51. śvāsapratiṣēdhādhyāyaḥ

Adhikarana 1 (1-3) · Śloka 3

ಅಥಾತಃ ಶ್ವಾಸಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨|| ಯೈರೇವ ಕಾರಣೈರ್ಹಿಕ್ಕಾ ಬಹುಭಿಃ ಸಮ್ಪ್ರವರ್ತತೇ | ತೈರೇವ ಕಾರಣೈಃ ಶ್ವಾಸೋ ಘೋರೋ ಭವತಿ ದೇಹಿನಾಮ್ ||೩||

Adhikarana 2 (4) · Śloka 4

ವಿಹಾಯ ಪ್ರಕೃತಿಂ ವಾಯುಃ ಪ್ರಾಣೋಽಥ ಕಫಸಂಯುತಃ | ಶ್ವಾಸಯತ್ಯೂರ್ಧ್ವಗೋ ಭೂತ್ವಾ ತಂ ಶ್ವಾಸಂ ಪರಿಚಕ್ಷತೇ ||೪||

Adhikarana 3 (5) · Śloka 5

ಕ್ಷುದ್ರಕಸ್ತಮಕಶ್ಛಿನ್ನೋ ಮಹಾನೂರ್ಧ್ವಶ್ಚ ಪಞ್ಚಧಾ | ಭಿದ್ಯತೇ ಸ ಮಹಾವ್ಯಾಧಿಃ ಶ್ವಾಸ ಏಕೋ ವಿಶೇಷತಃ ||೫||

Adhikarana 4 (6) · Śloka 6

ಪ್ರಾಗ್ರೂಪಂ ತಸ್ಯ ಹೃತ್ಪೀಡಾ ಭಕ್ತದ್ವೇಷೋಽರತಿಃ ಪರಾ | ಆನಾಹಃ ಪಾರ್ಶ್ವಯೋಃ ಶೂಲಂ ವೈರಸ್ಯಂ ವದನಸ್ಯ ಚ ||೬||

Adhikarana 5 (7) · Śloka 7

ಕಿಞ್ಚಿದಾರಭಮಾಣಸ್ಯ ಯಸ್ಯ ಶ್ವಾಸಃ ಪ್ರವರ್ತತೇ | ನಿಷಣ್ಣಸ್ಯೈತಿ ಶಾನ್ತಿಂ ಚ ಸ ಕ್ಷುದ್ರ ಇತಿ ಸಞ್ಜ್ಞಿತಃ ||೭||

Adhikarana 6 (8-10) · Śloka 10

ತೃಟ್ಸ್ವೇದವಮಥುಪ್ರಾಯಃ ಕಣ್ಠಘುರ್ಘುರಿಕಾನ್ವಿತಃ | ವಿಶೇಷಾದ್ದುರ್ದಿನೇ ತಾಮ್ಯೇಚ್ಛ್ವಾಸಃ ಸ ತಮಕೋ ಮತಃ ||೮|| ಘೋಷೇಣ ಮಹತಾಽಽವಿಷ್ಟಃ ಸಕಾಸಃ ಸಕಫೋ ನರಃ | ಯಃ ಶ್ವಸಿತ್ಯಬಲೋಽನ್ನದ್ವಿಟ್ ಸುಪ್ತಸ್ತಮಕಪೀಡಿತಃ ||೯|| ಸ ಶಾಮ್ಯತಿ ಕಫೇ ಹೀನೇ ಸ್ವಪತಶ್ಚ ವಿವರ್ಧತೇ | ಮೂರ್ಚ್ಛಾಜ್ವರಾಭಿಭೂತಸ್ಯ ಜ್ಞೇಯಃ ಪ್ರತಮಕಸ್ತು ಸಃ ||೧೦||

Adhikarana 7 (11) · Śloka 11

ಆಧ್ಮಾತೋ ದಹ್ಯಮಾನೇನ ಬಸ್ತಿನಾ ಸರುಜಂ ನರಃ | ಸರ್ವಪ್ರಾಣೇನ ವಿಚ್ಛಿನ್ನಂ ಶ್ವಸ್ಯಾಚ್ಛಿನ್ನಂ ತಮಾದಿಶೇತ್ ||೧೧||

