46. annapānavidhyadhyāyaḥ

Adhikarana 1 (1-2) · Śloka 2

অথাতোঽন্নপানবিধিমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

ধন্বন্তরিমভিবাদ্য সুশ্রুত উবাচ- প্রাগভিহিতঃ ‘প্রাণিনাং পুনর্মূলমাহারো বলবর্ণৌজসাং চ, স ষট্সু রসেষ্বাযত্তঃ, রসাঃ পুনর্দ্রব্যাশ্রযিণঃ,’ দ্রব্যরসগুণবীর্যবিপাকনিমিত্তে চ ক্ষযবৃদ্ধী দোষাণাং সাম্যং চ, ব্রহ্মাদেরপি চ লোকস্যাহারঃ স্থিত্যুত্পত্তিবিনাশহেতুঃ, আহারাদেবাভিবৃদ্ধির্বলমারোগ্যং বর্ণেন্দ্রিযপ্রসাদশ্চ, তথা হ্যাহারবৈষম্যাদস্বাস্থ্যং; তস্যাশিতপীতলীঢখাদিতস্য নানাদ্রব্যাত্মকস্যানেকবিধবিকল্পস্যানেকবিধপ্রভাবস্য পৃথক্ পৃথগ্দ্রব্যরসগুণবীর্যবিপাককর্মাণীচ্ছামি জ্ঞাতুং, ন হ্যনববুদ্ধস্বভাবা ভিষজঃ স্বস্থানুবৃত্তিং রোগনিগ্রহণং চ কর্তুং সমর্থাঃ; আহারাযত্তাশ্চ সর্বপ্রাণিনো যস্মাত্তস্মাদন্নপানবিধিমুপদিশতু মে ভগবানিত্যুক্তঃ প্রোবাচ ভগবান্ ধন্বন্তরিঃ- অথ খলু বত্স সুশ্রুত! যথাপ্রশ্নমুচ্যমানমুপধারযস্ব- ||৩||

Adhikarana 3 (4) · Śloka 4

তত্র, লোহিতশালিকলমকর্দমকপাণ্ডুকসুগন্ধকশকুনাহৃতপুষ্পাণ্ডকপুণ্ডরীকমহাশালিশীতভীরুকরোধ্রপুষ্পক- দীর্ঘশূককাঞ্চনকমহিষমহাশূকহাযনকদূষকমহাদূষকপ্রভৃতযঃ শালযঃ ||৪||

Adhikarana 4 (5) · Śloka 5

মধুরা বীর্যতঃ শীতা লঘুপাকা বলাবহাঃ | পিত্তঘ্নাল্পানিলকফাঃ স্নিগ্ধা বদ্ধাল্পবর্চসঃ ||৫||

Adhikarana 5 (6) · Śloka 7

তেষাং লোহিতকঃ শ্রেষ্ঠো দোষঘ্নঃ শুক্রমূত্রলঃ | চক্ষুষ্যো বর্ণবলকৃত্ স্বর্যো হৃদ্যস্তৃষাপহঃ ||৬|| ব্রণ্যো জ্বরহরশ্চৈব সর্বদোষবিষাপহঃ |৭|

Adhikarana 6 (7) · Śloka 7

তস্মাদল্পান্তরগুণাঃ ক্রমশঃ শালযোঽবরাঃ ||৭||

Adhikarana 7 (8-9) · Śloka 9

ষষ্টিককাঙ্গুকমুকুন্দকপীতকপ্রমোদককাকলকাসনপুষ্পকমহাষষ্টিকচূর্ণককুরবককেদারপ্রভৃতযঃ ষষ্টিকাঃ ||৮|| রসে পাকে চ মধুরাঃ শমনা বাতপিত্তযোঃ | শালীনাং চ গুণৈস্তুল্যা বৃংহণাঃ কফশুক্রলাঃ ||৯||

Adhikarana 8 (10) · Śloka 11

ষষ্টিকঃ প্রবরস্তেষাং কষাযানুরসো লঘুঃ | মৃদুঃ স্নিগ্ধস্ত্রিদোষঘ্নঃ স্থৈর্যকৃদ্বলবর্ধনঃ ||১০|| বিপাকে মধুরো গ্রাহী তুল্যো লোহিতশালিভিঃ |১১|

Adhikarana 9 (11) · Śloka 11

শেষাস্ত্বল্পান্তরাস্তস্মাত্ ষষ্টিকাঃ ক্রমশো গুণৈঃ ||১১||

Adhikarana 10 (12) · Śloka 12

কৃষ্ণব্রীহিশালামুখজতুমুখনন্দীমুখলাবাক্ষকত্বরিতককুক্কুটাণ্ডকপারাবতকপাটলপ্রভৃতযো ব্রীহযঃ ||১২||

Adhikarana 11 (13) · Śloka 13

কষাযমধুরাঃ পাকেঽমধুরা বীর্যতোঽহিমাঃ | অল্পাভিষ্যন্দিনস্তুল্যাঃ ষষ্টিকৈর্বদ্ধবর্চসঃ ||১৩||

Adhikarana 12 (14) · Śloka 14

কৃষ্ণব্রীহির্বরস্তেষাং কষাযানুরসো লঘুঃ | তস্মাদল্পান্তরগুণাঃ ক্রমশো ব্রীহযোঽপরে ||১৪||

Adhikarana 13 (15) · Śloka 15

দগ্ধাযামবনৌ জাতাঃ শালযো লঘুপাকিনঃ | কষাযা বদ্ধবিণ্মূত্রা রূক্ষাঃ শ্লেষ্মাপকর্ষণাঃ ||১৫||

Adhikarana 14 (16) · Śloka 16

স্থলজাঃ কফপিত্তঘ্নাঃ কষাযাঃ কটুকান্বযাঃ | কিঞ্চিত্সতিক্তমধুরাঃ পবনানলবর্ধনাঃ ||১৬||

Adhikarana 15 (17) · Śloka 17

কৈদারা মধুরা বৃষ্যা বল্যাঃ পিত্তনিবর্হণাঃ | ঈষত্কষাযাল্পমলা গুরবঃ কফশুক্রলাঃ ||১৭||

Adhikarana 16 (18) · Śloka 18

রোপ্যাতিরোপ্যা লঘবঃ শীঘ্রপাকা গুণোত্তরাঃ | অদাহিনো দোষহরা বল্যা মূত্রবিবর্ধনাঃ ||১৮||

Adhikarana 17 (19) · Śloka 19

শালযশ্ছিন্নরূঢা যে রূক্ষাস্তে বদ্ধবর্চসঃ | তিক্তাঃ কষাযাঃ পিত্তঘ্না লঘুপাকাঃ কফাপহাঃ ||১৯||

Adhikarana 18 (20) · Śloka 20

বিস্তরেণাযমুদ্দিষ্টঃ শালিবর্গো হিতাহিতঃ |২০| ইতি শালিবর্গঃ |

Adhikarana 19 (20) · Śloka 20

অথ কুধান্যবর্গঃ | তদ্বত্ কুধান্যমুদ্গাদিমাষাদীনাং চ বক্ষ্যতে ||২০||

Adhikarana 20 (21) · Śloka 21

কোরদূষকশ্যামাকনীবারশান্তনুবরকোদ্দালকপ্রিযঙ্গুমধূলিকানন্দীমুখী- কুরুবিন্দগবেধুকসরবরুকতোদ(য)পর্ণীমুকুন্দকবেণুযবপ্রভৃতযঃ কুধান্যবিশেষাঃ ||২১||

Adhikarana 21 (22-23) · Śloka 23

উষ্ণাঃ কষাযমধুরা রূক্ষাঃ কটুবিপাকিনঃ | শ্লেষ্মঘ্না বদ্ধনিস্যন্দা বাতপিত্তপ্রকোপণাঃ ||২২|| কষাযমধুরস্তেষাং শীতঃ পিত্তাপহঃ স্মৃতঃ | কোদ্রবশ্চ সনীবারঃ শ্যামাকশ্চ সশান্তনুঃ ||২৩||

Adhikarana 22 (24) · Śloka 24

কৃষ্ণা রক্তাশ্চ পীতাশ্চ শ্বেতাশ্চৈব প্রিযঙ্গবঃ | যথোত্তরং প্রধানাঃ স্যূ রূক্ষাঃ কফহরাঃ স্মৃতাঃ ||২৪||

Adhikarana 23 (25) · Śloka 25

মধূলী মধুরা শীতা স্নিগ্ধা নন্দীমুখী তথা |২৫|

Adhikarana 24 (25) · Śloka 25

বিশোষী তত্র ভূযিষ্ঠং বরুকঃ সমুকুন্দকঃ ||২৫||

Adhikarana 25 (26) · Śloka 26

রূক্ষা বেণুযবা জ্ঞেযা বীর্যোষ্ণা কটুপাকিনঃ | বদ্ধমূত্রাঃ কফহরাঃ কষাযা বাতকোপনাঃ ||২৬||

Adhikarana 26 (27) · Śloka 27

মুদ্গবনমুদ্গকলাযমকুষ্ঠমসূরমঙ্গল্যচণকসতীনত্রিপুটকহরেণ্বাঢকীপ্রভৃতযো বৈদলাঃ ||২৭||

Adhikarana 27 (28) · Śloka 28

কষাযমধুরাঃ শীতাঃ কটুপাকা মরুত্করাঃ | বদ্ধমূত্রপুরীষাশ্চ পিত্তশ্লেষ্মহরাস্তথা ||২৮||

Adhikarana 28 (29) · Śloka 29

নাত্যর্থং বাতলাস্তেষু মুদ্গা দৃষ্টিপ্রসাদনাঃ | প্রধানা হরিতাস্তত্র বন্যা মুদ্গসমাঃ স্মৃতাঃ ||২৯||

Adhikarana 29 (30) · Śloka 30

বিপাকে মধুরাঃ প্রোক্তা মসূরা বদ্ধবর্চসঃ |৩০|

Adhikarana 30 (30) · Śloka 30

মকুষ্ঠকাঃ কৃমিকরাঃ... |৩০|

Adhikarana 31 (30) · Śloka 30

... কলাযাঃ প্রচুরানিলাঃ ||৩০||

Adhikarana 32 (31) · Śloka 31

আঢকী কফপিত্তঘ্নী নাতিবাতপ্রকোপণী |৩১|

Adhikarana 33 (31-32) · Śloka 32

বাতলাঃ শীতমধুরাঃ সকষাযা বিরূক্ষণাঃ ||৩১|| কফশোণিতপিত্তঘ্নাশ্চণকাঃ পুংস্ত্বনাশনাঃ | ত এব ঘৃতসংযুক্তাস্ত্রিদোষশমনাঃ পরম্ ||৩২||

Adhikarana 34 (33) · Śloka 33

হরেণবঃ সতীনাশ্চ বিজ্ঞেযা বদ্ধবর্চসঃ |৩৩|

Adhikarana 35 (33) · Śloka 33

ঋতে মুদ্গমসূরাভ্যামন্যে ত্বাধ্মানকারকাঃ ||৩৩||

Adhikarana 36 (34) · Śloka 34

মাষো গুরুর্ভিন্নপুরীষমূত্রঃ স্নিগ্ধোষ্ণবৃষ্যো মধুরোঽনিলঘ্নঃ | সন্তর্পণঃ স্তন্যকরো বিশেষাদ্বলপ্রদঃ শুক্রকফাবহশ্চ ||৩৪||

Adhikarana 37 (35) · Śloka 35

কষাযভাবান্ন পুরীষভেদী ন মূত্রলো নৈব কফস্য কর্তা | স্বাদুর্বিপাকে মধুরোঽলসান্দ্রঃ সন্তর্পণঃ স্তন্যরুচিপ্রদশ্চ ||৩৫||

Adhikarana 38 (36) · Śloka 36

মাষৈঃ সমানং ফলমাত্মগুপ্তমুক্তং চ কাকাণ্ডফলং তথৈব |৩৬|

Adhikarana 39 (36) · Śloka 36

আরণ্যমাষা গুণতঃ প্রদিষ্টা রূক্ষাঃ কষাযা অবিদাহিনশ্চ ||৩৬||

Adhikarana 40 (37) · Śloka 37

উষ্ণঃ কুলত্থো রসতঃ কষাযঃ কটুর্বিপাকে কফমারুতঘ্নঃ | শুক্রাশ্মরীগুল্মনিষূদনশ্চ সাঙ্গ্রাহিকঃ পীনসকাসহন্তা ||৩৭||

Adhikarana 41 (38) · Śloka 38

আনাহমেদোগুদকীলহিক্কাশ্বাসাপহঃ শোণিতপিত্তকৃচ্চ | কফস্য হন্তা নযনামযঘ্নো বিশেষতো বন্যকুলত্থ উক্তঃ ||৩৮||

Adhikarana 42 (39) · Śloka 40

ঈষত্কষাযো মধুরঃ সতিক্তঃ সাঙ্গ্রাহিকঃ পিত্তকরস্তথোষ্ণঃ | তিলো বিপাকে মধুরো বলিষ্ঠঃ স্নিগ্ধো ব্রণে লেপন এব পথ্যঃ ||৩৯|| দন্ত্যোঽগ্নিমেধাজননোঽল্পমূত্রস্ত্বচ্যোঽথ কেশ্যোঽনিলহা গুরুশ্চ |৪০|

Adhikarana 43 (40) · Śloka 40

তিলেষু সর্বেষ্বসিতঃ প্রধানো মধ্যঃ সিতো হীনতরাস্তথাঽন্যে ||৪০||

Adhikarana 44 (41-42) · Śloka 42

যবঃ কষাযো মধুরো হিমশ্চ কটুর্বিপাকে কফপিত্তহারী | ব্রণেষু পথ্যস্তিলবচ্চ নিত্যং প্রবদ্ধমূত্রো বহুবাতবর্চাঃ ||৪১|| স্থৈর্যাগ্নিমেধাস্বরবর্ণকৃচ্চ সপিচ্ছিলঃ স্থূলবিলেখনশ্চ | মেদোমরুত্তৃড্‌হরণোঽতিরূক্ষঃ প্রসাদনঃ শোণিতপিত্তযোশ্চ ||৪২||

Adhikarana 45 (43) · Śloka 43

এভির্গুণৈর্হীনতরৈস্তু কিঞ্চিদ্বিদ্যাদ্যবেভ্যোঽতিযবানশেষৈঃ |৪৩|

Adhikarana 46 (43) · Śloka 44

গোধূম উক্তো মধুরো গুরুশ্চ বল্যঃ স্থিরঃ শুক্ররুচিপ্রদশ্চ ||৪৩|| স্নিগ্ধোঽতিশীতোঽনিলপিত্তহন্তা সন্ধানকৃচ্ছ্লেষ্মকরঃ সরশ্চ |৪৪|

Adhikarana 47 (44) · Śloka 45

রূক্ষঃ কষাযো বিষশোষশুক্রবলাসদৃষ্টিক্ষযকৃদ্বিদাহী ||৪৪|| কটুর্বিপাকে মধুরস্তু শিম্বঃ প্রভিন্নবিণ্মারুতপিত্তলশ্চ |৪৫|

Adhikarana 48 (45) · Śloka 46

সিতাসিতাঃ পীতকরক্তবর্ণা ভবন্তি যেঽনেকবিধাস্তু শিম্বাঃ ||৪৫|| যথাদিতস্তে গুণতঃ প্রধানা জ্ঞেযাঃ কটূষ্ণা রসপাকযোশ্চ |৪৬|

Adhikarana 49 (46) · Śloka 47

সহাদ্বযং মূলকজাশ্চ শিম্বাঃ কুশিম্বিবল্লীপ্রভবাস্তু শিম্বাঃ ||৪৬|| জ্ঞেযা বিপাকে মধুরা রসে চ বলপ্রদাঃ পিত্তনিবর্হণাশ্চ |৪৭|

Adhikarana 50 (47) · Śloka 48

বিদাহবন্তশ্চ ভৃশং বিরূক্ষা বিষ্টভ্য জীর্যন্ত্যনিলপ্রদাশ্চ ||৪৭|| রুচিপ্রদাশ্চৈব সুদুর্জরাশ্চ সর্বে স্মৃতা বৈদলিকাস্তু শিম্বাঃ |৪৮|

Adhikarana 51 (48-49) · Śloka 50

কটুর্বিপাকে কটুকঃ কফঘ্নো বিদাহিভাবাদহিতঃ কুসুম্ভঃ ||৪৮|| উষ্ণাঽতসী স্বাদুরসাঽনিলঘ্নী পিত্তোল্বণা স্যাত্ কটুকা বিপাকে | পাকে রসে চাপি কটুঃ প্রদিষ্টঃ সিদ্ধার্থকঃ শোণিতপিত্তকোপী ||৪৯|| তীক্ষ্ণোষ্ণরূক্ষঃ কফমারুতঘ্নস্তথাগুণশ্চাসিতসর্ষপোঽপি |৫০|

Adhikarana 52 (50) · Śloka 50

অনার্তবং ব্যাধিহতমপর্যাগতমেব চ | অভূমিজং নবং চাপি ন ধান্যং গুণবত্ স্মৃতম্ ||৫০||

Adhikarana 53 (51) · Śloka 51

নবং ধান্যমভিষ্যন্দি লঘু সংবত্সরোষিতম্ |৫১|

Adhikarana 54 (51) · Śloka 51

বিদাহি গুরু বিষ্টম্ভি বিরূঢং দৃষ্টিদূষণম্ ||৫১||

Adhikarana 55 (52) · Śloka 52

শাল্যাদেঃ সর্ষপান্তস্য বিবিধস্যাস্য ভাগশঃ | কালপ্রমাণসংস্কারমাত্রাঃ সম্পরিকীর্তিতাঃ ||৫২|| ইতি কুধান্যবর্গঃ |

Adhikarana 56 (53) · Śloka 53

অথ মাংসবর্গঃ | অত ঊর্ধ্বং মাংসবর্গানুপদেক্ষ্যামঃ; তদ্যথা- জলেশযা, আনূপা, গ্রাম্যাঃ, ক্রব্যভুজ, একশফা, জাঙ্গলাশ্চেতি ষণ্মাংসবর্গা ভবন্তি | এতেষাং বর্গাণামুত্তরোত্তরা প্রধানতমাঃ | তে পুনর্দ্বিবিধা জাঙ্গলা আনূপাশ্চেতি | তত্র জাঙ্গলবর্গোঽষ্টবিধঃ | তদ্যথা- জঙ্ঘালা, বিষ্কিরাঃ, প্রতুদা, গুহাশযাঃ, প্রসহাঃ, পর্ণমৃগা, বিলেশযা, গ্রাম্যাশ্চেতি | তেষাং জঙ্ঘালবিষ্কিরৌ প্রধানতমৌ ||৫৩||

Adhikarana 57 (54) · Śloka 54

তাবেণহরিণর্ক্ষকুরঙ্গকরালকৃতমালশরভশ্বদংষ্ট্রাপৃষতচারুষ্করমৃগমাতৃকাপ্রভৃতযো জঙ্ঘালা মৃগাঃ কষাযা মধুরা লঘবো বাতপিত্তহরাস্তীক্ষ্ণা হৃদ্যা বস্তিশোধনাশ্চ ||৫৪||

