40. atisārapratiṣēdhādhyāyaḥ

Adhikarana 1 (1-2) · Śloka 2

ಅಥಾತೋಽತೀಸಾರಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3-5) · Śloka 5

ಗುರ್ವತಿಸ್ನಿಗ್ಧರೂಕ್ಷೋಷ್ಣದ್ರವಸ್ಥೂಲಾತಿಶೀತಲೈಃ | ವಿರುದ್ಧಾಧ್ಯಶನಾಜೀರ್ಣೈರಸಾತ್ಮ್ಯೈಶ್ಚಾಪಿ ಭೋಜನೈಃ ||೩|| ಸ್ನೇಹಾದ್ಯೈರತಿಯುಕ್ತೈಶ್ಚ ಮಿಥ್ಯಾಯುಕ್ತೈರ್ವಿಷಾದ್ಭಯಾತ್ | ಶೋಕಾದ್ದುಷ್ಟಾಮ್ಬುಮದ್ಯಾತಿಪಾನಾತ್ ಸಾತ್ಮ್ಯರ್ತುಪರ್ಯಯಾತ್ ||೪|| ಜಲಾತಿರಮಣೈರ್ವೇಗವಿಘಾತೈಃ ಕೃಮಿದೋಷತಃ | ನೃಣಾಂ ಭವತ್ಯತೀಸಾರೋ ಲಕ್ಷಣಂ ತಸ್ಯ ವಕ್ಷ್ಯತೇ ||೫||

Adhikarana 3 (6) · Śloka 6

ಸಂಶಮ್ಯಾಪಾನ್ಧಾತುರನ್ತಃ ಕೃಶಾನುಂ ವರ್ಚೋಮಿಶ್ರೋ ಮಾರುತೇನ ಪ್ರಣುನ್ನಃ | ವೃದ್ಧೋಽತೀವಾಧಃ ಸರತ್ಯೇಷ ಯಸ್ಮಾದ್ವ್ಯಾಧಿಂ ಘೋರಂ ತಂ ತ್ವತೀಸಾರಮಾಹುಃ ||೬||

Adhikarana 4 (7) · Śloka 8

ಏಕೈಕಶಃ ಸರ್ವಶಶ್ಚಾಪಿ ದೋಷೈಃ ಶೋಕೇನಾನ್ಯಃ ಷಷ್ಠ ಆಮೇನ ಚೋಕ್ತಃ | ಕೇಚಿತ್ ಪ್ರಾಹುರ್ನೈಕರೂಪಪ್ರಕಾರಂ ನೈವೇತ್ಯೇವಂ ಕಾಶಿರಾಜಸ್ತ್ವವೋಚತ್ ||೭|| ದೋಷಾವಸ್ಥಾಸ್ತಸ್ಯ ನೈಕಪ್ರಕಾರಾಃ ಕಾಲೇ ಕಾಲೇ ವ್ಯಾಧಿತಸ್ಯೋದ್ಭವನ್ತಿ |೮|

Adhikarana 5 (8) · Śloka 9

ಹೃನ್ನಾಭಿಪಾಯೂದರಕುಕ್ಷಿತೋದಗಾತ್ರಾವಸಾದಾನಿಲಸನ್ನಿರೋಧಾಃ ||೮|| ವಿಟ್ಸಙ್ಗ ಆಧ್ಮಾನಮಥಾವಿಪಾಕೋ ಭವಿಷ್ಯತಸ್ತಸ್ಯ ಪುರಃಸರಾಣಿ |೯|

Adhikarana 6 (9) · Śloka 10

ಶೂಲಾವಿಷ್ಟಃ ಸಕ್ತಮೂತ್ರೋಽನ್ತ್ರಕೂಜೀ ಸ್ರಸ್ತಾಪಾನಃ ಸನ್ನಕಟ್ಯೂರುಜಙ್ಘಃ ||೯|| ವರ್ಚೋ ಮುಞ್ಚತ್ಯಲ್ಪಮಲ್ಪಂ ಸಫೇನಂ ರೂಕ್ಷಂ ಶ್ಯಾವಂ ಸಾನಿಲಂ ಮಾರುತೇನ |೧೦|

Adhikarana 7 (10) · Śloka 11

ದುರ್ಗನ್ಧ್ಯುಷ್ಣಂ ವೇಗವನ್ಮಾಂಸತೋಯಪ್ರಖ್ಯಂ ಭಿನ್ನಂ ಸ್ವಿನ್ನದೇಹೋಽತಿತೀಕ್ಷ್ಣಮ್ ||೧೦|| ಪಿತ್ತಾತ್ ಪೀತಂ ನೀಲಮಾಲೋಹಿತಂ ವಾ ತೃಷ್ಣಾಮೂರ್ಚ್ಛಾದಾಹಪಾಕಜ್ವರಾರ್ತಃ |೧೧|

Adhikarana 8 (11) · Śloka 12

ತನ್ದ್ರಾನಿದ್ರಾಗೌರವೋತ್ಕ್ಲೇಶಸಾದೀ ವೇಗಾಶಙ್ಕೀ ಸೃಷ್ಟವಿಟ್ಕೋಽಪಿ ಭೂಯಃ ||೧೧|| ಶುಕ್ಲಂ ಸಾನ್ದ್ರಂ ಶ್ಲೇಷ್ಮಣಾ ಶ್ಲೇಷ್ಮಯುಕ್ತಂ ಭಕ್ತದ್ವೇಷೀ ನಿಃಸ್ವನಂ ಹೃಷ್ಟರೋಮಾ |೧೨|

Adhikarana 9 (12) · Śloka 13

ತನ್ದ್ರಾಯುಕ್ತೋ ಮೋಹಸಾದಾಸ್ಯಶೋಷೀ ವರ್ಚಃ ಕುರ್ಯಾನ್ನೈಕವರ್ಣಂ ತೃಷಾರ್ತಃ ||೧೨|| ಸರ್ವೋದ್ಭೂತೇ ಸರ್ವಲಿಙ್ಗೋಪಪತ್ತಿಃ ಕೃಚ್ಛ್ರಶ್ಚಾಯಂ ಬಾಲವೃದ್ಧೇಷ್ವಸಾಧ್ಯಃ |೧೩|

Adhikarana 10 (13-14) · Śloka 15

ತೈಸ್ತೈರ್ಭಾವೈಃ ಶೋಚತೋಽಲ್ಪಾಶನಸ್ಯ ಬಾಷ್ಪಾವೇಗಃ ಪಕ್ತಿಮಾವಿಧ್ಯ(ಶ್ಯ)ಜನ್ತೋಃ ||೧೩|| ಕೋಷ್ಠಂ ಗತ್ವಾ ಕ್ಷೋಭಯತ್ಯಸ್ಯ ರಕ್ತಂ ತಚ್ಚಾಧಸ್ತಾತ್ ಕಾಕಣನ್ತೀಪ್ರಕಾಶಮ್ | ವರ್ಚೋಮಿಶ್ರಂ ನಿಃಪುರೀಷಂ ಸಗನ್ಧಂ ನಿರ್ಗನ್ಧಂ ವಾ ಸಾರ್ಯತೇ ತೇನ ಕೃಚ್ಛ್ರಾತ್ ||೧೪|| ಶೋಕೋತ್ಪನ್ನೋ ದುಶ್ಚಿಕಿತ್ಸ್ಯೋಽತಿಮಾತ್ರಂ ರೋಗೋ ವೈದ್ಯೈಃ ಕಷ್ಟ ಏಷ ಪ್ರದಿಷ್ಟಃ |೧೫|

Adhikarana 11 (15-16) · Śloka 16

ಆಮಾಜೀರ್ಣೋಪದ್ರುತಾಃ ಕ್ಷೋಭಯನ್ತಃ ಕೋಷ್ಠಂ ದೋಷಾಃ ಸಮ್ಪ್ರದುಷ್ಟಾಃ ಸಭಕ್ತಮ್ ||೧೫|| ನಾನಾವರ್ಣಂ ನೈಕಶಃ ಸಾರಯನ್ತಿ ಕೃಚ್ಛ್ರಾಜ್ಜನ್ತೋಃ ಷಷ್ಠಮೇನಂ ವದನ್ತಿ ||೧೬||

Adhikarana 12 (17) · Śloka 17

ಸಂಸೃಷ್ಟಮೇಭಿರ್ದೋಷೈಸ್ತು ನ್ಯಸ್ತಮಪ್ಸ್ವವಸೀದತಿ | ಪುರೀಷಂ ಭೃಶದುರ್ಗನ್ಧಿ ವಿಚ್ಛಿನ್ನಂ ಚಾಮಸಞ್ಜ್ಞಕಮ್ ||೧೭||

Adhikarana 13 (18) · Śloka 18

ಏತಾನ್ಯೇವ ತು ಲಿಙ್ಗಾನಿ ವಿಪರೀತಾನಿ ಯಸ್ಯ ತು | ಲಾಘವಂ ಚ ಮನುಷ್ಯಸ್ಯ ತಸ್ಯ ಪಕ್ವಂ ವಿನಿರ್ದಿಶೇತ್ ||೧೮||

Adhikarana 14 (19-21) · Śloka 21

ಸರ್ಪಿರ್ಮೇದೋವೇಸವಾರಾಮ್ಬುತೈಲಮಜ್ಜಾಕ್ಷೀರಕ್ಷೌದ್ರರೂಪಂ ಸ್ರವೇದ್ಯತ್ | ಮಞ್ಜಿಷ್ಠಾಭಂ ಮಸ್ತುಲುಙ್ಗೋಪಮಂ ವಾ ವಿಸ್ರಂ ಶೀತಂ ಪ್ರೇತಗನ್ಧ್ಯಞ್ಜನಾಭಮ್ ||೧೯|| ರಾಜೀಮದ್ವಾ ಚನ್ದ್ರಕೈಃ ಸನ್ತತಂ ವಾ ಪೂಯಪ್ರಖ್ಯಂ ಕರ್ದಮಾಭಂ ತಥೋಷ್ಣಮ್ | ಹನ್ಯಾದೇತದ್ಯತ್ ಪ್ರತೀಪಂ ಭವೇಚ್ಚ ಕ್ಷೀಣಂ ಹನ್ಯುಶ್ಚೋಪಸರ್ಗಾಃ ಪ್ರಭೂತಾಃ ||೨೦|| ಅಸಂವೃತಗುದಂ ಕ್ಷೀಣಂ ದುರಾಧ್ಮಾತಮುಪದ್ರುತಮ್ | ಗುದೇ ಪಕ್ವೇ ಗತೋಷ್ಮಾಣಮತೀಸಾರಕಿಣಂ ತ್ಯಜೇತ್ ||೨೧||

