52. kāsapratiṣēdhādhyāyaḥ

Adhikarana 1 (1-2) · Śloka 2

ಅಥಾತಃ ಕಾಸಪ್ರತಿಷೇಧಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಉಕ್ತಾ ಯೇ ಹೇತವೋ ನೄಣಾಂ ರೋಗಯೋಃ ಶ್ವಾಸಹಿಕ್ಕಯೋಃ | ಕಾಸಸ್ಯಾಪಿ ಚ ವಿಜ್ಞೇಯಾಸ್ತ ಏವೋತ್ಪತ್ತಿಹೇತವಃ ||೩||

Adhikarana 3 (4-5) · Śloka 5

ಧೂಮೋಪಘಾತಾದ್ರಜಸಸ್ತಥೈವ ವ್ಯಾಯಾಮರೂಕ್ಷಾನ್ನನಿಷೇವಣಾಚ್ಚ | ವಿಮಾರ್ಗಗತ್ವಾದಪಿ ಭೋಜನಸ್ಯ ವೇಗಾವರೋಧಾತ್ ಕ್ಷವಥೋಸ್ತಥೈವ ||೪|| ಪ್ರಾಣೋ ಹ್ಯುದಾನಾನುಗತಃ ಪ್ರದುಷ್ಟಃ ಸಮ್ಭಿನ್ನಕಾಂಸ್ಯಸ್ವನತುಲ್ಯಘೋಷಃ | ನಿರೇತಿ ವಕ್ತ್ರಾತ್ ಸಹಸಾ ಸದೋಷಃ ಕಾಸಃ ಸ ವಿದ್ವದ್ಭಿರುದಾಹೃತಸ್ತು ||೫||

Adhikarana 4 (6) · Śloka 6

ಸ ವಾತಪಿತ್ತಪ್ರಭವಃ ಕಫಾಚ್ಚ ಕ್ಷತಾತ್ತಥಾಽನ್ಯಃ ಕ್ಷಯಜೋಽಪರಶ್ಚ | ಪಞ್ಚಪ್ರಕಾರಃ ಕಥಿತೋ ಭಿಷಗ್ಭಿರ್ವಿವರ್ಧಿತೋ ಯಕ್ಷ್ಮವಿಕಾರಕೃತ್ ಸ್ಯಾತ್ ||೬||

Adhikarana 5 (7) · Śloka 7

ಭವಿಷ್ಯತಸ್ತಸ್ಯ ತು ಕಣ್ಠಕಣ್ಡೂರ್ಭೋಜ್ಯೋಪರೋಧೋ ಗಲತಾಲುಲೇಪಃ | ಸ್ವಶಬ್ದವೈಷಮ್ಯಮರೋಚಕೋಽಗ್ನಿಸಾದಶ್ಚ ಲಿಙ್ಗಾನಿ ಭವನ್ತ್ಯಮೂನಿ ||೭||

Adhikarana 6 (8) · Śloka 8

ಹೃಚ್ಛಙ್ಖಮೂರ್ಧೋದರಪಾರ್ಶ್ವಶೂಲೀ ಕ್ಷಾಮಾನನಃ ಕ್ಷೀಣಬಲಸ್ವರೌಜಾಃ | ಪ್ರಸಕ್ತಮನ್ತಃಕಫಮೀರಣೇನ ಕಾಸೇತ್ತು ಶುಷ್ಕಂ ಸ್ವರಭೇದಯುಕ್ತಃ ||೮||

Adhikarana 7 (9) · Śloka 9

ಉರೋವಿದಾಹಜ್ವರವಕ್ತ್ರಶೋಷೈರಭ್ಯರ್ದಿತಸ್ತಿಕ್ತಮುಖಸ್ತೃಷಾರ್ತಃ | ಪಿತ್ತೇನ ಪೀತಾನಿ ವಮೇತ್ ಕಟೂನಿ ಕಾಸೇತ್ ಸ ಪಾಣ್ಡುಃ ಪರಿದಹ್ಯಮಾನಃ ||೯||

