65. tantrayuktyadhyāyaḥ

Adhikarana 1 (1-2) · Śloka 2

ಅಥಾತಸ್ತನ್ತ್ರಯುಕ್ತಿಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ದ್ವಾತ್ರಿಂಶತ್ತನ್ತ್ರಯುಕ್ತಯೋ ಭವನ್ತಿ ಶಾಸ್ತ್ರೇ | ತದ್ಯಥಾ- ಅಧಿಕರಣಂ(೧), ಯೋಗಃ(೨), ಪದಾರ್ಥಃ(೩), ಹೇತ್ವರ್ಥಃ(೪), ಉದ್ದೇಶಃ(೫), ನಿರ್ದೇಶಃ(೬), ಉಪದೇಶಃ(೭), ಅಪದೇಶಃ(೮), ಪ್ರದೇಶಃ(೯), ಅತಿದೇಶಃ(೧೦), ಅಪವರ್ಜಃ(೧೧), ವಾಕ್ಯಶೇಷಃ(೧೨), ಅರ್ಥಾಪತ್ತಿಃ(೧೩), ವಿಪರ್ಯಯಃ(೧೪), ಪ್ರಸಙ್ಗಃ(೧೫), ಏಕಾನ್ತಃ(೧೬), ಅನೇಕಾನ್ತಃ(೧೭), ಪೂರ್ವಪಕ್ಷಃ(೧೮), ನಿರ್ಣಯಃ(೧೯), ಅನುಮತಂ(೨೦), ವಿಧಾನಮ್(೨೧), ಅನಾಗತಾವೇಕ್ಷಣಮ್(೨೨), ಅತಿಕ್ರಾನ್ತಾವೇಕ್ಷಣಂ(೨೩), ಸಂಶಯಃ(೨೪), ವ್ಯಾಖ್ಯಾನಂ(೨೫), ಸ್ವಸಞ್ಜ್ಞಾ(೨೬), ನಿರ್ವಚನಂ(೨೭), ನಿದರ್ಶನಂ(೨೮), ನಿಯೋಗಃ(೨೯), ವಿಕಲ್ಪಃ(೩೦), ಸಮುಚ್ಚಯಃ(೩೧), ಊಹ್ಯಮ್(೩೨) ಇತಿ ||೩||

Adhikarana 3 (4) · Śloka 4

ಅತ್ರಾಸಾಂ ತನ್ತ್ರಯುಕ್ತೀನಾಂ ಕಿಂ ಪ್ರಯೋಜನಮ್? ಉಚ್ಯತೇ- ವಾಕ್ಯಯೋಜನಮರ್ಥಯೋಜನಂ ಚ ||೪||

Adhikarana 4 (5-6) · Śloka 6

ಭವನ್ತಿ ಚಾತ್ರ ಶ್ಲೋಕಾಃ- ಅಸದ್ವಾದಿಪ್ರಯುಕ್ತಾನಾಂ ವಾಕ್ಯಾನಾಂ ಪ್ರತಿಷೇಧನಮ್ | ಸ್ವವಾಕ್ಯಸಿದ್ಧಿರಪಿ ಚ ಕ್ರಿಯತೇ ತನ್ತ್ರಯುಕ್ತಿತಃ ||೫|| ವ್ಯಕ್ತಾ ನೋಕ್ತಾಸ್ತು ಯೇ ಹ್ಯಾರ್ಥಾ ಲೀನಾ ಯೇ ಚಾಪ್ಯನಿರ್ಮಲಾಃ | ಲೇಶೋಕ್ತಾ ಯೇ ಚ ಕೇಚಿತ್ಸ್ಯುಸ್ತೇಷಾಂ ಚಾಪಿ ಪ್ರಸಾಧನಮ್ ||೬||

Adhikarana 5 (7) · Śloka 7

ಯಥಾಽಮ್ಬುಜವನಸ್ಯಾರ್ಕಃ ಪ್ರದೀಪೋ ವೇಶ್ಮನೋ ಯಥಾ | ಪ್ರಬೋಧಸ್ಯ ಪ್ರಕಾಶಾರ್ಥಂ ತಥಾ ತನ್ತ್ರಸ್ಯ ಯುಕ್ತಯಃ ||೭||

