8. indriyōpakramaṇīyō'dhyāyaḥ

Adhikarana 1 (1-2) · Śloka 2

ಅಥಾತ ಇನ್ದ್ರಿಯೋಪಕ್ರಮಣೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||

Adhikarana 2 (3) · Śloka 3

ಇಹ ಖಲು ಪಞ್ಚೇನ್ದ್ರಿಯಾಣಿ, ಪಞ್ಚೇನ್ದ್ರಿಯದ್ರವ್ಯಾಣಿ, ಪಞ್ಚೇನ್ದ್ರಿಯಾಧಿಷ್ಠಾನಾನಿ, ಪಞ್ಚೇನ್ದ್ರಿಯಾರ್ಥಾಃ, ಪಞ್ಚೇನ್ದ್ರಿಯಬುದ್ಧಯೋ ಭವನ್ತಿ, ಇತ್ಯುಕ್ತಮಿನ್ದ್ರಿಯಾಧಿಕಾರೇ||೩||

Adhikarana 3 (4) · Śloka 4

ಅತೀನ್ದ್ರಿಯಂ ಪುನರ್ಮನಃ ಸತ್ತ್ವಸಞ್ಜ್ಞಕಂ, ‘ಚೇತಃ’ ಇತ್ಯಾಹುರೇಕೇ, ತದರ್ಥಾತ್ಮಸಮ್ಪದಾಯತ್ತಚೇಷ್ಟಂ ಚೇಷ್ಟಾಪ್ರತ್ಯಯಭೂತಮಿನ್ದ್ರಿಯಾಣಾಮ್||೪||

Adhikarana 4 (5) · Śloka 5

ಸ್ವಾರ್ಥೇನ್ದ್ರಿಯಾರ್ಥಸಙ್ಕಲ್ಪವ್ಯಭಿಚರಣಾಚ್ಚಾನೇಕಮೇಕಸ್ಮಿನ್ ಪುರುಷೇ ಸತ್ತ್ವಂ, ರಜಸ್ತಮಃಸತ್ತ್ವಗುಣಯೋಗಾಚ್ಚ; ನ ಚಾನೇಕತ್ವಂ, ನಹ್ಯೇಕಂ ಹ್ಯೇಕಕಾಲಮನೇಕೇಷು ಪ್ರವರ್ತತೇ ; ತಸ್ಮಾನ್ನೈಕಕಾಲಾ ಸರ್ವೇನ್ದ್ರಿಯಪ್ರವೃತ್ತಿಃ||೫||

Adhikarana 5 (6) · Śloka 6

ಯದ್ಗುಣಂ ಚಾಭೀಕ್ಷ್ಣಂ ಪುರುಷಮನುವರ್ತತೇ ಸತ್ತ್ವಂ ತತ್ಸತ್ತ್ವಮೇವೋಪದಿಶನ್ತಿ ಮುನಯೋ ಬಾಹುಲ್ಯಾನುಶಯಾತ್||೬||

Adhikarana 6 (7) · Śloka 7

ಮನಃಪುರಃಸರಾಣೀನ್ದ್ರಿಯಾಣ್ಯರ್ಥಗ್ರಹಣಸಮರ್ಥಾನಿ ಭವನ್ತಿ||೭||

Adhikarana 7 (8) · Śloka 8

ತತ್ರ ಚಕ್ಷುಃ ಶ್ರೋತ್ರಂ ಘ್ರಾಣಂ ರಸನಂ ಸ್ಪರ್ಶನಮಿತಿ ಪಞ್ಚೇನ್ದ್ರಿಯಾಣಿ||೮||

Adhikarana 8 (9) · Śloka 9

ಪಞ್ಚೇನ್ದ್ರಿಯದ್ರವ್ಯಾಣಿ- ಖಂ ವಾಯುರ್ಜ್ಯೋತಿರಾಪೋ ಭೂರಿತಿ||೯||

Adhikarana 9 (10) · Śloka 10

ಪಞ್ಚೇನ್ದ್ರಿಯಾಧಿಷ್ಠಾನಾನಿ- ಅಕ್ಷಿಣೀ ಕರ್ಣೌ ನಾಸಿಕೇ ಜಿಹ್ವಾ ತ್ವಕ್ ಚೇತಿ||೧೦||

Adhikarana 10 (11) · Śloka 11

ಪಞ್ಚೇನ್ದ್ರಿಯಾರ್ಥಾಃ- ಶಬ್ದಸ್ಪರ್ಶರೂಪರಸಗನ್ಧಾಃ||೧೧||

Adhikarana 11 (12) · Śloka 12

ಪಞ್ಚೇನ್ದ್ರಿಯಬುದ್ಧಯಃ- ಚಕ್ಷುರ್ಬುದ್ಧ್ಯಾದಿಕಾಃ; ತಾಃ ಪುನರಿನ್ದ್ರಿಯೇನ್ದ್ರಿಯಾರ್ಥಸತ್ತ್ವಾತ್ಮಸನ್ನಿಕರ್ಷಜಾಃ, ಕ್ಷಣಿಕಾ, ನಿಶ್ಚಯಾತ್ಮಿಕಾಶ್ಚ, ಇತ್ಯೇತತ್ ಪಞ್ಚಪಞ್ಚಕಮ್||೧೨||

