9. vātābhiṣyandapratiṣēdhādhyāyaḥ

Adhikarana 1 (1-2) · Śloka 2

ಅಥಾತೋ ವಾತಾಭಿಷ್ಯನ್ದಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3-4) · Śloka 5

ಪುರಾಣಸರ್ಪಿಷಾ ಸ್ನಿಗ್ಧೌ ಸ್ಯನ್ದಾಧೀಮನ್ಥಪೀಡಿತೌ | ಸ್ವೇದಯಿತ್ವಾ ಯಥಾನ್ಯಾಯಂ ಸಿರಾಮೋಕ್ಷೇಣ ಯೋಜಯೇತ್ ||೩|| ಸಮ್ಪಾದಯೇದ್ಬಸ್ತಿಭಿಸ್ತು ಸಮ್ಯಕ್ ಸ್ನೇಹವಿರೇಚಿತೌ | ತರ್ಪಣೈಃ ಪುಟಪಾಕೈಶ್ಚ ಧೂಮೈರಾಶ್ಚ್ಯೋತನೈಸ್ತಥಾ ||೪|| ನಸ್ಯಸ್ನೇಹಪರೀಷೇಕೈಃ ಶಿರೋಬಸ್ತಿಭಿರೇವ ಚ |೫|

Adhikarana 3 (5-6) · Śloka 7

ವಾತಘ್ನಾನೂಪಜಲಜಮಾಂಸಾಮ್ಲಕ್ವಾಥಸೇಚನೈಃ ||೫|| ಸ್ನೇಹೈಶ್ಚತುರ್ಭಿರುಷ್ಣೈಶ್ಚ ತತ್ಪೀತಾಮ್ಬರಧಾರಣೈಃ | ಪಯೋಭಿರ್ವೇಸವಾರೈಶ್ಚ ಸಾಲ್ವಣೈಃ ಪಾಯಸೈಸ್ತಥಾ ||೬|| ಭಿಷಕ್ ಸಮ್ಪಾದಯೇದೇತಾವುಪನಾಹೈಶ್ಚ ಪೂಜಿತೈಃ |೭|

Adhikarana 4 (7) · Śloka 8

ಗ್ರಾಮ್ಯಾನೂಪೌದಕರಸೈಃ ಸ್ನಿಗ್ಧೈಃ ಫಲರಸಾನ್ವಿತೈಃ ||೭|| ಸುಸಂಸ್ಕೃತೈಃ ಪಯೋಭಿಶ್ಚ ತಯೋರಾಹಾರ ಇಷ್ಯತೇ |೮|

Adhikarana 5 (8-9) · Śloka 10

ತಥಾ ಚೋಪರಿ ಭಕ್ತಸ್ಯ ಸರ್ಪಿಃಪಾನಂ(ನೇ)ಪ್ರಶಸ್ಯತೇ ||೮|| ತ್ರಿಫಲಾಕ್ವಾಥಸಂಸಿದ್ಧಂ ಕೇವಲಂ ಜೀರ್ಣಮೇವ ವಾ | ಸಿದ್ಧಂ ವಾತಹರೈಃ ಕ್ಷೀರಂ ಪ್ರಥಮೇನ ಗಣೇನ ವಾ ||೯|| ಸ್ನೇಹಾಸ್ತೈಲಾದ್ವಿನಾ ಸಿದ್ಧಾ ವಾತಘ್ನೈಸ್ತರ್ಪಣೇ ಹಿತಾಃ |೧೦|

Adhikarana 6 (10) · Śloka 11

ಸ್ನೈಹಿಕಃ ಪುಟಪಾಕಶ್ಚ ಧೂಮೋ ನಸ್ಯಂ ಚ ತದ್ವಿಧಮ್ ||೧೦|| ನಸ್ಯಾದಿಷು ಸ್ಥಿರಾಕ್ಷೀರಮಧುರೈಸ್ತೈಲಮಿಷ್ಯತೇ |೧೧|

Adhikarana 7 (11) · Śloka 12

ಏರಣ್ಡಪಲ್ಲವೇ ಮೂಲೇ ತ್ವಚಿ ವಾಽಽಜಂ ಪಯಃ ಶೃತಮ್ ||೧೧|| ಕಣ್ಟಕಾರ್ಯಾಶ್ಚ ಮೂಲೇಷು ಸುಖೋಷ್ಣಂ ಸೇಚನೇ ಹಿತಮ್ |೧೨|

Adhikarana 8 (12) · Śloka 13

ಸೈನ್ಧವೋದೀಚ್ಯಯಷ್ಟ್ಯಾಹ್ವಪಿಪ್ಪಲೀಭಿಃ ಶೃತಂ ಪಯಃ ||೧೨|| ಹಿತಮರ್ಧೋದಕಂ ಸೇಕೇ ತಥಾಽಽಶ್ಚ್ಯೋತನಮೇವ ಚ |೧೩|

Adhikarana 9 (13) · Śloka 14

ಹೀಬೇರವಕ್ರಮಞ್ಜಿಷ್ಠೋದುಮ್ಬರತ್ವಕ್ಷು ಸಾಧಿತಮ್ ||೧೩|| ಸಾಮ್ಭಶ್ಛಾಗಂ ಪಯೋ ವಾಽಪಿ ಶೂಲಾಶ್ಚ್ಯೋತನಮುತ್ತಮಮ್ |೧೪|