Adhikarana 8 (10) · Śloka 10

ಪ್ರ(ವಿ)ಲಿಪ್ಯಮಾನೇನ ಮುಖೇನ ಸೀದನ್ ಶಿರೋರುಜಾರ್ತಃ ಕಫಪೂರ್ಣದೇಹಃ | ಅಭಕ್ತರುಗ್ಗೌರವಸಾದಯುಕ್ತಃ ಕಾಸೇತ ನಾ ಸಾನ್ದ್ರಕಫಂ ಕಫೇನ ||೧೦||

Adhikarana 9 (11) · Śloka 11

ವಕ್ಷೋಽತಿಮಾತ್ರಂ ವಿಹತಂ ತು ಯಸ್ಯ ವ್ಯಾಯಾಮಭಾರಾಧ್ಯಯನಾಭಿಘಾತೈಃ | ವಿಶ್ಲಿಷ್ಟವಕ್ಷಾಃ ಸ ನರಃ ಸರಕ್ತಂ ಷ್ಠೀವತ್ಯಭೀಕ್ಷ್ಣಂ ಕ್ಷತಜಂ ತಮಾಹುಃ ||೧೧||

Adhikarana 10 (12) · Śloka 13

ಸ ಗಾತ್ರಶೂಲಜ್ವರದಾಹಮೋಹಾನ್ ಪ್ರಾಣಕ್ಷಯಂ ಚೋಪಲಭೇತ ಕಾಸೀ | ಶುಷ್ಯನ್ ವಿನಿಷ್ಠೀವತಿ ದುರ್ಬಲಸ್ತು ಪ್ರಕ್ಷೀಣಮಾಂಸೋ ರುಧಿರಂ ಸಪೂಯಮ್ ||೧೨|| ಸಸರ್ವಲಿಙ್ಗಂ ಭೃಶದುಶ್ಚಿಕಿತ್ಸ್ಯಂ ಚಿಕಿತ್ಸಿತಜ್ಞಾಃ ಕ್ಷಯಜಂ ವದನ್ತಿ |೧೩|

Adhikarana 11 (13) · Śloka 13

ವೃದ್ಧತ್ವಮಾಸಾದ್ಯ ಭವೇತ್ತು ಯೋ ವೈ ಯಾಪ್ಯಂ ತಮಾಹುರ್ಭಿಷಜಸ್ತು ಕಾಸಮ್ ||೧೩||

Adhikarana 12 (14) · Śloka 14

ಶೃಙ್ಗೀವಚಾಕಟ್ಫಲಕತ್ತೃಣಾಬ್ದಧಾನ್ಯಾಭಯಾಭಾರ್ಗ್ಯಮರಾಹ್ವವಿಶ್ವಮ್ | ಉಷ್ಣಾಮ್ಬುನಾ ಹಿಙ್ಗುಯುತಂ ತು ಪೀತ್ವಾ ಬದ್ಧಾಸ್ಯಮಪ್ಯಾಶು ಜಹಾತಿ ಕಾಸಮ್ ||೧೪||

Adhikarana 13 (15) · Śloka 15

ಫಲತ್ರಿಕವ್ಯೋಷವಿಡಙ್ಗಶೃಙ್ಗೀರಾಸ್ನಾವಚಾಪದ್ಮಕದೇವಕಾಷ್ಠೈಃ | ಲೇಹಃ ಸಮೈಃ ಕ್ಷೌದ್ರಸಿತಾಘೃತಾಕ್ತಃ ಕಾಸಂ ನಿಹನ್ಯಾದಚಿರಾದುದೀರ್ಣಮ್ ||೧೫||