Adhikarana 12 (13) · Śloka 13

ಮನೋ ಮನೋರ್ಥೋ ಬುದ್ಧಿರಾತ್ಮಾ ಚೇತ್ಯಧ್ಯಾತ್ಮದ್ರವ್ಯಗುಣಸಙ್ಗ್ರಹಃ ಶುಭಾಶುಭಪ್ರವೃತ್ತಿನಿವೃತ್ತಿಹೇತುಶ್ಚ, ದ್ರವ್ಯಾಶ್ರಿತಂ ಚ ಕರ್ಮ; ಯದುಚ್ಯತೇ ಕ್ರಿಯೇತಿ||೧೩||

Adhikarana 13 (14) · Śloka 14

ತತ್ರಾನುಮಾನಗಮ್ಯಾನಾಂ ಪಞ್ಚಮಹಾಭೂತವಿಕಾರಸಮುದಾಯಾತ್ಮಕಾನಾಮಪಿ ಸತಾಮಿನ್ದ್ರಿಯಾಣಾಂ ತೇಜಶ್ಚಕ್ಷುಷಿ, ಖಂ ಶ್ರೋತ್ರೇ, ಘ್ರಾಣೇ ಕ್ಷಿತಿಃ, ಆಪೋ ರಸನೇ, ಸ್ಪರ್ಶನೇಽನಿಲೋ ವಿಶೇಷೇಣೋಪಪದ್ಯತೇ| ತತ್ರ ಯದ್ಯದಾತ್ಮಕಮಿನ್ದ್ರಿಯಂ ವಿಶೇಷಾತ್ತತ್ತದಾತ್ಮಕಮೇವಾರ್ಥಮನುಗೃಹ್ಣಾತಿ, ತತ್ಸ್ವಭಾವಾದ್ವಿಭುತ್ವಾಚ್ಚ||೧೪||

Adhikarana 14 (15) · Śloka 15

ತದರ್ಥಾತಿಯೋಗಾಯೋಗಮಿಥ್ಯಾಯೋಗಾತ್ ಸಮನಸ್ಕಮಿನ್ದ್ರಿಯಂ ವಿಕೃತಿಮಾಪದ್ಯಮಾನಂ ಯಥಾಸ್ವಂ ಬುದ್ಧ್ಯುಪಘಾತಾಯ ಸಮ್ಪದ್ಯತೇ, ಸಾಮರ್ಥ್ಯಯೋಗಾತ್ ಪುನಃ ಪ್ರಕೃತಿಮಾಪದ್ಯಮಾನಂ ಯಥಾಸ್ವಂ ಬುದ್ಧಿಮಾಪ್ಯಾಯಯತಿ||೧೫||

Adhikarana 15 (16) · Śloka 16

ಮನಸಸ್ತು ಚಿನ್ತ್ಯಮರ್ಥಃ| ತತ್ರ ಮನಸೋ ಮನೋಬುದ್ಧೇಶ್ಚ ತ ಏವ ಸಮಾನಾತಿಹೀನಮಿಥ್ಯಾಯೋಗಾಃ ಪ್ರಕೃತಿವಿಕೃತಿಹೇತವೋ ಭವನ್ತಿ||೧೬||

Adhikarana 16 (17) · Śloka 17

ತತ್ರೇನ್ದ್ರಿಯಾಣಾಂ ಸಮನಸ್ಕಾನಾಮನುಪತಪ್ತಾನಾಮನುಪತಾಪಾಯ ಪ್ರಕೃತಿಭಾವೇ ಪ್ರಯತಿತವ್ಯಮೇಭಿರ್ಹೇತುಭಿಃ; ತದ್ಯಥಾ- ಸಾತ್ಮ್ಯೇನ್ದ್ರಿಯಾರ್ಥಸಂಯೋಗೇನ ಬುದ್ಧ್ಯಾ ಸಮ್ಯಗವೇಕ್ಷ್ಯಾವೇಕ್ಷ್ಯ ಕರ್ಮಣಾಂ ಸಮ್ಯಕ್ ಪ್ರತಿಪಾದನೇನ, ದೇಶಕಾಲಾತ್ಮಗುಣವಿಪರೀತೋಪಾಸನೇನ ಚೇತಿ| ತಸ್ಮಾದಾತ್ಮಹಿತಂ ಚಿಕೀರ್ಷತಾ ಸರ್ವೇಣ ಸರ್ವಂ ಸರ್ವದಾ ಸ್ಮೃತಿಮಾಸ್ಥಾಯ ಸದ್ವೃತ್ತಮನುಷ್ಠೇಯಮ್||೧೭||