Adhikarana 6 (8) · Śloka 8

ತತ್ರ ಯಮರ್ಥಮಧಿಕೃತ್ಯೋಚ್ಯತೇ ತದಧಿಕರಣಂ; ಯಥಾ ರಸಂ ದೋಷಂ ವಾ ||೮||

Adhikarana 7 (9) · Śloka 9

ಯೇನ ವಾಕ್ಯಂ ಯುಜ್ಯತೇ ಸ ಯೋಗಃ | ಯಥಾ- ‘ತೈಲಂ ಪಿಬೇಚ್ಚಾಮೃತವಲ್ಲಿನಿಮ್ಬಹಿಂಸ್ರಾಭಯಾವೃಕ್ಷಕಪಿಪ್ಪಲೀಭಿಃ | ಸಿದ್ಧಂ ಬಲಾಭ್ಯಾಂ ಚ ಸದೇವದಾರು ಹಿತಾಯ ನಿತ್ಯಂ ಗಲಗಣ್ಡರೋಗೇ’ | ಇತ್ಯತ್ರ ತೈಲಂ ಸಿದ್ಧಂ ಪಿಬೇದಿತಿ ಪ್ರಥಮಂ ವಕ್ತವ್ಯೇ ತೃತೀಯಪಾದೇ ಸಿದ್ಧಮಿತಿ ಪ್ರಯುಕ್ತಂ, ಏವಂ ದೂರಸ್ಥಾನಾಮಪಿ ಪದಾನಾಮೇಕೀಕರಣಂ ಯೋಗಃ ||೯||

Adhikarana 8 (10) · Śloka 10

ಯೋಽರ್ಥೋಽಭಿಹಿತಃ ಸೂತ್ರೇ ಪದೇ ವಾ ಸ ಪದಾರ್ಥಃ ಪದಸ್ಯ ಪದಯೋಃ ಪದಾನಾಂ ವಾಽರ್ಥಃ ಪದಾರ್ಥಃ; ಅಪರಿಮಿತಾಶ್ಚ ಪದಾರ್ಥಾಃ | ಯಥಾ- ಸ್ನೇಹಸ್ವೇದಾಞ್ಜನೇಷು ನಿರ್ದಿಷ್ಟೇಷು ದ್ವಯೋಸ್ತ್ರಯಾಣಾಂ ವಾಽರ್ಥಾನಾಮುಪಪತ್ತಿರ್ದೃಶ್ಯತೇ, ತತ್ರ ಯೋಽರ್ಥಃ ಪೂರ್ವಾಪರಯೋಗಸಿದ್ಧೋ ಭವತಿ ಸ ಗ್ರಹೀತವ್ಯಃ; ಯಥಾ- ‘ವೇದೋತ್ಪತ್ತಿಮಧ್ಯಾಯಂ ವ್ಯಾಖ್ಯಾಸ್ಯಾಮ’ ಇತ್ಯುಕ್ತೇ ಸನ್ದಿಹ್ಯತೇ ಬುದ್ಧಿಃ- ಕತಮಸ್ಯ ವೇದಸ್ಯೋತ್ಪತ್ತಿಂ ವಕ್ಷ್ಯತೀತಿ, ಯತಃ ಋಗ್ವೇದಾದಯಸ್ತು ವೇದಾಃ; ‘ವಿದ ವಿಚಾರಣೇ, ವಿದ್ಲೃ ಲಾಭೇ,’ ಇತ್ಯೇತಯೋಶ್ಚ ಧಾತ್ವೋರನೇಕಾರ್ಥಯೋಃ ಪ್ರಯೋಗಾತ್, ತತ್ರ ಪೂರ್ವಾಪರಯೋಗಮುಪಲಭ್ಯ ಪ್ರತಿಪತ್ತಿರ್ಭವತಿ- ಆಯುರ್ವೇದೋತ್ಪತ್ತಿಮಯಂ ವಿವಕ್ಷುರಿತಿ; ಏಷ ಪದಾರ್ಥಃ ||೧೦||

Adhikarana 9 (11) · Śloka 11

ಯದನ್ಯದುಕ್ತಮನ್ಯಾರ್ಥಸಾಧಕಂ ಭವತಿ ಸ ಹೇತ್ವರ್ಥಃ | ಯಥಾ- ಮೃತ್ಪಿಣ್ಡೋಽದ್ಭಿಃ ಪ್ರಕ್ಲಿಘತೇ ತಥಾ ಮಾಷದುಗ್ಧಪ್ರಭೃತಿಭಿರ್ವ್ರಣಃ ಪ್ರಕ್ಲಿಘತ ಇತಿ ||೧೧||

