1. vēdōtpattyadhyāyaḥ

Adhikarana 2 (1-2) · Śloka 2

ಅಥಾತೋ ವೇದೋತ್ಪತ್ತಿಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 3 (3) · Śloka 3

ಅಥ ಖಲು ಭಗವನ್ತಮಮರವರಮೃಷಿಗಣಪರಿವೃತಮಾಶ್ರಮಸ್ಥಂ ಕಾಶಿರಾಜಂ ದಿವೋದಾಸಂ ಧನ್ವನ್ತರಿಮೌಪಧೇನವವೈತರಣೌರಭ್ರಪೌಷ್ಕಲಾವತಕರವೀರ್ಯ(ರ)ಗೋಪುರರಕ್ಷಿತಸುಶ್ರುತಪ್ರಭೃತಯ ಊಚುಃ ||೩||

Adhikarana 4 (4) · Śloka 4

ಭಗವನ್! ಶಾರೀರಮಾನಸಾಗನ್ತುಭಿರ್ವ್ಯಾಧಿಭಿರ್ವಿವಿಧವೇದನಾಭಿಘಾತೋಪದ್ರುತಾನ್ ಸನಾಥಾನಪ್ಯನಾಥವದ್ವಿಚೇಷ್ಟಮಾನಾನ್ ವಿಕ್ರೋಶತಶ್ಚ ಮಾನವಾನಭಿಸಮೀಕ್ಷ್ಯ ಮನಸಿ ನಃ ಪೀಡಾ ಭವತಿ, ತೇಷಾಂ ಸುಖೈಷಿಣಾಂ ರೋಗೋಪಶಮಾರ್ಥಮಾತ್ಮನಶ್ಚ ಪ್ರಾಣಯಾತ್ರಾರ್ಥಂ ಪ್ರಜಾಹಿತಹೇತೋರಾಯುರ್ವೇದಂ ಶ್ರೋತುಮಿಚ್ಛಾಮ ಇಹೋಪದಿಶ್ಯಮಾನಮ್, ಅತ್ರಾಯತ್ತಮೈಹಿಕಮಾಮುಷ್ಮಿಕಂ ಚ ಶ್ರೇಯಃ; ತದ್ಭಗವನ್ತಮುಪಪನ್ನಾಃ ಸ್ಮಃ ಶಿಷ್ಯತ್ವೇನೇತಿ ||೪||

Adhikarana 5 (5) · Śloka 5

ತಾನುವಾಚ ಭಗವಾನ್- ಸ್ವಾಗತಂ ವಃ; ಸರ್ವ ಏವಾಮೀಮಾಂಸ್ಯಾ ಅಧ್ಯಾಪ್ಯಾಶ್ಚ ಭವನ್ತೋ ವತ್ಸಾಃ ||೫||

Adhikarana 6 (6) · Śloka 6

ಇಹ ಖಲ್ವಾಯುರ್ವೇದಂ ನಾಮೋಪಾಙ್ಗಮಥರ್ವವೇದಸ್ಯಾನುತ್ಪಾದ್ಯೈವ ಪ್ರಜಾಃ ಶ್ಲೋಕಶತಸಹಸ್ರಮಧ್ಯಾಯಸಹಸ್ರಂ ಚ ಕೃತವಾನ್ ಸ್ವಯಮ್ಭೂಃ, ತತೋಽಲ್ಪಾಯುಷ್ಟ್ವಮಲ್ಪಮೇಧಸ್ತ್ವಂ ಚಾಲೋಕ್ಯ ನರಾಣಾಂ ಭೂಯೋಽಷ್ಟಧಾ ಪ್ರಣೀತವಾನ್ ||೬||

Adhikarana 7 (7) · Śloka 7

ತದ್ಯಥಾ- ಶಲ್ಯಂ, ಶಾಲಾಕ್ಯಂ, ಕಾಯಚಿಕಿತ್ಸಾ, ಭೂತವಿದ್ಯಾ, ಕೌಮಾರಭೃತ್ಯಮ್, ಅಗದತನ್ತ್ರಂ, ರಸಾಯನತನ್ತ್ರಂ, ವಾಜೀಕರಣತನ್ತ್ರಮಿತಿ ||೭||