Adhikarana 8 (12) · Śloka 12

ನಿಃಸಞ್ಜ್ಞಃ ಪಾರ್ಶ್ವಶೂಲಾರ್ತಃ ಶುಷ್ಕಕಣ್ಠೋಽತಿಘೋಷವಾನ್ | ಸಂರಬ್ಧನೇತ್ರಸ್ತ್ವಾಯಮ್ಯ ಯಃ ಶ್ವಸ್ಯಾತ್ ಸ ಮಹಾನ್ ಸ್ಮೃತಃ ||೧೨||

Adhikarana 9 (13) · Śloka 13

ಮರ್ಮಸ್ವಾಯಮ್ಯಮಾನೇಷು ಶ್ವಸನ್ಮೂಢೋ ಮುಹುಶ್ಚ ಯಃ | ಊರ್ಧ್ವಪ್ರೇಕ್ಷೀ ಹತರವಸ್ತಮೂರ್ಧ್ವಶ್ವಾಸಮಾದಿಶೇತ್ ||೧೩||

Adhikarana 10 (14) · Śloka 14

ಕ್ಷುದ್ರಃ ಸಾಧ್ಯತಮಸ್ತೇಷಾಂ ತಮಕಃ ಕೃಚ್ಛ್ರ ಉಚ್ಯತೇ | ತ್ರಯಃ ಶ್ವಾಸಾ ನ ಸಿಧ್ಯನ್ತಿ ತಮಕೋ ದುರ್ಬಲಸ್ಯ ಚ ||೧೪||

Adhikarana 11 (15) · Śloka 15

ಸ್ನೇಹಬಸ್ತಿಂ ವಿನಾ ಕೇಚಿದೂರ್ಧ್ವಂ ಚಾಧಶ್ಚ ಶೋಧನಮ್ | ಮೃದು ಪ್ರಾಣವತಾಂ ಶ್ರೇಷ್ಠಂ ಶ್ವಾಸಿನಾಮಾದಿಶನ್ತಿ ಹಿ ||೧೫||

Adhikarana 12 (16) · Śloka 16

ಶ್ವಾಸೇ ಕಾಸೇ ಚ ಹಿಕ್ಕಾಯಾಂ ಹೃದ್ರೋಗೇ ಚಾಪಿ ಪೂಜಿತಮ್ | ಘೃತಂ ಪುರಾಣಂ ಸಂಸಿದ್ಧಮಭಯಾವಿಡರಾಮಠೈಃ ||೧೬||

Adhikarana 13 (17) · Śloka 18

ಸೌವರ್ಚಲಾಭಯಾಬಿಲ್ವೈಃ ಸಂಸ್ಕೃತಂ ವಾಽನವಂ ಘೃತಮ್ | ಪಿಪ್ಪಲ್ಯಾದಿಪ್ರತೀವಾಪಂ ಸಿದ್ಧಂ ವಾ ಪ್ರಥಮೇ ಗಣೇ ||೧೭|| ಸಪಞ್ಚಲವಣಂ ಸರ್ಪಿಃ ಶ್ವಾಸಕಾಸೌ ವ್ಯಪೋಹತಿ |೧೮|

Adhikarana 14 (18-20) · Śloka 21

ಹಿಂಸ್ರಾವಿಡಙ್ಗಪೂತೀಕತ್ರಿಫಲಾವ್ಯೋಷಚಿತ್ರಕೈಃ ||೧೮|| ದ್ವಿಕ್ಷೀರಂ ಸಾಧಿತಂ ಸರ್ಪಿಶ್ಚತುರ್ಗುಣಜಲಾಪ್ಲುತಮ್ | ಕೋಲಮಾತ್ರೈಃ ಪಿಬೇತ್ತದ್ಧಿ ಶ್ವಾಸಕಾಸೌ ವ್ಯಪೋಹತಿ ||೧೯|| ಅರ್ಶಾಂಸ್ಯರೋಚಕಂ ಗುಲ್ಮಂ ಶಕೃದ್ಭೇದಂ ಕ್ಷಯಂ ತಥಾ | ಕೃತ್ಸ್ನೇ ವೃಷಕಷಾಯೇ ವಾ ಪಚೇತ್ ಸರ್ಪಿಶ್ಚತುರ್ಗುಣೇ ||೨೦|| ತನ್ಮೂಲಕುಸುಮಾವಾಪಂ ಶೀತಂ ಕ್ಷೌದ್ರೇಣ ಯೋಜಯೇತ್ |೨೧|

