2. śiṣyōpanayanīyaḥ

Adhikarana pratij~jA (1) · Śloka 1

अथाऽतः शिष्योपनयनीयमध्यायं व्याख्यास्यामः| इति ह स्माहुरात्रेयादयो महर्षयः||१||

Adhikarana shiShyaguNAH (2) · Śloka 2

गुरुभक्तोऽभियुक्तोऽतियुक्तो धीस्मृतिपाटवैः| ऋज्वास्यनासानयनस्तनुस्निग्धनखच्छविः| ब्रह्मचारी जितद्वन्द्वो धीरः सुचरितः स्थिरः| षण्मासानुषितः शक्लो लज्जाशौचकुलान्वितः| शिष्योऽध्याप्यो गतो यावदन्तं तन्त्रार्थकर्मणाम्||२||

Adhikarana anadhyAyAH (3) · Śloka 3

नाऽकालविद्युत्स्तनिते भूकम्पे राहुदर्शने| पञ्चदश्यामचन्द्रायां परोक्षे वा गुरोः पठेत्||३||

Adhikarana adhyayanavidhiH (4) · Śloka 4

नाविच्छिन्नपदं नातिमन्दं नात्युच्चनीचकैः||४||

Adhikarana guruparicaryAkramaH (5) · Śloka 5

हीनान्यवेष आचार्यं पर्युपासीत राजवत्| शयीत सुप्त एवास्मिन्नुत्तिष्ठेतास्य पूर्वतः| न ब्रूयात्केवलं नाम नाऽसाध्वपि विनाटयेत्||५||

Adhikarana BiShaglakShaNam (6) · Śloka 6

अभेद्योऽनुद्धतः स्तब्धः सूनृतः प्रियदर्शनः| बहुश्रुतः कालवेदी ज्ञातग्रन्थोऽर्थशास्त्रवित्| अनाथान् रोगिणो यश्च पुत्रवत्समुपाचरेत्| गुरुणा समनुज्ञातः स भिषक्छब्दमश्नुते||६||

Adhikarana kevalashAstraj~jasya doShAH (7) · Śloka 7

यस्तु केवलशास्त्रज्ञः कर्मस्वपरिनिष्ठितः| स मुह्यत्यातुरं प्राप्य प्राप्य भीरुरिवाहवम्||७||

Adhikarana shAstravidhurasya nindyatvam (8) · Śloka 8

यः पुनः कुरुते कर्म धार्ष्ट्याच्छास्त्रविवर्जितः| स सत्सु गर्हामाप्नोति वधं चर्च्छति राजतः||८||

Adhikarana BiShaktamalakShaNam (9) · Śloka 9

हेतौ लिङ्गे प्रशमने रोगाणामपुनर्भवे| ज्ञानं चतुर्विधं यस्य स राजार्हो भिषक्तमः||९||

Adhikarana bAhushrutyena praj~jAmupabRuMhayet (10) · Śloka 10

शस्त्रं शास्त्राणि सलिलं गुणादोषप्रवृत्तये| पात्रापेक्षीण्यतः प्रज्ञां बाहुश्रुत्येन बृंहयेत्||१०||

Adhikarana praj~jopabRuMhaNe hetuH (11) · Śloka 11

प्रदीपभूतं शास्त्रं हि दर्शनं विपुला मतिः| ताभ्याम्भिषक्सुयुक्ताभ्याञ्चिकित्सन्नापराध्यति||११||

Adhikarana siddhiBAgvaidyalakShaNam (12) · Śloka 12

आहूत एव यो याति सुवेषः सुनिमित्ततः| गत्वाऽतुरार्थादन्यत्र न निधत्ते मनः क्वचित्| व्याधीन् परीक्षते सम्यङ्निदानादिविशेषतः| ह्रेपणीयां च तद्वार्त्तां न प्रकाशयते बहिः| सहसा न च तस्यापि क्रियाकालमहापयन्| जानाति चोपचरितुं स वैद्यः सिद्धिमश्नुते||१२||

Adhikarana vaidyena varjanIyam (13) · Śloka 13

नावदीताऽमिषं स्त्रीभ्यस्तदध्यक्षे पराङ्मुखे| ताभिश्च रहसि स्थानं परिहासं च वर्जयेत्||१३||

Adhikarana acikitsyAH (14) · Śloka 14

आर्त्तं च नृपसद्वैद्यैर्द्विष्टं तद्द्वेषिणं द्विषम्| चण्डं शोकातुरं भीरुं कृतघ्नं वैद्यमानिनम्| हीनोपकरणं व्यग्रमविधेयं गतायुषम्||१४||

Adhikarana varjanIyavaidyAH (15) · Śloka 15

जिजीविषुर्व्याधितोऽपि पूर्वोक्तगुणवर्जितान्| क्रियाविक्रियिणो वैद्यान् मृत्योरग्रेसरा हि ते||१५||