Adhikarana 8 (8) · Śloka 8

ಅಥಾಸ್ಯ ಪ್ರತ್ಯಙ್ಗಲಕ್ಷಣಸಮಾಸಃ |೮|

Adhikarana 9 (8(1)) · Śloka 8

ತತ್ರ, ಶಲ್ಯಂ ನಾಮ ವಿವಿಧತೃಣಕಾಷ್ಠಪಾಷಾಣಪಾಂಶುಲೋಹಲೋಷ್ಟಾಸ್ಥಿಬಾಲನಖಪೂಯಾಸ್ರಾವದುಷ್ಟವ್ರಣಾನ್ತರ್ಗರ್ಭಶಲ್ಯೋದ್ಧರಣಾರ್ಥಂ , ಯನ್ತ್ರಶಸ್ತ್ರಕ್ಷಾರಾಗ್ನಿಪ್ರಣಿಧಾನವ್ರಣವಿನಿಶ್ಚಯಾರ್ಥಂ ಚ (೧) |೮|

Adhikarana 10 (8(2)) · Śloka 8

ಶಾಲಾಕ್ಯಂ ನಾಮೋರ್ಧ್ವಜತ್ರುಗತಾನಾಂ ಶ್ರವಣನಯನವದನಘ್ರಾಣಾದಿಸಂಶ್ರಿತಾನಾಂ ವ್ಯಾಧೀನಾಮುಪಶಮನಾರ್ಥಮ್ (೨) |೮|

Adhikarana 11 (8(3)) · Śloka 8

ಕಾಯಚಿಕಿತ್ಸಾ ನಾಮ ಸರ್ವಾಙ್ಗಸಂಶ್ರಿತಾನಾಂ ವ್ಯಾಧೀನಾಂ ಜ್ವರರಕ್ತಪಿತ್ತಶೋಷೋನ್ಮಾದಾಪಸ್ಮಾರಕುಷ್ಠಮೇಹಾತಿಸಾರಾದೀನಾಮುಪಶಮನಾರ್ಥಮ್ (೩) |೮|

Adhikarana 12 (8(4)) · Śloka 8

ಭೂತವಿದ್ಯಾ ನಾಮ ದೇವಾಸುರಗನ್ಧರ್ವಯಕ್ಷರಕ್ಷಃಪಿತೃಪಿಶಾಚನಾಗಗ್ರಹಾದ್ಯುಪಸೃಷ್ಟಚೇತಸಾಂ ಶಾನ್ತಿಕರ್ಮಬಲಿಹರಣಾದಿಗ್ರಹೋಪಶಮನಾರ್ಥಮ್ (೪) |೮|

Adhikarana 13 (8(5)) · Śloka 8

ಕೌಮಾರಭೃತ್ಯಂ ನಾಮ ಕುಮಾರಭರಣಧಾತ್ರೀಕ್ಷೀರದೋಷಸಂಶೋಧನಾರ್ಥಂ ದುಷ್ಟಸ್ತನ್ಯಗ್ರಹಸಮುತ್ಥಾನಾಂ ಚ ವ್ಯಾಧೀನಾಮುಪಶಮನಾರ್ಥಮ್ (೫) |೮|

Adhikarana 14 (8(6)) · Śloka 8

ಅಗದತನ್ತ್ರಂ ನಾಮ ಸರ್ಪಕೀಟಲೂತಾಮೂಷಕಾದಿದಷ್ಟವಿಷವ್ಯಞ್ಜನಾರ್ಥಂ ವಿವಿಧವಿಷಸಂಯೋಗೋಪಶಮನಾರ್ಥಂ ಚ (೬) |೮|

Adhikarana 15 (8(7)) · Śloka 8

ರಸಾಯನತನ್ತ್ರಂ ನಾಮ ವಯಃಸ್ಥಾಪನಮಾಯುರ್ಮೇಧಾಬಲಕರಂ ರೋಗಾಪಹರಣಸಮರ್ಥಂ ಚ (೭) |೮|

Adhikarana 16 (8(8)) · Śloka 8

ವಾಜೀಕರಣತನ್ತ್ರಂ ನಾಮಾಲ್ಪದುಷ್ಟಕ್ಷೀಣವಿಶುಷ್ಕರೇತಸಾಮಾಪ್ಯಾಯನಪ್ರಸಾದೋಪಚಯಜನನನಿಮಿತ್ತಂ ಪ್ರಹರ್ಷಜನನಾರ್ಥಂ ಚ (೮) ||೮||