Adhikarana 15 (21-22) · Śloka 23

ಶೃಙ್ಗೀಮಧೂಲಿಕಾಭಾರ್ಗೀಶುಣ್ಠೀತಾರ್ಕ್ಷ್ಯಸಿತಾಮ್ಬುದೈಃ ||೨೧|| ಸಹರಿದ್ರೈಃ ಸಯಷ್ಟ್ಯಾಹ್ವೈಃ ಸಮೈರಾವಾಪ್ಯ ಯೋಗತಃ | ಘೃತಪ್ರಸ್ಥಂ ಪಚೇದ್ಧೀಮಾನ್ ಶೀತತೋಯೇ ಚತುರ್ಗುಣೇ ||೨೨|| ಶ್ವಾಸಂ ಕಾಸಂ ತಥಾ ಹಿಕ್ಕಾಂ ಸರ್ಪಿರೇತನ್ನಿಯಚ್ಛತಿ |೨೩|

Adhikarana 16 (23-24) · Śloka 25

ಸುವಹಾ ಕಾಲಿಕಾ ಭಾರ್ಗೀ ಶುಕಾಖ್ಯಾ ನೈಚುಲಂ ಫಲಮ್ ||೨೩|| ಕಾಕಾದನೀ ಶೃಙ್ಗವೇರಂ ವರ್ಷಾಭೂರ್ಬೃಹತೀದ್ವಯಮ್ | ಕೋಲಮಾತ್ರೈರ್ಘೃತಪ್ರಸ್ಥಂ ಪಚೇದೇಭಿರ್ಜಲದ್ವಿಕಮ್ ||೨೪|| ಕಟೂಷ್ಣಂ ಪೀತಮೇತದ್ಧಿ ಶ್ವಾಸಾಮಯವಿನಾಶನಮ್ |೨೫|

Adhikarana 17 (25-26) · Śloka 26

ಸೌವರ್ಚಲಯವಕ್ಷಾರಕಟುಕಾವ್ಯೋಷಚಿತ್ರಕೈಃ ||೨೫|| ವಚಾಭಯಾವಿಡಙ್ಗೈಶ್ಚ ಸಾಧಿತಂ ಶ್ವಾಸಶಾನ್ತಯೇ | ಗೋಪವಲ್ಲ್ಯುದಕೇ ಸಿದ್ಧಂ ಸ್ಯಾದನ್ಯದ್ದ್ವಿಗುಣೇ ಘೃತಮ್ ||೨೬||

Adhikarana 18 (27) · Śloka 27

ಪಞ್ಚೈತಾನಿ ಹವೀಂಷ್ಯಾಹುರ್ಭಿಷಜಃ ಶ್ವಾಸಕಾಸಯೋಃ |೨೭|

Adhikarana 19 (27-29) · Śloka 29

ತಾಲೀಶತಾಮಲಕ್ಯುಗ್ರಾಜೀವನ್ತೀಕುಷ್ಠಸೈನ್ಧವೈಃ ||೨೭|| ಬಿಲ್ವಪುಷ್ಕರಭೂತೀಕಸೌವರ್ಚಲಕಣಾಗ್ನಿಭಿಃ | ಪಥ್ಯಾತೇಜೋವತೀಯುಕ್ತೈಃ ಸರ್ಪಿರ್ಜಲಚತುರ್ಗುಣಮ್ ||೨೮|| ಹಿಙ್ಗುಪಾದಯುತಂ ಸಿದ್ಧಂ ಸರ್ವಶ್ವಾಸಹರಂ ಪರಮ್ | ವಾಸಾಘೃತಂ ಷಟ್ಪಲಂ ವಾ ಘೃತಂ ಚಾತ್ರ ಹಿತಂ ಭವೇತ್ ||೨೯||

Adhikarana 20 (30) · Śloka 30

ತೈಲಂ ದಶಗುಣೇ ಸಿದ್ಧಂ ಭೃಙ್ಗರಾಜರಸೇ ಶುಭೇ | ಸೇವ್ಯಮಾನಂ ಯಥಾನ್ಯಾಯಂ ಶ್ವಾಸಕಾಸೌ ವ್ಯಪೋಹತಿ ||೩೦||

