Adhikarana 1 (1-2) · Śloka 2
athāta āturōpakramaṇīyamadhyāyaṁ vyākhyāsyāmaḥ ||1|| yathōvāca bhagavān dhanvantariḥ ||2||
View original
अथात आतुरोपक्रमणीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
35. āturōpakramaṇīyādhyāyaḥ
Adhikarana 2 (3) · Śloka 3
āturamupakramamāṇēna bhiṣajā''yurādāvēva parīkṣitavyaṁ ; satyāyuṣi vyādhyr̥tvagnivayōdēhabalasattvasātmyaprakr̥tibhēṣajadēśān parīkṣēta ||3||
View original
आतुरमुपक्रममाणेन भिषजाऽऽयुरादावेव परीक्षितव्यं ; सत्यायुषि व्याध्यृत्वग्निवयोदेहबलसत्त्वसात्म्यप्रकृतिभेषजदेशान् परीक्षेत ||३||
🔊 Audio coming soon
Adhikarana 3 (4) · Śloka 4
tatra mahāpāṇipādapārśvapr̥ṣṭhastanāgradaśanavadanaskandhalalāṭaṁ dīrghāṅguliparvōcchvāsaprēkṣaṇabāhuṁ, vistīrṇabhrūstanāntarōraskaṁ hrasvajaṅghāmēḍhragrīvaṁ, gambhīrasattvasvaranābhim , anuccairbaddhastanam, upacitamahārōmaśakarṇaṁ, paścānmastiṣkaṁ, snātānuliptaṁ mūrdhānupūrvyā viśuṣyamāṇaśarīraṁ paścācca viśuṣyamāṇahr̥dayaṁ puruṣaṁ jānīyāddīrghāyuḥ khalvayamiti | tamēkāntēnōpakramēt | ēbhirlakṣaṇairviparītairalpāyuḥ; miśrairmadhyamāyuriti ||4||
View original
तत्र महापाणिपादपार्श्वपृष्ठस्तनाग्रदशनवदनस्कन्धललाटं दीर्घाङ्गुलिपर्वोच्छ्वासप्रेक्षणबाहुं, विस्तीर्णभ्रूस्तनान्तरोरस्कं ह्रस्वजङ्घामेढ्रग्रीवं, गम्भीरसत्त्वस्वरनाभिम् , अनुच्चैर्बद्धस्तनम्, उपचितमहारोमशकर्णं, पश्चान्मस्तिष्कं, स्नातानुलिप्तं मूर्धानुपूर्व्या विशुष्यमाणशरीरं पश्चाच्च विशुष्यमाणहृदयं पुरुषं जानीयाद्दीर्घायुः खल्वयमिति | तमेकान्तेनोपक्रमेत् | एभिर्लक्षणैर्विपरीतैरल्पायुः; मिश्रैर्मध्यमायुरिति ||४||
🔊 Audio coming soon
Adhikarana 4 (5-6) · Śloka 6
bhavanti cātra | gūḍhasandhisirāsnāyuḥ saṁhatāṅgaḥ sthirēndriyaḥ | uttarōttarasukṣētrō yaḥ sa dīrghāyurucyatē ||5|| garbhāt prabhr̥tyarōgō yaḥ śanaiḥ samupacīyatē | śarīrajñānavijñānaiḥ sa dīrghāyuḥ samāsataḥ ||6||
View original
भवन्ति चात्र | गूढसन्धिसिरास्नायुः संहताङ्गः स्थिरेन्द्रियः | उत्तरोत्तरसुक्षेत्रो यः स दीर्घायुरुच्यते ||५|| गर्भात् प्रभृत्यरोगो यः शनैः समुपचीयते | शरीरज्ञानविज्ञानैः स दीर्घायुः समासतः ||६||
🔊 Audio coming soon
Adhikarana 5 (7-8) · Śloka 9
madhyamasyāyuṣō jñānamata ūrdhvaṁ nibōdha mē | adhastādakṣayōryasya lēkhāḥ syurvyaktamāyatāḥ ||7|| dvē vā tisrō'dhikā vā'pi pādau karṇau ca māṁsalau | nāsāgramūrdhvaṁ ca bhavēdūrdhvaṁ lēkhāśca pr̥ṣṭhataḥ ||8|| yasya syustasya paramamāyurbhavati saptatiḥ |9|
View original
मध्यमस्यायुषो ज्ञानमत ऊर्ध्वं निबोध मे | अधस्तादक्षयोर्यस्य लेखाः स्युर्व्यक्तमायताः ||७|| द्वे वा तिस्रोऽधिका वाऽपि पादौ कर्णौ च मांसलौ | नासाग्रमूर्ध्वं च भवेदूर्ध्वं लेखाश्च पृष्ठतः ||८|| यस्य स्युस्तस्य परममायुर्भवति सप्ततिः |९|
🔊 Audio coming soon
Adhikarana 6 (9-11) · Śloka 11