Adhikarana 14 (16) · Śloka 16

ಪಥ್ಯಾಂ ಸಿತಾಮಾಮಲಕಾನಿ ಲಾಜಾಂ ಸಮಾಗಧೀಂ ಚಾಪಿ ವಿಚೂರ್ಣ್ಯ ಶುಣ್ಠೀಮ್ | ಸರ್ಪಿರ್ಮಧುಭ್ಯಾಂ ವಿಲಿಹೀತ ಕಾಸೀ ಸಸೈನ್ಧವಾಂ ವೋಷ್ಣಜಲೇನ ಕೃಷ್ಣಾಮ್ ||೧೬||

Adhikarana 15 (17-18) · Śloka 18

ಖಾದೇದ್ಗುಡಂ ನಾಗರಪಿಪ್ಪಲೀಭ್ಯಾಂ ದ್ರಾಕ್ಷಾಂ ಚ ಸರ್ಪಿರ್ಮಧುನಾಽವಲಿಹ್ಯಾತ್ | ದ್ರಾಕ್ಷಾಂ ಸಿತಾಂ ಮಾಗಧಿಕಾಂ ಚ ತುಲ್ಯಾಂ ಸಶೃಙ್ಗವೇರಂ ಮಧುಕಂ ತುಗಾಂ ಚ ||೧೭|| ಲಿಹ್ಯಾದ್ಘೃತಕ್ಷೌದ್ರಯುತಾಂ ಸಮಾಂಶಾಂ ಸಿತೋಪಲಾಂ ವಾ ಮರಿಚಾಂಶಯುಕ್ತಾಮ್ | ಧಾತ್ರೀಕಣಾವಿಶ್ವಸಿತೋಪಲಾಶ್ಚ ಸಞ್ಚೂರ್ಣ್ಯ ಮಣ್ಡೇನ ಪಿಬೇಚ್ಚ ದಧ್ನಃ ||೧೮||

Adhikarana 16 (19-20) · Śloka 20

ಹರೇಣುಕಾಂ ಮಾಗಧಿಕಾಂ ಚ ತುಲ್ಯಾಂ ದಧ್ನಾ ಪಿಬೇತ್ ಕಾಸಗದಾಭಿಭೂತಃ | ಉಭೇ ಹರಿದ್ರೇ ಸುರದಾರುಶುಣ್ಠೀಂ ಗಾಯತ್ರಿಸಾರಂ ಚ ಪಿಬೇತ್ ಸಮಾಂಶಮ್ ||೧೯|| ಬಸ್ತಸ್ಯ ಮೂತ್ರೇಣ ಸುಖಾಮ್ಬುನಾ ವಾ ದನ್ತೀಂ ದ್ರವನ್ತೀಂ ಚ ಸತಿಲ್ವಕಾಖ್ಯಾಮ್ | ಭೃಷ್ಟಾನಿ ಸರ್ಪೀಂಷ್ಯಥ ಬಾದರಾಣಿ ಖಾದೇತ್ ಪಲಾಶಾನಿ ಸಸೈನ್ಧವಾನಿ ||೨೦||

Adhikarana 17 (21) · Śloka 21

ಕೋಲಪ್ರಮಾಣಂ ಪ್ರಪಿಬೇದ್ಧಿ ಹಿಙ್ಗು ಸೌವೀರಕೇಣಾಮ್ಲರಸೇನ ವಾಽಪಿ |೨೧|

Adhikarana 18 (21) · Śloka 22

ಕ್ಷೌದ್ರೇಣ ಲಿಹ್ಯಾನ್ಮರಿಚಾನಿ ವಾಽಪಿ ಭಾರ್ಗೀವಚಾಹಿಙ್ಗುಕೃತಾ ಚ ವರ್ತಿಃ ||೨೧|| ಧೂಮೇ ಪ್ರಶಸ್ತಾ ಘೃತಸಮ್ಪ್ರಯುಕ್ತಾ ವೇಣುತ್ವಗೇಲಾಲವಣೈಃ ಕೃತಾ ವಾ |೨೨|