Adhikarana 58 (55) · Śloka 55

কষাযমধুরো হৃদ্যঃ পিত্তাসৃক্কফরোগহা | সঙ্গ্রাহী রোচনো বল্যস্তেষামেণো জ্বরাপহঃ ||৫৫||

Adhikarana 59 (56) · Śloka 56

মধুরো মধুরঃ পাকে দোষঘ্নোঽনলদীপনঃ | শীতলো বদ্ধবিণ্মূত্র সুগন্ধির্হরিণো লঘুঃ ||৫৬||

Adhikarana 60 (57) · Śloka 57

এণঃ কৃষ্ণস্তযোর্জ্ঞেযো হরিণস্তাম্র উচ্যতে | যো ন কৃষ্ণো ন তাম্রশ্চ কুরঙ্গঃ সোঽভিধীযতে ||৫৭||

Adhikarana 61 (58) · Śloka 58

শীতাঽসৃক্পিত্তশমনী বিজ্ঞেযা মৃগমাতৃকা | সন্নিপাতক্ষযশ্বাসকাসহিক্কারুচিপ্রণুত্ ||৫৮||

Adhikarana 62 (59) · Śloka 60

লাবতিত্তিরিকপিঞ্জলবর্তীরবর্তিকাবর্তকনপ্তৃকাবার্তীকচকোরকলবিঙ্কমযূরক্রকরোপচক্র- কুক্কুটসারঙ্গশতপত্রকুতিত্তিরিকুরুবাহকযবালকপ্রভৃতযস্ত্র্যাহলা বিষ্কিরাঃ ||৫৯|| লঘবঃ শীতমধুরাঃ কষাযা দোষনাশনাঃ |৬০|

Adhikarana 63 (60) · Śloka 60

সঙ্গ্রাহী দীপনশ্চৈব কষাযমধুরো লঘুঃ | লাবঃ কটুবিপাকশ্চ সন্নিপাতে তু পূজিতঃ ||৬০||

Adhikarana 64 (61-62) · Śloka 63

ঈষদ্গুরূষ্ণমধুরো বৃষ্যো মেধাগ্নিবর্ধনঃ | তিত্তিরিঃ সর্বদোষঘ্নো গ্রাহী বর্ণপ্রসাদনঃ ||৬১|| রক্তপিত্তহরঃ শীতো লঘুশ্চাপি কপিঞ্জলঃ | কফোত্থেষু চ রোগেষু মন্দবাতে চ শস্যতে ||৬২|| হিক্কাশ্বাসানিলহরো বিশেষাদ্গৌরতিত্তিরিঃ |৬৩|

Adhikarana 65 (63) · Śloka 64

বাতপিত্তহরা বৃষ্যা মেধাগ্নিবলবর্ধনাঃ ||৬৩|| লঘবঃ ক্রকরা হৃদ্যাস্তথা চৈবোপচক্রকাঃ |৬৪|

Adhikarana 66 (64) · Śloka 65

কষাযঃ স্বাদুলবণস্ত্বচ্যঃ কেশ্যোঽরুচৌ হিতঃ ||৬৪|| মযূরঃ স্বরমেধাগ্নিদৃক্শ্রোত্রেন্দ্রিযদার্ঢ্যকৃত্ |৬৫|

Adhikarana 67 (65-66) · Śloka 66

স্নিগ্ধোষ্ণোঽনিলহা বৃষ্যঃ স্বেদস্বরবলাবহঃ ||৬৫|| বৃংহণঃ কুক্কুটো বন্যস্তদ্বদ্গ্রাম্যো গুরুস্তু সঃ | বাতরোগক্ষযবমীবিষমজ্বরনাশনঃ ||৬৬||

Adhikarana 68 (67) · Śloka 67

কপোতপারাবতভৃঙ্গরাজপরভৃতকোযষ্টিককুলিঙ্গগৃহকুলিঙ্গগোক্ষ্বেডকডিণ্ডিমাণবকশতপত্রক- মাতৃনিন্দকভেদাশিশুকসারিকাবল্গুলীগিরিশালট্বালট্টূষকসুগৃহাখঞ্জরীটহারীতদাত্যূহপ্রভৃতযঃ , প্রতুদাঃ ||৬৭||

Adhikarana 69 (68) · Śloka 68

কষাযমধুরা রূক্ষাঃ ফলাহারা মরুত্করাঃ | পিত্তশ্লেষ্মহরাঃ শীতা বদ্ধমূত্রাল্পবর্চসঃ ||৬৮||

Adhikarana 70 (69) · Śloka 69

সর্বদোষকরস্তেষাং ভেদাশী মলদূষকঃ |৬৯|

Adhikarana 71 (69) · Śloka 69

কষাযস্বাদুলবণো গুরুঃ কাণকপোতকঃ ||৬৯||

Adhikarana 72 (70) · Śloka 70

রক্তপিত্তপ্রশমনঃ কষাযবিশদোঽপি চ | বিপাকে মধুরশ্চাপি গুরুঃ পারাবতঃ স্মৃতঃ ||৭০||

Adhikarana 73 (71) · Śloka 71

কুলিঙ্গো মধুরঃ স্নিগ্ধঃ কফশুক্রবিবর্ধনঃ |৭১|

Adhikarana 74 (71) · Śloka 71

রক্তপিত্তহরো বেশ্মকুলিঙ্গস্ত্বতিশুক্রলঃ ||৭১||

Adhikarana 75 (72) · Śloka 72

সিংহব্যাঘ্রবৃকতরক্ষ্বৃক্ষদ্বীপিমার্জারশৃগালমৃগের্বারুকপ্রভৃতযো গুহাশযাঃ ||৭২||

Adhikarana 76 (73) · Śloka 73

মধুরা গুরবঃ স্নিগ্ধা বল্যা মারুতনাশনাঃ | উষ্ণবীর্যা হিতা নিত্যং নেত্রগুহ্যবিকারিণাম্ ||৭৩||

Adhikarana 77 (74) · Śloka 74

কাককঙ্ককুররচাষভাসশশঘাত্যুলূকচিল্লিশ্যেনগৃধ্রপ্রভৃতযঃ প্রসহাঃ ||৭৪||

Adhikarana 78 (75) · Śloka 75

এতে সিংহাদিভিঃ সর্বে সমানা বাযসাদযঃ | রসবীর্যবিপাকেষু বিশেষাচ্ছোষিণে হিতাঃ ||৭৫||

Adhikarana 79 (76) · Śloka 76

মদ্গুমূষিকবৃক্ষশাযিকাবকুশপূতিঘাসবানরপ্রভৃতযঃ পর্ণমৃগাঃ ||৭৬||

Adhikarana 80 (77) · Śloka 77

মধুরা গুরবো বৃষ্যাশ্চক্ষুষ্যাঃ শোষিণে হিতাঃ | সৃষ্টমূত্রপুরীষাশ্চ কাসার্শঃশ্বাসনাশনাঃ ||৭৭||

Adhikarana 81 (78) · Śloka 78

শ্বাবিচ্ছল্যকগোধাশশবৃষদংশলোপাকলোমশকর্ণকদলীমৃগপ্রিযকাজগরসর্পমূষিকনকুলমহাবভ্রুপ্রভৃতযো বিলেশযাঃ ||৭৮||

Adhikarana 82 (79) · Śloka 79

বর্চোমূত্রং সংহতং কুর্যুরেতে বীর্যে চোষ্ণাঃ পূর্ববত্ স্বাদুপাকাঃ | বাতং হন্যুঃ শ্লেষ্মপিত্তে চ কুর্যুঃ স্নিগ্ধাঃ কাসশ্বাসকার্শ্যাপহাশ্চ ||৭৯||

Adhikarana 83 (80) · Śloka 80

কষাযমধুরস্তেষাং শশঃ পিত্তকফাপহঃ | নাতিশীতলবীর্যত্বাদ্বাতসাধারণো মতঃ ||৮০||

Adhikarana 84 (81-84) · Śloka 84

গোধা বিপাকে মধুরা কষাযকটুকা স্মৃতা | বাতপিত্তপ্রশমনী বৃংহণী বলবর্ধনী ||৮১|| শল্যকঃ স্বাদুপিত্তঘ্নো লঘুঃ শীতো বিষাপহঃ | প্রিযকো মারুতে পথ্যোঽজগরস্ত্বর্শসাং হিতঃ ||৮২|| দুর্নামানিলদোষঘ্নাঃ কৃমিদূষীবিষাপহাঃ | চক্ষুষ্যা মধুরাঃ পাকে সর্পা মেধাগ্নিবর্ধনাঃ ||৮৩|| দর্বীকরা দীপকাশ্চ তেষূক্তাঃ কটুপাকিনঃ | মধুরাশ্চাতিচক্ষুষ্যাঃ সৃষ্টবিণ্মূত্রমারুতাঃ ||৮৪||

Adhikarana 85 (85) · Śloka 85

অশ্বাশ্বতরগোখরোষ্ট্রবস্তোরভ্রমেদঃপুচ্ছকপ্রভৃতযো গ্রাম্যাঃ ||৮৫||

Adhikarana 86 (86) · Śloka 86

গ্রাম্যা বাতহরাঃ সর্বে বৃংহণাঃ কফপিত্তলাঃ | মধুরা রসপাকাভ্যাং দীপনা বলবর্ধনাঃ ||৮৬||

Adhikarana 87 (87) · Śloka 87

নাতিশীতো গুরুঃ স্নিগ্ধো মন্দপিত্তকফঃ স্মৃতঃ | ছগলস্ত্বনভিষ্যন্দী তেষাং পীনসনাশনঃ ||৮৭||

Adhikarana 88 (88) · Śloka 88

বৃংহণং মাংসমৌরভ্রং পিত্তশ্লেষ্মাবহং গুরু |৮৮|

Adhikarana 89 (88) · Śloka 88

মেদঃপুচ্ছোদ্ভবং বৃষ্যমৌরভ্রসদৃশং গুণৈঃ ||৮৮||

Adhikarana 90 (89) · Śloka 89

শ্বাসকাসপ্রতিশ্যাযবিষমজ্বরনাশনম্ | শ্রমাত্যগ্নিহিতং গব্যং পবিত্রমনিলাপহম্ ||৮৯||

Adhikarana 91 (90) · Śloka 90

ঔরভ্রবত্সলবণং মাংসমেকশফোদ্ভবম্ |৯০|

Adhikarana 92 (90) · Śloka 90

অল্পাভিষ্যন্দ্যযং বর্গো জাঙ্গলঃ সমুদাহৃতঃ ||৯০||

Adhikarana 93 (91-92) · Śloka 92

দূরে জনান্তনিলযা দূরে পানীযগোচরাঃ | যে মৃগাশ্চ বিহঙ্গাশ্চ তেঽল্পাভিষ্যন্দিনো মতাঃ ||৯১|| অতীবাসন্ননিলযাঃ সমীপোদকগোচরাঃ | যে মৃগাশ্চ বিহঙ্গাশ্চ মহাভিষ্যন্দিনস্তু তে ||৯২||

Adhikarana 94 (93) · Śloka 93

আনূপবর্গস্তু পঞ্চবিধঃ | তদ্যথা- কূলচরাঃ, প্লবাঃ, কোষস্থাঃ, পাদিনো, মত্স্যাশ্চেতি ||৯৩||

Adhikarana 95 (94) · Śloka 94

তত্র গজগবযমহিষরুরুচমরসৃমররোহিতবরাহখড্গিগোকর্ণকালপুচ্ছকোদ্রন্যঙ্ক্বরণ্যগবযপ্রভৃতযঃ কূলচরাঃ পশবঃ ||৯৪||

Adhikarana 96 (95) · Śloka 95

বাতপিত্তহরা বৃষ্যা মধুরা রসপাকযোঃ | শীতলা বলিনঃ স্নিগ্ধা মূত্রলাঃ কফবর্ধনঃ ||৯৫||

Adhikarana 97 (96-97) · Śloka 97

বিরূক্ষণো লেখনশ্চ বীর্যোষ্ণঃ পিত্তদূষণঃ | স্বাদ্বম্ললবণস্তেষাং গজঃ শ্লেষ্মানিলাপহঃ ||৯৬|| গবযস্য তু মাংসং হি স্নিগ্ধং মধুরকাসজিত্ | বিপাকে মধুরং চাপি ব্যবাযস্য তু বর্ধনম্ ||৯৭||

Adhikarana 98 (98) · Śloka 98

স্নিগ্ধোষ্ণমধুরো বৃষ্যো মহিষস্তর্পণো গুরুঃ | নিদ্রাপুংস্ত্ববলস্তন্যবর্ধনো মাংসদার্ঢ্যকৃত্ ||৯৮||

Adhikarana 99 (99-104) · Śloka 104

রুরোর্মাংসং সমধুরং কষাযানুরসং স্মৃতম্ | বাতপিত্তোপশমনং গুরু শুক্রবিবর্ধনম্ ||৯৯|| তথা চমরমাংসং তু স্নিগ্ধং মধুরকাসজিত্ | বিপাকে মধুরং চাপি বাতপিত্তপ্রণাশনম্ ||১০০|| সৃমরস্য তু মাংসং চ কষাযানুরসং স্মৃতম্ | বাতপিত্তোপশমনং গুরু শুক্রবিবর্ধনম্ ||১০১|| স্বেদনং বৃংহণং বৃষ্যং শীতলং তর্পণং গুরু | শ্রমানিলহরং স্নিগ্ধং বারাহং বলবর্ধনম্ ||১০২|| কফঘ্নং খড্গিপিশিতং কষাযমনিলাপহম্ | পিত্র্যং পবিত্রমাযুষ্যং বদ্ধমূত্রং বিরূক্ষণম্ ||১০৩|| গোকর্ণমাংসং মধুরং স্নিগ্ধং মৃদু কফাবহম্ | বিপাকে মধুরং চাপি রক্তপিত্তবিনাশনম্ ||১০৪||

Adhikarana 100 (105) · Śloka 105

হংসসারসক্রৌঞ্চচক্রবাককুররকাদম্বকারণ্ডবজীবঞ্জীবকবকবলাকাপুণ্ডরীকপ্লবশরারীমুখ- নন্দীমুখমদ্গূত্ক্রোশকাচাক্ষমল্লিকাক্ষশুক্লাক্ষপুষ্করশাযিকাকোনালকাম্বুকুক্কুটিকামেঘরাবশ্বেতবারলপ্রভৃতযঃ প্লবাঃ সঙ্ঘাতচারিণঃ ||১০৫||

Adhikarana 101 (106) · Śloka 106

রক্তপিত্তহরাঃ শীতাঃ স্নিগ্ধা বৃষ্যা মরুজ্জিতঃ | সৃষ্টমূত্রপুরীষাশ্চ মধুরা রসপাকযোঃ ||১০৬||

Adhikarana 102 (107) · Śloka 107

গুরূষ্ণমধুরঃ স্নিগ্ধঃ স্বরবর্ণবলপ্রদঃ | বৃংহণঃ শুক্রলস্তেষাং হংসো বাতবিকারনুত্ ||১০৭||

Adhikarana 103 (108) · Śloka 108

শঙ্খশঙ্খনকশুক্তিশম্বূকভল্লূকপ্রভৃতযঃ কোশস্থাঃ ||১০৮||

Adhikarana 104 (109) · Śloka 109

কূর্মকুম্ভীরকর্কটককৃষ্ণকর্কটকশিশুমারপ্রভৃতযঃ পাদিনঃ ||১০৯||

Adhikarana 105 (110) · Śloka 110

শঙ্খকূর্মাদযঃ স্বাদুরসপাকা মরুন্নুদঃ | শীতাঃ স্নিগ্ধা হিতাঃ পিত্তে বর্চস্যাঃ শ্লেষ্মবর্ধনাঃ ||১১০||

Adhikarana 106 (111) · Śloka 111

কৃষ্ণকর্কটকস্তেষাং বল্যঃ কোষ্ণোঽনিলাপহঃ | শুক্লঃ সন্ধানকৃত্ সৃষ্টবিণ্মূত্রোঽনিলপিত্তহা ||১১১||

Adhikarana 107 (112) · Śloka 112

মত্স্যাস্তু দ্বিবিধা নাদেযাঃ সামুদ্রাশ্চ ||১১২||

Adhikarana 108 (113) · Śloka 113

তত্র নাদেযাঃ- রোহিতপাঠীনপাটলারাজীববর্মিগোমত্স্যকৃষ্ণমত্স্যবাগুঞ্জারমুরলসহস্রদংষ্ট্রপ্রভৃতযঃ ||১১৩||

Adhikarana 109 (114) · Śloka 114

নাদেযা মধুরা মত্স্যা গুরবো মারুতাপহাঃ | রক্তপিত্তকরাশ্চোষ্ণা বৃষ্যাঃ স্নিগ্ধাল্পবর্চসঃ ||১১৪||

Adhikarana 110 (115) · Śloka 115

কষাযানুরসস্তেষাং শষ্পশৈবালভোজনঃ | রোহিতো মারুতহরো নাত্যর্থং পিত্তকোপনঃ ||১১৫||

Adhikarana 111 (116) · Śloka 116

পাঠীনঃ শ্লেষ্মলো বৃষ্যো নিদ্রালুঃ পিশিতাশনঃ | দূষযেদ্রক্তপিত্তং তু কুষ্ঠরোগং করোত্যসৌ | মুরলো বৃংহণো বৃষ্যঃ স্তন্যশ্লেষ্মকরস্তথা ||১১৬||

Adhikarana 112 (117) · Śloka 117

সরস্তডাগসম্ভূতাঃ স্নিগ্ধাঃ স্বাদুরসাঃ স্মৃতাঃ | মহাহ্রদেষু বলিনঃ, স্বল্পেঽম্ভস্যবলাঃ স্মৃতাঃ ||১১৭||

Adhikarana 113 (118) · Śloka 118

তিমিতিমিঙ্গিলকুলিশপাকমত্স্যনিরুলনন্দিবার(রু)লকমকরগর্গরচন্দ্রকমহামীনরাজীবপ্রভৃতযঃ সামুদ্রাঃ ||১১৮||

Adhikarana 114 (119) · Śloka 120

সামুদ্রা গুরবঃ স্নিগ্ধা মধুরা নাতিপিত্তলাঃ | উষ্ণা বাতহরা বৃষ্যা বর্চস্যাঃ শ্লেষ্মবর্ধনাঃ ||১১৯|| বলাবহা বিশেষেণ মাংসাশিত্বাত্ সমুদ্রজাঃ |১২০|

Adhikarana 115 (120-121) · Śloka 121

সমুদ্রজেভ্যো নাদেযা বৃংহণত্বাদ্গুণোত্তরাঃ ||১২০|| তেষামপ্যনিলঘ্নত্বাচ্চৌণ্ট্যকৌপ্যৌ গুণোত্তরৌ | স্নিগ্ধত্বাত্ স্বাদুপাকত্বাত্তযোর্বাপ্যা গুণাধিকাঃ ||১২১||

