಕೇಚಿದ್ದೇವಭಾವಮುಪಾಶ್ರಿತಾಃ ||೨೬|| ಭೂತಾನೀತಿ ಕೃತಾ ಸಞ್ಜ್ಞಾ ತೇಷಾಂ ಸಞ್ಜ್ಞಾಪ್ರವಕ್ತೃಭಿಃ |೨೭|

Adhikarana 26 (27) · Śloka 28

ಗ್ರಹಸಞ್ಜ್ಞಾನಿ ಭೂತಾನಿ ಯಸ್ಮದ್ವೇತ್ತ್ಯನಯಾ ಭಿಷಕ್ ||೨೭|| ವಿದ್ಯಯಾ ಭೂತವಿದ್ಯಾತ್ವಮತ ಏವ ನಿರುಚ್ಯತೇ |೨೮|

Adhikarana 27 (28) · Śloka 29

ತೇಷಾಂ ಶಾನ್ತ್ಯರ್ಥಮನ್ವಿಚ್ಛನ್ ವೈದ್ಯಸ್ತು ಸುಸಮಾಹಿತಃ ||೨೮|| ಜಪೈಃ ಸನಿಯಮೈರ್ಹೋಮೈರಾರಭೇತ ಚಿಕಿತ್ಸಿತುಮ್ |೨೯|

Adhikarana 28 (29) · Śloka 30

ರಕ್ತಾನಿ ಗನ್ಧಮಾಲ್ಯಾನಿ ಬೀಜಾನಿ ಮಧುಸರ್ಪಿಷೀ ||೨೯|| ಭಕ್ಷ್ಯಾಶ್ಚ ಸರ್ವೇ ಸರ್ವೇಷಾಂ ಸಾಮಾನ್ಯೋ ವಿಧಿರುಚ್ಯತೇ |೩೦|

Adhikarana 29 (30) · Śloka 30

ವಸ್ತ್ರಾಣಿ ಗನ್ಧಮಾಲ್ಯಾನಿ ಮಾಂಸಾನಿ ರುಧಿರಾಣಿ ಚ ಯಾನಿ ಯೇಷಾಂ ಯಥೇಷ್ಟಾನಿ ತಾನಿ ತೇಭ್ಯಃ ಪ್ರದಾಪಯೇತ್ ||೩೦||

Adhikarana 30 (31) · Śloka 32

ಹಿಂಸನ್ತಿ ಮನುಜಾನ್ ಯೇಷು ಪ್ರಾಯಶೋ ದಿವಸೇಷು ತು ||೩೧|| ದಿನೇಷು ತೇಷು ದೇಯಾನಿ ತದ್ಭೂತವಿನಿವೃತ್ತಯೇ |೩೨|

Adhikarana 31 (32) · Śloka 33

ದೇವಗ್ರಹೇ ದೇವಗೃಹೇ ಹುತ್ವಾಽಗ್ನಿಂ ಪ್ರಾ(ದಾ) ಪಯೇದ್ವಲಿಮ್ ||೩೨|| ಕುಶಸ್ವಸ್ತಿಕಪೂಪಾಜ್ಯಚ್ಛತ್ರಪಾಯಸಸಮ್ಭೃತಮ್ |೩೩|

Adhikarana 32 (33) · Śloka 33

ಅಸುರಾಯ ಯಥಾಕಾಲಂ ವಿದಧ್ಯಾಚ್ಚತ್ವರಾದಿಷು ||೩೩||

Adhikarana 33 (34) · Śloka 34

ಗನ್ಧರ್ವಸ್ಯ ಗವಾಂ ಮಧ್ಯೇ ಮದ್ಯಮಾಂಸಾಮ್ಬುಜಾಙ್ಗಲಮ್ |೩೪|

Adhikarana 34 (34) · Śloka 35

ಹೃದ್ಯೇ ವೇಶ್ಮನಿ ಯಕ್ಷಸ್ಯ ಕುಲ್ಮಾಷಾಸೃಕ್ಸುರಾದಿಭಿಃ ||೩೪|| ಅತಿಮುಕ್ತಕಕುನ್ದಾಬ್ಜೈಃ ಪುಷ್ಪೈಶ್ಚ ವಿತರೇದ್ವಲಿಮ್ |೩೫|

