33. avāraṇīyādhyāyaḥ

Adhikarana 1 (1-2) · Śloka 2

ಅಥಾತೋಽವಾರಣೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಉಪದ್ರವೈಸ್ತು ಯೇ ಜುಷ್ಟಾ ವ್ಯಾಧಯೋ ಯಾನ್ತ್ಯವಾರ್ಯತಾಮ್ | ರಸಾಯನಾದ್ವಿನಾ ವತ್ಸ! ತಾನ್ ಶೃಣ್ವೇಕಮನಾ ಮಮ ||೩||

Adhikarana 3 (4) · Śloka 5

ವಾತವ್ಯಾಧಿಃ ಪ್ರಮೇಹಶ್ಚ ಕುಷ್ಠಮರ್ಶೋ ಭಗನ್ದರಮ್ | ಅಶ್ಮರೀ ಮೂಢಗರ್ಭಶ್ಚ ತಥೈವೋದರಮಷ್ಟಮಮ್ ||೪|| ಅಷ್ಟಾವೇತೇ ಪ್ರಕೃತ್ಯೈವ ದುಶ್ಚಿಕಿತ್ಸ್ಯಾ ಮಹಾಗದಾಃ |೫|

Adhikarana 4 (5-6) · Śloka 6

ಪ್ರಾಣಮಾಂಸಕ್ಷಯಃ ಶೋಷಸ್ತೃಷ್ಣಾ ಚ್ಛರ್ದಿರ್ಜ್ವರಸ್ತಥಾ ||೫|| ಅತೀಸಾರಶ್ಚ ಮೂರ್ಚ್ಛಾ ಚ ಹಿಕ್ಕಾ ಶ್ವಾಸಸ್ತಥೈವ ಚ | ಏತೈರುಪದ್ರವೈರ್ಜುಷ್ಟಾನ್ ಸರ್ವಾನೇವ ವಿವರ್ಜಯೇತ್ ||೬||

Adhikarana 5 (7) · Śloka 7

ಶೂನಂ ಸುಪ್ತತ್ವಚಂ ಭಗ್ನಂ ಕಮ್ಪಾಧ್ಮಾನನಿಪೀಡಿತಮ್ | ನರಂ ರುಜಾರ್ತಮನ್ತಶ್ಚ ವಾತವ್ಯಾಧಿರ್ವಿನಾಶಯೇತ್ ||೭||

Adhikarana 6 (8) · Śloka 8

ಯಥೋಕ್ತೋಪದ್ರವಾವಿಷ್ಟಮತಿಪ್ರಸ್ರುತಮೇವ ವಾ | ಪಿಡಕಾಪೀಡಿತಂ ಗಾಢಂ ಪ್ರಮೇಹೋ ಹನ್ತಿ ಮಾನವಮ್ ||೮||

Adhikarana 7 (9) · Śloka 9

ಪ್ರಭಿನ್ನಪ್ರಸ್ರುತಾಙ್ಗಂ ಚ ರಕ್ತನೇತ್ರಂ ಹತಸ್ವರಮ್ | ಪಞ್ಚಕರ್ಮಗುಣಾತೀತಂ ಕುಷ್ಠಂ ಹನ್ತೀಹ ಕುಷ್ಠಿನಮ್ ||೯||

Adhikarana 8 (10) · Śloka 10

ತೃಷ್ಣಾರೋಚಕಶೂಲಾರ್ತಮತಿಪ್ರಸ್ರುತಶೋಣಿತಮ್ | ಶೋಫಾತೀಸಾರಸಂಯುಕ್ತಮರ್ಶೋವ್ಯಾಧಿರ್ವಿನಾಶಯೇತ್ ||೧೦||

Adhikarana 9 (11) · Śloka 11

ವಾತಮೂತ್ರಪುರೀಷಾಣಿ ಕ್ರಿಮಯಃ ಶುಕ್ರಮೇವ ಚ | ಭಗನ್ದರಾತ್ ಪ್ರಸ್ರವನ್ತಿ ಯಸ್ಯ ತಂ ಪರಿವರ್ಜಯೇತ್ ||೧೧||

Adhikarana 10 (12) · Śloka 12

ಪ್ರಶೂನನಾಭಿವೃಷಣಂ ರುದ್ಧಮೂತ್ರಂ ರುಗನ್ವಿತಮ್ | ಅಶ್ಮರೀ ಕ್ಷಪಯತ್ಯಾಶು ಸಿಕತಾ ಶರ್ಕರಾನ್ವಿತಾ ||೧೨||

Adhikarana 11 (13) · Śloka 13

ಗರ್ಭಕೋಷಪರಾಸಙ್ಗೋ ಮಕ್ಕಲ್ಲೋ ಯೋನಿಸಂವೃತಿಃ | ಹನ್ಯಾತ್ ಸ್ತ್ರಿಯಂ ಮೂಢಗರ್ಭೇ ಯಥೋಕ್ತಾಶ್ಚಾಪ್ಯುಪದ್ರವಾಃ ||೧೩||

Adhikarana 12 (14) · Śloka 14

ಪಾರ್ಶ್ವಭಙ್ಗಾನ್ನವಿದ್ವೇಷಶೋಫಾತೀಸಾರಪೀಡಿತಮ್ | ವಿರಿಕ್ತಂ ಪೂರ್ಯಮಾಣಂ ಚ ವರ್ಜಯೇದುದರಾರ್ದಿತಮ್ ||೧೪||