Adhikarana 17 (9) · Śloka 9

ಏವಮಯಮಾಯುರ್ವೇದೋಽಷ್ಟಾಙ್ಗ ಉಪದಿಶ್ಯತೇ; ಅತ್ರ ಕಸ್ಮೈ ಕಿಮುಚ್ಯತಾಮಿತಿ ||೯||

Adhikarana 18 (10-11) · Śloka 11

ತ ಊಚುಃ- ಅಸ್ಮಾಕಂ ಸರ್ವೇಷಾಮೇವ ಶಲ್ಯಜ್ಞಾನಂ ಮೂಲಂ ಕೃತ್ವೋಪದಿಶತು ಭಗವಾನಿತಿ ||೧೦|| ಸ ಉವಾಚೈವಮಸ್ತ್ವಿತಿ ||೧೧||

Adhikarana 19 (12-13) · Śloka 13

ತ ಊಚುರ್ಭೂಯೋಽಪಿ ಭಗವನ್ತಮ್- ಅಸ್ಮಾಕಮೇಕಮತೀನಾಂ ಮತಮಭಿಸಮೀಕ್ಷ್ಯ ಸುಶ್ರುತೋ ಭಗವನ್ತಂ ಪ್ರಕ್ಷ್ಯತಿ, ಅಸ್ಮೈ ಚೋಪದಿಶ್ಯಮಾನಂ ವಯಮಪ್ಯುಧಾರಯಿಷ್ಯಾಮಃ ||೧೨|| ಸ ಉವಾಚೈವಮಸ್ತ್ವಿತಿ ||೧೩||

Adhikarana 20 (14) · Śloka 14

ವತ್ಸ ಸುಶ್ರುತ! ಇಹ ಖಲ್ವಾಯುರ್ವೇದಪ್ರಯೋಜನಂ- ವ್ಯಾಧ್ಯುಪಸೃಷ್ಟಾನಾಂ ವ್ಯಾಧಿಪರಿಮೋಕ್ಷಃ, ಸ್ವಸ್ಥಸ್ಯ ರಕ್ಷಣಂ ಚ ||೧೪||

Adhikarana 21 (15) · Śloka 15

‘ಆಯುರಸ್ಮಿನ್ ವಿದ್ಯತೇ, ಅನೇನ ವಾಽಽಯುರ್ವಿನ್ದನ್ತಿ’ ಇತ್ಯಾಯುರ್ವೇದಃ ||೧೫||

Adhikarana 22 (16) · Śloka 16

ತಸ್ಯಾಙ್ಗವರಮಾದ್ಯಂ ಪ್ರತ್ಯಕ್ಷಾಗಮಾನುಮಾನೋಪಮಾನೈರವಿರುದ್ಧಮುಚ್ಯಮಾನಮುಪಧಾರಯ ||೧೬||

Adhikarana 23 (17) · Śloka 17

ಏತದ್ಧ್ಯಙ್ಗಂ ಪ್ರಥಮಂ, ಪ್ರಾಗಭಿಘಾತವ್ರಣಸಂರೋಹಾದ್ಯಜ್ಞಶಿರಃಸನ್ಧಾನಾಚ್ಚ | ಶ್ರೂಯತೇ ಹಿ ಯಥಾ- “ರುದ್ರೇಣ ಯಜ್ಞಸ್ಯ ಶಿರಶ್ಛಿನ್ನಮಿತಿ, ತತೋ ದೇವಾ ಅಶ್ವಿನಾವಭಿಗಮ್ಯೋಚುಃ- ಭಗವನ್ತೌ ನಃ ಶ್ರೇಷ್ಠತಮೌ ಯುವಾಂ ಭವಿಷ್ಯಥಃ, ಭವದ್ಭ್ಯಾಂ ಯಜ್ಞಸ್ಯ ಶಿರಃ ಸನ್ಧಾತವ್ಯಮಿತಿ | ತಾವೂಚತುರೇವಮಸ್ತ್ವಿತಿ | ಅಥ ತಯೋರರ್ಥೇ ದೇವಾ ಇನ್ದ್ರಂ ಯಜ್ಞಭಾಗೇನ ಪ್ರಾಸಾದಯನ್ | ತಾಭ್ಯಾಂ ಯಜ್ಞಸ್ಯ ಶಿರಃ ಸಂಹಿತಮ್” ಇತಿ ||೧೭||

