10. pittābhiṣyandapratiṣēdhādhyāyaḥ

Adhikarana 1 (1-2) · Śloka 2

అథాతః పిత్తాభిష్యందప్రతిషేధం వ్యాఖ్యాస్యామః ||1|| యథోవాచ భగవాన్ ధన్వంతరిః ||2||

Adhikarana 2 (3) · Śloka 3

పిత్తస్యందే పైత్తికే చాధిమంథే రక్తాస్రావః స్రంసనం చాపి కార్యం | అక్ష్ణోః సేకాలేపనస్యాంజనాని పైత్తే చ స్యాద్యద్విసర్పే విధానం ||3||

Adhikarana 3 (4-5) · Śloka 6

గుంద్రాం శాలిం శైవలం శైలభేదం దార్వీమేలాముత్పలం రోధ్రమభ్రం | పద్మాత్పత్రం శర్కరా దర్భమిక్షుం తాలం రోధ్రం వేతసం పద్మకం చ ||4|| ద్రాక్షాం క్షౌద్రం చందనం యష్టికాహ్వం యోషిత్క్షీరం రాత్ర్యనంతే చ పిష్ట్వా | సర్పిఃసిద్ధం తర్పణే సేకనస్యే శస్తం క్షీరం సిద్ధమేతేషు చాజం ||5|| యోజ్యో వర్గో వ్యస్త ఏషోఽన్యథా వా సమ్యఙ్నస్యేఽష్టార్ధసంఖ్యేఽపి నిత్యం |6|

Adhikarana 4 (6) · Śloka 6

క్రియాః సర్వా పిత్తహర్యః ప్రశస్తాస్త్ర్యహాచ్చోర్ధ్వం క్షీరసర్పిశ్చ నస్యం ||6||

Adhikarana 5 (7) · Śloka 7

పాలాశం స్యాచ్ఛోణితం చాంజనార్థే శల్లక్యా వా శర్కరాక్షౌద్రయుక్తం |7|

Adhikarana 6 (7) · Śloka 7

రసక్రియాం శర్కరాక్షౌద్రయుక్తాం పాలింద్యాం వా మధుకే వాఽపి కుర్యాత్ ||7||

Adhikarana 7 (8) · Śloka 8

ముస్తా ఫేనః సాగరస్యోత్పలం చ కృమిఘ్నైలాధాత్రిబీజాద్రసశ్చ |8|

Adhikarana 8 (8) · Śloka 8

తాలీశైలాగైరికోశీరశంఖైరేవం యుంజ్యాదంజనం స్తన్యపిష్టైః ||8||

Adhikarana 9 (9) · Śloka 9

చూర్ణం కుర్యాదంజనార్థే రసో వా స్తన్యోపేతో ధాతకీస్యందనాభ్యాం |9|

Adhikarana 10 (9) · Śloka 9

యోషిత్స్తన్యం శాతకుంభం విఘృష్టం క్షౌద్రోపేతం కైంశుకం చాపి పుష్పం ||9||

Adhikarana 11 (10) · Śloka 10

రోధ్రం ద్రాక్షాం శర్కరాముత్పలం చ నార్యాః క్షీరే యష్టికాహ్వం వచాం చ | పిష్ట్వా క్షీరే వర్ణకస్య త్వచం చ తోయోన్మిశ్రే చందనోదుంబరే చ ||10||

Adhikarana 12 (11-12) · Śloka 12

కార్యః ఫేనః సాగరస్యాంజనార్థే నారీస్తన్యే మాక్షికే చాపి ఘృష్టః | యోషిత్స్తన్యే స్థాపితం యష్టికాహ్వం రోధ్రం ద్రాక్షాం శర్కరాముత్పలం చ ||11|| క్షౌమాబద్ధం పథ్యమాశ్చ్యోతనే వా సర్పిర్ఘృష్టం యష్టికాహ్వం సరోధ్రం | తోయోన్మిశ్రాః కాశ్మరీధాత్రిపథ్యాస్తద్వచ్చాహుః కట్ఫలం చాంబునైవ ||12||

Adhikarana 13 (13) · Śloka 13

ఏషోఽమ్లాఖ్యేఽనుక్రమశ్చాపి శుక్తౌ కార్యః సర్వః స్యాత్సిరామోక్షవర్జ్యః ||13||

Adhikarana 14 (14) · Śloka 14

సర్పిః పేయం త్రైఫలం తైల్వకం వా పేయం వా స్యాత్ కేవలం యత్ పురాణం |14|

Adhikarana 15 (14) · Śloka 14

దోషేఽధస్తాచ్ఛుక్తికాయామపాస్తే శీతైర్ద్రవ్యైరంజనం కార్యమాశు ||14||

Adhikarana 16 (15) · Śloka 15

వైదూర్యం యత్ స్ఫాటికం వైద్రుమం చ మౌక్తం శాంఖం రాజతం శాతకుంభం | చూర్ణం సూక్ష్మం శర్కరాక్షౌద్రయుక్తం శుక్తిం హన్యాదంజనం చైతదాశు ||15||

Adhikarana 17 (16) · Śloka 16

యుంజ్యాత్ సర్పిర్ధూమదర్శీ నరస్తు శేషం కుర్యాద్రక్తపిత్తే విధానం | యచ్చైవాన్యత్ పిత్తహృచ్చాపి సర్వం యద్వీసర్పే పైత్తికే వై విధానం ||16||

Adhikarana puShpikA · Śloka 10

ఇతి సుశ్రుతసంహితాయాముత్తరతంత్రాంతర్గతే శాలాక్యతంత్రే పిత్తాభిష్యందప్రతిషేధో నామ దశమోఽధ్యాయః ||10||