jaghanyasyāyuṣō jñānamata ūrdhvaṁ nibōdha mē ||9|| hasvāni yasya parvāṇi sumahaccāpi mēhanam | tathōrasyavalīḍhāni na ca syātpr̥ṣṭhamāyatam ||10|| ūrdhvaṁ ca śravaṇau sthānānnāsā cōccā śarīriṇaḥ | hasatō jalpatō vā'pi dantamāṁsaṁ pradr̥śyatē | prēkṣatē yaśca vibhrāntaṁ sa jīvētpañcaviṁśatim ||11||
View original
जघन्यस्यायुषो ज्ञानमत ऊर्ध्वं निबोध मे ||९|| हस्वानि यस्य पर्वाणि सुमहच्चापि मेहनम् | तथोरस्यवलीढानि न च स्यात्पृष्ठमायतम् ||१०|| ऊर्ध्वं च श्रवणौ स्थानान्नासा चोच्चा शरीरिणः | हसतो जल्पतो वाऽपि दन्तमांसं प्रदृश्यते | प्रेक्षते यश्च विभ्रान्तं स जीवेत्पञ्चविंशतिम् ||११||
🔊 Audio coming soon
Adhikarana 7 (12) · Śloka 12
atha punarāyuṣō vijñānārthamaṅgapratyaṅgapramāṇasārānupadēkṣyāmaḥ | tatrāṅgānyantarādhisakthibāhuśirāṁsi, tadavayavāḥ pratyaṅgānīti | tatra, svairaṅgulaiḥ pādāṅguṣṭhapradēśinyau dvyaṅgulāyatē ; pradēśinyāstu madhyamānāmikākaniṣṭhikā yathōttaraṁ pañcamabhāgahīnāḥ; caturaṅgulāyatē pañcāṅgulavistr̥tē prapadapādatalē; pañcacaturaṅgulāyatavistr̥tā pārṣṇiḥ; caturdaśāṅgulāyataḥ pādaḥ; caturdaśāṅgulapariṇāhāni pādagulphajaṅghājānumadhyāni; aṣṭādaśāṅgulā jaṅghā, jānūpariṣṭācca dvātriṁśadaṅgulam, ētē pañcāśat; jaṅghāyāmasamāvūrū; dvyaṅgulāni vr̥ṣaṇacibukadaśananāsāpuṭabhāgakarṇamūlabhrūnayanāntarāṇi; caturaṅgulāni mēhanavadanāntaranāsākarṇalalāṭagrīvōcchrāyadr̥ṣṭyantarāṇi; dvādaśāṅgulāni bhagavistāramēhananābhihr̥dayagrīvāstanāntaramukhāyāmamaṇibandhaprakōṣṭhasthaulyāni; indrabastipariṇāhāṁsapīṭhakūrparāntarāyāmaḥ ṣōḍaśāṅgulaḥ; caturviṁśatyaṅgulō hastaḥ; dvātriṁśadaṅgulaparimāṇau bhujau; dvātriṁśatpariṇāhāvūrū; maṇibandhakūrparāntaraṁ ṣōḍaśāṅgulaṁ; talaṁ ṣaṭcaturaṅgulāyāmavistāram; aṅguṣṭhamūlapradēśinīśravaṇāpāṅgāntaramadhyamāṅgulyau pañcāṅgulē; ardhapañcāṅgulē pradēśinyanāmikē; sārdhatryaṅgulau kaniṣṭhāṅguṣṭhau; caturviṁśativistārapariṇāhaṁ mukhagrīvaṁ; tribhāgāṅgulavistārā nāsāpuṭamaryādā; nayanatribhāgapariṇāhā tārakā; navamastārakāṁśō dr̥ṣṭiḥ; kēśāntamastakāntaramēkādaśāṅgulaṁ; mastakādavaṭukēśāntō daśāṅgulaḥ; karṇāvaṭvantaraṁ caturdaśāṅgulaṁ; puruṣōraḥpramāṇavistīrṇā strīśrōṇiḥ; aṣṭādaśāṅgulavistāramuraḥ; tatpramāṇā puruṣasya kaṭī; saviṁśamaṅgulaśataṁ puruṣāyāma iti ||12||
View original
अथ पुनरायुषो विज्ञानार्थमङ्गप्रत्यङ्गप्रमाणसारानुपदेक्ष्यामः | तत्राङ्गान्यन्तराधिसक्थिबाहुशिरांसि, तदवयवाः प्रत्यङ्गानीति | तत्र, स्वैरङ्गुलैः पादाङ्गुष्ठप्रदेशिन्यौ द्व्यङ्गुलायते ; प्रदेशिन्यास्तु मध्यमानामिकाकनिष्ठिका यथोत्तरं पञ्चमभागहीनाः; चतुरङ्गुलायते पञ्चाङ्गुलविस्तृते प्रपदपादतले; पञ्चचतुरङ्गुलायतविस्तृता पार्ष्णिः; चतुर्दशाङ्गुलायतः पादः; चतुर्दशाङ्गुलपरिणाहानि पादगुल्फजङ्घाजानुमध्यानि; अष्टादशाङ्गुला जङ्घा, जानूपरिष्टाच्च