2. apāmārgataṇḍulīyō'dhyāyaḥ

Adhikarana 1 (1-6) · Śloka 6

ಅಥಾತೋಽಪಾಮಾರ್ಗತಣ್ಡುಲೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨|| ಅಪಾಮಾರ್ಗಸ್ಯ ಬೀಜಾನಿ ಪಿಪ್ಪಲೀರ್ಮರಿಚಾನಿ ಚ| ವಿಡಙ್ಗಾನ್ಯಥ ಶಿಗ್ರೂಣಿ ಸರ್ಷಪಾಂಸ್ತುಮ್ಬುರೂಣಿ ಚ||೩|| ಅಜಾಜೀಂ ಚಾಜಗನ್ಧಾಂ ಚ ಪೀಲೂನ್ಯೇಲಾಂ ಹರೇಣುಕಾಮ್| ಪೃಥ್ವೀಕಾಂ ಸುರಸಾಂ ಶ್ವೇತಾಂ ಕುಠೇರಕಫಣಿಜ್ಝಕೌ||೪|| ಶಿರೀಷಬೀಜಂ ಲಶುನಂ ಹರಿದ್ರೇ ಲವಣದ್ವಯಮ್| ಜ್ಯೋತಿಷ್ಮತೀಂ ನಾಗರಂ ಚ ದದ್ಯಾಚ್ಛೀರ್ಷವಿರೇಚನೇ||೫|| ಗೌರವೇ ಶಿರಸಃ ಶೂಲೇ ಪೀನಸೇಽರ್ಧಾವಭೇದಕೇ| ಕ್ರಿಮಿವ್ಯಾಧಾವಪಸ್ಮಾರೇ ಘ್ರಾಣನಾಶೇ ಪ್ರಮೋಹಕೇ||೬||

Adhikarana 2 (7-8) · Śloka 8

ಮದನಂ ಮಧುಕಂ ನಿಮ್ಬಂ ಜೀಮೂತಂ ಕೃತವೇಧನಮ್| ಪಿಪ್ಪಲೀಕುಟಜೇಕ್ಷ್ವಾಕೂಣ್ಯೇಲಾಂ ಧಾಮಾರ್ಗವಾಣಿ ಚ||೭|| ಉಪಸ್ಥಿತೇ ಶ್ಲೇಷ್ಮಪಿತ್ತೇ ವ್ಯಾಧಾವಾಮಾಶಯಾಶ್ರಯೇ| ವಮನಾರ್ಥಂ ಪ್ರಯುಞ್ಜೀತ ಭಿಷಗ್ದೇಹಮದೂಷಯನ್||೮||

Adhikarana 3 (9-10) · Śloka 10

ತ್ರಿವೃತಾಂ ತ್ರಿಫಲಾಂ ದನ್ತೀಂ ನೀಲಿನೀಂ ಸಪ್ತಲಾಂ ವಚಾಮ್| ಕಮ್ಪಿಲ್ಲಕಂ ಗವಾಕ್ಷೀಂ ಚ ಕ್ಷೀರಿಣೀಮುದಕೀರ್ಯಕಾಮ್||೯|| ಪೀಲೂನ್ಯಾರಗ್ವಧಂ ದ್ರಾಕ್ಷಾಂ ದ್ರವನ್ತೀಂ ನಿಚುಲಾನಿ ಚ| ಪಕ್ವಾಶಯಗತೇ ದೋಷೇ ವಿರೇಕಾರ್ಥಂ ಪ್ರಯೋಜಯೇತ್||೧೦||

Adhikarana 4 (11-14) · Śloka 14

ಪಾಟಲಾಂ ಚಾಗ್ನಿಮನ್ಥಂ ಚ ಬಿಲ್ವಂ ಶ್ಯೋನಾಕಮೇವ ಚ| ಕಾಶ್ಮರ್ಯಂ ಶಾಲಪರ್ಣೀಂ ಚ ಪೃಶ್ನಿಪರ್ಣೀಂ ನಿದಿಗ್ಧಿಕಾಮ್||೧೧|| ಬಲಾಂ ಶ್ವದಂಷ್ಟ್ರಾಂ ಬೃಹತೀಮೇರಣ್ಡಂ ಸಪುನರ್ನವಮ್| ಯವಾನ್ ಕುಲತ್ಥಾನ್ ಕೋಲಾನಿ ಗುಡೂಚೀಂ ಮದನಾನಿ ಚ||೧೨|| ಪಲಾಶಂ ಕತ್ತೃಣಂ ಚೈವ ಸ್ನೇಹಾಂಶ್ಚ ಲವಣಾನಿ ಚ| ಉದಾವರ್ತೇ ವಿಬನ್ಧೇಷು ಯುಞ್ಜ್ಯಾದಾಸ್ಥಾಪನೇಷು ಚ||೧೩|| ಅತ ಏವೌಷಧಗಣಾತ್ ಸಙ್ಕಲ್ಪ್ಯಮನುವಾಸನಮ್| ಮಾರುತಘ್ನಮಿತಿ ಪ್ರೋಕ್ತಃ ಸಙ್ಗ್ರಹಃ ಪಾಞ್ಚಕರ್ಮಿಕಃ||೧೪||