Adhikarana 35 (35) · Śloka 35

ನದ್ಯಾಂ ಪಿತೃಗ್ರಹಾಯೇಷ್ಟಂ ಕುಶಾಸ್ತರಣಭೂಷಿತಮ್ ||೩೫||

Adhikarana 36 (36) · Śloka 36

ತತ್ರೈವೋಪಹರೇಚ್ಚಾಪಿ ನಾಗಾಯ ವಿವಿಧಂ ಬಲಿಮ್ |೩೬|

Adhikarana 37 (36) · Śloka 36

ಚತುಷ್ಪಥೇ ರಾಕ್ಷಸಸ್ಯ ಭೀಮೇಷು ಗಹನೇಷು ವಾ ||೩೬||

Adhikarana 38 (37) · Śloka 37

ಶೂನ್ಯಾಗಾರೇ ಪಿಶಾಚಸ್ಯ ತೀವ್ರಂ ಬಲಿಮುಪಾಹರೇತ್ |೩೭|

Adhikarana 39 (37) · Śloka 38

ಪೂರ್ವಮಾಚರಿತೈರ್ಮನ್ತ್ರೈರ್ಭೂತವಿದ್ಯಾನಿದರ್ಶಿತೈಃ ||೩೭|| ನ ಶಕ್ಯಾ ಬಲಿಭಿರ್ಜೇತುಂ ಯೋಗೈಸ್ತಾನ್ ಸಮುಪಾಚರೇತ್ |೩೮|

Adhikarana 40 (38-39) · Śloka 39

ಅಜರ್ಕ್ಷಚರ್ಮರೋಮಾಣಿ ಶಲ್ಯಕೋಲೂಕಯೋಸ್ತಥಾ ||೩೮|| ಹಿಙ್ಗು ಮೂತ್ರಂ ಚ ಬಸ್ತಸ್ಯ ಧೂಮಮಸ್ಯ ಪ್ರಯೋಜಯೇತ್ | ಏತೇನ ಶಾಮ್ಯತಿ ಕ್ಷಿಪ್ರಂ ಬಲವಾನಪಿ ಯೋ ಗ್ರಹಃ ||೩೯||

Adhikarana 41 (40) · Śloka 41

ಗಜಾಹ್ವಪಿಪ್ಪಲೀಮೂಲವ್ಯೋಷಾಮಲಕಸರ್ಷಪಾನ್ | ಗೋಧಾನಕುಲಮಾರ್ಜಾರಋಷ್ಯಪಿತ್ತಪ್ರಪೇಷಿತಾನ್ ||೪೦|| ನಸ್ಯಾಭ್ಯಞ್ಜನಸೇಕೇಷು ವಿದಧ್ಯಾದ್ಯೋಗತತ್ತ್ವವಿತ್ |೪೧|

Adhikarana 42 (41-42) · Śloka 42

ಖರಾಶ್ವಾಶ್ವತರೋಲೂಕಕರಭಶ್ವಶೃಗಾಲಜಮ್ ||೪೧|| ಪುರೀಷಂ ಗೃಧ್ರಕಾಕಾನಾಂ ವರಾಹಸ್ಯ ಚ ಪೇಷಯೇತ್ | ಬಸ್ತಮೂತ್ರೇಣ ತತ್ಸಿದ್ಧಂ ತೈಲಂ ಸ್ಯಾತ್ ಪೂರ್ವವದ್ಧಿತಮ್ ||೪೨||

Adhikarana 43 (43) · Śloka 44

ಶಿರೀಷಬೀಜಂ ಲಶುನಂ ಶುಣ್ಠೀಂ ಸಿದ್ಧಾರ್ಥಕಂ ವಚಾಮ್ | ಮಞ್ಜಿಷ್ಠಾಂ ರಜನೀಂ ಕೃಷ್ಣಾಂ ಬಸ್ತಮೂತ್ರೇಣ ಪೇಷಯೇತ್ ||೪೩|| ವರ್ತ್ಯಶ್ಛಾಯಾವಿಶುಷ್ಕಾಸ್ತಾಃ ಸಪಿತ್ತಾ ನಯನಾಞ್ಜನಮ್ |೪೪|

Adhikarana 44 (44) · Śloka 45

ನಕ್ತಮಾಲಫಲಂ ವ್ಯೋಷಂ ಮೂಲಂ ಶ್ಯೋನಾಕಬಿಲ್ವಯೋಃ ||೪೪|| ಹರಿದ್ರೇ ಚ ಕೃತಾ ವರ್ತ್ಯಃ ಪೂರ್ವವನ್ನಯನಾಞಜನಮ್ |೪೫|

Adhikarana 45 (45) · Śloka 46

ಸೈನ್ಧವಂ ಕಟುಕಾಂ ಹಿಙ್ಗಂ ವಯಃಸ್ಥಾಂ ಚ ವಚಾಮಪಿ | ಬಸ್ತಮೂತ್ರೇಣ ಸಮ್ಪಿಷ್ಟಂ ಮತ್ಸ್ಯಪಿತ್ತೇನ ಪೂರ್ವವತ್ ||೪೫|| ಯೇ ಯೇ ಗ್ರಹಾ ನ ಸಿಧ್ಯನ್ತಿ ಸರ್ವೇಷಾಂ ನಯನಾಞ್ಜನಮ್ |೪೬|