द्वात्रिंशदङ्गुलम्, एते पञ्चाशत्; जङ्घायामसमावूरू; द्व्यङ्गुलानि वृषणचिबुकदशननासापुटभागकर्णमूलभ्रूनयनान्तराणि; चतुरङ्गुलानि मेहनवदनान्तरनासाकर्णललाटग्रीवोच्छ्रायदृष्ट्यन्तराणि; द्वादशाङ्गुलानि भगविस्तारमेहननाभिहृदयग्रीवास्तनान्तरमुखायाममणिबन्धप्रकोष्ठस्थौल्यानि; इन्द्रबस्तिपरिणाहांसपीठकूर्परान्तरायामः षोडशाङ्गुलः; चतुर्विंशत्यङ्गुलो हस्तः; द्वात्रिंशदङ्गुलपरिमाणौ भुजौ; द्वात्रिंशत्परिणाहावूरू; मणिबन्धकूर्परान्तरं षोडशाङ्गुलं; तलं षट्चतुरङ्गुलायामविस्तारम्; अङ्गुष्ठमूलप्रदेशिनीश्रवणापाङ्गान्तरमध्यमाङ्गुल्यौ पञ्चाङ्गुले; अर्धपञ्चाङ्गुले प्रदेशिन्यनामिके; सार्धत्र्यङ्गुलौ कनिष्ठाङ्गुष्ठौ; चतुर्विंशतिविस्तारपरिणाहं मुखग्रीवं; त्रिभागाङ्गुलविस्तारा नासापुटमर्यादा; नयनत्रिभागपरिणाहा तारका; नवमस्तारकांशो दृष्टिः; केशान्तमस्तकान्तरमेकादशाङ्गुलं; मस्तकादवटुकेशान्तो दशाङ्गुलः; कर्णावट्वन्तरं चतुर्दशाङ्गुलं; पुरुषोरःप्रमाणविस्तीर्णा स्त्रीश्रोणिः; अष्टादशाङ्गुलविस्तारमुरः; तत्प्रमाणा पुरुषस्य कटी; सविंशमङ्गुलशतं पुरुषायाम इति ||१२||
🔊 Audio coming soon
Adhikarana 8 (13) · Śloka 13
bhavanti cātra ślōkāḥ | pañcaviṁśē tatō varṣē pumān nārī tu ṣōḍaśē | samatvāgatavīryau tau jānīyāt kuśalō bhiṣak ||13||
View original
भवन्ति चात्र श्लोकाः | पञ्चविंशे ततो वर्षे पुमान् नारी तु षोडशे | समत्वागतवीर्यौ तौ जानीयात् कुशलो भिषक् ||१३||
🔊 Audio coming soon
Adhikarana 9 (14) · Śloka 14
dēhaḥ svairaṅgulairēṣa yathāvadanukīrtitaḥ |14|
View original
देहः स्वैरङ्गुलैरेष यथावदनुकीर्तितः |१४|
🔊 Audio coming soon
Adhikarana 10 (14-15) · Śloka 15
yuktaḥ pramāṇēnānēna pumān vā yadi vā'ṅganā ||14|| dīrghamāyuravāpnōti vittaṁ ca mahadr̥cchati | madhyamaṁ madhyamairāyurvittaṁ hīnaistathā'varam ||15||
View original
युक्तः प्रमाणेनानेन पुमान् वा यदि वाऽङ्गना ||१४|| दीर्घमायुरवाप्नोति वित्तं च महदृच्छति | मध्यमं मध्यमैरायुर्वित्तं हीनैस्तथाऽवरम् ||१५||
🔊 Audio coming soon
Adhikarana 11 (16) · Śloka 16
atha sārān vakṣyāmaḥ- smr̥tibhaktiprajñāśaucaśauryōpētaṁ kalyāṇābhinivēśaṁ sattvasāraṁ vidyāt; snigdhasaṁhataśvētāsthidantanakhaṁ bahulakāmaprajaṁ śukrēṇa; akr̥śamuttamabalaṁ snigdhagambhīrasvaraṁ saubhāgyōpapannaṁ mahānētraṁ ca majjñā; mahāśiraḥskandhaṁ dr̥ḍhadantahanvasthinakhamasthibhiḥ; snigdhamūtrasvēdasvaraṁ br̥haccharīramāyāsāsahiṣṇuṁ mēdasā; acchidragātraṁ gūḍhāsthisandhiṁ māṁsōpacitaṁ ca māṁsēna; snigdhatāmranakhanayanatālujihvauṣṭhapāṇipādatalaṁ raktēna; suprasannamr̥dutvagrōmāṇaṁ tvaksāraṁ vidyāditi | ēṣāṁ pūrvaṁ pūrvaṁ pradhānamāyuḥsaubhāgyayōriti ||16||
View original