Adhikarana 19 (22) · Śloka 23

ಮುಸ್ತೇಙ್ಗುದೀತ್ವಙ್ಮಧುಕಾಹ್ವಮಾಂಸೀಮನಃಶಿಲಾಲೈಶ್ಛಗಲಾಮ್ಬುಪಿಷ್ಟೈಃ ||೨೨|| ವಿಧಾಯ ವರ್ತೀಶ್ಚ ಪಯೋಽನುಪಾನಂ ಧೂಮಂ ಪಿಬೇದ್ವಾತಬಲಾಸಕಾಸೀ |೨೩|

Adhikarana 20 (23) · Śloka 23

ಪಿಬೇಚ್ಚ ಸೀಧುಂ ಮರಿಚಾನ್ವಿತಂ ವಾ ತೇನಾಶು ಕಾಸಂ ಜಯತಿ ಪ್ರಸಹ್ಯ ||೨೩||

Adhikarana 21 (24) · Śloka 24

ದ್ರಾಕ್ಷಾಮ್ಬುಮಞ್ಜಿಷ್ಠಪುರಾಹ್ವಯಾಭಿಃ ಕ್ಷೀರಂ ಶೃತಂ ಮಾಕ್ಷಿಕಸಮ್ಪ್ರಯುಕ್ತಮ್ |೨೪|

Adhikarana 22 (24) · Śloka 24

ನಿದಿಗ್ಧಿಕಾನಾಗರಪಿಪ್ಪಲೀಭಿಃ ಖಾದೇಚ್ಚ ಮುದ್ಗಾನ್ಮಧುನಾ ಸುಸಿದ್ಧಾನ್ ||೨೪||

Adhikarana 23 (25) · Śloka 25

ಉತ್ಕಾರಿಕಾಂ ಸರ್ಪಿಷಿ ನಾಗರಾಢ್ಯಾಂ ಪಕ್ತ್ವಾ ಸಮೂಲೈಸ್ತ್ರುಟಿಕೋಲಪತ್ರೈಃ | ಏಭಿರ್ನಿಷೇವೇತ ಕೃತಾಂ ಚ ಪೇಯಾಂ ತನ್ವೀಂ ಸುಶೀತಾಂ ಮಧುನಾ ವಿಮಿಶ್ರಾಮ್ ||೨೫||

Adhikarana 24 (26) · Śloka 26

ಯತ್ ಪ್ಲೀಹ್ನಿ ಸರ್ಪಿರ್ವಿಹಿತಂ ಷಡಙ್ಗಂ ತದ್ವಾತಕಾಸಂ ಜಯತಿ ಪ್ರಸಹ್ಯ | ವಿದಾರಿಗನ್ಧಾದಿಕೃತಂ ಘೃತಂ ವಾ ರಸೇನ ವಾ ವಾಸಕಜೇನ ಪಕ್ವಮ್ ||೨೬||

Adhikarana 25 (27) · Śloka 28

ವಿರೇಚನಂ ಸ್ನೈಹಿಕಮತ್ರ ಚೋಕ್ತಮಾಸ್ಥಾಪನಂ ಚಾಪ್ಯನುವಾಸನಂ ಚ | ಧೂಮಂ ಪಿಬೇತ್ ಸ್ನೈಹಿಕಮಪ್ರಮತ್ತಃ ಪಿಬೇತ್ ಸುಖೋಷ್ಣಂ ಘೃತಮೇವ ಚಾತ್ರ ||೨೭|| ಹಿತಾ ಯವಾಗ್ವಶ್ಚ ರಸೇಷು ಸಿದ್ಧಾಃ ಪಯಾಂಸಿ ಲೇಹಾಃ ಸಘೃತಾಸ್ತಥೈವ |೨೮|