Adhikarana 116 (122-125) · Śloka 125

নাদেযা গুরবো মধ্যে যস্মাত্ পুচ্ছাস্যচারিণঃ | সরস্তডাগজানাং তু বিশেষেণ শিরো লঘু ||১২২|| অদূরগোচরা যস্মাত্তস্মাদুত্সোদপানজাঃ | কিঞ্চিন্মুক্ত্বা শিরোদেশমত্যর্থং গুরবস্তু তে ||১২৩|| অধস্তাদ্গুরবো জ্ঞেযা মত্স্যাঃ সাগরসম্ভবাঃ | উরোবিচরণাত্তেষাং পূর্বমঙ্গং লঘু স্মৃতম্ ||১২৪|| ইত্যানূপো মহাষ্যন্দী মাংসবর্গ উদীরিতঃ ||১২৫||

Adhikarana 117 (126) · Śloka 126

তত্র শুষ্কপূতিব্যাধিবিষসর্পহতদিগ্ধবিদ্ধজীর্ণকৃশবালানামসাত্ম্যচারিণাং চ মাংসান্যভক্ষ্যাণি, যস্মাদ্বিগতব্যাপন্নাপহতপরিণতাল্পাসম্পূর্ণবীর্যত্বাদ্দোষকরাণি ভবন্তি; এভ্যোঽন্যেষামুপাদেযং মাংসমিতি ||১২৬||

Adhikarana 118 (127-128) · Śloka 128

অরোচকং প্রতিশ্যাযং গুরু শুষ্কং প্রকীর্তিতম্ | বিষব্যাধিহতং মৃত্যুং বালং ছর্দিং চ কোপযেত্ ||১২৭|| কাসশ্বাসকরং বৃদ্ধং ত্রিদোষং ব্যাধিদূষিতম্ | ক্লিন্নমুত্ক্লেশজননং কৃশং বাতপ্রকোপণম্ ||১২৮||

Adhikarana 119 (129) · Śloka 129

স্ত্রিযশ্চতুষ্পাত্সু, পুমাংসো বিহঙ্গেষু, মহাশরীরেষ্বল্পশরীরাঃ, অল্পশরীরেষু মহাশরীরাঃ, প্রধানতমাঃ; এবমেকজাতীযানাং মহাশরীরেভ্যঃ কৃশশরীরাঃপ্রধানতমাঃ ||১২৯||

Adhikarana 120 (130-133) · Śloka 133

স্থানাদিকৃতং মাংসস্য গুরুলাঘবমুপদেক্ষ্যামঃ | তদ্যথা- রক্তাদিষু শুক্রান্তেষু ধাতুষূত্তরোত্তরা গুরুতরাঃ, তথা সক্থিস্কন্ধক্রোডশিরঃপাদকরকটীপৃষ্ঠচর্মকালেযকযকৃদন্ত্রাণি ||১৩০|| শিরঃস্কন্ধং কটী পৃষ্ঠং সক্থিনী চাত্মপক্ষযোঃ | গুরু পূর্বং বিজানীযাদ্ধাতবস্তু যথোত্তরম্ ||১৩১|| সর্বস্য প্রাণিনো দেহে মধ্যো গুরুরুদাহৃতঃ | পূর্বভাগো গুরুঃ পুংসামধোভাগস্তু যোষিতাম্ ||১৩২|| উরোগ্রীবং বিহঙ্গানাং বিশেষেণ গুরু স্মৃতম্ | পক্ষোত্ক্ষেপাত্সমো দৃষ্টো মধ্যভাগস্তু পক্ষিণাম্ ||১৩৩||

Adhikarana 121 (134) · Śloka 135

অতীব রূক্ষং মাংসং তু বিহঙ্গানাং ফলাশিনাম্ | বৃংহণং মাংসমত্যর্থং খগানাং পিশিতাশিনাম্ ||১৩৪|| মত্স্যাশিনাং পিত্তকরং বাতঘ্নং ধান্যচারিনাম্ |১৩৫|

Adhikarana 122 (135-136) · Śloka 136

জলজানূপজা গ্রাম্যা ক্রচ্যাদৈকশফাস্তথা ||১৩৫|| প্রসহা বিলবাসাশ্চ যে চ জঙ্ঘালসঞ্জ্ঞিতাঃ | প্রতুদা বিষ্কিরাশ্চৈব লঘবঃ স্যুর্যথোত্তরম্ | অল্পাভিষ্যন্দিনশ্চৈব যথাপূর্বমতোঽন্যথা ||১৩৬||

Adhikarana 123 (137) · Śloka 137

প্রামাণাধিকাস্তু স্বজাতাবল্পসারা গুরবশ্চ | সর্বপ্রাণিনাং সর্বশরীরেভ্যঃ প্রধানতমা ভবন্তি যকৃত্প্রদেশবর্তিনস্তানাদদীত; প্রধানালাভে মধ্যমবযস্কং সদ্যস্কমক্লিষ্টমুপাদেযং মাংসমিতি ||১৩৭||

Adhikarana 124 (138) · Śloka 138

ভবতি চাত্র- চরঃ শরীরাবযবাঃ স্বভাবো ধাতবঃ ক্রিযা | লিঙ্গং প্রমাণং সংস্কারো মাত্রা চাস্মিন্ পরীক্ষ্যতে ||১৩৮|| ইতি মাংসবর্গঃ |

Adhikarana 125 (139) · Śloka 139

অথ ফলবর্গঃ | অত ঊর্ধ্বং ফলান্যুপদেক্ষ্যামঃ | তদ্যথা- দাডিমামলকবদরকোলকর্কন্ধুসৌবীরসিঞ্চিতিকাফলকপিত্থমাতুলুঙ্গাম্রাম্রাতককরমর্দপ্রিযালনারঙ্গ- জম্বীরলকুচভব্যপারাবতবেত্রফলপ্রাচীনামলকতিন্তিডীকনীপকোশাম্রাম্লীকাপ্রভৃতীনি ||১৩৯||

Adhikarana 126 (140) · Śloka 140

অম্লানি রসতঃ পাকে গুরূণ্যুষ্ণানি বীর্যতঃ | পিত্তলান্যনিলঘ্নানি কফোত্ক্লেশকরাণি চ ||১৪০||

Adhikarana 127 (141-142) · Śloka 142

কষাযানুরসং তেষাং দাডিমং নাতিপিত্তলম্ | দীপনীযং রুচিকরং হৃদ্যং বর্চোবিবন্ধনম্ ||১৪১|| দ্বিবিধং তত্তু বিজ্ঞেযং মধুরং চাম্লমেব চ | ত্রিদোষঘ্নং তু মধুরমম্লং বাতকফাপহম্ ||১৪২||

Adhikarana 128 (143-148) · Śloka 148

অম্লং সমধুরং তিক্তং কষাযং কটুকং সরম্ | চক্ষুষ্যং সর্বদোষঘ্নং বৃষ্যমামলকীফলম্ ||১৪৩|| হন্তি বাতং তদম্লত্বাত্ পিত্তং মাধুর্যশৈত্যতঃ | কফং রূক্ষকষাযত্বাত্ ফলেভ্যোঽভ্যধিকং চ তত্ ||১৪৪|| কর্কন্ধুকোলবদরমামং পিত্তকফাবহম্ | পক্বং পিত্তানিলহরং স্নিগ্ধং সমধুরং সরম্ ||১৪৫|| পুরাতনং তৃট্শমনং শ্রমঘ্নং দীপনং লঘু | সৌবীরং বদরং স্নিগ্ধং মধুরং বাতপিত্তজিত্ ||১৪৬|| কষাযং স্বাদু সঙ্গ্রাহি শীতং সিঞ্চিতিকাফলম্ | আমং কপিত্থমস্বর্যং কফঘ্নং গ্রাহি বাতলম্ ||১৪৭|| কফানিলহরং পক্বং মধুরাম্লরসং গুরু | শ্বাসকাসারুচিহরং তৃষ্ণাঘ্নং কণ্ঠশোধনম্ ||১৪৮||

Adhikarana 130 (149-151) · Śloka 152

লঘ্বম্লং দীপনং হৃদ্যং মাতুলুঙ্গমুদাহৃতম্ | ত্বক্ তিক্তা দুর্জরা তস্য বাতক্রিমিকফাপহা ||১৪৯|| স্বাদু শীতং গুরু স্নিগ্ধং মাংসং মারুতপিত্তজিত্ | মেধ্যং শূলানিলচ্ছর্দিকফারোচকনাশনম্ ||১৫০|| দীপনং লঘু সঙ্গ্রাহি গুল্মার্শোঘ্নং তু কেসরম্ | শূলাজীর্ণবিবন্ধেষু মন্দেঽগ্নৌ কফমারুতে ||১৫১|| অরুচৌ চ বিশেষেণ রসস্তস্যোপদিশ্যতে |১৫২|

Adhikarana 131 (152-154) · Śloka 155

পিত্তানিলকরং বালং পিত্তলং বদ্ধকেসরম্ ||১৫২|| হৃদ্যং বর্ণকরং রুচ্যং রক্তমাংসবলপ্রদম্ | কষাযানুরসং স্বাদু বাতঘ্নং বৃংহণং গুরু ||১৫৩|| পিত্তাবিরোধি সম্পক্বমাম্রং শুক্রবিবর্ধনম্ | বৃংহণং মধুরং বল্যং গুরু বিষ্টভ্য জীর্যতি ||১৫৪|| আম্রাতকফলং বৃষ্যং সস্নেহং শ্লেষ্মবর্ধনম্ |১৫৫|

Adhikarana 132 (155) · Śloka 155

ত্রিদোষবিষ্টম্ভকরং লকুচং শুক্রনাশনম্ ||১৫৫||

Adhikarana 133 (156-162) · Śloka 162

অম্লং তৃষাপহং রুচ্যং পিত্তকৃত্ করমর্দকম্ | বাতপিত্তহরং বৃষ্যং প্রিযালং গুরু শীতলম্ ||১৫৬|| হৃদ্যং স্বাদু কষাযাম্লং ভব্যমাস্যবিশোধনম্ | পিত্তশ্লেষ্মহরং গ্রাহি গুরু বিষ্টম্ভি শীতলম্ ||১৫৭|| পারাবতং সমধুরং রুচ্যমত্যগ্নিবাতনুত্ | গরদোষহরং নীপং প্রাচীনামলকং তথা ||১৫৮|| বাতাপহং তিন্তিডীকমামং পিত্তবলাসকৃত্ | গ্রাহ্যুষ্ণং দীপনং রুচ্যং সম্পক্বং কফবাতনুত্ ||১৫৯|| তস্মাদল্পান্তরগুণং কোশাম্রফলমুচ্যতে | অম্লীকাযাঃ ফলং পক্বং তদ্বদ্ভেদি তু কেবলম্ ||১৬০|| অম্লং সমধুরং হৃদ্যং বিশদং ভক্তরোচনম্ | বাতঘ্নং দুর্জরং প্রোক্তং নারঙ্গস্য ফলং গুরু ||১৬১|| তৃষ্ণাশূলকফোত্ক্লেশচ্ছর্দিশ্বাসনিবারণম্ | বাতশ্লেষ্মবিবন্ধঘ্নং জম্বীরং গুরু পিত্তকৃত্ | ঐরাবতং দন্তশঠমম্লং শোণিতপিত্তকৃত্ ||১৬২||

Adhikarana 134 (163) · Śloka 163

ক্ষীরবৃক্ষফলজাম্ববরাজাদনতোদনশীতফলতিন্দুকবকুলধন্বনাশ্মন্তকাশ্বকর্ণফল্গু- পরূষকগাঙ্গেরুকীপুষ্করবর্তিবিল্ববিম্বীপ্রভৃতীনি ||১৬৩||

Adhikarana 135 (164) · Śloka 164

ফলান্যেতানি শীতানি কফপিত্তহরাণি চ | সঙ্গ্রাহকাণি রূক্ষাণি কষাযমধুরাণি চ ||১৬৪||

Adhikarana 136 (164-176) · Śloka 176

ক্ষীরবৃক্ষফলং তেষাং গুরু বিষ্টম্ভি শীতলম্ | কষাযং মধুরং সাম্লং নাতিমারুতকোপনম্ ||১৬৫|| অত্যর্থং বাতলং গ্রাহি জাম্ববং কফপিত্তজিত্ | স্নিগ্ধং স্বাদু কষাযং চ রাজাদনফলং গুরু ||১৬৬|| কষাযং মধুরং রূক্ষং তোদনং কফবাতজিত্ | অম্লোষ্ণং লঘু সঙ্গ্রাহি স্নিগ্ধং পিত্তাগ্নিবর্ধনম্ ||১৬৭|| আমং কষাযং সঙ্গ্রাহি তিন্দুকং বাতকোপনম্ | বিপাকে গুরু সম্পক্বং মধুরং কফপিত্তজিত্ ||১৬৮|| মধুরং চ কষাযং চ স্নিগ্ধং সঙ্গ্রাহি বাকুলম্ | স্থিরীকরং চ দন্তানাং বিশদং ফলমুচ্যতে ||১৬৯|| সকষাযং হিমং স্বাদু ধান্বনং কফবাতজিত্ | তদ্বদ্গাঙ্গেরুকং বিদ্যাদশ্মন্তকফলানি চ ||১৭০|| বিষ্টম্ভি মধুরং স্নিগ্ধং ফল্গুজং তর্পণং গুরু | অত্যম্লমীষন্মধুরং কষাযানুরসং লঘু ||১৭১|| বাতঘ্নং পিত্তজনমামং বিদ্যাত্ পরুষকম্ | তদেব পক্বং মধুরং বাতপিত্তনিবর্হণম্ ||১৭২|| বিপাকে মধুরং শীতং রক্তপিত্তপ্রসাদনম্ | পৌষ্করং স্বাদু বিষ্টম্ভি বল্যং কফকরং ফলম্ ||১৭৩|| কফানিলহরং তীক্ষ্ণং স্নিগ্ধং সঙ্গ্রাহি দীপনম্ | কটুতিক্তকষাযোষ্ণং বালং বিল্বমুদাহৃতম্ ||১৭৪|| বিদ্যাত্তদেব সম্পক্বং মধুরানুরসং গুরু | বিদাহি বিষ্টম্ভকরং দোষকৃত্ পূতিমারুতম্ ||১৭৫|| বিম্বীফলং সাশ্বকর্ণং স্তন্যকৃত্ কফপিত্তজিত্ | তৃড্দাহজ্বরপিত্তাসৃক্কাসশ্বাসক্ষযাপহম্ ||১৭৬||

Adhikarana 137 (177) · Śloka 177

তালনালিকেরপনসমোচপ্রভৃতীনি ||১৭৭||

Adhikarana 138 (178) · Śloka 178

স্বাদুপাকরসান্যাহুর্বাতপিত্তহরাণি চ | বলপ্রদানি স্নিগ্ধানি বৃংহণানি হিমানি চ ||১৭৮||

Adhikarana 139 (179-181) · Śloka 181

ফলং স্বাদুরসং তেষাং তালজং গুরু পিত্তজিত্ | তদ্বীজং স্বাদুপাকং তু মূত্রলং বাতপিত্তজিত্ ||১৭৯|| নালিকেরং গুরু স্নিগ্ধং পিত্তঘ্নং স্বাদু শীতলম্ | বলমাংসপ্রদং হৃদ্যং বৃংহণং বস্তিশোধনম্ ||১৮০|| পনসং সকষাযং তু স্নিগ্ধং স্বাদুরসং গুরু | মৌচং স্বাদুরসং প্রোক্তং কষাযং নাতিশীতলম্ | রক্তপিত্তহরং বৃষ্যং রুচ্যং শ্লেষ্মকরং গুরু ||১৮১||

Adhikarana 140 (182) · Śloka 182

দ্রাক্ষাকাশ্মর্যমধূকপুষ্পখর্জূরপ্রভৃতীনি ||১৮২||

Adhikarana 141 (183) · Śloka 183

রক্তপিত্তহরাণ্যাহুর্গুরূণি মধুরাণি চ |১৮৩|

Adhikarana 142 (183-186) · Śloka 186

তেষাং দ্রাক্ষা সরা স্বর্যা মধুরা স্নিগ্ধশীতলা ||১৮৩|| রক্তপিত্তজ্বরশ্বাসতৃষ্ণাদাহক্ষযাপহা | হৃদ্যং মূত্রবিবন্ধঘ্নং পিত্তাসৃগ্বাতনাশনম্ ||১৮৪|| কেশ্যং রসাযনং মেধ্যং কাশ্মর্যং ফলমুচ্যতে | ক্ষতক্ষযাপহং হৃদ্যং শীতলং তর্পণং গুরু ||১৮৫|| রসে পাকে চ মধুরং খার্জূরং রক্তপিত্তনুত্ | বৃংহণীযমহৃদ্যং চ মধূককুসুমং গুরু | বাতপিত্তোপশমনং ফলং তস্যোপদিশ্যতে ||১৮৬||

Adhikarana 143 (187) · Śloka 187

বাতামাক্ষোডাভিষুকনিচুলপিচুনিকোচকোরুমাণপ্রভৃতীনি ||১৮৭||

Adhikarana 144 (188) · Śloka 188

পিত্তশ্লেষ্মহরাণ্যাহুঃ স্নিগ্ধোষ্ণানি গুরূণি চ | বৃংহণান্যনিলঘ্নানি বল্যানি মধুরাণি চ ||১৮৮||

Adhikarana 145 (189) · Śloka 189

কষাযং কফপিত্তঘ্নং কিঞ্চিত্তিক্তং রুচিপ্রদম্ | হৃদ্যং সুগন্ধি বিশদং লবলীফলমুচ্যতে ||১৮৯||

Adhikarana 146 (190) · Śloka 191

বসিরং শীতপাক্যং চ সারুষ্করনিবন্ধনম্ | বিষ্টম্ভি দুর্জরং রূক্ষং শীতলং বাতকোপনম্ ||১৯০|| বিপাকে মধুরং চাপি রক্তপিত্তপ্রসাদনন্ |১৯১|

Adhikarana 147 (191-193) · Śloka 193

ঐরাবতং দন্তশঠমম্লং শোণিতপিত্তকৃত্ ||১৯১|| শীতং কষাযং মধুরং টঙ্কং মারুতকৃদ্গুরু | স্নিগ্ধোষ্ণং তিক্তমধুরং বাতশ্লেষ্মঘ্নমৈঙ্গুদম্ ||১৯২|| শমীফলং গুরু স্বাদু রূক্ষোষ্ণং কেশনাশনম্ | গুরু শ্লেষ্মাতকফলং কফকৃন্মধুরং হিমম্ ||১৯৩||

Adhikarana 148 (194) · Śloka 194

করীরাক্ষিকপীলূনি তৃণশূন্যফলানি চ | স্বাদুতিক্তকটূষ্ণানি কফবাতহরাণি চ ||১৯৪||

Adhikarana 149 (195) · Śloka 195

তিক্তং পিন্ত্তকরং তেষাং সরং কটুবিপাকি চ | তীক্ষ্ণোষ্ণং কটুকং পীলু সস্নেহং কফবাতজিত্ ||১৯৫||

Adhikarana 150 (196) · Śloka 196

আরুষ্করং তৌবরকং কষাযং কটুপাকি চ | উষ্ণং কৃমিজ্বরানাহমেহোদাবর্তনাশনম্ | কুষ্ঠগুল্মোদরার্শোঘ্নং কটুপাকি তথৈব চ ||১৯৬||