Adhikarana 10 (12) · Śloka 12

ಸಮಾಸವಚನಮುದ್ದೇಶಃ | ಯಥಾ- ಶಲ್ಯಮಿತಿ ||೧೨||

Adhikarana 11 (13) · Śloka 13

ವಿಸ್ತರವಚನಂ ನಿರ್ದೇಶಃ | ಯಥಾ- ಶಾರೀರಮಾಗನ್ತುಕಂ ಚೇತಿ ||೧೩||

Adhikarana 12 (14) · Śloka 14

ಏವಮಿತ್ಯುಪದೇಶಃ | ಯಥಾ- ‘ತಥಾ ನ ಜಾಗೃಯಾದ್ರಾತ್ರೌ ದಿವಾಸ್ವಪ್ನಂ ಚ ವರ್ಜಯೇತ್’ ಇತಿ ||೧೪||

Adhikarana 13 (15) · Śloka 15

ಅನೇನ ಕಾರಣೇನೇತ್ಯಪದೇಶಃ, ಯಥಾಽಪದಿಶ್ಯತೇ- ಮಧುರಃ ಶ್ಲೇಷ್ಮಾಣಮಭಿವರ್ಧಯತೀತಿ ||೧೫||

Adhikarana 14 (16) · Śloka 16

ಪ್ರಕೃತಸ್ಯಾತಿಕ್ರಾನ್ತೇನ ಸಾಧನಂ ಪ್ರದೇಶಃ | ಯಥಾ- ದೇವದತ್ತಸ್ಯಾನೇನ ಶಲ್ಯಮುದ್ಧೃತಂ ತಥಾ ಯಜ್ಞದತ್ತಸ್ಯಾಪ್ಯಯಮುದ್ಧರಿಷ್ಯತೀತಿ ||೧೬||

Adhikarana 15 (17) · Śloka 17

ಪ್ರಕೃತಸ್ಯಾನಾಗತಸ್ಯ ಸಾಧನಮತಿದೇಶಃ | ಯಥಾ- ಯತೋಽಸ್ಯ ವಾಯುರುರ್ಧ್ವಮುತ್ತಿಷ್ಠತೇ ತೇನೋದಾವರ್ತೀ ಸ್ಯಾದಿತಿ ||೧೭||

Adhikarana 16 (18) · Śloka 18

ಅಭಿವ್ಯಾಪ್ಯಾಪಕರ್ಷಣಮಪವರ್ಗಃ | ಯಥಾ- ಅಸ್ವೇದ್ಯಾ ವಿಷೋಪಸೃಷ್ಟಾಃ, ಅನ್ಯತ್ರ ಕೀಟವಿಷಾದಿತಿ ||೧೮||

Adhikarana 17 (19) · Śloka 19

ಯೇನ ಪದೇನಾನುಕ್ತೇನ ವಾಕ್ಯಂ ಸಮಾಪ್ಯೇತ ಸ ವಾಕ್ಯಶೇಷಃ | ಯಥಾ- ಶಿರಃ ಪಾಣಿಪಾದಪಾರ್ಶ್ವಪೃಷ್ಠೋದರೋರಸಾಮಿತ್ಯುಕ್ತೇ ಪುರುಷಗ್ರಹಣಂ ವಿನಾಽಪಿ ಗಮ್ಯತೇ ಪುರುಷಸ್ಯೇತಿ ||೧೯||

Adhikarana 18 (20) · Śloka 20

ಯದಕೀರ್ತಿತಮರ್ಥಾದಾಪದ್ಯತೇ ಸಾಽರ್ಥಾಪತ್ತಿಃ | ಯಥಾ- ಓದನಂ ಭೋಕ್ಷ್ಯೇ ಇತ್ಯುಕ್ತೇಽರ್ಥಾದಾಪನ್ನಂ ಭವತಿ- ನಾಯಂ ಪಿಪಾಸುರ್ಯವಾಗೂಮಿತಿ ||೨೦||

Adhikarana 19 (21) · Śloka 21

ಯದ್ಯತ್ರಾಭಿಹಿತಂ ತಸ್ಯ ಪ್ರಾತಿಲೋಮ್ಯಂ ವಿಪರ್ಯಯಃ | ಯಥಾ- ಕೃಶಾಲ್ಪಪ್ರಾಣಭೀರವೋ ದುಶ್ಚಿಕಿತ್ಸ್ಯಾ ಇತ್ಯುಕ್ತೇ ವಿಪರೀತಂ ಗೃಹ್ಯತೇ ದೃಢಾದಯಃ ಸುಚಿಕಿತ್ಸ್ಯಾ ಇತಿ ||೨೧||