Adhikarana 26 (28-31) · Śloka 32

ಪ್ರಚ್ಛರ್ದನಂ ಕಾಯಶಿರೋವಿರೇಕಾಸ್ತಥೈವ ಧೂಮಾಃ ಕವಲಗ್ರಹಾಶ್ಚ ||೨೮|| ಉಷ್ಣಾಶ್ಚ ಲೇಹಾಃ ಕಟುಕಾ ನಿಹನ್ಯುಃ ಕಫಂ ವಿಶೇಷೇಣ ವಿಶೋಷಣಂ ಚ | ಕಟುತ್ರಿಕಂ ಚಾಪಿ ವದನ್ತಿ ಪಥ್ಯಂ ಘೃತಂ ಕೃಮಿಘ್ನಸ್ವರಸೇ ವಿಪಕ್ವಮ್ ||೨೯|| ನಿರ್ಗುಣ್ಡಿಪತ್ರಸ್ವರಸೇ ಚ ಪಕ್ವಂ ಸರ್ಪಿಃ ಕಫೋತ್ಥಂ ವಿನಿಹನ್ತಿ ಕಾಸಮ್ | ಪಾಠಾವಿಡವ್ಯೋಷವಿಡಙ್ಗಸಿನ್ಧುತ್ರಿಕಣ್ಟರಾಸ್ನಾಹುತಭುಗ್ಬಲಾಭಿಃ ||೩೦|| ಶೃಙ್ಗೀವಚಾಮ್ಭೋಧರದೇವದಾರುದುರಾಲಭಾಭಾರ್ಗ್ಯಭಯಾಶಟೀಭಿಃ | ಸಮ್ಯಗ್ವಿಪಕ್ವಂ ದ್ವಿಗುಣೇನ ಸರ್ಪಿರ್ನಿದಿಗ್ಧಿಕಾಯಾಃ ಸ್ವರಸೇನ ಚೈತತ್ ||೩೧|| ಶ್ವಾಸಾಗ್ನಿಸಾದಸ್ವರಭೇದಭಿನ್ನಾನ್ನಿಹನ್ತ್ಯುದೀರ್ಣಾನಪಿ ಪಞ್ಚ ಕಾಸಾನ್ |೩೨|

Adhikarana 27 (32-33) · Śloka 33

ವಿದಾರಿಗನ್ಧೋತ್ಪಲಸಾರಿವಾದೀನ್ ನಿಷ್ಕ್ವಾಥ್ಯ ವರ್ಗಂ ಮಧುರಂ ಚ ಕೃತ್ಸ್ನಮ್ ||೩೨|| ಘೃತಂ ಪಚೇದಿಕ್ಷುರಸಾಮ್ಬುದುಗ್ಧೈಃ ಕಾಕೋಲಿವರ್ಗೇ ಚ ಸಶರ್ಕರಂ ತತ್ | ಪ್ರಾತಃ ಪಿಬೇತ್ ಪಿತ್ತಕೃತೇ ಚ ಕಾಸೇ ರತಿಪ್ರಸೂತೇ ಕ್ಷತಜೇ ಚ ಕಾಸೇ ||೩೩||

Adhikarana 28 (34) · Śloka 34

ಖರ್ಜೂರಭಾರ್ಗೀಮಗಧಾಪ್ರಿಯಾಲಮಧೂಲಿಕೈಲಾಮಲಕೈಃ ಸಮಾಂಶೈಃ | ಚೂರ್ಣಂ ಸಿತಾಕ್ಷೌದ್ರಘೃತಪ್ರಗಾಢಂ ತ್ರೀನ್ ಹನ್ತಿ ಕಾಸಾನುಪಯುಜ್ಯಮಾನಮ್ ||೩೪||

Adhikarana 29 (35) · Śloka 35

ರಕ್ತಾಹರಿದ್ರಾಞ್ಜನವಹ್ನಿಪಾಠಾಮೂರ್ವೋಪಕುಲ್ಯಾ ವಿಲಿಹೇತ್ ಸಮಾಂಶಾಃ | ಕ್ಷೌದ್ರೇಣ ಕಾಸೇ ಕ್ಷತಜೇ ಕ್ಷಯೋತ್ಥೇ ಪಿಬೇದ್ಘೃತಂ ಚೇಕ್ಷುರಸೇ ವಿಪಕ್ವಮ್ ||೩೫||