Adhikarana 151 (197-198) · Śloka 198

করঞ্জকিংশুকারিষ্টফলং জন্তুপ্রমেহনুত্ | অঙ্কোলস্য ফলং বিস্রং গুরু শ্লেষ্মহরং হিমম্ ||১৯৭|| রূক্ষোষ্ণং কটুকং পাকে লঘু বাতকফাপহম্ | তিক্তমীষদ্বিষহিতং বিডঙ্গং কৃমিনাশনম্ ||১৯৮||

Adhikarana 152 (199) · Śloka 199

ব্রণ্যমুষ্ণং সরং মেধ্যং দোষঘ্নং শোফকুষ্ঠনুত্ | কষাযং দীপনং চাম্লং চক্ষুষ্যং চাভযাফলম্ ||১৯৯||

Adhikarana 153 (200) · Śloka 200

ভেদনং লঘু রূক্ষোষ্ণং বৈস্বর্যক্রিমিনাশনম্ | চক্ষুষ্যং স্বাদুপাক্যাক্ষং কষাযং কফপিত্তজিত্ ||২০০||

Adhikarana 154 (201) · Śloka 201

কফপিত্তহরং রূক্ষং বক্ত্রক্লেদমলাপহম্ | কষাযমীষন্মধুরং কিঞ্চিত্ পূগফলং সরম্ ||২০১||

Adhikarana 155 (202) · Śloka 203

জাতীকোশোঽথ কর্পূরং জাতীকটুকযোঃ ফলম্ | কক্কো(ঙ্কো)লকং লবঙ্গং চ তিক্তং কটু কফাপহম্ ||২০২|| লঘু তৃষ্ণাপহং বক্ত্রক্লেদদৌর্গন্ধ্যনাশনম্ |২০৩|

Adhikarana 156 (203) · Śloka 204

সতিক্তঃ সুরভিঃ শীতঃ কর্পূরো লঘু লেখনঃ ||২০৩|| তৃষ্ণাযাং মুখশোষে চ বৈরস্যে চাপি পূজিতঃ |২০৪|

Adhikarana 157 (204) · Śloka 204

লতাকস্তূরিকা তদ্বচ্ছীতা বস্তিবিশোধনী ||২০৪||

Adhikarana 158 (205-207) · Śloka 207

প্রিযালমজ্জা মধুরো বৃষ্যঃ পিত্তানিলাপহঃ | বৈভীতকো মদকরঃ কফমারুতনাশনঃ ||২০৫|| কষাযমধুরো মজ্জা কোলানাং পিত্তনাশনঃ | তৃষ্ণাচ্ছর্দ্যনিলঘ্নশ্চ তদ্বদামলকস্য চ ||২০৬|| বীজপূরকশম্যাকমজ্জা কোশাম্রসম্ভবঃ | স্বাদুপাকোঽগ্নিবলদঃ স্নিগ্ধঃ পিত্তানিলাপহঃ ||২০৭||

Adhikarana 159 (208) · Śloka 208

যস্য যস্য ফলস্যেহ বীর্যং ভবতি যাদৃশম্ | তস্য তস্যৈব বীর্যেণ মজ্জানমপি নির্দিশেত্ ||২০৮||

Adhikarana 160 (209) · Śloka 209

ফলেষু পরিপক্বং যদ্গুণবত্তদুদাহৃতম্ | বিল্বাদন্যত্র বিজ্ঞেযমামং তদ্ধি গুণোত্তরম্ | গ্রাহ্যুষ্ণং দীপনং তদ্ধি কষাযকটুতিক্তকম্ ||২০৯||

Adhikarana 161 (210) · Śloka 210

ব্যাধিতং কৃমিজুষ্টং চ পাকাতীতমকালজম্ | বর্জনীযং ফলং সর্বমপর্যাগতমেব চ ||২১০|| ইতি ফলবর্গঃ |

Adhikarana 162 (211) · Śloka 211

অথ শাকবর্গঃ | শাকান্যত ঊর্ধ্বং বক্ষ্যামঃ | তত্র পুষ্পফলালাবুকালিন্দকপ্রভৃতীনি ||২১১||

Adhikarana 163 (212) · Śloka 212

পিত্তঘ্নান্যনিলং কুর্যুস্তথা মন্দকফানি চ | সৃষ্টমূত্রপুরীষাণি স্বাদুপাকরসানি চ ||২১২||

Adhikarana 164 (213-215) · Śloka 215

পিত্তঘ্নং তেষু কূষ্মাণ্ডং বালং মধ্যং কফাবহম্ | শুক্লং লঘূষ্ণং সক্ষারং দীপনং বস্তিশোধনম্ ||২১৩|| সর্বদোষহরং হৃদ্যং পথ্যং চেতোবিকারিণাম্ | দৃষ্টিশুক্রক্ষযকরং কালিন্দং কফবাতকৃত্ ||২১৪|| অলাবুর্ভিন্নবিট্কা তু রূক্ষা গুর্ব্যতিশীতলা | তিক্তালাবুরহৃদ্যা তু বামিনী বাতপিত্তজিত্ ||২১৫||

Adhikarana 165 (216) · Śloka 216

ত্রপুসৈর্বারুকর্কারুকশীর্ণবৃন্তপ্রভৃতীনি ||২১৬||

Adhikarana 166 (217) · Śloka 217

স্বাদুতিক্তরসান্যাহুঃ কফবাতকরাণি চ | সৃষ্টমূত্রপুরীষাণি রক্তপিত্তহরাণি চ ||২১৭||

Adhikarana 167 (218-219) · Śloka 219

বালং সনীলং ত্রপুসং তেষাং পিত্তহরং স্মৃতম্ | তত্পাণ্ডু কফকৃজ্জীর্ণমম্লং বাতকফাপহম্ ||২১৮|| এর্বারুকং সকর্কারু সম্পক্বং কফবাতকৃত্ | সক্ষারং মধুরং রুচ্যং দীপনং নাতিপিত্তলম্ ||২১৯||

Adhikarana 168 (220) · Śloka 220

সক্ষারং মধুরং চৈব শীর্ণবৃন্তং কফাপহম্ | ভেদনং দীপনং হৃদ্যমানাহাষ্ঠীলনুল্লঘু ||২২০||

Adhikarana 169 (221) · Śloka 221

পিপ্পলীমরিচশৃঙ্গবেরার্দ্রকহিঙ্গুজীরককুস্তুম্বুরুজম্বীরসুমুখসুরসার্জকভূস্তৃণসুগন্ধক- কাসমর্দককালমালকুঠেরকক্ষবকখরপুষ্পশিগ্রুমধুশিগ্রুফণিজ্ঝকসর্ষপরাজিকাকুলাহলাবগুত্থগণ্ডীরতিলপর্ণিকা- বর্ষাভূচিত্রকমূলকলশুনকলাযপলাণ্ডুপ্রভৃতীনি ||২২১||

Adhikarana 170 (222) · Śloka 222

কটূন্যুষ্ণানি রুচ্যানি বাতশ্লেষ্মহরাণি চ | কৃতান্নেষূপযুজ্যন্তে সংস্কারার্থমনেকধা ||২২২||

Adhikarana 171 (223) · Śloka 223

তেষাং গুর্বী স্বাদুশীতা পিপ্পল্যার্দ্রা কফাবহা | শুষ্কা কফানিলঘ্নী সা বৃষ্যা পিত্তাবিরোধিনী ||২২৩||

Adhikarana 172 (224-225) · Śloka 225

স্বাদুপাক্যার্দ্রমরিচং গুরু শ্লেষ্মপ্রসেকি চ | কটূষ্ণং লঘু তচ্ছুষ্কমবৃষ্যং কফবাতজিত্ ||২২৪|| নাত্যুষ্ণং নাতিশীতং চ বীর্যতো মরিচং সিতম্ | গুণবন্মরিচেভ্যশ্চ চক্ষুষ্যং চ বিশেষতঃ ||২২৫||

Adhikarana 173 (226-228) · Śloka 228

নাগরং কফবাতঘ্নং বিপাকে মধুরং কটু | বৃষ্যোষ্ণং রোচনং হৃদ্যং সস্নেহং লঘু দীপনম্ ||২২৬|| কফানিলহরং স্বর্যং বিবন্ধানাহশূলনুত্ | কটূষ্ণং রোচনং হৃদ্যং বৃষ্যং চৈবার্দ্রকং স্মৃতম্ ||২২৭|| লঘূষ্ণং পাচনং হিঙ্গু দীপনং কফবাতজিত্ | কটু স্নিগ্ধং সরং তীক্ষ্ণং শূলাজীর্ণবিবন্ধনুত্ ||২২৮||

Adhikarana 174 (229) · Śloka 230

তীক্ষ্ণোষ্ণং কটুকং পাকে রুচ্যং পিত্তাগ্নিবর্ধনম্ | কটু শ্লেষ্মানিলহরং গন্ধাঢ্যং জীরকদ্বযম্ ||২২৯|| কারবী করবী তদ্বদ্বিজ্ঞেযা সোপকুঞ্চিকা |২৩০|

Adhikarana 175 (230-231) · Śloka 232

ভক্ষ্যব্যঞ্জনভোজ্যেষু বিবিধেষ্ববচারিতা ||২৩০|| আর্দ্রা কুস্তুম্বরী কুর্যাত্ স্বাদুসৌগন্ধ্যহৃদ্যতাম্ | সা শুষ্কা মধুরা পাকে স্নিগ্ধা তৃড্দাহনাশনী ||২৩১|| দোষঘ্নী কটুকা কিঞ্চিত্ তিক্তা স্রোতোবিশোধনী |২৩২|

Adhikarana 176 (232-237) · Śloka 237

জম্বীরঃ পাচনস্তীক্ষ্ণঃ কৃমিবাতকফাপহঃ ||২৩২|| সুরাভির্দীপনো রুচ্যো মুখবৈশদ্যকারকঃ | কফানিলবিষশ্বাসকাসদৌর্গন্ধ্যনাশনঃ ||২৩৩|| পিত্তকৃত্ পার্শ্বশূলঘ্নঃ সুরসঃ সমুদাহৃতঃ | তদ্বত্তু সুমুখো জ্ঞেযো বিশেষাদ্গরনাশনঃ ||২৩৪|| কফঘ্না লঘবো রূক্ষাস্তীক্ষ্ণোষ্ণাঃ পিত্তবর্ধনাঃ | কটুপাকরসাশ্চৈব সুরসার্জকভূস্তৃণাঃ ||২৩৫|| মধুরঃ কফবাতঘ্নঃ পাচনঃ কণ্ঠশোধনঃ | বিশেষতঃ পিত্তহরঃ সতিক্তঃ কাসমর্দকঃ ||২৩৬|| কটুঃ সক্ষারমধুরঃ শিগ্রুস্তিক্তোঽথ পিচ্ছিলঃ | মধুশিগ্রুঃ সরস্তিক্তঃ শোফঘ্নো দীপনঃ কটুঃ ||২৩৭||

Adhikarana 177 (238-239) · Śloka 239

বিদাহি বদ্ধবিণ্মূত্রং রূক্ষং তীক্ষ্ণোষ্ণমেব চ | ত্রিদোষং সার্ষপং শাকং গাণ্ডীরং বেগনাম চ ||২৩৮|| চিত্রকস্তিলপর্ণী চ কফশোফহরে লঘূ | বর্ষাভূঃ কফবাতঘ্নী হিতা শোফোদরার্শসাম্ ||২৩৯||

Adhikarana 178 (240-242) · Śloka 242

কটুতিক্তরসা হৃদ্যা রোচনী বহ্নিদীপনী | সর্বদোষহরা লঘ্বী কণ্ঠ্যা মূলকপোতিকা ||২৪০|| মহত্তদ্গুরু বিষ্টম্ভি তীক্ষ্ণমামং ত্রিদোষকৃত্ | তদেব স্নেহসিদ্ধং তু পিত্তনুত্ কফবাতজিত্ ||২৪১|| ত্রিদোষশমনং শুষ্কং বিষদোষহরং লঘু | বিষ্টম্ভি বাতলং শাকং শুষ্কমন্যত্র মূলকাত্ ||২৪২||

Adhikarana 179 (243) · Śloka 243

পুষ্পং চ পত্রং চ ফলং তথৈব যথোত্তরং তে গুরবঃ প্রদিষ্টাঃ | তেষাং তু পুষ্পং কফপিত্তহন্তৃ ফলং নিহন্যাত্ কফমারুতৌ তু ||২৪৩||

Adhikarana 180 (244-248) · Śloka 248

স্নিগ্ধোষ্ণতীক্ষ্ণঃ কটুপিচ্ছিলশ্চ গুরুঃ সরঃ স্বাদুরসশ্চ বল্যঃ | বৃষ্যশ্চ মেধাস্বরবর্ণচক্ষুর্ভগ্নাস্থিসন্ধানকরো রসোনঃ ||২৪৪|| হৃদ্রোগজীর্ণজ্বরকুক্ষিশূলবিবন্ধগুল্মারুচিকাসশোফান্ | দুর্নামকুষ্ঠানলসাদজন্তুসমীরণশ্বাসকফাংশ্চ হন্তি ||২৪৫|| নাত্যুষ্ণবীর্যোঽনিলহা কটুশ্চ তীক্ষ্ণো গুরুর্নাতিকফাবহশ্চ | বলাবহঃ পিত্তকরোঽথ কিঞ্চিত্ পলাণ্ডুরগ্নিং চ বিবর্ধযেত্তু ||২৪৬|| স্নিগ্ধো রুচিষ্যঃ স্থিরধাতুকারী বল্যোঽথ মেধাকফপুষ্টিদশ্চ | স্বাদুর্গুরুঃ শোণিতপিত্তশস্তঃ সপিচ্ছিলঃ ক্ষীরপলাণ্ডুরুক্তঃ ||২৪৭|| কলাযশাকং পিত্তঘ্নং কফঘ্নং বাতলং গুরু | কষাযানুরসং চৈব বিপাকে মধুরং চ তত্ ||২৪৮||

Adhikarana 181 (249) · Śloka 249

চুচ্চূযূথিকাতরুণীজীবন্তীবিম্বীতিকানদী(ন্দী)ভল্লাতকচ্ছগলান্ত্রী- বৃক্ষাদনীফঞ্জীশাল্মলীশেলুবনস্পতিপ্রসবশণকর্বুদারকোবিদারপ্রভৃতীনি ||২৪৯||

Adhikarana 182 (250) · Śloka 250

কষাযস্বাদুতিক্তানি রক্তপিত্তহরাণি চ | কফঘ্নান্যনিলং কুর্যুঃ সঙ্গ্রাহীণি লঘূনি চ ||২৫০||

Adhikarana 183 (251-253) · Śloka 253

লঘুঃ পাকে চ জন্তুঘ্নঃ পিচ্ছিলো ব্রণিনাং হিতঃ | কষাযমধুরো গ্রাহী চুচ্চূস্তেষাং ত্রিদোষহা ||২৫১|| চক্ষুষ্যা সর্বদোষঘ্নী জীবন্তী সমুদাহৃতা | বৃক্ষাদনী বাতহরা, ফঞ্জী ত্বল্পবলা মতা ||২৫২|| ক্ষীরবৃক্ষোত্পলাদীনাং কষাযাঃ পল্লবাঃ স্মৃতাঃ | শীতাঃ সঙ্গ্রাহিণঃ শস্তা রক্তপিত্তাতিসারিণাম্ ||২৫৩||

Adhikarana 184 (254) · Śloka 255

পুনর্নবাবরুণতর্কার্যুরুবূকবত্সাদনীবিল্বশাকপ্রভৃতীনি ||২৫৪|| উষ্ণানি স্বাদুতিক্তানি বাতপ্রশমনানি চ |২৫৫|

Adhikarana 185 (255) · Śloka 255

তেষু পৌনর্নবং শাকং বিশেষাচ্ছোফনাশনম্ ||২৫৫||

Adhikarana 186 (256) · Śloka 256

তণ্ডুলীযকোপোদকাঽশ্ববলাচিল্লীপালঙ্ক্যাবাস্তূকপ্রভৃতীনি ||২৫৬||

Adhikarana 187 (257) · Śloka 257

সৃষ্টমূত্রপুরীষাণি সক্ষারমধুরাণি চ | মন্দবাতকফান্যাহূ রক্তপিত্তহরাণি চ ||২৫৭||

Adhikarana 188 (258-261) · Śloka 261

মধুরো রসপাকাভ্যাং রক্তপিত্তমদাপহঃ | তেষাং শীততমো রূক্ষস্তণ্ডুলীযো বিষাপহঃ ||২৫৮|| স্বাদুপাকরসা বৃষ্যা বাতপিত্তমদাপহা | উপোদকা সরা স্নিগ্ধা বল্যা শ্লেষ্মকরী হিমা ||২৫৯|| কটুর্বিপাকে কৃমিহা মেধাগ্নিবলবর্ধনঃ | সক্ষারঃ সর্বদোষঘ্নো বাস্তূকো রোচনঃ সরঃ ||২৬০|| চিল্লী বাস্তূকবজ্জ্ঞেযা পালঙ্ক্যা তণ্ডুলীযবত্ | বাতকৃদ্বদ্ধবিণ্মূত্রা রূক্ষা পিত্তকফে হিতা | শাকমাশ্ববলং রূক্ষং বদ্ধবিণ্মূত্রমারুতম্ ||২৬১||

Adhikarana 189 (262) · Śloka 262

মণ্ডূকপর্ণীসপ্তলাসুনিষণ্ণকসুবর্চলাপিপ্পলীগুডূচীগোজিহ্বা- কাকমাচীপ্রপুন্নাডাবল্গুজসতীনবৃহতীকণ্টকারিকাফল- পটোলবার্তাককারবেল্লককটুকিকাকেবু(ম্বু)কোরুবূকপর্পটককিরাততিক্ত- কর্কোটকারিষ্টকোশাতকীবেত্রকরীরাটরূষকার্কপুষ্পীপ্রভৃতীনি ||২৬২||

Adhikarana 190 (263) · Śloka 263

রক্তপিত্তহরাণ্যাহুর্হৃদ্যানি সুলঘূনি চ | কুষ্ঠমেহজ্বরশ্বাসকাসারুচিহরাণি চ ||২৬৩||