Adhikarana 24 (18) · Śloka 18

ಅಷ್ಟಾಸ್ವಪಿ ಚಾಯುರ್ವೇದತನ್ತ್ರೇಷ್ವೇತದೇವಾಧಿಕಮಭಿಮತಮ್, ಆಶುಕ್ರಿಯಾಕರಣಾದ್ಯನ್ತ್ರಶಸ್ತ್ರಕ್ಷಾರಾಗ್ನಿಪ್ರಣಿಧಾನಾತ್ ಸರ್ವತನ್ತ್ರಸಾಮಾನ್ಯಾಚ್ಚ ||೧೮||

Adhikarana 25 (19) · Śloka 19

ತದಿದಂ ಶಾಶ್ವತಂ ಪುಣ್ಯಂ ಸ್ವರ್ಗ್ಯಂ ಯಶಸ್ಯಮಾಯುಷ್ಯಂ ವೃತ್ತಿಕರಂ ಚೇತಿ ||೧೯||

Adhikarana 26 (20) · Śloka 20

ಬ್ರಹ್ಮಾ ಪ್ರೋವಾಚ ತತಃ ಪ್ರಜಾಪತಿರಧಿಜಗೇ, ತಸ್ಮಾದಶ್ವಿನೌ, ಅಶ್ವಿಭ್ಯಾಮಿನ್ದ್ರಃ, ಇನ್ದ್ರಾದಹಂ, ಮಯಾ ತ್ವಿಹ ಪ್ರದೇಯಮರ್ಥಿಭ್ಯಃ ಪ್ರಜಾಹಿತಹೇತೋಃ ||೨೦||

Adhikarana 27 (21) · Śloka 21

ಭವತಿ ಚಾತ್ರ- ಅಹಂ ಹಿ ಧನ್ವನ್ತರಿರಾದಿದೇವೋ ಜರಾರುಜಾಮೃತ್ಯುಹರೋಽಮರಾಣಾಮ್ | ಶಲ್ಯಾಙ್ಗಮಙ್ಗೈರಪರೈರುಪೇತಂ ಪ್ರಾಪ್ತೋಽಸ್ಮಿ ಗಾಂ ಭೂಯ ಇಹೋಪದೇಷ್ಟುಮ್ ||೨೧||

Adhikarana 28 (22) · Śloka 22

ಅಸ್ಮಿಞ್ಛಾಸ್ತ್ರೇ ಪಞ್ಚಮಹಾಭೂತಶರೀರಿಸಮವಾಯಃ ಪುರುಷ ಇತ್ಯುಚ್ಯತೇ | ತಸ್ಮಿನ್ ಕ್ರಿಯಾ, ಸೋಽಧಿಷ್ಠಾನಂ; ಕಸ್ಮಾತ್? ಲೋಕಸ್ಯ ದ್ವೈವಿಧ್ಯಾತ ; ಲೋಕೋ ಹಿ ದ್ವಿವಿಧಃ ಸ್ಥಾವರೋ ಜಙ್ಗಮಶ್ಚ; ದ್ವಿವಿಧಾತ್ಮಕ ಏವಾಗ್ನೇಯಃ, ಸೌಮ್ಯಶ್ಚ, ತದ್ಭೂಯಸ್ತ್ವಾತ್; ಪಞ್ಚಾತ್ಮಕೋ ವಾ; ತತ್ರ ಚತುರ್ವಿಧೋ ಭೂತಗ್ರಾಮಃ ಸಂಸ್ವೇದಜಜರಾಯುಜಾಣ್ಡಜೋದ್ಭಿಜ್ಜಸಞ್ಜ್ಞಃ ; ತತ್ರ ಪುರುಷಃ ಪ್ರಧಾನಂ, ತಸ್ಯೋಪಕರಣಮನ್ಯತ್; ತಸ್ಮಾತ್ ಪುರುಷೋಽಧಿಷ್ಠಾನಮ್ ||೨೨||