अथ सारान् वक्ष्यामः- स्मृतिभक्तिप्रज्ञाशौचशौर्योपेतं कल्याणाभिनिवेशं सत्त्वसारं विद्यात्; स्निग्धसंहतश्वेतास्थिदन्तनखं बहुलकामप्रजं शुक्रेण; अकृशमुत्तमबलं स्निग्धगम्भीरस्वरं सौभाग्योपपन्नं महानेत्रं च मज्ज्ञा; महाशिरःस्कन्धं दृढदन्तहन्वस्थिनखमस्थिभिः; स्निग्धमूत्रस्वेदस्वरं बृहच्छरीरमायासासहिष्णुं मेदसा; अच्छिद्रगात्रं गूढास्थिसन्धिं मांसोपचितं च मांसेन; स्निग्धताम्रनखनयनतालुजिह्वौष्ठपाणिपादतलं रक्तेन; सुप्रसन्नमृदुत्वग्रोमाणं त्वक्सारं विद्यादिति | एषां पूर्वं पूर्वं प्रधानमायुःसौभाग्ययोरिति ||१६||
🔊 Audio coming soon
Adhikarana 12 (17) · Śloka 17
viśēṣatō'ṅgapratyaṅgapramāṇādatha sārataḥ | parīkṣyāyuḥ sunipuṇō bhiṣak sidhyati karmasu ||17||
View original
विशेषतोऽङ्गप्रत्यङ्गप्रमाणादथ सारतः | परीक्ष्यायुः सुनिपुणो भिषक् सिध्यति कर्मसु ||१७||
🔊 Audio coming soon
Adhikarana 13 (18) · Śloka 18
vyādhiviśēṣāstu prāgabhihitāḥ; sarva ēvaitē trividhāḥ- sādhyā, yāpyāḥ, pratyākhyēyāśca | tatraitān bhūyastridhā parīkṣēta- kimayamaupasargikaḥ, prākkēvalaḥ, anyalakṣaṇa iti | tatra, aupasargikō nāma yaḥ pūrvōtpannaṁ vyādhiṁ jaghanyakālajātō vyādhirupasr̥jati, sa tanmūla ēvōpadravasañjñaḥ; prākkēvalō nāma yaḥ prāgēvōtpannō vyādhirapūrvarūpō'nupadravaśca; anyalakṣaṇō nāma yō bhaviṣyadvyādhikhyāpakaḥ, sa pūrvarūpasañjñaḥ | tatra, sōpadravamanyōnyāvirōdhēnōpakramēta, balavantamupadravaṁ vā; prākkēvalaṁ yathāsvaṁ pratikurvīta; anyalakṣaṇē tvādivyādhau prayatēta ||18||
View original
व्याधिविशेषास्तु प्रागभिहिताः; सर्व एवैते त्रिविधाः- साध्या, याप्याः, प्रत्याख्येयाश्च | तत्रैतान् भूयस्त्रिधा परीक्षेत- किमयमौपसर्गिकः, प्राक्केवलः, अन्यलक्षण इति | तत्र, औपसर्गिको नाम यः पूर्वोत्पन्नं व्याधिं जघन्यकालजातो व्याधिरुपसृजति, स तन्मूल एवोपद्रवसञ्ज्ञः; प्राक्केवलो नाम यः प्रागेवोत्पन्नो व्याधिरपूर्वरूपोऽनुपद्रवश्च; अन्यलक्षणो नाम यो भविष्यद्व्याधिख्यापकः, स पूर्वरूपसञ्ज्ञः | तत्र, सोपद्रवमन्योन्याविरोधेनोपक्रमेत, बलवन्तमुपद्रवं वा; प्राक्केवलं यथास्वं प्रतिकुर्वीत; अन्यलक्षणे त्वादिव्याधौ प्रयतेत ||१८||
🔊 Audio coming soon
Adhikarana 14 (19) · Śloka 19
bhavati cātra | nāsti rōgō vinā dōṣairyasmāttasmādvicakṣaṇaḥ | anuktamapi dōṣāṇāṁ liṅgairvyādhimupācarēt ||19||
View original
भवति चात्र | नास्ति रोगो विना दोषैर्यस्मात्तस्माद्विचक्षणः | अनुक्तमपि दोषाणां लिङ्गैर्व्याधिमुपाचरेत् ||१९||
🔊 Audio coming soon
Adhikarana 15 (20) · Śloka 20
prāgabhihitā r̥tavaḥ ||20||
View original
प्रागभिहिता ऋतवः ||२०||
🔊 Audio coming soon
Adhikarana 16 (21) · Śloka 21
śītē śītapratīkāramuṣṇē cōṣṇanivāraṇam | kr̥tvā kuryāt kriyāṁ prāptāṁ kriyākālaṁ na hāpayēt ||21||
View original
शीते शीतप्रतीकारमुष्णे चोष्णनिवारणम् | कृत्वा कुर्यात् क्रियां प्राप्तां क्रियाकालं न हापयेत् ||२१||
🔊 Audio coming soon
Adhikarana 17 (22) · Śloka 22
aprāptē vā kriyākālē prāptē vā na kr̥tā kriyā | kriyā hīnā'tiriktā vā sādhyēṣvapi na sidhyati ||22||
View original