Adhikarana 21 (31) · Śloka 32

ಫಲಾಮ್ಲಾ ವಿಷ್ಕಿರರಸಾಃ ಸ್ನಿಗ್ಧಾಃ ಪ್ರವ್ಯಕ್ತಸೈನ್ಧವಾಃ | ಏಣಾದೀನಾಂ ಶಿರೋಭಿರ್ವಾ ಕೌಲತ್ಥಾ ವಾ ಸುಸಂಸ್ಕೃತಾಃ ||೩೧|| ಹನ್ಯುಃ ಶ್ವಾಸಂ ಚ ಕಾಸಂ ಚ ಸಂಸ್ಕೃತಾನಿ ಪಯಾಂಸಿ ಚ |೩೨|

Adhikarana 22 (32-35) · Śloka 35

ತಿಮಿರಸ್ಯ ಚ ಬೀಜಾನಿ ಕರ್ಕಟಾಖ್ಯಾ ಚ ಚೂರ್ಣಿತಾ ||೩೨|| ದುರಾಲಭಾಽಥ ಪಿಪ್ಪಲ್ಯಃ ಕಟುಕಾಖ್ಯಾ ಹರೀತಕೀ | ಶ್ವಾವಿನ್ಮಯೂರರೋಮಾಣಿ ಕೋಲಾ ಮಾಗಧಿಕಾಕಣಾಃ ||೩೩|| ಭಾರ್ಗೀತ್ವಕ್ ಶೃಙ್ಗವೇರಂ ಚ ಶರ್ಕರಾ ಶಲ್ಲಕಾಙ್ಗಜಮ್ | ನೃತ್ತಕೌಣ್ಡಕಬೀಜಾನಿ ಚೂರ್ಣಿತಾನಿ ತು ಕೇವಲಮ್ ||೩೪|| ಪಞ್ಚ ಶ್ಲೋಕಾರ್ಧಿಕಾಸ್ತ್ವೇತೇ ಲೇಹಾ ಯೇ ಸಮ್ಯಗೀರಿತಾಃ | ಸರ್ಪಿರ್ಮಧುಭ್ಯಾಂ ತೇ ಲೇಹ್ಯಾಃ ಕಾಸಶ್ವಾಸಾರ್ದಿತೈರ್ನರೈಃ ||೩೫||

Adhikarana 23 (36) · Śloka 36

ಸಪ್ತಚ್ಛದಸ್ಯ ಪುಷ್ಪಾಣಿ ಪಿಪ್ಪಲೀಶ್ಚಾಪಿ ಮಸ್ತುನಾ | ಪಿಬೇತ್ ಸಞ್ಚೂರ್ಣ್ಯ ಮಧುನಾ ಧಾನಾಶ್ಚಾಪ್ಯಥ ಭಕ್ಷಯೇತ್ ||೩೬||

Adhikarana 24 (37-38) · Śloka 38

ಅರ್ಕಾಙ್ಕುರೈರ್ಭಾವಿತಾನಾಂ ಯವಾನಾಂ ಸಾಧ್ವನೇಕಶಃ | ತರ್ಪಣಂ ವಾ ಪಿಬೇದೇಷಾಂ ಸಕ್ಷೌದ್ರಂ ಶ್ವಾಸಪೀಡಿತಃ ||೩೭|| ಶಿರೀಷಕದಲೀಕುನ್ದಪುಷ್ಪಂ ಮಾಗಧಿಕಾಯುತಮ್ | ತಣ್ಡುಲಾಮ್ಬುಯುತಂ ಪೀತ್ವಾ ಜಯೇಚ್ಛ್ವಾಸಾನಶೇಷತಃ ||೩೮||

Adhikarana 25 (39) · Śloka 40

ಕೋಲಮಜ್ಜಾಂ ತಾಲಮೂಲಮೃಷ್ಯಚರ್ಮಮಸೀಮಪಿ | ಲಿಹ್ಯಾತ್ ಕ್ಷೌದ್ರೇಣ ಭಾರ್ಗೀಂ ವಾ ಸರ್ಪಿರ್ಮಧುಸಮಾಯುತಾಮ್ ||೩೯|| ನೀಚೈಃಕದಮ್ಬಬೀಜಂ ವಾ ಸಕ್ಷೌದ್ರಂ ತಣ್ಡುಲಾಮ್ಬುನಾ |೪೦|