Adhikarana 29 (23) · Śloka 23

ತದ್ದುಃಖಸಂಯೋಗಾ ವ್ಯಾಧಯ ಉಚ್ಯನ್ತೇ ||೨೩||

Adhikarana 30 (24) · Śloka 24

ತೇ ಚತುರ್ವಿಧಾಃ- ಆಗನ್ತವಃ, ಶಾರೀರಾಃ, ಮಾನಸಾಃ, ಸ್ವಾಭಾವಿಕಾಶ್ಚೇತಿ ||೨೪||

Adhikarana 31 (25(1)) · Śloka 25

ತೇಷಾಮಾಗನ್ತವೋಽಭಿಘಾತನಿಮಿತ್ತಾಃ |೨೫|

Adhikarana 32 (25(2)) · Śloka 25

ಶಾರೀರಾಸ್ತ್ವನ್ನಪಾನಮೂಲಾ ವಾತಪಿತ್ತಕಫಶೋಣಿತಸನ್ನಿಪಾತವೈಷಮ್ಯನಿಮಿತ್ತಾಃ |೨೫|

Adhikarana 33 (25(3)) · Śloka 25

ಮಾನಸಾಸ್ತು ಕ್ರೋಧಶೋಕಭಯಹರ್ಷವಿಷಾದೇರ್ಷ್ಯಾಭ್ಯಸೂಯಾದೈನ್ಯಮಾತ್ಸರ್ಯಕಾಮಲೋಭಪ್ರಭೃತಯ ಇಚ್ಛಾದ್ವೇಷಭೇದೈರ್ಭವನ್ತಿ |೨೫|

Adhikarana 34 (25(4)) · Śloka 25

ಸ್ವಾಭಾವಿಕಾಸ್ತು ಕ್ಷುತ್ಪಿಪಾಸಾಜರಾಮೃತ್ಯುನಿದ್ರಾಪ್ರಕೃ(ಭೃ)ತಯಃ ||೨೫||

Adhikarana 35 (26) · Śloka 26

ತ ಏತೇ ಮನಃಶರೀರಾಧಿಷ್ಠಾನಾಃ ||೨೬||

Adhikarana 36 (27) · Śloka 27

ತೇಷಾಂ ಸಂಶೋಧನಸಂಶಮನಾಹಾರಾಚಾರಾಃ ಸಮ್ಯಕ್ಪ್ರಯುಕ್ತಾ ನಿಗ್ರಹಹೇತವಃ ||೨೭||

Adhikarana 37 (28) · Śloka 28

ಪ್ರಾಣಿನಾಂ ಪುನರ್ಮೂಲಮಾಹಾರೋ ಬಲವರ್ಣೌಜಸಾಂ ಚ | ಸ ಷಟ್ಸು ರಸೇಷ್ವಾಯತ್ತಃ; ರಸಾಃ ಪುನರ್ದ್ರವ್ಯಾಶ್ರಯಾಃ; ದ್ರವ್ಯಾಣಿ ಪುನರೋಷಧಯಃ | ತಾಸ್ತು ದ್ವಿವಿಧಾಃ- ಸ್ಥಾವರಾ ಜಙ್ಗಮಾಶ್ಚ ||೨೮||

Adhikarana 38 (29) · Śloka 29

ತಾಸಾಂ ಸ್ಥಾವರಾಶ್ಚತುರ್ವಿಧಾಃ- ವನಸ್ಪತಯೋ, ವೃಕ್ಷಾ, ವೀರುಧ, ಓಷಧಯ ಇತಿ | ತಾಸು, ಅಪುಷ್ಪಾಃ ಫಲವನ್ತೋ ವನಸ್ಪತಯಃ, ಪುಷ್ಪಫಲವನ್ತೋ ವೃಕ್ಷಾಃ, ಪ್ರತಾನವತ್ಯಃ ಸ್ತಮ್ಬಿನ್ಯಶ್ಚ ವೀರುಧಃ, ಫಲಪಾಕನಿಷ್ಠಾ ಓಷಧಯ ಇತಿ ||೨೯||