Adhikarana 46 (46-53) · Śloka 54

ಪುರಾಣಸರ್ಪಿರ್ಲಶುನಂ ಹಿಙ್ಗ ಸಿದ್ಧಾರ್ಥಕಂ ವಚಾ ||೪೬|| ಗೋಲೋಮೀ ಚಾಜಲೋಮೀ ಚ ಭೂತಕೇಶೀ ಜಟಾ ತಥಾ | ಕುಕ್ಕುಟಾ ಸರ್ಪಗನ್ಧಾ ಚ ತಥಾ ಕಾಣವಿಕಾಣಿಕೇ ||೪೭|| ವಜ್ರಪ್ರೋಕ್ತಾ ವಯಃಸ್ಥಾ ಚ ಶೃಙ್ಗೀ ಮೋಹನವಲ್ಲಿಕಾ | ಅರ್ಕಮೂಲಂ ತ್ರಿಕಟುಕಂ ಲತಾ ಸ್ರೋತೋಜಮಞ್ಜನಮ್ ||೪೮|| ನೈಪಾಲೀ ಹರಿತಾಲಂ ಚ ರಕ್ಷೋಘ್ನಾ ಯೇ ಚ ಕೀರ್ತಿತಾಃ | ಸಿಂಹವ್ಯಾಘ್ರರ್ಕ್ಷಮಾರ್ಜಾರದ್ವೀಪಿವಾಜಿಗವಾಂ ತಥಾ ||೪೯|| ಶ್ವಾವಿಚ್ಛಲ್ಯಕಗೋಧಾನಾಮುಷ್ಟ್ರಸ್ಯ ನಕುಲಸ್ಯ ಚ | ವಿಟ್ತ್ವಗ್ರೋಮವಸಾಮೂತ್ರರಕ್ತಪಿತ್ತನಖಾದಯಃ ||೫೦|| ಅಸ್ಮಿನ್ ವರ್ಗೇ ಭಿಷಕ್ ಕುರ್ಯಾತ್ತೈಲಾನಿ ಚ ಘೃತಾನಿ ಚ | ಪಾನಾಭ್ಯಞ್ಜನನಸ್ಯೇಷು ತಾನಿ ಯೋಜ್ಯಾನಿ ಜಾನತಾ ||೫೧|| ಅವಪೀಡೇಽಞ್ಜನೇ ಚೈವ ವಿದಧ್ಯಾದ್ಗುಟಿಕೀಕೃತಮ್ | ವಿದಧೀತ ಪರೀಷೇಕೇ ಕ್ವಥಿತಂ, ಚೂರ್ಣಿತಂ ತಥಾ ||೫೨|| ಉದ್ಧೂಲನೇ, ಶ್ಲಕ್ಷ್ಣಪಿಷ್ಟಂ ಪ್ರದೇಹೇ ಚಾವಚಾರಯೇತ್ | ಏಷ ಸರ್ವವಿಕಾರಾಂಸ್ತು ಮಾನಸಾನಪರಾಜಿತಃ ||೫೩|| ಹನ್ಯಾದಲ್ಪೇನ ಕಾಲೇನ ಸ್ನೇಹಾದಿರಪಿ ಚ ಕ್ರಮಃ |೫೪|

Adhikarana 47 (54) · Śloka 54

ನ ಚಾಚೌಕ್ಷಂ ಪ್ರಯುಞ್ಜೀತ ಪ್ರಯೋಗಂ ದೇವತಾಗ್ರಹೇ ||೫೪||

Adhikarana 48 (55) · Śloka 55

ಋತೇ ಪಿಶಾಚಾದನ್ಯತ್ರ ಪ್ರತಿಕೂಲಂ ನ ಚಾಚರೇತ್ |೫೫|

Adhikarana 49 (55) · Śloka 55

ವೈದ್ಯಾತುರೌ ನಿಹನ್ಯುಸ್ತೇ ಧ್ರುವಂ ಕ್ರುದ್ಧಾ ಮಹೌಜಸಃ ||೫೫||

Adhikarana 50 (56) · Śloka 56

ಹಿತಾಹಿತೀಯೇ ಯಚ್ಚೋಕ್ತಂ ನಿತ್ಯಮೇವ ಸಮಾಚರೇತ್ |೫೬|

Adhikarana 51 (56) · Śloka 56

ತತಃ ಪ್ರಾಪ್ಸ್ಯತಿ ಸಿದ್ಧಿಂ ಚ ಯಶಶ್ಚ ವಿಪುಲಂ ಭಿಷಕ್ ||೫೬||

Adhikarana puShpikA · Śloka 60

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಭೂತವಿದ್ಯಾತನ್ತ್ರೇಽಮಾನುಷೋಪಸರ್ಗಪ್ರತಿಷೇಧೋ ನಾಮ (ಪ್ರಥಮೋಽಧ್ಯಾಯಃ, ಆದಿತಃ) ಷಷ್ಟಿತಮೋಽಧ್ಯಾಯಃ ||೬೦||