46. annapānavidhyadhyāyaḥ

Adhikarana 1 (1-2) · Śloka 2

ಅಥಾತೋಽನ್ನಪಾನವಿಧಿಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಧನ್ವನ್ತರಿಮಭಿವಾದ್ಯ ಸುಶ್ರುತ ಉವಾಚ- ಪ್ರಾಗಭಿಹಿತಃ ‘ಪ್ರಾಣಿನಾಂ ಪುನರ್ಮೂಲಮಾಹಾರೋ ಬಲವರ್ಣೌಜಸಾಂ ಚ, ಸ ಷಟ್ಸು ರಸೇಷ್ವಾಯತ್ತಃ, ರಸಾಃ ಪುನರ್ದ್ರವ್ಯಾಶ್ರಯಿಣಃ,’ ದ್ರವ್ಯರಸಗುಣವೀರ್ಯವಿಪಾಕನಿಮಿತ್ತೇ ಚ ಕ್ಷಯವೃದ್ಧೀ ದೋಷಾಣಾಂ ಸಾಮ್ಯಂ ಚ, ಬ್ರಹ್ಮಾದೇರಪಿ ಚ ಲೋಕಸ್ಯಾಹಾರಃ ಸ್ಥಿತ್ಯುತ್ಪತ್ತಿವಿನಾಶಹೇತುಃ, ಆಹಾರಾದೇವಾಭಿವೃದ್ಧಿರ್ಬಲಮಾರೋಗ್ಯಂ ವರ್ಣೇನ್ದ್ರಿಯಪ್ರಸಾದಶ್ಚ, ತಥಾ ಹ್ಯಾಹಾರವೈಷಮ್ಯಾದಸ್ವಾಸ್ಥ್ಯಂ; ತಸ್ಯಾಶಿತಪೀತಲೀಢಖಾದಿತಸ್ಯ ನಾನಾದ್ರವ್ಯಾತ್ಮಕಸ್ಯಾನೇಕವಿಧವಿಕಲ್ಪಸ್ಯಾನೇಕವಿಧಪ್ರಭಾವಸ್ಯ ಪೃಥಕ್ ಪೃಥಗ್ದ್ರವ್ಯರಸಗುಣವೀರ್ಯವಿಪಾಕಕರ್ಮಾಣೀಚ್ಛಾಮಿ ಜ್ಞಾತುಂ, ನ ಹ್ಯನವಬುದ್ಧಸ್ವಭಾವಾ ಭಿಷಜಃ ಸ್ವಸ್ಥಾನುವೃತ್ತಿಂ ರೋಗನಿಗ್ರಹಣಂ ಚ ಕರ್ತುಂ ಸಮರ್ಥಾಃ; ಆಹಾರಾಯತ್ತಾಶ್ಚ ಸರ್ವಪ್ರಾಣಿನೋ ಯಸ್ಮಾತ್ತಸ್ಮಾದನ್ನಪಾನವಿಧಿಮುಪದಿಶತು ಮೇ ಭಗವಾನಿತ್ಯುಕ್ತಃ ಪ್ರೋವಾಚ ಭಗವಾನ್ ಧನ್ವನ್ತರಿಃ- ಅಥ ಖಲು ವತ್ಸ ಸುಶ್ರುತ! ಯಥಾಪ್ರಶ್ನಮುಚ್ಯಮಾನಮುಪಧಾರಯಸ್ವ- ||೩||

Adhikarana 3 (4) · Śloka 4

ತತ್ರ, ಲೋಹಿತಶಾಲಿಕಲಮಕರ್ದಮಕಪಾಣ್ಡುಕಸುಗನ್ಧಕಶಕುನಾಹೃತಪುಷ್ಪಾಣ್ಡಕಪುಣ್ಡರೀಕಮಹಾಶಾಲಿಶೀತಭೀರುಕರೋಧ್ರಪುಷ್ಪಕ- ದೀರ್ಘಶೂಕಕಾಞ್ಚನಕಮಹಿಷಮಹಾಶೂಕಹಾಯನಕದೂಷಕಮಹಾದೂಷಕಪ್ರಭೃತಯಃ ಶಾಲಯಃ ||೪||

Adhikarana 4 (5) · Śloka 5

ಮಧುರಾ ವೀರ್ಯತಃ ಶೀತಾ ಲಘುಪಾಕಾ ಬಲಾವಹಾಃ | ಪಿತ್ತಘ್ನಾಲ್ಪಾನಿಲಕಫಾಃ ಸ್ನಿಗ್ಧಾ ಬದ್ಧಾಲ್ಪವರ್ಚಸಃ ||೫||

Adhikarana 5 (6) · Śloka 7

ತೇಷಾಂ ಲೋಹಿತಕಃ ಶ್ರೇಷ್ಠೋ ದೋಷಘ್ನಃ ಶುಕ್ರಮೂತ್ರಲಃ | ಚಕ್ಷುಷ್ಯೋ ವರ್ಣಬಲಕೃತ್ ಸ್ವರ್ಯೋ ಹೃದ್ಯಸ್ತೃಷಾಪಹಃ ||೬|| ವ್ರಣ್ಯೋ ಜ್ವರಹರಶ್ಚೈವ ಸರ್ವದೋಷವಿಷಾಪಹಃ |೭|

Adhikarana 6 (7) · Śloka 7

ತಸ್ಮಾದಲ್ಪಾನ್ತರಗುಣಾಃ ಕ್ರಮಶಃ ಶಾಲಯೋಽವರಾಃ ||೭||

Adhikarana 7 (8-9) · Śloka 9

ಷಷ್ಟಿಕಕಾಙ್ಗುಕಮುಕುನ್ದಕಪೀತಕಪ್ರಮೋದಕಕಾಕಲಕಾಸನಪುಷ್ಪಕಮಹಾಷಷ್ಟಿಕಚೂರ್ಣಕಕುರವಕಕೇದಾರಪ್ರಭೃತಯಃ ಷಷ್ಟಿಕಾಃ ||೮|| ರಸೇ ಪಾಕೇ ಚ ಮಧುರಾಃ ಶಮನಾ ವಾತಪಿತ್ತಯೋಃ | ಶಾಲೀನಾಂ ಚ ಗುಣೈಸ್ತುಲ್ಯಾ ಬೃಂಹಣಾಃ ಕಫಶುಕ್ರಲಾಃ ||೯||

Adhikarana 8 (10) · Śloka 11

ಷಷ್ಟಿಕಃ ಪ್ರವರಸ್ತೇಷಾಂ ಕಷಾಯಾನುರಸೋ ಲಘುಃ | ಮೃದುಃ ಸ್ನಿಗ್ಧಸ್ತ್ರಿದೋಷಘ್ನಃ ಸ್ಥೈರ್ಯಕೃದ್ಬಲವರ್ಧನಃ ||೧೦|| ವಿಪಾಕೇ ಮಧುರೋ ಗ್ರಾಹೀ ತುಲ್ಯೋ ಲೋಹಿತಶಾಲಿಭಿಃ |೧೧|

Adhikarana 9 (11) · Śloka 11

ಶೇಷಾಸ್ತ್ವಲ್ಪಾನ್ತರಾಸ್ತಸ್ಮಾತ್ ಷಷ್ಟಿಕಾಃ ಕ್ರಮಶೋ ಗುಣೈಃ ||೧೧||

Adhikarana 10 (12) · Śloka 12

ಕೃಷ್ಣವ್ರೀಹಿಶಾಲಾಮುಖಜತುಮುಖನನ್ದೀಮುಖಲಾವಾಕ್ಷಕತ್ವರಿತಕಕುಕ್ಕುಟಾಣ್ಡಕಪಾರಾವತಕಪಾಟಲಪ್ರಭೃತಯೋ ವ್ರೀಹಯಃ ||೧೨||

Adhikarana 11 (13) · Śloka 13

ಕಷಾಯಮಧುರಾಃ ಪಾಕೇಽಮಧುರಾ ವೀರ್ಯತೋಽಹಿಮಾಃ | ಅಲ್ಪಾಭಿಷ್ಯನ್ದಿನಸ್ತುಲ್ಯಾಃ ಷಷ್ಟಿಕೈರ್ಬದ್ಧವರ್ಚಸಃ ||೧೩||

Adhikarana 12 (14) · Śloka 14

ಕೃಷ್ಣವ್ರೀಹಿರ್ವರಸ್ತೇಷಾಂ ಕಷಾಯಾನುರಸೋ ಲಘುಃ | ತಸ್ಮಾದಲ್ಪಾನ್ತರಗುಣಾಃ ಕ್ರಮಶೋ ವ್ರೀಹಯೋಽಪರೇ ||೧೪||

Adhikarana 13 (15) · Śloka 15

ದಗ್ಧಾಯಾಮವನೌ ಜಾತಾಃ ಶಾಲಯೋ ಲಘುಪಾಕಿನಃ | ಕಷಾಯಾ ಬದ್ಧವಿಣ್ಮೂತ್ರಾ ರೂಕ್ಷಾಃ ಶ್ಲೇಷ್ಮಾಪಕರ್ಷಣಾಃ ||೧೫||

Adhikarana 14 (16) · Śloka 16

ಸ್ಥಲಜಾಃ ಕಫಪಿತ್ತಘ್ನಾಃ ಕಷಾಯಾಃ ಕಟುಕಾನ್ವಯಾಃ | ಕಿಞ್ಚಿತ್ಸತಿಕ್ತಮಧುರಾಃ ಪವನಾನಲವರ್ಧನಾಃ ||೧೬||

Adhikarana 15 (17) · Śloka 17

ಕೈದಾರಾ ಮಧುರಾ ವೃಷ್ಯಾ ಬಲ್ಯಾಃ ಪಿತ್ತನಿಬರ್ಹಣಾಃ | ಈಷತ್ಕಷಾಯಾಲ್ಪಮಲಾ ಗುರವಃ ಕಫಶುಕ್ರಲಾಃ ||೧೭||

Adhikarana 16 (18) · Śloka 18

ರೋಪ್ಯಾತಿರೋಪ್ಯಾ ಲಘವಃ ಶೀಘ್ರಪಾಕಾ ಗುಣೋತ್ತರಾಃ | ಅದಾಹಿನೋ ದೋಷಹರಾ ಬಲ್ಯಾ ಮೂತ್ರವಿವರ್ಧನಾಃ ||೧೮||

Adhikarana 17 (19) · Śloka 19

ಶಾಲಯಶ್ಛಿನ್ನರೂಢಾ ಯೇ ರೂಕ್ಷಾಸ್ತೇ ಬದ್ಧವರ್ಚಸಃ | ತಿಕ್ತಾಃ ಕಷಾಯಾಃ ಪಿತ್ತಘ್ನಾ ಲಘುಪಾಕಾಃ ಕಫಾಪಹಾಃ ||೧೯||

Adhikarana 18 (20) · Śloka 20

ವಿಸ್ತರೇಣಾಯಮುದ್ದಿಷ್ಟಃ ಶಾಲಿವರ್ಗೋ ಹಿತಾಹಿತಃ |೨೦| ಇತಿ ಶಾಲಿವರ್ಗಃ |

Adhikarana 19 (20) · Śloka 20

ಅಥ ಕುಧಾನ್ಯವರ್ಗಃ | ತದ್ವತ್ ಕುಧಾನ್ಯಮುದ್ಗಾದಿಮಾಷಾದೀನಾಂ ಚ ವಕ್ಷ್ಯತೇ ||೨೦||

Adhikarana 20 (21) · Śloka 21

ಕೋರದೂಷಕಶ್ಯಾಮಾಕನೀವಾರಶಾನ್ತನುವರಕೋದ್ದಾಲಕಪ್ರಿಯಙ್ಗುಮಧೂಲಿಕಾನನ್ದೀಮುಖೀ- ಕುರುವಿನ್ದಗವೇಧುಕಸರಬರುಕತೋದ(ಯ)ಪರ್ಣೀಮುಕುನ್ದಕವೇಣುಯವಪ್ರಭೃತಯಃ ಕುಧಾನ್ಯವಿಶೇಷಾಃ ||೨೧||

Adhikarana 21 (22-23) · Śloka 23

ಉಷ್ಣಾಃ ಕಷಾಯಮಧುರಾ ರೂಕ್ಷಾಃ ಕಟುವಿಪಾಕಿನಃ | ಶ್ಲೇಷ್ಮಘ್ನಾ ಬದ್ಧನಿಸ್ಯನ್ದಾ ವಾತಪಿತ್ತಪ್ರಕೋಪಣಾಃ ||೨೨|| ಕಷಾಯಮಧುರಸ್ತೇಷಾಂ ಶೀತಃ ಪಿತ್ತಾಪಹಃ ಸ್ಮೃತಃ | ಕೋದ್ರವಶ್ಚ ಸನೀವಾರಃ ಶ್ಯಾಮಾಕಶ್ಚ ಸಶಾನ್ತನುಃ ||೨೩||

Adhikarana 22 (24) · Śloka 24

ಕೃಷ್ಣಾ ರಕ್ತಾಶ್ಚ ಪೀತಾಶ್ಚ ಶ್ವೇತಾಶ್ಚೈವ ಪ್ರಿಯಙ್ಗವಃ | ಯಥೋತ್ತರಂ ಪ್ರಧಾನಾಃ ಸ್ಯೂ ರೂಕ್ಷಾಃ ಕಫಹರಾಃ ಸ್ಮೃತಾಃ ||೨೪||

Adhikarana 23 (25) · Śloka 25

ಮಧೂಲೀ ಮಧುರಾ ಶೀತಾ ಸ್ನಿಗ್ಧಾ ನನ್ದೀಮುಖೀ ತಥಾ |೨೫|

Adhikarana 24 (25) · Śloka 25

ವಿಶೋಷೀ ತತ್ರ ಭೂಯಿಷ್ಠಂ ವರುಕಃ ಸಮುಕುನ್ದಕಃ ||೨೫||

Adhikarana 25 (26) · Śloka 26

ರೂಕ್ಷಾ ವೇಣುಯವಾ ಜ್ಞೇಯಾ ವೀರ್ಯೋಷ್ಣಾ ಕಟುಪಾಕಿನಃ | ಬದ್ಧಮೂತ್ರಾಃ ಕಫಹರಾಃ ಕಷಾಯಾ ವಾತಕೋಪನಾಃ ||೨೬||

Adhikarana 26 (27) · Śloka 27

ಮುದ್ಗವನಮುದ್ಗಕಲಾಯಮಕುಷ್ಠಮಸೂರಮಙ್ಗಲ್ಯಚಣಕಸತೀನತ್ರಿಪುಟಕಹರೇಣ್ವಾಢಕೀಪ್ರಭೃತಯೋ ವೈದಲಾಃ ||೨೭||

Adhikarana 27 (28) · Śloka 28

ಕಷಾಯಮಧುರಾಃ ಶೀತಾಃ ಕಟುಪಾಕಾ ಮರುತ್ಕರಾಃ | ಬದ್ಧಮೂತ್ರಪುರೀಷಾಶ್ಚ ಪಿತ್ತಶ್ಲೇಷ್ಮಹರಾಸ್ತಥಾ ||೨೮||

Adhikarana 28 (29) · Śloka 29

ನಾತ್ಯರ್ಥಂ ವಾತಲಾಸ್ತೇಷು ಮುದ್ಗಾ ದೃಷ್ಟಿಪ್ರಸಾದನಾಃ | ಪ್ರಧಾನಾ ಹರಿತಾಸ್ತತ್ರ ವನ್ಯಾ ಮುದ್ಗಸಮಾಃ ಸ್ಮೃತಾಃ ||೨೯||

Adhikarana 29 (30) · Śloka 30

ವಿಪಾಕೇ ಮಧುರಾಃ ಪ್ರೋಕ್ತಾ ಮಸೂರಾ ಬದ್ಧವರ್ಚಸಃ |೩೦|

Adhikarana 30 (30) · Śloka 30

ಮಕುಷ್ಠಕಾಃ ಕೃಮಿಕರಾಃ... |೩೦|

Adhikarana 31 (30) · Śloka 30

... ಕಲಾಯಾಃ ಪ್ರಚುರಾನಿಲಾಃ ||೩೦||

Adhikarana 32 (31) · Śloka 31

ಆಢಕೀ ಕಫಪಿತ್ತಘ್ನೀ ನಾತಿವಾತಪ್ರಕೋಪಣೀ |೩೧|

Adhikarana 33 (31-32) · Śloka 32

ವಾತಲಾಃ ಶೀತಮಧುರಾಃ ಸಕಷಾಯಾ ವಿರೂಕ್ಷಣಾಃ ||೩೧|| ಕಫಶೋಣಿತಪಿತ್ತಘ್ನಾಶ್ಚಣಕಾಃ ಪುಂಸ್ತ್ವನಾಶನಾಃ | ತ ಏವ ಘೃತಸಂಯುಕ್ತಾಸ್ತ್ರಿದೋಷಶಮನಾಃ ಪರಮ್ ||೩೨||

Adhikarana 34 (33) · Śloka 33

ಹರೇಣವಃ ಸತೀನಾಶ್ಚ ವಿಜ್ಞೇಯಾ ಬದ್ಧವರ್ಚಸಃ |೩೩|

Adhikarana 35 (33) · Śloka 33

ಋತೇ ಮುದ್ಗಮಸೂರಾಭ್ಯಾಮನ್ಯೇ ತ್ವಾಧ್ಮಾನಕಾರಕಾಃ ||೩೩||

Adhikarana 36 (34) · Śloka 34

ಮಾಷೋ ಗುರುರ್ಭಿನ್ನಪುರೀಷಮೂತ್ರಃ ಸ್ನಿಗ್ಧೋಷ್ಣವೃಷ್ಯೋ ಮಧುರೋಽನಿಲಘ್ನಃ | ಸನ್ತರ್ಪಣಃ ಸ್ತನ್ಯಕರೋ ವಿಶೇಷಾದ್ಬಲಪ್ರದಃ ಶುಕ್ರಕಫಾವಹಶ್ಚ ||೩೪||

Adhikarana 37 (35) · Śloka 35

ಕಷಾಯಭಾವಾನ್ನ ಪುರೀಷಭೇದೀ ನ ಮೂತ್ರಲೋ ನೈವ ಕಫಸ್ಯ ಕರ್ತಾ | ಸ್ವಾದುರ್ವಿಪಾಕೇ ಮಧುರೋಽಲಸಾನ್ದ್ರಃ ಸನ್ತರ್ಪಣಃ ಸ್ತನ್ಯರುಚಿಪ್ರದಶ್ಚ ||೩೫||

Adhikarana 38 (36) · Śloka 36

ಮಾಷೈಃ ಸಮಾನಂ ಫಲಮಾತ್ಮಗುಪ್ತಮುಕ್ತಂ ಚ ಕಾಕಾಣ್ಡಫಲಂ ತಥೈವ |೩೬|

Adhikarana 39 (36) · Śloka 36

ಆರಣ್ಯಮಾಷಾ ಗುಣತಃ ಪ್ರದಿಷ್ಟಾ ರೂಕ್ಷಾಃ ಕಷಾಯಾ ಅವಿದಾಹಿನಶ್ಚ ||೩೬||

Adhikarana 40 (37) · Śloka 37

ಉಷ್ಣಃ ಕುಲತ್ಥೋ ರಸತಃ ಕಷಾಯಃ ಕಟುರ್ವಿಪಾಕೇ ಕಫಮಾರುತಘ್ನಃ | ಶುಕ್ರಾಶ್ಮರೀಗುಲ್ಮನಿಷೂದನಶ್ಚ ಸಾಙ್ಗ್ರಾಹಿಕಃ ಪೀನಸಕಾಸಹನ್ತಾ ||೩೭||

Adhikarana 41 (38) · Śloka 38

ಆನಾಹಮೇದೋಗುದಕೀಲಹಿಕ್ಕಾಶ್ವಾಸಾಪಹಃ ಶೋಣಿತಪಿತ್ತಕೃಚ್ಚ | ಕಫಸ್ಯ ಹನ್ತಾ ನಯನಾಮಯಘ್ನೋ ವಿಶೇಷತೋ ವನ್ಯಕುಲತ್ಥ ಉಕ್ತಃ ||೩೮||

Adhikarana 42 (39) · Śloka 40

ಈಷತ್ಕಷಾಯೋ ಮಧುರಃ ಸತಿಕ್ತಃ ಸಾಙ್ಗ್ರಾಹಿಕಃ ಪಿತ್ತಕರಸ್ತಥೋಷ್ಣಃ | ತಿಲೋ ವಿಪಾಕೇ ಮಧುರೋ ಬಲಿಷ್ಠಃ ಸ್ನಿಗ್ಧೋ ವ್ರಣೇ ಲೇಪನ ಏವ ಪಥ್ಯಃ ||೩೯|| ದನ್ತ್ಯೋಽಗ್ನಿಮೇಧಾಜನನೋಽಲ್ಪಮೂತ್ರಸ್ತ್ವಚ್ಯೋಽಥ ಕೇಶ್ಯೋಽನಿಲಹಾ ಗುರುಶ್ಚ |೪೦|

Adhikarana 43 (40) · Śloka 40

ತಿಲೇಷು ಸರ್ವೇಷ್ವಸಿತಃ ಪ್ರಧಾನೋ ಮಧ್ಯಃ ಸಿತೋ ಹೀನತರಾಸ್ತಥಾಽನ್ಯೇ ||೪೦||

Adhikarana 44 (41-42) · Śloka 42

ಯವಃ ಕಷಾಯೋ ಮಧುರೋ ಹಿಮಶ್ಚ ಕಟುರ್ವಿಪಾಕೇ ಕಫಪಿತ್ತಹಾರೀ | ವ್ರಣೇಷು ಪಥ್ಯಸ್ತಿಲವಚ್ಚ ನಿತ್ಯಂ ಪ್ರಬದ್ಧಮೂತ್ರೋ ಬಹುವಾತವರ್ಚಾಃ ||೪೧|| ಸ್ಥೈರ್ಯಾಗ್ನಿಮೇಧಾಸ್ವರವರ್ಣಕೃಚ್ಚ ಸಪಿಚ್ಛಿಲಃ ಸ್ಥೂಲವಿಲೇಖನಶ್ಚ | ಮೇದೋಮರುತ್ತೃಡ್‌ಹರಣೋಽತಿರೂಕ್ಷಃ ಪ್ರಸಾದನಃ ಶೋಣಿತಪಿತ್ತಯೋಶ್ಚ ||೪೨||

Adhikarana 45 (43) · Śloka 43

ಏಭಿರ್ಗುಣೈರ್ಹೀನತರೈಸ್ತು ಕಿಞ್ಚಿದ್ವಿದ್ಯಾದ್ಯವೇಭ್ಯೋಽತಿಯವಾನಶೇಷೈಃ |೪೩|

Adhikarana 46 (43) · Śloka 44

ಗೋಧೂಮ ಉಕ್ತೋ ಮಧುರೋ ಗುರುಶ್ಚ ಬಲ್ಯಃ ಸ್ಥಿರಃ ಶುಕ್ರರುಚಿಪ್ರದಶ್ಚ ||೪೩|| ಸ್ನಿಗ್ಧೋಽತಿಶೀತೋಽನಿಲಪಿತ್ತಹನ್ತಾ ಸನ್ಧಾನಕೃಚ್ಛ್ಲೇಷ್ಮಕರಃ ಸರಶ್ಚ |೪೪|

Adhikarana 47 (44) · Śloka 45

ರೂಕ್ಷಃ ಕಷಾಯೋ ವಿಷಶೋಷಶುಕ್ರಬಲಾಸದೃಷ್ಟಿಕ್ಷಯಕೃದ್ವಿದಾಹೀ ||೪೪|| ಕಟುರ್ವಿಪಾಕೇ ಮಧುರಸ್ತು ಶಿಮ್ಬಃ ಪ್ರಭಿನ್ನವಿಣ್ಮಾರುತಪಿತ್ತಲಶ್ಚ |೪೫|

Adhikarana 48 (45) · Śloka 46

ಸಿತಾಸಿತಾಃ ಪೀತಕರಕ್ತವರ್ಣಾ ಭವನ್ತಿ ಯೇಽನೇಕವಿಧಾಸ್ತು ಶಿಮ್ಬಾಃ ||೪೫|| ಯಥಾದಿತಸ್ತೇ ಗುಣತಃ ಪ್ರಧಾನಾ ಜ್ಞೇಯಾಃ ಕಟೂಷ್ಣಾ ರಸಪಾಕಯೋಶ್ಚ |೪೬|

Adhikarana 49 (46) · Śloka 47

ಸಹಾದ್ವಯಂ ಮೂಲಕಜಾಶ್ಚ ಶಿಮ್ಬಾಃ ಕುಶಿಮ್ಬಿವಲ್ಲೀಪ್ರಭವಾಸ್ತು ಶಿಮ್ಬಾಃ ||೪೬|| ಜ್ಞೇಯಾ ವಿಪಾಕೇ ಮಧುರಾ ರಸೇ ಚ ಬಲಪ್ರದಾಃ ಪಿತ್ತನಿಬರ್ಹಣಾಶ್ಚ |೪೭|

Adhikarana 50 (47) · Śloka 48

ವಿದಾಹವನ್ತಶ್ಚ ಭೃಶಂ ವಿರೂಕ್ಷಾ ವಿಷ್ಟಭ್ಯ ಜೀರ್ಯನ್ತ್ಯನಿಲಪ್ರದಾಶ್ಚ ||೪೭|| ರುಚಿಪ್ರದಾಶ್ಚೈವ ಸುದುರ್ಜರಾಶ್ಚ ಸರ್ವೇ ಸ್ಮೃತಾ ವೈದಲಿಕಾಸ್ತು ಶಿಮ್ಬಾಃ |೪೮|

Adhikarana 51 (48-49) · Śloka 50

ಕಟುರ್ವಿಪಾಕೇ ಕಟುಕಃ ಕಫಘ್ನೋ ವಿದಾಹಿಭಾವಾದಹಿತಃ ಕುಸುಮ್ಭಃ ||೪೮|| ಉಷ್ಣಾಽತಸೀ ಸ್ವಾದುರಸಾಽನಿಲಘ್ನೀ ಪಿತ್ತೋಲ್ಬಣಾ ಸ್ಯಾತ್ ಕಟುಕಾ ವಿಪಾಕೇ | ಪಾಕೇ ರಸೇ ಚಾಪಿ ಕಟುಃ ಪ್ರದಿಷ್ಟಃ ಸಿದ್ಧಾರ್ಥಕಃ ಶೋಣಿತಪಿತ್ತಕೋಪೀ ||೪೯|| ತೀಕ್ಷ್ಣೋಷ್ಣರೂಕ್ಷಃ ಕಫಮಾರುತಘ್ನಸ್ತಥಾಗುಣಶ್ಚಾಸಿತಸರ್ಷಪೋಽಪಿ |೫೦|

Adhikarana 52 (50) · Śloka 50

ಅನಾರ್ತವಂ ವ್ಯಾಧಿಹತಮಪರ್ಯಾಗತಮೇವ ಚ | ಅಭೂಮಿಜಂ ನವಂ ಚಾಪಿ ನ ಧಾನ್ಯಂ ಗುಣವತ್ ಸ್ಮೃತಮ್ ||೫೦||

Adhikarana 53 (51) · Śloka 51

ನವಂ ಧಾನ್ಯಮಭಿಷ್ಯನ್ದಿ ಲಘು ಸಂವತ್ಸರೋಷಿತಮ್ |೫೧|

Adhikarana 54 (51) · Śloka 51

ವಿದಾಹಿ ಗುರು ವಿಷ್ಟಮ್ಭಿ ವಿರೂಢಂ ದೃಷ್ಟಿದೂಷಣಮ್ ||೫೧||

Adhikarana 55 (52) · Śloka 52

ಶಾಲ್ಯಾದೇಃ ಸರ್ಷಪಾನ್ತಸ್ಯ ವಿವಿಧಸ್ಯಾಸ್ಯ ಭಾಗಶಃ | ಕಾಲಪ್ರಮಾಣಸಂಸ್ಕಾರಮಾತ್ರಾಃ ಸಮ್ಪರಿಕೀರ್ತಿತಾಃ ||೫೨|| ಇತಿ ಕುಧಾನ್ಯವರ್ಗಃ |