Adhikarana 20 (22) · Śloka 22

ಪ್ರಕರಣಾನ್ತರೇಣ ಸಮಾಪನಂ ಪ್ರಸಙ್ಗಃ, ಯದ್ವಾ ಪ್ರಕರಣಾನ್ತರಿತೋ ಯೋಽರ್ಥೋಽಸಕೃದುಕ್ತಃ ಸಮಾಪ್ಯತೇ ಸ ಪ್ರಸಙ್ಗಃ | ಯಥಾ- ಪಞ್ಚಮಹಾಭೂತಶರೀರಿಸಮವಾಯಃ ಪುರುಷಸ್ತಸ್ಮಿನ್ ಕ್ರಿಯಾ ಸೋಽಧಿಷ್ಠಾನಮಿತಿ ವೇದೋತ್ಪತ್ತಾವಭಿಧಾಯ, ಭೂತಚಿನ್ತಾಯಾಂ ಪುನರುಕ್ತಂ- ಯತೋಽಭಿಹಿತಂ ಪಞ್ಚಮಹಾಭೂತಶರೀರಿಸಮವಾಯಃ ಪುರೂಷ ಇತಿ, ಸ ಖಲ್ವೇಷ ಕರ್ಮಪುರುಷಶ್ಚಿಕಿತ್ಸಾಧಿಕೃತ ಇತಿ ||೨೨||

Adhikarana 21 (23) · Śloka 23

(ಸರ್ವತ್ರ )ಯದವಧಾರಣೇನೋಚ್ಯತೇ ಸ ಏಕಾನ್ತಃ | ಯಥಾ- ತ್ರಿವೃದ್ವಿರೇಚಯತಿ, ಮದನಫಲಂ ವಾಮಯತಿ(ಏವ) ||೨೩||

Adhikarana 22 (24) · Śloka 24

ಕ್ವಚಿತ್ತಥಾ ಕ್ವಚಿದನ್ಯಥೇತಿ ಯಃ ಸೋಽನೇಕಾನ್ತಃ | ಯಥಾ- ಕೇಚಿದಾಚಾರ್ಯಾ ಬ್ರುವತೇ ದ್ರವ್ಯಂ ಪ್ರಧಾನಂ, ಕೇಚಿದ್ರಸಂ, ಕೇಚಿದ್ವೀರ್ಯಂ ಕೇಚಿದ್ವಿಪಾಕಮಿತಿ ||೨೪||

Adhikarana 23 (25) · Śloka 25

ಆಕ್ಷೇಪಪೂರ್ವಕಃ ಪ್ರಶ್ನಃ ಪೂರ್ವಪಕ್ಷಃ | ಯಥಾ- ಕಥಂ ವಾತನಿಮಿತ್ತಾಶ್ಚತ್ವಾರಃ ಪ್ರಮೇಹ ಅಸಾಧ್ಯಾ ಭವನ್ತೀತಿ ||೨೫||

Adhikarana 24 (26-27) · Śloka 27

ತಸ್ಯೋತ್ತರಂ ನಿರ್ಣಯಃ | ಯಥಾ- ಶರೀರಂ ಪ್ರಪೀಡ್ಯ ಪಶ್ಚಾದಧೋ ಗತ್ವಾ ವಸಾಮೇದೋಮಜ್ಜಾನುವಿದ್ಧಂ ಮೂತ್ರಂ ವಿಸೃಜತಿ ವಾತಃ ಏವಮಸಾಧ್ಯಾ ವಾತಜಾ ಇತಿ ||೨೬|| ತಥಾ ಚೋಕ್ತಮ್- ಕೃತ್ಸ್ನಂ ಶರೀರಂ ನಿಷ್ಪೀಡ್ಯ ಮೇದೋಮಜ್ಜಾವಸಾಯುತಃ | ಅಧಃ ಪ್ರಕುಪ್ಯತೇ ವಾಯುಸ್ತೇನಾಸಾಧ್ಯಾಸ್ತು ವಾತಜಾಃ ||೨೭||

Adhikarana 25 (28) · Śloka 28

ಪರಮತಮಪ್ರತಿಷಿದ್ಧಮನುಮತಮ್ | ಯಥಾ- ಅನ್ಯೋ ಬ್ರೂಯಾತ್- ಸಪ್ತ ರಸಾ ಇತಿ, ತಚ್ಚಾಪ್ರತಿಷೇಧಾದನುಮನ್ಯತೇ ಕಥಞ್ಚಿದಿತಿ ||೨೮||