Adhikarana 15 (22-23) · Śloka 23

ಶರೀರಿಣಾಮತೀಸಾರಃ ಸಮ್ಭೂತೋ ಯೇನ ಕೇನಚಿತ್ | ದೋಷಾಣಾಮೇವ ಲಿಙ್ಗಾನಿ ಕದಾಚಿನ್ನಾತಿವರ್ತತೇ ||೨೨|| ಸ್ನೇಹಾಜೀರ್ಣನಿಮಿತ್ತಸ್ತು ಬಹುಶೂಲಪ್ರವಾಹಿಕಃ | ವಿಸೂಚಿಕಾನಿಮಿತ್ತಸ್ತು ಚಾನ್ಯೋಽಜೀರ್ಣನಿಮಿತ್ತಜಃ | ವಿಷಾರ್ಶಃಕೃಮಿಸಮ್ಭೂತೋ ಯಥಾಸ್ವಂ ದೋಷಲಕ್ಷಣಃ ||೨೩||

Adhikarana 16 (24) · Śloka 24

ಆಮಪಕ್ವಕ್ರಮಂ ಹಿತ್ವಾ ನಾತಿಸಾರೇ ಕ್ರಿಯಾ ಯತಃ | ಅತಃ ಸರ್ವೇಽತಿಸಾರಾಸ್ತು ಜ್ಞೇಯಾಃ ಪಕ್ವಾಮಲಕ್ಷಣೈಃ ||೨೪||

Adhikarana 17 (25) · Śloka 25

ತತ್ರಾದೌ ಲಙ್ಘನಂ ಕಾರ್ಯಮತಿಸಾರೇಷು ದೇಹಿನಾಮ್ | ತತಃ ಪಾಚನಸಂಯುಕ್ತೋ ಯವಾಗ್ವಾದಿಕ್ರಮೋ ಹಿತಃ ||೨೫||

Adhikarana 18 (26) · Śloka 26

ಅಥವಾ ವಾಮಯಿತ್ವಾಽಽಮೇ ಶೂಲಾಧ್ಮಾನನಿಪೀಡಿತಮ್ | ಪಿಪ್ಪಲೀಸೈನ್ಧವಾಮ್ಭೋಭಿರ್ಲಙ್ಘನಾದ್ಯೈರುಪಾಚರೇತ್ ||೨೬||

Adhikarana 19 (27) · Śloka 27

ಕಾರ್ಯಂ ವಮನಸ್ಯಾನ್ತೇ ಪ್ರದ್ರವಂ ಲಘುಭೋಜನಮ್ | ಖಡಯೂಷಯವಾಗೂಷು ಪಿಪ್ಪಲ್ಯಾದ್ಯಂ ಚ ಯೋಜಯೇತ್ ||೨೭||

Adhikarana 20 (28) · Śloka 28

ಅನೇನ ವಿಧಿನಾ ಚಾಮಂ ಯಸ್ಯ ವೈ ನೋಪಶಾಮ್ಯತಿ | ಹರಿದ್ರಾದಿಂ ವಚಾದಿಂ ವಾ ಪಿಬೇತ್ ಪ್ರಾತಃ ಸ ಮಾನವಃ ||೨೮||

Adhikarana 21 (29-30) · Śloka 30

ಆಮಾತೀಸಾರಿಣಾಂ ಕಾರ್ಯಂ ನಾದೌ ಸಙ್ಗ್ರಹಣಂ ನೃಣಾಮ್ | ತೇಷಾಂ ದೋಷಾ ವಿಬದ್ಧಾಃ ಪ್ರಾಗ್ಜನಯನ್ತ್ಯಾಮಯಾನಿಮಾನ್ ||೨೯|| ಪ್ಲೀಹಪಾಣ್ಡ್ವಾಮಯಾನಾಹಮೇಹಕುಷ್ಠೋದರಜ್ವರಾನ್ | ಶೋಫಗುಲ್ಮಗ್ರಹಣ್ಯರ್ಶಃಶೂಲಾಲಸಕಹೃದ್ಗ್ರಹಾನ್ ||೩೦||

Adhikarana 22 (31) · Śloka 31

ಸಶೂಲಂ ಬಹುಶಃ ಕೃಚ್ಛ್ರಾದ್ವಿಬದ್ಧಂ ಯೋಽತಿಸಾರ್ಯತೇ | ದೋಷಾನ್ ಸನ್ನಿಚಿತಾನ್ ತಸ್ಯ ಪಥ್ಯಾಭಿಃ ಸಮ್ಪ್ರವರ್ತಯೇತ್ ||೩೧||

Adhikarana 23 (32) · Śloka 32

ಯೋಽತಿದ್ರವಂ ಪ್ರಭೂತಂ ಚ ಪೂರೀಷಮತಿಸಾರ್ಯತೇ | ತಸ್ಯಾದೌ ವಮನಂ ಕುರ್ಯಾತ್ ಪಶ್ಚಾಲ್ಲಙ್ಘನಪಾಚನಮ್ ||೩೨||

Adhikarana 24 (33) · Śloka 33

ಸ್ತೋಕಂ ಸ್ತೋಕಂ ವಿಬದ್ಧಂ ವಾ ಸಶೂಲಂ ಯೋಽತಿಸಾರ್ಯತೇ | ಅಭಯಾಪಿಪ್ಪಲೀಕಲ್ಕೈಃ ಸುಖೋಷ್ಣೈಸ್ತಂ ವಿರೇಚಯೇತ್ ||೩೩||

Adhikarana 25 (34) · Śloka 34

ಆಮೇ ಚ ಲಙ್ಘನಂ ಶಸ್ತಮಾದೌ ಪಾಚನಮೇವ ವಾ |೩೪|

Adhikarana 26 (34) · Śloka 34

ಯೋಗಾಶ್ಚಾತ್ರ ಪ್ರವಕ್ಷ್ಯನ್ತೇ ತ್ವಾಮಾತೀಸಾರನಾಶನಾಃ ||೩೪||

Adhikarana 27 (35-46) · Śloka 46

ಕಲಿಙ್ಗಾತಿವಿಷಾಹಿಙ್ಗುಸೌವರ್ಚಲವಚಾಭಯಾಃ | ದೇವದಾರುವಚಾಮುಸ್ತಾನಾಗರಾತಿವಿಷಾಭಯಾಃ ||೩೫|| ಅಭಯಾ ಧಾನ್ಯಕಂ ಮುಸ್ತಂ ಪಿಪ್ಪಲೀ ನಾಗರಂ ವಚಾ | ನಾಗರಂ ಧಾನ್ಯಕಂ ಮುಸ್ತಂ ವಾಲಕಂ ಬಿಲ್ವಮೇವ ಚ ||೩೬|| ಮುಸ್ತಂ ಪರ್ಪಟಕಂ ಶುಣ್ಠೀ ವಚಾ ಪ್ರತಿವಿಷಾಽಭಯಾ | ಅಭಯಾಽತಿವಿಷಾ ಹಿಙ್ಗು ವಚಾ ಸೌವರ್ಚಲಂ ತಥಾ ||೩೭|| ಚಿತ್ರಕಃ ಪಿಪ್ಪಲೀಮೂಲಂ ವಚಾ ಕಟುಕರೋಹಿಣೀ | ಪಾಠಾ ವತ್ಸಕಬೀಜಾನಿ ಹರೀತಕ್ಯೋ ಮಹೌಷಧಮ್ ||೩೮|| ಮೂರ್ವಾ ನಿರ್ದಹನೀ ಪಾಠಾ ತ್ರ್ಯೂಷಣಂ ಗಜಪಿಪ್ಪಲೀ | ಸಿದ್ಧಾರ್ಥಕಾ ಭದ್ರದಾರು ಶತಾಹ್ವಾ ಕಟುರೋಹಿಣೀ ||೩೯|| ಏಲಾ ಸಾವರಕಂ ಕುಷ್ಠಂ ಹರಿದ್ರೇ ಕೌಟಜಾ ಯವಾಃ | ಮೇಷಶೃಙ್ಗೀ ತ್ವಗೇಲೇ ಚ ಕೃಮಿಘ್ನಂ ವೃಕ್ಷಕಾಣಿ ಚ ||೪೦|| ವೃಕ್ಷಾದನೀ ವೀರತರುರ್ಬೃಹತ್ಯೌ ದ್ವೇ ಸಹೇ ತಥಾ | ಅರಲುತ್ವಕ್ ತೈನ್ದುಕೀ ಚ ದಾಡಿಮೀ ಕೌಟಜೀ ಶಮೀ ||೪೧|| ಪಾಠಾ ತೇಜೋವತೀ ಮುಸ್ತಂ ಪಿಪ್ಪಲೀ ಕೌಟಜಂ ಫಲಮ್ | ಪಟೋಲಂ(ಲೀ) ದೀಪ್ಯಕೋ ಬಿಲ್ವಂ ಹರಿದ್ರೇ ದೇವದಾರು ಚ ||೪೨|| ವಿಡಙ್ಗಮಭಯಾ ಪಾಠಾ ಶೃಙ್ಗವೇರಂ ಘನಂ ವಚಾ | ವಚಾ ವತ್ಸಕಬೀಜಾನಿ ಸೈನ್ಧವಂ ಕಟುರೋಹಿಣೀ ||೪೩|| ಹಿಙ್ಗುರ್ವತ್ಸಕಬೀಜಾನಿ ವಚಾ ಬಿಲ್ವಶಲಾಟು ಚ | ನಾಗರಾತಿವಿಷೇ ಮುಸ್ತಂ ಪಿಪ್ಪಲ್ಯೋ ವಾತ್ಸಕಂ ಫಲಮ್ ||೪೪|| ಮಹೌಷಧಂ ಪ್ರತಿವಿಷಾ ಮುಸ್ತಂ ಚೇತ್ಯಾಮಪಾಚನಾಃ | ಪ್ರಯೋಜ್ಯಾ ವಿಂಶತಿರ್ಯೋಗಾಃ ಶ್ಲೋಕಾರ್ಧವಿಹಿತಾಸ್ತ್ವಿಮೇ ||೪೫|| ಧಾನ್ಯಾಮ್ಲೋಷ್ಣಾಮ್ಬುಮದ್ಯಾನಾಂ ಪಿಬೇದನ್ಯತಮೇನ ವಾ | ನಿಷ್ಕ್ವಾಥಾನ್ ವಾ ಪಿಬೇದೇಷಾಂ ಸುಖೋಷ್ಣಾನ್ ಸಾಧು ಸಾಧಿತಾನ್ ||೪೬||