Adhikarana 56 (53) · Śloka 53

ಅಥ ಮಾಂಸವರ್ಗಃ | ಅತ ಊರ್ಧ್ವಂ ಮಾಂಸವರ್ಗಾನುಪದೇಕ್ಷ್ಯಾಮಃ; ತದ್ಯಥಾ- ಜಲೇಶಯಾ, ಆನೂಪಾ, ಗ್ರಾಮ್ಯಾಃ, ಕ್ರವ್ಯಭುಜ, ಏಕಶಫಾ, ಜಾಙ್ಗಲಾಶ್ಚೇತಿ ಷಣ್ಮಾಂಸವರ್ಗಾ ಭವನ್ತಿ | ಏತೇಷಾಂ ವರ್ಗಾಣಾಮುತ್ತರೋತ್ತರಾ ಪ್ರಧಾನತಮಾಃ | ತೇ ಪುನರ್ದ್ವಿವಿಧಾ ಜಾಙ್ಗಲಾ ಆನೂಪಾಶ್ಚೇತಿ | ತತ್ರ ಜಾಙ್ಗಲವರ್ಗೋಽಷ್ಟವಿಧಃ | ತದ್ಯಥಾ- ಜಙ್ಘಾಲಾ, ವಿಷ್ಕಿರಾಃ, ಪ್ರತುದಾ, ಗುಹಾಶಯಾಃ, ಪ್ರಸಹಾಃ, ಪರ್ಣಮೃಗಾ, ಬಿಲೇಶಯಾ, ಗ್ರಾಮ್ಯಾಶ್ಚೇತಿ | ತೇಷಾಂ ಜಙ್ಘಾಲವಿಷ್ಕಿರೌ ಪ್ರಧಾನತಮೌ ||೫೩||

Adhikarana 57 (54) · Śloka 54

ತಾವೇಣಹರಿಣರ್ಕ್ಷಕುರಙ್ಗಕರಾಲಕೃತಮಾಲಶರಭಶ್ವದಂಷ್ಟ್ರಾಪೃಷತಚಾರುಷ್ಕರಮೃಗಮಾತೃಕಾಪ್ರಭೃತಯೋ ಜಙ್ಘಾಲಾ ಮೃಗಾಃ ಕಷಾಯಾ ಮಧುರಾ ಲಘವೋ ವಾತಪಿತ್ತಹರಾಸ್ತೀಕ್ಷ್ಣಾ ಹೃದ್ಯಾ ಬಸ್ತಿಶೋಧನಾಶ್ಚ ||೫೪||

Adhikarana 58 (55) · Śloka 55

ಕಷಾಯಮಧುರೋ ಹೃದ್ಯಃ ಪಿತ್ತಾಸೃಕ್ಕಫರೋಗಹಾ | ಸಙ್ಗ್ರಾಹೀ ರೋಚನೋ ಬಲ್ಯಸ್ತೇಷಾಮೇಣೋ ಜ್ವರಾಪಹಃ ||೫೫||

Adhikarana 59 (56) · Śloka 56

ಮಧುರೋ ಮಧುರಃ ಪಾಕೇ ದೋಷಘ್ನೋಽನಲದೀಪನಃ | ಶೀತಲೋ ಬದ್ಧವಿಣ್ಮೂತ್ರ ಸುಗನ್ಧಿರ್ಹರಿಣೋ ಲಘುಃ ||೫೬||

Adhikarana 60 (57) · Śloka 57

ಏಣಃ ಕೃಷ್ಣಸ್ತಯೋರ್ಜ್ಞೇಯೋ ಹರಿಣಸ್ತಾಮ್ರ ಉಚ್ಯತೇ | ಯೋ ನ ಕೃಷ್ಣೋ ನ ತಾಮ್ರಶ್ಚ ಕುರಙ್ಗಃ ಸೋಽಭಿಧೀಯತೇ ||೫೭||

Adhikarana 61 (58) · Śloka 58

ಶೀತಾಽಸೃಕ್ಪಿತ್ತಶಮನೀ ವಿಜ್ಞೇಯಾ ಮೃಗಮಾತೃಕಾ | ಸನ್ನಿಪಾತಕ್ಷಯಶ್ವಾಸಕಾಸಹಿಕ್ಕಾರುಚಿಪ್ರಣುತ್ ||೫೮||

Adhikarana 62 (59) · Śloka 60

ಲಾವತಿತ್ತಿರಿಕಪಿಞ್ಜಲವರ್ತೀರವರ್ತಿಕಾವರ್ತಕನಪ್ತೃಕಾವಾರ್ತೀಕಚಕೋರಕಲವಿಙ್ಕಮಯೂರಕ್ರಕರೋಪಚಕ್ರ- ಕುಕ್ಕುಟಸಾರಙ್ಗಶತಪತ್ರಕುತಿತ್ತಿರಿಕುರುವಾಹಕಯವಾಲಕಪ್ರಭೃತಯಸ್ತ್ರ್ಯಾಹಲಾ ವಿಷ್ಕಿರಾಃ ||೫೯|| ಲಘವಃ ಶೀತಮಧುರಾಃ ಕಷಾಯಾ ದೋಷನಾಶನಾಃ |೬೦|

Adhikarana 63 (60) · Śloka 60

ಸಙ್ಗ್ರಾಹೀ ದೀಪನಶ್ಚೈವ ಕಷಾಯಮಧುರೋ ಲಘುಃ | ಲಾವಃ ಕಟುವಿಪಾಕಶ್ಚ ಸನ್ನಿಪಾತೇ ತು ಪೂಜಿತಃ ||೬೦||

Adhikarana 64 (61-62) · Śloka 63

ಈಷದ್ಗುರೂಷ್ಣಮಧುರೋ ವೃಷ್ಯೋ ಮೇಧಾಗ್ನಿವರ್ಧನಃ | ತಿತ್ತಿರಿಃ ಸರ್ವದೋಷಘ್ನೋ ಗ್ರಾಹೀ ವರ್ಣಪ್ರಸಾದನಃ ||೬೧|| ರಕ್ತಪಿತ್ತಹರಃ ಶೀತೋ ಲಘುಶ್ಚಾಪಿ ಕಪಿಞ್ಜಲಃ | ಕಫೋತ್ಥೇಷು ಚ ರೋಗೇಷು ಮನ್ದವಾತೇ ಚ ಶಸ್ಯತೇ ||೬೨|| ಹಿಕ್ಕಾಶ್ವಾಸಾನಿಲಹರೋ ವಿಶೇಷಾದ್ಗೌರತಿತ್ತಿರಿಃ |೬೩|

Adhikarana 65 (63) · Śloka 64

ವಾತಪಿತ್ತಹರಾ ವೃಷ್ಯಾ ಮೇಧಾಗ್ನಿಬಲವರ್ಧನಾಃ ||೬೩|| ಲಘವಃ ಕ್ರಕರಾ ಹೃದ್ಯಾಸ್ತಥಾ ಚೈವೋಪಚಕ್ರಕಾಃ |೬೪|

Adhikarana 66 (64) · Śloka 65

ಕಷಾಯಃ ಸ್ವಾದುಲವಣಸ್ತ್ವಚ್ಯಃ ಕೇಶ್ಯೋಽರುಚೌ ಹಿತಃ ||೬೪|| ಮಯೂರಃ ಸ್ವರಮೇಧಾಗ್ನಿದೃಕ್ಶ್ರೋತ್ರೇನ್ದ್ರಿಯದಾರ್ಢ್ಯಕೃತ್ |೬೫|

Adhikarana 67 (65-66) · Śloka 66

ಸ್ನಿಗ್ಧೋಷ್ಣೋಽನಿಲಹಾ ವೃಷ್ಯಃ ಸ್ವೇದಸ್ವರಬಲಾವಹಃ ||೬೫|| ಬೃಂಹಣಃ ಕುಕ್ಕುಟೋ ವನ್ಯಸ್ತದ್ವದ್ಗ್ರಾಮ್ಯೋ ಗುರುಸ್ತು ಸಃ | ವಾತರೋಗಕ್ಷಯವಮೀವಿಷಮಜ್ವರನಾಶನಃ ||೬೬||

Adhikarana 68 (67) · Śloka 67

ಕಪೋತಪಾರಾವತಭೃಙ್ಗರಾಜಪರಭೃತಕೋಯಷ್ಟಿಕಕುಲಿಙ್ಗಗೃಹಕುಲಿಙ್ಗಗೋಕ್ಷ್ವೇಡಕಡಿಣ್ಡಿಮಾಣವಕಶತಪತ್ರಕ- ಮಾತೃನಿನ್ದಕಭೇದಾಶಿಶುಕಸಾರಿಕಾವಲ್ಗುಲೀಗಿರಿಶಾಲಟ್ವಾಲಟ್ಟೂಷಕಸುಗೃಹಾಖಞ್ಜರೀಟಹಾರೀತದಾತ್ಯೂಹಪ್ರಭೃತಯಃ , ಪ್ರತುದಾಃ ||೬೭||

Adhikarana 69 (68) · Śloka 68

ಕಷಾಯಮಧುರಾ ರೂಕ್ಷಾಃ ಫಲಾಹಾರಾ ಮರುತ್ಕರಾಃ | ಪಿತ್ತಶ್ಲೇಷ್ಮಹರಾಃ ಶೀತಾ ಬದ್ಧಮೂತ್ರಾಲ್ಪವರ್ಚಸಃ ||೬೮||

Adhikarana 70 (69) · Śloka 69

ಸರ್ವದೋಷಕರಸ್ತೇಷಾಂ ಭೇದಾಶೀ ಮಲದೂಷಕಃ |೬೯|

Adhikarana 71 (69) · Śloka 69

ಕಷಾಯಸ್ವಾದುಲವಣೋ ಗುರುಃ ಕಾಣಕಪೋತಕಃ ||೬೯||

Adhikarana 72 (70) · Śloka 70

ರಕ್ತಪಿತ್ತಪ್ರಶಮನಃ ಕಷಾಯವಿಶದೋಽಪಿ ಚ | ವಿಪಾಕೇ ಮಧುರಶ್ಚಾಪಿ ಗುರುಃ ಪಾರಾವತಃ ಸ್ಮೃತಃ ||೭೦||

Adhikarana 73 (71) · Śloka 71

ಕುಲಿಙ್ಗೋ ಮಧುರಃ ಸ್ನಿಗ್ಧಃ ಕಫಶುಕ್ರವಿವರ್ಧನಃ |೭೧|

Adhikarana 74 (71) · Śloka 71

ರಕ್ತಪಿತ್ತಹರೋ ವೇಶ್ಮಕುಲಿಙ್ಗಸ್ತ್ವತಿಶುಕ್ರಲಃ ||೭೧||

Adhikarana 75 (72) · Śloka 72

ಸಿಂಹವ್ಯಾಘ್ರವೃಕತರಕ್ಷ್ವೃಕ್ಷದ್ವೀಪಿಮಾರ್ಜಾರಶೃಗಾಲಮೃಗೇರ್ವಾರುಕಪ್ರಭೃತಯೋ ಗುಹಾಶಯಾಃ ||೭೨||

Adhikarana 76 (73) · Śloka 73

ಮಧುರಾ ಗುರವಃ ಸ್ನಿಗ್ಧಾ ಬಲ್ಯಾ ಮಾರುತನಾಶನಾಃ | ಉಷ್ಣವೀರ್ಯಾ ಹಿತಾ ನಿತ್ಯಂ ನೇತ್ರಗುಹ್ಯವಿಕಾರಿಣಾಮ್ ||೭೩||

Adhikarana 77 (74) · Śloka 74

ಕಾಕಕಙ್ಕಕುರರಚಾಷಭಾಸಶಶಘಾತ್ಯುಲೂಕಚಿಲ್ಲಿಶ್ಯೇನಗೃಧ್ರಪ್ರಭೃತಯಃ ಪ್ರಸಹಾಃ ||೭೪||

Adhikarana 78 (75) · Śloka 75

ಏತೇ ಸಿಂಹಾದಿಭಿಃ ಸರ್ವೇ ಸಮಾನಾ ವಾಯಸಾದಯಃ | ರಸವೀರ್ಯವಿಪಾಕೇಷು ವಿಶೇಷಾಚ್ಛೋಷಿಣೇ ಹಿತಾಃ ||೭೫||

Adhikarana 79 (76) · Śloka 76

ಮದ್ಗುಮೂಷಿಕವೃಕ್ಷಶಾಯಿಕಾವಕುಶಪೂತಿಘಾಸವಾನರಪ್ರಭೃತಯಃ ಪರ್ಣಮೃಗಾಃ ||೭೬||

Adhikarana 80 (77) · Śloka 77

ಮಧುರಾ ಗುರವೋ ವೃಷ್ಯಾಶ್ಚಕ್ಷುಷ್ಯಾಃ ಶೋಷಿಣೇ ಹಿತಾಃ | ಸೃಷ್ಟಮೂತ್ರಪುರೀಷಾಶ್ಚ ಕಾಸಾರ್ಶಃಶ್ವಾಸನಾಶನಾಃ ||೭೭||

Adhikarana 81 (78) · Śloka 78

ಶ್ವಾವಿಚ್ಛಲ್ಯಕಗೋಧಾಶಶವೃಷದಂಶಲೋಪಾಕಲೋಮಶಕರ್ಣಕದಲೀಮೃಗಪ್ರಿಯಕಾಜಗರಸರ್ಪಮೂಷಿಕನಕುಲಮಹಾಬಭ್ರುಪ್ರಭೃತಯೋ ಬಿಲೇಶಯಾಃ ||೭೮||

Adhikarana 82 (79) · Śloka 79

ವರ್ಚೋಮೂತ್ರಂ ಸಂಹತಂ ಕುರ್ಯುರೇತೇ ವೀರ್ಯೇ ಚೋಷ್ಣಾಃ ಪೂರ್ವವತ್ ಸ್ವಾದುಪಾಕಾಃ | ವಾತಂ ಹನ್ಯುಃ ಶ್ಲೇಷ್ಮಪಿತ್ತೇ ಚ ಕುರ್ಯುಃ ಸ್ನಿಗ್ಧಾಃ ಕಾಸಶ್ವಾಸಕಾರ್ಶ್ಯಾಪಹಾಶ್ಚ ||೭೯||

Adhikarana 83 (80) · Śloka 80

ಕಷಾಯಮಧುರಸ್ತೇಷಾಂ ಶಶಃ ಪಿತ್ತಕಫಾಪಹಃ | ನಾತಿಶೀತಲವೀರ್ಯತ್ವಾದ್ವಾತಸಾಧಾರಣೋ ಮತಃ ||೮೦||

Adhikarana 84 (81-84) · Śloka 84

ಗೋಧಾ ವಿಪಾಕೇ ಮಧುರಾ ಕಷಾಯಕಟುಕಾ ಸ್ಮೃತಾ | ವಾತಪಿತ್ತಪ್ರಶಮನೀ ಬೃಂಹಣೀ ಬಲವರ್ಧನೀ ||೮೧|| ಶಲ್ಯಕಃ ಸ್ವಾದುಪಿತ್ತಘ್ನೋ ಲಘುಃ ಶೀತೋ ವಿಷಾಪಹಃ | ಪ್ರಿಯಕೋ ಮಾರುತೇ ಪಥ್ಯೋಽಜಗರಸ್ತ್ವರ್ಶಸಾಂ ಹಿತಃ ||೮೨|| ದುರ್ನಾಮಾನಿಲದೋಷಘ್ನಾಃ ಕೃಮಿದೂಷೀವಿಷಾಪಹಾಃ | ಚಕ್ಷುಷ್ಯಾ ಮಧುರಾಃ ಪಾಕೇ ಸರ್ಪಾ ಮೇಧಾಗ್ನಿವರ್ಧನಾಃ ||೮೩|| ದರ್ವೀಕರಾ ದೀಪಕಾಶ್ಚ ತೇಷೂಕ್ತಾಃ ಕಟುಪಾಕಿನಃ | ಮಧುರಾಶ್ಚಾತಿಚಕ್ಷುಷ್ಯಾಃ ಸೃಷ್ಟವಿಣ್ಮೂತ್ರಮಾರುತಾಃ ||೮೪||

Adhikarana 85 (85) · Śloka 85

ಅಶ್ವಾಶ್ವತರಗೋಖರೋಷ್ಟ್ರಬಸ್ತೋರಭ್ರಮೇದಃಪುಚ್ಛಕಪ್ರಭೃತಯೋ ಗ್ರಾಮ್ಯಾಃ ||೮೫||

Adhikarana 86 (86) · Śloka 86

ಗ್ರಾಮ್ಯಾ ವಾತಹರಾಃ ಸರ್ವೇ ಬೃಂಹಣಾಃ ಕಫಪಿತ್ತಲಾಃ | ಮಧುರಾ ರಸಪಾಕಾಭ್ಯಾಂ ದೀಪನಾ ಬಲವರ್ಧನಾಃ ||೮೬||

Adhikarana 87 (87) · Śloka 87

ನಾತಿಶೀತೋ ಗುರುಃ ಸ್ನಿಗ್ಧೋ ಮನ್ದಪಿತ್ತಕಫಃ ಸ್ಮೃತಃ | ಛಗಲಸ್ತ್ವನಭಿಷ್ಯನ್ದೀ ತೇಷಾಂ ಪೀನಸನಾಶನಃ ||೮೭||

Adhikarana 88 (88) · Śloka 88

ಬೃಂಹಣಂ ಮಾಂಸಮೌರಭ್ರಂ ಪಿತ್ತಶ್ಲೇಷ್ಮಾವಹಂ ಗುರು |೮೮|

Adhikarana 89 (88) · Śloka 88

ಮೇದಃಪುಚ್ಛೋದ್ಭವಂ ವೃಷ್ಯಮೌರಭ್ರಸದೃಶಂ ಗುಣೈಃ ||೮೮||

Adhikarana 90 (89) · Śloka 89

ಶ್ವಾಸಕಾಸಪ್ರತಿಶ್ಯಾಯವಿಷಮಜ್ವರನಾಶನಮ್ | ಶ್ರಮಾತ್ಯಗ್ನಿಹಿತಂ ಗವ್ಯಂ ಪವಿತ್ರಮನಿಲಾಪಹಮ್ ||೮೯||

Adhikarana 91 (90) · Śloka 90

ಔರಭ್ರವತ್ಸಲವಣಂ ಮಾಂಸಮೇಕಶಫೋದ್ಭವಮ್ |೯೦|

Adhikarana 92 (90) · Śloka 90

ಅಲ್ಪಾಭಿಷ್ಯನ್ದ್ಯಯಂ ವರ್ಗೋ ಜಾಙ್ಗಲಃ ಸಮುದಾಹೃತಃ ||೯೦||

Adhikarana 93 (91-92) · Śloka 92

ದೂರೇ ಜನಾನ್ತನಿಲಯಾ ದೂರೇ ಪಾನೀಯಗೋಚರಾಃ | ಯೇ ಮೃಗಾಶ್ಚ ವಿಹಙ್ಗಾಶ್ಚ ತೇಽಲ್ಪಾಭಿಷ್ಯನ್ದಿನೋ ಮತಾಃ ||೯೧|| ಅತೀವಾಸನ್ನನಿಲಯಾಃ ಸಮೀಪೋದಕಗೋಚರಾಃ | ಯೇ ಮೃಗಾಶ್ಚ ವಿಹಙ್ಗಾಶ್ಚ ಮಹಾಭಿಷ್ಯನ್ದಿನಸ್ತು ತೇ ||೯೨||

Adhikarana 94 (93) · Śloka 93

ಆನೂಪವರ್ಗಸ್ತು ಪಞ್ಚವಿಧಃ | ತದ್ಯಥಾ- ಕೂಲಚರಾಃ, ಪ್ಲವಾಃ, ಕೋಷಸ್ಥಾಃ, ಪಾದಿನೋ, ಮತ್ಸ್ಯಾಶ್ಚೇತಿ ||೯೩||

Adhikarana 95 (94) · Śloka 94

ತತ್ರ ಗಜಗವಯಮಹಿಷರುರುಚಮರಸೃಮರರೋಹಿತವರಾಹಖಡ್ಗಿಗೋಕರ್ಣಕಾಲಪುಚ್ಛಕೋದ್ರನ್ಯಙ್ಕ್ವರಣ್ಯಗವಯಪ್ರಭೃತಯಃ ಕೂಲಚರಾಃ ಪಶವಃ ||೯೪||

Adhikarana 96 (95) · Śloka 95

ವಾತಪಿತ್ತಹರಾ ವೃಷ್ಯಾ ಮಧುರಾ ರಸಪಾಕಯೋಃ | ಶೀತಲಾ ಬಲಿನಃ ಸ್ನಿಗ್ಧಾ ಮೂತ್ರಲಾಃ ಕಫವರ್ಧನಃ ||೯೫||

Adhikarana 97 (96-97) · Śloka 97

ವಿರೂಕ್ಷಣೋ ಲೇಖನಶ್ಚ ವೀರ್ಯೋಷ್ಣಃ ಪಿತ್ತದೂಷಣಃ | ಸ್ವಾದ್ವಮ್ಲಲವಣಸ್ತೇಷಾಂ ಗಜಃ ಶ್ಲೇಷ್ಮಾನಿಲಾಪಹಃ ||೯೬|| ಗವಯಸ್ಯ ತು ಮಾಂಸಂ ಹಿ ಸ್ನಿಗ್ಧಂ ಮಧುರಕಾಸಜಿತ್ | ವಿಪಾಕೇ ಮಧುರಂ ಚಾಪಿ ವ್ಯವಾಯಸ್ಯ ತು ವರ್ಧನಮ್ ||೯೭||

Adhikarana 98 (98) · Śloka 98

ಸ್ನಿಗ್ಧೋಷ್ಣಮಧುರೋ ವೃಷ್ಯೋ ಮಹಿಷಸ್ತರ್ಪಣೋ ಗುರುಃ | ನಿದ್ರಾಪುಂಸ್ತ್ವಬಲಸ್ತನ್ಯವರ್ಧನೋ ಮಾಂಸದಾರ್ಢ್ಯಕೃತ್ ||೯೮||

Adhikarana 99 (99-104) · Śloka 104

ರುರೋರ್ಮಾಂಸಂ ಸಮಧುರಂ ಕಷಾಯಾನುರಸಂ ಸ್ಮೃತಮ್ | ವಾತಪಿತ್ತೋಪಶಮನಂ ಗುರು ಶುಕ್ರವಿವರ್ಧನಮ್ ||೯೯|| ತಥಾ ಚಮರಮಾಂಸಂ ತು ಸ್ನಿಗ್ಧಂ ಮಧುರಕಾಸಜಿತ್ | ವಿಪಾಕೇ ಮಧುರಂ ಚಾಪಿ ವಾತಪಿತ್ತಪ್ರಣಾಶನಮ್ ||೧೦೦|| ಸೃಮರಸ್ಯ ತು ಮಾಂಸಂ ಚ ಕಷಾಯಾನುರಸಂ ಸ್ಮೃತಮ್ | ವಾತಪಿತ್ತೋಪಶಮನಂ ಗುರು ಶುಕ್ರವಿವರ್ಧನಮ್ ||೧೦೧|| ಸ್ವೇದನಂ ಬೃಂಹಣಂ ವೃಷ್ಯಂ ಶೀತಲಂ ತರ್ಪಣಂ ಗುರು | ಶ್ರಮಾನಿಲಹರಂ ಸ್ನಿಗ್ಧಂ ವಾರಾಹಂ ಬಲವರ್ಧನಮ್ ||೧೦೨|| ಕಫಘ್ನಂ ಖಡ್ಗಿಪಿಶಿತಂ ಕಷಾಯಮನಿಲಾಪಹಮ್ | ಪಿತ್ರ್ಯಂ ಪವಿತ್ರಮಾಯುಷ್ಯಂ ಬದ್ಧಮೂತ್ರಂ ವಿರೂಕ್ಷಣಮ್ ||೧೦೩|| ಗೋಕರ್ಣಮಾಂಸಂ ಮಧುರಂ ಸ್ನಿಗ್ಧಂ ಮೃದು ಕಫಾವಹಮ್ | ವಿಪಾಕೇ ಮಧುರಂ ಚಾಪಿ ರಕ್ತಪಿತ್ತವಿನಾಶನಮ್ ||೧೦೪||

Adhikarana 100 (105) · Śloka 105

ಹಂಸಸಾರಸಕ್ರೌಞ್ಚಚಕ್ರವಾಕಕುರರಕಾದಮ್ಬಕಾರಣ್ಡವಜೀವಞ್ಜೀವಕಬಕಬಲಾಕಾಪುಣ್ಡರೀಕಪ್ಲವಶರಾರೀಮುಖ- ನನ್ದೀಮುಖಮದ್ಗೂತ್ಕ್ರೋಶಕಾಚಾಕ್ಷಮಲ್ಲಿಕಾಕ್ಷಶುಕ್ಲಾಕ್ಷಪುಷ್ಕರಶಾಯಿಕಾಕೋನಾಲಕಾಮ್ಬುಕುಕ್ಕುಟಿಕಾಮೇಘರಾವಶ್ವೇತವಾರಲಪ್ರಭೃತಯಃ ಪ್ಲವಾಃ ಸಙ್ಘಾತಚಾರಿಣಃ ||೧೦೫||

Adhikarana 101 (106) · Śloka 106

ರಕ್ತಪಿತ್ತಹರಾಃ ಶೀತಾಃ ಸ್ನಿಗ್ಧಾ ವೃಷ್ಯಾ ಮರುಜ್ಜಿತಃ | ಸೃಷ್ಟಮೂತ್ರಪುರೀಷಾಶ್ಚ ಮಧುರಾ ರಸಪಾಕಯೋಃ ||೧೦೬||

Adhikarana 102 (107) · Śloka 107

ಗುರೂಷ್ಣಮಧುರಃ ಸ್ನಿಗ್ಧಃ ಸ್ವರವರ್ಣಬಲಪ್ರದಃ | ಬೃಂಹಣಃ ಶುಕ್ರಲಸ್ತೇಷಾಂ ಹಂಸೋ ವಾತವಿಕಾರನುತ್ ||೧೦೭||

Adhikarana 103 (108) · Śloka 108

ಶಙ್ಖಶಙ್ಖನಕಶುಕ್ತಿಶಮ್ಬೂಕಭಲ್ಲೂಕಪ್ರಭೃತಯಃ ಕೋಶಸ್ಥಾಃ ||೧೦೮||

Adhikarana 104 (109) · Śloka 109

ಕೂರ್ಮಕುಮ್ಭೀರಕರ್ಕಟಕಕೃಷ್ಣಕರ್ಕಟಕಶಿಶುಮಾರಪ್ರಭೃತಯಃ ಪಾದಿನಃ ||೧೦೯||

Adhikarana 105 (110) · Śloka 110

ಶಙ್ಖಕೂರ್ಮಾದಯಃ ಸ್ವಾದುರಸಪಾಕಾ ಮರುನ್ನುದಃ | ಶೀತಾಃ ಸ್ನಿಗ್ಧಾ ಹಿತಾಃ ಪಿತ್ತೇ ವರ್ಚಸ್ಯಾಃ ಶ್ಲೇಷ್ಮವರ್ಧನಾಃ ||೧೧೦||