Adhikarana 17 (18) · Śloka 18

ತದ್ಧ್ಯನುತಿಷ್ಠನ್ ಯುಗಪತ್ ಸಮ್ಪಾದಯತ್ಯರ್ಥದ್ವಯಮಾರೋಗ್ಯಮಿನ್ದ್ರಿಯವಿಜಯಂ ಚೇತಿ; ತತ್ ಸದ್ವೃತ್ತಮಖಿಲೇನೋಪದೇಕ್ಷ್ಯಾಮೋಽಗ್ನಿವೇಶ ! ತದ್ಯಥಾ- ದೇವಗೋಬ್ರಾಹ್ಮಣಗುರುವೃದ್ಧಸಿದ್ಧಾಚಾರ್ಯಾನರ್ಚಯೇತ್, ಅಗ್ನಿಮುಪಚರೇತ್, ಓಷಧೀಃ ಪ್ರಶಸ್ತಾ ಧಾರಯೇತ್, ದ್ವೌ ಕಾಲಾವುಪಸ್ಪೃಶೇತ್, ಮಲಾಯನೇಷ್ವಭೀಕ್ಷ್ಣಂ ಪಾದಯೋಶ್ಚ ವೈಮಲ್ಯಮಾದಧ್ಯಾತ್, ತ್ರಿಃಪಕ್ಷಸ್ಯ ಕೇಶಶ್ಮಶ್ರುಲೋಮನಖಾನ್ ಸಂಹಾರಯೇತ್, ನಿತ್ಯಮನುಪಹತವಾಸಾಃ ಸುಮನಾಃ ಸುಗನ್ಧಿಃ ಸ್ಯಾತ್, ಸಾಧುವೇಶಃ, ಪ್ರಸಿದ್ಧಕೇಶಃ , ಮೂರ್ಧಶ್ರೋತ್ರಘ್ರಾಣಪಾದತೈಲನಿತ್ಯಃ, ಧೂಮಪಃ, ಪೂರ್ವಾಭಿಭಾಷೀ, ಸುಮುಖಃ, ದುರ್ಗೇಷ್ವಭ್ಯುಪಪತ್ತಾ, ಹೋತಾ, ಯಷ್ಟಾ, ದಾತಾ, ಚತುಷ್ಪಥಾನಾಂ ನಮಸ್ಕರ್ತಾ, ಬಲೀನಾಮುಪಹರ್ತಾ, ಅತಿಥೀನಾಂ ಪೂಜಕಃ, ಪಿತೃಭ್ಯಃ ಪಿಣ್ಡದಃ, ಕಾಲೇ ಹಿತಮಿತಮಧುರಾರ್ಥವಾದೀ, ವಶ್ಯಾತ್ಮಾ, ಧರ್ಮಾತ್ಮಾ, ಹೇತಾವೀರ್ಷ್ಯುಃ, ಫಲೇ ನೇರ್ಷ್ಯುಃ, ನಿಶ್ಚಿನ್ತಃ, ನಿರ್ಭೀಕಃ, ಹ್ರೀಮಾನ್, ಧೀಮಾನ್, ಮಹೋತ್ಸಾಹಃ, ದಕ್ಷಃ, ಕ್ಷಮಾವಾನ್, ಧಾರ್ಮಿಕಃ, ಆಸ್ತಿಕಃ, ವಿನಯಬುದ್ಧಿವಿದ್ಯಾಭಿಜನವಯೋವೃದ್ಧಸಿದ್ಧಾಚಾರ್ಯಾಣಾಮುಪಾಸಿತಾ , ಛತ್ರೀ ದಣ್ಡೀ ಮೌಲೀ ಸೋಪಾನತ್ಕೋ ಯುಗಮಾತ್ರದೃಗ್ವಿಚರೇತ್ , ಮಙ್ಗಲಾಚಾರಶೀಲಃ, ಕುಚೇಲಾಸ್ಥಿಕಣ್ಟಕಾಮೇಧ್ಯಕೇಶತುಷೋತ್ಕರಭಸ್ಮಕಪಾಲಸ್ನಾನಬಲಿಭೂಮೀನಾಂ ಪರಿಹರ್ತಾ, ಪ್ರಾಕ್ ಶ್ರಮಾದ್ ವ್ಯಾಯಾಮವರ್ಜೀ ಸ್ಯಾತ್, ಸರ್ವಪ್ರಾಣಿಷು ಬನ್ಧುಭೂತಃ ಸ್ಯಾತ್, ಕ್ರುದ್ಧಾನಾಮನುನೇತಾ, ಭೀತಾನಾಮಾಶ್ವಾಸಯಿತಾ, ದೀನಾನಾಮಭ್ಯುಪಪತ್ತಾ, ಸತ್ಯಸನ್ಧಃ, ಸಾಮಪ್ರಧಾನಃ , ಪರಪರುಷವಚನಸಹಿಷ್ಣುಃ, ಅಮರ್ಷಘ್ನಃ, ಪ್ರಶಮಗುಣದರ್ಶೀ, ರಾಗದ್ವೇಷಹೇತೂನಾಂ ಹನ್ತಾ ಚ||೧೮||