Adhikarana 26 (40) · Śloka 41

ದ್ರಾಕ್ಷಾಂ ಹರೀತಕೀಂ ಕೃಷ್ಣಾಂ ಕರ್ಕಟಾಖ್ಯಾಂ ದುರಾಲಭಾಮ್ ||೪೦|| ಸರ್ಪಿರ್ಮಧುಭ್ಯಾಂ ವಿಲಿಹನ್ ಹನ್ತಿ ಶ್ವಾಸಾನ್ ಸುದಾರುಣಾನ್ |೪೧|

Adhikarana 27 (41) · Śloka 42

ಹರಿದ್ರಾಂ ಮರಿಚಂ ದ್ರಾಕ್ಷಾಂ ಗುಡಂ ರಾಸ್ನಾಂ ಕಣಾಂ ಶಟೀಮ್ ||೪೧|| ಲಿಹ್ಯಾತ್ತೈಲೇನ ತುಲ್ಯಾನಿ ಶ್ವಾಸಾರ್ತೋ ಹಿತಭೋಜನಃ |೪೨|

Adhikarana 28 (42) · Śloka 43

ಗವಾಂ ಪುರೀಷಸ್ವರಸಂ ಮಧುಸರ್ಪಿಃಕಣಾಯುತಮ್ ||೪೨|| ಲಿಹ್ಯಾಚ್ಛ್ವಾಸೇಷು ಕಾಸೇಷು ವಾಜಿನಾಂ ವಾ ಶಕೃದ್ರಸಮ್ |೪೩|

Adhikarana 29 (43) · Śloka 44

ಪಾಣ್ಡುರೋಗೇಷು ಶೋಥೇಷು ಯೇ ಯೋಗಾಃ ಸಮ್ಪ್ರಕೀರ್ತಿತಾಃ ||೪೩|| ಶ್ವಾಸಕಾಸಾಪಹಾಸ್ತೇಽಪಿ ಕಾಸಘ್ನಾ ಯೇ ಚ ಕೀರ್ತಿತಾಃ |೪೪|

Adhikarana 30 (44) · Śloka 45

ಭಾರ್ಗೀತ್ವಕ್ ತ್ರ್ಯೂಷಣಂ ತೈಲಂ ಹರಿದ್ರಾಂ ಕಟುರೋಹಿಣೀಮ್ ||೪೪|| ಪಿಪ್ಪಲೀಂ ಮರಿಚಂ ಚಣ್ಡಾಂ ಗೋಶಕೃದ್ರಸಮೇವ ಚ |೪೫|

Adhikarana 31 (45) · Śloka 46

ತಲಕೋಟಸ್ಯ ಬೀಜೇಷು ಪಚೇದುತ್ಕಾರಿಕಾಂ ಶುಭಾಮ್ ||೪೫|| ಸೇವ್ಯಮಾನಾ ನಿಹನ್ತ್ಯೇಷಾ ಶ್ವಾಸಾನಾಶು ಸುದುಸ್ತರಾನ್ |೪೬|

Adhikarana 32 (46-47) · Śloka 47

ಪುರಾಣಸರ್ಪಿಃ ಪಿಪ್ಪಲ್ಯಃ ಕೌಲತ್ಥಾ ಜಾಙ್ಗಲಾ ರಸಾಃ ||೪೬|| ಸುರಾ ಸೌವೀರಕಂ ಹಿಙ್ಗುಃ ಮಾತುಲುಙ್ಗರಸೋ ಮಧು | ದ್ರಾಕ್ಷಾಮಲಕಬಿಲ್ವಾನಿ ಶಸ್ತಾನಿ ಶ್ವಾಸಿಹಿಕ್ಕಿನಾಮ್ ||೪೭||

Adhikarana 33 (48) · Śloka 49

ಶ್ವಾಸಹಿಕ್ಕಾಪರಿಗತಂ ಸ್ನಿಗ್ಧೈಃ ಸ್ವೇದೈರುಪಾಚರೇತ್ | ಆಕ್ತಂ ಲವಣತೈಲಾಭ್ಯಾಂ ತೈರಸ್ಯ ಗ್ರಥಿತಃ ಕಫಃ ||೪೮|| ಖಸ್ಥೋ ವಿಲಯನಂ ಯಾತಿ ಮಾರುತಶ್ಚ ಪ್ರಶಾಮ್ಯತಿ |೪೯|