Adhikarana 106 (111) · Śloka 111

ಕೃಷ್ಣಕರ್ಕಟಕಸ್ತೇಷಾಂ ಬಲ್ಯಃ ಕೋಷ್ಣೋಽನಿಲಾಪಹಃ | ಶುಕ್ಲಃ ಸನ್ಧಾನಕೃತ್ ಸೃಷ್ಟವಿಣ್ಮೂತ್ರೋಽನಿಲಪಿತ್ತಹಾ ||೧೧೧||

Adhikarana 107 (112) · Śloka 112

ಮತ್ಸ್ಯಾಸ್ತು ದ್ವಿವಿಧಾ ನಾದೇಯಾಃ ಸಾಮುದ್ರಾಶ್ಚ ||೧೧೨||

Adhikarana 108 (113) · Śloka 113

ತತ್ರ ನಾದೇಯಾಃ- ರೋಹಿತಪಾಠೀನಪಾಟಲಾರಾಜೀವವರ್ಮಿಗೋಮತ್ಸ್ಯಕೃಷ್ಣಮತ್ಸ್ಯವಾಗುಞ್ಜಾರಮುರಲಸಹಸ್ರದಂಷ್ಟ್ರಪ್ರಭೃತಯಃ ||೧೧೩||

Adhikarana 109 (114) · Śloka 114

ನಾದೇಯಾ ಮಧುರಾ ಮತ್ಸ್ಯಾ ಗುರವೋ ಮಾರುತಾಪಹಾಃ | ರಕ್ತಪಿತ್ತಕರಾಶ್ಚೋಷ್ಣಾ ವೃಷ್ಯಾಃ ಸ್ನಿಗ್ಧಾಲ್ಪವರ್ಚಸಃ ||೧೧೪||

Adhikarana 110 (115) · Śloka 115

ಕಷಾಯಾನುರಸಸ್ತೇಷಾಂ ಶಷ್ಪಶೈವಾಲಭೋಜನಃ | ರೋಹಿತೋ ಮಾರುತಹರೋ ನಾತ್ಯರ್ಥಂ ಪಿತ್ತಕೋಪನಃ ||೧೧೫||

Adhikarana 111 (116) · Śloka 116

ಪಾಠೀನಃ ಶ್ಲೇಷ್ಮಲೋ ವೃಷ್ಯೋ ನಿದ್ರಾಲುಃ ಪಿಶಿತಾಶನಃ | ದೂಷಯೇದ್ರಕ್ತಪಿತ್ತಂ ತು ಕುಷ್ಠರೋಗಂ ಕರೋತ್ಯಸೌ | ಮುರಲೋ ಬೃಂಹಣೋ ವೃಷ್ಯಃ ಸ್ತನ್ಯಶ್ಲೇಷ್ಮಕರಸ್ತಥಾ ||೧೧೬||

Adhikarana 112 (117) · Śloka 117

ಸರಸ್ತಡಾಗಸಮ್ಭೂತಾಃ ಸ್ನಿಗ್ಧಾಃ ಸ್ವಾದುರಸಾಃ ಸ್ಮೃತಾಃ | ಮಹಾಹ್ರದೇಷು ಬಲಿನಃ, ಸ್ವಲ್ಪೇಽಮ್ಭಸ್ಯಬಲಾಃ ಸ್ಮೃತಾಃ ||೧೧೭||

Adhikarana 113 (118) · Śloka 118

ತಿಮಿತಿಮಿಙ್ಗಿಲಕುಲಿಶಪಾಕಮತ್ಸ್ಯನಿರುಲನನ್ದಿವಾರ(ರು)ಲಕಮಕರಗರ್ಗರಚನ್ದ್ರಕಮಹಾಮೀನರಾಜೀವಪ್ರಭೃತಯಃ ಸಾಮುದ್ರಾಃ ||೧೧೮||

Adhikarana 114 (119) · Śloka 120

ಸಾಮುದ್ರಾ ಗುರವಃ ಸ್ನಿಗ್ಧಾ ಮಧುರಾ ನಾತಿಪಿತ್ತಲಾಃ | ಉಷ್ಣಾ ವಾತಹರಾ ವೃಷ್ಯಾ ವರ್ಚಸ್ಯಾಃ ಶ್ಲೇಷ್ಮವರ್ಧನಾಃ ||೧೧೯|| ಬಲಾವಹಾ ವಿಶೇಷೇಣ ಮಾಂಸಾಶಿತ್ವಾತ್ ಸಮುದ್ರಜಾಃ |೧೨೦|

Adhikarana 115 (120-121) · Śloka 121

ಸಮುದ್ರಜೇಭ್ಯೋ ನಾದೇಯಾ ಬೃಂಹಣತ್ವಾದ್ಗುಣೋತ್ತರಾಃ ||೧೨೦|| ತೇಷಾಮಪ್ಯನಿಲಘ್ನತ್ವಾಚ್ಚೌಣ್ಟ್ಯಕೌಪ್ಯೌ ಗುಣೋತ್ತರೌ | ಸ್ನಿಗ್ಧತ್ವಾತ್ ಸ್ವಾದುಪಾಕತ್ವಾತ್ತಯೋರ್ವಾಪ್ಯಾ ಗುಣಾಧಿಕಾಃ ||೧೨೧||

Adhikarana 116 (122-125) · Śloka 125

ನಾದೇಯಾ ಗುರವೋ ಮಧ್ಯೇ ಯಸ್ಮಾತ್ ಪುಚ್ಛಾಸ್ಯಚಾರಿಣಃ | ಸರಸ್ತಡಾಗಜಾನಾಂ ತು ವಿಶೇಷೇಣ ಶಿರೋ ಲಘು ||೧೨೨|| ಅದೂರಗೋಚರಾ ಯಸ್ಮಾತ್ತಸ್ಮಾದುತ್ಸೋದಪಾನಜಾಃ | ಕಿಞ್ಚಿನ್ಮುಕ್ತ್ವಾ ಶಿರೋದೇಶಮತ್ಯರ್ಥಂ ಗುರವಸ್ತು ತೇ ||೧೨೩|| ಅಧಸ್ತಾದ್ಗುರವೋ ಜ್ಞೇಯಾ ಮತ್ಸ್ಯಾಃ ಸಾಗರಸಮ್ಭವಾಃ | ಉರೋವಿಚರಣಾತ್ತೇಷಾಂ ಪೂರ್ವಮಙ್ಗಂ ಲಘು ಸ್ಮೃತಮ್ ||೧೨೪|| ಇತ್ಯಾನೂಪೋ ಮಹಾಷ್ಯನ್ದೀ ಮಾಂಸವರ್ಗ ಉದೀರಿತಃ ||೧೨೫||

Adhikarana 117 (126) · Śloka 126

ತತ್ರ ಶುಷ್ಕಪೂತಿವ್ಯಾಧಿವಿಷಸರ್ಪಹತದಿಗ್ಧವಿದ್ಧಜೀರ್ಣಕೃಶಬಾಲಾನಾಮಸಾತ್ಮ್ಯಚಾರಿಣಾಂ ಚ ಮಾಂಸಾನ್ಯಭಕ್ಷ್ಯಾಣಿ, ಯಸ್ಮಾದ್ವಿಗತವ್ಯಾಪನ್ನಾಪಹತಪರಿಣತಾಲ್ಪಾಸಮ್ಪೂರ್ಣವೀರ್ಯತ್ವಾದ್ದೋಷಕರಾಣಿ ಭವನ್ತಿ; ಏಭ್ಯೋಽನ್ಯೇಷಾಮುಪಾದೇಯಂ ಮಾಂಸಮಿತಿ ||೧೨೬||

Adhikarana 118 (127-128) · Śloka 128

ಅರೋಚಕಂ ಪ್ರತಿಶ್ಯಾಯಂ ಗುರು ಶುಷ್ಕಂ ಪ್ರಕೀರ್ತಿತಮ್ | ವಿಷವ್ಯಾಧಿಹತಂ ಮೃತ್ಯುಂ ಬಾಲಂ ಛರ್ದಿಂ ಚ ಕೋಪಯೇತ್ ||೧೨೭|| ಕಾಸಶ್ವಾಸಕರಂ ವೃದ್ಧಂ ತ್ರಿದೋಷಂ ವ್ಯಾಧಿದೂಷಿತಮ್ | ಕ್ಲಿನ್ನಮುತ್ಕ್ಲೇಶಜನನಂ ಕೃಶಂ ವಾತಪ್ರಕೋಪಣಮ್ ||೧೨೮||

Adhikarana 119 (129) · Śloka 129

ಸ್ತ್ರಿಯಶ್ಚತುಷ್ಪಾತ್ಸು, ಪುಮಾಂಸೋ ವಿಹಙ್ಗೇಷು, ಮಹಾಶರೀರೇಷ್ವಲ್ಪಶರೀರಾಃ, ಅಲ್ಪಶರೀರೇಷು ಮಹಾಶರೀರಾಃ, ಪ್ರಧಾನತಮಾಃ; ಏವಮೇಕಜಾತೀಯಾನಾಂ ಮಹಾಶರೀರೇಭ್ಯಃ ಕೃಶಶರೀರಾಃಪ್ರಧಾನತಮಾಃ ||೧೨೯||

Adhikarana 120 (130-133) · Śloka 133

ಸ್ಥಾನಾದಿಕೃತಂ ಮಾಂಸಸ್ಯ ಗುರುಲಾಘವಮುಪದೇಕ್ಷ್ಯಾಮಃ | ತದ್ಯಥಾ- ರಕ್ತಾದಿಷು ಶುಕ್ರಾನ್ತೇಷು ಧಾತುಷೂತ್ತರೋತ್ತರಾ ಗುರುತರಾಃ, ತಥಾ ಸಕ್ಥಿಸ್ಕನ್ಧಕ್ರೋಡಶಿರಃಪಾದಕರಕಟೀಪೃಷ್ಠಚರ್ಮಕಾಲೇಯಕಯಕೃದನ್ತ್ರಾಣಿ ||೧೩೦|| ಶಿರಃಸ್ಕನ್ಧಂ ಕಟೀ ಪೃಷ್ಠಂ ಸಕ್ಥಿನೀ ಚಾತ್ಮಪಕ್ಷಯೋಃ | ಗುರು ಪೂರ್ವಂ ವಿಜಾನೀಯಾದ್ಧಾತವಸ್ತು ಯಥೋತ್ತರಮ್ ||೧೩೧|| ಸರ್ವಸ್ಯ ಪ್ರಾಣಿನೋ ದೇಹೇ ಮಧ್ಯೋ ಗುರುರುದಾಹೃತಃ | ಪೂರ್ವಭಾಗೋ ಗುರುಃ ಪುಂಸಾಮಧೋಭಾಗಸ್ತು ಯೋಷಿತಾಮ್ ||೧೩೨|| ಉರೋಗ್ರೀವಂ ವಿಹಙ್ಗಾನಾಂ ವಿಶೇಷೇಣ ಗುರು ಸ್ಮೃತಮ್ | ಪಕ್ಷೋತ್ಕ್ಷೇಪಾತ್ಸಮೋ ದೃಷ್ಟೋ ಮಧ್ಯಭಾಗಸ್ತು ಪಕ್ಷಿಣಾಮ್ ||೧೩೩||

Adhikarana 121 (134) · Śloka 135

ಅತೀವ ರೂಕ್ಷಂ ಮಾಂಸಂ ತು ವಿಹಙ್ಗಾನಾಂ ಫಲಾಶಿನಾಮ್ | ಬೃಂಹಣಂ ಮಾಂಸಮತ್ಯರ್ಥಂ ಖಗಾನಾಂ ಪಿಶಿತಾಶಿನಾಮ್ ||೧೩೪|| ಮತ್ಸ್ಯಾಶಿನಾಂ ಪಿತ್ತಕರಂ ವಾತಘ್ನಂ ಧಾನ್ಯಚಾರಿನಾಮ್ |೧೩೫|

Adhikarana 122 (135-136) · Śloka 136

ಜಲಜಾನೂಪಜಾ ಗ್ರಾಮ್ಯಾ ಕ್ರಚ್ಯಾದೈಕಶಫಾಸ್ತಥಾ ||೧೩೫|| ಪ್ರಸಹಾ ಬಿಲವಾಸಾಶ್ಚ ಯೇ ಚ ಜಙ್ಘಾಲಸಞ್ಜ್ಞಿತಾಃ | ಪ್ರತುದಾ ವಿಷ್ಕಿರಾಶ್ಚೈವ ಲಘವಃ ಸ್ಯುರ್ಯಥೋತ್ತರಮ್ | ಅಲ್ಪಾಭಿಷ್ಯನ್ದಿನಶ್ಚೈವ ಯಥಾಪೂರ್ವಮತೋಽನ್ಯಥಾ ||೧೩೬||

Adhikarana 123 (137) · Śloka 137

ಪ್ರಾಮಾಣಾಧಿಕಾಸ್ತು ಸ್ವಜಾತಾವಲ್ಪಸಾರಾ ಗುರವಶ್ಚ | ಸರ್ವಪ್ರಾಣಿನಾಂ ಸರ್ವಶರೀರೇಭ್ಯಃ ಪ್ರಧಾನತಮಾ ಭವನ್ತಿ ಯಕೃತ್ಪ್ರದೇಶವರ್ತಿನಸ್ತಾನಾದದೀತ; ಪ್ರಧಾನಾಲಾಭೇ ಮಧ್ಯಮವಯಸ್ಕಂ ಸದ್ಯಸ್ಕಮಕ್ಲಿಷ್ಟಮುಪಾದೇಯಂ ಮಾಂಸಮಿತಿ ||೧೩೭||

Adhikarana 124 (138) · Śloka 138

ಭವತಿ ಚಾತ್ರ- ಚರಃ ಶರೀರಾವಯವಾಃ ಸ್ವಭಾವೋ ಧಾತವಃ ಕ್ರಿಯಾ | ಲಿಙ್ಗಂ ಪ್ರಮಾಣಂ ಸಂಸ್ಕಾರೋ ಮಾತ್ರಾ ಚಾಸ್ಮಿನ್ ಪರೀಕ್ಷ್ಯತೇ ||೧೩೮|| ಇತಿ ಮಾಂಸವರ್ಗಃ |

Adhikarana 125 (139) · Śloka 139

ಅಥ ಫಲವರ್ಗಃ | ಅತ ಊರ್ಧ್ವಂ ಫಲಾನ್ಯುಪದೇಕ್ಷ್ಯಾಮಃ | ತದ್ಯಥಾ- ದಾಡಿಮಾಮಲಕಬದರಕೋಲಕರ್ಕನ್ಧುಸೌವೀರಸಿಞ್ಚಿತಿಕಾಫಲಕಪಿತ್ಥಮಾತುಲುಙ್ಗಾಮ್ರಾಮ್ರಾತಕಕರಮರ್ದಪ್ರಿಯಾಲನಾರಙ್ಗ- ಜಮ್ಬೀರಲಕುಚಭವ್ಯಪಾರಾವತವೇತ್ರಫಲಪ್ರಾಚೀನಾಮಲಕತಿನ್ತಿಡೀಕನೀಪಕೋಶಾಮ್ರಾಮ್ಲೀಕಾಪ್ರಭೃತೀನಿ ||೧೩೯||

Adhikarana 126 (140) · Śloka 140

ಅಮ್ಲಾನಿ ರಸತಃ ಪಾಕೇ ಗುರೂಣ್ಯುಷ್ಣಾನಿ ವೀರ್ಯತಃ | ಪಿತ್ತಲಾನ್ಯನಿಲಘ್ನಾನಿ ಕಫೋತ್ಕ್ಲೇಶಕರಾಣಿ ಚ ||೧೪೦||

Adhikarana 127 (141-142) · Śloka 142

ಕಷಾಯಾನುರಸಂ ತೇಷಾಂ ದಾಡಿಮಂ ನಾತಿಪಿತ್ತಲಮ್ | ದೀಪನೀಯಂ ರುಚಿಕರಂ ಹೃದ್ಯಂ ವರ್ಚೋವಿಬನ್ಧನಮ್ ||೧೪೧|| ದ್ವಿವಿಧಂ ತತ್ತು ವಿಜ್ಞೇಯಂ ಮಧುರಂ ಚಾಮ್ಲಮೇವ ಚ | ತ್ರಿದೋಷಘ್ನಂ ತು ಮಧುರಮಮ್ಲಂ ವಾತಕಫಾಪಹಮ್ ||೧೪೨||

Adhikarana 128 (143-148) · Śloka 148

ಅಮ್ಲಂ ಸಮಧುರಂ ತಿಕ್ತಂ ಕಷಾಯಂ ಕಟುಕಂ ಸರಮ್ | ಚಕ್ಷುಷ್ಯಂ ಸರ್ವದೋಷಘ್ನಂ ವೃಷ್ಯಮಾಮಲಕೀಫಲಮ್ ||೧೪೩|| ಹನ್ತಿ ವಾತಂ ತದಮ್ಲತ್ವಾತ್ ಪಿತ್ತಂ ಮಾಧುರ್ಯಶೈತ್ಯತಃ | ಕಫಂ ರೂಕ್ಷಕಷಾಯತ್ವಾತ್ ಫಲೇಭ್ಯೋಽಭ್ಯಧಿಕಂ ಚ ತತ್ ||೧೪೪|| ಕರ್ಕನ್ಧುಕೋಲಬದರಮಾಮಂ ಪಿತ್ತಕಫಾವಹಮ್ | ಪಕ್ವಂ ಪಿತ್ತಾನಿಲಹರಂ ಸ್ನಿಗ್ಧಂ ಸಮಧುರಂ ಸರಮ್ ||೧೪೫|| ಪುರಾತನಂ ತೃಟ್ಶಮನಂ ಶ್ರಮಘ್ನಂ ದೀಪನಂ ಲಘು | ಸೌವೀರಂ ಬದರಂ ಸ್ನಿಗ್ಧಂ ಮಧುರಂ ವಾತಪಿತ್ತಜಿತ್ ||೧೪೬|| ಕಷಾಯಂ ಸ್ವಾದು ಸಙ್ಗ್ರಾಹಿ ಶೀತಂ ಸಿಞ್ಚಿತಿಕಾಫಲಮ್ | ಆಮಂ ಕಪಿತ್ಥಮಸ್ವರ್ಯಂ ಕಫಘ್ನಂ ಗ್ರಾಹಿ ವಾತಲಮ್ ||೧೪೭|| ಕಫಾನಿಲಹರಂ ಪಕ್ವಂ ಮಧುರಾಮ್ಲರಸಂ ಗುರು | ಶ್ವಾಸಕಾಸಾರುಚಿಹರಂ ತೃಷ್ಣಾಘ್ನಂ ಕಣ್ಠಶೋಧನಮ್ ||೧೪೮||

Adhikarana 130 (149-151) · Śloka 152

ಲಘ್ವಮ್ಲಂ ದೀಪನಂ ಹೃದ್ಯಂ ಮಾತುಲುಙ್ಗಮುದಾಹೃತಮ್ | ತ್ವಕ್ ತಿಕ್ತಾ ದುರ್ಜರಾ ತಸ್ಯ ವಾತಕ್ರಿಮಿಕಫಾಪಹಾ ||೧೪೯|| ಸ್ವಾದು ಶೀತಂ ಗುರು ಸ್ನಿಗ್ಧಂ ಮಾಂಸಂ ಮಾರುತಪಿತ್ತಜಿತ್ | ಮೇಧ್ಯಂ ಶೂಲಾನಿಲಚ್ಛರ್ದಿಕಫಾರೋಚಕನಾಶನಮ್ ||೧೫೦|| ದೀಪನಂ ಲಘು ಸಙ್ಗ್ರಾಹಿ ಗುಲ್ಮಾರ್ಶೋಘ್ನಂ ತು ಕೇಸರಮ್ | ಶೂಲಾಜೀರ್ಣವಿಬನ್ಧೇಷು ಮನ್ದೇಽಗ್ನೌ ಕಫಮಾರುತೇ ||೧೫೧|| ಅರುಚೌ ಚ ವಿಶೇಷೇಣ ರಸಸ್ತಸ್ಯೋಪದಿಶ್ಯತೇ |೧೫೨|

Adhikarana 131 (152-154) · Śloka 155

ಪಿತ್ತಾನಿಲಕರಂ ಬಾಲಂ ಪಿತ್ತಲಂ ಬದ್ಧಕೇಸರಮ್ ||೧೫೨|| ಹೃದ್ಯಂ ವರ್ಣಕರಂ ರುಚ್ಯಂ ರಕ್ತಮಾಂಸಬಲಪ್ರದಮ್ | ಕಷಾಯಾನುರಸಂ ಸ್ವಾದು ವಾತಘ್ನಂ ಬೃಂಹಣಂ ಗುರು ||೧೫೩|| ಪಿತ್ತಾವಿರೋಧಿ ಸಮ್ಪಕ್ವಮಾಮ್ರಂ ಶುಕ್ರವಿವರ್ಧನಮ್ | ಬೃಂಹಣಂ ಮಧುರಂ ಬಲ್ಯಂ ಗುರು ವಿಷ್ಟಭ್ಯ ಜೀರ್ಯತಿ ||೧೫೪|| ಆಮ್ರಾತಕಫಲಂ ವೃಷ್ಯಂ ಸಸ್ನೇಹಂ ಶ್ಲೇಷ್ಮವರ್ಧನಮ್ |೧೫೫|

Adhikarana 132 (155) · Śloka 155

ತ್ರಿದೋಷವಿಷ್ಟಮ್ಭಕರಂ ಲಕುಚಂ ಶುಕ್ರನಾಶನಮ್ ||೧೫೫||

Adhikarana 133 (156-162) · Śloka 162

ಅಮ್ಲಂ ತೃಷಾಪಹಂ ರುಚ್ಯಂ ಪಿತ್ತಕೃತ್ ಕರಮರ್ದಕಮ್ | ವಾತಪಿತ್ತಹರಂ ವೃಷ್ಯಂ ಪ್ರಿಯಾಲಂ ಗುರು ಶೀತಲಮ್ ||೧೫೬|| ಹೃದ್ಯಂ ಸ್ವಾದು ಕಷಾಯಾಮ್ಲಂ ಭವ್ಯಮಾಸ್ಯವಿಶೋಧನಮ್ | ಪಿತ್ತಶ್ಲೇಷ್ಮಹರಂ ಗ್ರಾಹಿ ಗುರು ವಿಷ್ಟಮ್ಭಿ ಶೀತಲಮ್ ||೧೫೭|| ಪಾರಾವತಂ ಸಮಧುರಂ ರುಚ್ಯಮತ್ಯಗ್ನಿವಾತನುತ್ | ಗರದೋಷಹರಂ ನೀಪಂ ಪ್ರಾಚೀನಾಮಲಕಂ ತಥಾ ||೧೫೮|| ವಾತಾಪಹಂ ತಿನ್ತಿಡೀಕಮಾಮಂ ಪಿತ್ತಬಲಾಸಕೃತ್ | ಗ್ರಾಹ್ಯುಷ್ಣಂ ದೀಪನಂ ರುಚ್ಯಂ ಸಮ್ಪಕ್ವಂ ಕಫವಾತನುತ್ ||೧೫೯|| ತಸ್ಮಾದಲ್ಪಾನ್ತರಗುಣಂ ಕೋಶಾಮ್ರಫಲಮುಚ್ಯತೇ | ಅಮ್ಲೀಕಾಯಾಃ ಫಲಂ ಪಕ್ವಂ ತದ್ವದ್ಭೇದಿ ತು ಕೇವಲಮ್ ||೧೬೦|| ಅಮ್ಲಂ ಸಮಧುರಂ ಹೃದ್ಯಂ ವಿಶದಂ ಭಕ್ತರೋಚನಮ್ | ವಾತಘ್ನಂ ದುರ್ಜರಂ ಪ್ರೋಕ್ತಂ ನಾರಙ್ಗಸ್ಯ ಫಲಂ ಗುರು ||೧೬೧|| ತೃಷ್ಣಾಶೂಲಕಫೋತ್ಕ್ಲೇಶಚ್ಛರ್ದಿಶ್ವಾಸನಿವಾರಣಮ್ | ವಾತಶ್ಲೇಷ್ಮವಿಬನ್ಧಘ್ನಂ ಜಮ್ಬೀರಂ ಗುರು ಪಿತ್ತಕೃತ್ | ಐರಾವತಂ ದನ್ತಶಠಮಮ್ಲಂ ಶೋಣಿತಪಿತ್ತಕೃತ್ ||೧೬೨||

Adhikarana 134 (163) · Śloka 163

ಕ್ಷೀರವೃಕ್ಷಫಲಜಾಮ್ಬವರಾಜಾದನತೋದನಶೀತಫಲತಿನ್ದುಕಬಕುಲಧನ್ವನಾಶ್ಮನ್ತಕಾಶ್ವಕರ್ಣಫಲ್ಗು- ಪರೂಷಕಗಾಙ್ಗೇರುಕೀಪುಷ್ಕರವರ್ತಿಬಿಲ್ವಬಿಮ್ಬೀಪ್ರಭೃತೀನಿ ||೧೬೩||