Adhikarana 26 (29) · Śloka 29

ಪ್ರಕರಣಾನುಪೂರ್ವ್ಯಾಽಭಿಹಿತಂ ವಿಧಾನಮ್ | ಯಥಾ- ಸಕ್ಥಿಮರ್ಮಾಣ್ಯೇಕಾದಶ ಪ್ರಕರಣಾನುಪೂರ್ವ್ಯಾಽಭಿಹಿತಾನಿ ||೨೯||

Adhikarana 27 (30) · Śloka 30

ಏವಂ ವಕ್ಷ್ಯತೀತ್ಯನಾಗತಾವೇಕ್ಷಣಮ್ | ಯಥಾ- ಶ್ಲೋಕಸ್ಥಾನೇ ಬ್ರೂಯಾತ್- ಚಿಕಿತ್ಸಿತೇಷು ವಕ್ಷ್ಯಾಮೀತಿ ||೩೦||

Adhikarana 28 (31) · Śloka 31

ಯತ್ಪೂರ್ವಮುಕ್ತಂ ತದತಿಕ್ರಾನ್ತಾವೇಕ್ಷಣಮ್ | ಯಥಾ- ಚಿಕಿತ್ಸಿತೇಷು ಬ್ರೂಯಾತ್- ಶ್ಲೋಕಸ್ಥಾನೇ ಯದೀರಿತಮಿತಿ ||೩೧||

Adhikarana 29 (32) · Śloka 32

ಉಭಯಹೇತುದರ್ಶನಂ ಸಂಶಯಃ | ಯಥಾ - ತಲಹೃದಯಾಭಿಘಾತಃ ಪ್ರಾಣಹರಃ, ಪಾಣಿಪಾದಚ್ಛೇದನಮಪ್ರಾಣಹರಮಿತಿ ||೩೨||

Adhikarana 30 (33) · Śloka 33

ತನ್ತ್ರೇಽತಿಶಯೋಪವರ್ಣನಂ ವ್ಯಾಖ್ಯಾನಮ್ | ಯಥಾ- ಇಹ ಪಞ್ಚವಿಂಶತಿಕಃ ಪುರೂಷೋ ವ್ಯಾಖ್ಯಾಯತೇ, ಅನ್ಯೇಷ್ವಾಯುರ್ವೇದತನ್ತ್ರೇಷು ಭೂತಾದಿಪ್ರಭೃತ್ಯಾರಭ್ಯ ಚಿನ್ತಾ ||೩೩||

Adhikarana 31 (34) · Śloka 34

ಅನ್ಯಶಾಸ್ತ್ರಾಸಾಮಾನ್ಯಾ ಸ್ವಸಞ್ಜ್ಞಾ | ಯಥಾ- ಮಿಥುನಮಿತಿ ಮಧುಸರ್ಪಿಷೋರ್ಗ್ರಗಣಂ; ಲೋಕಪ್ರಸಿದ್ಧಮುದಾಹರಣಂ ವಾ ||೩೪||

Adhikarana 32 (35) · Śloka 35

ನಿಶ್ಚಿತಂ ವಚನಂ ನಿರ್ವಚನಮ್ | ಯಥಾ- ಆಯುರ್ವಿದ್ಯತೇಽಸ್ಮಿನ್ನನೇನ ವಾ ಆಯುರ್ವಿನ್ದತೀತ್ಯಾಯುರ್ವೇದಃ ||೩೫||

Adhikarana 33 (36) · Śloka 36

ದೃಷ್ಟಾನ್ತವ್ಯಕ್ತಿರ್ನಿದರ್ಶನಮ್ | ಯಥಾ- ಅಗ್ನಿರ್ವಾಯುನಾ ಸಹಿತಃ ಕಕ್ಷೇ ವೃರ್ದ್ಧಿ ಗಚ್ಛತಿ ತಥಾ ವಾತಪಿತ್ತಕಫದುಷ್ಟೋ ವ್ರಣ ಇತಿ ||೩೬||