Adhikarana 18 (19) · Śloka 19

ನಾನೃತಂ ಬ್ರೂಯಾತ್, ನಾನ್ಯಸ್ವಮಾದದೀತ, ನಾನ್ಯಸ್ತ್ರಿಯಮಭಿಲಷೇನ್ನಾನ್ಯಶ್ರಿಯಂ, ನ ವೈರಂ ರೋಚಯೇತ್, ನ ಕುರ್ಯಾತ್ ಪಾಪಂ, ನ ಪಾಪೇಽಪಿ ಪಾಪೀ ಸ್ಯಾತ್, ನಾನ್ಯದೋಷಾನ್ ಬ್ರೂಯಾತ್, ನಾನ್ಯರಹಸ್ಯಮಾಗಮಯೇನ್, ನಾಧಾರ್ಮಿಕೈರ್ನ ನರೇನ್ದ್ರದ್ವಿಷ್ಟೈಃ ಸಹಾಸೀತ ನೋನ್ಮತ್ತೈರ್ನ ಪತಿತೈರ್ನ ಭ್ರೂಣಹನ್ತೃಭಿರ್ನ ಕ್ಷುದ್ರೈರ್ನ ದುಷ್ಟೈಃ, ನ ದುಷ್ಟಯಾನಾನ್ಯಾರೋಹೇತ, ನ ಜಾನುಸಮಂ ಕಠಿನಮಾಸನಮಧ್ಯಾಸೀತ, ನಾನಾಸ್ತೀರ್ಣಮನುಪಹಿತಮವಿಶಾಲಮಸಮಂ ವಾ ಶಯನಂ ಪ್ರಪದ್ಯೇತ, ನ ಗಿರಿವಿಷಮಮಸ್ತಕೇಷ್ವನುಚರೇತ್, ನ ದ್ರುಮಮಾರೋಹೇತ್, ನ ಜಲೋಗ್ರವೇಗಮವಗಾಹೇತ, ನ ಕುಲಚ್ಛಾಯಾಮುಪಾಸೀತ , ನಾಗ್ನ್ಯುತ್ಪಾತಮಭಿತಶ್ಚರೇತ್, ನೋಚ್ಚೈರ್ಹಸೇತ್, ನ ಶಬ್ದವನ್ತಂ ಮಾರುತಂ ಮುಞ್ಚೇತ್, ನಾನಾವೃತಮುಖೋ ಜೃಮ್ಭಾಂ ಕ್ಷವಥುಂ ಹಾಸ್ಯಂ ವಾ ಪ್ರವರ್ತಯೇತ್, ನ ನಾಸಿಕಾಂ ಕುಷ್ಣೀಯಾತ್, ನ ದನ್ತಾನ್ ವಿಘಟ್ಟಯೇತ್, ನ ನಖಾನ್ ವಾದಯೇತ್, ನಾಸ್ಥೀನ್ಯಭಿಹನ್ಯಾತ್, ನ ಭೂಮಿಂ ವಿಲಿಖೇತ್, ನ ಛಿನ್ದ್ಯಾತ್ತೃಣಂ, ನ ಲೋಷ್ಟಂ ಮೃದ್ನೀಯಾತ್, ನ ವಿಗುಣಮಙ್ಗೈಶ್ಚೇಷ್ಟೇತ, ಜ್ಯೋತೀಂಷ್ಯನಿಷ್ಟಮಮೇಧ್ಯಮಶಸ್ತಂ ಚ ನಾಭಿವೀಕ್ಷೇತ, ನ ಹುಙ್ಕುರ್ಯಾಚ್ಛವಂ , ನ ಚೈತ್ಯಧ್ವಜಗುರುಪೂಜ್ಯಾಶಸ್ತಚ್ಛಾಯಾಮಾಕ್ರಾಮೇತ್, ನ ಕ್ಷಪಾಸ್ವಮರಸದನಚೈತ್ಯಚತ್ವರಚತುಷ್ಪಥೋಪವನಶ್ಮಶಾನಾಘಾತನಾನ್ಯಾಸೇವೇತ , ನೈಕಃ ಶೂನ್ಯಗೃಹಂ ನ ಚಾಟವೀಮನುಪ್ರವಿಶೇತ್, ನ ಪಾಪವೃತ್ತಾನ್ ಸ್ತ್ರೀಮಿತ್ರಭೃತ್ಯಾನ್ ಭಜೇತ, ನೋತ್ತಮೈರ್ವಿರುಧ್ಯೇತ, ನಾವರಾನುಪಾಸೀತ, ನ ಜಿಹ್ಮಂ ರೋಚಯೇತ್, ನಾನಾರ್ಯಮಾಶ್ರಯೇತ್, ನ ಭಯಮುತ್ಪಾದಯೇತ್, ನ ಸಾಹಸಾತಿಸ್ವಪ್ನಪ್ರಜಾಗರಸ್ನಾನಪಾನಾಶನಾನ್ಯಾಸೇವೇತ, ನೋರ್ಧ್ವಜಾನುಶ್ಚಿರಂ ತಿಷ್ಠೇತ್, ನ ವ್ಯಾಲಾನುಪಸರ್ಪೇನ್ನ ದಂಷ್ಟ್ರಿಣೋ ನ ವಿಷಾಣಿನಃ, ಪುರೋವಾತಾತಪಾವಶ್ಯಾಯಾತಿಪ್ರವಾತಾಞ್ಜಹ್ಯಾತ್, ಕಲಿಂ ನಾರಭೇತ, ನಾಸುನಿಭೃತೋಽಗ್ನಿಮುಪಾಸೀತ ನೋಚ್ಛಿಷ್ಟಃ, ನಾಧಃ ಕೃತ್ವಾ ಪ್ರತಾಪಯೇತ್, ನಾವಿಗತಕ್ಲಮೋ ನಾನಾಪ್ಲುತವದನೋ ನ ನಗ್ನ ಉಪಸ್ಪೃಶೇತ್, ನ ಸ್ನಾನಶಾಟ್ಯಾ ಸ್ಪೃಶೇದುತ್ತಮಾಙ್ಗಂ, ನ ಕೇಶಾಗ್ರಾಣ್ಯಭಿಹನ್ಯಾತ್, ನೋಪಸ್ಪೃಶ್ಯ ತೇ ಏವ ವಾಸಸೀ ಬಿಭೃಯಾತ್, ನಾಸ್ಪೃಷ್ಟ್ವಾ ರತ್ನಾಜ್ಯಪೂಜ್ಯಮಙ್ಗಲಸುಮನಸೋಽಭಿನಿಷ್ಕ್ರಾಮೇತ್, ನ ಪೂಜ್ಯಮಙ್ಗಲಾನ್ಯಪಸವ್ಯಂ ಗಚ್ಛೇನ್ನೇತರಾಣ್ಯನುದಕ್ಷಿಣಮ್||೧೯||