Adhikarana 30 (36) · Śloka 36

ಚೂರ್ಣಂ ಪಿಬೇದಾಮಲಕಸ್ಯ ವಾಽಪಿ ಕ್ಷೀರೇಣ ಪಕ್ವಂ ಸಘೃತಂ ಹಿತಾಶೀ |೩೬|

Adhikarana 31 (36) · Śloka 37

ಚೂರ್ಣಾನಿ ಗೋಧೂಮಯವೋದ್ಭವಾನಿ ಕಾಕೋಲಿವರ್ಗಶ್ಚ ಕೃತಃ ಸುಸೂಕ್ಷ್ಮಃ ||೩೬|| ಕಾಸೇಷು ಪೇಯಸ್ತ್ರಿಷು ಕಾಸವದ್ಭಿಃ ಕ್ಷೀರೇಣ ಸಕ್ಷೌದ್ರಘೃತೇನ ವಾಽಪಿ |೩೭|

Adhikarana 32 (37) · Śloka 37

ಗುಡೋದಕಂ ವಾ ಕ್ವಥಿತಂ ಪಿಬೇದ್ಧಿ ಕ್ಷೌದ್ರೇಣ ಶೀತಂ ಮರಿಚೋಪದಂಶಮ್ ||೩೭||

Adhikarana 33 (38-41) · Śloka 41

ಪ್ರಸ್ಥತ್ರಯೇಣಾಮಲಕೀರಸಸ್ಯ ಶುದ್ಧಸ್ಯ ದತ್ತ್ವಾಽರ್ಧತುಲಾಂ ಗುಡಸ್ಯ | ಚೂರ್ಣೀಕೃತೈರ್ಗ್ರನ್ಥಿಕಚವ್ಯಜೀರವ್ಯೋಷೇಭಕೃಷ್ಣಾಹಪುಷಾಜಮೋದೈಃ ||೩೮|| ವಿಡಙ್ಗಸಿನ್ಧುತ್ರಿಫಲಾಯವಾನೀಪಾಠಾಗ್ನಿಧಾನ್ಯೈಶ್ಚ ಪಿಚುಪ್ರಮಾಣೈಃ | ದತ್ತ್ವಾ ತ್ರಿವೃಚ್ಚೂರ್ಣಪಲಾನಿ ಚಾಷ್ಟಾವಷ್ಟೌ ಚ ತೈಲಸ್ಯ ಪಚೇದ್ಯಥಾವತ್ ||೩೯|| ತಂ ಭಕ್ಷಯೇದಕ್ಷಫಲಪ್ರಮಾಣಂ ಯಥೇಷ್ಟಚೇಷ್ಟಸ್ತ್ರಿಸುಗನ್ಧಿಯುಕ್ತಮ್ | ಅನೇನ ಸರ್ವೇ ಗ್ರಹಣೀವಿಕಾರಾಃ ಸಶ್ವಾಸಕಾಸಸ್ವರಭೇದಶೋಥಾಃ ||೪೦|| ಶಾಮ್ಯನ್ತಿ ಚಾಯಂ ಚಿರಮನ್ತರಗ್ನೇರ್ಹತಸ್ಯ ಪುಂಸ್ತ್ವಸ್ಯ ಚ ವೃದ್ಧಿಹೇತುಃ | ಸ್ತ್ರೀಣಾಂ ಚ ವನ್ಧ್ಯಾಮಯನಾಶನಃ ಸ್ಯಾತ್ ಕಲ್ಯಾಣಕೋ ನಾಮ ಗುಡಃ ಪ್ರತೀತಃ ||೪೧||