Adhikarana 135 (164) · Śloka 164

ಫಲಾನ್ಯೇತಾನಿ ಶೀತಾನಿ ಕಫಪಿತ್ತಹರಾಣಿ ಚ | ಸಙ್ಗ್ರಾಹಕಾಣಿ ರೂಕ್ಷಾಣಿ ಕಷಾಯಮಧುರಾಣಿ ಚ ||೧೬೪||

Adhikarana 136 (164-176) · Śloka 176

ಕ್ಷೀರವೃಕ್ಷಫಲಂ ತೇಷಾಂ ಗುರು ವಿಷ್ಟಮ್ಭಿ ಶೀತಲಮ್ | ಕಷಾಯಂ ಮಧುರಂ ಸಾಮ್ಲಂ ನಾತಿಮಾರುತಕೋಪನಮ್ ||೧೬೫|| ಅತ್ಯರ್ಥಂ ವಾತಲಂ ಗ್ರಾಹಿ ಜಾಮ್ಬವಂ ಕಫಪಿತ್ತಜಿತ್ | ಸ್ನಿಗ್ಧಂ ಸ್ವಾದು ಕಷಾಯಂ ಚ ರಾಜಾದನಫಲಂ ಗುರು ||೧೬೬|| ಕಷಾಯಂ ಮಧುರಂ ರೂಕ್ಷಂ ತೋದನಂ ಕಫವಾತಜಿತ್ | ಅಮ್ಲೋಷ್ಣಂ ಲಘು ಸಙ್ಗ್ರಾಹಿ ಸ್ನಿಗ್ಧಂ ಪಿತ್ತಾಗ್ನಿವರ್ಧನಮ್ ||೧೬೭|| ಆಮಂ ಕಷಾಯಂ ಸಙ್ಗ್ರಾಹಿ ತಿನ್ದುಕಂ ವಾತಕೋಪನಮ್ | ವಿಪಾಕೇ ಗುರು ಸಮ್ಪಕ್ವಂ ಮಧುರಂ ಕಫಪಿತ್ತಜಿತ್ ||೧೬೮|| ಮಧುರಂ ಚ ಕಷಾಯಂ ಚ ಸ್ನಿಗ್ಧಂ ಸಙ್ಗ್ರಾಹಿ ಬಾಕುಲಮ್ | ಸ್ಥಿರೀಕರಂ ಚ ದನ್ತಾನಾಂ ವಿಶದಂ ಫಲಮುಚ್ಯತೇ ||೧೬೯|| ಸಕಷಾಯಂ ಹಿಮಂ ಸ್ವಾದು ಧಾನ್ವನಂ ಕಫವಾತಜಿತ್ | ತದ್ವದ್ಗಾಙ್ಗೇರುಕಂ ವಿದ್ಯಾದಶ್ಮನ್ತಕಫಲಾನಿ ಚ ||೧೭೦|| ವಿಷ್ಟಮ್ಭಿ ಮಧುರಂ ಸ್ನಿಗ್ಧಂ ಫಲ್ಗುಜಂ ತರ್ಪಣಂ ಗುರು | ಅತ್ಯಮ್ಲಮೀಷನ್ಮಧುರಂ ಕಷಾಯಾನುರಸಂ ಲಘು ||೧೭೧|| ವಾತಘ್ನಂ ಪಿತ್ತಜನಮಾಮಂ ವಿದ್ಯಾತ್ ಪರುಷಕಮ್ | ತದೇವ ಪಕ್ವಂ ಮಧುರಂ ವಾತಪಿತ್ತನಿಬರ್ಹಣಮ್ ||೧೭೨|| ವಿಪಾಕೇ ಮಧುರಂ ಶೀತಂ ರಕ್ತಪಿತ್ತಪ್ರಸಾದನಮ್ | ಪೌಷ್ಕರಂ ಸ್ವಾದು ವಿಷ್ಟಮ್ಭಿ ಬಲ್ಯಂ ಕಫಕರಂ ಫಲಮ್ ||೧೭೩|| ಕಫಾನಿಲಹರಂ ತೀಕ್ಷ್ಣಂ ಸ್ನಿಗ್ಧಂ ಸಙ್ಗ್ರಾಹಿ ದೀಪನಮ್ | ಕಟುತಿಕ್ತಕಷಾಯೋಷ್ಣಂ ಬಾಲಂ ಬಿಲ್ವಮುದಾಹೃತಮ್ ||೧೭೪|| ವಿದ್ಯಾತ್ತದೇವ ಸಮ್ಪಕ್ವಂ ಮಧುರಾನುರಸಂ ಗುರು | ವಿದಾಹಿ ವಿಷ್ಟಮ್ಭಕರಂ ದೋಷಕೃತ್ ಪೂತಿಮಾರುತಮ್ ||೧೭೫|| ಬಿಮ್ಬೀಫಲಂ ಸಾಶ್ವಕರ್ಣಂ ಸ್ತನ್ಯಕೃತ್ ಕಫಪಿತ್ತಜಿತ್ | ತೃಡ್ದಾಹಜ್ವರಪಿತ್ತಾಸೃಕ್ಕಾಸಶ್ವಾಸಕ್ಷಯಾಪಹಮ್ ||೧೭೬||

Adhikarana 137 (177) · Śloka 177

ತಾಲನಾಲಿಕೇರಪನಸಮೋಚಪ್ರಭೃತೀನಿ ||೧೭೭||

Adhikarana 138 (178) · Śloka 178

ಸ್ವಾದುಪಾಕರಸಾನ್ಯಾಹುರ್ವಾತಪಿತ್ತಹರಾಣಿ ಚ | ಬಲಪ್ರದಾನಿ ಸ್ನಿಗ್ಧಾನಿ ಬೃಂಹಣಾನಿ ಹಿಮಾನಿ ಚ ||೧೭೮||

Adhikarana 139 (179-181) · Śloka 181

ಫಲಂ ಸ್ವಾದುರಸಂ ತೇಷಾಂ ತಾಲಜಂ ಗುರು ಪಿತ್ತಜಿತ್ | ತದ್ಬೀಜಂ ಸ್ವಾದುಪಾಕಂ ತು ಮೂತ್ರಲಂ ವಾತಪಿತ್ತಜಿತ್ ||೧೭೯|| ನಾಲಿಕೇರಂ ಗುರು ಸ್ನಿಗ್ಧಂ ಪಿತ್ತಘ್ನಂ ಸ್ವಾದು ಶೀತಲಮ್ | ಬಲಮಾಂಸಪ್ರದಂ ಹೃದ್ಯಂ ಬೃಂಹಣಂ ಬಸ್ತಿಶೋಧನಮ್ ||೧೮೦|| ಪನಸಂ ಸಕಷಾಯಂ ತು ಸ್ನಿಗ್ಧಂ ಸ್ವಾದುರಸಂ ಗುರು | ಮೌಚಂ ಸ್ವಾದುರಸಂ ಪ್ರೋಕ್ತಂ ಕಷಾಯಂ ನಾತಿಶೀತಲಮ್ | ರಕ್ತಪಿತ್ತಹರಂ ವೃಷ್ಯಂ ರುಚ್ಯಂ ಶ್ಲೇಷ್ಮಕರಂ ಗುರು ||೧೮೧||

Adhikarana 140 (182) · Śloka 182

ದ್ರಾಕ್ಷಾಕಾಶ್ಮರ್ಯಮಧೂಕಪುಷ್ಪಖರ್ಜೂರಪ್ರಭೃತೀನಿ ||೧೮೨||

Adhikarana 141 (183) · Śloka 183

ರಕ್ತಪಿತ್ತಹರಾಣ್ಯಾಹುರ್ಗುರೂಣಿ ಮಧುರಾಣಿ ಚ |೧೮೩|

Adhikarana 142 (183-186) · Śloka 186

ತೇಷಾಂ ದ್ರಾಕ್ಷಾ ಸರಾ ಸ್ವರ್ಯಾ ಮಧುರಾ ಸ್ನಿಗ್ಧಶೀತಲಾ ||೧೮೩|| ರಕ್ತಪಿತ್ತಜ್ವರಶ್ವಾಸತೃಷ್ಣಾದಾಹಕ್ಷಯಾಪಹಾ | ಹೃದ್ಯಂ ಮೂತ್ರವಿಬನ್ಧಘ್ನಂ ಪಿತ್ತಾಸೃಗ್ವಾತನಾಶನಮ್ ||೧೮೪|| ಕೇಶ್ಯಂ ರಸಾಯನಂ ಮೇಧ್ಯಂ ಕಾಶ್ಮರ್ಯಂ ಫಲಮುಚ್ಯತೇ | ಕ್ಷತಕ್ಷಯಾಪಹಂ ಹೃದ್ಯಂ ಶೀತಲಂ ತರ್ಪಣಂ ಗುರು ||೧೮೫|| ರಸೇ ಪಾಕೇ ಚ ಮಧುರಂ ಖಾರ್ಜೂರಂ ರಕ್ತಪಿತ್ತನುತ್ | ಬೃಂಹಣೀಯಮಹೃದ್ಯಂ ಚ ಮಧೂಕಕುಸುಮಂ ಗುರು | ವಾತಪಿತ್ತೋಪಶಮನಂ ಫಲಂ ತಸ್ಯೋಪದಿಶ್ಯತೇ ||೧೮೬||

Adhikarana 143 (187) · Śloka 187

ವಾತಾಮಾಕ್ಷೋಡಾಭಿಷುಕನಿಚುಲಪಿಚುನಿಕೋಚಕೋರುಮಾಣಪ್ರಭೃತೀನಿ ||೧೮೭||

Adhikarana 144 (188) · Śloka 188

ಪಿತ್ತಶ್ಲೇಷ್ಮಹರಾಣ್ಯಾಹುಃ ಸ್ನಿಗ್ಧೋಷ್ಣಾನಿ ಗುರೂಣಿ ಚ | ಬೃಂಹಣಾನ್ಯನಿಲಘ್ನಾನಿ ಬಲ್ಯಾನಿ ಮಧುರಾಣಿ ಚ ||೧೮೮||

Adhikarana 145 (189) · Śloka 189

ಕಷಾಯಂ ಕಫಪಿತ್ತಘ್ನಂ ಕಿಞ್ಚಿತ್ತಿಕ್ತಂ ರುಚಿಪ್ರದಮ್ | ಹೃದ್ಯಂ ಸುಗನ್ಧಿ ವಿಶದಂ ಲವಲೀಫಲಮುಚ್ಯತೇ ||೧೮೯||

Adhikarana 146 (190) · Śloka 191

ವಸಿರಂ ಶೀತಪಾಕ್ಯಂ ಚ ಸಾರುಷ್ಕರನಿಬನ್ಧನಮ್ | ವಿಷ್ಟಮ್ಭಿ ದುರ್ಜರಂ ರೂಕ್ಷಂ ಶೀತಲಂ ವಾತಕೋಪನಮ್ ||೧೯೦|| ವಿಪಾಕೇ ಮಧುರಂ ಚಾಪಿ ರಕ್ತಪಿತ್ತಪ್ರಸಾದನನ್ |೧೯೧|

Adhikarana 147 (191-193) · Śloka 193

ಐರಾವತಂ ದನ್ತಶಠಮಮ್ಲಂ ಶೋಣಿತಪಿತ್ತಕೃತ್ ||೧೯೧|| ಶೀತಂ ಕಷಾಯಂ ಮಧುರಂ ಟಙ್ಕಂ ಮಾರುತಕೃದ್ಗುರು | ಸ್ನಿಗ್ಧೋಷ್ಣಂ ತಿಕ್ತಮಧುರಂ ವಾತಶ್ಲೇಷ್ಮಘ್ನಮೈಙ್ಗುದಮ್ ||೧೯೨|| ಶಮೀಫಲಂ ಗುರು ಸ್ವಾದು ರೂಕ್ಷೋಷ್ಣಂ ಕೇಶನಾಶನಮ್ | ಗುರು ಶ್ಲೇಷ್ಮಾತಕಫಲಂ ಕಫಕೃನ್ಮಧುರಂ ಹಿಮಮ್ ||೧೯೩||

Adhikarana 148 (194) · Śloka 194

ಕರೀರಾಕ್ಷಿಕಪೀಲೂನಿ ತೃಣಶೂನ್ಯಫಲಾನಿ ಚ | ಸ್ವಾದುತಿಕ್ತಕಟೂಷ್ಣಾನಿ ಕಫವಾತಹರಾಣಿ ಚ ||೧೯೪||

Adhikarana 149 (195) · Śloka 195

ತಿಕ್ತಂ ಪಿನ್ತ್ತಕರಂ ತೇಷಾಂ ಸರಂ ಕಟುವಿಪಾಕಿ ಚ | ತೀಕ್ಷ್ಣೋಷ್ಣಂ ಕಟುಕಂ ಪೀಲು ಸಸ್ನೇಹಂ ಕಫವಾತಜಿತ್ ||೧೯೫||

Adhikarana 150 (196) · Śloka 196

ಆರುಷ್ಕರಂ ತೌವರಕಂ ಕಷಾಯಂ ಕಟುಪಾಕಿ ಚ | ಉಷ್ಣಂ ಕೃಮಿಜ್ವರಾನಾಹಮೇಹೋದಾವರ್ತನಾಶನಮ್ | ಕುಷ್ಠಗುಲ್ಮೋದರಾರ್ಶೋಘ್ನಂ ಕಟುಪಾಕಿ ತಥೈವ ಚ ||೧೯೬||

Adhikarana 151 (197-198) · Śloka 198

ಕರಞ್ಜಕಿಂಶುಕಾರಿಷ್ಟಫಲಂ ಜನ್ತುಪ್ರಮೇಹನುತ್ | ಅಙ್ಕೋಲಸ್ಯ ಫಲಂ ವಿಸ್ರಂ ಗುರು ಶ್ಲೇಷ್ಮಹರಂ ಹಿಮಮ್ ||೧೯೭|| ರೂಕ್ಷೋಷ್ಣಂ ಕಟುಕಂ ಪಾಕೇ ಲಘು ವಾತಕಫಾಪಹಮ್ | ತಿಕ್ತಮೀಷದ್ವಿಷಹಿತಂ ವಿಡಙ್ಗಂ ಕೃಮಿನಾಶನಮ್ ||೧೯೮||

Adhikarana 152 (199) · Śloka 199

ವ್ರಣ್ಯಮುಷ್ಣಂ ಸರಂ ಮೇಧ್ಯಂ ದೋಷಘ್ನಂ ಶೋಫಕುಷ್ಠನುತ್ | ಕಷಾಯಂ ದೀಪನಂ ಚಾಮ್ಲಂ ಚಕ್ಷುಷ್ಯಂ ಚಾಭಯಾಫಲಮ್ ||೧೯೯||

Adhikarana 153 (200) · Śloka 200

ಭೇದನಂ ಲಘು ರೂಕ್ಷೋಷ್ಣಂ ವೈಸ್ವರ್ಯಕ್ರಿಮಿನಾಶನಮ್ | ಚಕ್ಷುಷ್ಯಂ ಸ್ವಾದುಪಾಕ್ಯಾಕ್ಷಂ ಕಷಾಯಂ ಕಫಪಿತ್ತಜಿತ್ ||೨೦೦||

Adhikarana 154 (201) · Śloka 201

ಕಫಪಿತ್ತಹರಂ ರೂಕ್ಷಂ ವಕ್ತ್ರಕ್ಲೇದಮಲಾಪಹಮ್ | ಕಷಾಯಮೀಷನ್ಮಧುರಂ ಕಿಞ್ಚಿತ್ ಪೂಗಫಲಂ ಸರಮ್ ||೨೦೧||

Adhikarana 155 (202) · Śloka 203

ಜಾತೀಕೋಶೋಽಥ ಕರ್ಪೂರಂ ಜಾತೀಕಟುಕಯೋಃ ಫಲಮ್ | ಕಕ್ಕೋ(ಙ್ಕೋ)ಲಕಂ ಲವಙ್ಗಂ ಚ ತಿಕ್ತಂ ಕಟು ಕಫಾಪಹಮ್ ||೨೦೨|| ಲಘು ತೃಷ್ಣಾಪಹಂ ವಕ್ತ್ರಕ್ಲೇದದೌರ್ಗನ್ಧ್ಯನಾಶನಮ್ |೨೦೩|

Adhikarana 156 (203) · Śloka 204

ಸತಿಕ್ತಃ ಸುರಭಿಃ ಶೀತಃ ಕರ್ಪೂರೋ ಲಘು ಲೇಖನಃ ||೨೦೩|| ತೃಷ್ಣಾಯಾಂ ಮುಖಶೋಷೇ ಚ ವೈರಸ್ಯೇ ಚಾಪಿ ಪೂಜಿತಃ |೨೦೪|

Adhikarana 157 (204) · Śloka 204

ಲತಾಕಸ್ತೂರಿಕಾ ತದ್ವಚ್ಛೀತಾ ಬಸ್ತಿವಿಶೋಧನೀ ||೨೦೪||

Adhikarana 158 (205-207) · Śloka 207

ಪ್ರಿಯಾಲಮಜ್ಜಾ ಮಧುರೋ ವೃಷ್ಯಃ ಪಿತ್ತಾನಿಲಾಪಹಃ | ಬೈಭೀತಕೋ ಮದಕರಃ ಕಫಮಾರುತನಾಶನಃ ||೨೦೫|| ಕಷಾಯಮಧುರೋ ಮಜ್ಜಾ ಕೋಲಾನಾಂ ಪಿತ್ತನಾಶನಃ | ತೃಷ್ಣಾಚ್ಛರ್ದ್ಯನಿಲಘ್ನಶ್ಚ ತದ್ವದಾಮಲಕಸ್ಯ ಚ ||೨೦೬|| ಬೀಜಪೂರಕಶಮ್ಯಾಕಮಜ್ಜಾ ಕೋಶಾಮ್ರಸಮ್ಭವಃ | ಸ್ವಾದುಪಾಕೋಽಗ್ನಿಬಲದಃ ಸ್ನಿಗ್ಧಃ ಪಿತ್ತಾನಿಲಾಪಹಃ ||೨೦೭||

Adhikarana 159 (208) · Śloka 208

ಯಸ್ಯ ಯಸ್ಯ ಫಲಸ್ಯೇಹ ವೀರ್ಯಂ ಭವತಿ ಯಾದೃಶಮ್ | ತಸ್ಯ ತಸ್ಯೈವ ವೀರ್ಯೇಣ ಮಜ್ಜಾನಮಪಿ ನಿರ್ದಿಶೇತ್ ||೨೦೮||

Adhikarana 160 (209) · Śloka 209

ಫಲೇಷು ಪರಿಪಕ್ವಂ ಯದ್ಗುಣವತ್ತದುದಾಹೃತಮ್ | ಬಿಲ್ವಾದನ್ಯತ್ರ ವಿಜ್ಞೇಯಮಾಮಂ ತದ್ಧಿ ಗುಣೋತ್ತರಮ್ | ಗ್ರಾಹ್ಯುಷ್ಣಂ ದೀಪನಂ ತದ್ಧಿ ಕಷಾಯಕಟುತಿಕ್ತಕಮ್ ||೨೦೯||

Adhikarana 161 (210) · Śloka 210

ವ್ಯಾಧಿತಂ ಕೃಮಿಜುಷ್ಟಂ ಚ ಪಾಕಾತೀತಮಕಾಲಜಮ್ | ವರ್ಜನೀಯಂ ಫಲಂ ಸರ್ವಮಪರ್ಯಾಗತಮೇವ ಚ ||೨೧೦|| ಇತಿ ಫಲವರ್ಗಃ |

Adhikarana 162 (211) · Śloka 211

ಅಥ ಶಾಕವರ್ಗಃ | ಶಾಕಾನ್ಯತ ಊರ್ಧ್ವಂ ವಕ್ಷ್ಯಾಮಃ | ತತ್ರ ಪುಷ್ಪಫಲಾಲಾಬುಕಾಲಿನ್ದಕಪ್ರಭೃತೀನಿ ||೨೧೧||

Adhikarana 163 (212) · Śloka 212

ಪಿತ್ತಘ್ನಾನ್ಯನಿಲಂ ಕುರ್ಯುಸ್ತಥಾ ಮನ್ದಕಫಾನಿ ಚ | ಸೃಷ್ಟಮೂತ್ರಪುರೀಷಾಣಿ ಸ್ವಾದುಪಾಕರಸಾನಿ ಚ ||೨೧೨||

Adhikarana 164 (213-215) · Śloka 215

ಪಿತ್ತಘ್ನಂ ತೇಷು ಕೂಷ್ಮಾಣ್ಡಂ ಬಾಲಂ ಮಧ್ಯಂ ಕಫಾವಹಮ್ | ಶುಕ್ಲಂ ಲಘೂಷ್ಣಂ ಸಕ್ಷಾರಂ ದೀಪನಂ ಬಸ್ತಿಶೋಧನಮ್ ||೨೧೩|| ಸರ್ವದೋಷಹರಂ ಹೃದ್ಯಂ ಪಥ್ಯಂ ಚೇತೋವಿಕಾರಿಣಾಮ್ | ದೃಷ್ಟಿಶುಕ್ರಕ್ಷಯಕರಂ ಕಾಲಿನ್ದಂ ಕಫವಾತಕೃತ್ ||೨೧೪|| ಅಲಾಬುರ್ಭಿನ್ನವಿಟ್ಕಾ ತು ರೂಕ್ಷಾ ಗುರ್ವ್ಯತಿಶೀತಲಾ | ತಿಕ್ತಾಲಾಬುರಹೃದ್ಯಾ ತು ವಾಮಿನೀ ವಾತಪಿತ್ತಜಿತ್ ||೨೧೫||

Adhikarana 165 (216) · Śloka 216

ತ್ರಪುಸೈರ್ವಾರುಕರ್ಕಾರುಕಶೀರ್ಣವೃನ್ತಪ್ರಭೃತೀನಿ ||೨೧೬||

Adhikarana 166 (217) · Śloka 217

ಸ್ವಾದುತಿಕ್ತರಸಾನ್ಯಾಹುಃ ಕಫವಾತಕರಾಣಿ ಚ | ಸೃಷ್ಟಮೂತ್ರಪುರೀಷಾಣಿ ರಕ್ತಪಿತ್ತಹರಾಣಿ ಚ ||೨೧೭||

Adhikarana 167 (218-219) · Śloka 219

ಬಾಲಂ ಸನೀಲಂ ತ್ರಪುಸಂ ತೇಷಾಂ ಪಿತ್ತಹರಂ ಸ್ಮೃತಮ್ | ತತ್ಪಾಣ್ಡು ಕಫಕೃಜ್ಜೀರ್ಣಮಮ್ಲಂ ವಾತಕಫಾಪಹಮ್ ||೨೧೮|| ಏರ್ವಾರುಕಂ ಸಕರ್ಕಾರು ಸಮ್ಪಕ್ವಂ ಕಫವಾತಕೃತ್ | ಸಕ್ಷಾರಂ ಮಧುರಂ ರುಚ್ಯಂ ದೀಪನಂ ನಾತಿಪಿತ್ತಲಮ್ ||೨೧೯||

Adhikarana 168 (220) · Śloka 220

ಸಕ್ಷಾರಂ ಮಧುರಂ ಚೈವ ಶೀರ್ಣವೃನ್ತಂ ಕಫಾಪಹಮ್ | ಭೇದನಂ ದೀಪನಂ ಹೃದ್ಯಮಾನಾಹಾಷ್ಠೀಲನುಲ್ಲಘು ||೨೨೦||

Adhikarana 169 (221) · Śloka 221

ಪಿಪ್ಪಲೀಮರಿಚಶೃಙ್ಗವೇರಾರ್ದ್ರಕಹಿಙ್ಗುಜೀರಕಕುಸ್ತುಮ್ಬುರುಜಮ್ಬೀರಸುಮುಖಸುರಸಾರ್ಜಕಭೂಸ್ತೃಣಸುಗನ್ಧಕ- ಕಾಸಮರ್ದಕಕಾಲಮಾಲಕುಠೇರಕಕ್ಷವಕಖರಪುಷ್ಪಶಿಗ್ರುಮಧುಶಿಗ್ರುಫಣಿಜ್ಝಕಸರ್ಷಪರಾಜಿಕಾಕುಲಾಹಲಾವಗುತ್ಥಗಣ್ಡೀರತಿಲಪರ್ಣಿಕಾ- ವರ್ಷಾಭೂಚಿತ್ರಕಮೂಲಕಲಶುನಕಲಾಯಪಲಾಣ್ಡುಪ್ರಭೃತೀನಿ ||೨೨೧||

Adhikarana 170 (222) · Śloka 222

ಕಟೂನ್ಯುಷ್ಣಾನಿ ರುಚ್ಯಾನಿ ವಾತಶ್ಲೇಷ್ಮಹರಾಣಿ ಚ | ಕೃತಾನ್ನೇಷೂಪಯುಜ್ಯನ್ತೇ ಸಂಸ್ಕಾರಾರ್ಥಮನೇಕಧಾ ||೨೨೨||

Adhikarana 171 (223) · Śloka 223

ತೇಷಾಂ ಗುರ್ವೀ ಸ್ವಾದುಶೀತಾ ಪಿಪ್ಪಲ್ಯಾರ್ದ್ರಾ ಕಫಾವಹಾ | ಶುಷ್ಕಾ ಕಫಾನಿಲಘ್ನೀ ಸಾ ವೃಷ್ಯಾ ಪಿತ್ತಾವಿರೋಧಿನೀ ||೨೨೩||

Adhikarana 172 (224-225) · Śloka 225

ಸ್ವಾದುಪಾಕ್ಯಾರ್ದ್ರಮರಿಚಂ ಗುರು ಶ್ಲೇಷ್ಮಪ್ರಸೇಕಿ ಚ | ಕಟೂಷ್ಣಂ ಲಘು ತಚ್ಛುಷ್ಕಮವೃಷ್ಯಂ ಕಫವಾತಜಿತ್ ||೨೨೪|| ನಾತ್ಯುಷ್ಣಂ ನಾತಿಶೀತಂ ಚ ವೀರ್ಯತೋ ಮರಿಚಂ ಸಿತಮ್ | ಗುಣವನ್ಮರಿಚೇಭ್ಯಶ್ಚ ಚಕ್ಷುಷ್ಯಂ ಚ ವಿಶೇಷತಃ ||೨೨೫||

Adhikarana 173 (226-228) · Śloka 228

ನಾಗರಂ ಕಫವಾತಘ್ನಂ ವಿಪಾಕೇ ಮಧುರಂ ಕಟು | ವೃಷ್ಯೋಷ್ಣಂ ರೋಚನಂ ಹೃದ್ಯಂ ಸಸ್ನೇಹಂ ಲಘು ದೀಪನಮ್ ||೨೨೬|| ಕಫಾನಿಲಹರಂ ಸ್ವರ್ಯಂ ವಿಬನ್ಧಾನಾಹಶೂಲನುತ್ | ಕಟೂಷ್ಣಂ ರೋಚನಂ ಹೃದ್ಯಂ ವೃಷ್ಯಂ ಚೈವಾರ್ದ್ರಕಂ ಸ್ಮೃತಮ್ ||೨೨೭|| ಲಘೂಷ್ಣಂ ಪಾಚನಂ ಹಿಙ್ಗು ದೀಪನಂ ಕಫವಾತಜಿತ್ | ಕಟು ಸ್ನಿಗ್ಧಂ ಸರಂ ತೀಕ್ಷ್ಣಂ ಶೂಲಾಜೀರ್ಣವಿಬನ್ಧನುತ್ ||೨೨೮||

Adhikarana 174 (229) · Śloka 230

ತೀಕ್ಷ್ಣೋಷ್ಣಂ ಕಟುಕಂ ಪಾಕೇ ರುಚ್ಯಂ ಪಿತ್ತಾಗ್ನಿವರ್ಧನಮ್ | ಕಟು ಶ್ಲೇಷ್ಮಾನಿಲಹರಂ ಗನ್ಧಾಢ್ಯಂ ಜೀರಕದ್ವಯಮ್ ||೨೨೯|| ಕಾರವೀ ಕರವೀ ತದ್ವದ್ವಿಜ್ಞೇಯಾ ಸೋಪಕುಞ್ಚಿಕಾ |೨೩೦|

Adhikarana 175 (230-231) · Śloka 232

ಭಕ್ಷ್ಯವ್ಯಞ್ಜನಭೋಜ್ಯೇಷು ವಿವಿಧೇಷ್ವವಚಾರಿತಾ ||೨೩೦|| ಆರ್ದ್ರಾ ಕುಸ್ತುಮ್ಬರೀ ಕುರ್ಯಾತ್ ಸ್ವಾದುಸೌಗನ್ಧ್ಯಹೃದ್ಯತಾಮ್ | ಸಾ ಶುಷ್ಕಾ ಮಧುರಾ ಪಾಕೇ ಸ್ನಿಗ್ಧಾ ತೃಡ್ದಾಹನಾಶನೀ ||೨೩೧|| ದೋಷಘ್ನೀ ಕಟುಕಾ ಕಿಞ್ಚಿತ್ ತಿಕ್ತಾ ಸ್ರೋತೋವಿಶೋಧನೀ |೨೩೨|