Adhikarana 13 (15-18) · Śloka 18

ಯಸ್ತಾಮ್ಯತಿ ವಿಸಞ್ಜ್ಞಶ್ಚ ಶೇತೇ ನಿಪತಿತೋಽಪಿ ವಾ | ಶೀತಾರ್ದಿತೋಽನ್ತರುಷ್ಣಶ್ಚ ಜ್ವರೇಣ ಮ್ರಿಯತೇ ನರಃ ||೧೫|| ಯೋ ಹೃಷ್ಟರೋಮಾ ರಕ್ತಾಕ್ಷೋ ಹೃದಿ ಸಙ್ಘಾತಶೂಲವಾನ್ | ನಿತ್ಯಂ ವಕ್ತ್ರೇಣ ಚೋಚ್ಛ್ವಸ್ಯಾತ್ತಂ ಜ್ವರೋ ಹನ್ತಿ ಮಾನವಮ್ ||೧೬|| ಹಿಕ್ಕಾಶ್ವಾಸಪಿಪಾಸಾರ್ತಂ ಮೂಢಂ ವಿಭ್ರಾನ್ತಲೋಚನಮ್ | ಸನ್ತತೋಚ್ಛ್ವಾಸಿನಂ ಕ್ಷೀಣಂ ನರಂ ಕ್ಷಪಯತಿ ಜ್ವರಃ ||೧೭|| ಆವಿಲಾಕ್ಷಂ ಪ್ರತಾಮ್ಯನ್ತಂ ನಿದ್ರಾಯುಕ್ತಮತೀವ ಚ | ಕ್ಷೀಣಶೋಣಿತಮಾಂಸಂ ಚ ನರಂ ನಾಶಯತಿ ಜ್ವರಃ ||೧೮||

Adhikarana 14 (19) · Śloka 19

ಶ್ವಾಸಶೂಲಪಿಪಾಸಾರ್ತಂ ಕ್ಷೀಣಂ ಜ್ವರನಿಪೀಡಿತಮ್ | ವಿಶೇಷೇಣ ನರಂ ವೃದ್ಧಮತೀಸಾರೋ ವಿನಾಶಯೇತ್ ||೧೯||

Adhikarana 15 (20) · Śloka 20

ಶುಕ್ಲಾಕ್ಷಮನ್ನದ್ವೇಷ್ಟಾರಮೂರ್ಧ್ವಶ್ವಾಸನಿಪೀಡಿತಮ್ | ಕೃಚ್ಛ್ರೇಣ ಬಹು ಮೇಹನ್ತಂ ಯಕ್ಷ್ಮಾ ಹನ್ತೀಹ ಮಾನವಮ್ ||೨೦||

Adhikarana 16 (21) · Śloka 21

ಶ್ವಾಸಶೂಲಪಿಪಾಸಾನ್ನವಿದ್ವೇಷಗ್ರನ್ಥಿಮೂಢತಾಃ | ಭವನ್ತಿ ದುರ್ಬಲತ್ವಂ ಚ ಗುಲ್ಮಿನೋ ಮೃತ್ಯುಮೇಷ್ಯತಃ ||೨೧||

Adhikarana 17 (22) · Śloka 22

ಆಧ್ಮಾತಂ ಬದ್ಧನಿಷ್ಯನ್ದಂ ಛರ್ದಿಹಿಕ್ಕಾತೃಡನ್ವಿತಮ್ | ರುಜಾಶ್ವಾಸಸಮಾವಿಷ್ಟಂ ವಿದ್ರಧಿರ್ನಾಶಯೇನ್ನರಮ್ ||೨೨||

Adhikarana 18 (23) · Śloka 23

ಪಾಣ್ಡುದನ್ತನಖೋ ಯಶ್ಚ ಪಾಣ್ಡುನೇತ್ರಶ್ಚ ಮಾನವಃ | ಪಾಣ್ಡುಸಙ್ಘಾತದರ್ಶೀ ಚ ಪಾಣ್ಡುರೋಗೀ ವಿನಶ್ಯತಿ ||೨೩||

Adhikarana 19 (24) · Śloka 24

ಲೋಹಿತಂ ಛರ್ದಯೇದ್ಯಸ್ತು ಬಹುಶೋ ಲೋಹಿತೇಕ್ಷಣಃ | ರಕ್ತಾನಾಂ ಚ ದಿಶಾಂ ದ್ರಷ್ಟಾ ರಕ್ತಪಿತ್ತೀ ವಿನಶ್ಯತಿ ||೨೪||

Adhikarana 20 (25) · Śloka 25

ಅವಾಙ್ಮುಖಸ್ತೂನ್ಮುಖೋ ವಾ ಕ್ಷೀಣಮಾಂಸಬಲೋ ನರಃ | ಜಾಗರಿಷ್ಣುರಸನ್ದೇಹಮುನ್ಮಾದೇನ ವಿನಶ್ಯತಿ ||೨೫||

Adhikarana 21 (26) · Śloka 26

ಬಹುಶೋಽಪಸ್ಮರನ್ತಂ ತು ಪ್ರಕ್ಷೀಣಂ ಚಲಿತಭ್ರುವಮ್ | ನೇತ್ರಾಭ್ಯಾಂ ಚ ವಿಕುರ್ವಾಣಮಪಸ್ಮಾರೋ ವಿನಾಶಯೇತ್ ||೨೬||

Adhikarana puShpikA · Śloka 33

ಇತಿ ಸುಶ್ರುತಸಂಹಿತಾಯಾಂ ಸೂತ್ರಸ್ಥಾನೇಽವಾರಣೀಯೋ ನಾಮ ತ್ರಯಸ್ತ್ರಿಂಶತ್ತಮೋಽಧ್ಯಾಯಃ ||೩೩||