Adhikarana 28 (47-59) · Śloka 59

ಪಯಸ್ಯುತ್ಕ್ವಾಥ್ಯ ಮುಸ್ತಾನಾಂ ವಿಂಶತಿಂ ತ್ರಿಗುಣಾಮ್ಭಸಿ | ಕ್ಷೀರಾವಶಿಷ್ಟಂ ತತ್ಪೀತಂ ಹನ್ತ್ಯಾಮಂ ಶೂಲಮೇವ ಚ ||೪೭|| ನಿಖಿಲೇನೋಪದಿಷ್ಟೋಽಯಂ ವಿಧಿರಾಮೋಪಶಾನ್ತಯೇ | ಹರೀತಕೀಮತಿವಿಷಾಂ ಹಿಙ್ಗು ಸೌವರ್ಚಲಂ ವಚಾಮ್ ||೪೮|| ಪಿಬೇತ್ ಸುಖಾಮ್ಬುನಾ ಜನ್ತುರಾಮಾತೀಸಾರಪೀಡಿತಃ | ಪಟೋಲಂ ದೀಪ್ಯಕಂ ಬಿಲ್ವಂ ವಚಾಪಿಪ್ಪಲಿನಾಗರಮ್ ||೪೯|| ಮುಸ್ತಂ ಕುಷ್ಠಂ ವಿಡಙ್ಗಂ ಚ ಪಿಬೇದ್ವಾಽಪಿ ಸುಖಾಮ್ಬುನಾ | ಶೃಙ್ಗವೇರಂ ಗುಡೂಚೀಂ ಚ ಪಿಬೇದುಷ್ಣೇನ ವಾರಿಣಾ ||೫೦|| ಲವಣಾನ್ಯಥ ಪಿಪ್ಪಲ್ಯೋ ವಿಡಙ್ಗಾನಿ ಹರೀತಕೀ | ಚಿತ್ರಕಂ ಶಿಂಶಪಾ ಪಾಠಾ ಶಾರ್ಙ್ಗೇಷ್ಟಾ ಲವಣಾನಿ ಚ ||೫೧|| ಹಿಙ್ಗುರ್ವೃಕ್ಷಕಬೀಜಾನಿ ಲವಣಾನಿ ಚ ಭಾಗಶಃ | ಹಸ್ತಿದನ್ತ್ಯಥ ಪಿಪ್ಪಲ್ಯಃ ಕಲ್ಕಾವಕ್ಷಸಮೌ ಸ್ಮೃತೌ ||೫೨|| ವಚಾ ಗುಡೂಚೀಕಾಣ್ಡಾನಿ ಯೋಗೋಽಯಂ ಪರಮೋ ಮತಃ | ಏತೇ ಸುಖಾಮ್ಬುನಾ ಯೋಗಾ ದೇಯಾಃ ಪಞ್ಚ ಸತಾಂ ಮತಾಃ ||೫೩|| ನಿವೃತ್ತೇಷ್ವಾಮಶೂಲೇಷು ಯಸ್ಯ ನ ಪ್ರಗುಣೋಽನಿಲಃ | ಸ್ತೋಕಂ ಸ್ತೋಕಂ ರುಜಾಮಚ್ಚ ಸಶೂಲಂ ಯೋಽತಿಸಾರ್ಯತೇ ||೫೪|| ಸಕ್ಷಾರಲವಣೈರ್ಯುಕ್ತಂ ಮನ್ದಾಗ್ನಿಃ ಸ ಪಿಬೇದ್ಘೃತಮ್ | ಕ್ಷೀರನಾಗರಚಾಙ್ಗೇರೀಕೋಲದಧ್ಯಮ್ಲಸಾಧಿತಮ್ ||೫೫|| ಸರ್ಪಿರಚ್ಛಂ ಪಿಬೇದ್ವಾಪಿ ಶೂಲಾತೀಸಾರಶಾನ್ತಯೇ | ದಧ್ನಾ ತೈಲಘೃತಂ ಪಕ್ವಂ ಸವ್ಯೋಷಾಜಾತಿಚಿತ್ರಕೈಃ ||೫೬|| ಸಬಿಲ್ವಪಿಪ್ಪಲೀಮೂಲದಾಡಿಮೈರ್ವಾ ರುಗನ್ವಿತೈಃ | ನಿಖಿಲೋ ವಿಧಿರುಕ್ತೋಽಯಂ ವಾತಶ್ಲೇಷ್ಮೋಪಶಾನ್ತಯೇ ||೫೭|| ತೀಕ್ಷ್ಣೋಷ್ಣವರ್ಜ್ಯಮೇನಂ ತು ವಿದಧ್ಯಾತ್ಪಿತ್ತಜೇ ಭಿಷಕ್ | ಯಥೋಕ್ತಮುಪವಾಸಾನ್ತೇ ಯವಾಗೂಶ್ಚ ಪ್ರಶಸ್ಯತೇ ||೫೮|| ಬಲಯೋರಂಶುಮತ್ಯಾಂ ಚ ಶ್ವದಂಷ್ಟ್ರಬೃಹತೀಷು ಚ | ಶತಾವರ್ಯಾಂ ಚ ಸಂಸಿದ್ಧಾಃ ಸುಶೀತಾ ಮಧುಸಂಯುತಾಃ ||೫೯||

Adhikarana 29 (60) · Śloka 60

ಮುದ್ಗಾದಿಷು ಚ ಯೂಷಾಃ ಸ್ಯುರ್ದ್ರವ್ಯೈರೇತೈಃ ಸುಸಂಸ್ಕೃತಾಃ |೬೦|

Adhikarana 30 (60-62) · Śloka 62

ಮೃದುಭಿರ್ದೀಪನೈಸ್ತಿಕ್ತೈರ್ದ್ರವ್ಯೈಃ ಸ್ಯಾದಾಮಪಾಚನಮ್ ||೬೦|| ಹರಿದ್ರಾತಿವಿಷಾಪಾಠಾವತ್ಸಬೀಜರಸಾಞ್ಜನಮ್ | ರಸಾಞ್ಜನಂ ಹರಿದ್ರೇ ದ್ವೇ ಬೀಜಾನಿ ಕುಟಜಸ್ಯ ಚ ||೬೧|| ಪಾಠಾ ಗುಡೂಚೀ ಭೂನಿಮ್ಬಸ್ತಥೈವ ಕಟುರೋಹಿಣೀ | ಏತೈಃ ಶ್ಲೋಕಾರ್ಧನಿರ್ದಿಷ್ಟೈಃ ಕ್ವಾಥಾಃ ಸ್ಯುಃ ಪಿತ್ತಪಾಚನಾಃ ||೬೨||

Adhikarana 31 (63-65) · Śloka 66

ಮುಸ್ತಂ ಕುಟಜಬೀಜಾನಿ ಭೂನಿಮ್ಬಂ ಸರಸಾಞ್ಜನಮ್ | ದಾರ್ವೀ ದುರಾಲಭಾ ಬಿಲ್ವಂ ವಾಲಕಂ ರಕ್ತಚನ್ದನಮ್ ||೬೩|| ಚನ್ದನಂ ವಾಲಕಂ ಮುಸ್ತಂ ಭೂನಿಮ್ಬಂ ಸದುರಾಲಭಮ್ | ಮೃಣಾಲಂ ಚನ್ದನಂ ರೋಧ್ರಂ ನಾಗರಂ ನೀಲಮುತ್ಪಲಮ್ ||೬೪|| ಪಾಠಾ ಮುಸ್ತಂ ಹರಿದ್ರೇ ದ್ವೇ ಪಿಪ್ಪಲೀ ಕೌಟಜಂ ಫಲಮ್ | ಫಲತ್ವಚಂ ವತ್ಸಕಸ್ಯ ಶೃಙ್ಗವೇರಂ ಘನಂ ವಚಾ ||೬೫|| ಷಡೇತೇಽಭಿಹಿತಾ ಯೋಗಾಃ ಪಿತ್ತಾತೀಸಾರನಾಶನಾಃ |೬೬|

Adhikarana 32 (66) · Śloka 66

ಬಿಲ್ವಶಕ್ರಯವಾಮ್ಭೋದಬಾಲಕಾತಿವಿಷಾಕೃತಃ | ಕಷಾಯೋ ಹನ್ತ್ಯತೀಸಾರಂ ಸಾಮಂ ಪಿತ್ತಸಮುದ್ಭವಮ್ ||೬೬||

Adhikarana 33 (67) · Śloka 67

ಮಧುಕೋತ್ಪಲಬಿಲ್ವಾಬ್ದಹ್ರೀಬೇರೋಶೀರನಾಗರೈಃ | ಕೃತಃ ಕ್ವಾಥೋ ಮಧುಯುತಃ ಪಿತ್ತಾತೀಸಾರನಾಶನಃ ||೬೭||

Adhikarana 34 (68) · Śloka 68

ಯದಾ ಪಕ್ವೋಽಪ್ಯತೀಸಾರಃ ಸರತ್ಯೇವ ಮುಹುರ್ಮುಹುಃ | ಗ್ರಹಣ್ಯಾ ಮಾರ್ದವಾಜ್ಜನ್ತೋಸ್ತತ್ರ ಸಂಸ್ತಮ್ಭನಂ ಹಿತಮ್ ||೬೮||

Adhikarana 35 (69-71) · Śloka 71

ಸಮಙ್ಗಾ ಧಾತಕೀಪುಷ್ಪಂ ಮಞ್ಜಿಷ್ಠಾ ಲೋಧ್ರಮುಸ್ತಕಮ್ | ಶಾಲ್ಮಲೀವೇಷ್ಟಕೋ ರೋಧ್ರಂ ವೃಕ್ಷದಾಡಿಮಯೋಸ್ತ್ವಚೌ ||೬೯|| ಆಮ್ರಾಸ್ಥಿಮಧ್ಯಂ ಲೋಧ್ರಂ ಚ ಬಿಲ್ವಮಧ್ಯಂ ಪ್ರಿಯಙ್ಗವಃ | ಮಧುಕಂ ಶೃಙ್ಗವೇರಂ ಚ ದೀರ್ಘವೃನ್ತತ್ವಗೇವ ಚ ||೭೦|| ಚತ್ವಾರ ಏತೇ ಯೋಗಾಃ ಸ್ಯುಃ ಪಕ್ವಾತೀಸಾರನಾಶನಾಃ | ಉಕ್ತಾ ಯ ಉಪಯೋಜ್ಯಾಸ್ತೇ ಸಕ್ಷೌದ್ರಾಸ್ತಣ್ಡುಲಾಮ್ಬುನಾ ||೭೧||