Adhikarana 191 (264-271) · Śloka 271

কষাযা তু হিতা পিত্তে স্বাদুপাকরসা হিমা | লঘ্বী মণ্ডূকপর্ণী তু তদ্বদ্গোজিহ্বিকা মতা ||২৬৪|| অবিদাহী ত্রিদোষঘ্নঃ সঙ্গ্রাহী সুনিষণ্ণকঃ | অবল্গুজঃ কটুঃ পাকে তিক্তঃ পিত্তকফাপহঃ ||২৬৫|| ঈষত্তিক্তং ত্রিদোষঘ্নং শাকং কটু সতীনজম্ | নাত্যুষ্ণশীতং কুষ্ঠঘ্নং কাকমাচ্যাস্তু তদ্বিধম্ ||২৬৬|| কণ্ডূকুষ্ঠকৃমিঘ্নানি কফবাতহরাণি চ | ফলানি বৃহতীনাং তু কটুতিক্তলঘূনি চ ||২৬৭|| কফপিত্তহরং ব্রণ্যমুষ্ণং তিক্তমবাতলম্ | পটোলং কটুকং পাকে বৃষ্যং রোচনদীপনম্ ||২৬৮|| কফবাতহরং তিক্তং রোচনং কটুকং লঘু | বার্তাকং দীপনং প্রোক্তং জীর্ণং সক্ষারপিত্তলম্ | তদ্বত্ কর্কোটকং বিদ্যাত্ কারবেল্লকমেব চ ||২৬৯|| আটরূষকবেত্রাগ্রগুডূচীনিম্বপর্পটাঃ | কিরাততিক্তসহিতাস্তিক্তাঃ পিত্তকফাপহাঃ ||২৭০|| কফাপহং শাকমুক্তং বরুণপ্রপুনাড(ট)যোঃ | রূক্ষং লঘু চ শীতং চ বাতপিত্তপ্রকোপণম্ ||২৭১||

Adhikarana 192 (272-273) · Śloka 273

দীপনং কালশাকং তু গরদোষহরং কটু | কৌসুম্ভং মধুরং রূক্ষমুষ্ণং শ্লেষ্মহরং লঘু ||২৭২|| বাতলং নালিকাশাকং পিত্তঘ্নং মধুরং চ তত্ | গ্রহণ্যর্শোবিকারঘ্নী সাম্লা বাতকফে হিতা | উষ্ণা কষাযমধুরা চাঙ্গেরী চাগ্নিদীপনী ||২৭৩||

Adhikarana 193 (274) · Śloka 274

লোণিকাজাতুকত্রিপর্ণিকাপত্তূরজীবকসুবর্চলাডুডুরককুতুম্বককুঠিঞ্জরকুন্তলিকাকুরণ্টিকাপ্রভৃতযঃ ||২৭৪||

Adhikarana 194 (275) · Śloka 275

স্বাদুপাকরসাঃ শীতাঃ কফঘ্না নাতিপিত্তলাঃ | লবণানুরসা রূক্ষাঃ সক্ষারা বাতলাঃ সরাঃ ||২৭৫||

Adhikarana 195 (276) · Śloka 276

স্বাদুতিক্তা কুন্তলিকা কষাযা সকুরণ্টিকা |২৭৬|

Adhikarana 196 (276) · Śloka 276

সঙ্গ্রাহি শীতলং চাপি লঘু দোষাপহং তথা | রাজক্ষবকশাকং তু শটীশাকং চ তদ্বিধম্ ||২৭৬||

Adhikarana 197 (277) · Śloka 277

স্বাদুপাকরসং শাকং দুর্জরং হরিমন্থজম্ |২৭৭|

Adhikarana 198 (277) · Śloka 277

ভেদনং মধুরং রূক্ষং কালাযমতিবাতলম্ ||২৭৭||

Adhikarana 199 (278) · Śloka 278

স্রংসনং কটুকং পাকে লঘু বাতকফাপহম্ | শোফঘ্নমুষ্ণবীর্যং চ পত্রং পূতিকরঞ্জজম্ ||২৭৮||

Adhikarana 200 (279-280) · Śloka 280

তাম্বূলপত্রং তীক্ষ্ণোষ্ণং কটু পিত্তপ্রকোপণম্ | সুগন্ধি বিশদং তিক্তং স্বর্যং বাতকফাপহম্ ||২৭৯|| স্রংসনং কটুকং পাকে কষাযং বহ্নিদীপনম্ | বক্ত্রকণ্ডূমলক্লেদদৌর্গন্ধ্যাদিবিশোধনম্ ||২৮০||

Adhikarana 201 (281) · Śloka 281

অথ পুষ্পবর্গঃ | কোবিদারশণশাল্মলীপুষ্পাণি মধুরাণি মধুরবিপাকানি রক্তপিত্তহরাণি চ; বৃষাগস্ত্যযোঃ পুষ্পাণি তিক্তানি কটুবিপাকানি ক্ষযকাসাপহানি চ ||২৮১||

Adhikarana 202 (282) · Śloka 282

আগস্ত্যং নাতিশীতোষ্ণং নক্তান্ধানাং প্রশস্যতে ||২৮২||

Adhikarana 203 (283) · Śloka 283

করীরকুসুমানি কটুবিপাকানি বাতহরাণি সৃষ্টমূত্রপুরীষাণি চ ||২৮৩||

Adhikarana 204 (284) · Śloka 284

রক্তবৃক্ষস্য নিম্বস্য মুষ্ককার্কাসনস্য চ | কফপিত্তহরং পুষ্পং কুষ্ঠঘ্নং কুটজস্য চ ||২৮৪||

Adhikarana 205 (285) · Śloka 285

সতিক্তং মধুরং শীতং পদ্মং পিত্তকফাপহম্ | মধুরং পিচ্ছিলং স্নিগ্ধং কুমুদং হ্লাদি শীতলম্ | তস্মাদল্পান্তরগুণে বিদ্যাত্ কুবলযোত্পলে ||২৮৫||

Adhikarana 206 (286) · Śloka 286

সিন্ধুবারং বিজানীযাদ্ধিমং পিত্তবিনাশনম্ |২৮৬|

Adhikarana 207 (286) · Śloka 286

মালতীমল্লিকে তিক্তে সৌরভ্যাত্ পিত্তনাশনে ||২৮৬||

Adhikarana 208 (287) · Śloka 287

সুগন্ধি বিশদং হৃদ্যং বাকুলং পাটলানি চ | শ্লেষ্মপিত্তবিষঘ্নং তু নাগং তদ্বচ্চ কুঙ্কুমম্ ||২৮৭||

Adhikarana 209 (288) · Śloka 288

চম্পকং রক্তপিত্তঘ্নং শীতোষ্ণং কফনাশনম্ | কিংশুকং কফপিত্তঘ্নং তদ্বদেব কুরণ্টকম্ ||২৮৮||

Adhikarana 210 (289) · Śloka 289

যথাবৃক্ষং বিজানীযাত্ পুষ্পং বৃক্ষোচিতং তথা |২৮৯|

Adhikarana 211 (289) · Śloka 289

মধুশিগ্রুকরীরাণি কটূনি শ্লেষ্মহরাণি চ ||২৮৯||

Adhikarana 212 (290) · Śloka 290

ক্ষবককুলেবরবংশকরীরপ্রভৃতীনি কফকরাণি সৃষ্টমূত্রপুরীষাণি চ ||২৯০||

Adhikarana 213 (291-292) · Śloka 292

ক্ষবকং কৃমিলং তেষু স্বাদুপাকং সপিচ্ছলম্ | বিস্যন্দি বাতলং নাতিপিত্তশ্লেষ্মকরং চ তত্ ||২৯১|| বেণোঃ করীরাঃ কফলা মধুরা রসপাকতঃ | বিদাহিনো বাতকরাঃ সকষাযা বিরূক্ষণাঃ ||২৯২||

Adhikarana 214 (293) · Śloka 293

উদ্ভিদানি পলালেক্ষুকরীষবেণুক্ষিতিজানি | তত্র পলালজাতং মধুরং মধুরবিপাকং রূক্ষং দোষপ্রশমনং চ | ইক্ষুজং মধুরং কষাযানুরসং কটুপাকং শীতলং চ | তদ্বদেবোষ্ণং কারীষং কষাযং বাতকোপনং চ, (বেণুজাতং কষাযং বাতকোপনং চ,) ভূমিজং গুরু নাতিবাতলং ভূমিতশ্চাস্যানুরসঃ ||২৯৩||

Adhikarana 215 (294) · Śloka 294

পিণ্যাকতিলকল্কস্থূণিকাশুষ্কশাকানি সর্বদোষপ্রকোপণানি ||২৯৪||

Adhikarana 216 (295) · Śloka 295

বিষ্টম্ভিনঃ স্মৃতাঃ সর্বে বটকা বাতকোপনাঃ |২৯৫|

Adhikarana 217 (295) · Śloka 295

সিণ্ডাকী বাতলা সার্দ্রা রুচিষ্যাঽনলদীপনী ||২৯৫||

Adhikarana 218 (296) · Śloka 296

বিড্ভেদি গুরু রূক্ষং চ প্রাযো বিষ্টম্ভি দুর্জরম্ | সকষাযং চ সর্বং হি স্বাদু শাকমুদাহৃতম্ | পুষ্পং পত্রং ফলং নালং কন্দাশ্চ গুরবঃ ক্রমাত্ ||২৯৬||

Adhikarana 219 (297) · Śloka 297

কর্কশং পরিজীর্ণং চ কৃমিজুষ্টমদেশজম্ | বর্জযেত্ পত্রশাকং তদ্যদকালবিরোহি চ ||২৯৭|| ইতি শাকবর্গঃ |

Adhikarana 220 (298) · Śloka 298

অথ কন্দবর্গঃ | কন্দানাত ঊর্ধ্বং বক্ষ্যামঃ- বিদারীকন্দশতাবরীবিসমৃণালশৃঙ্গাটককশেরুকপিণ্ডালুকমধ্বালুক- হস্ত্যালুককাষ্ঠালুকশঙ্খালুকরক্তালুকেন্দীবরোত্পলকন্দপ্রভৃতীনি ||২৯৮||

Adhikarana 221 (299) · Śloka 299

রক্তপিত্তহরাণ্যাহুঃ শীতানি মধুরাণি চ | গুরূণি বহুশুক্রাণি স্তন্যবৃদ্ধিকরাণি চ ||২৯৯||

Adhikarana 222 (300-302) · Śloka 302

মধুরো বৃংহণো বৃষ্যঃ শীতঃ স্বর্যোঽতিমূত্রলঃ | বিদারীকন্দো বল্যশ্চ পিত্তবাতহরশ্চ সঃ ||৩০০|| বাতপিত্তহরী বৃষ্যা স্বাদুতিক্তা শতাবরী | মহতী চৈব হৃদ্যা চ মেধাগ্নিবলবর্ধিনী ||৩০১|| গ্রহণ্যর্শোবিকারঘ্নী বৃষ্যা শীতা রসাযনী | কফপিত্তহরাস্তিক্তাস্তস্যা এবাঙ্কুরাঃ স্মৃতাঃ ||৩০২||

Adhikarana 223 (303-304) · Śloka 305

অবিদাহি বিসং প্রোক্তং রক্তপিত্তপ্রসাদনম্ | বিষ্টম্ভি দুর্জরং রূক্ষং বিরসং মারুতাবহম্ ||৩০৩|| গুরূ বিষ্টম্ভিশীতৌ চ শৃঙ্গাটককশেরুকৌ | পিণ্ডালুকং কফকরং গুরু বাতপ্রকোপণম্ ||৩০৪|| সুরেন্দ্রকন্দঃ শ্লেষ্মঘ্নো বিপাকে কটু পিত্তকৃত্ |৩০৫|

Adhikarana 224 (305) · Śloka 305

বেণোঃ করীরা গুরবঃ কফমারুতকোপনাঃ ||৩০৫||

Adhikarana 225 (306) · Śloka 306

স্থূলসূরণমাণকপ্রভৃতযঃ কন্দা ঈষত্কষাযাঃ কটুকা রূক্ষা বিষ্টম্ভিনো গুরবঃ কফবাতলাঃ পিত্তহরাশ্চ ||৩০৬||

Adhikarana 226 (307) · Śloka 307

মান(ণ)কং স্বাদু শীতং চ গুরু চাপি প্রকীর্তিতম্ | স্থূলকন্দস্তু নাত্যুষ্ণঃ সূরণো গুদকীলহা ||৩০৭||

Adhikarana 227 (308-309) · Śloka 309

কুমুদোত্পলপদ্মানাং কন্দা মারুতকোপনাঃ | কষাযাঃ পিত্তশমনা বিপাকে মধুরা হিমাঃ ||৩০৮|| বারাহকন্দঃ শ্লেষ্মঘ্নঃ কটুকো রসপাকতঃ | মেহকুষ্ঠকৃমিহরো বল্যো বৃষ্যো রসাযনঃ ||৩০৯||

Adhikarana 228 (310) · Śloka 310

তালনারিকেলখর্জূরপ্রভৃতীনাং মস্তকমজ্জানঃ ||৩১০||

Adhikarana 229 (311) · Śloka 311

স্বাদুপাকরসানাহূ রক্তপিত্তহরাংস্তথা | শুক্রলাননিলঘ্নাংশ্চ কফবৃদ্ধিকরানপি ||৩১১||

Adhikarana 230 (312) · Śloka 312

বালং হ্যনার্তবং জীর্ণং ব্যাধিতং ক্রিমিভক্ষিতম্ | কন্দং বিবর্জযেত্ সর্বং যো বা সম্যঙ্ন রোহতি ||৩১২||

Adhikarana 231 (313) · Śloka 313

অথ লবণবর্গঃ | অথ লবণানি- সৈন্ধবসামুদ্রবিডসৌবর্চলরোমকৌদ্ভিদপ্রভৃতীনি যথোত্তরমুষ্ণানি বাতহরাণি কফপিত্তকরাণি কটুপাকীনি যথাপূর্বং স্নিগ্ধানি স্বাদূনি সৃষ্টমূত্রপুরীষাণি চেতি ||৩১৩||

Adhikarana 232 (314-320) · Śloka 320

চক্ষুষ্যং সৈন্ধবং হৃদ্যং রুচ্যং লঘ্বগ্নিদীপনম্ | স্নিগ্ধং সমধুরং বৃষ্যং শীতং দোষঘ্নমুত্তমম্ ||৩১৪|| সামুদ্রং মধুরং পাকে নাত্যুষ্ণমবিদাহি চ | ভেদন স্নিগ্ধমীষচ্চ শূলঘ্নং নাতিপিত্তলম্ ||৩১৫|| সক্ষারং দীপনং সূক্ষ্মং শূলহৃদ্রোগনাশনম্ | রোচনং তীক্ষ্ণমুষ্ণং চ বিডং বাতানুলোমনম্ ||৩১৬|| লঘু সৌবর্চলং পাকে বীর্যোষ্ণং বিশদং কটু | গুল্মশূলবিবন্ধঘ্নং হৃদ্যং সুরভি রোচনম্ ||৩১৭|| রোমকং তীক্ষ্ণমত্যুষ্ণং ব্যবাযি কটুপাকি চ | বাতঘ্নং লঘু বিস্যন্দি সূক্ষ্মং বিড্ভেদি মূত্রলম্ ||৩১৮|| লঘু তীক্ষ্ণোষ্ণমুত্ক্লেদি সূক্ষ্মং বাতানুলোমনম্ | সতিক্তং কটু সক্ষারং বিদ্যাল্লবণমৌদ্ভিদম্ ||৩১৯|| কফবাতক্রিমিঘ্নং চ লেখনং পিত্তকোপনম্ | দীপনং পাচনং ভেদি লবণং গুটিকাহ্বযম্ ||৩২০||

Adhikarana 233 (321) · Śloka 321

ঊষসূতং বালুকৈলং শৈলমূলাকরোদ্ভবম্ | লবণং কটুকং ছেদি বিহিতং কটু চোচ্যতে ||৩২১||

Adhikarana 234 (322-325) · Śloka 325

যবক্ষারস্বর্জিকাক্ষারোষক্ষারপাকিমটঙ্কণক্ষারপ্রভৃতযঃ | গুল্মার্শোগ্রহণীদোষশর্করাশ্মরিনাশনাঃ | ক্ষারাস্তু পাচনাঃ সর্বে রক্তপিত্তকরাঃ সরাঃ | জ্ঞেযৌ বহ্নিসমৌ ক্ষারৌ স্বর্জিকাযাবশূকজৌ | শুক্রশ্লেষ্মবিবন্ধার্শোগুল্মপ্লীহবিনাশনৌ ||৩২৩|| উষ্ণোঽনিলঘ্নঃ প্রক্লেদী চোষক্ষারো বলাপহঃ | মেদোঘ্নঃ পাকিমঃ ক্ষারস্তেষাং বস্তিবিশোধনঃ ||৩২৪|| বিরূক্ষণোঽনিলকরঃ শ্লেষ্মঘ্নঃ পিত্তদূষণঃ | অগ্নিদীপ্তিকরস্তীক্ষ্ণষ্টঙ্কণঃ ক্ষার উচ্যতে ||৩২৫||

Adhikarana 235 (326-330) · Śloka 330

সুবর্ণং স্বাদু হৃদ্যং চ বৃংহণীযং রসাযনম্ | দোষত্রযাপহং শীতং চক্ষুষ্যং বিষসূদনম্ ||৩২৬|| রূপ্যমম্লং সরং শীতং সস্নেহং পিত্তবাতনুত্ | তাম্রং কষাযং মধুরং লেখনং শীতলং সরম্ ||৩২৭|| সতিক্তং লেখনং কাংস্যং চক্ষুষ্যং কফবাতজিত্ | বাতকৃচ্ছীতলং লোহং তৃষ্ণাপিত্তকফাপহম্ ||৩২৮|| কটু ক্রিমিঘ্নং লবণং ত্রপু সীসং চ লেখনম্ | মুক্তাবিদ্রুমবজ্রেন্দ্রবৈদূর্যস্ফটিকাদযঃ ||৩২৯|| চক্ষুষ্যা মণযঃ শীতা লেখনা বিষসূদনাঃ | পবিত্রা ধারণীযাশ্চ পাপ্মালক্ষ্মীমলাপহাঃ ||৩৩০|| ইতি লবণাদিবর্গঃ |

Adhikarana 236 (331) · Śloka 331

ধান্যেষু মাংসেষু ফলেষু চৈব শাকেষু চানুক্তমিহাপ্রমেযাত্ | আস্বাদতো ভূতগুণৈশ্চ মত্বা তদাদিশেদ্দ্রব্যমনল্পবুদ্ধিঃ ||৩৩১||

Adhikarana 237 (332-339) · Śloka 339

ষষ্টিকা যবগোধূমা লোহিতা যে চ শালযঃ | মুদ্গাঢকীমসূরাশ্চ ধান্যেষু প্রবরাঃ স্মৃতাঃ ||৩৩২|| লাবতিত্তিরিসারঙ্গকুরঙ্গৈণকপিঞ্জলাঃ | মযূরবর্মিকূর্মাশ্চ শ্রেষ্ঠা মাংসগণেষ্বিহ ||৩৩৩|| দাডিমামলকং দ্রাক্ষা খর্জূরং সপরূষকম্ | রাজাদনং মাতুলুঙ্গং ফলবর্গে প্রশস্যতে ||৩৩৪|| সতীনো বাস্তুকশ্চুচ্চূচিল্লীমূলকপোতিকাঃ | মণ্ডূকপর্ণী জীবন্তী শাকবর্গে প্রশস্যতে ||৩৩৫|| গব্যং ক্ষীরং ঘৃতং শ্রেষ্ঠং, সৈন্ধবং লবণেষু চ | ধাত্রীদাডিমমম্লেষু, পিপ্পলী নাগরং কটৌ ||৩৩৬|| তিক্তে পটোলবার্তাকং, মধুরে ঘৃতমুচ্যতে | ক্ষৌদ্রং, পূগফলং শ্রেষ্ঠং কষাযে সপরূষকম্ ||৩৩৭|| শর্করেক্ষুবিকারেষু, পানে মধ্বাসবৌ তথা | পরিসংবত্সরং ধান্যং, মাংসং বযসি মধ্যমে ||৩৩৮|| অপর্যুষিতমন্নং তু সংস্কৃতং মাত্রযা শুভম্ | ফলং পর্যাগতং, শাকমশুষ্কং তরুণং নবম্ ||৩৩৯||