Adhikarana 176 (232-237) · Śloka 237

ಜಮ್ಬೀರಃ ಪಾಚನಸ್ತೀಕ್ಷ್ಣಃ ಕೃಮಿವಾತಕಫಾಪಹಃ ||೨೩೨|| ಸುರಾಭಿರ್ದೀಪನೋ ರುಚ್ಯೋ ಮುಖವೈಶದ್ಯಕಾರಕಃ | ಕಫಾನಿಲವಿಷಶ್ವಾಸಕಾಸದೌರ್ಗನ್ಧ್ಯನಾಶನಃ ||೨೩೩|| ಪಿತ್ತಕೃತ್ ಪಾರ್ಶ್ವಶೂಲಘ್ನಃ ಸುರಸಃ ಸಮುದಾಹೃತಃ | ತದ್ವತ್ತು ಸುಮುಖೋ ಜ್ಞೇಯೋ ವಿಶೇಷಾದ್ಗರನಾಶನಃ ||೨೩೪|| ಕಫಘ್ನಾ ಲಘವೋ ರೂಕ್ಷಾಸ್ತೀಕ್ಷ್ಣೋಷ್ಣಾಃ ಪಿತ್ತವರ್ಧನಾಃ | ಕಟುಪಾಕರಸಾಶ್ಚೈವ ಸುರಸಾರ್ಜಕಭೂಸ್ತೃಣಾಃ ||೨೩೫|| ಮಧುರಃ ಕಫವಾತಘ್ನಃ ಪಾಚನಃ ಕಣ್ಠಶೋಧನಃ | ವಿಶೇಷತಃ ಪಿತ್ತಹರಃ ಸತಿಕ್ತಃ ಕಾಸಮರ್ದಕಃ ||೨೩೬|| ಕಟುಃ ಸಕ್ಷಾರಮಧುರಃ ಶಿಗ್ರುಸ್ತಿಕ್ತೋಽಥ ಪಿಚ್ಛಿಲಃ | ಮಧುಶಿಗ್ರುಃ ಸರಸ್ತಿಕ್ತಃ ಶೋಫಘ್ನೋ ದೀಪನಃ ಕಟುಃ ||೨೩೭||

Adhikarana 177 (238-239) · Śloka 239

ವಿದಾಹಿ ಬದ್ಧವಿಣ್ಮೂತ್ರಂ ರೂಕ್ಷಂ ತೀಕ್ಷ್ಣೋಷ್ಣಮೇವ ಚ | ತ್ರಿದೋಷಂ ಸಾರ್ಷಪಂ ಶಾಕಂ ಗಾಣ್ಡೀರಂ ವೇಗನಾಮ ಚ ||೨೩೮|| ಚಿತ್ರಕಸ್ತಿಲಪರ್ಣೀ ಚ ಕಫಶೋಫಹರೇ ಲಘೂ | ವರ್ಷಾಭೂಃ ಕಫವಾತಘ್ನೀ ಹಿತಾ ಶೋಫೋದರಾರ್ಶಸಾಮ್ ||೨೩೯||

Adhikarana 178 (240-242) · Śloka 242

ಕಟುತಿಕ್ತರಸಾ ಹೃದ್ಯಾ ರೋಚನೀ ವಹ್ನಿದೀಪನೀ | ಸರ್ವದೋಷಹರಾ ಲಘ್ವೀ ಕಣ್ಠ್ಯಾ ಮೂಲಕಪೋತಿಕಾ ||೨೪೦|| ಮಹತ್ತದ್ಗುರು ವಿಷ್ಟಮ್ಭಿ ತೀಕ್ಷ್ಣಮಾಮಂ ತ್ರಿದೋಷಕೃತ್ | ತದೇವ ಸ್ನೇಹಸಿದ್ಧಂ ತು ಪಿತ್ತನುತ್ ಕಫವಾತಜಿತ್ ||೨೪೧|| ತ್ರಿದೋಷಶಮನಂ ಶುಷ್ಕಂ ವಿಷದೋಷಹರಂ ಲಘು | ವಿಷ್ಟಮ್ಭಿ ವಾತಲಂ ಶಾಕಂ ಶುಷ್ಕಮನ್ಯತ್ರ ಮೂಲಕಾತ್ ||೨೪೨||

Adhikarana 179 (243) · Śloka 243

ಪುಷ್ಪಂ ಚ ಪತ್ರಂ ಚ ಫಲಂ ತಥೈವ ಯಥೋತ್ತರಂ ತೇ ಗುರವಃ ಪ್ರದಿಷ್ಟಾಃ | ತೇಷಾಂ ತು ಪುಷ್ಪಂ ಕಫಪಿತ್ತಹನ್ತೃ ಫಲಂ ನಿಹನ್ಯಾತ್ ಕಫಮಾರುತೌ ತು ||೨೪೩||

Adhikarana 180 (244-248) · Śloka 248

ಸ್ನಿಗ್ಧೋಷ್ಣತೀಕ್ಷ್ಣಃ ಕಟುಪಿಚ್ಛಿಲಶ್ಚ ಗುರುಃ ಸರಃ ಸ್ವಾದುರಸಶ್ಚ ಬಲ್ಯಃ | ವೃಷ್ಯಶ್ಚ ಮೇಧಾಸ್ವರವರ್ಣಚಕ್ಷುರ್ಭಗ್ನಾಸ್ಥಿಸನ್ಧಾನಕರೋ ರಸೋನಃ ||೨೪೪|| ಹೃದ್ರೋಗಜೀರ್ಣಜ್ವರಕುಕ್ಷಿಶೂಲವಿಬನ್ಧಗುಲ್ಮಾರುಚಿಕಾಸಶೋಫಾನ್ | ದುರ್ನಾಮಕುಷ್ಠಾನಲಸಾದಜನ್ತುಸಮೀರಣಶ್ವಾಸಕಫಾಂಶ್ಚ ಹನ್ತಿ ||೨೪೫|| ನಾತ್ಯುಷ್ಣವೀರ್ಯೋಽನಿಲಹಾ ಕಟುಶ್ಚ ತೀಕ್ಷ್ಣೋ ಗುರುರ್ನಾತಿಕಫಾವಹಶ್ಚ | ಬಲಾವಹಃ ಪಿತ್ತಕರೋಽಥ ಕಿಞ್ಚಿತ್ ಪಲಾಣ್ಡುರಗ್ನಿಂ ಚ ವಿವರ್ಧಯೇತ್ತು ||೨೪೬|| ಸ್ನಿಗ್ಧೋ ರುಚಿಷ್ಯಃ ಸ್ಥಿರಧಾತುಕಾರೀ ಬಲ್ಯೋಽಥ ಮೇಧಾಕಫಪುಷ್ಟಿದಶ್ಚ | ಸ್ವಾದುರ್ಗುರುಃ ಶೋಣಿತಪಿತ್ತಶಸ್ತಃ ಸಪಿಚ್ಛಿಲಃ ಕ್ಷೀರಪಲಾಣ್ಡುರುಕ್ತಃ ||೨೪೭|| ಕಲಾಯಶಾಕಂ ಪಿತ್ತಘ್ನಂ ಕಫಘ್ನಂ ವಾತಲಂ ಗುರು | ಕಷಾಯಾನುರಸಂ ಚೈವ ವಿಪಾಕೇ ಮಧುರಂ ಚ ತತ್ ||೨೪೮||

Adhikarana 181 (249) · Śloka 249

ಚುಚ್ಚೂಯೂಥಿಕಾತರುಣೀಜೀವನ್ತೀಬಿಮ್ಬೀತಿಕಾನದೀ(ನ್ದೀ)ಭಲ್ಲಾತಕಚ್ಛಗಲಾನ್ತ್ರೀ- ವೃಕ್ಷಾದನೀಫಞ್ಜೀಶಾಲ್ಮಲೀಶೇಲುವನಸ್ಪತಿಪ್ರಸವಶಣಕರ್ಬುದಾರಕೋವಿದಾರಪ್ರಭೃತೀನಿ ||೨೪೯||

Adhikarana 182 (250) · Śloka 250

ಕಷಾಯಸ್ವಾದುತಿಕ್ತಾನಿ ರಕ್ತಪಿತ್ತಹರಾಣಿ ಚ | ಕಫಘ್ನಾನ್ಯನಿಲಂ ಕುರ್ಯುಃ ಸಙ್ಗ್ರಾಹೀಣಿ ಲಘೂನಿ ಚ ||೨೫೦||

Adhikarana 183 (251-253) · Śloka 253

ಲಘುಃ ಪಾಕೇ ಚ ಜನ್ತುಘ್ನಃ ಪಿಚ್ಛಿಲೋ ವ್ರಣಿನಾಂ ಹಿತಃ | ಕಷಾಯಮಧುರೋ ಗ್ರಾಹೀ ಚುಚ್ಚೂಸ್ತೇಷಾಂ ತ್ರಿದೋಷಹಾ ||೨೫೧|| ಚಕ್ಷುಷ್ಯಾ ಸರ್ವದೋಷಘ್ನೀ ಜೀವನ್ತೀ ಸಮುದಾಹೃತಾ | ವೃಕ್ಷಾದನೀ ವಾತಹರಾ, ಫಞ್ಜೀ ತ್ವಲ್ಪಬಲಾ ಮತಾ ||೨೫೨|| ಕ್ಷೀರವೃಕ್ಷೋತ್ಪಲಾದೀನಾಂ ಕಷಾಯಾಃ ಪಲ್ಲವಾಃ ಸ್ಮೃತಾಃ | ಶೀತಾಃ ಸಙ್ಗ್ರಾಹಿಣಃ ಶಸ್ತಾ ರಕ್ತಪಿತ್ತಾತಿಸಾರಿಣಾಮ್ ||೨೫೩||

Adhikarana 184 (254) · Śloka 255

ಪುನರ್ನವಾವರುಣತರ್ಕಾರ್ಯುರುಬೂಕವತ್ಸಾದನೀಬಿಲ್ವಶಾಕಪ್ರಭೃತೀನಿ ||೨೫೪|| ಉಷ್ಣಾನಿ ಸ್ವಾದುತಿಕ್ತಾನಿ ವಾತಪ್ರಶಮನಾನಿ ಚ |೨೫೫|

Adhikarana 185 (255) · Śloka 255

ತೇಷು ಪೌನರ್ನವಂ ಶಾಕಂ ವಿಶೇಷಾಚ್ಛೋಫನಾಶನಮ್ ||೨೫೫||

Adhikarana 186 (256) · Śloka 256

ತಣ್ಡುಲೀಯಕೋಪೋದಕಾಽಶ್ವಬಲಾಚಿಲ್ಲೀಪಾಲಙ್ಕ್ಯಾವಾಸ್ತೂಕಪ್ರಭೃತೀನಿ ||೨೫೬||

Adhikarana 187 (257) · Śloka 257

ಸೃಷ್ಟಮೂತ್ರಪುರೀಷಾಣಿ ಸಕ್ಷಾರಮಧುರಾಣಿ ಚ | ಮನ್ದವಾತಕಫಾನ್ಯಾಹೂ ರಕ್ತಪಿತ್ತಹರಾಣಿ ಚ ||೨೫೭||

Adhikarana 188 (258-261) · Śloka 261

ಮಧುರೋ ರಸಪಾಕಾಭ್ಯಾಂ ರಕ್ತಪಿತ್ತಮದಾಪಹಃ | ತೇಷಾಂ ಶೀತತಮೋ ರೂಕ್ಷಸ್ತಣ್ಡುಲೀಯೋ ವಿಷಾಪಹಃ ||೨೫೮|| ಸ್ವಾದುಪಾಕರಸಾ ವೃಷ್ಯಾ ವಾತಪಿತ್ತಮದಾಪಹಾ | ಉಪೋದಕಾ ಸರಾ ಸ್ನಿಗ್ಧಾ ಬಲ್ಯಾ ಶ್ಲೇಷ್ಮಕರೀ ಹಿಮಾ ||೨೫೯|| ಕಟುರ್ವಿಪಾಕೇ ಕೃಮಿಹಾ ಮೇಧಾಗ್ನಿಬಲವರ್ಧನಃ | ಸಕ್ಷಾರಃ ಸರ್ವದೋಷಘ್ನೋ ವಾಸ್ತೂಕೋ ರೋಚನಃ ಸರಃ ||೨೬೦|| ಚಿಲ್ಲೀ ವಾಸ್ತೂಕವಜ್ಜ್ಞೇಯಾ ಪಾಲಙ್ಕ್ಯಾ ತಣ್ಡುಲೀಯವತ್ | ವಾತಕೃದ್ಬದ್ಧವಿಣ್ಮೂತ್ರಾ ರೂಕ್ಷಾ ಪಿತ್ತಕಫೇ ಹಿತಾ | ಶಾಕಮಾಶ್ವಬಲಂ ರೂಕ್ಷಂ ಬದ್ಧವಿಣ್ಮೂತ್ರಮಾರುತಮ್ ||೨೬೧||

Adhikarana 189 (262) · Śloka 262

ಮಣ್ಡೂಕಪರ್ಣೀಸಪ್ತಲಾಸುನಿಷಣ್ಣಕಸುವರ್ಚಲಾಪಿಪ್ಪಲೀಗುಡೂಚೀಗೋಜಿಹ್ವಾ- ಕಾಕಮಾಚೀಪ್ರಪುನ್ನಾಡಾವಲ್ಗುಜಸತೀನಬೃಹತೀಕಣ್ಟಕಾರಿಕಾಫಲ- ಪಟೋಲವಾರ್ತಾಕಕಾರವೇಲ್ಲಕಕಟುಕಿಕಾಕೇಬು(ಮ್ಬು)ಕೋರುಬೂಕಪರ್ಪಟಕಕಿರಾತತಿಕ್ತ- ಕರ್ಕೋಟಕಾರಿಷ್ಟಕೋಶಾತಕೀವೇತ್ರಕರೀರಾಟರೂಷಕಾರ್ಕಪುಷ್ಪೀಪ್ರಭೃತೀನಿ ||೨೬೨||

Adhikarana 190 (263) · Śloka 263

ರಕ್ತಪಿತ್ತಹರಾಣ್ಯಾಹುರ್ಹೃದ್ಯಾನಿ ಸುಲಘೂನಿ ಚ | ಕುಷ್ಠಮೇಹಜ್ವರಶ್ವಾಸಕಾಸಾರುಚಿಹರಾಣಿ ಚ ||೨೬೩||

Adhikarana 191 (264-271) · Śloka 271

ಕಷಾಯಾ ತು ಹಿತಾ ಪಿತ್ತೇ ಸ್ವಾದುಪಾಕರಸಾ ಹಿಮಾ | ಲಘ್ವೀ ಮಣ್ಡೂಕಪರ್ಣೀ ತು ತದ್ವದ್ಗೋಜಿಹ್ವಿಕಾ ಮತಾ ||೨೬೪|| ಅವಿದಾಹೀ ತ್ರಿದೋಷಘ್ನಃ ಸಙ್ಗ್ರಾಹೀ ಸುನಿಷಣ್ಣಕಃ | ಅವಲ್ಗುಜಃ ಕಟುಃ ಪಾಕೇ ತಿಕ್ತಃ ಪಿತ್ತಕಫಾಪಹಃ ||೨೬೫|| ಈಷತ್ತಿಕ್ತಂ ತ್ರಿದೋಷಘ್ನಂ ಶಾಕಂ ಕಟು ಸತೀನಜಮ್ | ನಾತ್ಯುಷ್ಣಶೀತಂ ಕುಷ್ಠಘ್ನಂ ಕಾಕಮಾಚ್ಯಾಸ್ತು ತದ್ವಿಧಮ್ ||೨೬೬|| ಕಣ್ಡೂಕುಷ್ಠಕೃಮಿಘ್ನಾನಿ ಕಫವಾತಹರಾಣಿ ಚ | ಫಲಾನಿ ಬೃಹತೀನಾಂ ತು ಕಟುತಿಕ್ತಲಘೂನಿ ಚ ||೨೬೭|| ಕಫಪಿತ್ತಹರಂ ವ್ರಣ್ಯಮುಷ್ಣಂ ತಿಕ್ತಮವಾತಲಮ್ | ಪಟೋಲಂ ಕಟುಕಂ ಪಾಕೇ ವೃಷ್ಯಂ ರೋಚನದೀಪನಮ್ ||೨೬೮|| ಕಫವಾತಹರಂ ತಿಕ್ತಂ ರೋಚನಂ ಕಟುಕಂ ಲಘು | ವಾರ್ತಾಕಂ ದೀಪನಂ ಪ್ರೋಕ್ತಂ ಜೀರ್ಣಂ ಸಕ್ಷಾರಪಿತ್ತಲಮ್ | ತದ್ವತ್ ಕರ್ಕೋಟಕಂ ವಿದ್ಯಾತ್ ಕಾರವೇಲ್ಲಕಮೇವ ಚ ||೨೬೯|| ಆಟರೂಷಕವೇತ್ರಾಗ್ರಗುಡೂಚೀನಿಮ್ಬಪರ್ಪಟಾಃ | ಕಿರಾತತಿಕ್ತಸಹಿತಾಸ್ತಿಕ್ತಾಃ ಪಿತ್ತಕಫಾಪಹಾಃ ||೨೭೦|| ಕಫಾಪಹಂ ಶಾಕಮುಕ್ತಂ ವರುಣಪ್ರಪುನಾಡ(ಟ)ಯೋಃ | ರೂಕ್ಷಂ ಲಘು ಚ ಶೀತಂ ಚ ವಾತಪಿತ್ತಪ್ರಕೋಪಣಮ್ ||೨೭೧||

Adhikarana 192 (272-273) · Śloka 273

ದೀಪನಂ ಕಾಲಶಾಕಂ ತು ಗರದೋಷಹರಂ ಕಟು | ಕೌಸುಮ್ಭಂ ಮಧುರಂ ರೂಕ್ಷಮುಷ್ಣಂ ಶ್ಲೇಷ್ಮಹರಂ ಲಘು ||೨೭೨|| ವಾತಲಂ ನಾಲಿಕಾಶಾಕಂ ಪಿತ್ತಘ್ನಂ ಮಧುರಂ ಚ ತತ್ | ಗ್ರಹಣ್ಯರ್ಶೋವಿಕಾರಘ್ನೀ ಸಾಮ್ಲಾ ವಾತಕಫೇ ಹಿತಾ | ಉಷ್ಣಾ ಕಷಾಯಮಧುರಾ ಚಾಙ್ಗೇರೀ ಚಾಗ್ನಿದೀಪನೀ ||೨೭೩||

Adhikarana 193 (274) · Śloka 274

ಲೋಣಿಕಾಜಾತುಕತ್ರಿಪರ್ಣಿಕಾಪತ್ತೂರಜೀವಕಸುವರ್ಚಲಾಡುಡುರಕಕುತುಮ್ಬಕಕುಠಿಞ್ಜರಕುನ್ತಲಿಕಾಕುರಣ್ಟಿಕಾಪ್ರಭೃತಯಃ ||೨೭೪||

Adhikarana 194 (275) · Śloka 275

ಸ್ವಾದುಪಾಕರಸಾಃ ಶೀತಾಃ ಕಫಘ್ನಾ ನಾತಿಪಿತ್ತಲಾಃ | ಲವಣಾನುರಸಾ ರೂಕ್ಷಾಃ ಸಕ್ಷಾರಾ ವಾತಲಾಃ ಸರಾಃ ||೨೭೫||

Adhikarana 195 (276) · Śloka 276

ಸ್ವಾದುತಿಕ್ತಾ ಕುನ್ತಲಿಕಾ ಕಷಾಯಾ ಸಕುರಣ್ಟಿಕಾ |೨೭೬|

Adhikarana 196 (276) · Śloka 276

ಸಙ್ಗ್ರಾಹಿ ಶೀತಲಂ ಚಾಪಿ ಲಘು ದೋಷಾಪಹಂ ತಥಾ | ರಾಜಕ್ಷವಕಶಾಕಂ ತು ಶಟೀಶಾಕಂ ಚ ತದ್ವಿಧಮ್ ||೨೭೬||

Adhikarana 197 (277) · Śloka 277

ಸ್ವಾದುಪಾಕರಸಂ ಶಾಕಂ ದುರ್ಜರಂ ಹರಿಮನ್ಥಜಮ್ |೨೭೭|

Adhikarana 198 (277) · Śloka 277

ಭೇದನಂ ಮಧುರಂ ರೂಕ್ಷಂ ಕಾಲಾಯಮತಿವಾತಲಮ್ ||೨೭೭||

Adhikarana 199 (278) · Śloka 278

ಸ್ರಂಸನಂ ಕಟುಕಂ ಪಾಕೇ ಲಘು ವಾತಕಫಾಪಹಮ್ | ಶೋಫಘ್ನಮುಷ್ಣವೀರ್ಯಂ ಚ ಪತ್ರಂ ಪೂತಿಕರಞ್ಜಜಮ್ ||೨೭೮||

Adhikarana 200 (279-280) · Śloka 280

ತಾಮ್ಬೂಲಪತ್ರಂ ತೀಕ್ಷ್ಣೋಷ್ಣಂ ಕಟು ಪಿತ್ತಪ್ರಕೋಪಣಮ್ | ಸುಗನ್ಧಿ ವಿಶದಂ ತಿಕ್ತಂ ಸ್ವರ್ಯಂ ವಾತಕಫಾಪಹಮ್ ||೨೭೯|| ಸ್ರಂಸನಂ ಕಟುಕಂ ಪಾಕೇ ಕಷಾಯಂ ವಹ್ನಿದೀಪನಮ್ | ವಕ್ತ್ರಕಣ್ಡೂಮಲಕ್ಲೇದದೌರ್ಗನ್ಧ್ಯಾದಿವಿಶೋಧನಮ್ ||೨೮೦||

Adhikarana 201 (281) · Śloka 281

ಅಥ ಪುಷ್ಪವರ್ಗಃ | ಕೋವಿದಾರಶಣಶಾಲ್ಮಲೀಪುಷ್ಪಾಣಿ ಮಧುರಾಣಿ ಮಧುರವಿಪಾಕಾನಿ ರಕ್ತಪಿತ್ತಹರಾಣಿ ಚ; ವೃಷಾಗಸ್ತ್ಯಯೋಃ ಪುಷ್ಪಾಣಿ ತಿಕ್ತಾನಿ ಕಟುವಿಪಾಕಾನಿ ಕ್ಷಯಕಾಸಾಪಹಾನಿ ಚ ||೨೮೧||

Adhikarana 202 (282) · Śloka 282

ಆಗಸ್ತ್ಯಂ ನಾತಿಶೀತೋಷ್ಣಂ ನಕ್ತಾನ್ಧಾನಾಂ ಪ್ರಶಸ್ಯತೇ ||೨೮೨||

Adhikarana 203 (283) · Śloka 283

ಕರೀರಕುಸುಮಾನಿ ಕಟುವಿಪಾಕಾನಿ ವಾತಹರಾಣಿ ಸೃಷ್ಟಮೂತ್ರಪುರೀಷಾಣಿ ಚ ||೨೮೩||

Adhikarana 204 (284) · Śloka 284

ರಕ್ತವೃಕ್ಷಸ್ಯ ನಿಮ್ಬಸ್ಯ ಮುಷ್ಕಕಾರ್ಕಾಸನಸ್ಯ ಚ | ಕಫಪಿತ್ತಹರಂ ಪುಷ್ಪಂ ಕುಷ್ಠಘ್ನಂ ಕುಟಜಸ್ಯ ಚ ||೨೮೪||

Adhikarana 205 (285) · Śloka 285

ಸತಿಕ್ತಂ ಮಧುರಂ ಶೀತಂ ಪದ್ಮಂ ಪಿತ್ತಕಫಾಪಹಮ್ | ಮಧುರಂ ಪಿಚ್ಛಿಲಂ ಸ್ನಿಗ್ಧಂ ಕುಮುದಂ ಹ್ಲಾದಿ ಶೀತಲಮ್ | ತಸ್ಮಾದಲ್ಪಾನ್ತರಗುಣೇ ವಿದ್ಯಾತ್ ಕುವಲಯೋತ್ಪಲೇ ||೨೮೫||

Adhikarana 206 (286) · Śloka 286

ಸಿನ್ಧುವಾರಂ ವಿಜಾನೀಯಾದ್ಧಿಮಂ ಪಿತ್ತವಿನಾಶನಮ್ |೨೮೬|

Adhikarana 207 (286) · Śloka 286

ಮಾಲತೀಮಲ್ಲಿಕೇ ತಿಕ್ತೇ ಸೌರಭ್ಯಾತ್ ಪಿತ್ತನಾಶನೇ ||೨೮೬||

Adhikarana 208 (287) · Śloka 287

ಸುಗನ್ಧಿ ವಿಶದಂ ಹೃದ್ಯಂ ಬಾಕುಲಂ ಪಾಟಲಾನಿ ಚ | ಶ್ಲೇಷ್ಮಪಿತ್ತವಿಷಘ್ನಂ ತು ನಾಗಂ ತದ್ವಚ್ಚ ಕುಙ್ಕುಮಮ್ ||೨೮೭||

Adhikarana 209 (288) · Śloka 288

ಚಮ್ಪಕಂ ರಕ್ತಪಿತ್ತಘ್ನಂ ಶೀತೋಷ್ಣಂ ಕಫನಾಶನಮ್ | ಕಿಂಶುಕಂ ಕಫಪಿತ್ತಘ್ನಂ ತದ್ವದೇವ ಕುರಣ್ಟಕಮ್ ||೨೮೮||

Adhikarana 210 (289) · Śloka 289

ಯಥಾವೃಕ್ಷಂ ವಿಜಾನೀಯಾತ್ ಪುಷ್ಪಂ ವೃಕ್ಷೋಚಿತಂ ತಥಾ |೨೮೯|

Adhikarana 211 (289) · Śloka 289

ಮಧುಶಿಗ್ರುಕರೀರಾಣಿ ಕಟೂನಿ ಶ್ಲೇಷ್ಮಹರಾಣಿ ಚ ||೨೮೯||

Adhikarana 212 (290) · Śloka 290

ಕ್ಷವಕಕುಲೇವರವಂಶಕರೀರಪ್ರಭೃತೀನಿ ಕಫಕರಾಣಿ ಸೃಷ್ಟಮೂತ್ರಪುರೀಷಾಣಿ ಚ ||೨೯೦||

Adhikarana 213 (291-292) · Śloka 292

ಕ್ಷವಕಂ ಕೃಮಿಲಂ ತೇಷು ಸ್ವಾದುಪಾಕಂ ಸಪಿಚ್ಛಲಮ್ | ವಿಸ್ಯನ್ದಿ ವಾತಲಂ ನಾತಿಪಿತ್ತಶ್ಲೇಷ್ಮಕರಂ ಚ ತತ್ ||೨೯೧|| ವೇಣೋಃ ಕರೀರಾಃ ಕಫಲಾ ಮಧುರಾ ರಸಪಾಕತಃ | ವಿದಾಹಿನೋ ವಾತಕರಾಃ ಸಕಷಾಯಾ ವಿರೂಕ್ಷಣಾಃ ||೨೯೨||

Adhikarana 214 (293) · Śloka 293

ಉದ್ಭಿದಾನಿ ಪಲಾಲೇಕ್ಷುಕರೀಷವೇಣುಕ್ಷಿತಿಜಾನಿ | ತತ್ರ ಪಲಾಲಜಾತಂ ಮಧುರಂ ಮಧುರವಿಪಾಕಂ ರೂಕ್ಷಂ ದೋಷಪ್ರಶಮನಂ ಚ | ಇಕ್ಷುಜಂ ಮಧುರಂ ಕಷಾಯಾನುರಸಂ ಕಟುಪಾಕಂ ಶೀತಲಂ ಚ | ತದ್ವದೇವೋಷ್ಣಂ ಕಾರೀಷಂ ಕಷಾಯಂ ವಾತಕೋಪನಂ ಚ, (ವೇಣುಜಾತಂ ಕಷಾಯಂ ವಾತಕೋಪನಂ ಚ,) ಭೂಮಿಜಂ ಗುರು ನಾತಿವಾತಲಂ ಭೂಮಿತಶ್ಚಾಸ್ಯಾನುರಸಃ ||೨೯೩||

