10. pittābhiṣyandapratiṣēdhādhyāyaḥ

Adhikarana 1 (1-2) · Śloka 2

ಅಥಾತಃ ಪಿತ್ತಾಭಿಷ್ಯನ್ದಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಪಿತ್ತಸ್ಯನ್ದೇ ಪೈತ್ತಿಕೇ ಚಾಧಿಮನ್ಥೇ ರಕ್ತಾಸ್ರಾವಃ ಸ್ರಂಸನಂ ಚಾಪಿ ಕಾರ್ಯಮ್ | ಅಕ್ಷ್ಣೋಃ ಸೇಕಾಲೇಪನಸ್ಯಾಞ್ಜನಾನಿ ಪೈತ್ತೇ ಚ ಸ್ಯಾದ್ಯದ್ವಿಸರ್ಪೇ ವಿಧಾನಮ್ ||೩||

Adhikarana 3 (4-5) · Śloka 6

ಗುನ್ದ್ರಾಂ ಶಾಲಿಂ ಶೈವಲಂ ಶೈಲಭೇದಂ ದಾರ್ವೀಮೇಲಾಮುತ್ಪಲಂ ರೋಧ್ರಮಭ್ರಮ್ | ಪದ್ಮಾತ್ಪತ್ರಂ ಶರ್ಕರಾ ದರ್ಭಮಿಕ್ಷುಂ ತಾಲಂ ರೋಧ್ರಂ ವೇತಸಂ ಪದ್ಮಕಂ ಚ ||೪|| ದ್ರಾಕ್ಷಾಂ ಕ್ಷೌದ್ರಂ ಚನ್ದನಂ ಯಷ್ಟಿಕಾಹ್ವಂ ಯೋಷಿತ್ಕ್ಷೀರಂ ರಾತ್ರ್ಯನನ್ತೇ ಚ ಪಿಷ್ಟ್ವಾ | ಸರ್ಪಿಃಸಿದ್ಧಂ ತರ್ಪಣೇ ಸೇಕನಸ್ಯೇ ಶಸ್ತಂ ಕ್ಷೀರಂ ಸಿದ್ಧಮೇತೇಷು ಚಾಜಮ್ ||೫|| ಯೋಜ್ಯೋ ವರ್ಗೋ ವ್ಯಸ್ತ ಏಷೋಽನ್ಯಥಾ ವಾ ಸಮ್ಯಙ್ನಸ್ಯೇಽಷ್ಟಾರ್ಧಸಙ್ಖ್ಯೇಽಪಿ ನಿತ್ಯಮ್ |೬|