Adhikarana 238 (340) · Śloka 341

অথ কৃতান্নবর্গঃ | অতঃ পরং প্রবক্ষ্যামি কৃতান্নগুণবিস্তরম্ | লাজমণ্ডো বিশুদ্ধানাং পথ্যঃ পাচনদীপনঃ ||৩৪০|| বাতানুলোমনো হৃদ্যঃ পিপ্পলীনাগরাযুতঃ |৩৪১|

Adhikarana 239 (341) · Śloka 342

স্বেদাগ্নিজননী লঘ্বী দীপনী বস্তিশোধনী ||৩৪১|| ক্ষুত্তৃট্শ্রমগ্লানিহরী পেযা বাতানুলোমনী |৩৪২|

Adhikarana 240 (342) · Śloka 343

বিলেপী তর্পণী হৃদ্যা গ্রাহিণী বলবর্ধনী ||৩৪২|| পথ্যা স্যাদুরসা লঘ্বী দীপনী ক্ষুত্তৃষাপহা |৩৪৩|

Adhikarana 241 (343) · Śloka 344

হৃদ্যা সন্তর্পণী বৃষ্যা বৃংহণী বলবর্ধনী ||৩৪৩|| শাকমাংসফলৈর্যুক্তা বিলেপ্যম্লা চ দুর্জরা |৩৪৪|

Adhikarana 242 (344) · Śloka 345

সিক্থৈর্বিরহিতো মণ্ডঃ পেযা সিক্থসমন্বিতা ||৩৪৪|| বিলেপী বহুসিক্থা স্যাদ্যবাগূর্বিরলদ্রবা |৩৪৫|

Adhikarana 243 (345) · Śloka 345

বিষ্টম্ভী পাযসো বল্যো মেদঃকফকরো গুরুঃ ||৩৪৫||

Adhikarana 244 (346) · Śloka 346

কফপিত্তকরী বল্যা কৃশরাঽনিলনাশনী |৩৪৬|

Adhikarana 245 (346) · Śloka 347

ধৌতস্তু বিমলঃ শুদ্ধো মনোজ্ঞঃ সুরভিঃ সমঃ ||৩৪৬|| স্বিন্নঃ সুপ্রস্রুতস্তূষ্ণো বিশদস্ত্বোদনো লঘুঃ |৩৪৭|

Adhikarana 246 (347) · Śloka 347

অধৌতোঽপ্রস্রুতোঽস্বিন্নঃ শীতশ্চাপ্যোদনো গুরুঃ ||৩৪৭||

Adhikarana 247 (348) · Śloka 348

লঘুঃ সুগন্ধিঃ কফহা বিজ্ঞেযো ভৃষ্টতণ্ডুলঃ |৩৪৮|

Adhikarana 248 (348) · Śloka 349

স্নেহৈর্মাংসৈঃ ফলৈঃ কন্দৈর্বিদলাম্লৈশ্চ সংযুতাঃ ||৩৪৮|| গুরবো বৃংহণা বল্যা যে চ ক্ষীরোপসাধিতাঃ |৩৪৯|

Adhikarana 249 (349) · Śloka 349

সুস্বিন্নো নিস্তুষো ভৃষ্ট ঈষত্ সূপো লঘুর্হিতঃ ||৩৪৯||

Adhikarana 250 (350) · Śloka 350

স্বিন্নং নিষ্পীডিতং শাকং হিতং স্যাত্ স্নেহসংস্কৃতম্ | অস্বিন্নং স্নেহরহিতমপীডিতমতোঽন্যথা ||৩৫০||

Adhikarana 251 (351) · Śloka 352

মাংসং স্বভাবতো বৃষ্যং স্নেহনং বলবর্ধনম্ | স্নেহগোরসধান্যাম্লফলাম্লকটুকৈঃ সহ ||৩৫১|| সিদ্ধং মাংসং হিতং বল্যং রোচনং বৃংহণং গুরু |৩৫২|

Adhikarana 252 (352) · Śloka 353

তদেব গোরসাদানং সুরভিদ্রব্যসংস্কৃতম্ ||৩৫২|| বিদ্যাত্পিত্তকফোদ্রেকী বলমাংসাগ্নিবর্ধনম্ |৩৫৩|

Adhikarana 253 (353) · Śloka 354

পরিশুষ্কং স্থিরং স্নিগ্ধং হর্ষণং প্রীণনং গুরু ||৩৫৩|| রোচনং বলমেধাগ্নিমাংসৌজঃশুক্রবর্ধনম্ |৩৫৪|

Adhikarana 254 (354) · Śloka 354

তদেবোল্লুপ্তপিষ্টত্বাদুল্লুপ্তমিতি পাচকাঃ ||৩৫৪||

Adhikarana 255 (355) · Śloka 355

পরিশুষ্কগুণৈর্যুক্তং বহ্নৌ পক্বমতো লঘু |৩৫৫|

Adhikarana 256 (356) · Śloka 356

তদেব শূলিকাপ্রোতমঙ্গারপরিপাচিতম্ ||৩৫৫|| জ্ঞেযং গুরুতরং কিঞ্চিত্ প্রদিগ্ধং গুরুপাকতঃ |৩৫৬|

Adhikarana 257 (356-358) · Śloka 358

উল্লুপ্তং ভর্জিতং পিষ্টং প্রতপ্তং কন্দুপাচিতম্ ||৩৫৬|| পরিশুষ্কং প্রদিগ্ধং চ শূল্যং যচ্চান্যদীদৃশম্ | মাংসং যত্তৈলসিদ্ধং তদ্বীর্যোষ্ণং পিত্তকৃদ্গুরু ||৩৫৭|| লঘ্বগ্নিদীপনং হৃদ্যং রুচ্যং দৃষ্টিপ্রসাদনম্ | অনুষ্ণবীর্যং পিত্তঘ্নং মনোজ্ঞং ঘৃতসাধিতম্ ||৩৫৮||

Adhikarana 258 (359-360) · Śloka 361

প্রীণনঃ প্রাণজননঃ শ্বাসকাসক্ষযাপহঃ | বাতপিত্তশ্রমহরো হৃদ্যো মাংসরসঃ স্মৃতঃ ||৩৫৯|| স্মৃত্যোজঃস্বরহীনানাং জ্বরক্ষীণক্ষতোরসাম্ | ভগ্নবিশ্লিষ্টসন্ধীনাং কৃশানামল্পরেতসাম্ ||৩৬০|| আপ্যাযনঃ সংহননঃ শুক্রদো বলবর্ধনঃ |৩৬১|

Adhikarana 259 (361) · Śloka 361

স দাডিমযুতো বৃষ্যঃ সংস্কৃতো দোষনাশনঃ ||৩৬১||

Adhikarana 260 (362) · Śloka 362

প্রীণনঃ সর্বভূতানাং বিশেষান্মুখশোষিণাম্ | ক্ষুত্তৃষ্ণাপহরঃ শ্রেষ্ঠঃ সৌরাবঃ স্বাদুশীতলঃ ||৩৬২||

Adhikarana 260 (363) · Śloka 363

যন্মাংসমুদ্ধৃতরসং ন তত্ পুষ্টিবলাবহম্ | বিষ্টম্ভি দুর্জরং রূক্ষং বিরসং মারুতাবহম্ ||৩৬৩||

Adhikarana 262 (364) · Śloka 364

দীপ্তাগ্নীনাং সদা পথ্যঃ খানিষ্কস্তু পরং গুরুঃ |৩৬৪|

Adhikarana 263 (364-365) · Śloka 366

মাংসং নিরস্থি সুস্বিন্নং পুনর্দৃষদি পেষিতম্ ||৩৬৪|| পিপ্পলীশুণ্ঠিমরিচগুডসর্পিঃসমন্বিতম্ | ঐকধ্যং পাচযেত্ সম্যগ্বেসবার ইতি স্মৃতঃ ||৩৬৫|| বেসবারো গুরুঃ স্নিগ্ধো বল্যো বাতরুজাপহঃ |৩৬৬|

Adhikarana 264 (366) · Śloka 367

কফঘ্নো দীপনো হৃদ্যঃ শুদ্ধানাং ব্রণিনামপি ||৩৬৬|| জ্ঞেযঃ পথ্যতমশ্চৈব মুদ্গযূষঃ কৃতাকৃতঃ |৩৬৭|

Adhikarana 265 (367) · Śloka 368

স তু দাডিমমৃদ্বীকাযুক্তঃ স্যাদ্রাগষাডবঃ ||৩৬৭|| রুচিষ্যো লঘুপাকশ্চ দোষাণাং চাবিরোধকৃত্ |৩৬৮|

Adhikarana 266 (368) · Śloka 369

মসূরমুদ্গগোধূমকুলত্থলবণৈঃ কৃতঃ ||৩৬৮|| কফপিত্তাবিরোধী স্যাদ্বাতব্যাধৌ চ শস্যতে |৩৬৯|

Adhikarana 267 (369) · Śloka 370

মৃদ্বীকাদাডিমৈর্যুক্তঃ স চাপ্যুক্তোঽনিলার্দিতে ||৩৬৯|| রোচনো দীপনো হৃদ্যো লঘুপাক্যুপদিশ্যতে |৩৭০|

Adhikarana 268 (370) · Śloka 371

পটোলনিম্বযূষৌ তু কফমেদোবিশোষিণৌ ||৩৭০|| পিত্তঘ্নৌ দীপনৌ হৃদ্যৌ কৃমিকুষ্ঠজ্বরাপহৌ |৩৭১|

Adhikarana 269 (371-372) · Śloka 373

শ্বাসকাসপ্রতিশ্যাযপ্রসেকারোচকজ্বরান্ ||৩৭১|| হন্তি মূলকযূষস্তু কফমেদোগলগ্রহান্ | কুলত্থযূষোঽনিলহা শ্বাসপীনসনাশনঃ ||৩৭২|| তূণীপ্রতূণীকাসাশ্মগুল্মমেদঃকফাবহঃ |৩৭৩|

Adhikarana 270 (373) · Śloka 374

দাডিমামলকৈর্যূষো হৃদ্যঃ সংশমনো লঘুঃ ||৩৭৩|| প্রাণাগ্নিজননো মূর্চ্ছামেদোঘ্নো বাতপিত্তজিত্ |৩৭৪|

Adhikarana 271 (374) · Śloka 374

মুদ্গামলকযূষস্তু গ্রাহী পিত্তকফে হিতঃ ||৩৭৪||

Adhikarana 272 (375) · Śloka 375

যবকোলকুলত্থানাং যূষঃ কণ্ঠ্যোঽনিলাপহঃ |৩৭৫|

Adhikarana 273 (375) · Śloka 375

সর্বধান্যকৃতস্তদ্বদ্বৃংহণঃ প্রাণবর্ধনঃ ||৩৭৫||

Adhikarana 274 (376) · Śloka 376

খডকাম্বলিকৌ হৃদ্যৌ তথা বাতকফে হিতৌ |৩৭৬|

Adhikarana 275 (376-377) · Śloka 377

বল্যঃ কফানিলৌ হন্তি দাডিমাম্লোঽগ্নিদীপনঃ ||৩৭৬|| দধ্যম্লঃ কফকৃদ্বল্যঃ স্নিগ্ধো বাতহরো গুরুঃ | তক্রাম্লঃ পিত্তকৃত্ প্রোক্তো বিষরক্তপ্রদূষণঃ ||৩৭৭||

Adhikarana 276 (378) · Śloka 378

খডাঃ খডযবাগ্বশ্চ ষা(খা)ডবাঃ পানকানি চ | এবমাদীনি চান্যানি ক্রিযন্তে বৈদ্যবাক্যতঃ ||৩৭৮||

Adhikarana 277 (379) · Śloka 379

অস্নেহলবণং সর্বমকৃতং কটুকৈর্বিনা | বিজ্ঞেযং লবণস্নেহকটুকৈঃ সংযুতং কৃতম্ ||৩৭৯||

Adhikarana 278 (380) · Śloka 380

অথ গোরসধান্যাম্লফলাম্লৈরম্লিতং চ যত্ | যথোত্তরং লঘু হিতং সংস্কৃতাসংস্কৃতং রসম্ ||৩৮০||

Adhikarana 279 (381) · Śloka 381

দধিমস্ত্বম্লসিদ্ধস্তু যূষঃ কাম্বলিকঃ স্মৃতঃ |৩৮১|

Adhikarana 280 (381) · Śloka 382

তিলপিণ্যাকবিকৃতিঃ শুষ্কশাকং বিরূঢকম্ ||৩৮১|| সিণ্ডাকী চ গুরূণি স্যুঃ কফপিত্তকরাণি চ |৩৮২|

Adhikarana 281 (382) · Śloka 382

তদ্বচ্চ বটকান্যাহুর্বিদাহীনি গুরূণি চ ||৩৮২||

Adhikarana 282 (383) · Śloka 383

লঘবো বৃংহণা বৃষ্যা হৃদ্যা রোচনদীপনাঃ | তৃষ্ণামূর্চ্ছাভ্রমচ্ছর্দিশ্রমঘ্না রাগষাডবাঃ ||৩৮৩||

Adhikarana 282 (384) · Śloka 384

রসালা বৃংহণী বল্যা স্নিগ্ধা বৃষ্যা চ রোচনী |৩৮৪|

Adhikarana 283 (384) · Śloka 384

স্নেহনং গুডসংযুক্তং হৃদ্যং দধ্যনিলাপহম্ ||৩৮৪||

Adhikarana 284 (385-387) · Śloka 388

সক্তবঃ সর্পিষাঽভ্যক্তাঃ শীতবারিপরিপ্লুতাঃ | নাতিদ্রবা নাতিসান্দ্রা মন্থ ইত্যুপদিশ্যতে ||৩৮৫|| মন্থঃ সদ্যোবলকরঃ পিপাসাশ্রমনাশনঃ | সাম্লস্নেহগুডো মূত্রকৃচ্ছ্রোদাবর্তনাশনঃ ||৩৮৬|| শর্করেক্ষুরসদ্রাক্ষাযুক্তঃ পিত্তবিকারনুত্ | দ্রাক্ষামধূদকযুতঃ কফরোগনিবর্হণঃ ||৩৮৭|| বর্গত্রযেণোপহিতো মলদোষানুলোমনঃ |৩৮৮|

Adhikarana 285 (388-391) · Śloka 391

গৌডমম্লমনম্লং বা পানকং গুরু মূত্রলম্ ||৩৮৮|| তদেব খণ্ডমৃদ্বীকাশর্করাসহিতং পুনঃ | সাম্লং সতীক্ষ্ণং সহিমং পানকং স্যান্নিরত্যযম্ ||৩৮৯|| মার্দ্বীকং তু শ্রমহরং মূর্চ্ছাদাহতৃষাপহম্ | পরূষকাণাং কোলানাং হৃদ্যং বিষ্টম্ভি পানকম্ ||৩৯০|| দ্রব্যসংযোগসংস্কারং জ্ঞাত্বা মাত্রাং চ সর্বতঃ | পানকানাং যথাযোগং গুরুলাঘবমাদিশেত্ ||৩৯১|| ইতি কৃতান্নবর্গঃ |

Adhikarana 286 (392) · Śloka 392

অথ ভক্ষ্যবর্গঃ | বক্ষ্যাম্যতঃ পরং ভক্ষ্যান্ রসবীর্যবিপাকতঃ |৩৯২|

Adhikarana 287 (392) · Śloka 393

ভক্ষ্যাঃ ক্ষীরকৃতা বল্যা বৃষ্যা হৃদ্যাঃ সুগন্ধিনঃ ||৩৯২|| অদাহিনঃ পুষ্টিকরা দীপনাঃ পিত্তনাশনাঃ |৩৯৩|

Adhikarana 288 (393) · Śloka 394

তেষাং প্রাণকরা হৃদ্যা ঘৃতপূরাঃ কফাবহাঃ ||৩৯৩|| বাতপিত্তহরা বৃষ্যা গুরবো রক্তমাংসলাঃ |৩৯৪|

Adhikarana 289 (394) · Śloka 395

বৃংহণা গৌডিকা ভক্ষ্যা গুরবোঽনিলনাশনাঃ ||৩৯৪|| অদাহিনঃ পিত্তহরাঃ শুক্রলাঃ কফবর্ধনাঃ |৩৯৫|

Adhikarana 290 (395) · Śloka 396

মধুশীর্ষকসংযাবাঃ পূপা যে তে বিশেষতঃ ||৩৯৫|| গুরবো বৃংহণাশ্চৈব মোদকাস্তু সুদুর্জরাঃ |৩৯৬|

Adhikarana 291 (396) · Śloka 397

রোচনো দীপনঃ স্বর্যঃ পিত্তঘ্নঃ পবনাপহঃ ||৩৯৬|| গুরুর্মৃষ্টতরমশ্চৈব সট্টকঃ প্রাণবর্ধনঃ |৩৯৭|

Adhikarana 292 (397) · Śloka 398

হৃদ্যঃ সুগন্ধির্মধুরঃ স্নিগ্ধঃ কফকরো গুরুঃ ||৩৯৭|| বাতাপহস্তৃপ্তিকরো বল্যো বিষ্যন্দ উচ্যতে |৩৯৮|

Adhikarana 293 (398) · Śloka 399

বৃংহণা বাতপিত্তঘ্না ভক্ষ্যা বল্যাস্তু সামিতাঃ ||৩৯৮|| হৃদ্যাঃ পথ্যতমাস্তেষাং লঘবঃ ফেনকাদযঃ |৩৯৯|

Adhikarana 294 (399) · Śloka 400

মুদ্গাদিবেসবারাণাং পূর্ণা বিষ্টম্ভিনো মতাঃ ||৩৯৯|| বেসবারৈঃ সপিশিতৈঃ সম্পূর্ণা গুরুবৃংহণাঃ |৪০০|

Adhikarana 295 (400) · Śloka 400

পাললাঃ শ্লেষ্মজননাঃ, শষ্কুল্যঃ কফপিত্তলাঃ ||৪০০||

Adhikarana 296 (401) · Śloka 401

বীর্যোষ্ণাঃ পৈষ্টিকা ভক্ষ্যাঃ কফপিত্তপ্রকোপণাঃ | বিদাহিনো নাতিবলা গুরবশ্চ বিশেষতঃ ||৪০১||

Adhikarana 297 (402) · Śloka 403

বৈদলা লঘবো ভক্ষ্যাঃ কষাযাঃ সৃষ্টমারুতাঃ | বিষ্টম্ভিনঃ পিত্তসমাঃ শ্লেষ্মঘ্না ভিন্নবর্চসঃ ||৪০২|| বল্যা বৃষ্যাস্তু গুরবো বিজ্ঞেযা মাষসাধিতাঃ |৪০৩|