Adhikarana 19 (20) · Śloka 20

ನಾರತ್ನಪಾಣಿರ್ನಾಸ್ನಾತೋ ನೋಪಹತವಾಸಾ ನಾಜಪಿತ್ವಾ ನಾಹುತ್ವಾ ದೇವತಾಭ್ಯೋ ನಾನಿರೂಪ್ಯ ಪಿತೃಭ್ಯೋ ನಾದತ್ತ್ವಾ ಗುರುಭ್ಯೋ ನಾತಿಥಿಭ್ಯೋ ನೋಪಾಶ್ರಿತೇಭ್ಯೋ ನಾಪುಣ್ಯಗನ್ಧೋ ನಾಮಾಲೀ ನಾಪ್ರಕ್ಷಾಲಿತಪಾಣಿಪಾದವದನೋ ನಾಶುದ್ಧಮುಖೋ ನೋದಙ್ಮುಖೋ ನ ವಿಮನಾ ನಾಭಕ್ತಾಶಿಷ್ಟಾಶುಚಿಕ್ಷುಧಿತಪರಿಚರೋ ನ ಪಾತ್ರೀಷ್ವಮೇಧ್ಯಾಸು ನಾದೇಶೇ ನಾಕಾಲೇ ನಾಕೀರ್ಣೇ ನಾದತ್ತ್ವಾಽಗ್ರಮಗ್ನಯೇ ನಾಪ್ರೋಕ್ಷಿತಂ ಪ್ರೋಕ್ಷಣೋದಕೈರ್ನ ಮನ್ತ್ರೈರನಭಿಮನ್ತ್ರಿತಂ ನ ಕುತ್ಸಯನ್ನ ಕುತ್ಸಿತಂ ನ ಪ್ರತಿಕೂಲೋಪಹಿತಮನ್ನಮಾದದೀತ, ನ ಪರ್ಯುಷಿತಮನ್ಯತ್ರ ಮಾಂಸಹರಿತಕಶುಷ್ಕಶಾಕಫಲಭಕ್ಷ್ಯೇಭ್ಯಃ, ನಾಶೇಷಭುಕ್ ಸ್ಯಾದನ್ಯತ್ರ ದಧಿಮಧುಲವಣಸಕ್ತುಸರ್ಪಿಭ್ಯಃ, ನ ನಕ್ತಂ ದಧಿ ಭುಞ್ಜೀತ, ನ ಸಕ್ತೂನೇಕಾನಶ್ನೀಯಾನ್ನ ನಿಶಿ ನ ಭುಕ್ತ್ವಾ ನ ಬಹೂನ್ನ ದ್ವಿರ್ನೋದಕಾನ್ತರಿತಾತ್, ನ ಛಿತ್ತ್ವಾ ದ್ವಿಜೈರ್ಭಕ್ಷಯೇತ್||೨೦||