अप्राप्ते वा क्रियाकाले प्राप्ते वा न कृता क्रिया | क्रिया हीनाऽतिरिक्ता वा साध्येष्वपि न सिध्यति ||२२||
🔊 Audio coming soon
Adhikarana 18 (23) · Śloka 23
yā hyudīrṇaṁ śamayati nānyaṁ vyādhiṁ karōti ca | sā kriyā, na tu yā vyādhiṁ haratyanyamudīrayēt ||23||
View original
या ह्युदीर्णं शमयति नान्यं व्याधिं करोति च | सा क्रिया, न तु या व्याधिं हरत्यन्यमुदीरयेत् ||२३||
🔊 Audio coming soon
Adhikarana 19 (24) · Śloka 24
prāgabhihitō'gnirannasya pācakaḥ | sa caturvidhō bhavati- dōṣānabhipanna ēkaḥ, vikriyāmāpannastrividhō bhavati- viṣamō vātēna, tīkṣṇaḥ pittēna, mandaḥ ślēṣmaṇā, caturthaḥ samaḥ sarvasāmyāditi | tatra, yō yathākālamupayuktamannaṁ samyak pacati sa samaḥ, samairdōṣaiḥ; yaḥ kadācit samyak pacati, kadācidādhmānaśūlōdāvartātisārajaṭharagauravāntrakūjanapravāhaṇāni kr̥tvā, sa viṣamaḥ; yaḥ prabhūtamapyupayuktamannamāśu pacati sa tīkṣṇaḥ, sa ēvābhivardhamānō'tyagnirityābhāṣyatē, sa muhurmuhuḥ prabhūtamapyupayuktamannamāśutaraṁ pacati, pākāntē ca galatālvōṣṭhaśōṣadāhasantāpāñjanayati; yastvalpamapyupayuktamudaraśirōgauravakāsaśvāsaprasēkacchardigātrasadanāni kr̥tvā mahatā kālēna pacati, sa mandaḥ ||24||
View original
प्रागभिहितोऽग्निरन्नस्य पाचकः | स चतुर्विधो भवति- दोषानभिपन्न एकः, विक्रियामापन्नस्त्रिविधो भवति- विषमो वातेन, तीक्ष्णः पित्तेन, मन्दः श्लेष्मणा, चतुर्थः समः सर्वसाम्यादिति | तत्र, यो यथाकालमुपयुक्तमन्नं सम्यक् पचति स समः, समैर्दोषैः; यः कदाचित् सम्यक् पचति, कदाचिदाध्मानशूलोदावर्तातिसारजठरगौरवान्त्रकूजनप्रवाहणानि कृत्वा, स विषमः; यः प्रभूतमप्युपयुक्तमन्नमाशु पचति स तीक्ष्णः, स एवाभिवर्धमानोऽत्यग्निरित्याभाष्यते, स मुहुर्मुहुः प्रभूतमप्युपयुक्तमन्नमाशुतरं पचति, पाकान्ते च गलताल्वोष्ठशोषदाहसन्तापाञ्जनयति; यस्त्वल्पमप्युपयुक्तमुदरशिरोगौरवकासश्वासप्रसेकच्छर्दिगात्रसदनानि कृत्वा महता कालेन पचति, स मन्दः ||२४||
🔊 Audio coming soon
Adhikarana 20 (25) · Śloka 25
viṣamō vātajān rōgāṁstīkṣṇaḥ pittanimittajān | karōtyagnistathā mandō vikārān kaphasambhavān ||25||
View original
विषमो वातजान् रोगांस्तीक्ष्णः पित्तनिमित्तजान् | करोत्यग्निस्तथा मन्दो विकारान् कफसम्भवान् ||२५||
🔊 Audio coming soon
Adhikarana 21 (26) · Śloka 26
tatra, samē parirakṣaṇaṁ kurvīta; viṣamē snigdhāmlalavaṇaiḥ kriyāviśēṣaiḥ pratikurvīta; tīkṣṇē madhurasnigdhaśītairvirēkaiśca; ēvamēvātyagnau, viśēṣēṇa māhiṣaiśca kṣīradadhisarpirbhiḥ; mandē kaṭutiktakaṣāyairvamanaiśca ||26||
View original
तत्र, समे परिरक्षणं कुर्वीत; विषमे स्निग्धाम्ललवणैः क्रियाविशेषैः प्रतिकुर्वीत; तीक्ष्णे मधुरस्निग्धशीतैर्विरेकैश्च; एवमेवात्यग्नौ, विशेषेण माहिषैश्च क्षीरदधिसर्पिर्भिः; मन्दे कटुतिक्तकषायैर्वमनैश्च ||२६||
🔊 Audio coming soon
Adhikarana 22 (27) · Śloka 27
jāṭharō bhagavānagnirīśvarō'nnasya pācakaḥ | saukṣmyādrasānādadānō vivēktuṁ naiva śakyatē ||27||