Adhikarana 34 (37) · Śloka 37

ಇದಮೇವ ಕರ್ತವ್ಯಮಿತಿ ನಿಯೋಗಃ | ಯಥಾ- ಪಥ್ಯಮೇವ ಭೋಕ್ತವ್ಯಮಿತಿ ||೩೭||

Adhikarana 35 (38) · Śloka 38

ಇದಂ ಚೇದಂ ಚೇತಿ ಸಮುಚ್ಚಯಃ | ಯಥಾ- ಮಾಂಸವರ್ಗೇ ಏಣಹರಿಣಾದಯೋ ಲಾವತಿತ್ತಿರಿಶಾರಙ್ಗಶ್ಚ ಪ್ರಧಾನಾನೀತಿ ||೩೮||

Adhikarana 36 (39) · Śloka 39

ಇದಂ ವೇದಂ ವೇತಿ ವಿಕಲ್ಪಃ | ಯಥಾ- ರಸೌದನಃ ಸಘೃತಾ ಯವಾಗೂರ್ವಾ (ಭವತ್ವಿತಿ) ||೩೯||

Adhikarana 37 (40) · Śloka 40

ಯದನಿರ್ದಿಷ್ಟಂ ಬುದ್ಧಯಾಽವಗಮ್ಯತೇ ತದೂಹ್ಯಮ್ | ಯಥಾ- ಅಭಿಹಿತಮನ್ನಪಾನವಿಧೌ ಚತುರ್ವಿಧಂ ಚಾನ್ನಮುಪದಿಶ್ಯತೇ- ಭಕ್ಷ್ಯಂ ಭೋಜ್ಯಂ ಲೇಹ್ಯಂ ಪೇಯಮಿತಿ, ಏವಂ ಚತುರ್ವಿಧೇ ವಕ್ತವ್ಯೇ ದ್ವಿವಿಧಮಭಿಹಿತಮ್; ಇದಮತ್ರೋಹ್ಯಮ್- ಅನ್ನಪಾನೇ ವಿಶಿಷ್ಟಯೋರ್ದ್ವಯೋರ್ಗ್ರಹಣೇ ಕೃತೇ ಚತುರ್ಣಾಮಪಿ ಗ್ರಹಣಂ ಭವತೀತಿ; ಚತುರ್ವಿಧಶ್ಚಾಹಾರಃ ಪ್ರವಿರಲಃ, ಪ್ರಾಯೇಣ ದ್ವಿವಿಧ ಏವ; ಅತೋ ದ್ವಿತ್ವಂ ಪ್ರಸಿದ್ಧಮಿತಿ | ಕಿಞ್ಚಾನ್ಯತ್- ಅನ್ನೇನ ಭಕ್ಷ್ಯಮವರುದ್ಧಂ, ಘನಸಾಧರ್ಮ್ಯಾತ್; ಪೇಯೇನ ಲೇಹ್ಯಂ, ದ್ರವಸಾಧರ್ಮ್ಯಾತ್ ||೪೦||

Adhikarana 38 (41-43) · Śloka 43

ಭವನ್ತಿ ಚಾತ್ರ- ಸಾಮಾನ್ಯದರ್ಶನೇನಾಸಾಂ ವ್ಯವಸ್ಥಾ ಸಮ್ಪ್ರದರ್ಶಿತಾ | ವಿಶೇಷಸ್ತು ಯಥಾಯೋಗಮುಪಧಾರ್ಯೋ ವಿಪಶ್ಚಿತಾ ||೪೧|| ದ್ವಾತ್ರಿಂಶದ್ಯುಕ್ತಯೋ ಹ್ಯೇತಾಸ್ತನ್ತ್ರಸಾರಗವೇಷಣೇ | ಮಯಾ ಸಮ್ಯಗ್ವಿನಿಹಿತಾಃ ಶಬ್ದಾರ್ಥನ್ಯಾಯಸಂಯುತಾಃ ||೪೨|| ಯೋ ಹ್ಯೋತಾ ವಿಧಿವದ್ವೇತ್ತಿ ದೀಪೀಭೂತಾಸ್ತು ಬುದ್ಧಿಮಾನ್ | ಸ ಪೂಜಾರ್ಹೋ ಭಿಷಕ್ಶ್ರೇಷ್ಠ ಇತಿ ಧನ್ವನ್ತರೇರ್ಮತಮ್ ||೪೩||

Adhikarana puShpikA · Śloka 65

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರೇ ತನ್ತ್ರಭೂಷಣಾಧ್ಯಾಯೇಷು ತನ್ತ್ರಯುಕ್ತಿರ್ನಾಮ (ತೃತೀಯೋಽಧ್ಯಾಯಃ, ಆದಿತಃ) ಪಞ್ಚಷಷ್ಟಿಮೋಽಧ್ಯಾಯಃ ||೬೫||