Adhikarana 36 (72) · Śloka 72

ಮೌಸ್ತಂ ಕಷಾಯಮೇಕಂ ವಾ ಪೇಯಂ ಮಧುಸಮಾಯುತಮ್ | ಲೋಧ್ರಾಮ್ಬಷ್ಠಾಪ್ರಿಯಙ್ಗ್ವಾದೀನ್ ಗಣಾನೇವಂ ಪ್ರಯೋಜಯೇತ್ ||೭೨||

Adhikarana 37 (73) · Śloka 73

ಪದ್ಮಾಂ ಸಮಙ್ಗಾಂ ಮಧುಕಂ ಬಿಲ್ವಜಮ್ಬೂಶಲಾಟು ಚ | ಪಿಬೇತ್ತಣ್ಡುಲತೋಯೇನ ಸಕ್ಷೌದ್ರಮಗದಙ್ಕರಮ್ ||೭೩||

Adhikarana 38 (74) · Śloka 75

ಕಚ್ಛುರಾಮೂಲಕಲ್ಕಂ ವಾಽಪ್ಯುದುಮ್ಬರಫಲೋಪಮಮ್ | ಪಯಸ್ಯಾ ಚನ್ದನಂ ಪದ್ಮಾ ಸಿತಾಮುಸ್ತಾಬ್ಜಕೇಶರಮ್ ||೭೪|| ಪಕ್ವಾತಿಸಾರಂ ಯೋಗೋಽಯಂ ಜಯೇತ್ಪೀತಃ ಸಶೋಣಿತಮ್ |೭೫|

Adhikarana 39 (75) · Śloka 76

ನಿರಾಮರೂಪಂ ಶೂಲಾರ್ತಂ ಲಙ್ಘನಾದ್ಯೈಶ್ಚ ಕರ್ಷಿತಮ್ ||೭೫|| ನರಂ ರೂಕ್ಷಮವೇಕ್ಷ್ಯಾಗ್ನಿಂ ಸಕ್ಷಾರಂ ಪಾಯಯೇದ್ಘೃತಮ್ |೭೬|

Adhikarana 40 (76) · Śloka 77

ಬಲಾಬೃಹತ್ಯಂಶುಮತೀಕಚ್ಛುರಾಮೂಲಸಾಧಿತಮ್ ||೭೬|| ಮಧೂಕ್ಷಿತಂ ಸಮಧುಕಂ ಪಿಬೇಚ್ಛೂಲೈರಭಿದ್ರುತಃ |೭೭|

Adhikarana 41 (77-78) · Śloka 79

ದಾರ್ವೀಬಿಲ್ವಕಣಾದ್ರಾಕ್ಷಾಕಟುಕೇನ್ದ್ರಯವೈರ್ಘೃತಮ್ ||೭೭|| ಸಾಧಿತಂ ಹನ್ತ್ಯತೀಸಾರಂ ವಾತಪಿತ್ತಕಫಾತ್ಮಕಮ್ | ದಧ್ನಾ ಚಾಮ್ಲೇನ ಸಮ್ಪಕ್ವಂ ಸವ್ಯೋಷಾಜಾಜಿಚಿತ್ರಕಮ್ ||೭೮|| ಸಚವ್ಯಪಿಪ್ಪಲೀಮೂಲಂ ದಾಡಿಮೈರ್ವಾ ರುಗರ್ದಿತಃ |೭೯|

Adhikarana 42 (79) · Śloka 80

ಪಯೋ ಘೃತಂ ಚ ಮಧು ಚ ಪಿಬೇಚ್ಛೂಲೈರಭಿದ್ರುತಃ ||೭೯|| ಸಿತಾಜಮೋದಕಟ್ವಙ್ಗಮಧುಕೈರವಚೂರ್ಣಿತಮ್ |೮೦|

Adhikarana 43 (80) · Śloka 81

ಅವೇದನಂ ಸುಸಮ್ಪಕ್ವಂ ದೀಪ್ತಾಗ್ನೇಃ ಸುಚಿರೋತ್ಥಿತಮ್ ||೮೦|| ನಾನಾವರ್ಣಮತೀಸಾರಂ ಪುಟಪಾಕೈರುಪಾಚರೇತ್ |೮೧|

Adhikarana 44 (81-83) · Śloka 84

ತ್ವಕ್ಪಿಣ್ಡಂ ದೀರ್ಘವೃನ್ತಸ್ಯ ಪದ್ಮಕೇಸರಸಂಯುತಮ್ ||೮೧|| ಕಾಶ್ಮರೀಪದ್ಮಪತ್ರೈಶ್ಚಾವೇಷ್ಟ್ಯ ಸೂತ್ರೇಣ ಸನ್ದೃಢಮ್ | ಮೃದಾಽವಲಿಪ್ತಂ ಸುಕೃತಮಙ್ಗಾರೇಷ್ವವಕೂಲಯೇತ್ ||೮೨|| ಸ್ವಿನ್ನಮುದ್ಧೃತ್ಯ ನಿಷ್ಪೀಡ್ಯ ರಸಮಾದಾಯ ತಂ ತತಃ | ಶೀತಂ ಮಧುಯುತಂ ಕೃತ್ವಾ ಪಾಯಯೇತೋದರಾಮಯೇ ||೮೩|| ಜೀವನ್ತೀಮೇಷಶೃಙ್ಗ್ಯಾದಿಷ್ವೇವಂ ದ್ರವ್ಯೇಷು ಸಾಧಯೇತ್ |೮೪|

Adhikarana 45 (84-85) · Śloka 86

ತಿತ್ತಿರಿಂ ಲುಞ್ಚಿತಂ ಸಮ್ಯಕ್ ನಿಷ್ಕೃಷ್ಟಾನ್ತ್ರಂ ತು ಪೂರಯೇತ್ ||೮೪|| ನ್ಯಗ್ರೋಧಾದಿತ್ವಚಾಂ ಕಲ್ಕೈಃ ಪೂರ್ವವಚ್ಚಾವಕೂಲಯೇತ್ | ರಸಮಾದಾಯ ತಸ್ಯಾಥ ಸುಸ್ವಿನ್ನಸ್ಯ ಸಮಾಕ್ಷಿಕಮ್ ||೮೫|| ಶರ್ಕರೋಪಹಿತಂ ಶೀತಂ ಪಾಯಯೇತೋದರಾಮಯೇ |೮೬|

Adhikarana 46 (86-87) · Śloka 88

ಲೋಧ್ರಚನ್ದನಯಷ್ಟ್ಯಾಹ್ವದಾರ್ವೀಪಾಠಾಸಿತೋತ್ಪಲಾನ್ ||೮೬|| ತಣ್ಡುಲೋದಕಸಮ್ಪಿಷ್ಟಾನ್ ದೀರ್ಘವೃನ್ತತ್ವಗನ್ವಿತಾನ್ | ಪೂರ್ವವತ್ ಕೂಲಿತಾತ್ತಸ್ಮಾದ್ರಸಮಾದಾಯ ಶೀತಲಮ್ ||೮೭|| ಮಧ್ವಾಕ್ತಂ ಪಾಯಯೇಚ್ಚೈತತ್ ಕಫಪಿತ್ತೋದರಾಮಯೇ |೮೮|

Adhikarana 47 (88) · Śloka 89

ಏವಂ ಪ್ರರೋಹೈಃ ಕುರ್ವೀತ ವಟಾದೀನಾಂ ವಿಧಾನವತ್ ||೮೮|| ಪುಟಪಾಕಾನ್ ಯಥಾಯೋಗಂ ಜಾಙ್ಗಲೋಪಹಿತಾನ್ ಶುಭಾನ್ |೮೯|

Adhikarana 48 (89-90) · Śloka 90

ಬಹುಶ್ಲೇಷ್ಮ ಸರಕ್ತಂ ಚ ಮನ್ದವಾತಂ ಚಿರೋತ್ಥಿತಮ್ ||೮೯|| ಕೌಟಜಂ ಫಾಣಿತಂ ವಾಽಪಿ ಹನ್ತ್ಯತೀಸಾರಮೋಜಸಾ | ಅಮ್ಬಷ್ಠಾದಿಮಧುಯುತಂ ಪಿಪ್ಪಲ್ಯಾದಿಸಮನ್ವಿತಮ್ ||೯೦||

Adhikarana 49 (91) · Śloka 91

ಪೃಶ್ನಿಪರ್ಣೀಬಲಾಬಿಲ್ವವಾಲಕೋತ್ಪಲಧಾನ್ಯಕೈಃ | ಸನಾಗರೈಃ ಪಿಬೇತ್ ಪೇಯಾಂ ಸಾಧಿತಾಮುದರಾಮಯೀ ||೯೧||

Adhikarana 50 (92) · Śloka 93

ಅರಲುತ್ವಕ್ ಪ್ರಿಯಙ್ಗುಂ ಚ ಮಧುಕಂ ದಾಡಿಮಾಙ್ಕುರಾನ್ | ಆವಾಪ್ಯ ಪಿಷ್ಟ್ವಾ ದಧನಿ ಯವಾಗೂಂ ಸಾಧಯೇದ್ದ್ರವಾಮ್ ||೯೨|| ಏಷಾ ಸರ್ವಾನತೀಸಾರಾನ್ ಹನ್ತಿ ಪಕ್ವಾನಸಂಶಯಮ್ |೯೩|

Adhikarana 51 (93-94) · Śloka 94

ರಸಾಞ್ಜನಂ ಸಾತಿವಿಷಂ ತ್ವಗ್ಬೀಜಂ ಕೌಟಜಂ ತಥಾ ||೯೩|| ಧಾತಕೀ ನಾಗರಂ ಚೈವ ಪಾಯಯೇತ್ತಣ್ಡುಲಾಮ್ಬುನಾ | ಸಶೂಲಂ ರಕ್ತಜಂ ಘ್ನನ್ತಿ ಏತೇ ಮಧುಸಮಾಯುತಾಃ ||೯೪||

Adhikarana 52 (95) · Śloka 96

ಮಧುಕಂ ಬಿಲ್ವಪೇಶೀ ಚ ಶರ್ಕರಾಮಧುಸಂಯುತಾ | ಅತೀಸಾರಂ ನಿಹನ್ಯುಶ್ಚ ಶಾಲಿಷಷ್ಟಿಕಯೋಃ ಕಣಾಃ ||೯೫|| ತದ್ವಲ್ಲೀಢಂ ಮಧುಯುತಂ ಬದರೀಮೂಲಮೇವ ತು |೯೬|