Adhikarana 39 (30) · Śloka 30

ಜಙ್ಗಮಾ ಖಲ್ವಪಿ ಚತುರ್ವಿಧಾಃ- ಜರಾಯುಜಾಣ್ಡಜಸ್ವೇದಜೋದ್ಭಿಜ್ಜಾಃ | ತತ್ರ ಪಶುಮನುಷ್ಯವ್ಯಾಲಾದಯೋ ಜರಾಯುಜಾಃ, ಖಗಸರ್ಪಸರೀಸೃಪಪ್ರಭೃತಯೋಽಣ್ಡಜಾಃ, ಕೃಮಿಕೀಟಪಿಪೀಲಿಕಾಪ್ರಭೃತಯಃ ಸ್ವೇದಜಾಃ, ಇನ್ದ್ರಗೋಪಮಣ್ಡೂಕಪ್ರಭೃತಯ ಉದ್ಭಿಜ್ಜಾಃ ||೩೦||

Adhikarana 40 (31) · Śloka 31

ತತ್ರ ಸ್ಥಾವರೇಭ್ಯಸ್ತ್ವಕ್ಪತ್ರಪುಷ್ಪಫಲಮೂಲಕನ್ದನಿರ್ಯಾಸಸ್ವರಸಾದಯಃ ಪ್ರಯೋಜನವನ್ತಃ; ಜಙ್ಗಮೇಭ್ಯಶ್ಚರ್ಮನಖರೋಮರುಧಿರಾದಯಃ ||೩೧||

Adhikarana 41 (32) · Śloka 32

ಪಾರ್ಥಿವಾಃ ಸುವರ್ಣರಜತಮಣಿಮುಕ್ತಾಮನಃಶಿಲಾಮೃತ್ಕಪಾಲಾದಯಃ ||೩೨||

Adhikarana 42 (33) · Śloka 33

ಕಾಲಕೃತಾಃಪ್ರವಾತನಿವಾತಾತಪಚ್ಛಾಯಾಜ್ಯೋತ್ಸ್ನಾತಮಃಶೀತೋಷ್ಣವರ್ಷಾಹೋರಾತ್ರಪಕ್ಷಮಾಸರ್ತ್ವಯನಾದಯಃ ಸಂವತ್ಸರವಿಶೇಷಾಃ ||೩೩||

Adhikarana 43 (34) · Śloka 34

ತ ಏತೇ ಸ್ವಭಾವತ ಏವ ದೋಷಾಣಾಂ ಸಞ್ಚಯಪ್ರಕೋಪಪ್ರಶಮಪ್ರತೀಕಾರಹೇತವಃ ಪ್ರಯೋಜನವನ್ತಶ್ಚ ||೩೪||

Adhikarana 44 (35) · Śloka 35

ಭವನ್ತಿ ಚಾತ್ರ ಶ್ಲೋಕಾಃ- ಶಾರೀರಾಣಾಂ ವಿಕಾರಾಣಾಮೇಷ ವರ್ಗಶ್ಚತುರ್ವಿಧಃ | ಪ್ರಕೋಪೇ ಪ್ರಶಮೇ ಚೈವ ಹೇತುರುಕ್ತಶ್ಚಿಕಿತ್ಸಕೈಃ ||೩೫||

Adhikarana 45 (36-37) · Śloka 37

ಆಗನ್ತವಸ್ತು ಯೇ ರೋಗಾಸ್ತೇ ದ್ವಿಧಾ ನಿಪತನ್ತಿ ಹಿ | ಮನಸ್ಯನ್ಯೇ ಶರೀರೇಽನ್ಯೇ ತೇಷಾಂ ತು ದ್ವಿವಿಧಾ ಕ್ರಿಯಾ ||೩೬|| ಶರೀರಪತಿತಾನಾಂ ತು ಶಾರೀರವದುಪಕ್ರಮಃ | ಮಾನಸಾನಾಂ ತು ಶಬ್ದಾದಿರಿಷ್ಟೋ ವರ್ಗಃ ಸುಖಾವಹಃ ||೩೭||