Adhikarana 215 (294) · Śloka 294

ಪಿಣ್ಯಾಕತಿಲಕಲ್ಕಸ್ಥೂಣಿಕಾಶುಷ್ಕಶಾಕಾನಿ ಸರ್ವದೋಷಪ್ರಕೋಪಣಾನಿ ||೨೯೪||

Adhikarana 216 (295) · Śloka 295

ವಿಷ್ಟಮ್ಭಿನಃ ಸ್ಮೃತಾಃ ಸರ್ವೇ ವಟಕಾ ವಾತಕೋಪನಾಃ |೨೯೫|

Adhikarana 217 (295) · Śloka 295

ಸಿಣ್ಡಾಕೀ ವಾತಲಾ ಸಾರ್ದ್ರಾ ರುಚಿಷ್ಯಾಽನಲದೀಪನೀ ||೨೯೫||

Adhikarana 218 (296) · Śloka 296

ವಿಡ್ಭೇದಿ ಗುರು ರೂಕ್ಷಂ ಚ ಪ್ರಾಯೋ ವಿಷ್ಟಮ್ಭಿ ದುರ್ಜರಮ್ | ಸಕಷಾಯಂ ಚ ಸರ್ವಂ ಹಿ ಸ್ವಾದು ಶಾಕಮುದಾಹೃತಮ್ | ಪುಷ್ಪಂ ಪತ್ರಂ ಫಲಂ ನಾಲಂ ಕನ್ದಾಶ್ಚ ಗುರವಃ ಕ್ರಮಾತ್ ||೨೯೬||

Adhikarana 219 (297) · Śloka 297

ಕರ್ಕಶಂ ಪರಿಜೀರ್ಣಂ ಚ ಕೃಮಿಜುಷ್ಟಮದೇಶಜಮ್ | ವರ್ಜಯೇತ್ ಪತ್ರಶಾಕಂ ತದ್ಯದಕಾಲವಿರೋಹಿ ಚ ||೨೯೭|| ಇತಿ ಶಾಕವರ್ಗಃ |

Adhikarana 220 (298) · Śloka 298

ಅಥ ಕನ್ದವರ್ಗಃ | ಕನ್ದಾನಾತ ಊರ್ಧ್ವಂ ವಕ್ಷ್ಯಾಮಃ- ವಿದಾರೀಕನ್ದಶತಾವರೀಬಿಸಮೃಣಾಲಶೃಙ್ಗಾಟಕಕಶೇರುಕಪಿಣ್ಡಾಲುಕಮಧ್ವಾಲುಕ- ಹಸ್ತ್ಯಾಲುಕಕಾಷ್ಠಾಲುಕಶಙ್ಖಾಲುಕರಕ್ತಾಲುಕೇನ್ದೀವರೋತ್ಪಲಕನ್ದಪ್ರಭೃತೀನಿ ||೨೯೮||

Adhikarana 221 (299) · Śloka 299

ರಕ್ತಪಿತ್ತಹರಾಣ್ಯಾಹುಃ ಶೀತಾನಿ ಮಧುರಾಣಿ ಚ | ಗುರೂಣಿ ಬಹುಶುಕ್ರಾಣಿ ಸ್ತನ್ಯವೃದ್ಧಿಕರಾಣಿ ಚ ||೨೯೯||

Adhikarana 222 (300-302) · Śloka 302

ಮಧುರೋ ಬೃಂಹಣೋ ವೃಷ್ಯಃ ಶೀತಃ ಸ್ವರ್ಯೋಽತಿಮೂತ್ರಲಃ | ವಿದಾರೀಕನ್ದೋ ಬಲ್ಯಶ್ಚ ಪಿತ್ತವಾತಹರಶ್ಚ ಸಃ ||೩೦೦|| ವಾತಪಿತ್ತಹರೀ ವೃಷ್ಯಾ ಸ್ವಾದುತಿಕ್ತಾ ಶತಾವರೀ | ಮಹತೀ ಚೈವ ಹೃದ್ಯಾ ಚ ಮೇಧಾಗ್ನಿಬಲವರ್ಧಿನೀ ||೩೦೧|| ಗ್ರಹಣ್ಯರ್ಶೋವಿಕಾರಘ್ನೀ ವೃಷ್ಯಾ ಶೀತಾ ರಸಾಯನೀ | ಕಫಪಿತ್ತಹರಾಸ್ತಿಕ್ತಾಸ್ತಸ್ಯಾ ಏವಾಙ್ಕುರಾಃ ಸ್ಮೃತಾಃ ||೩೦೨||

Adhikarana 223 (303-304) · Śloka 305

ಅವಿದಾಹಿ ಬಿಸಂ ಪ್ರೋಕ್ತಂ ರಕ್ತಪಿತ್ತಪ್ರಸಾದನಮ್ | ವಿಷ್ಟಮ್ಭಿ ದುರ್ಜರಂ ರೂಕ್ಷಂ ವಿರಸಂ ಮಾರುತಾವಹಮ್ ||೩೦೩|| ಗುರೂ ವಿಷ್ಟಮ್ಭಿಶೀತೌ ಚ ಶೃಙ್ಗಾಟಕಕಶೇರುಕೌ | ಪಿಣ್ಡಾಲುಕಂ ಕಫಕರಂ ಗುರು ವಾತಪ್ರಕೋಪಣಮ್ ||೩೦೪|| ಸುರೇನ್ದ್ರಕನ್ದಃ ಶ್ಲೇಷ್ಮಘ್ನೋ ವಿಪಾಕೇ ಕಟು ಪಿತ್ತಕೃತ್ |೩೦೫|

Adhikarana 224 (305) · Śloka 305

ವೇಣೋಃ ಕರೀರಾ ಗುರವಃ ಕಫಮಾರುತಕೋಪನಾಃ ||೩೦೫||

Adhikarana 225 (306) · Śloka 306

ಸ್ಥೂಲಸೂರಣಮಾಣಕಪ್ರಭೃತಯಃ ಕನ್ದಾ ಈಷತ್ಕಷಾಯಾಃ ಕಟುಕಾ ರೂಕ್ಷಾ ವಿಷ್ಟಮ್ಭಿನೋ ಗುರವಃ ಕಫವಾತಲಾಃ ಪಿತ್ತಹರಾಶ್ಚ ||೩೦೬||

Adhikarana 226 (307) · Śloka 307

ಮಾನ(ಣ)ಕಂ ಸ್ವಾದು ಶೀತಂ ಚ ಗುರು ಚಾಪಿ ಪ್ರಕೀರ್ತಿತಮ್ | ಸ್ಥೂಲಕನ್ದಸ್ತು ನಾತ್ಯುಷ್ಣಃ ಸೂರಣೋ ಗುದಕೀಲಹಾ ||೩೦೭||

Adhikarana 227 (308-309) · Śloka 309

ಕುಮುದೋತ್ಪಲಪದ್ಮಾನಾಂ ಕನ್ದಾ ಮಾರುತಕೋಪನಾಃ | ಕಷಾಯಾಃ ಪಿತ್ತಶಮನಾ ವಿಪಾಕೇ ಮಧುರಾ ಹಿಮಾಃ ||೩೦೮|| ವಾರಾಹಕನ್ದಃ ಶ್ಲೇಷ್ಮಘ್ನಃ ಕಟುಕೋ ರಸಪಾಕತಃ | ಮೇಹಕುಷ್ಠಕೃಮಿಹರೋ ಬಲ್ಯೋ ವೃಷ್ಯೋ ರಸಾಯನಃ ||೩೦೯||

Adhikarana 228 (310) · Śloka 310

ತಾಲನಾರಿಕೇಲಖರ್ಜೂರಪ್ರಭೃತೀನಾಂ ಮಸ್ತಕಮಜ್ಜಾನಃ ||೩೧೦||

Adhikarana 229 (311) · Śloka 311

ಸ್ವಾದುಪಾಕರಸಾನಾಹೂ ರಕ್ತಪಿತ್ತಹರಾಂಸ್ತಥಾ | ಶುಕ್ರಲಾನನಿಲಘ್ನಾಂಶ್ಚ ಕಫವೃದ್ಧಿಕರಾನಪಿ ||೩೧೧||

Adhikarana 230 (312) · Śloka 312

ಬಾಲಂ ಹ್ಯನಾರ್ತವಂ ಜೀರ್ಣಂ ವ್ಯಾಧಿತಂ ಕ್ರಿಮಿಭಕ್ಷಿತಮ್ | ಕನ್ದಂ ವಿವರ್ಜಯೇತ್ ಸರ್ವಂ ಯೋ ವಾ ಸಮ್ಯಙ್ನ ರೋಹತಿ ||೩೧೨||

Adhikarana 231 (313) · Śloka 313

ಅಥ ಲವಣವರ್ಗಃ | ಅಥ ಲವಣಾನಿ- ಸೈನ್ಧವಸಾಮುದ್ರವಿಡಸೌವರ್ಚಲರೋಮಕೌದ್ಭಿದಪ್ರಭೃತೀನಿ ಯಥೋತ್ತರಮುಷ್ಣಾನಿ ವಾತಹರಾಣಿ ಕಫಪಿತ್ತಕರಾಣಿ ಕಟುಪಾಕೀನಿ ಯಥಾಪೂರ್ವಂ ಸ್ನಿಗ್ಧಾನಿ ಸ್ವಾದೂನಿ ಸೃಷ್ಟಮೂತ್ರಪುರೀಷಾಣಿ ಚೇತಿ ||೩೧೩||

Adhikarana 232 (314-320) · Śloka 320

ಚಕ್ಷುಷ್ಯಂ ಸೈನ್ಧವಂ ಹೃದ್ಯಂ ರುಚ್ಯಂ ಲಘ್ವಗ್ನಿದೀಪನಮ್ | ಸ್ನಿಗ್ಧಂ ಸಮಧುರಂ ವೃಷ್ಯಂ ಶೀತಂ ದೋಷಘ್ನಮುತ್ತಮಮ್ ||೩೧೪|| ಸಾಮುದ್ರಂ ಮಧುರಂ ಪಾಕೇ ನಾತ್ಯುಷ್ಣಮವಿದಾಹಿ ಚ | ಭೇದನ ಸ್ನಿಗ್ಧಮೀಷಚ್ಚ ಶೂಲಘ್ನಂ ನಾತಿಪಿತ್ತಲಮ್ ||೩೧೫|| ಸಕ್ಷಾರಂ ದೀಪನಂ ಸೂಕ್ಷ್ಮಂ ಶೂಲಹೃದ್ರೋಗನಾಶನಮ್ | ರೋಚನಂ ತೀಕ್ಷ್ಣಮುಷ್ಣಂ ಚ ವಿಡಂ ವಾತಾನುಲೋಮನಮ್ ||೩೧೬|| ಲಘು ಸೌವರ್ಚಲಂ ಪಾಕೇ ವೀರ್ಯೋಷ್ಣಂ ವಿಶದಂ ಕಟು | ಗುಲ್ಮಶೂಲವಿಬನ್ಧಘ್ನಂ ಹೃದ್ಯಂ ಸುರಭಿ ರೋಚನಮ್ ||೩೧೭|| ರೋಮಕಂ ತೀಕ್ಷ್ಣಮತ್ಯುಷ್ಣಂ ವ್ಯವಾಯಿ ಕಟುಪಾಕಿ ಚ | ವಾತಘ್ನಂ ಲಘು ವಿಸ್ಯನ್ದಿ ಸೂಕ್ಷ್ಮಂ ವಿಡ್ಭೇದಿ ಮೂತ್ರಲಮ್ ||೩೧೮|| ಲಘು ತೀಕ್ಷ್ಣೋಷ್ಣಮುತ್ಕ್ಲೇದಿ ಸೂಕ್ಷ್ಮಂ ವಾತಾನುಲೋಮನಮ್ | ಸತಿಕ್ತಂ ಕಟು ಸಕ್ಷಾರಂ ವಿದ್ಯಾಲ್ಲವಣಮೌದ್ಭಿದಮ್ ||೩೧೯|| ಕಫವಾತಕ್ರಿಮಿಘ್ನಂ ಚ ಲೇಖನಂ ಪಿತ್ತಕೋಪನಮ್ | ದೀಪನಂ ಪಾಚನಂ ಭೇದಿ ಲವಣಂ ಗುಟಿಕಾಹ್ವಯಮ್ ||೩೨೦||

Adhikarana 233 (321) · Śloka 321

ಊಷಸೂತಂ ವಾಲುಕೈಲಂ ಶೈಲಮೂಲಾಕರೋದ್ಭವಮ್ | ಲವಣಂ ಕಟುಕಂ ಛೇದಿ ವಿಹಿತಂ ಕಟು ಚೋಚ್ಯತೇ ||೩೨೧||

Adhikarana 234 (322-325) · Śloka 325

ಯವಕ್ಷಾರಸ್ವರ್ಜಿಕಾಕ್ಷಾರೋಷಕ್ಷಾರಪಾಕಿಮಟಙ್ಕಣಕ್ಷಾರಪ್ರಭೃತಯಃ | ಗುಲ್ಮಾರ್ಶೋಗ್ರಹಣೀದೋಷಶರ್ಕರಾಶ್ಮರಿನಾಶನಾಃ | ಕ್ಷಾರಾಸ್ತು ಪಾಚನಾಃ ಸರ್ವೇ ರಕ್ತಪಿತ್ತಕರಾಃ ಸರಾಃ | ಜ್ಞೇಯೌ ವಹ್ನಿಸಮೌ ಕ್ಷಾರೌ ಸ್ವರ್ಜಿಕಾಯಾವಶೂಕಜೌ | ಶುಕ್ರಶ್ಲೇಷ್ಮವಿಬನ್ಧಾರ್ಶೋಗುಲ್ಮಪ್ಲೀಹವಿನಾಶನೌ ||೩೨೩|| ಉಷ್ಣೋಽನಿಲಘ್ನಃ ಪ್ರಕ್ಲೇದೀ ಚೋಷಕ್ಷಾರೋ ಬಲಾಪಹಃ | ಮೇದೋಘ್ನಃ ಪಾಕಿಮಃ ಕ್ಷಾರಸ್ತೇಷಾಂ ಬಸ್ತಿವಿಶೋಧನಃ ||೩೨೪|| ವಿರೂಕ್ಷಣೋಽನಿಲಕರಃ ಶ್ಲೇಷ್ಮಘ್ನಃ ಪಿತ್ತದೂಷಣಃ | ಅಗ್ನಿದೀಪ್ತಿಕರಸ್ತೀಕ್ಷ್ಣಷ್ಟಙ್ಕಣಃ ಕ್ಷಾರ ಉಚ್ಯತೇ ||೩೨೫||

Adhikarana 235 (326-330) · Śloka 330

ಸುವರ್ಣಂ ಸ್ವಾದು ಹೃದ್ಯಂ ಚ ಬೃಂಹಣೀಯಂ ರಸಾಯನಮ್ | ದೋಷತ್ರಯಾಪಹಂ ಶೀತಂ ಚಕ್ಷುಷ್ಯಂ ವಿಷಸೂದನಮ್ ||೩೨೬|| ರೂಪ್ಯಮಮ್ಲಂ ಸರಂ ಶೀತಂ ಸಸ್ನೇಹಂ ಪಿತ್ತವಾತನುತ್ | ತಾಮ್ರಂ ಕಷಾಯಂ ಮಧುರಂ ಲೇಖನಂ ಶೀತಲಂ ಸರಮ್ ||೩೨೭|| ಸತಿಕ್ತಂ ಲೇಖನಂ ಕಾಂಸ್ಯಂ ಚಕ್ಷುಷ್ಯಂ ಕಫವಾತಜಿತ್ | ವಾತಕೃಚ್ಛೀತಲಂ ಲೋಹಂ ತೃಷ್ಣಾಪಿತ್ತಕಫಾಪಹಮ್ ||೩೨೮|| ಕಟು ಕ್ರಿಮಿಘ್ನಂ ಲವಣಂ ತ್ರಪು ಸೀಸಂ ಚ ಲೇಖನಮ್ | ಮುಕ್ತಾವಿದ್ರುಮವಜ್ರೇನ್ದ್ರವೈದೂರ್ಯಸ್ಫಟಿಕಾದಯಃ ||೩೨೯|| ಚಕ್ಷುಷ್ಯಾ ಮಣಯಃ ಶೀತಾ ಲೇಖನಾ ವಿಷಸೂದನಾಃ | ಪವಿತ್ರಾ ಧಾರಣೀಯಾಶ್ಚ ಪಾಪ್ಮಾಲಕ್ಷ್ಮೀಮಲಾಪಹಾಃ ||೩೩೦|| ಇತಿ ಲವಣಾದಿವರ್ಗಃ |

Adhikarana 236 (331) · Śloka 331

ಧಾನ್ಯೇಷು ಮಾಂಸೇಷು ಫಲೇಷು ಚೈವ ಶಾಕೇಷು ಚಾನುಕ್ತಮಿಹಾಪ್ರಮೇಯಾತ್ | ಆಸ್ವಾದತೋ ಭೂತಗುಣೈಶ್ಚ ಮತ್ವಾ ತದಾದಿಶೇದ್ದ್ರವ್ಯಮನಲ್ಪಬುದ್ಧಿಃ ||೩೩೧||

Adhikarana 237 (332-339) · Śloka 339

ಷಷ್ಟಿಕಾ ಯವಗೋಧೂಮಾ ಲೋಹಿತಾ ಯೇ ಚ ಶಾಲಯಃ | ಮುದ್ಗಾಢಕೀಮಸೂರಾಶ್ಚ ಧಾನ್ಯೇಷು ಪ್ರವರಾಃ ಸ್ಮೃತಾಃ ||೩೩೨|| ಲಾವತಿತ್ತಿರಿಸಾರಙ್ಗಕುರಙ್ಗೈಣಕಪಿಞ್ಜಲಾಃ | ಮಯೂರವರ್ಮಿಕೂರ್ಮಾಶ್ಚ ಶ್ರೇಷ್ಠಾ ಮಾಂಸಗಣೇಷ್ವಿಹ ||೩೩೩|| ದಾಡಿಮಾಮಲಕಂ ದ್ರಾಕ್ಷಾ ಖರ್ಜೂರಂ ಸಪರೂಷಕಮ್ | ರಾಜಾದನಂ ಮಾತುಲುಙ್ಗಂ ಫಲವರ್ಗೇ ಪ್ರಶಸ್ಯತೇ ||೩೩೪|| ಸತೀನೋ ವಾಸ್ತುಕಶ್ಚುಚ್ಚೂಚಿಲ್ಲೀಮೂಲಕಪೋತಿಕಾಃ | ಮಣ್ಡೂಕಪರ್ಣೀ ಜೀವನ್ತೀ ಶಾಕವರ್ಗೇ ಪ್ರಶಸ್ಯತೇ ||೩೩೫|| ಗವ್ಯಂ ಕ್ಷೀರಂ ಘೃತಂ ಶ್ರೇಷ್ಠಂ, ಸೈನ್ಧವಂ ಲವಣೇಷು ಚ | ಧಾತ್ರೀದಾಡಿಮಮಮ್ಲೇಷು, ಪಿಪ್ಪಲೀ ನಾಗರಂ ಕಟೌ ||೩೩೬|| ತಿಕ್ತೇ ಪಟೋಲವಾರ್ತಾಕಂ, ಮಧುರೇ ಘೃತಮುಚ್ಯತೇ | ಕ್ಷೌದ್ರಂ, ಪೂಗಫಲಂ ಶ್ರೇಷ್ಠಂ ಕಷಾಯೇ ಸಪರೂಷಕಮ್ ||೩೩೭|| ಶರ್ಕರೇಕ್ಷುವಿಕಾರೇಷು, ಪಾನೇ ಮಧ್ವಾಸವೌ ತಥಾ | ಪರಿಸಂವತ್ಸರಂ ಧಾನ್ಯಂ, ಮಾಂಸಂ ವಯಸಿ ಮಧ್ಯಮೇ ||೩೩೮|| ಅಪರ್ಯುಷಿತಮನ್ನಂ ತು ಸಂಸ್ಕೃತಂ ಮಾತ್ರಯಾ ಶುಭಮ್ | ಫಲಂ ಪರ್ಯಾಗತಂ, ಶಾಕಮಶುಷ್ಕಂ ತರುಣಂ ನವಮ್ ||೩೩೯||

Adhikarana 238 (340) · Śloka 341

ಅಥ ಕೃತಾನ್ನವರ್ಗಃ | ಅತಃ ಪರಂ ಪ್ರವಕ್ಷ್ಯಾಮಿ ಕೃತಾನ್ನಗುಣವಿಸ್ತರಮ್ | ಲಾಜಮಣ್ಡೋ ವಿಶುದ್ಧಾನಾಂ ಪಥ್ಯಃ ಪಾಚನದೀಪನಃ ||೩೪೦|| ವಾತಾನುಲೋಮನೋ ಹೃದ್ಯಃ ಪಿಪ್ಪಲೀನಾಗರಾಯುತಃ |೩೪೧|

Adhikarana 239 (341) · Śloka 342

ಸ್ವೇದಾಗ್ನಿಜನನೀ ಲಘ್ವೀ ದೀಪನೀ ಬಸ್ತಿಶೋಧನೀ ||೩೪೧|| ಕ್ಷುತ್ತೃಟ್ಶ್ರಮಗ್ಲಾನಿಹರೀ ಪೇಯಾ ವಾತಾನುಲೋಮನೀ |೩೪೨|

Adhikarana 240 (342) · Śloka 343

ವಿಲೇಪೀ ತರ್ಪಣೀ ಹೃದ್ಯಾ ಗ್ರಾಹಿಣೀ ಬಲವರ್ಧನೀ ||೩೪೨|| ಪಥ್ಯಾ ಸ್ಯಾದುರಸಾ ಲಘ್ವೀ ದೀಪನೀ ಕ್ಷುತ್ತೃಷಾಪಹಾ |೩೪೩|

Adhikarana 241 (343) · Śloka 344

ಹೃದ್ಯಾ ಸನ್ತರ್ಪಣೀ ವೃಷ್ಯಾ ಬೃಂಹಣೀ ಬಲವರ್ಧನೀ ||೩೪೩|| ಶಾಕಮಾಂಸಫಲೈರ್ಯುಕ್ತಾ ವಿಲೇಪ್ಯಮ್ಲಾ ಚ ದುರ್ಜರಾ |೩೪೪|

Adhikarana 242 (344) · Śloka 345

ಸಿಕ್ಥೈರ್ವಿರಹಿತೋ ಮಣ್ಡಃ ಪೇಯಾ ಸಿಕ್ಥಸಮನ್ವಿತಾ ||೩೪೪|| ವಿಲೇಪೀ ಬಹುಸಿಕ್ಥಾ ಸ್ಯಾದ್ಯವಾಗೂರ್ವಿರಲದ್ರವಾ |೩೪೫|

Adhikarana 243 (345) · Śloka 345

ವಿಷ್ಟಮ್ಭೀ ಪಾಯಸೋ ಬಲ್ಯೋ ಮೇದಃಕಫಕರೋ ಗುರುಃ ||೩೪೫||

Adhikarana 244 (346) · Śloka 346

ಕಫಪಿತ್ತಕರೀ ಬಲ್ಯಾ ಕೃಶರಾಽನಿಲನಾಶನೀ |೩೪೬|

Adhikarana 245 (346) · Śloka 347

ಧೌತಸ್ತು ವಿಮಲಃ ಶುದ್ಧೋ ಮನೋಜ್ಞಃ ಸುರಭಿಃ ಸಮಃ ||೩೪೬|| ಸ್ವಿನ್ನಃ ಸುಪ್ರಸ್ರುತಸ್ತೂಷ್ಣೋ ವಿಶದಸ್ತ್ವೋದನೋ ಲಘುಃ |೩೪೭|

Adhikarana 246 (347) · Śloka 347

ಅಧೌತೋಽಪ್ರಸ್ರುತೋಽಸ್ವಿನ್ನಃ ಶೀತಶ್ಚಾಪ್ಯೋದನೋ ಗುರುಃ ||೩೪೭||

Adhikarana 247 (348) · Śloka 348

ಲಘುಃ ಸುಗನ್ಧಿಃ ಕಫಹಾ ವಿಜ್ಞೇಯೋ ಭೃಷ್ಟತಣ್ಡುಲಃ |೩೪೮|

Adhikarana 248 (348) · Śloka 349

ಸ್ನೇಹೈರ್ಮಾಂಸೈಃ ಫಲೈಃ ಕನ್ದೈರ್ವಿದಲಾಮ್ಲೈಶ್ಚ ಸಂಯುತಾಃ ||೩೪೮|| ಗುರವೋ ಬೃಂಹಣಾ ಬಲ್ಯಾ ಯೇ ಚ ಕ್ಷೀರೋಪಸಾಧಿತಾಃ |೩೪೯|

Adhikarana 249 (349) · Śloka 349

ಸುಸ್ವಿನ್ನೋ ನಿಸ್ತುಷೋ ಭೃಷ್ಟ ಈಷತ್ ಸೂಪೋ ಲಘುರ್ಹಿತಃ ||೩೪೯||

Adhikarana 250 (350) · Śloka 350

ಸ್ವಿನ್ನಂ ನಿಷ್ಪೀಡಿತಂ ಶಾಕಂ ಹಿತಂ ಸ್ಯಾತ್ ಸ್ನೇಹಸಂಸ್ಕೃತಮ್ | ಅಸ್ವಿನ್ನಂ ಸ್ನೇಹರಹಿತಮಪೀಡಿತಮತೋಽನ್ಯಥಾ ||೩೫೦||

Adhikarana 251 (351) · Śloka 352

ಮಾಂಸಂ ಸ್ವಭಾವತೋ ವೃಷ್ಯಂ ಸ್ನೇಹನಂ ಬಲವರ್ಧನಮ್ | ಸ್ನೇಹಗೋರಸಧಾನ್ಯಾಮ್ಲಫಲಾಮ್ಲಕಟುಕೈಃ ಸಹ ||೩೫೧|| ಸಿದ್ಧಂ ಮಾಂಸಂ ಹಿತಂ ಬಲ್ಯಂ ರೋಚನಂ ಬೃಂಹಣಂ ಗುರು |೩೫೨|

Adhikarana 252 (352) · Śloka 353

ತದೇವ ಗೋರಸಾದಾನಂ ಸುರಭಿದ್ರವ್ಯಸಂಸ್ಕೃತಮ್ ||೩೫೨|| ವಿದ್ಯಾತ್ಪಿತ್ತಕಫೋದ್ರೇಕೀ ಬಲಮಾಂಸಾಗ್ನಿವರ್ಧನಮ್ |೩೫೩|

Adhikarana 253 (353) · Śloka 354

ಪರಿಶುಷ್ಕಂ ಸ್ಥಿರಂ ಸ್ನಿಗ್ಧಂ ಹರ್ಷಣಂ ಪ್ರೀಣನಂ ಗುರು ||೩೫೩|| ರೋಚನಂ ಬಲಮೇಧಾಗ್ನಿಮಾಂಸೌಜಃಶುಕ್ರವರ್ಧನಮ್ |೩೫೪|

Adhikarana 254 (354) · Śloka 354

ತದೇವೋಲ್ಲುಪ್ತಪಿಷ್ಟತ್ವಾದುಲ್ಲುಪ್ತಮಿತಿ ಪಾಚಕಾಃ ||೩೫೪||

Adhikarana 255 (355) · Śloka 355

ಪರಿಶುಷ್ಕಗುಣೈರ್ಯುಕ್ತಂ ವಹ್ನೌ ಪಕ್ವಮತೋ ಲಘು |೩೫೫|

Adhikarana 256 (356) · Śloka 356

ತದೇವ ಶೂಲಿಕಾಪ್ರೋತಮಙ್ಗಾರಪರಿಪಾಚಿತಮ್ ||೩೫೫|| ಜ್ಞೇಯಂ ಗುರುತರಂ ಕಿಞ್ಚಿತ್ ಪ್ರದಿಗ್ಧಂ ಗುರುಪಾಕತಃ |೩೫೬|