Adhikarana 20 (21) · Śloka 21

ನಾನೃಜುಃ ಕ್ಷುಯಾನ್ನಾದ್ಯಾನ್ನ ಶಯೀತ, ನ ವೇಗಿತೋಽನ್ಯಕಾರ್ಯಃ ಸ್ಯಾತ್, ನ ವಾಯ್ವಗ್ನಿಸಲಿಲಸೋಮಾರ್ಕದ್ವಿಜಗುರುಪ್ರತಿಮುಖಂ ನಿಷ್ಠೀವಿಕಾ(ವಾತ)ವರ್ಚೋಮೂತ್ರಾಣ್ಯುತ್ಸೃಜೇತ್, ನ ಪನ್ಥಾನಮವಮೂತ್ರಯೇನ್ನ ಜನವತಿ ನಾನ್ನಕಾಲೇ, ನ ಜಪಹೋಮಾಧ್ಯಯನಬಲಿಮಙ್ಗಲಕ್ರಿಯಾಸು ಶ್ಲೇಷ್ಮಸಿಙ್ಘಾಣಕಂ ಮುಞ್ಚೇತ್||೨೧||

Adhikarana 21 (22) · Śloka 22

ನ ಸ್ತ್ರಿಯಮವಜಾನೀತ, ನಾತಿವಿಶ್ರಮ್ಭಯೇತ್, ನ ಗುಹ್ಯಮನುಶ್ರಾವಯೇತ್, ನಾಧಿಕುರ್ಯಾತ್| ನ ರಜಸ್ವಲಾಂ ನಾತುರಾಂ ನಾಮೇಧ್ಯಾಂ ನಾಶಸ್ತಾಂ ನಾನಿಷ್ಟರೂಪಾಚಾರೋಪಚಾರಾಂ ನಾದಕ್ಷಾಂ ನಾದಕ್ಷಿಣಾಂ ನಾಕಾಮಾಂ ನಾನ್ಯಕಾಮಾಂ ನಾನ್ಯಸ್ತ್ರಿಯಂ ನಾನ್ಯಯೋನಿಂ ನಾಯೋನೌ ನ ಚೈತ್ಯಚತ್ವರಚತುಷ್ಪಥೋಪವನಶ್ಮಶಾನಾಘಾತನಸಲಿಲೌಷಧಿದ್ವಿಜಗುರುಸುರಾಲಯೇಷು ನ ಸನ್ಧ್ಯಯೋರ್ನಾತಿಥಿಷು ನಾಶುಚಿರ್ನಾಜಗ್ಧಭೇಷಜೋ ನಾಪ್ರಣೀತಸಙ್ಕಲ್ಪೋ ನಾನುಪಸ್ಥಿತಪ್ರಹರ್ಷೋ ನಾಭುಕ್ತವಾನ್ನಾತ್ಯಶಿತೋ ನ ವಿಷಮಸ್ಥೋ ನ ಮೂತ್ರೋಚ್ಚಾರಪೀಡಿತೋ ನ ಶ್ರಮವ್ಯಾಯಾಮೋಪವಾಸಕ್ಲಮಾಭಿಹತೋ ನಾರಹಸಿ ವ್ಯವಾಯಂ ಗಚ್ಛೇತ್||೨೨||

Adhikarana 22 (23-24) · Śloka 24

ನ ಸತೋ ನ ಗುರೂನ್ ಪರಿವದೇತ್, ನಾಶುಚಿರಭಿಚಾರಕರ್ಮಚೈತ್ಯಪೂಜ್ಯಪೂಜಾಧ್ಯಯನಮಭಿನಿರ್ವರ್ತಯೇತ್||೨೩|| ನ ವಿದ್ಯುತ್ಸ್ವನಾರ್ತವೀಷು ನಾಭ್ಯುದಿತಾಸು ದಿಕ್ಷು ನಾಗ್ನಿಸಮ್ಪ್ಲವೇ ನ ಭೂಮಿಕಮ್ಪೇ ನ ಮಹೋತ್ಸವೇ ನೋಲ್ಕಾಪಾತೇ ನ ಮಹಾಗ್ರಹೋಪಗಮನೇ ನ ನಷ್ಟಚನ್ದ್ರಾಯಾಂ ತಿಥೌ ನ ಸನ್ಧ್ಯಯೋರ್ನಾಮುಖಾದ್ಗುರೋರ್ನಾವಪತಿತಂ ನಾತಿಮಾತ್ರಂ ನ ತಾನ್ತಂ ನ ವಿಸ್ವರಂ ನಾನವಸ್ಥಿತಪದಂ ನಾತಿದ್ರುತಂ ನ ವಿಲಮ್ಬಿತಂ ನಾತಿಕ್ಲೀಬಂ ನಾತ್ಯುಚ್ಚೈರ್ನಾತಿನೀಚೈಃ ಸ್ವರೈರಧ್ಯಯನಮಭ್ಯಸ್ಯೇತ್||೨೪||