Adhikarana 53 (96) · Śloka 97

ಬದರ್ಯರ್ಜುನಜಮ್ಬ್ವಾಮ್ರಶಲ್ಲಕೀವೇತಸತ್ವಚಃ ||೯೬|| ಶರ್ಕರಾಕ್ಷೌದ್ರಸಂಯುಕ್ತಾಃ ಪೀತಾ ಘ್ನನ್ತ್ಯುದರಾಮಯಮ್ |೯೭|

Adhikarana 54 (97) · Śloka 98

ಏತೈರೇವ ಯವಾಗೂಂಶ್ಚ ಷಡಾನ್ ಯೂಷಾಂಶ್ಚ ಕಾರಯೇತ್ ||೯೭|| ಪಾನೀಯಾನಿ ಚ ತೃಷ್ಣಾಸು ದ್ರವ್ಯೇಷ್ವೇತೇಷು ಬುದ್ಧಿಮಾನ್ |೯೮|

Adhikarana 55 (98) · Śloka 99

ಕೃತಂ ಶಾಲ್ಮಲಿವೃನ್ತೇಷು ಕಷಾಯಂ ಹಿಮಸಞ್ಜ್ಞಿತಮ್ ||೯೮|| ನಿಶಾಪರ್ಯುಷಿತಂ ಪೇಯಂ ಸಕ್ಷೌದ್ರಂ ಮಧುಕಾನ್ವಿತಮ್ |೯೯|

Adhikarana 56 (99-102) · Śloka 102

ವಿಬದ್ಧವಾತವಿಟ್ ಶೂಲಪರೀತಃ ಸಪ್ರವಾಹಿಕಃ ||೯೯|| ಸರಕ್ತಪಿತ್ತಶ್ಚ ಪಯಃ ಪಿಬೇತ್ತೃಷ್ಣಾಸಮನ್ವಿತಃ | ಯಥಾಽಮೃತಂ ತಥಾ ಕ್ಷೀರಮತೀಸಾರೇಷು ಪೂಜಿತಮ್ ||೧೦೦|| ಚಿರೋತ್ಥಿತೇಷು ತತ್ ಪೇಯಮಪಾಂ ಭಾಗೈಸ್ತ್ರಿಭಿಃ ಶೃತಮ್ | ದೋಷಶೇಷಂ ಹರೇತ್ತದ್ಧಿ ತಸ್ಮಾತ್ಪಥ್ಯತಮಂ ಸ್ಮೃತಮ್ ||೧೦೧|| ಹಿತಃ ಸ್ನೇಹವಿರೇಕೋ ವಾ ಬಸ್ತಯಃ ಪಿಚ್ಛಿಲಾಶ್ಚ ಯೇ | ಪಿಚ್ಛಿಲಸ್ವರಸೇ ಸಿದ್ಧಂ ಹಿತಂ ಚ ಘೃತಮುಚ್ಯತೇ ||೧೦೨||

Adhikarana 57 (103) · Śloka 104

ಶಕೃತಾ ಯಸ್ತು ಸಂಸೃಷ್ಟಮತಿಸಾರ್ಯೇತ ಶೋಣಿತಮ್ | ಪ್ರಾಕ್ ಪಶ್ಚಾದ್ವಾ ಪುರೀಷಸ್ಯ ಸರುಕ್ ಸಪರಿಕರ್ತಿಕಃ ||೧೦೩|| ಕ್ಷೀರಿಶುಙ್ಗಾಶೃತಂ ಸರ್ಪಿಃ ಪಿಬೇತ್ ಸಕ್ಷೌದ್ರಶರ್ಕರಮ್ |೧೦೪|

Adhikarana 58 (104-105) · Śloka 105

ದಾರ್ವೀತ್ವಕ್ಪಿಪ್ಪಲೀಶುಣ್ಠೀಲಾಕ್ಷಾಶಕ್ರಯವೈರ್ಘೃತಮ್ ||೧೦೪|| ಸಂಯುಕ್ತಂ ಭದ್ರರೋಹಿಣ್ಯಾ ಪಕ್ವಂ ಪೇಯಾದಿಮಿಶ್ರಿತಮ್ | ತ್ರಿದೋಷಮಪ್ಯತೀಸಾರಂ ಪೀತಂ ಹನ್ತಿ ಸುದಾರುಣಮ್ ||೧೦೫||

Adhikarana 59 (106) · Śloka 106

ಗೌರವೇ ವಮನಂ ಪಥ್ಯಂ ಯಸ್ಯ ಸ್ಯಾತ್ ಪ್ರಬಲಃ ಕಫಃ | ಜ್ವರೇ ದಾಹೇ ಸವಿಡ್ಬನ್ಧೇ ಮಾರುತಾದ್ರಕ್ತಪಿತ್ತವತ್ ||೧೦೬||

Adhikarana 60 (107) · Śloka 107

ಸಮ್ಪಕ್ವೇ ಬಹುದೋಷೇ ಚ ವಿಬನ್ಧೇ ಮೂತ್ರಶೋಧನೈಃ | ಕಾರ್ಯಮಾಸ್ಥಾಪನಂ ಕ್ಷಿಪ್ರಂ ತಥಾ ಚೈವಾನುವಾಸನಮ್ ||೧೦೭||

Adhikarana 61 (108) · Śloka 108

ಪ್ರವಾಹಣೇ ಗುದಭ್ರಂಶೇ ಮೂತ್ರಾಘಾತೇ ಕಟಿಗ್ರಹೇ | ಮಧುರಾಮ್ಲೈಃ ಶೃತಂ ತೈಲಂ ಸರ್ಪಿರ್ವಾಽಪ್ಯನುವಾಸನಮ್ ||೧೦೮||

Adhikarana 62 (109) · Śloka 109

ಗುದಪಾಕಸ್ತು ಪಿತ್ತೇನ ಯಸ್ಯ ಸ್ಯಾದಹಿತಾಶಿನಃ | ತಸ್ಯ ಪಿತ್ತಹರಾಃ ಸೇಕಾಸ್ತತ್ಸಿದ್ಧಾಶ್ಚಾನುವಾಸನಾಃ ||೧೦೯||

Adhikarana 63 (110) · Śloka 110

ದಧಿಮಣ್ಡಸುರಾಬಿಲ್ವಸಿದ್ಧಂ ತೈಲಂ ಸಮಾರುತೇ | ಭೋಜನೇ ಚ ಹಿತಂ ಕ್ಷೀರಂ ಕಚ್ಛುರಾಮೂಲಸಾಧಿತಮ್ ||೧೧೦||

Adhikarana 64 (111) · Śloka 111

ಅಲ್ಪಾಲ್ಪಂ ಬಹುಶೋ ರಕ್ತಂ ಸರುಗ್ಯ ಉಪವೇಶ್ಯತೇ | ಯದಾ ವಾಯುರ್ವಿಬದ್ಧಶ್ಚ ಪಿಚ್ಛಾಬಸ್ತಿಸ್ತದಾ ಹಿತಃ ||೧೧೧||

Adhikarana 65 (112) · Śloka 112

ಪ್ರಾಯೇಣ ಗುದದೌರ್ಬಲ್ಯಂ ದೀರ್ಘಕಾಲಾತಿಸಾರಿಣಾಮ್ | ಭವೇತ್ತಸ್ಮಾದ್ಧಿತಂ ತೇಷಾಂ ಗುದೇ ತೈಲಾವಚಾರಣಮ್ ||೧೧೨||

Adhikarana 66 (113) · Śloka 113

ಕಪಿತ್ಥಶಾಲ್ಮಲೀಫಞ್ಜೀವಟಕಾರ್ಪಾಸದಾಡಿಮಾಃ | ಯೂಥಿಕಾ ಕಚ್ಛುರಾ ಶೇಲುಃ ಶಣಶ್ಚುಚ್ಚೂಶ್ಚ ದಾಧಿಕಾಃ ||೧೧೩||

Adhikarana 67 (114) · Śloka 115

ಶಾಲಪರ್ಣೀ ಪೃಶ್ನಿಪರ್ಣೀ ಬೃಹತೀ ಕಣ್ಟಕಾರಿಕಾ | ಬಲಾಶ್ವದಂಷ್ಟ್ರಾಬಿಲ್ವಾನಿ ಪಾಠಾನಾಗರಧಾನ್ಯಕಮ್ ||೧೧೪|| ಏಷ ಆಹಾರಸಂಯೋಗೇ ಹಿತಃ ಸರ್ವಾತಿಸಾರಿಣಾಮ್ |೧೧೫|

Adhikarana 68 (115) · Śloka 115

ತಿಲಕಲ್ಕೋ ಹಿತಶ್ಚಾತ್ರ ಮೌದ್ಗೋ ಮುದ್ಗರಸಸ್ತಥಾ ||೧೧೫||

Adhikarana 69 (116) · Śloka 117

ಪಿತ್ತಾತಿಸಾರೀ ಯೋ ಮರ್ತ್ಯಃ ಪಿತ್ತಲಾನ್ಯತಿಷೇವತೇ | ಪಿತ್ತಂ ಪ್ರದುಷ್ಟಂ ತಸ್ಯಾಶು ರಕ್ತಾತೀಸಾರಮಾವಹೇತ್ ||೧೧೬|| ಜ್ವರಂ ಶೂಲಂ ತೃಷಾಂ ದಾಹಂ ಗುದಪಾಕಂ ಚ ದಾರುಣಮ್ |೧೧೭|

Adhikarana 70 (117-118) · Śloka 119

ಯೋ ರಕ್ತಂ ಶಕೃತಃ ಪೂರ್ವಂ ಪಶ್ಚಾದ್ವಾ ಪ್ರತಿಸಾರ್ಯತೇ ||೧೧೭|| ಸ ಪಲ್ಲವೈರ್ವಟಾದೀನಾಂ ಸಸರ್ಪಿಃ ಸಾಧಿತಂ ಪಯಃ | ಪಿಬೇತ್ ಸಶರ್ಕರಾಕ್ಷೌದ್ರಮಥವಾಽಪ್ಯಭಿಮಥ್ಯ ತತ್ ||೧೧೮|| ನವನೀತಮಥೋ ಲಿಹ್ಯಾತ್ತಕ್ರಂ ಚಾನುಪಿಬೇತ್ತತಃ |೧೧೯|

Adhikarana 71 (119) · Śloka 120

ಪ್ರಿಯಾಲಶಾಲ್ಮಲೀಪ್ಲಕ್ಷಶಲ್ಲಕೀತಿನಿಶತ್ವಚಃ ||೧೧೯|| ಕ್ಷೀರೇ ವಿಮೃದಿತಾಃ ಪೀತಾಃ ಸಕ್ಷೌದ್ರಾ ರಕ್ತನಾಶನಾಃ |೧೨೦|