Adhikarana 298 (403) · Śloka 403

কূর্চিকাবিকৃতা ভক্ষ্যা গুরবো নাতিপিত্তলাঃ ||৪০৩||

Adhikarana 299 (404) · Śloka 404

বিরূঢককৃতা ভক্ষ্যা গুরবোঽনিলপিত্তলাঃ | বিদাহোত্ক্লেশজননা রূক্ষা দৃষ্টিপ্রদূষণাঃ ||৪০৪||

Adhikarana 300 (405-406) · Śloka 406

হৃদ্যাঃ সুগন্ধিনো ভক্ষ্যা লঘবো ঘৃতপাচিতাঃ | বাতপিত্তহরা বল্যা বর্ণদৃষ্টিপ্রসাদনাঃ ||৪০৫|| বিদাহিনস্তৈলকৃতা গুরবঃ কটুপাকিনঃ | উষ্ণা মারুতদৃষ্টিঘ্নাঃ পিত্তলাস্ত্বক্প্রদূষণাঃ ||৪০৬||

Adhikarana 301 (407) · Śloka 407

ফলমাংসেক্ষুবিকৃতিতিলমাষোপসংস্কৃতাঃ | ভক্ষ্যা বল্যাশ্চ গুরবো বৃংহণা হৃদযপ্রিযাঃ ||৪০৭||

Adhikarana 302 (408) · Śloka 408

কপালাঙ্গারপক্বাস্তু লঘবো বাতকোপনাঃ | সুপক্বাস্তনবশ্চৈব ভূযিষ্ঠং লঘবো মতাঃ ||৪০৮||

Adhikarana 303 (409) · Śloka 409

সকিলাটাদযো ভক্ষ্যা গুরবঃ কফবর্ধনাঃ |৪০৯|

Adhikarana 304 (409) · Śloka 409

কুল্মাষা বাতলা রূক্ষা গুরবো ভিন্নবর্চসঃ ||৪০৯||

Adhikarana 305 (410) · Śloka 410

উদাবর্তহরো বাট্যঃ কাসপীনসমেহনুত্ |৪১০|

Adhikarana 306 (410) · Śloka 410

ধানোলুম্বাস্তু লঘবঃ কফমেদোবিশোষণাঃ ||৪১০||

Adhikarana 307 (411-412) · Śloka 412

শক্তবো বৃংহণা বৃষ্যাস্তৃষ্ণাপিত্তকফাপহাঃ | পীতাঃ সদ্যোবলকরা ভেদিনঃ পবনাপহাঃ ||৪১১|| গুর্বী পিণ্ডী খরাঽত্যর্থং লঘ্বী সৈব বিপর্যযাত্ | শক্তূনামাশু জীর্যেত মৃদুত্বাদবলেহিকা ||৪১২||

Adhikarana 308 (413) · Śloka 413

লাজাশ্ছর্দ্যতিসারঘ্না দীপনাঃ কফনাশনাঃ | বল্যাঃ কষাযমধুরা লঘবস্তৃণ্মলাপহাঃ ||৪১৩||

Adhikarana 309 (414) · Śloka 414

তৃট্ছর্দিদাহঘর্মার্তিনুদস্তত্সক্তবো মতাঃ | রক্তপিত্তহরাশ্চৈব দাহজ্বরবিনাশনাঃ ||৪১৪||

Adhikarana 310 (415) · Śloka 415

পৃথুকা গুরবঃ স্নিগ্ধা বৃংহণাঃ কফবর্ধনাঃ | বল্যাঃ সক্ষীরভাবাত্তু বাতঘ্না ভিন্নবর্চসঃ ||৪১৫||

Adhikarana 311 (416) · Śloka 416

সন্ধানকৃত্পিষ্টমামং তণ্ডুলং কৃমিমেহনুত্ |৪১৬|

Adhikarana 312 (416) · Śloka 417

সুদুর্জরঃ স্বাদুরসো বৃংহণস্তণ্ডুলো নবঃ ||৪১৬|| সন্ধানকৃন্মেহহরঃ পুরাণস্তণ্ডুলঃ স্মৃতঃ |৪১৭|

Adhikarana 313 (417-418) · Śloka 418

দ্রব্যসংযোগসংস্কারবিকারান্ সমবেক্ষ্য চ ||৪১৭|| যথাকারণমাসাদ্য ভোক্তৄণাং ছন্দতোঽপি বা | অনেকদ্রব্যযোনিত্বাচ্ছাস্ত্রতস্তান্ বিনির্দিশেত্ ||৪১৮|| ইতি ভক্ষ্যবর্গঃ |

Adhikarana 314 (419) · Śloka 419

অতঃ সর্বানুপানান্যুপদেক্ষ্যামঃ | - অম্লেন কেচিদ্বিহতা মনুষ্যা মাধুর্যযোগে প্রণযীভবন্তি | তথাম্লযোগে মধুরেণ তৃপ্তাস্তেষাং যথেষ্টং প্রবদন্তি পথ্যম্ ||৪১৯||

Adhikarana 315 (420-421) · Śloka 422

শীতোষ্ণতোযাসবমদ্যযূষফলাম্লধান্যাম্লপযোরসানাম্ | যস্যানুপানং তু হিতং ভবেদ্যত্তস্মৈ প্রদেযং ত্বিহ মাত্রযা তত্ ||৪২০|| ব্যাধিং চ কালং চ বিভাব্য ধীরৈর্দ্রব্যাণি ভোজ্যানি চ তানি তানি | সর্বানুপানেষু বরং বদন্তি মৈধ্যং যদম্ভঃ শুচিভাজনস্থম্ ||৪২১|| লোকস্য জন্মপ্রভৃতি প্রশস্তং তোযাত্মকাঃ সর্বরসাশ্চ দৃষ্টাঃ | সঙ্ক্ষেপ এষোঽভিহিতোঽনুপানে... |৪২২|

Adhikarana 316 (422-431) · Śloka 431

... ষ্বতঃ পরং বিস্তরতোঽভিধাস্যে ||৪২২|| উষ্ণোদকানুপানং তু স্নেহানামথ শস্যতে | ঋতে ভল্লাতকস্নেহাত্ স্নেহাত্তৌবরকাত্তথা ||৪২৩|| অনুপানং বদন্ত্যেকে তৈলে যূষাম্লকাঞ্জিকম্ | শীতোদকং মাক্ষিকস্য পিষ্টান্নস্য চ সর্বশঃ ||৪২৪|| দধিপাযসমদ্যার্তিবিষজুষ্টে তথৈব চ | কেচিত্ পিষ্টমযস্যাহুরনুপানং সুখোদকম্ ||৪২৫|| পযো মাংসরসো বাঽপি শালিমুদ্গাদিভোজিনাম্ | যুদ্ধাধ্বাতপসন্তাপবিষমদ্যরুজাসু চ ||৪২৬|| মাষাদেরনুপানং তু ধান্যাম্লং দধিমস্তু বা | মদ্যং মদ্যোচিতানাং তু সর্বমাংসেষু পূজিতম্ ||৪২৭|| অমদ্যপানামুদকং ফলাম্লং বা প্রশস্যতে | ক্ষীরং ঘর্মাধ্বভাষ্যস্ত্রীক্লান্তানামমৃতোপমম্ ||৪২৮|| সুরা কৃশানাং স্থূলানামনুপানং মধূদকম্ | নিরামযানাং চিত্রং তু ভুক্তমধ্যে প্রকীর্তিতম্ ||৪২৯|| স্নিগ্ধোষ্ণং মারুতে পথ্যং, কফে রূক্ষোষ্ণমিষ্যতে | অনুপানং হিতং চাপি পিত্তে মধুরশীতলম্ ||৪৩০|| হিতং শোণিতপিত্তিভ্যঃ ক্ষীরমিক্ষুরসস্তথা | অর্কশেলুশিরীষাণামাসবাস্তু বিষার্তিষু ||৪৩১||

Adhikarana 317 (432-433) · Śloka 433

অতঃ পরং তু বর্গাণামনুপানং পৃথক্ পৃথক্ | প্রবক্ষ্যাম্যনুপূর্বেণ সর্বেষামেব মে শৃণু ||৪৩২|| তত্র পূর্বশস্যজাতানাং বদরাম্লং, বৈদলানাং ধান্যাম্লং, জঙ্ঘালানাং ধন্বজানাং চ পিপ্পল্যাসবঃ, বিষ্কিরাণাং কোলবদরাসবঃ, প্রতুদানাং ক্ষীরবৃক্ষাসবঃ, গুহাশযানাং খর্জূরনালিকেরাসবঃ, প্রসহানামশ্বগন্ধাসবঃ, পর্ণমৃগাণাং কৃষ্ণগন্ধাসবঃ, বিলেশযানাং ফলাসবঃ , একশফানাং ত্রিফলাসবঃ, অনেকশফানাং খদিরাসবঃ, কূলচরাণাং শৃঙ্গাটককশেরুকাসবঃ, কোশবাসিনাং পাদিনাং চ স এব, প্লবানামিক্ষুরসাসবঃ, নাদেযানাং মত্স্যানাং মৃণালাসবঃ, সামুদ্রাণাং মাতুলুঙ্গাসবঃ, অম্লানাং ফলানাং পদ্মোত্পলকন্দাসবঃ, কষাযাণাং দাডিমবেত্রাসবঃ, মধুরাণাং ত্রিকটুকযুক্তঃ খণ্ডাসবঃ, তালফলাদীনাং ধান্যাম্লং, কটুকানাং দূর্বানলবেত্রাসবঃ, পিপ্পল্যাদীনাং শ্বদংষ্ট্রাবসুকাসবঃ, কূষ্মাণ্ডাদীনাং দার্বীকরীরাসবঃ, চুচ্চুপ্রভৃতীনাং লোধ্রাসবঃ, জীবন্ত্যাদীনাং ত্রিফলাসবঃ, কুসুম্ভশাকস্য স এব, মণ্ডূকপর্ণ্যাদীনাং মহাপঞ্চমূলাসবঃ, তালমস্তকাদীনামম্লফলাসবঃ, সৈন্ধবাদীনাং সুরাসব আরনালং চ, তোযং বা সর্বত্রেতি ||৪৩৩||

Adhikarana 318 (434) · Śloka 434

ভবন্তি চাত্র- সর্বেষামনুপানানাং মাহেন্দ্রং তোযমুত্তমম্ |৪৩৪|

Adhikarana 319 (434) · Śloka 434

সাত্ম্যং বা যস্য যত্তোযং তত্তস্মৈ হিতমুচ্যতে ||৪৩৪||

Adhikarana 320 (435) · Śloka 435

উষ্ণং বাতে কফে তোযং পিত্তে রক্তে চ শীতলম্ |৪৩৫|

Adhikarana 321 (435-437) · Śloka 438

দোষবদ্গুরু বা ভুক্তমতিমাত্রমথাপি বা ||৪৩৫|| যথোক্তেনানুপানেন সুখমন্নং প্রজীর্যতি | রোচনং বৃংহণং বৃষ্যং দোষসঙ্ঘাতভেদনম্ ||৪৩৬|| তর্পণং মার্দবকরং শ্রমক্লমহরং সুখম্ | দীপনং দোষশমনং পিপাসাচ্ছেদনং পরম্ ||৪৩৭|| বল্যং বর্ণকরং সম্যগনুপানং সদোচ্যতে |৪৩৮|

Adhikarana 322 (438) · Śloka 439

তদাদৌ কর্শযেত্পীতং স্থাপযেন্মধ্যসেবিতম্ ||৪৩৮|| পশ্চাত্পীতং বৃংহযতি তস্মাদ্বীক্ষ্য প্রযোজযেত্ |৪৩৯|

Adhikarana 323 (439) · Śloka 440

স্থিরতাং গতমল্কিন্নমন্নমদ্রবপাযিনাম্ ||৪৩৯|| ভবত্যাবাধজননমনুপানমতঃ পিবেত্ |৪৪০|

Adhikarana 324 (440) · Śloka 441

ন পিবেচ্ছ্বাসকাসার্তো রোগে চাপ্যূর্ধ্বজত্রুগে ||৪৪০|| ক্ষতোরস্কঃ প্রসেকী চ যস্য চোপহতঃ স্বরঃ |৪৪১|

Adhikarana 325 (441-442) · Śloka 442

পীত্বাঽধ্বভাষ্যাধ্যযনগেযস্বপ্নান্ন শীলযেত্ ||৪৪১|| প্রদূষ্যামাশযং তদ্ধি তস্য কণ্ঠোরসি স্থিতম্ | স্যন্দাগ্নিসাদচ্ছর্দ্যাদীনামযাঞ্জনযেদ্বহূন্ ||৪৪২||

Adhikarana 326 (443) · Śloka 443

গুরুলাঘবচিন্তেযং স্বভাবং নাতিবর্ততে | তথা সংস্কারমাত্রান্নকালাংশ্চাপ্যুত্তরোত্তরম্ ||৪৪৩||

Adhikarana 327 (444) · Śloka 444

মন্দকর্মানলারোগ্যাঃ সুকুমারাঃ সুখোচিতাঃ | জন্তবো যে তু তেষাং হি চিন্তেযং পরিকীর্ত্যতে ||৪৪৪||

Adhikarana 328 (445) · Śloka 445

বলিনঃ খরভক্ষ্যা যে যে চ দীপ্তাগ্নযো নরাঃ | কর্মনিত্যাশ্চ যে তেষাং নাবশ্যং পরিকীর্ত্যতে ||৪৪৫|| ইত্যনুপানবর্গঃ |

Adhikarana 329 (446) · Śloka 446

অথাহারবিধিং বত্স! বিস্তরেণাখিলং শৃণু |৪৪৬|

Adhikarana 330 (446) · Śloka 446

আপ্তাস্থিতমসঙ্কীর্ণং শুচি কার্যং মহানসম্ ||৪৪৬||

Adhikarana 331 (447) · Śloka 447

তত্রাপ্তৈর্গুণসম্পন্নং ভক্ষ্যমন্নং সুসংস্কৃতম্ | শুচৌ দেশে সুসঙ্গুপ্তং সমুপস্থাপযেদ্ভিষক্ ||৪৪৭||

Adhikarana 332 (448) · Śloka 448

বিষঘ্নৈরগদৈঃ স্পৃষ্টং প্রোক্ষিতং ব্যজনোদকৈঃ | সিদ্ধৈর্মন্ত্রৈর্হতবিষং সিদ্ধমন্নং নিবেদযেত্ ||৪৪৮||

Adhikarana 333 (449-457) · Śloka 457

বক্ষ্যাম্যতঃ পরং কৃত্স্নামাহারস্যোপকল্পনাম্ | ঘৃতং কার্ষ্ণাযসে দেযং, পেযা দেযা তু রাজতে ||৪৪৯|| ফলানি সর্বভক্ষ্যাংশ্চ প্রদদ্যাদ্বৈ দলেষু তু | পরিশুষ্কপ্রদিগ্ধানি সৌবর্ণেষু প্রকল্পযেত্ ||৪৫০|| প্রদ্রবাণি রসাংশ্চৈবং রাজতেষূপহারযেত্ | কট্বরাণি খডাংশ্চৈব সর্বাঞ্ছৈলেষু দাপযেত্ ||৪৫১|| দদ্যাত্তাম্রমযে পাত্রে সুশীতং সুশৃতং পযঃ | পানীযং, পানকং মদ্যং মৃন্মযেষু প্রদাপযেত্ ||৪৫২|| কাচস্ফটিকপাত্রেষু শীতলেষু শুভেষু চ | দদ্যাদ্বৈদূর্যচিত্রেষু রাগষাডবসট্টকান্ ||৪৫৩|| পুরস্তাদ্বিমলে পাত্রে সুবিস্তীর্ণে মনোরমে | সূদঃ সূপৌদনং দদ্যাত্ প্রদেহাংশ্চ সুসংস্কৃতান্ ||৪৫৪|| ফলানি সর্বভক্ষ্যাংশ্চ পরিশুষ্কাণি যানি চ | তানি দক্ষিণপার্শ্বে তু ভুঞ্জানস্যোপকল্পযেত্ ||৪৫৫|| প্রদ্রবাণি রসাংশ্চৈব পানীযং পানকং পযঃ | খডান্ যূষাংশ্চ পেযাংশ্চ সব্যে পার্শ্বে প্রদাপযেত্ ||৪৫৬|| সর্বান্ গুডবিকারাংশ্চ রাগষাডবসট্টকান্ | পুরস্তাত্ স্থাপযেত্ প্রাজ্ঞো দ্বযোরপি চ মধ্যতঃ ||৪৫৭||

Adhikarana 334 (458) · Śloka 459

এবং বিজ্ঞায মতিমান্ ভোজনস্যোপকল্পনাম্ | ভোক্তারং বিজনে রম্যে নিঃসম্পাতে শুভে শুচৌ ||৪৫৮|| সুগন্ধপুষ্পরচিতে সমে দেশে চ ভোজযেত্ |৪৫৯|

Adhikarana 335 (459) · Śloka 460

বিশিষ্টমিষ্টসংস্কারৈঃ পথ্যৈরিষ্টৈ রসাদিভিঃ ||৪৫৯|| মনোজ্ঞং শুচি নাত্যুষ্ণং প্রত্যগ্রমশনং হিতম্ |৪৬০|

Adhikarana 336 (460-464) · Śloka 464

পূর্বং মধুরমশ্নীযান্মধ্যেঽম্ললবণৌ রসৌ ||৪৬০|| পশ্চাচ্ছেষান্ রসান্ বৈদ্যো ভোজনেষ্ববচারযেত্ | আদৌ ফলানি ভুঞ্জীত দাডিমাদীনি বুদ্ধিমান্ ||৪৬১|| ততঃ পেযাংস্ততো ভোজ্যান্ ভক্ষ্যাংশ্চিত্রাংস্ততঃ পরম্ | ঘনং পূর্বং সমশ্নীযাত্, কেচিদাহুর্বিপর্যযম্ ||৪৬২|| আদাবন্তে চ মধ্যে চ ভোজনস্য তু শস্যতে | নিরত্যযং দোষহরং ফলেষ্বামলকং নৃণাম্ ||৪৬৩|| মৃণালবিসশালূককন্দেক্ষুপ্রভৃতীনি চ | পূর্বং যোজ্যানি ভিষজা ন তু ভুক্তে কদাচন ||৪৬৪||

Adhikarana 337 (465) · Śloka 466

সুখমুচ্চৈঃ সমাসীনঃ সমদেহোঽন্নতত্পরঃ | কালে সাত্ম্যং লঘু স্নিগ্ধমুষ্ণং ক্ষিপ্রং দ্রবোত্তরম্ ||৪৬৫|| বুভুক্ষিতোঽন্নমশ্নীযান্মাত্রাবদ্বিদিতাগমঃ |৪৬৬|

Adhikarana 338 (466-467) · Śloka 468

কালে প্রীণযতে ভুক্তং সাত্ম্যমন্নং ন বাধতে ||৪৬৬|| লঘু শীঘ্রং ব্রজেত্ পাকং স্নিগ্ধোষ্ণং বলবহ্নিদম্ | ক্ষিপ্রং ভুক্তং সমং পাকং যাত্যদোষং দ্রবোত্তরম্ ||৪৬৭|| সুখং জীর্যতি মাত্রাবদ্ধাতুসাম্যং করোতি চ |৪৬৮|