View original
जाठरो भगवानग्निरीश्वरोऽन्नस्य पाचकः | सौक्ष्म्याद्रसानाददानो विवेक्तुं नैव शक्यते ||२७||
🔊 Audio coming soon
Adhikarana 23 (28) · Śloka 28
prāṇāpānasamānaistu sarvataḥ pavanaistribhiḥ | dhmāyatē pālyatē cāpi svāṁ svāṁ gatimavasthitaiḥ ||28||
View original
प्राणापानसमानैस्तु सर्वतः पवनैस्त्रिभिः | ध्मायते पाल्यते चापि स्वां स्वां गतिमवस्थितैः ||२८||
🔊 Audio coming soon
Adhikarana 24 (29) · Śloka 29
vayastu trividhaṁ- bālyaṁ, madhyaṁ, vr̥ddhamiti | tatrōnaṣōḍaśavarṣīyā bālāḥ | tē trividhāḥ- kṣīrapāḥ, kṣīrānnādā, annādā iti | tēṣu saṁvatsaraparāḥ kṣīrapāḥ, dvisaṁvatsaraparāḥ kṣīrānnādāḥ, paratō'nnādā iti | ṣōḍaśasaptatyōrantarē madhyaṁ vayaḥ | tasya vikalpō- vr̥ddhiḥ, yauvanaṁ, sampūrṇatā, parihāṇiriti | tatra, āviṁśatērvr̥ddhiḥ, ātriṁśatō yauvanam, ācatvāriṁśataḥ sarvadhātvindriyabalavīryasampūrṇatā, ata ūrdhvamīṣatparihāṇiryāvat saptatiriti | saptatērūrdhvaṁ kṣīyamāṇadhātvindriyabalavīryōtsāhamahanyahani valīpalitakhālityajuṣṭaṁ kāsaśvāsaprabhr̥tibhirupadravairabhibhūyamānaṁ sarvakriyāsvasamarthaṁ jīrṇāgāramivābhivr̥ṣṭamavasīdantaṁ vr̥ddhamācakṣatē ||29||
View original
वयस्तु त्रिविधं- बाल्यं, मध्यं, वृद्धमिति | तत्रोनषोडशवर्षीया बालाः | ते त्रिविधाः- क्षीरपाः, क्षीरान्नादा, अन्नादा इति | तेषु संवत्सरपराः क्षीरपाः, द्विसंवत्सरपराः क्षीरान्नादाः, परतोऽन्नादा इति | षोडशसप्तत्योरन्तरे मध्यं वयः | तस्य विकल्पो- वृद्धिः, यौवनं, सम्पूर्णता, परिहाणिरिति | तत्र, आविंशतेर्वृद्धिः, आत्रिंशतो यौवनम्, आचत्वारिंशतः सर्वधात्विन्द्रियबलवीर्यसम्पूर्णता, अत ऊर्ध्वमीषत्परिहाणिर्यावत् सप्ततिरिति | सप्ततेरूर्ध्वं क्षीयमाणधात्विन्द्रियबलवीर्योत्साहमहन्यहनि वलीपलितखालित्यजुष्टं कासश्वासप्रभृतिभिरुपद्रवैरभिभूयमानं सर्वक्रियास्वसमर्थं जीर्णागारमिवाभिवृष्टमवसीदन्तं वृद्धमाचक्षते ||२९||
🔊 Audio coming soon
Adhikarana 25 (30) · Śloka 30
tatrōttarōttarāsu vayōvasthāsūttarōttarā bhēṣajamātrāviśēṣā bhavanti, r̥tē ca parihāṇēḥ; tatrādyāpēkṣayā pratikurvīta ||30||
View original
तत्रोत्तरोत्तरासु वयोवस्थासूत्तरोत्तरा भेषजमात्राविशेषा भवन्ति, ऋते च परिहाणेः; तत्राद्यापेक्षया प्रतिकुर्वीत ||३०||
🔊 Audio coming soon
Adhikarana 26 (31) · Śloka 31
bhavanti cātra- bālē vivardhatē ślēṣmā madhyamē pittamēva tu | bhūyiṣṭhaṁ vardhatē vāyurvr̥ddhē tadvīkṣya yōjayēt ||31||
View original
भवन्ति चात्र- बाले विवर्धते श्लेष्मा मध्यमे पित्तमेव तु | भूयिष्ठं वर्धते वायुर्वृद्धे तद्वीक्ष्य योजयेत् ||३१||
🔊 Audio coming soon
Adhikarana 27 (32) · Śloka 32
agnikṣāravirēkaistu bālavr̥ddhau vivarjayēt | tatsādhyēṣu vikārēṣu mr̥dvīṁ kuryāt kriyāṁ śanaiḥ ||32||
View original