Adhikarana 72 (120) · Śloka 121

ಮಧುಕಂ ಶರ್ಕರಾಂ ಲೋಧ್ರಂ ಪಯಸ್ಯಾಮಥ ಸಾರಿವಾಮ್ ||೧೨೦|| ಪಿಬೇಚ್ಛಾಗೇನ ಪಯಸಾ ಸಕ್ಷೌದ್ರಂ ರಕ್ತನಾಶನಮ್ |೧೨೧|

Adhikarana 73 (121) · Śloka 122

ಮಞ್ಜಿಷ್ಠಾಂ ಸಾರಿವಾಂ ಲೋಧ್ರಂ ಪದ್ಮಕಂ ಕುಮುದೋತ್ಪಲಮ್ ||೧೨೧|| ಪಿಬೇತ್ ಪದ್ಮಾಂ ಚ ದುಗ್ಧೇನ ಛಾಗೇನಾಸೃಕ್ಪ್ರಶಾನ್ತಯೇ |೧೨೨|

Adhikarana 74 (122-124) · Śloka 124

ಶರ್ಕರೋತ್ಪಲಲೋಧ್ರಾಣಿ ಸಮಙ್ಗಾ ಮಧುಕಂ ತಿಲಾಃ ||೧೨೨|| ತಿಲಾಃ ಕೃಷ್ಣಾಃ ಸಯಷ್ಟ್ಯಾಹ್ವಾಃ ಸಮಙ್ಗಾ ಚೋತ್ಪಲಾನಿ ಚ | ತಿಲಾ ಮೋಚರಸೋ ಲೋಧ್ರಂ ತಥೈವ ಮಧುಕೋತ್ಪಲಮ್ ||೧೨೩|| ಕಚ್ಛುರಾ ತಿಲಕಲ್ಕಶ್ಚ ಯೋಗಾಶ್ಚತ್ವಾರ ಏವ ಚ | ಆಜೇನ ಪಯಸಾ ಪೇಯಾಃ ಸರಕ್ತೇ ಮಧುಸಂಯುತಾಃ ||೧೨೪||

Adhikarana 75 (125) · Śloka 125

ದ್ರವೇ ಸರಕ್ತೇ ಸ್ರವತಿ ಬಾಲಬಿಲ್ವಂ ಸಫಾಣಿತಮ್ | ಸಕ್ಷೌದ್ರತೈಲಂ ಪ್ರಾಗೇವ ಲಿಹ್ಯಾದಾಶು ಹಿತಂ ಹಿ ತತ್ ||೧೨೫||

Adhikarana 76 (126) · Śloka 126

ಕೋಶಕಾರಂ ಘೃತೇ ಭೃಷ್ಟಂ ಲಾಜಚೂರ್ಣಂ ಸಿತಾ ಮಧು | ಸಶೂಲಂ ರಕ್ತಪಿತ್ತೋತ್ಥಂ ಲೀಢಂ ಹನ್ತ್ಯುದರಾಮಯಮ್ ||೧೨೬||

Adhikarana 77 (127) · Śloka 127

ಬಿಲ್ವಮಧ್ಯಂ ಸಮಧುಕಂ ಶರ್ಕರಾಕ್ಷೌದ್ರಸಂಯುತಮ್ | ತಣ್ಡುಲಾಮ್ಬುಯುತೋ ಯೋಗಃ ಪಿತ್ತರಕ್ತೋತ್ಥಿತಂ ಜಯೇತ್ ||೧೨೭||

Adhikarana 78 (128) · Śloka 128

ಯೋಗಾನ್ ಸಾಙ್ಗ್ರಾಹಿಕಾಂಶ್ಚಾನ್ಯಾನ್ ಪಿಬೇತ್ಸಕ್ಷೌದ್ರಶರ್ಕರಾನ್ | ನ್ಯಗ್ರೋಧಾದಿಷು ಕುರ್ಯಾಚ್ಚ ಪುಟಪಾಕಾನ್ ಯಥೇರಿತಾನ್ ||೧೨೮||

Adhikarana 79 (129) · Śloka 129

ಗುದಪಾಕೇ ಚ ಯೇ ಉಕ್ತಾಸ್ತೇಽತ್ರಾಪಿ ವಿಧಯಃ ಸ್ಮೃತಾಃ |೧೨೯|

Adhikarana 80 (129) · Śloka 129

ರುಜಾಯಾಂ ಚಾಪ್ರಶಾಮ್ಯನ್ತ್ಯಾಂ ಪಿಚ್ಛಾಬಸ್ತಿರ್ಹಿತೋ ಭವೇತ್ ||೧೨೯||

Adhikarana 81 (130-131) · Śloka 131

ಸಕ್ತವಿಡ್ ದೋಷಬಹುಲಂ ದೀಪ್ತಾಗ್ನಿರ್ಯೋಽತಿಸಾರ್ಯತೇ | ವಿಡಙ್ಗತ್ರಿಫಲಾಕೃಷ್ಣಾಕಷಾಯೈಸ್ತಂ ವಿರೇಚಯೇತ್ ||೧೩೦|| ಅಥವೈರಣ್ಡಸಿದ್ಧೇನ ಪಯಸಾ ಕೇವಲೇನ ವಾ | ಯವಾಗೂರ್ವಿತರೇಚ್ಚಾಸ್ಯ ವಾತಘ್ನೈರ್ದೀಪನೈಃ ಕೃತಾಃ ||೧೩೧||

Adhikarana 82 (132) · Śloka 132

ದೀಪ್ತಾಗ್ನಿರ್ನಿಷ್ಪುರೀಷೋ ಯಃ ಸಾರ್ಯತೇ ಫೇನಿಲಂ ಶಕೃತ್ | ಸ ಪಿಬೇತ್ ಫಾಣಿತಂ ಶುಣ್ಠೀದಧಿತೈಲಪಯೋಘೃತಮ್ ||೧೩೨||

Adhikarana 83 (133) · Śloka 133

ಸ್ವಿನ್ನಾನಿ ಗುಡತೈಲಾಭ್ಯಾಂ ಭಕ್ಷಯೇದ್ಬದರಾಣಿ ಚ |೧೩೩|

Adhikarana 84 (133) · Śloka 133

ಸ್ವಿನ್ನಾನಿ ಪಿಷ್ಟವದ್ವಾಽಪಿ ಸಮಂ ಬಿಲ್ವಶಲಾಟುಭಿಃ ||೧೩೩||

Adhikarana 85 (134) · Śloka 134

ದಧ್ನೋಪಯುಜ್ಯ ಕುಲ್ಮಾಷಾನ್ ಶ್ವೇತಾಮನುಪಿಬೇತ್ ಸುರಾಮ್ |೧೩೪|

Adhikarana 86 (134) · Śloka 135

ಶಶಮಾಂಸಂ ಸರುಧಿರಂ ಸಮಙ್ಗಾಂ ಸಘೃತಂ ದಧಿ ||೧೩೪|| ಖಾದೇದ್ವಿಪಾಚ್ಯ ಸೇವೇತ ಮೃದ್ವನ್ನಂ ಶಕೃತಃ ಕ್ಷಯೇ |೧೩೫|

Adhikarana 87 (135) · Śloka 136

ಸಂಸ್ಕೃತೋ ಯಮಕೇ ಮಾಷಯವಕೋಲರಸಃ ಶುಭಃ ||೧೩೫|| ಭೋಜನಾರ್ಥಂ ಪ್ರದಾತವ್ಯೋ ದಧಿದಾಡಿಮಸಾಧಿತಃ |೧೩೬|

Adhikarana 88 (136) · Śloka 137

ವಿಡಂ ಬಿಲ್ವಶಲಾಟೂನಿ ನಾಗರಂ ಚಾಮ್ಲಪೇಷಿತಮ್ ||೧೩೬|| ದಧ್ನಃ ಸರಶ್ಚ ಯಮಕೇ ಭೃಷ್ಟೋ ವರ್ಚಃಕ್ಷಯೇ ಹಿತಃ |೧೩೭|

Adhikarana 89 (137) · Śloka 137

ಸಶೂಲಂ ಕ್ಷೀಣವರ್ಚಾ ಯೋ ದೀಪ್ತಾಗ್ನಿರತಿಸಾರ್ಯತೇ | ಸ ಪಿಬೇದ್ದೀಪನೈರ್ಯುಕ್ತಂ ಸರ್ಪಿಃ ಸಙ್ಗ್ರಾಹಕೈಃ ಸಹ ||೧೩೭||

Adhikarana 90 (138) · Śloka 138

ವಾಯುಃ ಪ್ರವೃದ್ಧೋ ನಿಚಿತಂ ಬಲಾಸಂ ನುದತ್ಯಧಸ್ತಾದಹಿತಾಶನಸ್ಯ | ಪ್ರವಾಹಮಾಣಸ್ಯ ಮುಹುರ್ಮಲಾಕ್ತಂ ಪ್ರವಾಹಿಕಾಂ ತಾಂ ಪ್ರವದನ್ತಿ ತಜ್ಜ್ಞಾಃ ||೧೩೮||

Adhikarana 91 (139) · Śloka 140

ಪ್ರವಾಹಿಕಾ ವಾತಕೃತಾ ಸಶೂಲಾ ಪಿತ್ತಾತ್ ಸದಾಹಾ ಸಕಫಾ ಕಫಾಚ್ಚ | ಸಶೋಣಿತಾ ಶೋಣಿತಸಮ್ಭವಾ ತು ತಾಃ ಸ್ನೇಹರೂಕ್ಷಪ್ರಭವಾ ಮತಾಸ್ತು ||೧೩೯|| ತಾಸಾಮತೀಸಾರವದಾದಿಶೇಚ್ಚ ಲಿಙ್ಗಂ ಕ್ರಮಂ ಚಾಮವಿಪಕ್ವತಾಂ ಚ |೧೪೦|

Adhikarana 92 (140) · Śloka 141

ನ ಶಾನ್ತಿಮಾಯಾತಿ ವಿಲಙ್ಘನೈರ್ಯಾ ಯೋಗೈರುದೀರ್ಣಾ ಯದಿ ಪಾಚನೈರ್ವಾ ||೧೪೦|| ತಾಂ ಕ್ಷೀರಮೇವಾಶು ಶೃತಂ ನಿಹನ್ತಿ ತೈಲಂ ತಿಲಾಃ ಪಿಚ್ಛಿಲಬಸ್ತಯಶ್ಚ |೧೪೧|