Adhikarana 34 (49-50) · Śloka 51

ಸ್ವಿನ್ನಂ ಜ್ಞಾತ್ವಾ ತತಶ್ಚೈವ ಭೋಜಯಿತ್ವಾ ರಸೌದನಮ್ ||೪೯|| ವಾತಶ್ಲೇಷ್ಮವಿಬನ್ಧೇ ವಾ ಭಿಷಗ್ ಧೂಮಂ ಪ್ರಯೋಜಯೇತ್ | ಮನಃಶಿಲಾದೇವದಾರುಹರಿದ್ರಾಚ್ಛದನಾಮಿಷೈಃ ||೫೦|| ಲಾಕ್ಷೋರುಬೂಕಮೂಲೈಶ್ಚ ಕೃತ್ವಾ ವರ್ತೀರ್ವಿಧಾನತಃ |೫೧|

Adhikarana 35 (51) · Śloka 51

ಸರ್ಪಿರ್ಯವಮಧುಚ್ಛಿಷ್ಟಶಾಲನಿರ್ಯಾಸಜಂ ತಥಾ ||೫೧||

Adhikarana 36 (52) · Śloka 52

ಶೃಙ್ಗಬಾಲಖುರಸ್ನಾಯುತ್ವಕ್ ಸಮಸ್ತಂ ಗವಾಮಪಿ |೫೨|

Adhikarana 37 (52) · Śloka 52

ತುರುಷ್ಕಶಲ್ಲಕೀನಾಂ ಚ ಗುಗ್ಗುಲೋಃ ಪದ್ಮಕಸ್ಯ ಚ ||೫೨||

Adhikarana 38 (53) · Śloka 53

ಏತೇ ಸರ್ವೇ ಸಸರ್ಪಿಷ್ಕಾ ಧೂಮಾಃ ಕಾರ್ಯಾ ವಿಜಾನತಾ |೫೩|

Adhikarana 39 (53) · Śloka 53

ಬಲೀಯಸಿ ಕಫಗ್ರಸ್ತೇ ವಮನಂ ಸವಿರೇಚನಮ್ ||೫೩||

Adhikarana 40 (54) · Śloka 54

ದುರ್ಬಲೇ ಚೈವ ರೂಕ್ಷೇ ಚ ತರ್ಪಣಂ ಹಿತಮುಚ್ಯತೇ | ಜಾಙ್ಗಲೋರಭ್ರಜೈರ್ಮಾಂಸೈರಾನೂಪೈರ್ವಾ ಸುಸಂಸ್ಕೃತೈಃ ||೫೪||

Adhikarana 41 (55) · Śloka 55

ನಿದಿಗ್ಧಿಕಾಂ ಚಾಮಲಕಪ್ರಮಾಣಾಂ ಹಿಙ್ಗ್ವರ್ಧಯುಕ್ತಾಂ ಮಧುನಾ ಸುಯುಕ್ತಾಮ್ | ಲಿಹನ್ನರಃ ಶ್ವಾಸನಿಪೀಡಿತೋ ಹಿ ಶ್ವಾಸಂ ಜಯತ್ಯೇವ ಬಲಾತ್ರ್ಯಹೇಣ ||೫೫||

Adhikarana 42 (56) · Śloka 56

ಯಥಾಽಗ್ನಿರಿದ್ಧಃ ಪವನಾನುವಿದ್ಧೋ ವಜ್ರಂ ಯಥಾ ವಾ ಸುರರಾಜಮುಕ್ತಮ್ | ರೋಗಾಸ್ತಥೈತೇ ಖಲು ದುರ್ನಿವಾರಾಃ ಶ್ವಾಸಶ್ಚ ಕಾಸಶ್ಚ ವಿಲಮ್ಬಿಕಾ ಚ ||೫೬||

Adhikarana puShpikA · Śloka 51

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕಾಯಚಿಕಿತ್ಸಾತನ್ತ್ರೇ ಹಿಕ್ಕಾಶ್ವಾಸಪ್ರತಿಷೇಧೋ ನಾಮ (ತ್ರಯೋದಶೋಽಧ್ಯಾಯಃ, ಆದಿತಃ) ಏಕಪಞ್ಚಾಶತ್ತಮೋಽಧ್ಯಾಯಃ ||೫೧||