Adhikarana 10 (14) · Śloka 15

ಮಧುಕಂ ರಜನೀಂ ಪಥ್ಯಾಂ ದೇವದಾರುಂ ಚ ಪೇಷಯೇತ್ ||೧೪|| ಆಜೇನ ಪಯಸಾ ಶ್ರೇಷ್ಠಮಭಿಷ್ಯನ್ದೇ ತದಞ್ಜನಮ್ |೧೫|

Adhikarana 11 (15) · Śloka 16

ಗೈರಿಕಂ ಸೈನ್ಧವಂ ಕೃಷ್ಣಾಂ ನಾಗರಂ ಚ ಯಥೋತ್ತರಮ್ ||೧೫|| ದ್ವಿಗುಣಂ ಪಿಷ್ಟಮದ್ಭಿಸ್ತು ಗುಟಿಕಾಞ್ಜನಮಿಷ್ಯತೇ |೧೬|

Adhikarana 12 (16) · Śloka 16

ಸ್ನೇಹಾಞ್ಜನಂ ಹಿತಂ ಚಾತ್ರ ವಕ್ಷ್ಯತೇ ತದ್ಯಥಾವಿಧಿ ||೧೬||

Adhikarana 13 (17) · Śloka 17

ರೋಗೋ ಯಶ್ಚಾನ್ಯತೋವಾತೋ ಯಶ್ಚ ಮಾರುತಪರ್ಯಯಃ | ಅನೇನೈವ ವಿಧಾನೇನ ಭಿಷಕ್ ತಾವಪಿ ಸಾಧಯೇತ್ ||೧೭||

Adhikarana 14 (18-19) · Śloka 20

ಪೂರ್ವಭಕ್ತಂ ಹಿತಂ ಸರ್ಪಿಃ ಕ್ಷೀರಂ ವಾಽಪ್ಯಥ ಭೋಜನೇ | ವೃಕ್ಷಾದನ್ಯಾಂ ಕಪಿತ್ಥೇ ಚ ಪಞ್ಚಮೂಲೇ ಮಹತ್ಯಪಿ ||೧೮|| ಸಕ್ಷೀರಂ ಕರ್ಕಟರಸೇ ಸಿದ್ಧಂ ಚಾತ್ರ ಘೃತಂ ಪಿಬೇತ್ | ಸಿದ್ಧಂ ವಾ ಹಿತಮತ್ರಾಹುಃ ಪತ್ತೂರಾರ್ತಗಲಗ್ನಿಕೈಃ ||೧೯|| ಸಕ್ಷೀರಂ ಮೇಷಶೃಙ್ಗ್ಯಾ ವಾ ಸರ್ಪಿರ್ವೀರತರೇಣ ವಾ |೨೦|

Adhikarana 15 (20-24) · Śloka 24

ಸೈನ್ಧವಂ ದಾರು ಶುಣ್ಠೀ ಚ ಮಾತುಲುಙ್ಗರಸೋ ಘೃತಮ್ ||೨೦|| ಸ್ತನ್ಯೋದಕಾಭ್ಯಾಂ ಕರ್ತವ್ಯಂ ಶುಷ್ಕಪಾಕೇ ತದಞ್ಜನಮ್ | ಪೂಜಿತಂ ಸರ್ಪಿಷಶ್ಚಾತ್ರ ಪಾನಮಕ್ಷ್ಣೋಶ್ಚ ತರ್ಪಣಮ್ ||೨೧|| ಘೃತೇನ ಜೀವನೀಯೇನ ನಸ್ಯಂ ತೈಲೇನ ಚಾಣುನಾ | ಪರಿಷೇಕೇ ಹಿತಂ ಚಾತ್ರ ಪಯಃ ಶೀತಂ ಸಸೈನ್ಧವಮ್ ||೨೨|| ರಜನೀದಾರುಸಿದ್ಧಂ ವಾ ಸೈನ್ಧವೇನ ಸಮಾಯುತಮ್ | ಸರ್ಪಿರ್ಯುತಂ ಸ್ತನ್ಯಘೃಷ್ಟಮಞ್ಜನಂ ವಾ ಮಹೌಷಧಮ್ ||೨೩|| ವಸಾ ವಾಽಽನೂಪಜಲಜಾ ಸೈನ್ಧವೇನ ಸಮಾಯುತಾ | ನಾಗರೋನ್ಮಿಶ್ರಿತಾ ಕಿಞ್ಚಿಚ್ಛುಷ್ಕಪಾಕೇ ತದಞ್ಜನಮ್ ||೨೪||

Adhikarana 16 (25) · Śloka 25

ಪವನಪ್ರಭವಾ ರೋಗಾ ಯೇ ಕೇಚಿದ್ದೃಷ್ಟಿನಾಶನಾಃ | ಬೀಜೇನಾನೇನ ಮತಿಮಾನ್ ತೇಷು ಕರ್ಮ ಪ್ರಯೋಜಯೇತ್ ||೨೫||

Adhikarana puShpikA · Śloka 9

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಶಾಲಾಕ್ಯತನ್ತ್ರೇ ವಾತಾಭಿಷ್ಯನ್ದಪ್ರತಿಷೇಧೋ ನಾಮ ನವಮೋಽಧ್ಯಾಯಃ ||೯||