Adhikarana 93 (141-142) · Śloka 143

ಆರ್ದ್ರೈಃ ಕುಶೈಃ ಸಮ್ಪರಿವೇಷ್ಟಿತಾನಿ ವೃನ್ತಾನ್ಯಥಾರ್ದ್ರಾಣಿ ಹಿ ಶಾಲ್ಮಲೀನಾಮ್ ||೧೪೧|| ಪಕ್ವಾನಿ ಸಮ್ಯಕ್ ಪುಟಪಾಕಯೋಗೇನಾಪೋಥ್ಯ ತೇಭ್ಯೋ ರಸಮಾದದೀತ | ಕ್ಷೀರಂ ಶೃತಂ ತೈಲಹವಿರ್ವಿಮಿಶ್ರಂ ಕಲ್ಕೇನ ಯಷ್ಟೀಮಧುಕಸ್ಯ ವಾಽಪಿ ||೧೪೨|| ಬಸ್ತಿಂ ವಿದಧ್ಯಾದ್ಭಿಷಗಪ್ರಮತ್ತಃ ಪ್ರವಾಹಿಕಾಮೂತ್ರಪುರೀಷಸಙ್ಗೇ |೧೪೩|

Adhikarana 94 (143) · Śloka 144

ದ್ವಿಪಞ್ಚಮೂಲೀಕ್ವಥಿತೇನ ಶೂಲೇ ಪ್ರವಾಹಮಾಣಸ್ಯ ಸಮಾಕ್ಷಿಕೇಣ ||೧೪೩|| ಕ್ಷೀರೇಣ ಚಾಸ್ಥಾಪನಮಗ್ರ್ಯಮುಕ್ತಂ... |೧೪೪|

Adhikarana 95 (144) · Śloka 144

...ತೈಲೇನ ಯುಞ್ಜ್ಯಾದನುವಾಸನಂ ಚ |೧೪೪|

Adhikarana 96 (144) · Śloka 144

ವಾತಘ್ನವರ್ಗೇ ಲವಣೇಷು ಚೈವ ತೈಲಂ ಚ ಸಿದ್ಧಂ ಹಿತಮನ್ನಪಾನೇ ||೧೪೪||

Adhikarana 97 (145) · Śloka 145

ಲೋಧ್ರಂ ವಿಡಂ ಬಿಲ್ವಶಲಾಟು ಚೈವ ಲಿಹ್ಯಾಚ್ಚ ತೈಲೇನ ಕಟುತ್ರಿಕಾಢ್ಯಮ್ |೧೪೫|

Adhikarana 98 (145-149) · Śloka 149

ದಧ್ನಾ ಸಸಾರೇಣ ಸಮಾಕ್ಷಿಕೇಣ ಭುಞ್ಜೀತ ನಿಶ್ಚಾ(ಸ್ಸಾ)ರಕಪೀಡಿತಸ್ತು ||೧೪೫|| ಸುತಪ್ತಕುಪ್ಯಕ್ವಥಿತೇನ ವಾಽಪಿ ಕ್ಷೀರೇಣ ಶೀತೇನ ಮಧುಪ್ಲುತೇನ | ಶೂಲಾರ್ದಿತೋ ವ್ಯೋಷವಿದಾರಿಗನ್ಧಾಸಿದ್ಧೇನ ದುಗ್ಧೇನ ಹಿತಾಯ ಭೋಜ್ಯಃ ||೧೪೬|| ವಾತಘ್ನಸಾಙ್ಗ್ರಾಹಿಕದೀಪನೀಯೈಃ ಕೃತಾನ್ ಷಡಾಂಶ್ಚಾಪ್ಯುಪಭೋಜಯೇಚ್ಚ | ಖಾದೇಚ್ಚ ಮತ್ಸ್ಯಾನ್ ರಸಮಾಪ್ನುಯಾಚ್ಚ ವಾತಘ್ನಸಿದ್ಧಂ ಸಘೃತಂ ಸತೈಲಮ್ ||೧೪೭|| ಏಣಾವ್ಯಜಾನಾಂ ತು ವಟಪ್ರವಾಲೈಃ ಸಿದ್ಧಾನಿ ಸಾರ್ಧಂ ಪಿಶಿತಾನಿ ಖಾದೇತ್ | ಮೇಧ್ಯ(ದ್ಯ)ಸ್ಯ ಸಿದ್ಧಂ ತ್ವಥ ವಾಽಪಿ ರಕ್ತಂ ಬಸ್ತಸ್ಯ ದಧ್ನಾ ಘೃತತೈಲಯುಕ್ತಮ್ ||೧೪೮|| ಖಾದೇತ್ ಪ್ರದೇಹೈಃ ಶಿಖಿಲಾವಜೈರ್ವಾ ಭುಞ್ಜೀತ ಯೂಷೈರ್ದಧಿಭಿಶ್ಚ ಮುಖ್ಯೈಃ | ಮಾಷಾನ್ ಸುಸಿದ್ಧಾನ್ ಘೃತಮಣ್ಡಯುಕ್ತಾನ್ ಖಾದೇಚ್ಚ ದಧ್ನಾ ಮರಿಚೋಪದಂಶಾನ್ ||೧೪೯||

Adhikarana 99 (150) · Śloka 151

ಮಹಾರುಜೇ ಮೂತ್ರಕೃಚ್ಛ್ರೇ ಭಿಷಗ್ ಬಸ್ತಿಂ ಪ್ರದಾಪಯೇತ್ | ಪಯೋಮಧುಘೃತೋನ್ಮಿಶ್ರಂ ಮಧುಕೋತ್ಪಲಸಾಧಿತಮ್ ||೧೫೦|| ಸ ಬಸ್ತಿಃ ಶಮಯೇತ್ತಸ್ಯ ರಕ್ತಂ ದಾಹಮಥೋ ಜ್ವರಮ್ |೧೫೧|

Adhikarana 100 (151) · Śloka 152

ಮಧುರೌಷಧಸಿದ್ಧಂ ಚ ಹಿತಂ ತಸ್ಯಾನುವಾಸನಮ್ ||೧೫೧|| ರಾತ್ರಾವಹನಿ ವಾ ನಿತ್ಯಂ ರುಜಾರ್ತೋ ಯೋ ಭವೇನ್ನರಃ |೧೫೨|

Adhikarana 101 (152-153) · Śloka 153

ಯಥಾ ಯಥಾ ಸತೈಲಃ ಸ್ಯಾದ್ವಾತಶಾನ್ತಿಸ್ತಥಾ ತಥಾ ||೧೫೨|| ಪ್ರಶಾನ್ತೇ ಮಾರುತೇ ಚಾಪಿ ಶಾನ್ತಿಂ ಯಾತಿ ಪ್ರವಾಹಿಕಾ | ತಸ್ಮಾತ್ ಪ್ರವಾಹಿಕಾರೋಗೇ ಮಾರುತಂ ಶಮಯೇದ್ಭಿಷಕ್ ||೧೫೩||

Adhikarana 102 (154) · Śloka 154

ಪಾಠಾಜಮೋದಾಕುಟಜೋತ್ಪಲಂ ಚ ಶುಣ್ಠೀ ಸಮಾ ಮಾಗಧಿಕಾಶ್ಚ ಪಿಷ್ಟಾಃ | ಸುಖಾಮ್ಬುಪೀತಾಃ ಶಮಯನ್ತಿ ರೋಗಂ... |೧೫೪|

Adhikarana 103 (154) · Śloka 154

... ಮೇಧ್ಯಾಣ್ಡಸಿದ್ಧಂ ಸಘೃತಂ ಪಯೋ ವಾ ||೧೫೪||

Adhikarana 104 (155) · Śloka 155

ಶುಣ್ಠೀಂ ಘೃತಂ ಸಕ್ಷವಕಂ ಸತೈಲಂ ವಿಪಾಚ್ಯ ಲೀಢ್ವಾಽಽಮಯಮಾಶು ಹನ್ಯಾತ್ |೧೫೫|

Adhikarana 105 (155) · Śloka 156

ಗಜಾಶನಾಕುಮ್ಭಿಕದಾಡಿಮಾನಾಂ ರಸೈಃ ಕೃತಾ ತೈಲಘೃತೇ ಸದಧ್ನಿ ||೧೫೫|| ಬಿಲ್ವಾನ್ವಿತಾ ಪಥ್ಯತಮಾ ಯವಾಗೂ... |೧೫೬|

Adhikarana 106 (156) · Śloka 156

...ರ್ಧಾರೋಷ್ಣದುಗ್ಧಸ್ಯ ತಥಾ ಚ ಪಾನಮ್ |೧೫೬|

Adhikarana 107 (156-157) · Śloka 157

ಲಘೂನಿ ಪಥ್ಯಾನ್ಯಥ ದೀಪನಾನಿ ಸ್ನಿಗ್ಧಾನಿ ಭೋಜ್ಯಾನ್ಯುದರಾಮಯೇಷು ||೧೫೬|| ಹಿತಾಯ ನಿತ್ಯಂ ವಿತರೇದ್ವಿಭಜ್ಯ ಯೋಗಾಂಶ್ಚ ತಾಂಸ್ತಾನ್ ಭಿಷಗಪ್ರಮತ್ತಃ ||೧೫೭||

Adhikarana 108 (158) · Śloka 158

ತೃಷ್ಣಾಪನಯನೀ ಲಘ್ವೀ ದೀಪನೀ ಬಸ್ತಿಶೋಧನೀ | ಜ್ವರೇ ಚೈವಾತಿಸಾರೇ ಚ ಯವಾಗೂಃ ಸರ್ವದಾ ಹಿತಾ ||೧೫೮||

Adhikarana 109 (159) · Śloka 160

ರೂಕ್ಷಾಜ್ಜಾತೇ ಕ್ರಿಯಾ ಸ್ನಿಗ್ಧಾ ರೂಕ್ಷಾ ಸ್ನೇಹನಿಮಿತ್ತಜೇ | ಭಯಜೇ ಸಾನ್ತ್ವನಾಪೂರ್ವಾ ಶೋಕಜೇ ಶೋಕನಾಶಿನೀ ||೧೫೯|| ವಿಷಾರ್ಶಃಕೃಮಿಸಮ್ಭೂತೇ ಹಿತಾ ಚೋಭಯಶರ್ಮದಾ |೧೬೦|