Adhikarana 5 (15) · Śloka 15

ತಾನ್ಯುಪಸ್ಥಿತದೋಷಾಣಾಂ ಸ್ನೇಹಸ್ವೇದೋಪಪಾದನೈಃ| ಪಞ್ಚಕರ್ಮಾಣಿ ಕುರ್ವೀತ ಮಾತ್ರಾಕಾಲೌ ವಿಚಾರಯನ್||೧೫||

Adhikarana 6 (16) · Śloka 16

ಮಾತ್ರಾಕಾಲಾಶ್ರಯಾ ಯುಕ್ತಿಃ, ಸಿದ್ಧಿರ್ಯುಕ್ತೌ ಪ್ರತಿಷ್ಠಿತಾ| ತಿಷ್ಠತ್ಯುಪರಿ ಯುಕ್ತಿಜ್ಞೋ ದ್ರವ್ಯಜ್ಞಾನವತಾಂ ಸದಾ||೧೬||

Adhikarana 7 (17) · Śloka 17

ಅತ ಊರ್ಧ್ವಂ ಪ್ರವಕ್ಷ್ಯಾಮಿ ಯವಾಗೂರ್ವಿವಿಧೌಷಧಾಃ| ವಿವಿಧಾನಾಂ ವಿಕಾರಾಣಾಂ ತತ್ಸಾಧ್ಯಾನಾಂ ನಿವೃತ್ತಯೇ||೧೭||

Adhikarana 8 (18-33) · Śloka 33

ಪಿಪ್ಪಲೀಪಿಪ್ಪಲೀಮೂಲಚವ್ಯಚಿತ್ರಕನಾಗರೈಃ| ಯವಾಗೂರ್ದೀಪನೀಯಾ ಸ್ಯಾಚ್ಛೂಲಘ್ನೀ ಚೋಪಸಾಧಿತಾ||೧೮|| ದಧಿತ್ಥಬಿಲ್ವಚಾಙ್ಗೇರೀತಕ್ರದಾಡಿಮಸಾಧಿತಾ| ಪಾಚನೀ ಗ್ರಾಹಿಣೀ, ಪೇಯಾ ಸವಾತೇ ಪಾಞ್ಚಮೂಲಿಕೀ||೧೯|| ಶಾಲಪರ್ಣೀಬಲಾಬಿಲ್ವೈಃ ಪೃಶ್ನಿಪರ್ಣ್ಯಾ ಚ ಸಾಧಿತಾ| ದಾಡಿಮಾಮ್ಲಾ ಹಿತಾ ಪೇಯಾ ಪಿತ್ತಶ್ಲೇಷ್ಮಾತಿಸಾರಿಣಾಮ್||೨೦|| ಪಯಸ್ಯರ್ಧೋದಕೇ ಚ್ಛಾಗೇ ಹ್ರೀವೇರೋತ್ಪಲನಾಗರೈಃ| ಪೇಯಾ ರಕ್ತಾತಿಸಾರಘ್ನೀ ಪೃಶ್ನಿಪರ್ಣ್ಯಾ ಚ ಸಾಧಿತಾ||೨೧|| ದದ್ಯಾತ್ ಸಾತಿವಿಷಾಂ ಪೇಯಾಂ ಸಾಮೇ ಸಾಮ್ಲಾಂ ಸನಾಗರಾಮ್| ಶ್ವದಂಷ್ಟ್ರಾಕಣ್ಟಕಾರೀಭ್ಯಾಂ ಮೂತ್ರಕೃಚ್ಛ್ರೇ ಸಫಾಣಿತಾಮ್||೨೨|| ವಿಡಙ್ಗಪಿಪ್ಪಲೀಮೂಲಶಿಗ್ರುಭಿರ್ಮರಿಚೇನ ಚ| ತಕ್ರಸಿದ್ಧಾ ಯವಾಗೂಃ ಸ್ಯಾತ್ ಕ್ರಿಮಿಘ್ನೀ ಸಸುವರ್ಚಿಕಾ||೨೩|| ಮೃದ್ವೀಕಾಸಾರಿವಾಲಾಜಪಿಪ್ಪಲೀಮಧುನಾಗರೈಃ| ಪಿಪಾಸಾಘ್ನೀ, ವಿಷಘ್ನೀ ಚ ಸೋಮರಾಜೀವಿಪಾಚಿತಾ||೨೪|| ಸಿದ್ಧಾ ವರಾಹನಿರ್ಯೂಹೇ ಯವಾಗೂರ್ಬೃಂಹಣೀ ಮತಾ| ಗವೇಧುಕಾನಾಂ ಭೃಷ್ಟಾನಾಂ ಕರ್ಶನೀಯಾ ಸಮಾಕ್ಷಿಕಾ||೨೫|| ಸರ್ಪಿಷ್ಮತೀ ಬಹುತಿಲಾ ಸ್ನೇಹನೀ ಲವಣಾನ್ವಿತಾ| ಕುಶಾಮಲಕನಿರ್ಯೂಹೇ ಶ್ಯಾಮಾಕಾನಾಂ ವಿರೂಕ್ಷಣೀ||೨೬|| ದಶಮೂಲೀಶೃತಾ ಕಾಸಹಿಕ್ಕಾಶ್ವಾಸಕಫಾಪಹಾ| ಯಮಕೇ ಮದಿರಾಸಿದ್ಧಾ ಪಕ್ವಾಶಯರುಜಾಪಹಾ||೨೭|| ಶಾಕೈರ್ಮಾಂಸೈಸ್ತಿಲೈರ್ಮಾಷೈಃ ಸಿದ್ಧಾ ವರ್ಚೋ ನಿರಸ್ಯತಿ| ಜಮ್ಬ್ವಾಮ್ರಾಸ್ಥಿದಧಿತ್ಥಾಮ್ಲಬಿಲ್ವೈಃ ಸಾಙ್ಗ್ರಾಹಿಕೀ ಮತಾ||೨೮|| ಕ್ಷಾರಚಿತ್ರಕಹಿಙ್ಗ್ವಮ್ಲವೇತಸೈರ್ಭೇದಿನೀ ಮತಾ| ಅಭಯಾಪಿಪ್ಪಲೀಮೂಲವಿಶ್ವೈರ್ವಾತಾನುಲೋಮನೀ ||೨೯|| ತಕ್ರಸಿದ್ಧಾ ಯವಾಗೂಃ ಸ್ಯಾದ್ಧೃತವ್ಯಾಪತ್ತಿನಾಶಿನೀ| ತೈಲವ್ಯಾಪದಿ ಶಸ್ತಾ ಸ್ಯಾತ್ತಕ್ರಪಿಣ್ಯಾಕಸಾಧಿತಾ||೩೦|| ಗವ್ಯಮಾಂಸರಸೈಃ ಸಾಮ್ಲಾ ವಿಷಮಜ್ವರನಾಶಿನೀ| ಕಣ್ಠ್ಯಾ ಯವಾನಾಂ ಯಮಕೇ ಪಿಪ್ಪಲ್ಯಾಮಲಕೈಃ ಶೃತಾ||೩೧|| ತಾಮ್ರಚೂಡರಸೇ ಸಿದ್ಧಾ ರೇತೋಮಾರ್ಗರುಜಾಪಹಾ| ಸಮಾಷವಿದಲಾ ವೃಷ್ಯಾ ಘೃತಕ್ಷೀರೋಪಸಾಧಿತಾ||೩೨|| ಉಪೋದಿಕಾದಧಿಭ್ಯಾಂ ತು ಸಿದ್ಧಾ ಮದವಿನಾಶಿನೀ| ಕ್ಷುಧಂ ಹನ್ಯಾದಪಾಮಾರ್ಗಕ್ಷೀರಗೋಧಾರಸೈಃ ಶೃತಾ||೩೩||