Adhikarana 4 (6) · Śloka 6

ಕ್ರಿಯಾಃ ಸರ್ವಾ ಪಿತ್ತಹರ್ಯಃ ಪ್ರಶಸ್ತಾಸ್ತ್ರ್ಯಹಾಚ್ಚೋರ್ಧ್ವಂ ಕ್ಷೀರಸರ್ಪಿಶ್ಚ ನಸ್ಯಮ್ ||೬||

Adhikarana 5 (7) · Śloka 7

ಪಾಲಾಶಂ ಸ್ಯಾಚ್ಛೋಣಿತಂ ಚಾಞ್ಜನಾರ್ಥೇ ಶಲ್ಲಕ್ಯಾ ವಾ ಶರ್ಕರಾಕ್ಷೌದ್ರಯುಕ್ತಮ್ |೭|

Adhikarana 6 (7) · Śloka 7

ರಸಕ್ರಿಯಾಂ ಶರ್ಕರಾಕ್ಷೌದ್ರಯುಕ್ತಾಂ ಪಾಲಿನ್ದ್ಯಾಂ ವಾ ಮಧುಕೇ ವಾಽಪಿ ಕುರ್ಯಾತ್ ||೭||

Adhikarana 7 (8) · Śloka 8

ಮುಸ್ತಾ ಫೇನಃ ಸಾಗರಸ್ಯೋತ್ಪಲಂ ಚ ಕೃಮಿಘ್ನೈಲಾಧಾತ್ರಿಬೀಜಾದ್ರಸಶ್ಚ |೮|

Adhikarana 8 (8) · Śloka 8

ತಾಲೀಶೈಲಾಗೈರಿಕೋಶೀರಶಙ್ಖೈರೇವಂ ಯುಞ್ಜ್ಯಾದಞ್ಜನಂ ಸ್ತನ್ಯಪಿಷ್ಟೈಃ ||೮||

Adhikarana 9 (9) · Śloka 9

ಚೂರ್ಣಂ ಕುರ್ಯಾದಞ್ಜನಾರ್ಥೇ ರಸೋ ವಾ ಸ್ತನ್ಯೋಪೇತೋ ಧಾತಕೀಸ್ಯನ್ದನಾಭ್ಯಾಮ್ |೯|

Adhikarana 10 (9) · Śloka 9

ಯೋಷಿತ್ಸ್ತನ್ಯಂ ಶಾತಕುಮ್ಭಂ ವಿಘೃಷ್ಟಂ ಕ್ಷೌದ್ರೋಪೇತಂ ಕೈಂಶುಕಂ ಚಾಪಿ ಪುಷ್ಪಮ್ ||೯||

Adhikarana 11 (10) · Śloka 10

ರೋಧ್ರಂ ದ್ರಾಕ್ಷಾಂ ಶರ್ಕರಾಮುತ್ಪಲಂ ಚ ನಾರ್ಯಾಃ ಕ್ಷೀರೇ ಯಷ್ಟಿಕಾಹ್ವಂ ವಚಾಂ ಚ | ಪಿಷ್ಟ್ವಾ ಕ್ಷೀರೇ ವರ್ಣಕಸ್ಯ ತ್ವಚಂ ಚ ತೋಯೋನ್ಮಿಶ್ರೇ ಚನ್ದನೋದುಮ್ಬರೇ ಚ ||೧೦||

Adhikarana 12 (11-12) · Śloka 12

ಕಾರ್ಯಃ ಫೇನಃ ಸಾಗರಸ್ಯಾಞ್ಜನಾರ್ಥೇ ನಾರೀಸ್ತನ್ಯೇ ಮಾಕ್ಷಿಕೇ ಚಾಪಿ ಘೃಷ್ಟಃ | ಯೋಷಿತ್ಸ್ತನ್ಯೇ ಸ್ಥಾಪಿತಂ ಯಷ್ಟಿಕಾಹ್ವಂ ರೋಧ್ರಂ ದ್ರಾಕ್ಷಾಂ ಶರ್ಕರಾಮುತ್ಪಲಂ ಚ ||೧೧|| ಕ್ಷೌಮಾಬದ್ಧಂ ಪಥ್ಯಮಾಶ್ಚ್ಯೋತನೇ ವಾ ಸರ್ಪಿರ್ಘೃಷ್ಟಂ ಯಷ್ಟಿಕಾಹ್ವಂ ಸರೋಧ್ರಮ್ | ತೋಯೋನ್ಮಿಶ್ರಾಃ ಕಾಶ್ಮರೀಧಾತ್ರಿಪಥ್ಯಾಸ್ತದ್ವಚ್ಚಾಹುಃ ಕಟ್ಫಲಂ ಚಾಮ್ಬುನೈವ ||೧೨||

Adhikarana 13 (13) · Śloka 13

ಏಷೋಽಮ್ಲಾಖ್ಯೇಽನುಕ್ರಮಶ್ಚಾಪಿ ಶುಕ್ತೌ ಕಾರ್ಯಃ ಸರ್ವಃ ಸ್ಯಾತ್ಸಿರಾಮೋಕ್ಷವರ್ಜ್ಯಃ ||೧೩||

Adhikarana 14 (14) · Śloka 14

ಸರ್ಪಿಃ ಪೇಯಂ ತ್ರೈಫಲಂ ತೈಲ್ವಕಂ ವಾ ಪೇಯಂ ವಾ ಸ್ಯಾತ್ ಕೇವಲಂ ಯತ್ ಪುರಾಣಮ್ |೧೪|

Adhikarana 15 (14) · Śloka 14

ದೋಷೇಽಧಸ್ತಾಚ್ಛುಕ್ತಿಕಾಯಾಮಪಾಸ್ತೇ ಶೀತೈರ್ದ್ರವ್ಯೈರಞ್ಜನಂ ಕಾರ್ಯಮಾಶು ||೧೪||

Adhikarana 16 (15) · Śloka 15

ವೈದೂರ್ಯಂ ಯತ್ ಸ್ಫಾಟಿಕಂ ವೈದ್ರುಮಂ ಚ ಮೌಕ್ತಂ ಶಾಙ್ಖಂ ರಾಜತಂ ಶಾತಕುಮ್ಭಮ್ | ಚೂರ್ಣಂ ಸೂಕ್ಷ್ಮಂ ಶರ್ಕರಾಕ್ಷೌದ್ರಯುಕ್ತಂ ಶುಕ್ತಿಂ ಹನ್ಯಾದಞ್ಜನಂ ಚೈತದಾಶು ||೧೫||

Adhikarana 17 (16) · Śloka 16

ಯುಞ್ಜ್ಯಾತ್ ಸರ್ಪಿರ್ಧೂಮದರ್ಶೀ ನರಸ್ತು ಶೇಷಂ ಕುರ್ಯಾದ್ರಕ್ತಪಿತ್ತೇ ವಿಧಾನಮ್ | ಯಚ್ಚೈವಾನ್ಯತ್ ಪಿತ್ತಹೃಚ್ಚಾಪಿ ಸರ್ವಂ ಯದ್ವೀಸರ್ಪೇ ಪೈತ್ತಿಕೇ ವೈ ವಿಧಾನಮ್ ||೧೬||

Adhikarana puShpikA · Śloka 10

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಶಾಲಾಕ್ಯತನ್ತ್ರೇ ಪಿತ್ತಾಭಿಷ್ಯನ್ದಪ್ರತಿಷೇಧೋ ನಾಮ ದಶಮೋಽಧ್ಯಾಯಃ ||೧೦||