अग्निक्षारविरेकैस्तु बालवृद्धौ विवर्जयेत् | तत्साध्येषु विकारेषु मृद्वीं कुर्यात् क्रियां शनैः ||३२||
🔊 Audio coming soon
Adhikarana 28 (33) · Śloka 33
dēhaḥ sthūlaḥ, kr̥śō, madhya, iti prāgupadiṣṭaḥ ||33||
View original
देहः स्थूलः, कृशो, मध्य, इति प्रागुपदिष्टः ||३३||
🔊 Audio coming soon
Adhikarana 29 (34) · Śloka 34
karśayēdbr̥ṁhayēccāpi sadā sthūlakr̥śau narau | rakṣaṇaṁ caiva madhyasya kurvīta satataṁ bhiṣak ||34||
View original
कर्शयेद्बृंहयेच्चापि सदा स्थूलकृशौ नरौ | रक्षणं चैव मध्यस्य कुर्वीत सततं भिषक् ||३४||
🔊 Audio coming soon
Adhikarana 30 (35) · Śloka 35
balamabhihitaguṇaṁ; daurbalyaṁ tu svabhāvadōṣajarādibhiravēkṣitavyam | yasmādbalavataḥ sarvakriyāpravr̥ttistasmādbalamēva pradhānamadhikaraṇānām ||35||
View original
बलमभिहितगुणं; दौर्बल्यं तु स्वभावदोषजरादिभिरवेक्षितव्यम् | यस्माद्बलवतः सर्वक्रियाप्रवृत्तिस्तस्माद्बलमेव प्रधानमधिकरणानाम् ||३५||
🔊 Audio coming soon
Adhikarana 31 (36) · Śloka 36
kēcit kr̥śāḥ prāṇavantaḥ sthūlāścālpabalā narāḥ | tasmāt sthiratvaṁ vyāyāmairbalaṁ vaidyaḥ pratarkayēt ||36||
View original
केचित् कृशाः प्राणवन्तः स्थूलाश्चाल्पबला नराः | तस्मात् स्थिरत्वं व्यायामैर्बलं वैद्यः प्रतर्कयेत् ||३६||
🔊 Audio coming soon
Adhikarana 32 (37-38) · Śloka 38
sattvaṁ tu vyasanābhyudayakriyādisthānēṣvaviklavakaram ||37|| sattvavān sahatē sarvaṁ saṁstabhyātmānamātmanā | rājasaḥ stabhyamānō'nyaiḥ sahatē naiva tāmasaḥ ||38||
View original
सत्त्वं तु व्यसनाभ्युदयक्रियादिस्थानेष्वविक्लवकरम् ||३७|| सत्त्ववान् सहते सर्वं संस्तभ्यात्मानमात्मना | राजसः स्तभ्यमानोऽन्यैः सहते नैव तामसः ||३८||
🔊 Audio coming soon
Adhikarana 33 (39-40) · Śloka 40
sātmyāni tu dēśakālajātyr̥turōgavyāyāmōdakadivāsvapnarasaprabhr̥tīni prakr̥tiviruddhānyapi yānyabādhakarāṇi bhavanti ||39|| yō rasaḥ kalpatē yasya sukhāyaiva niṣēvitaḥ | vyāyāmajātamanyadvā tat sātmyamiti nirdiśēt ||40||
View original
सात्म्यानि तु देशकालजात्यृतुरोगव्यायामोदकदिवास्वप्नरसप्रभृतीनि प्रकृतिविरुद्धान्यपि यान्यबाधकराणि भवन्ति ||३९|| यो रसः कल्पते यस्य सुखायैव निषेवितः | व्यायामजातमन्यद्वा तत् सात्म्यमिति निर्दिशेत् ||४०||
🔊 Audio coming soon
Adhikarana 34 (41) · Śloka 41
prakr̥tiṁ bhēṣajaṁ cōpariṣṭādvakṣyāmaḥ ||41||
View original
प्रकृतिं भेषजं चोपरिष्टाद्वक्ष्यामः ||४१||
🔊 Audio coming soon
Adhikarana 35 (42) · Śloka 42
dēśastvānūpō jāṅgalaḥ sādhāraṇa iti | tatra, bahūdakanimnōnnatanadīvarṣagahanō mr̥duśītānilō bahumahāparvatavr̥kṣō mr̥dusukumārōpacitaśarīramanuṣyaprāyaḥ kaphavātarōgabhūyiṣṭhaścānūpaḥ; ākāśasamaḥ praviralālpakaṇṭakivr̥kṣaprāyō'lpavarṣaprasravaṇōdapānōdakaprāya uṣṇadāruṇavātaḥ praviralālpaśailaḥ sthirakr̥śaśarīramanuṣyaprāyō vātapittarōgabhūyiṣṭhaśca jāṅgalaḥ; ubhayadēśalakṣaṇaḥ sādhāraṇa iti ||42||