Adhikarana 257 (356-358) · Śloka 358

ಉಲ್ಲುಪ್ತಂ ಭರ್ಜಿತಂ ಪಿಷ್ಟಂ ಪ್ರತಪ್ತಂ ಕನ್ದುಪಾಚಿತಮ್ ||೩೫೬|| ಪರಿಶುಷ್ಕಂ ಪ್ರದಿಗ್ಧಂ ಚ ಶೂಲ್ಯಂ ಯಚ್ಚಾನ್ಯದೀದೃಶಮ್ | ಮಾಂಸಂ ಯತ್ತೈಲಸಿದ್ಧಂ ತದ್ವೀರ್ಯೋಷ್ಣಂ ಪಿತ್ತಕೃದ್ಗುರು ||೩೫೭|| ಲಘ್ವಗ್ನಿದೀಪನಂ ಹೃದ್ಯಂ ರುಚ್ಯಂ ದೃಷ್ಟಿಪ್ರಸಾದನಮ್ | ಅನುಷ್ಣವೀರ್ಯಂ ಪಿತ್ತಘ್ನಂ ಮನೋಜ್ಞಂ ಘೃತಸಾಧಿತಮ್ ||೩೫೮||

Adhikarana 258 (359-360) · Śloka 361

ಪ್ರೀಣನಃ ಪ್ರಾಣಜನನಃ ಶ್ವಾಸಕಾಸಕ್ಷಯಾಪಹಃ | ವಾತಪಿತ್ತಶ್ರಮಹರೋ ಹೃದ್ಯೋ ಮಾಂಸರಸಃ ಸ್ಮೃತಃ ||೩೫೯|| ಸ್ಮೃತ್ಯೋಜಃಸ್ವರಹೀನಾನಾಂ ಜ್ವರಕ್ಷೀಣಕ್ಷತೋರಸಾಮ್ | ಭಗ್ನವಿಶ್ಲಿಷ್ಟಸನ್ಧೀನಾಂ ಕೃಶಾನಾಮಲ್ಪರೇತಸಾಮ್ ||೩೬೦|| ಆಪ್ಯಾಯನಃ ಸಂಹನನಃ ಶುಕ್ರದೋ ಬಲವರ್ಧನಃ |೩೬೧|

Adhikarana 259 (361) · Śloka 361

ಸ ದಾಡಿಮಯುತೋ ವೃಷ್ಯಃ ಸಂಸ್ಕೃತೋ ದೋಷನಾಶನಃ ||೩೬೧||

Adhikarana 260 (362) · Śloka 362

ಪ್ರೀಣನಃ ಸರ್ವಭೂತಾನಾಂ ವಿಶೇಷಾನ್ಮುಖಶೋಷಿಣಾಮ್ | ಕ್ಷುತ್ತೃಷ್ಣಾಪಹರಃ ಶ್ರೇಷ್ಠಃ ಸೌರಾವಃ ಸ್ವಾದುಶೀತಲಃ ||೩೬೨||

Adhikarana 260 (363) · Śloka 363

ಯನ್ಮಾಂಸಮುದ್ಧೃತರಸಂ ನ ತತ್ ಪುಷ್ಟಿಬಲಾವಹಮ್ | ವಿಷ್ಟಮ್ಭಿ ದುರ್ಜರಂ ರೂಕ್ಷಂ ವಿರಸಂ ಮಾರುತಾವಹಮ್ ||೩೬೩||

Adhikarana 262 (364) · Śloka 364

ದೀಪ್ತಾಗ್ನೀನಾಂ ಸದಾ ಪಥ್ಯಃ ಖಾನಿಷ್ಕಸ್ತು ಪರಂ ಗುರುಃ |೩೬೪|

Adhikarana 263 (364-365) · Śloka 366

ಮಾಂಸಂ ನಿರಸ್ಥಿ ಸುಸ್ವಿನ್ನಂ ಪುನರ್ದೃಷದಿ ಪೇಷಿತಮ್ ||೩೬೪|| ಪಿಪ್ಪಲೀಶುಣ್ಠಿಮರಿಚಗುಡಸರ್ಪಿಃಸಮನ್ವಿತಮ್ | ಐಕಧ್ಯಂ ಪಾಚಯೇತ್ ಸಮ್ಯಗ್ವೇಸವಾರ ಇತಿ ಸ್ಮೃತಃ ||೩೬೫|| ವೇಸವಾರೋ ಗುರುಃ ಸ್ನಿಗ್ಧೋ ಬಲ್ಯೋ ವಾತರುಜಾಪಹಃ |೩೬೬|

Adhikarana 264 (366) · Śloka 367

ಕಫಘ್ನೋ ದೀಪನೋ ಹೃದ್ಯಃ ಶುದ್ಧಾನಾಂ ವ್ರಣಿನಾಮಪಿ ||೩೬೬|| ಜ್ಞೇಯಃ ಪಥ್ಯತಮಶ್ಚೈವ ಮುದ್ಗಯೂಷಃ ಕೃತಾಕೃತಃ |೩೬೭|

Adhikarana 265 (367) · Śloka 368

ಸ ತು ದಾಡಿಮಮೃದ್ವೀಕಾಯುಕ್ತಃ ಸ್ಯಾದ್ರಾಗಷಾಡವಃ ||೩೬೭|| ರುಚಿಷ್ಯೋ ಲಘುಪಾಕಶ್ಚ ದೋಷಾಣಾಂ ಚಾವಿರೋಧಕೃತ್ |೩೬೮|

Adhikarana 266 (368) · Śloka 369

ಮಸೂರಮುದ್ಗಗೋಧೂಮಕುಲತ್ಥಲವಣೈಃ ಕೃತಃ ||೩೬೮|| ಕಫಪಿತ್ತಾವಿರೋಧೀ ಸ್ಯಾದ್ವಾತವ್ಯಾಧೌ ಚ ಶಸ್ಯತೇ |೩೬೯|

Adhikarana 267 (369) · Śloka 370

ಮೃದ್ವೀಕಾದಾಡಿಮೈರ್ಯುಕ್ತಃ ಸ ಚಾಪ್ಯುಕ್ತೋಽನಿಲಾರ್ದಿತೇ ||೩೬೯|| ರೋಚನೋ ದೀಪನೋ ಹೃದ್ಯೋ ಲಘುಪಾಕ್ಯುಪದಿಶ್ಯತೇ |೩೭೦|

Adhikarana 268 (370) · Śloka 371

ಪಟೋಲನಿಮ್ಬಯೂಷೌ ತು ಕಫಮೇದೋವಿಶೋಷಿಣೌ ||೩೭೦|| ಪಿತ್ತಘ್ನೌ ದೀಪನೌ ಹೃದ್ಯೌ ಕೃಮಿಕುಷ್ಠಜ್ವರಾಪಹೌ |೩೭೧|

Adhikarana 269 (371-372) · Śloka 373

ಶ್ವಾಸಕಾಸಪ್ರತಿಶ್ಯಾಯಪ್ರಸೇಕಾರೋಚಕಜ್ವರಾನ್ ||೩೭೧|| ಹನ್ತಿ ಮೂಲಕಯೂಷಸ್ತು ಕಫಮೇದೋಗಲಗ್ರಹಾನ್ | ಕುಲತ್ಥಯೂಷೋಽನಿಲಹಾ ಶ್ವಾಸಪೀನಸನಾಶನಃ ||೩೭೨|| ತೂಣೀಪ್ರತೂಣೀಕಾಸಾಶ್ಮಗುಲ್ಮಮೇದಃಕಫಾವಹಃ |೩೭೩|

Adhikarana 270 (373) · Śloka 374

ದಾಡಿಮಾಮಲಕೈರ್ಯೂಷೋ ಹೃದ್ಯಃ ಸಂಶಮನೋ ಲಘುಃ ||೩೭೩|| ಪ್ರಾಣಾಗ್ನಿಜನನೋ ಮೂರ್ಚ್ಛಾಮೇದೋಘ್ನೋ ವಾತಪಿತ್ತಜಿತ್ |೩೭೪|

Adhikarana 271 (374) · Śloka 374

ಮುದ್ಗಾಮಲಕಯೂಷಸ್ತು ಗ್ರಾಹೀ ಪಿತ್ತಕಫೇ ಹಿತಃ ||೩೭೪||

Adhikarana 272 (375) · Śloka 375

ಯವಕೋಲಕುಲತ್ಥಾನಾಂ ಯೂಷಃ ಕಣ್ಠ್ಯೋಽನಿಲಾಪಹಃ |೩೭೫|

Adhikarana 273 (375) · Śloka 375

ಸರ್ವಧಾನ್ಯಕೃತಸ್ತದ್ವದ್ಬೃಂಹಣಃ ಪ್ರಾಣವರ್ಧನಃ ||೩೭೫||

Adhikarana 274 (376) · Śloka 376

ಖಡಕಾಮ್ಬಲಿಕೌ ಹೃದ್ಯೌ ತಥಾ ವಾತಕಫೇ ಹಿತೌ |೩೭೬|

Adhikarana 275 (376-377) · Śloka 377

ಬಲ್ಯಃ ಕಫಾನಿಲೌ ಹನ್ತಿ ದಾಡಿಮಾಮ್ಲೋಽಗ್ನಿದೀಪನಃ ||೩೭೬|| ದಧ್ಯಮ್ಲಃ ಕಫಕೃದ್ಬಲ್ಯಃ ಸ್ನಿಗ್ಧೋ ವಾತಹರೋ ಗುರುಃ | ತಕ್ರಾಮ್ಲಃ ಪಿತ್ತಕೃತ್ ಪ್ರೋಕ್ತೋ ವಿಷರಕ್ತಪ್ರದೂಷಣಃ ||೩೭೭||

Adhikarana 276 (378) · Śloka 378

ಖಡಾಃ ಖಡಯವಾಗ್ವಶ್ಚ ಷಾ(ಖಾ)ಡವಾಃ ಪಾನಕಾನಿ ಚ | ಏವಮಾದೀನಿ ಚಾನ್ಯಾನಿ ಕ್ರಿಯನ್ತೇ ವೈದ್ಯವಾಕ್ಯತಃ ||೩೭೮||

Adhikarana 277 (379) · Śloka 379

ಅಸ್ನೇಹಲವಣಂ ಸರ್ವಮಕೃತಂ ಕಟುಕೈರ್ವಿನಾ | ವಿಜ್ಞೇಯಂ ಲವಣಸ್ನೇಹಕಟುಕೈಃ ಸಂಯುತಂ ಕೃತಮ್ ||೩೭೯||

Adhikarana 278 (380) · Śloka 380

ಅಥ ಗೋರಸಧಾನ್ಯಾಮ್ಲಫಲಾಮ್ಲೈರಮ್ಲಿತಂ ಚ ಯತ್ | ಯಥೋತ್ತರಂ ಲಘು ಹಿತಂ ಸಂಸ್ಕೃತಾಸಂಸ್ಕೃತಂ ರಸಮ್ ||೩೮೦||

Adhikarana 279 (381) · Śloka 381

ದಧಿಮಸ್ತ್ವಮ್ಲಸಿದ್ಧಸ್ತು ಯೂಷಃ ಕಾಮ್ಬಲಿಕಃ ಸ್ಮೃತಃ |೩೮೧|

Adhikarana 280 (381) · Śloka 382

ತಿಲಪಿಣ್ಯಾಕವಿಕೃತಿಃ ಶುಷ್ಕಶಾಕಂ ವಿರೂಢಕಮ್ ||೩೮೧|| ಸಿಣ್ಡಾಕೀ ಚ ಗುರೂಣಿ ಸ್ಯುಃ ಕಫಪಿತ್ತಕರಾಣಿ ಚ |೩೮೨|

Adhikarana 281 (382) · Śloka 382

ತದ್ವಚ್ಚ ವಟಕಾನ್ಯಾಹುರ್ವಿದಾಹೀನಿ ಗುರೂಣಿ ಚ ||೩೮೨||

Adhikarana 282 (383) · Śloka 383

ಲಘವೋ ಬೃಂಹಣಾ ವೃಷ್ಯಾ ಹೃದ್ಯಾ ರೋಚನದೀಪನಾಃ | ತೃಷ್ಣಾಮೂರ್ಚ್ಛಾಭ್ರಮಚ್ಛರ್ದಿಶ್ರಮಘ್ನಾ ರಾಗಷಾಡವಾಃ ||೩೮೩||

Adhikarana 282 (384) · Śloka 384

ರಸಾಲಾ ಬೃಂಹಣೀ ಬಲ್ಯಾ ಸ್ನಿಗ್ಧಾ ವೃಷ್ಯಾ ಚ ರೋಚನೀ |೩೮೪|

Adhikarana 283 (384) · Śloka 384

ಸ್ನೇಹನಂ ಗುಡಸಂಯುಕ್ತಂ ಹೃದ್ಯಂ ದಧ್ಯನಿಲಾಪಹಮ್ ||೩೮೪||

Adhikarana 284 (385-387) · Śloka 388

ಸಕ್ತವಃ ಸರ್ಪಿಷಾಽಭ್ಯಕ್ತಾಃ ಶೀತವಾರಿಪರಿಪ್ಲುತಾಃ | ನಾತಿದ್ರವಾ ನಾತಿಸಾನ್ದ್ರಾ ಮನ್ಥ ಇತ್ಯುಪದಿಶ್ಯತೇ ||೩೮೫|| ಮನ್ಥಃ ಸದ್ಯೋಬಲಕರಃ ಪಿಪಾಸಾಶ್ರಮನಾಶನಃ | ಸಾಮ್ಲಸ್ನೇಹಗುಡೋ ಮೂತ್ರಕೃಚ್ಛ್ರೋದಾವರ್ತನಾಶನಃ ||೩೮೬|| ಶರ್ಕರೇಕ್ಷುರಸದ್ರಾಕ್ಷಾಯುಕ್ತಃ ಪಿತ್ತವಿಕಾರನುತ್ | ದ್ರಾಕ್ಷಾಮಧೂದಕಯುತಃ ಕಫರೋಗನಿಬರ್ಹಣಃ ||೩೮೭|| ವರ್ಗತ್ರಯೇಣೋಪಹಿತೋ ಮಲದೋಷಾನುಲೋಮನಃ |೩೮೮|

Adhikarana 285 (388-391) · Śloka 391

ಗೌಡಮಮ್ಲಮನಮ್ಲಂ ವಾ ಪಾನಕಂ ಗುರು ಮೂತ್ರಲಮ್ ||೩೮೮|| ತದೇವ ಖಣ್ಡಮೃದ್ವೀಕಾಶರ್ಕರಾಸಹಿತಂ ಪುನಃ | ಸಾಮ್ಲಂ ಸತೀಕ್ಷ್ಣಂ ಸಹಿಮಂ ಪಾನಕಂ ಸ್ಯಾನ್ನಿರತ್ಯಯಮ್ ||೩೮೯|| ಮಾರ್ದ್ವೀಕಂ ತು ಶ್ರಮಹರಂ ಮೂರ್ಚ್ಛಾದಾಹತೃಷಾಪಹಮ್ | ಪರೂಷಕಾಣಾಂ ಕೋಲಾನಾಂ ಹೃದ್ಯಂ ವಿಷ್ಟಮ್ಭಿ ಪಾನಕಮ್ ||೩೯೦|| ದ್ರವ್ಯಸಂಯೋಗಸಂಸ್ಕಾರಂ ಜ್ಞಾತ್ವಾ ಮಾತ್ರಾಂ ಚ ಸರ್ವತಃ | ಪಾನಕಾನಾಂ ಯಥಾಯೋಗಂ ಗುರುಲಾಘವಮಾದಿಶೇತ್ ||೩೯೧|| ಇತಿ ಕೃತಾನ್ನವರ್ಗಃ |

Adhikarana 286 (392) · Śloka 392

ಅಥ ಭಕ್ಷ್ಯವರ್ಗಃ | ವಕ್ಷ್ಯಾಮ್ಯತಃ ಪರಂ ಭಕ್ಷ್ಯಾನ್ ರಸವೀರ್ಯವಿಪಾಕತಃ |೩೯೨|

Adhikarana 287 (392) · Śloka 393

ಭಕ್ಷ್ಯಾಃ ಕ್ಷೀರಕೃತಾ ಬಲ್ಯಾ ವೃಷ್ಯಾ ಹೃದ್ಯಾಃ ಸುಗನ್ಧಿನಃ ||೩೯೨|| ಅದಾಹಿನಃ ಪುಷ್ಟಿಕರಾ ದೀಪನಾಃ ಪಿತ್ತನಾಶನಾಃ |೩೯೩|

Adhikarana 288 (393) · Śloka 394

ತೇಷಾಂ ಪ್ರಾಣಕರಾ ಹೃದ್ಯಾ ಘೃತಪೂರಾಃ ಕಫಾವಹಾಃ ||೩೯೩|| ವಾತಪಿತ್ತಹರಾ ವೃಷ್ಯಾ ಗುರವೋ ರಕ್ತಮಾಂಸಲಾಃ |೩೯೪|

Adhikarana 289 (394) · Śloka 395

ಬೃಂಹಣಾ ಗೌಡಿಕಾ ಭಕ್ಷ್ಯಾ ಗುರವೋಽನಿಲನಾಶನಾಃ ||೩೯೪|| ಅದಾಹಿನಃ ಪಿತ್ತಹರಾಃ ಶುಕ್ರಲಾಃ ಕಫವರ್ಧನಾಃ |೩೯೫|

Adhikarana 290 (395) · Śloka 396

ಮಧುಶೀರ್ಷಕಸಂಯಾವಾಃ ಪೂಪಾ ಯೇ ತೇ ವಿಶೇಷತಃ ||೩೯೫|| ಗುರವೋ ಬೃಂಹಣಾಶ್ಚೈವ ಮೋದಕಾಸ್ತು ಸುದುರ್ಜರಾಃ |೩೯೬|

Adhikarana 291 (396) · Śloka 397

ರೋಚನೋ ದೀಪನಃ ಸ್ವರ್ಯಃ ಪಿತ್ತಘ್ನಃ ಪವನಾಪಹಃ ||೩೯೬|| ಗುರುರ್ಮೃಷ್ಟತರಮಶ್ಚೈವ ಸಟ್ಟಕಃ ಪ್ರಾಣವರ್ಧನಃ |೩೯೭|

Adhikarana 292 (397) · Śloka 398

ಹೃದ್ಯಃ ಸುಗನ್ಧಿರ್ಮಧುರಃ ಸ್ನಿಗ್ಧಃ ಕಫಕರೋ ಗುರುಃ ||೩೯೭|| ವಾತಾಪಹಸ್ತೃಪ್ತಿಕರೋ ಬಲ್ಯೋ ವಿಷ್ಯನ್ದ ಉಚ್ಯತೇ |೩೯೮|

Adhikarana 293 (398) · Śloka 399

ಬೃಂಹಣಾ ವಾತಪಿತ್ತಘ್ನಾ ಭಕ್ಷ್ಯಾ ಬಲ್ಯಾಸ್ತು ಸಾಮಿತಾಃ ||೩೯೮|| ಹೃದ್ಯಾಃ ಪಥ್ಯತಮಾಸ್ತೇಷಾಂ ಲಘವಃ ಫೇನಕಾದಯಃ |೩೯೯|

Adhikarana 294 (399) · Śloka 400

ಮುದ್ಗಾದಿವೇಸವಾರಾಣಾಂ ಪೂರ್ಣಾ ವಿಷ್ಟಮ್ಭಿನೋ ಮತಾಃ ||೩೯೯|| ವೇಸವಾರೈಃ ಸಪಿಶಿತೈಃ ಸಮ್ಪೂರ್ಣಾ ಗುರುಬೃಂಹಣಾಃ |೪೦೦|

Adhikarana 295 (400) · Śloka 400

ಪಾಲಲಾಃ ಶ್ಲೇಷ್ಮಜನನಾಃ, ಶಷ್ಕುಲ್ಯಃ ಕಫಪಿತ್ತಲಾಃ ||೪೦೦||

Adhikarana 296 (401) · Śloka 401

ವೀರ್ಯೋಷ್ಣಾಃ ಪೈಷ್ಟಿಕಾ ಭಕ್ಷ್ಯಾಃ ಕಫಪಿತ್ತಪ್ರಕೋಪಣಾಃ | ವಿದಾಹಿನೋ ನಾತಿಬಲಾ ಗುರವಶ್ಚ ವಿಶೇಷತಃ ||೪೦೧||

Adhikarana 297 (402) · Śloka 403

ವೈದಲಾ ಲಘವೋ ಭಕ್ಷ್ಯಾಃ ಕಷಾಯಾಃ ಸೃಷ್ಟಮಾರುತಾಃ | ವಿಷ್ಟಮ್ಭಿನಃ ಪಿತ್ತಸಮಾಃ ಶ್ಲೇಷ್ಮಘ್ನಾ ಭಿನ್ನವರ್ಚಸಃ ||೪೦೨|| ಬಲ್ಯಾ ವೃಷ್ಯಾಸ್ತು ಗುರವೋ ವಿಜ್ಞೇಯಾ ಮಾಷಸಾಧಿತಾಃ |೪೦೩|

Adhikarana 298 (403) · Śloka 403

ಕೂರ್ಚಿಕಾವಿಕೃತಾ ಭಕ್ಷ್ಯಾ ಗುರವೋ ನಾತಿಪಿತ್ತಲಾಃ ||೪೦೩||

Adhikarana 299 (404) · Śloka 404

ವಿರೂಢಕಕೃತಾ ಭಕ್ಷ್ಯಾ ಗುರವೋಽನಿಲಪಿತ್ತಲಾಃ | ವಿದಾಹೋತ್ಕ್ಲೇಶಜನನಾ ರೂಕ್ಷಾ ದೃಷ್ಟಿಪ್ರದೂಷಣಾಃ ||೪೦೪||

Adhikarana 300 (405-406) · Śloka 406

ಹೃದ್ಯಾಃ ಸುಗನ್ಧಿನೋ ಭಕ್ಷ್ಯಾ ಲಘವೋ ಘೃತಪಾಚಿತಾಃ | ವಾತಪಿತ್ತಹರಾ ಬಲ್ಯಾ ವರ್ಣದೃಷ್ಟಿಪ್ರಸಾದನಾಃ ||೪೦೫|| ವಿದಾಹಿನಸ್ತೈಲಕೃತಾ ಗುರವಃ ಕಟುಪಾಕಿನಃ | ಉಷ್ಣಾ ಮಾರುತದೃಷ್ಟಿಘ್ನಾಃ ಪಿತ್ತಲಾಸ್ತ್ವಕ್ಪ್ರದೂಷಣಾಃ ||೪೦೬||

Adhikarana 301 (407) · Śloka 407

ಫಲಮಾಂಸೇಕ್ಷುವಿಕೃತಿತಿಲಮಾಷೋಪಸಂಸ್ಕೃತಾಃ | ಭಕ್ಷ್ಯಾ ಬಲ್ಯಾಶ್ಚ ಗುರವೋ ಬೃಂಹಣಾ ಹೃದಯಪ್ರಿಯಾಃ ||೪೦೭||

Adhikarana 302 (408) · Śloka 408

ಕಪಾಲಾಙ್ಗಾರಪಕ್ವಾಸ್ತು ಲಘವೋ ವಾತಕೋಪನಾಃ | ಸುಪಕ್ವಾಸ್ತನವಶ್ಚೈವ ಭೂಯಿಷ್ಠಂ ಲಘವೋ ಮತಾಃ ||೪೦೮||

Adhikarana 303 (409) · Śloka 409

ಸಕಿಲಾಟಾದಯೋ ಭಕ್ಷ್ಯಾ ಗುರವಃ ಕಫವರ್ಧನಾಃ |೪೦೯|

Adhikarana 304 (409) · Śloka 409

ಕುಲ್ಮಾಷಾ ವಾತಲಾ ರೂಕ್ಷಾ ಗುರವೋ ಭಿನ್ನವರ್ಚಸಃ ||೪೦೯||

Adhikarana 305 (410) · Śloka 410

ಉದಾವರ್ತಹರೋ ವಾಟ್ಯಃ ಕಾಸಪೀನಸಮೇಹನುತ್ |೪೧೦|

Adhikarana 306 (410) · Śloka 410

ಧಾನೋಲುಮ್ಬಾಸ್ತು ಲಘವಃ ಕಫಮೇದೋವಿಶೋಷಣಾಃ ||೪೧೦||

Adhikarana 307 (411-412) · Śloka 412

ಶಕ್ತವೋ ಬೃಂಹಣಾ ವೃಷ್ಯಾಸ್ತೃಷ್ಣಾಪಿತ್ತಕಫಾಪಹಾಃ | ಪೀತಾಃ ಸದ್ಯೋಬಲಕರಾ ಭೇದಿನಃ ಪವನಾಪಹಾಃ ||೪೧೧|| ಗುರ್ವೀ ಪಿಣ್ಡೀ ಖರಾಽತ್ಯರ್ಥಂ ಲಘ್ವೀ ಸೈವ ವಿಪರ್ಯಯಾತ್ | ಶಕ್ತೂನಾಮಾಶು ಜೀರ್ಯೇತ ಮೃದುತ್ವಾದವಲೇಹಿಕಾ ||೪೧೨||

Adhikarana 308 (413) · Śloka 413

ಲಾಜಾಶ್ಛರ್ದ್ಯತಿಸಾರಘ್ನಾ ದೀಪನಾಃ ಕಫನಾಶನಾಃ | ಬಲ್ಯಾಃ ಕಷಾಯಮಧುರಾ ಲಘವಸ್ತೃಣ್ಮಲಾಪಹಾಃ ||೪೧೩||

Adhikarana 309 (414) · Śloka 414

ತೃಟ್ಛರ್ದಿದಾಹಘರ್ಮಾರ್ತಿನುದಸ್ತತ್ಸಕ್ತವೋ ಮತಾಃ | ರಕ್ತಪಿತ್ತಹರಾಶ್ಚೈವ ದಾಹಜ್ವರವಿನಾಶನಾಃ ||೪೧೪||

Adhikarana 310 (415) · Śloka 415

ಪೃಥುಕಾ ಗುರವಃ ಸ್ನಿಗ್ಧಾ ಬೃಂಹಣಾಃ ಕಫವರ್ಧನಾಃ | ಬಲ್ಯಾಃ ಸಕ್ಷೀರಭಾವಾತ್ತು ವಾತಘ್ನಾ ಭಿನ್ನವರ್ಚಸಃ ||೪೧೫||

Adhikarana 311 (416) · Śloka 416

ಸನ್ಧಾನಕೃತ್ಪಿಷ್ಟಮಾಮಂ ತಣ್ಡುಲಂ ಕೃಮಿಮೇಹನುತ್ |೪೧೬|

Adhikarana 312 (416) · Śloka 417

ಸುದುರ್ಜರಃ ಸ್ವಾದುರಸೋ ಬೃಂಹಣಸ್ತಣ್ಡುಲೋ ನವಃ ||೪೧೬|| ಸನ್ಧಾನಕೃನ್ಮೇಹಹರಃ ಪುರಾಣಸ್ತಣ್ಡುಲಃ ಸ್ಮೃತಃ |೪೧೭|

Adhikarana 313 (417-418) · Śloka 418

ದ್ರವ್ಯಸಂಯೋಗಸಂಸ್ಕಾರವಿಕಾರಾನ್ ಸಮವೇಕ್ಷ್ಯ ಚ ||೪೧೭|| ಯಥಾಕಾರಣಮಾಸಾದ್ಯ ಭೋಕ್ತೄಣಾಂ ಛನ್ದತೋಽಪಿ ವಾ | ಅನೇಕದ್ರವ್ಯಯೋನಿತ್ವಾಚ್ಛಾಸ್ತ್ರತಸ್ತಾನ್ ವಿನಿರ್ದಿಶೇತ್ ||೪೧೮|| ಇತಿ ಭಕ್ಷ್ಯವರ್ಗಃ |