Adhikarana 34 (42-46) · Śloka 46

ದ್ವಿಪಞ್ಚಮೂಲೇಭಕಣಾತ್ಮಗುಪ್ತಾಭಾರ್ಗೀಶಟೀಪುಷ್ಕರಮೂಲವಿಶ್ವಾನ್ | ಪಾಠಾಮೃತಾಗ್ರನ್ಥಿಕಶಙ್ಖಪುಷ್ಪೀರಾಸ್ನಾಗ್ನ್ಯಪಾಮಾರ್ಗಬಲಾಯವಾಸಾನ್ ||೪೨|| ದ್ವಿಪಾಲಿಕಾನ್ ನ್ಯಸ್ಯ ಯವಾಢಕಂ ಚ ಹರೀತಕೀನಾಂ ಚ ಶತಂ ಗುರೂಣಾಮ್ | ದ್ರೋಣೇ ಜಲಸ್ಯಾಢಕಸಂಯುತೇ ಚ ಕ್ವಾಥೇ ಕೃತೇ ಪೂತಚತುರ್ಥಭಾಗೇ ||೪೩|| ಪಚೇತ್ತುಲಾಂ ಶುದ್ಧಗುಡಸ್ಯ ದತ್ತ್ವಾ ಪೃಥಕ್ ಚ ತೈಲಾತ್ ಕುಡವಂ ಘೃತಾಚ್ಚ | ಚೂರ್ಣಂ ಚ ತಾವನ್ಮಗಧೋದ್ಭವಾಯಾ ದೇಯಂ ಚ ತಸ್ಮಿನ್ಮಧು ಸಿದ್ಧಶೀತೇ ||೪೪|| ರಸಾಯನಾತ್ ಕರ್ಷಮತೋ ವಿಲಿಹ್ಯಾದ್ದ್ವೇ ಚಾಭಯೇ ನಿತ್ಯಮಥಾಶು ಹನ್ಯಾತ್ | ತದ್ರಾಜಯಕ್ಷ್ಮಗ್ರಹಣೀಪ್ರದೋಷಶೋಫಾಗ್ನಿಮಾನ್ದ್ಯಸ್ವರಭೇದಕಾಸಾನ್ ||೪೫|| ಪಾಣ್ಡ್ವಾಮಯಶ್ವಾಸಶಿರೋವಿಕಾರಾನ್ ಹೃದ್ರೋಗಹಿಕ್ಕಾವಿಷಮಜ್ವರಾಂಶ್ಚ | ಮೇಧಾಬಲೋತ್ಸಾಹಮತಿಪ್ರದಂ ಚ ಚಕಾರ ಚೈತದ್ಭಗವಾನಗಸ್ತ್ಯಃ ||೪೬||

Adhikarana 35 (47-48) · Śloka 48

ಕುಲೀರಶುಕ್ತೀಚಟಕೈಣಲಾವಾನ್ನಿಷ್ಕ್ವಾಥ್ಯ ವರ್ಗಂ ಮಧುರಂ ಚ ಕೃತ್ಸ್ನಮ್ | ಪಚೇದ್ಘೃತಂ ತತ್ತು ನಿಷೇವ್ಯಮಾಣಂ ಹನ್ಯಾತ್ ಕ್ಷತೋತ್ಥಂ ಕ್ಷಯಜಂ ಚ ಕಾಸಮ್ ||೪೭|| ಶತಾವರೀನಾಗಬಲಾವಿಪಕ್ವಂ ಘೃತಂ ವಿಧೇಯಂ ಚ ಹಿತಾಯ ಕಾಸಿನಾಮ್ ||೪೮||

Adhikarana puShpikA · Śloka 52

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕಾಯಚಿಕಿತ್ಸಾತನ್ತ್ರೇ ಕಾಸಪ್ರತಿಷೇಧೋ ನಾಮ (ಚತುರ್ದಶೋಽಧ್ಯಾಯಃ, ಆದಿತಃ) ದ್ವಿಪಞ್ಚಾಶತ್ತಮೋಽಧ್ಯಾಯಃ ||೫೨||