Adhikarana 46 (38) · Śloka 38

ಏವಮೇತತ್ ಪುರುಷೋ ವ್ಯಾಧಿರೌಷಧಂ ಕ್ರಿಯಾಕಾಲ ಇತಿ ಚತುಷ್ಟಯಂ ಸಮಾಸೇನ ವ್ಯಾಖ್ಯಾತಮ್ | ತತ್ರ ಪುರುಷಗ್ರಹಣಾತ್ ತತ್ಸಮ್ಭವದ್ರವ್ಯಸಮೂಹೋ ಭೂತಾದಿರುಕ್ತಸ್ತದಙ್ಗಪ್ರತ್ಯಙ್ಗವಿಕಲ್ಪಾಶ್ಚ ತ್ವಙ್ಮಾಂಸಾಸ್ಥಿಸಿರಾಸ್ನಾಯುಪ್ರಭೃತಯಃ, ವ್ಯಾಧಿಗ್ರಹಣಾದ್ವಾತಪಿತ್ತಕಫಶೋಣಿತಸನ್ನಿಪಾತವೈಷಮ್ಯನಿಮಿತ್ತಾಃ ಸರ್ವ ಏವ ವ್ಯಾಧಯೋ ವ್ಯಾಖ್ಯಾತಾಃ, ಔಷಧಗ್ರಹಣಾದ್ದ್ರವ್ಯರಸಗುಣವೀರ್ಯವಿಪಾಕಾನಾಮಾದೇಶಃ, ಕ್ರಿಯಾಗ್ರಹಣಾತ್ ಸ್ನೇಹಾದೀನಿ ಚ್ಛೇದ್ಯಾದೀನಿ ಚ ಕರ್ಮಾಣಿ ವ್ಯಾಖ್ಯಾತಾನಿ, ಕಾಲಗ್ರಹಣಾತ್ ಸರ್ವಕ್ರಿಯಾಕಾಲಾನಾಮಾದೇಶಃ ||೩೮||

Adhikarana 47 (39) · Śloka 39

ಭವತಿ ಚಾತ್ರ- ಬೀಜಂ ಚಿಕಿತ್ಸಿತಸ್ಯೈತತ್ಸಮಾಸೇನ ಪ್ರಕೀರ್ತಿತಮ್ | ಸವಿಂಶಮಧ್ಯಾಯಶತಮಸ್ಯ ವ್ಯಾಖ್ಯಾ ಭವಿಷ್ಯತಿ ||೩೯||

Adhikarana 48 (40) · Śloka 40

ತಚ್ಚ ಸವಿಂಶಮಧ್ಯಾಯಶತಂ ಪಞ್ಚಸು ಸ್ಥಾನೇಷು | ತತ್ರ ಸೂತ್ರನಿದಾನಶಾರೀರಚಿಕಿತ್ಸಿತಕಲ್ಪೇಷ್ವರ್ಥವಶಾತ್ ಸಂವಿಭಜ್ಯೋತ್ತರೇ ತನ್ತ್ರೇ ಶೇಷಾನರ್ಥಾನ್ ವಕ್ಷ್ಯಾಮಃ ||೪೦||

Adhikarana 49 (41) · Śloka 41

ಭವತಿ ಚಾತ್ರ- ಸ್ವಯಮ್ಭುವಾ ಪ್ರೋಕ್ತಮಿದಂ ಸನಾತನಂ ಪಠೇದ್ಧಿ ಯಃ ಕಾಶಿಪತಿಪ್ರಕಾಶಿತಮ್ | ಸ ಪುಣ್ಯಕರ್ಮಾ ಭುವಿ ಪೂಜಿತೋ ನೃಪೈರಸುಕ್ಷಯೇ ಶಕ್ರಸಲೋಕತಾಂ ವ್ರಜೇತ್ ||೪೧||

Adhikarana puShpikA · Śloka 1

ಇತಿ ಸುಶ್ರುತಸಂಹಿತಾಯಾಂ ಸೂತ್ರಸ್ಥಾನೇ ವೇದೋತ್ಪತ್ತಿರ್ನಾಮ ಪ್ರಥಮೋಽಧ್ಯಾಯಃ ||೧||