View original
देशस्त्वानूपो जाङ्गलः साधारण इति | तत्र, बहूदकनिम्नोन्नतनदीवर्षगहनो मृदुशीतानिलो बहुमहापर्वतवृक्षो मृदुसुकुमारोपचितशरीरमनुष्यप्रायः कफवातरोगभूयिष्ठश्चानूपः; आकाशसमः प्रविरलाल्पकण्टकिवृक्षप्रायोऽल्पवर्षप्रस्रवणोदपानोदकप्राय उष्णदारुणवातः प्रविरलाल्पशैलः स्थिरकृशशरीरमनुष्यप्रायो वातपित्तरोगभूयिष्ठश्च जाङ्गलः; उभयदेशलक्षणः साधारण इति ||४२||
🔊 Audio coming soon
Adhikarana 36 (43) · Śloka 43
bhavanti cātra- samāḥ sādhāraṇē yasmācchītavarṣōṣmamārutāḥ | dōṣāṇāṁ samatā jantōstasmātsādhāraṇō mataḥ ||43||
View original
भवन्ति चात्र- समाः साधारणे यस्माच्छीतवर्षोष्ममारुताः | दोषाणां समता जन्तोस्तस्मात्साधारणो मतः ||४३||
🔊 Audio coming soon
Adhikarana 37 (44-45) · Śloka 45
na tathā balavantaḥ syurjalajā vā sthalāhr̥tāḥ | svadēśē nicitā dōṣā anyasmin kōpamāgatāḥ ||44|| ucitē vartamānasya nāsti dēśakr̥taṁ bhayam | āhārasvapnacēṣṭādau taddēśasya guṇē sati ||45||
View original
न तथा बलवन्तः स्युर्जलजा वा स्थलाहृताः | स्वदेशे निचिता दोषा अन्यस्मिन् कोपमागताः ||४४|| उचिते वर्तमानस्य नास्ति देशकृतं भयम् | आहारस्वप्नचेष्टादौ तद्देशस्य गुणे सति ||४५||
🔊 Audio coming soon
Adhikarana 38 (46-47) · Śloka 47
dēśaprakr̥tisātmyartuviparītō'cirōtthitaḥ | sampattau bhiṣagādīnāṁ balasattvāyuṣāṁ tathā ||46|| kēvalaḥ samadēhāgnēḥ sukhasādhyatamō gadaḥ | atō'nyathā tvasādhyaḥ syātkr̥cchrō vyāmiśralakṣaṇaḥ ||47||
View original
देशप्रकृतिसात्म्यर्तुविपरीतोऽचिरोत्थितः | सम्पत्तौ भिषगादीनां बलसत्त्वायुषां तथा ||४६|| केवलः समदेहाग्नेः सुखसाध्यतमो गदः | अतोऽन्यथा त्वसाध्यः स्यात्कृच्छ्रो व्यामिश्रलक्षणः ||४७||
🔊 Audio coming soon
Adhikarana 39 (48) · Śloka 48
kriyāyāstu guṇālābhē kriyāmanyāṁ prayōjayēt | pūrvasyāṁ śāntavēgāyāṁ na kriyāsaṅkarō hitaḥ ||48||
View original
क्रियायास्तु गुणालाभे क्रियामन्यां प्रयोजयेत् | पूर्वस्यां शान्तवेगायां न क्रियासङ्करो हितः ||४८||
🔊 Audio coming soon
Adhikarana 40 (49) · Śloka 49
guṇālābhē'pi sapadi yadi saiva kriyā hitā | kartavyaiva tadā vyādhiḥ kr̥cchrasādhyatamō yadi ||49||
View original
गुणालाभेऽपि सपदि यदि सैव क्रिया हिता | कर्तव्यैव तदा व्याधिः कृच्छ्रसाध्यतमो यदि ||४९||
🔊 Audio coming soon
Adhikarana 41 (50) · Śloka 50
ya ēvamēnaṁ vidhimēkarūpaṁ bibharti kālādivaśēna dhīmān | sa mr̥tyupāśāñjagatō gadaughāñchinatti bhaiṣajyaparaśvadhēna ||50||
View original
य एवमेनं विधिमेकरूपं बिभर्ति कालादिवशेन धीमान् | स मृत्युपाशाञ्जगतो गदौघाञ्छिनत्ति भैषज्यपरश्वधेन ||५०||
🔊 Audio coming soon
Adhikarana puShpikA · Śloka 35
iti suśrutasaṁhitāyāṁ sūtrasthānē āturōpakramaṇīyō nāma pañcatriṁśō'dhyāyaḥ ||35||
View original
इति सुश्रुतसंहितायां सूत्रस्थाने आतुरोपक्रमणीयो नाम पञ्चत्रिंशोऽध्यायः ||३५||
🔊 Audio coming soon