Adhikarana 23 (25) · Śloka 25

ನಾತಿಸಮಯಂ ಜಹ್ಯಾತ್, ನ ನಿಯಮಂ ಭಿನ್ದ್ಯಾತ್, ನ ನಕ್ತಂ ನಾದೇಶೇ ಚರೇತ್, ನ ಸನ್ಧ್ಯಾಸ್ವಭ್ಯವಹಾರಾಧ್ಯಯನಸ್ತ್ರೀಸ್ವಪ್ನಸೇವೀ ಸ್ಯಾತ್, ನ ಬಾಲವೃದ್ಧಲುಬ್ಧಮೂರ್ಖಕ್ಲಿಷ್ಟಕ್ಲೀಬೈಃ ಸಹ ಸಖ್ಯಂ ಕುರ್ಯಾತ್, ನ ಮದ್ಯದ್ಯೂತವೇಶ್ಯಾಪ್ರಸಙ್ಗರುಚಿಃ ಸ್ಯಾತ್, ನ ಗುಹ್ಯಂ ವಿವೃಣುಯಾತ್, ನ ಕಞ್ಚಿದವಜಾನೀಯಾತ್, ನಾಹಮ್ಮಾನೀ ಸ್ಯಾನ್ನಾದಕ್ಷೋ ನಾದಕ್ಷಿಣೋ ನಾಸೂಯಕಃ, ನ ಬ್ರಾಹ್ಮಣಾನ್ ಪರಿವದೇತ್, ನ ಗವಾಂ ದಣ್ಡಮುದ್ಯಚ್ಛೇತ್, ನ ವೃದ್ಧಾನ್ನ ಗುರೂನ್ನ ಗಣಾನ್ನ ನೃಪಾನ್ ವಾಽಧಿಕ್ಷಿಪೇತ್, ನ ಚಾತಿಬ್ರೂಯಾತ್, ನ ಬಾನ್ಧವಾನುರಕ್ತಕೃಚ್ಛ್ರದ್ವಿತೀಯಗುಹ್ಯಜ್ಞಾನ್ ಬಹಿಷ್ಕುರ್ಯಾತ್||೨೫||

Adhikarana 24 (26) · Śloka 26

ನಾಧೀರೋ ನಾತ್ಯುಚ್ಛ್ರಿತಸತ್ತ್ವಃ ಸ್ಯಾತ್, ನಾಭೃತಭೃತ್ಯಃ, ನಾವಿಶ್ರಬ್ಧಸ್ವಜನಃ, ನೈಕಃ ಸುಖೀ, ನ ದುಃಖಶೀಲಾಚಾರೋಪಚಾರಃ, ನ ಸರ್ವವಿಶ್ರಮ್ಭೀ, ನ ಸರ್ವಾಭಿಶಙ್ಕೀ, ನ ಸರ್ವಕಾಲವಿಚಾರೀ||೨೬||

Adhikarana 25 (27) · Śloka 27

ನ ಕಾರ್ಯಕಾಲಮತಿಪಾತಯೇತ್, ನಾಪರೀಕ್ಷಿತಮಭಿನಿವಿಶೇತ್, ನೇನ್ದ್ರಿಯವಶಗಃ ಸ್ಯಾತ್, ನ ಚಞ್ಚಲಂ ಮನೋಽನುಭ್ರಾಮಯೇತ್, ನ ಬುದ್ಧೀನ್ದ್ರಿಯಾಣಾಮತಿಭಾರಮಾದಧ್ಯಾತ್, ನ ಚಾತಿದೀರ್ಘಸೂತ್ರೀ ಸ್ಯಾತ್, ನ ಕ್ರೋಧಹರ್ಷಾವನುವಿದಧ್ಯಾತ್, ನ ಶೋಕಮನುವಸೇತ್, ನ ಸಿದ್ಧಾವುತ್ಸೇಕಂ ಯಚ್ಛೇನ್ನಾಸಿದ್ಧೌ ದೈನ್ಯಂ, ಪ್ರಕೃತಿಮಭೀಕ್ಷ್ಣಂ ಸ್ಮರೇತ್, ಹೇತುಪ್ರಭಾವನಿಶ್ಚಿತಃ ಸ್ಯಾದ್ಧೇತ್ವಾರಮ್ಭನಿತ್ಯಶ್ಚ, ನ ಕೃತಮಿತ್ಯಾಶ್ವಸೇತ್, ನ ವೀರ್ಯಂ ಜಹ್ಯಾತ್, ನಾಪವಾದಮನುಸ್ಮರೇತ್||೨೭||