Adhikarana 339 (468-470) · Śloka 471

অতীবাযতযামাস্তু ক্ষপা যেষ্বৃতুষু স্মৃতাঃ ||৪৬৮|| তেষু তত্প্রত্যনীকাঢ্যং ভুঞ্জীত প্রাতরেব তু | যেষু চাপি ভবেযুশ্চ দিবসা ভৃশমাযতাঃ ||৪৬৯|| তেষু তত্কালবিহিতমপরাহ্ণে প্রশস্যতে | রজন্যো দিবসাশ্চৈব যেষু চাপি সমাঃ স্মৃতাঃ ||৪৭০|| কৃত্বা সমমহোরাত্রং তেষু ভুঞ্জীত ভোজনম্ |৪৭১|

Adhikarana 340 (471-474) · Śloka 474

নাপ্রাপ্তাতীতকালং বা হীনাধিকমথাপি বা ||৪৭১|| অপ্রাপ্তকালং ভুঞ্জানঃ শরীরে হ্যলঘৌ নরঃ | তাংস্তান্ ব্যাধীনবাপ্নোতি মরণং বা নিযচ্ছতি ||৪৭২|| অতীতকালং ভুঞ্জানো বাযুনোপহতেঽনলে | কৃচ্ছ্রাদ্বিপচ্যতে ভুক্তং দ্বিতীযং চ ন কাঙ্ক্ষতি ||৪৭৩|| হীনমাত্রমসন্তোষং করোতি চ বলক্ষযম্ | আলস্যগৌরবাটোপসাদাংশ্চ কুরুতেঽধিকম্ ||৪৭৪||

Adhikarana 341 (475) · Śloka 476

তস্মাত্ সুসংস্কৃতং যুক্ত্যা দোষৈরেতৈর্বিবর্জিতম্ | যথোক্তগুণসম্পন্নমুপসেবেত ভোজনম্ ||৪৭৫|| বিভজ্য দোষকালাদীন্ কালযোরুভযোরপি |৪৭৬|

Adhikarana 342 (476-477) · Śloka 478

অচোক্ষং দুষ্টমুত্সৃষ্টং পাষাণতৃণলোষ্টবত্ ||৪৭৬|| দ্বিষ্টং ব্যুষিতমস্বাদু পূতি চান্নং বিবর্জযেত্ | চিরসিদ্ধং স্থিরং শীতমন্নমুষ্ণীকৃতং পুনঃ ||৪৭৭|| অশান্তমুপদগ্ধং চ তথা স্বাদু ন লক্ষ্যতে |৪৭৮|

Adhikarana 343 (478) · Śloka 478

যদ্যত্ স্বাদুতরং তত্তদ্বিদধ্যাদুত্তরোত্তরম্ ||৪৭৮||

Adhikarana 344 (479-480) · Śloka 480

প্রক্ষালযেদদ্ভিরাস্যং ভুঞ্জানস্য মুহুর্মুহুঃ | বিশুদ্ধে রসনে তস্য রোচতেঽন্নমপূর্ববত্ ||৪৭৯|| স্বাদুনা তস্য রসনং প্রথমেনাতিতর্পিতম্ | ন তথা স্বাদযেদন্যত্তস্মাত্ প্রক্ষাল্যমন্তরা ||৪৮০||

Adhikarana 345 (481) · Śloka 481

সৌমনস্যং বলং পুষ্টিমুত্সাহং হর্ষণং সুখম্ | স্বাদু সঞ্জনযত্যন্নমস্বাদু চ বিপর্যযম্ ||৪৮১||

Adhikarana 346 (482) · Śloka 482

ভুক্ত্বাঽপি যত্ প্রার্থযতে ভূযস্তত্ স্বাদু ভোজনম্ |৪৮২|

Adhikarana 347 (482) · Śloka 482

অশিতশ্চোদকং যুক্ত্যা ভুঞ্জানশ্চান্তরা পিবেত্ ||৪৮২||

Adhikarana 348 (483) · Śloka 483

দন্তান্তরগতং চান্নং শোধনেনাহরেচ্ছনৈঃ | কুর্যাদনির্হৃতং তদ্ধি মুখস্যানিষ্টগন্ধতাম্ ||৪৮৩||

Adhikarana 349 (484) · Śloka 484

জীর্ণেঽন্নে বর্ধতে বাযুর্বিদগ্ধে পিত্তমেব তু | ভুক্তমাত্রে কফশ্চাপি,... |৪৮৪|

Adhikarana 350 (484-486) · Śloka 486

... তস্মাদ্ভুক্তেরিতং কফম্ ||৪৮৪|| ধূমেনাপোহ্য হৃদ্যৈর্বা কষাযকটুতিক্তকৈঃ | পূগকঙ্কোলকর্পূরলবঙ্গসুমনঃফলৈঃ ||৪৮৫|| ফলৈঃ কটুকষাযৈর্বা মুখবৈশদ্যকারকৈঃ | তাম্বূলপত্রসহিতৈঃ সুগন্ধৈর্বা বিচক্ষণঃ ||৪৮৬||

Adhikarana 351 (487) · Śloka 487

ভুক্ত্বা রাজবদাসীত যাবদন্নক্লমো গতঃ | ততঃ পাদশতং গত্বা বামপার্শ্বেন সংবিশেত্ ||৪৮৭||

Adhikarana 352 (488) · Śloka 488

শব্দান্রূপান্রসান্ গন্ধান্ স্পর্শাংশ্চ মনসঃ প্রিযান্ | ভুক্তবানুপসেবেত তেনান্নং সাধু তিষ্ঠতি ||৪৮৮||

Adhikarana 353 (489) · Śloka 489

শব্দরূপরসা গন্ধাঃ স্পর্শাশ্চাপি জুগুপ্সিতাঃ | অশুচ্যন্নং তথা ভুক্তমতিহাস্যং চ বামযেত্ ||৪৮৯||

Adhikarana 354 (490-491) · Śloka 491

শযনং চাসনং বাঽপি নেচ্ছেদ্বাঽপি দ্রবোত্তরম্ | নাগ্ন্যাতপৌ ন প্লবনং ন যানং নাপি বাহনম্ ||৪৯০|| ন চৈকরসসেবাযাং প্রসজ্যেত কদাচন | শাকাবরান্নভূযিষ্ঠমম্লং চ ন সমাচরেত্ ||৪৯১||

Adhikarana 355 (492) · Śloka 492

একৈকশঃ সমস্তান্ বা নাধ্যশ্নীযাদ্রসান্ সদা |৪৯২|

Adhikarana 356 (492) · Śloka 493

প্রাগ্ভুক্তে ত্ববিবিক্তেঽগ্নৌ দ্বিরন্নং ন সমাচরেত্ ||৪৯২|| পূর্বভুক্তে বিদগ্ধেঽন্নে ভুঞ্জানো হন্তি পাবকম্ |৪৯৩|

Adhikarana 357 (493) · Śloka 493

মাত্রাগুরুং পরিহরেদাহারং দ্রব্যতশ্চ যঃ ||৪৯৩||

Adhikarana 358 (494) · Śloka 494

পিষ্টান্নং নৈব ভুঞ্জীত মাত্রযা বা বুভুক্ষিতঃ | দ্বিগুণং চ পিবেত্তোযং সুখং সম্যক্ প্রজীর্যতি |৪৯৪|

Adhikarana 359 (494) · Śloka 494

পেযলেহ্যাদ্যভক্ষ্যাণাং গুরু বিদ্যাদ্যথোত্তরম্ ||৪৯৪||

Adhikarana 360 (495) · Śloka 495

গুরূণামর্ধসৌহিত্যং লঘূনাং তৃপ্তিরিষ্যতে | দ্রবোত্তরো দ্রবশ্চাপি ন মাত্রাগুরুরিষ্যতে ||৪৯৫||

Adhikarana 361 (496) · Śloka 496

দ্রবাঢ্যমপি শুষ্কং তু সম্যগেবোপপদ্যতে |৪৯৬|

Adhikarana 362 (496) · Śloka 497

বিশুষ্কমন্নমভ্যস্তং ন পাকং সাধু গচ্ছতি ||৪৯৬|| পিণ্ডীকৃতমসঙ্ক্লিন্নং বিদাহমুপগচ্ছতি |৪৯৭|

Adhikarana 363 (497) · Śloka 498

স্রোতস্যন্নবহে পিত্তং পক্তৌ বা যস্য তিষ্ঠতি ||৪৯৭|| বিদাহি ভুক্তমন্যদ্বা তস্যাপ্যন্নং বিদহ্যতে |৪৯৮|

Adhikarana 364 (498) · Śloka 498

শুষ্কং বিরুদ্ধং বিষ্টম্ভি বহ্নিব্যাপদমাবহেত্ ||৪৯৮||

Adhikarana 365 (499) · Śloka 499

আমং বিদগ্ধং বিষ্টব্ধং কফপিত্তানিলৈস্ত্রিভিঃ | অজীর্ণং কেচিদিচ্ছন্তি চতুর্থং রসশেষতঃ ||৪৯৯||

Adhikarana 366 (500-501) · Śloka 501

অত্যম্বুপানাদ্বিষমাশনাদ্বা সন্ধারণাত্ স্বপ্নবিপর্যযাচ্চ | কালেঽপি সাত্ম্যং লঘু চাপি ভুক্তমন্নং ন পাকং ভজতে নরস্য ||৫০০|| ঈর্ষ্যাভযক্রোধপরিক্ষতেন লুব্ধেন শুগ্দৈন্যনিপীডিতেন | প্রদ্বেষযুক্তেন চ সেব্যমানমন্নং ন সম্যক্ পরিণামমেতি ||৫০১||

Adhikarana 367 (502-503) · Śloka 503

মাধুর্যমন্নং গতমামসঞ্জ্ঞং বিদগ্ধসঞ্জ্ঞং গতমম্লভাবম্ | কিঞ্চিদ্বিপক্বং, ভৃশতোদশূলং বিষ্টব্ধমানদ্ধবিরুদ্ধবাতম্ ||৫০২|| উদ্গারশুদ্ধাবপি ভক্তকাঙ্ক্ষা ন জাযতে হৃদ্গুরুতা চ যস্য | রসাবশেষেণ তু সপ্রসেকং চতুর্থমেতত্ প্রবদন্ত্যজীর্ণম্ ||৫০৩||

Adhikarana 368 (504) · Śloka 504

মূর্চ্ছা প্রলাপো বমথুঃ প্রসেকঃ সদনং ভ্রমঃ | উপদ্রবা ভবন্ত্যেতে মরণং চাপ্যজীর্ণতঃ ||৫০৪||

Adhikarana 369 (505-507) · Śloka 507

তত্রামে লঙ্ঘনং কার্যং, বিদগ্ধে বমনং হিতম্ | বিষ্টব্ধে স্বেদনং পথ্যং, রসশেষে শযীত চ ||৫০৫|| বামযেদাশু তং তস্মাদুষ্ণেন লবণাম্বুনা | কার্যং বাঽনশনং তাবদ্যাবন্ন প্রকৃতিং ভজেত্ ||৫০৬|| লঘুকাযমতশ্চৈনং লঙ্ঘনৈঃ সমুপাচরেত্ | যাবন্ন প্রকৃতিস্থঃ স্যাদ্দোষতঃ প্রাণতস্তথা ||৫০৭||

Adhikarana 370 (508-509) · Śloka 509

হিতাহিতোপসংযুক্তমন্নং সমশনং স্মৃতম্ | বহু স্তোকমকালে বা তজ্জ্ঞেযং বিষমাশনম্ ||৫০৮|| অজীর্ণে ভুজ্যতে যত্তু তদধ্যশনমুচ্যতে | ত্রযমেতন্নিহন্ত্যাশু বহূন্ব্যাধীন্করোতি বা ||৫০৯||

Adhikarana 371 (510) · Śloka 510

অন্নং বিদগ্ধং হি নরস্য শীঘ্রং শীতাম্বুনা বৈ পরিপাকমেতি | তদ্ধ্যস্য শৈত্যেন নিহন্তি পিত্তমাক্লেদিভাবাচ্চ নযত্যধস্তাত্ ||৫১০||

Adhikarana 372 (511) · Śloka 511

বিদহ্যতে যস্য তু ভুক্তমাত্রে দহ্যেত হৃত্কোষ্ঠগলং চ যস্য | দ্রাক্ষাভযাং মাক্ষিকসম্প্রযুক্তাং লীঢ্বাঽভযাং বা স সুখং লভেত ||৫১১||

Adhikarana 373 (512) · Śloka 512

ভবেদজীর্ণং প্রতি যস্য শঙ্কা স্নিগ্ধস্য জন্তোর্বলিনোঽন্নকালে | প্রাতঃ সশুণ্ঠীমভযামশঙ্কো ভুঞ্জীত সম্প্রাশ্য হিতং হিতার্থী ||৫১২||

Adhikarana 374 (513) · Śloka 513

স্বল্পং যদা দোষবিবদ্ধমামং লীনং ন তেজঃপথমাবৃণোতি | ভবত্যজীর্ণেঽপি তদা বুভুক্ষা যা মন্দবুদ্ধিং বিষবন্নিহন্তি ||৫১৩||

Adhikarana 375 (514-524) · Śloka 525

অত উর্ধ্বং প্রবক্ষ্যামি গুণানাং কর্মবিস্তরম্ | কর্মভিস্ত্বনুমীযন্তে নানাদ্রব্যাশ্রযা গুণাঃ ||৫১৪|| হ্লাদনঃ স্তম্ভনঃ শীতো মূর্চ্ছাতৃট্স্বেদদাহজিত্ | উষ্ণস্তদ্বিপরীতঃ স্যাত্পাচনশ্চ বিশেষতঃ ||৫১৫|| স্নেহমার্দবকৃত্ স্নিগ্ধো বলবর্ণকরস্তথা | রূক্ষস্তদ্বিপরীতঃ স্যাদ্বিশেষাত্ স্তম্ভনঃ খরঃ ||৫১৬|| পিচ্ছিলো জীবনো বল্যঃ সন্ধানঃ শ্লেষ্মলো গুরুঃ | বিশদো বিপরীতোঽস্মাত্ ক্লেদাচূষণরোপণঃ ||৫১৭|| দাহপাককরস্তীক্ষ্ণঃ স্রাবণো, মৃদুরন্যথা | সাদোপলেপবলকৃদ্গুরুস্তর্পণবৃংহণঃ ||৫১৮|| লঘুস্তদ্বিপরীতঃ স্যাল্লেখনো রোপণস্তথা | দশাদ্যাঃ কর্মতঃ প্রোক্তাস্তেষাং কর্মবিশেষণৈঃ ||৫১৯|| দশৈবান্যান্ প্রবক্ষ্যামি দ্রবাদীংস্তান্নিবোধ মে | দ্রবঃ প্রক্লেদনঃ, সান্দ্রঃ স্থূলঃ স্যাদ্বন্ধকারকঃ ||৫২০|| শ্লক্ষ্ণঃ পিচ্ছিলবজ্জ্ঞেযঃ কর্কশো বিশদো যথা | সুখানুবন্ধী সূক্ষ্মশ্চ সুগন্ধো রোচনো মৃদুঃ ||৫২১|| দুর্গন্ধো বিপরীতোঽস্মাদ্ধৃল্লাসারুচিকারকঃ | সরোঽনুলোমনঃ প্রোক্তো, মন্দো যাত্রাকরঃ স্মৃতঃ ||৫২২|| ব্যবাযী চাখিলং দেহং ব্যাপ্য পাকায কল্পতে | বিকাসী বিকসন্নেবং ধাতুবন্ধান্ বিমোক্ষযেত্ ||৫২৩|| আশুকারী তথাঽঽশুত্বাদ্ধাবত্যম্ভসি তৈলবত্ | সূক্ষ্মস্তু সৌক্ষ্ম্যাত্ সূক্ষ্মেষু স্রোতঃস্বনুসরঃ স্মৃতঃ ||৫২৪|| গুণা বিংশতিরিত্যেবং যথাবত্পরিকীর্তিতাঃ |৫২৫|

Adhikarana 376 (525) · Śloka 525

সম্প্রবক্ষ্যাম্যতশ্চোর্ধ্বমাহারগতিনিশ্চযম্ ||৫২৫||

Adhikarana 377 (526) · Śloka 526

পঞ্চভূতাত্মকে দেহে হ্যাহারঃ পাঞ্চভৌতিকঃ | বিপক্বঃ পঞ্চধা সম্যগ্গুণান্ স্বানভিবর্ধযেত্ ||৫২৬||

Adhikarana 378 (527) · Śloka 527

অবিদগ্ধঃ কফং, পিত্তং বিদগ্ধঃ, পবনং পুনঃ | সম্যগ্বিপক্বো নিঃসার আহারঃ পরিবৃংহযেত্ ||৫২৭||

Adhikarana 379 (528) · Śloka 528

বিণ্মূত্রমাহারমলঃ সারঃ প্রাগীরিতো রসঃ |৫২৮|

Adhikarana 380 (528) · Śloka 528

স তু ব্যানেন বিক্ষিপ্তঃ সর্বান্ ধাতূন্ প্রতর্পযেত্ ||৫২৮||

Adhikarana 381 (529) · Śloka 529

কফঃ পিত্তং মলঃ খেষু স্বেদঃ স্যান্নখরোম চ | নেত্রবিট্ ত্বক্ষু চ স্নেহো ধাতূনাং ক্রমশো মলাঃ ||৫২৯||

Adhikarana 382 (530-531) · Śloka 531

দিবা বিবুদ্ধে হৃদযে জাগ্রতঃ পুণ্ডরীকবত্ | অন্নমক্লিন্নধাতুত্বাদজীর্ণেঽপি হিতং নিশি ||৫৩০|| হৃদি সম্মীলিতে রাত্রৌ প্রসুপ্তস্য বিশেষতঃ | ক্লিন্নবিস্রস্তধাতুত্বাদজীর্ণে ন হিতং দিবা ||৫৩১||

Adhikarana 383 (532) · Śloka 532

ইমং বিধিং যোঽনুমতং মহামুনের্নৃপর্ষিমুখ্যস্য পঠেদ্ধি যত্নতঃ | স ভূমিপালায বিধাতুমৌষধং মহাত্মনাং চার্হতি সূরিসত্তমঃ ||৫৩২||

Adhikarana puShpikA · Śloka 46

ইতি ভগবতা শ্রীধন্বন্তরিণোপদিষ্টাযাং তচ্ছিষ্যেণ মহর্ষিণা সুশ্রুতেন বিরচিতাযাং সুশ্রুতসংহিতাযাং সূত্রস্থানে ষট্চত্বারিংশত্তমোঽধ্যাযঃ ||৪৬|| ইতি ভগবতা শ্রীধন্বন্তরিণোপদিষ্টাযাং তচ্ছিষ্যেণ মহর্ষিণা সুশ্রুতেন বিরচিতাযাং সুশ্রুতসংহিতাযাং প্রথমং সূত্রস্থানং সমাপ্তম্ |