Adhikarana cikitsAyAH pAdacatuShTayam (16) · Śloka 16

भिषग्द्रव्याण्युपस्थाता रोगी पादचतुष्टयम्| चिकित्सितस्य निर्दिष्टं प्रत्येकं तच्चतुर्गुणम्||१६||

Adhikarana BiShagguNAH (17) · Śloka 17

दक्षस्तीर्थात्तशास्त्रार्थो दृष्टकर्मा शुचिर्भिषक्||१७||

Adhikarana auShadhaguNAH (18) · Śloka 18

बहुकल्पं बहुगुणं सम्पन्नं योग्यमौषधम्||१८||

Adhikarana paricArakaguNAH (19) · Śloka 19

अनुरक्तः शुचिर्दक्षो बुद्धिमान् परिचारकः||१९||

Adhikarana rogiguNAH (20) · Śloka 20

आढ्यो रोगी भिषग्वश्यो ज्ञापकस्सत्त्ववानपि||२०||

Adhikarana cikitsAyAH pradhAnaM kAraNaM BiShak (21) · Śloka 21

यद्वैद्ये विगुणे पादा गुणवन्तोऽप्यनर्थकाः| स पादहीनानप्यार्त्तान् गुणवान् यच्च यापयेत्| चिकित्सायास्तमेवातः प्रधानं कारणं विदुः||२१||

Adhikarana vyAdhiprakArAH (22) · Śloka 22

साध्योऽसाध्य इति व्याधिर्द्विधा तौ तु पुनस्त्रिधा| सुसाध्यः कृच्छ्रसाध्यश्च व्याप्यो यश्चानुपक्रमः||२२||

Adhikarana suKasAdhyavyAdhilakShaNam (23) · Śloka 23

सर्वौषधक्षमे देहे यूनः पुंसो जितात्मनः| अमर्मगोऽल्पहेत्वग्ररूपरूपोऽनुपद्रवः| अतुल्यदूष्यदेशर्तुप्रकृतिः पादस्म्पदि| ग्रहेष्वनुगुणेष्वेकदोषमार्गो नवः सुखः| सुखसाध्यः सुखोपायः कालेनाल्पेन साध्यते||२३||

Adhikarana kRucCrasAdhyalakShaNam (24) · Śloka 24

कृच्छ्रैरुपायैः कृच्छ्रस्तु महद्भिश्च चिरेण वा| असाध्यलिङ्गसङ्कीर्णस्तथा शस्त्रादिसाधनः||२४||

Adhikarana yApyavyAdhilakShaNam (25) · Śloka 25

शेषत्वादायुषः पथ्यैर्याप्यः प्रायो विपर्यये| दत्त्वाऽल्पं सुखमल्पेन हेतुना स प्रतन्यते| याति नाशेषतां रोगः कर्मजो नियतायुषः| प्रपतन्निव विष्कम्भैर्धार्यतेऽत्रातुरो हितैः||२५||

Adhikarana asAdhyavyAdhilakShaNam (26) · Śloka 26

परोऽसाध्यः क्रियाः सर्वाः प्रत्याख्येयोऽतिवर्त्तते| तस्मादुपेक्ष्य एवासौ स्थितोऽत्यन्तविपर्यये| भ्रममोहारतिकरो दृष्टिरिष्टोऽक्षनाशनः||२६||

Adhikarana vyAdhIn vimRushya cikitsAmAraBeta (27) · Śloka 27

व्याधीन् पुरा परीक्षैवमारभेत ततः क्रियाम्| स्वार्थविद्यायशोहानिमन्यथा ध्रुवमाप्नुयात्||२७||

Adhikarana sAdhyasyA~apyasAdhyatAprAptiH (28) · Śloka 28

साध्ययोरपि संयोगो बलिनोर्यात्यसाध्यताम्| विद्यादसाध्यमेवातः साध्यासाध्यसमागमम्| नासाध्यस्साध्यतां याति साध्यो याति त्वसाध्यताम्||२८||

Adhikarana vyAdhInAmavasthAntaragamane hetuH (29) · Śloka 29

पादापचाराद्दैवाच्च यान्तवस्थान्तरं गदाः||२९||

Adhikarana vaidyavRuttam (30) · Śloka 30

वरमाशीविषविषं दीप्तमग्निमयोऽपि वा| उपयुञ्जीत न त्वर्त्तादामिषं कृपणाज्जनात्||३०||

Adhikarana antya (2) · Śloka 2

वरो भूतदया धर्म इत्यार्त्तेषु भिषग्वरः| वर्त्तते यस्तु सिद्धार्थः स सर्वमतिवर्त्तते||३१|| इति वैद्यपतिसिंहगुप्तस्य सूनोर्वाग्भटस्य कृतावष्टाङ्गसंग्रहसंहितायां सूत्रस्थाने शिष्योपनयनीयो नाम द्वितीयोऽध्यायः||२||