Adhikarana 26 (28) · Śloka 28

ನಾಶುಚಿರುತ್ತಮಾಜ್ಯಾಕ್ಷತತಿಲಕುಶಸರ್ಷಪೈರಗ್ನಿಂ ಜುಹುಯಾದಾತ್ಮಾನಮಾಶೀರ್ಭಿರಾಶಾಸಾನಃ, ಅಗ್ನಿರ್ಮೇ ನಾಪಗಚ್ಛೇಚ್ಛರೀರಾದ್ವಾಯುರ್ಮೇ ಪ್ರಾಣಾನಾದಧಾತು ವಿಷ್ಣುರ್ಮೇ ಬಲಮಾದಧಾತು ಇನ್ದ್ರೋ ಮೇ ವೀರ್ಯಂ ಶಿವಾ ಮಾಂ ಪ್ರವಿಶನ್ತ್ವಾಪ ಆಪೋಹಿಷ್ಠೇತ್ಯಪಃ ಸ್ಪೃಶೇತ್, ದ್ವಿಃ ಪರಿಮೃಜ್ಯೋಷ್ಠೌ ಪಾದೌ ಚಾಭ್ಯುಕ್ಷ್ಯ ಮೂರ್ಧನಿ ಖಾನಿ ಚೋಪಸ್ಪೃಶೇದದ್ಭಿರಾತ್ಮಾನಂ ಹೃದಯಂ ಶಿರಶ್ಚ||೨೮||

Adhikarana 27 (29) · Śloka 29

ಬ್ರಹ್ಮಚರ್ಯಜ್ಞಾನದಾನಮೈತ್ರೀಕಾರುಣ್ಯಹರ್ಷೋಪೇಕ್ಷಾಪ್ರಶಮಪರಶ್ಚ ಸ್ಯಾದಿತಿ||೨೯||

Adhikarana 28 (30-33) · Śloka 33

ತತ್ರ ಶ್ಲೋಕಾಃ- ಪಞ್ಚಪಞ್ಚಕಮುದ್ದಿಷ್ಟಂ ಮನೋ ಹೇತುಚತುಷ್ಟಯಮ್| ಇನ್ದ್ರಿಯೋಪಕ್ರಮೇಽಧ್ಯಾಯೇ ಸದ್ವೃತ್ತಮಖಿಲೇನ ಚ||೩೦|| ಸ್ವಸ್ಥವೃತ್ತಂ ಯಥೋದ್ದಿಷ್ಟಂ ಯಃ ಸಮ್ಯಗನುತಿಷ್ಠತಿ| ಸ ಸಮಾಃ ಶತಮವ್ಯಾಧಿರಾಯುಷಾ ನ ವಿಯುಜ್ಯತೇ||೩೧|| ನೃಲೋಕಮಾಪೂರಯತೇ ಯಶಸಾ ಸಾಧುಸಮ್ಮತಃ| ಧರ್ಮಾರ್ಥಾವೇತಿ ಭೂತಾನಾಂ ಬನ್ಧುತಾಮುಪಗಚ್ಛತಿ||೩೨|| ಪರಾನ್ ಸುಕೃತಿನೋ ಲೋಕಾನ್ ಪುಣ್ಯಕರ್ಮಾ ಪ್ರಪದ್ಯತೇ| ತಸ್ಮಾದ್ವೃತ್ತಮನುಷ್ಠೇಯಮಿದಂ ಸರ್ವೇಣ ಸರ್ವದಾ||೩೩||

Adhikarana 29 (34) · Śloka 34

ಯಚ್ಚಾನ್ಯದಪಿ ಕಿಞ್ಚಿತ್ ಸ್ಯಾದನುಕ್ತಮಿಹ ಪೂಜಿತಮ್| ವೃತ್ತಂ ತದಪಿ ಚಾತ್ರೇಯಃ ಸದೈವಾಭ್ಯನುಮನ್ಯತೇ||೩೪||

Adhikarana puShpikA · Śloka 2

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇ ಶ್ಲೋಕಸ್ಥಾನೇ ಇನ್ದ್ರಿಯೋಪಕ್ರಮಣೀಯೋ ನಾಮಾಷ್ಟಮೋಽಧ್ಯಾಯಃ||೮|| ಇತಿ ಸ್ವಸ್ಥಚತುಷ್ಕೋ ದ್ವಿತೀಯಃ||೨||