Adhikarana 110 (160) · Śloka 160

ಛರ್ದಿಮೂರ್ಚ್ಛಾತೃಡಾದ್ಯಾಂಶ್ಚ ಸಾಧಯೇದವಿರೋಧತಃ ||೧೬೦||

Adhikarana 111 (161) · Śloka 161

ಸಮವಾಯೇ ತು ದೋಷಾಣಾಂ ಪೂರ್ವಂ ಪಿತ್ತಮುಪಾಚರೇತ್ | ಜ್ವರೇ ಚೈವಾತಿಸಾರೇ ಚ ಸರ್ವತ್ರಾನ್ಯತ್ರ ಮಾರುತಮ್ ||೧೬೧||

Adhikarana 112 (162) · Śloka 162

ಯಸ್ಯೋಚ್ಚಾರಂ ವಿನಾ ಮೂತ್ರಂ ಸಮ್ಯಗ್ವಾಯುಶ್ಚ ಗಚ್ಛತಿ | ದೀಪ್ತಾಗ್ನೇರ್ಲಘುಕೋಷ್ಠಸ್ಯ ಸ್ಥಿತಸ್ತಸ್ಯೋದರಾಮಯಃ ||೧೬೨||

Adhikarana 113 (163) · Śloka 163

ಕರ್ಮಜಾ ವ್ಯಾಧಯಃ ಕೇಚಿದ್ದೋಷಜಾಃ ಸನ್ತಿ ಚಾಪರೇ | ಕರ್ಮದೋಷೋದ್ಭವಾಶ್ಚಾನ್ಯೇ... |೧೬೩|

Adhikarana 114 (163) · Śloka 164

... ಕರ್ಮಜಾಸ್ತೇಷ್ವಹೇತುಕಾಃ ||೧೬೩|| ನಶ್ಯನ್ತಿ ತ್ವಕ್ರಿಯಾಭಿಸ್ತೇ ಕ್ರಿಯಾಭಿಃ ಕರ್ಮಸಙ್ಕ್ಷಯೇ |೧೬೪|

Adhikarana 115 (164) · Śloka 164

ಶಾಮ್ಯನ್ತಿ ದೋಷಸಮ್ಭೂತಾ ದೋಷಸಙ್ಕ್ಷಯಹೇತುಭಿಃ ||೧೬೪||

Adhikarana 116 (165) · Śloka 165

ತೇಷಾಮಲ್ಪನಿದಾನಾ ಯೇ ಪ್ರತಿಕಷ್ಟಾ ಭವನ್ತಿ ಚ | ಮೃದವೋ ಬಹುದೋಷಾ ವಾ ಕರ್ಮದೋಷೋದ್ಭವಾಸ್ತು ತೇ ||೧೬೫||

Adhikarana 117 (166) · Śloka 166

ಕರ್ಮದೋಷಕ್ಷಯಕೃತಾ ತೇಷಾಂ ಸಿದ್ಧಿರ್ವಿಧೀಯತೇ |೧೬೬|

Adhikarana 118 (166) · Śloka 166

ದುಷ್ಯತಿ ಗ್ರಹಣೀ ಜನ್ತೋರಗ್ನಿಸಾದನಹೇತುಭಿಃ ||೧೬೬||

Adhikarana 119 (167-168) · Śloka 168

ಅತಿಸಾರೇ ನಿವೃತ್ತೇಽಪಿ ಮನ್ದಾಗ್ನೇರಹಿತಾಶಿನಃ | ಭೂಯಃ ಸನ್ದೂಷಿತೋ ವಹ್ನಿರ್ಗ್ರಹಣೀಮಭಿದೂಷಯೇತ್ ||೧೬೭|| ತಸ್ಮಾತ್ಕಾರ್ಯಃ ಪರೀಹಾರಸ್ತ್ವತೀಸಾರೇ ವಿರಿಕ್ತವತ್ | ಯಾವನ್ನ ಪ್ರಕೃತಿಸ್ಥಃ ಸ್ಯಾದ್ದೋಷತಃ ಪ್ರಾಣತಸ್ತಥಾ ||೧೬೮||

Adhikarana 120 (169) · Śloka 169

ಷಷ್ಠೀ ಪಿತ್ತಧರಾ ನಾಮ ಯಾ ಕಲಾ ಪರಿಕೀರ್ತಿತಾ | ಪಕ್ವಾಮಾಶಯಮಧ್ಯಸ್ಥಾ ಗ್ರಹಣೀ ಸಾ ಪ್ರಕೀರ್ತಿತಾ ||೧೬೯||

Adhikarana 121 (170) · Śloka 170

ಗ್ರಹಣ್ಯಾ ಬಲಮಗ್ನಿರ್ಹಿ ಸ ಚಾಪಿ ಗ್ರಹಣೀಂ ಶ್ರಿತಃ | ತಸ್ಮಾತ್ ಸನ್ದೂಷಿತೇ ವಹ್ನೌ ಗ್ರಹಣೀ ಸಮ್ಪ್ರದುಷ್ಯತಿ ||೧೭೦||

Adhikarana 122 (171-172) · Śloka 172

ಏಕಶಃ ಸರ್ವಶಶ್ಚೈವ ದೋಷೈರತ್ಯರ್ಥಮುಚ್ಛ್ರಿತೈಃ | ಸಾ ದುಷ್ಟಾ ಬಹುಶೋ ಭುಕ್ತಮಾಮಮೇವ ವಿಮುಞ್ಚತಿ ||೧೭೧|| ಪಕ್ವಂ ವಾ ಸರುಜಂ ಪೂತಿ ಮುಹುರ್ಬದ್ಧಂ ಮುಹುರ್ದ್ರವಮ್ | ಗ್ರಹಣೀರೋಗಮಾಹುಸ್ತಮಾಯುರ್ವೇದವಿದೋ ಜನಾಃ ||೧೭೨||

Adhikarana 123 (173) · Śloka 173

ತಸ್ಯೋತ್ಪತ್ತೌ ವಿದಾಹೋಽನ್ನೇ ಸದನಾಲಸ್ಯತೃಟ್ಕ್ಲಮಾಃ | ಬಲಕ್ಷಯೋಽರುಚಿಃ ಕಾಸಃ ಕರ್ಣಕ್ಷ್ವೇಡೋಽನ್ತ್ರಕೂಜನಮ್ ||೧೭೩||

Adhikarana 124 (174-175) · Śloka 175

ಅಥ ಜಾತೇ ಭವೇಜ್ಜನ್ತುಃ ಶೂನಪಾದಕರಃ ಕೃಶಃ | ಪರ್ವರುಗ್ಲೌಲ್ಯತೃಟ್ಛರ್ದಿಜ್ವರಾರೋಚಕದಾಹವಾನ್ ||೧೭೪|| ಉದ್ಗಿರೇಚ್ಛುಕ್ತತಿಕ್ತಾಮ್ಲಲೋಹಧೂಮಾಮಗನ್ಧಿಕಮ್ | ಪ್ರಸೇಕಮುಖವೈರಸ್ಯತಮಕಾರುಚಿಪೀಡಿತಃ ||೧೭೫||

Adhikarana 125 (176) · Śloka 176

ವಾತಾಚ್ಛೂಲಾಧಿಕೈಃ ಪಾಯುಹೃತ್ಪಾರ್ಶ್ವೋದರಮಸ್ತಕೈಃ | ಪಿತ್ತಾತ್ ಸದಾಹೈರ್ಗುರುಭಿಃ ಕಫಾತ್ತ್ರಿಭ್ಯಸ್ತ್ರಿಲಕ್ಷಣೈಃ ||೧೭೬||

Adhikarana 126 (177) · Śloka 177

ದೋಷವರ್ಣೈರ್ನಖೈಸ್ತದ್ವದ್ವಿಣ್ಮೂತ್ರನಯನಾನನೈಃ | ಹೃತ್ಪಾಣ್ಡೂದರಗುಲ್ಮಾರ್ಶಃಪ್ಲೀಹಾಶಙ್ಖೀ ಚ ಮಾನವಃ ||೧೭೭||

Adhikarana 127 (178-180) · Śloka 181

ಯಥಾದೋಷೋಚ್ಛ್ರಯಂ ತಸ್ಯ ವಿಶುದ್ಧಸ್ಯ ಯಥಾಕ್ರಮಮ್ | ಪೇಯಾದಿಂ ವಿತರೇತ್ ಸಮ್ಯಗ್ದೀಪನೀಯೋಪಸಮ್ಭೃತಮ್ ||೧೭೮|| ತತಃ ಪಾಚನಸಙ್ಗ್ರಾಹಿದೀಪನೀಯಗಣತ್ರಯಮ್ | ಪಿಬೇತ್ ಪ್ರಾತಃ ಸುರಾರಿಷ್ಟಸ್ನೇಹಮೂತ್ರಸುಖಾಮ್ಬುಭಿಃ ||೧೭೯|| ತಕ್ರೇಣ ವಾಽಥ ತಕ್ರಂ ವಾ ಕೇವಲಂ ಹಿತಮುಚ್ಯತೇ | ಕೃಮಿಗುಲ್ಮೋದರಾರ್ಶೋಘ್ನೀಃ ಕ್ರಿಯಾಶ್ಚಾತ್ರಾವಚಾರಯೇತ್ ||೧೮೦|| ಚೂರ್ಣಂ ಹಿಙ್ಗ್ವಾದಿಕಂ ಚಾತ್ರ ಘೃತಂ ವಾ ಪ್ಲೀಹನಾಶನಮ್ |೧೮೧|

Adhikarana 128 (181) · Śloka 182

ಕಲ್ಕೇನ ಮಗಧಾದೇಶ್ಚ ಚಾಙ್ಗೇರೀಸ್ವರಸೇನ ಚ ||೧೮೧|| ಚತುರ್ಗುಣೇನ ದಧ್ನಾ ಚ ಘೃತಂ ಸಿದ್ಧಂ ಹಿತಂ ಭವೇತ್ |೧೮೨|

Adhikarana 129 (182) · Śloka 182

ಸರ್ವಥಾ ದೀಪನಂ ಸರ್ವಂ ಗ್ರಹಣೀರೋಗಿಣಾಂ ಹಿತಮ್ ||೧೮೨||

Adhikarana 130 (183) · Śloka 183

ಜ್ವರಾದೀನವಿರೋಧಾಚ್ಚ ಸಾಧಯೇತ್ ಸ್ವೈಶ್ಚಿಕಿತ್ಸಿತೈಃ ||೧೮೩||

Adhikarana puShpikA · Śloka 40

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕಾಯಚಿಕಿತ್ಸಾತನ್ತ್ರೇಽತಿಸಾರಪ್ರತಿಷೇಧೋ ನಾಮ (ದ್ವಿತೀಯೋಽಧ್ಯಾಯಃ, ಆದಿತಃ) ಚತ್ವಾರಿಂಶೋಽಧ್ಯಾಯಃ ||೪೦||