Adhikarana 9 (34) · Śloka 34

ತತ್ರ ಶ್ಲೋಕಃ- ಅಷ್ಟಾವಿಂಶತಿರಿತ್ಯೇತಾ ಯವಾಗ್ವಃ ಪರಿಕೀರ್ತಿತಾಃ| ಪಞ್ಚಕರ್ಮಾಣಿ ಚಾಶ್ರಿತ್ಯ ಪ್ರೋಕ್ತೋ ಭೈಷಜ್ಯಸಙ್ಗ್ರಹಃ||೩೪||

Adhikarana 10 (35) · Śloka 35

ಪೂರ್ವಂ ಮೂಲಫಲಜ್ಞಾನಹೇತೋರುಕ್ತಂ ಯದೌಷಧಮ್| ಪಞ್ಚಕರ್ಮಾಶ್ರಯಜ್ಞಾನಹೇತೋಸ್ತತ್ ಕೀರ್ತಿತಂ ಪುನಃ||೩೫||

Adhikarana 11 (36) · Śloka 36

ಸ್ಮೃತಿಮಾನ್ ಹೇತುಯುಕ್ತಿಜ್ಞೋ ಜಿತಾತ್ಮಾ ಪ್ರತಿಪತ್ತಿಮಾನ್| ಭಿಷಗೌಷಧಸಂಯೋಗೈಶ್ಚಿಕಿತ್ಸಾಂ ಕರ್ತುಮರ್ಹತಿ||೩೬||

Adhikarana puShpikA · Śloka 2

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇ ಶ್ಲೋಕಸ್ಥಾನೇಽಪಾಮಾರ್ಗತಣ್ಡುಲೀಯೋ ನಾಮ ದ್ವಿತೀಯೋಽಧ್ಯಾಯಃ||೨||