Adhikarana 314 (419) · Śloka 419

ಅತಃ ಸರ್ವಾನುಪಾನಾನ್ಯುಪದೇಕ್ಷ್ಯಾಮಃ | - ಅಮ್ಲೇನ ಕೇಚಿದ್ವಿಹತಾ ಮನುಷ್ಯಾ ಮಾಧುರ್ಯಯೋಗೇ ಪ್ರಣಯೀಭವನ್ತಿ | ತಥಾಮ್ಲಯೋಗೇ ಮಧುರೇಣ ತೃಪ್ತಾಸ್ತೇಷಾಂ ಯಥೇಷ್ಟಂ ಪ್ರವದನ್ತಿ ಪಥ್ಯಮ್ ||೪೧೯||

Adhikarana 315 (420-421) · Śloka 422

ಶೀತೋಷ್ಣತೋಯಾಸವಮದ್ಯಯೂಷಫಲಾಮ್ಲಧಾನ್ಯಾಮ್ಲಪಯೋರಸಾನಾಮ್ | ಯಸ್ಯಾನುಪಾನಂ ತು ಹಿತಂ ಭವೇದ್ಯತ್ತಸ್ಮೈ ಪ್ರದೇಯಂ ತ್ವಿಹ ಮಾತ್ರಯಾ ತತ್ ||೪೨೦|| ವ್ಯಾಧಿಂ ಚ ಕಾಲಂ ಚ ವಿಭಾವ್ಯ ಧೀರೈರ್ದ್ರವ್ಯಾಣಿ ಭೋಜ್ಯಾನಿ ಚ ತಾನಿ ತಾನಿ | ಸರ್ವಾನುಪಾನೇಷು ವರಂ ವದನ್ತಿ ಮೈಧ್ಯಂ ಯದಮ್ಭಃ ಶುಚಿಭಾಜನಸ್ಥಮ್ ||೪೨೧|| ಲೋಕಸ್ಯ ಜನ್ಮಪ್ರಭೃತಿ ಪ್ರಶಸ್ತಂ ತೋಯಾತ್ಮಕಾಃ ಸರ್ವರಸಾಶ್ಚ ದೃಷ್ಟಾಃ | ಸಙ್ಕ್ಷೇಪ ಏಷೋಽಭಿಹಿತೋಽನುಪಾನೇ... |೪೨೨|

Adhikarana 316 (422-431) · Śloka 431

... ಷ್ವತಃ ಪರಂ ವಿಸ್ತರತೋಽಭಿಧಾಸ್ಯೇ ||೪೨೨|| ಉಷ್ಣೋದಕಾನುಪಾನಂ ತು ಸ್ನೇಹಾನಾಮಥ ಶಸ್ಯತೇ | ಋತೇ ಭಲ್ಲಾತಕಸ್ನೇಹಾತ್ ಸ್ನೇಹಾತ್ತೌವರಕಾತ್ತಥಾ ||೪೨೩|| ಅನುಪಾನಂ ವದನ್ತ್ಯೇಕೇ ತೈಲೇ ಯೂಷಾಮ್ಲಕಾಞ್ಜಿಕಮ್ | ಶೀತೋದಕಂ ಮಾಕ್ಷಿಕಸ್ಯ ಪಿಷ್ಟಾನ್ನಸ್ಯ ಚ ಸರ್ವಶಃ ||೪೨೪|| ದಧಿಪಾಯಸಮದ್ಯಾರ್ತಿವಿಷಜುಷ್ಟೇ ತಥೈವ ಚ | ಕೇಚಿತ್ ಪಿಷ್ಟಮಯಸ್ಯಾಹುರನುಪಾನಂ ಸುಖೋದಕಮ್ ||೪೨೫|| ಪಯೋ ಮಾಂಸರಸೋ ವಾಽಪಿ ಶಾಲಿಮುದ್ಗಾದಿಭೋಜಿನಾಮ್ | ಯುದ್ಧಾಧ್ವಾತಪಸನ್ತಾಪವಿಷಮದ್ಯರುಜಾಸು ಚ ||೪೨೬|| ಮಾಷಾದೇರನುಪಾನಂ ತು ಧಾನ್ಯಾಮ್ಲಂ ದಧಿಮಸ್ತು ವಾ | ಮದ್ಯಂ ಮದ್ಯೋಚಿತಾನಾಂ ತು ಸರ್ವಮಾಂಸೇಷು ಪೂಜಿತಮ್ ||೪೨೭|| ಅಮದ್ಯಪಾನಾಮುದಕಂ ಫಲಾಮ್ಲಂ ವಾ ಪ್ರಶಸ್ಯತೇ | ಕ್ಷೀರಂ ಘರ್ಮಾಧ್ವಭಾಷ್ಯಸ್ತ್ರೀಕ್ಲಾನ್ತಾನಾಮಮೃತೋಪಮಮ್ ||೪೨೮|| ಸುರಾ ಕೃಶಾನಾಂ ಸ್ಥೂಲಾನಾಮನುಪಾನಂ ಮಧೂದಕಮ್ | ನಿರಾಮಯಾನಾಂ ಚಿತ್ರಂ ತು ಭುಕ್ತಮಧ್ಯೇ ಪ್ರಕೀರ್ತಿತಮ್ ||೪೨೯|| ಸ್ನಿಗ್ಧೋಷ್ಣಂ ಮಾರುತೇ ಪಥ್ಯಂ, ಕಫೇ ರೂಕ್ಷೋಷ್ಣಮಿಷ್ಯತೇ | ಅನುಪಾನಂ ಹಿತಂ ಚಾಪಿ ಪಿತ್ತೇ ಮಧುರಶೀತಲಮ್ ||೪೩೦|| ಹಿತಂ ಶೋಣಿತಪಿತ್ತಿಭ್ಯಃ ಕ್ಷೀರಮಿಕ್ಷುರಸಸ್ತಥಾ | ಅರ್ಕಶೇಲುಶಿರೀಷಾಣಾಮಾಸವಾಸ್ತು ವಿಷಾರ್ತಿಷು ||೪೩೧||

Adhikarana 317 (432-433) · Śloka 433

ಅತಃ ಪರಂ ತು ವರ್ಗಾಣಾಮನುಪಾನಂ ಪೃಥಕ್ ಪೃಥಕ್ | ಪ್ರವಕ್ಷ್ಯಾಮ್ಯನುಪೂರ್ವೇಣ ಸರ್ವೇಷಾಮೇವ ಮೇ ಶೃಣು ||೪೩೨|| ತತ್ರ ಪೂರ್ವಶಸ್ಯಜಾತಾನಾಂ ಬದರಾಮ್ಲಂ, ವೈದಲಾನಾಂ ಧಾನ್ಯಾಮ್ಲಂ, ಜಙ್ಘಾಲಾನಾಂ ಧನ್ವಜಾನಾಂ ಚ ಪಿಪ್ಪಲ್ಯಾಸವಃ, ವಿಷ್ಕಿರಾಣಾಂ ಕೋಲಬದರಾಸವಃ, ಪ್ರತುದಾನಾಂ ಕ್ಷೀರವೃಕ್ಷಾಸವಃ, ಗುಹಾಶಯಾನಾಂ ಖರ್ಜೂರನಾಲಿಕೇರಾಸವಃ, ಪ್ರಸಹಾನಾಮಶ್ವಗನ್ಧಾಸವಃ, ಪರ್ಣಮೃಗಾಣಾಂ ಕೃಷ್ಣಗನ್ಧಾಸವಃ, ಬಿಲೇಶಯಾನಾಂ ಫಲಾಸವಃ , ಏಕಶಫಾನಾಂ ತ್ರಿಫಲಾಸವಃ, ಅನೇಕಶಫಾನಾಂ ಖದಿರಾಸವಃ, ಕೂಲಚರಾಣಾಂ ಶೃಙ್ಗಾಟಕಕಶೇರುಕಾಸವಃ, ಕೋಶವಾಸಿನಾಂ ಪಾದಿನಾಂ ಚ ಸ ಏವ, ಪ್ಲವಾನಾಮಿಕ್ಷುರಸಾಸವಃ, ನಾದೇಯಾನಾಂ ಮತ್ಸ್ಯಾನಾಂ ಮೃಣಾಲಾಸವಃ, ಸಾಮುದ್ರಾಣಾಂ ಮಾತುಲುಙ್ಗಾಸವಃ, ಅಮ್ಲಾನಾಂ ಫಲಾನಾಂ ಪದ್ಮೋತ್ಪಲಕನ್ದಾಸವಃ, ಕಷಾಯಾಣಾಂ ದಾಡಿಮವೇತ್ರಾಸವಃ, ಮಧುರಾಣಾಂ ತ್ರಿಕಟುಕಯುಕ್ತಃ ಖಣ್ಡಾಸವಃ, ತಾಲಫಲಾದೀನಾಂ ಧಾನ್ಯಾಮ್ಲಂ, ಕಟುಕಾನಾಂ ದೂರ್ವಾನಲವೇತ್ರಾಸವಃ, ಪಿಪ್ಪಲ್ಯಾದೀನಾಂ ಶ್ವದಂಷ್ಟ್ರಾವಸುಕಾಸವಃ, ಕೂಷ್ಮಾಣ್ಡಾದೀನಾಂ ದಾರ್ವೀಕರೀರಾಸವಃ, ಚುಚ್ಚುಪ್ರಭೃತೀನಾಂ ಲೋಧ್ರಾಸವಃ, ಜೀವನ್ತ್ಯಾದೀನಾಂ ತ್ರಿಫಲಾಸವಃ, ಕುಸುಮ್ಭಶಾಕಸ್ಯ ಸ ಏವ, ಮಣ್ಡೂಕಪರ್ಣ್ಯಾದೀನಾಂ ಮಹಾಪಞ್ಚಮೂಲಾಸವಃ, ತಾಲಮಸ್ತಕಾದೀನಾಮಮ್ಲಫಲಾಸವಃ, ಸೈನ್ಧವಾದೀನಾಂ ಸುರಾಸವ ಆರನಾಲಂ ಚ, ತೋಯಂ ವಾ ಸರ್ವತ್ರೇತಿ ||೪೩೩||

Adhikarana 318 (434) · Śloka 434

ಭವನ್ತಿ ಚಾತ್ರ- ಸರ್ವೇಷಾಮನುಪಾನಾನಾಂ ಮಾಹೇನ್ದ್ರಂ ತೋಯಮುತ್ತಮಮ್ |೪೩೪|

Adhikarana 319 (434) · Śloka 434

ಸಾತ್ಮ್ಯಂ ವಾ ಯಸ್ಯ ಯತ್ತೋಯಂ ತತ್ತಸ್ಮೈ ಹಿತಮುಚ್ಯತೇ ||೪೩೪||

Adhikarana 320 (435) · Śloka 435

ಉಷ್ಣಂ ವಾತೇ ಕಫೇ ತೋಯಂ ಪಿತ್ತೇ ರಕ್ತೇ ಚ ಶೀತಲಮ್ |೪೩೫|

Adhikarana 321 (435-437) · Śloka 438

ದೋಷವದ್ಗುರು ವಾ ಭುಕ್ತಮತಿಮಾತ್ರಮಥಾಪಿ ವಾ ||೪೩೫|| ಯಥೋಕ್ತೇನಾನುಪಾನೇನ ಸುಖಮನ್ನಂ ಪ್ರಜೀರ್ಯತಿ | ರೋಚನಂ ಬೃಂಹಣಂ ವೃಷ್ಯಂ ದೋಷಸಙ್ಘಾತಭೇದನಮ್ ||೪೩೬|| ತರ್ಪಣಂ ಮಾರ್ದವಕರಂ ಶ್ರಮಕ್ಲಮಹರಂ ಸುಖಮ್ | ದೀಪನಂ ದೋಷಶಮನಂ ಪಿಪಾಸಾಚ್ಛೇದನಂ ಪರಮ್ ||೪೩೭|| ಬಲ್ಯಂ ವರ್ಣಕರಂ ಸಮ್ಯಗನುಪಾನಂ ಸದೋಚ್ಯತೇ |೪೩೮|

Adhikarana 322 (438) · Śloka 439

ತದಾದೌ ಕರ್ಶಯೇತ್ಪೀತಂ ಸ್ಥಾಪಯೇನ್ಮಧ್ಯಸೇವಿತಮ್ ||೪೩೮|| ಪಶ್ಚಾತ್ಪೀತಂ ಬೃಂಹಯತಿ ತಸ್ಮಾದ್ವೀಕ್ಷ್ಯ ಪ್ರಯೋಜಯೇತ್ |೪೩೯|

Adhikarana 323 (439) · Śloka 440

ಸ್ಥಿರತಾಂ ಗತಮಲ್ಕಿನ್ನಮನ್ನಮದ್ರವಪಾಯಿನಾಮ್ ||೪೩೯|| ಭವತ್ಯಾಬಾಧಜನನಮನುಪಾನಮತಃ ಪಿಬೇತ್ |೪೪೦|

Adhikarana 324 (440) · Śloka 441

ನ ಪಿಬೇಚ್ಛ್ವಾಸಕಾಸಾರ್ತೋ ರೋಗೇ ಚಾಪ್ಯೂರ್ಧ್ವಜತ್ರುಗೇ ||೪೪೦|| ಕ್ಷತೋರಸ್ಕಃ ಪ್ರಸೇಕೀ ಚ ಯಸ್ಯ ಚೋಪಹತಃ ಸ್ವರಃ |೪೪೧|

Adhikarana 325 (441-442) · Śloka 442

ಪೀತ್ವಾಽಧ್ವಭಾಷ್ಯಾಧ್ಯಯನಗೇಯಸ್ವಪ್ನಾನ್ನ ಶೀಲಯೇತ್ ||೪೪೧|| ಪ್ರದೂಷ್ಯಾಮಾಶಯಂ ತದ್ಧಿ ತಸ್ಯ ಕಣ್ಠೋರಸಿ ಸ್ಥಿತಮ್ | ಸ್ಯನ್ದಾಗ್ನಿಸಾದಚ್ಛರ್ದ್ಯಾದೀನಾಮಯಾಞ್ಜನಯೇದ್ಬಹೂನ್ ||೪೪೨||

Adhikarana 326 (443) · Śloka 443

ಗುರುಲಾಘವಚಿನ್ತೇಯಂ ಸ್ವಭಾವಂ ನಾತಿವರ್ತತೇ | ತಥಾ ಸಂಸ್ಕಾರಮಾತ್ರಾನ್ನಕಾಲಾಂಶ್ಚಾಪ್ಯುತ್ತರೋತ್ತರಮ್ ||೪೪೩||

Adhikarana 327 (444) · Śloka 444

ಮನ್ದಕರ್ಮಾನಲಾರೋಗ್ಯಾಃ ಸುಕುಮಾರಾಃ ಸುಖೋಚಿತಾಃ | ಜನ್ತವೋ ಯೇ ತು ತೇಷಾಂ ಹಿ ಚಿನ್ತೇಯಂ ಪರಿಕೀರ್ತ್ಯತೇ ||೪೪೪||

Adhikarana 328 (445) · Śloka 445

ಬಲಿನಃ ಖರಭಕ್ಷ್ಯಾ ಯೇ ಯೇ ಚ ದೀಪ್ತಾಗ್ನಯೋ ನರಾಃ | ಕರ್ಮನಿತ್ಯಾಶ್ಚ ಯೇ ತೇಷಾಂ ನಾವಶ್ಯಂ ಪರಿಕೀರ್ತ್ಯತೇ ||೪೪೫|| ಇತ್ಯನುಪಾನವರ್ಗಃ |

Adhikarana 329 (446) · Śloka 446

ಅಥಾಹಾರವಿಧಿಂ ವತ್ಸ! ವಿಸ್ತರೇಣಾಖಿಲಂ ಶೃಣು |೪೪೬|

Adhikarana 330 (446) · Śloka 446

ಆಪ್ತಾಸ್ಥಿತಮಸಙ್ಕೀರ್ಣಂ ಶುಚಿ ಕಾರ್ಯಂ ಮಹಾನಸಮ್ ||೪೪೬||

Adhikarana 331 (447) · Śloka 447

ತತ್ರಾಪ್ತೈರ್ಗುಣಸಮ್ಪನ್ನಂ ಭಕ್ಷ್ಯಮನ್ನಂ ಸುಸಂಸ್ಕೃತಮ್ | ಶುಚೌ ದೇಶೇ ಸುಸಙ್ಗುಪ್ತಂ ಸಮುಪಸ್ಥಾಪಯೇದ್ಭಿಷಕ್ ||೪೪೭||

Adhikarana 332 (448) · Śloka 448

ವಿಷಘ್ನೈರಗದೈಃ ಸ್ಪೃಷ್ಟಂ ಪ್ರೋಕ್ಷಿತಂ ವ್ಯಜನೋದಕೈಃ | ಸಿದ್ಧೈರ್ಮನ್ತ್ರೈರ್ಹತವಿಷಂ ಸಿದ್ಧಮನ್ನಂ ನಿವೇದಯೇತ್ ||೪೪೮||

Adhikarana 333 (449-457) · Śloka 457

ವಕ್ಷ್ಯಾಮ್ಯತಃ ಪರಂ ಕೃತ್ಸ್ನಾಮಾಹಾರಸ್ಯೋಪಕಲ್ಪನಾಮ್ | ಘೃತಂ ಕಾರ್ಷ್ಣಾಯಸೇ ದೇಯಂ, ಪೇಯಾ ದೇಯಾ ತು ರಾಜತೇ ||೪೪೯|| ಫಲಾನಿ ಸರ್ವಭಕ್ಷ್ಯಾಂಶ್ಚ ಪ್ರದದ್ಯಾದ್ವೈ ದಲೇಷು ತು | ಪರಿಶುಷ್ಕಪ್ರದಿಗ್ಧಾನಿ ಸೌವರ್ಣೇಷು ಪ್ರಕಲ್ಪಯೇತ್ ||೪೫೦|| ಪ್ರದ್ರವಾಣಿ ರಸಾಂಶ್ಚೈವಂ ರಾಜತೇಷೂಪಹಾರಯೇತ್ | ಕಟ್ವರಾಣಿ ಖಡಾಂಶ್ಚೈವ ಸರ್ವಾಞ್ಛೈಲೇಷು ದಾಪಯೇತ್ ||೪೫೧|| ದದ್ಯಾತ್ತಾಮ್ರಮಯೇ ಪಾತ್ರೇ ಸುಶೀತಂ ಸುಶೃತಂ ಪಯಃ | ಪಾನೀಯಂ, ಪಾನಕಂ ಮದ್ಯಂ ಮೃನ್ಮಯೇಷು ಪ್ರದಾಪಯೇತ್ ||೪೫೨|| ಕಾಚಸ್ಫಟಿಕಪಾತ್ರೇಷು ಶೀತಲೇಷು ಶುಭೇಷು ಚ | ದದ್ಯಾದ್ವೈದೂರ್ಯಚಿತ್ರೇಷು ರಾಗಷಾಡವಸಟ್ಟಕಾನ್ ||೪೫೩|| ಪುರಸ್ತಾದ್ವಿಮಲೇ ಪಾತ್ರೇ ಸುವಿಸ್ತೀರ್ಣೇ ಮನೋರಮೇ | ಸೂದಃ ಸೂಪೌದನಂ ದದ್ಯಾತ್ ಪ್ರದೇಹಾಂಶ್ಚ ಸುಸಂಸ್ಕೃತಾನ್ ||೪೫೪|| ಫಲಾನಿ ಸರ್ವಭಕ್ಷ್ಯಾಂಶ್ಚ ಪರಿಶುಷ್ಕಾಣಿ ಯಾನಿ ಚ | ತಾನಿ ದಕ್ಷಿಣಪಾರ್ಶ್ವೇ ತು ಭುಞ್ಜಾನಸ್ಯೋಪಕಲ್ಪಯೇತ್ ||೪೫೫|| ಪ್ರದ್ರವಾಣಿ ರಸಾಂಶ್ಚೈವ ಪಾನೀಯಂ ಪಾನಕಂ ಪಯಃ | ಖಡಾನ್ ಯೂಷಾಂಶ್ಚ ಪೇಯಾಂಶ್ಚ ಸವ್ಯೇ ಪಾರ್ಶ್ವೇ ಪ್ರದಾಪಯೇತ್ ||೪೫೬|| ಸರ್ವಾನ್ ಗುಡವಿಕಾರಾಂಶ್ಚ ರಾಗಷಾಡವಸಟ್ಟಕಾನ್ | ಪುರಸ್ತಾತ್ ಸ್ಥಾಪಯೇತ್ ಪ್ರಾಜ್ಞೋ ದ್ವಯೋರಪಿ ಚ ಮಧ್ಯತಃ ||೪೫೭||

Adhikarana 334 (458) · Śloka 459

ಏವಂ ವಿಜ್ಞಾಯ ಮತಿಮಾನ್ ಭೋಜನಸ್ಯೋಪಕಲ್ಪನಾಮ್ | ಭೋಕ್ತಾರಂ ವಿಜನೇ ರಮ್ಯೇ ನಿಃಸಮ್ಪಾತೇ ಶುಭೇ ಶುಚೌ ||೪೫೮|| ಸುಗನ್ಧಪುಷ್ಪರಚಿತೇ ಸಮೇ ದೇಶೇ ಚ ಭೋಜಯೇತ್ |೪೫೯|

Adhikarana 335 (459) · Śloka 460

ವಿಶಿಷ್ಟಮಿಷ್ಟಸಂಸ್ಕಾರೈಃ ಪಥ್ಯೈರಿಷ್ಟೈ ರಸಾದಿಭಿಃ ||೪೫೯|| ಮನೋಜ್ಞಂ ಶುಚಿ ನಾತ್ಯುಷ್ಣಂ ಪ್ರತ್ಯಗ್ರಮಶನಂ ಹಿತಮ್ |೪೬೦|

Adhikarana 336 (460-464) · Śloka 464

ಪೂರ್ವಂ ಮಧುರಮಶ್ನೀಯಾನ್ಮಧ್ಯೇಽಮ್ಲಲವಣೌ ರಸೌ ||೪೬೦|| ಪಶ್ಚಾಚ್ಛೇಷಾನ್ ರಸಾನ್ ವೈದ್ಯೋ ಭೋಜನೇಷ್ವವಚಾರಯೇತ್ | ಆದೌ ಫಲಾನಿ ಭುಞ್ಜೀತ ದಾಡಿಮಾದೀನಿ ಬುದ್ಧಿಮಾನ್ ||೪೬೧|| ತತಃ ಪೇಯಾಂಸ್ತತೋ ಭೋಜ್ಯಾನ್ ಭಕ್ಷ್ಯಾಂಶ್ಚಿತ್ರಾಂಸ್ತತಃ ಪರಮ್ | ಘನಂ ಪೂರ್ವಂ ಸಮಶ್ನೀಯಾತ್, ಕೇಚಿದಾಹುರ್ವಿಪರ್ಯಯಮ್ ||೪೬೨|| ಆದಾವನ್ತೇ ಚ ಮಧ್ಯೇ ಚ ಭೋಜನಸ್ಯ ತು ಶಸ್ಯತೇ | ನಿರತ್ಯಯಂ ದೋಷಹರಂ ಫಲೇಷ್ವಾಮಲಕಂ ನೃಣಾಮ್ ||೪೬೩|| ಮೃಣಾಲಬಿಸಶಾಲೂಕಕನ್ದೇಕ್ಷುಪ್ರಭೃತೀನಿ ಚ | ಪೂರ್ವಂ ಯೋಜ್ಯಾನಿ ಭಿಷಜಾ ನ ತು ಭುಕ್ತೇ ಕದಾಚನ ||೪೬೪||

Adhikarana 337 (465) · Śloka 466

ಸುಖಮುಚ್ಚೈಃ ಸಮಾಸೀನಃ ಸಮದೇಹೋಽನ್ನತತ್ಪರಃ | ಕಾಲೇ ಸಾತ್ಮ್ಯಂ ಲಘು ಸ್ನಿಗ್ಧಮುಷ್ಣಂ ಕ್ಷಿಪ್ರಂ ದ್ರವೋತ್ತರಮ್ ||೪೬೫|| ಬುಭುಕ್ಷಿತೋಽನ್ನಮಶ್ನೀಯಾನ್ಮಾತ್ರಾವದ್ವಿದಿತಾಗಮಃ |೪೬೬|

Adhikarana 338 (466-467) · Śloka 468

ಕಾಲೇ ಪ್ರೀಣಯತೇ ಭುಕ್ತಂ ಸಾತ್ಮ್ಯಮನ್ನಂ ನ ಬಾಧತೇ ||೪೬೬|| ಲಘು ಶೀಘ್ರಂ ವ್ರಜೇತ್ ಪಾಕಂ ಸ್ನಿಗ್ಧೋಷ್ಣಂ ಬಲವಹ್ನಿದಮ್ | ಕ್ಷಿಪ್ರಂ ಭುಕ್ತಂ ಸಮಂ ಪಾಕಂ ಯಾತ್ಯದೋಷಂ ದ್ರವೋತ್ತರಮ್ ||೪೬೭|| ಸುಖಂ ಜೀರ್ಯತಿ ಮಾತ್ರಾವದ್ಧಾತುಸಾಮ್ಯಂ ಕರೋತಿ ಚ |೪೬೮|

Adhikarana 339 (468-470) · Śloka 471

ಅತೀವಾಯತಯಾಮಾಸ್ತು ಕ್ಷಪಾ ಯೇಷ್ವೃತುಷು ಸ್ಮೃತಾಃ ||೪೬೮|| ತೇಷು ತತ್ಪ್ರತ್ಯನೀಕಾಢ್ಯಂ ಭುಞ್ಜೀತ ಪ್ರಾತರೇವ ತು | ಯೇಷು ಚಾಪಿ ಭವೇಯುಶ್ಚ ದಿವಸಾ ಭೃಶಮಾಯತಾಃ ||೪೬೯|| ತೇಷು ತತ್ಕಾಲವಿಹಿತಮಪರಾಹ್ಣೇ ಪ್ರಶಸ್ಯತೇ | ರಜನ್ಯೋ ದಿವಸಾಶ್ಚೈವ ಯೇಷು ಚಾಪಿ ಸಮಾಃ ಸ್ಮೃತಾಃ ||೪೭೦|| ಕೃತ್ವಾ ಸಮಮಹೋರಾತ್ರಂ ತೇಷು ಭುಞ್ಜೀತ ಭೋಜನಮ್ |೪೭೧|

Adhikarana 340 (471-474) · Śloka 474

ನಾಪ್ರಾಪ್ತಾತೀತಕಾಲಂ ವಾ ಹೀನಾಧಿಕಮಥಾಪಿ ವಾ ||೪೭೧|| ಅಪ್ರಾಪ್ತಕಾಲಂ ಭುಞ್ಜಾನಃ ಶರೀರೇ ಹ್ಯಲಘೌ ನರಃ | ತಾಂಸ್ತಾನ್ ವ್ಯಾಧೀನವಾಪ್ನೋತಿ ಮರಣಂ ವಾ ನಿಯಚ್ಛತಿ ||೪೭೨|| ಅತೀತಕಾಲಂ ಭುಞ್ಜಾನೋ ವಾಯುನೋಪಹತೇಽನಲೇ | ಕೃಚ್ಛ್ರಾದ್ವಿಪಚ್ಯತೇ ಭುಕ್ತಂ ದ್ವಿತೀಯಂ ಚ ನ ಕಾಙ್ಕ್ಷತಿ ||೪೭೩|| ಹೀನಮಾತ್ರಮಸನ್ತೋಷಂ ಕರೋತಿ ಚ ಬಲಕ್ಷಯಮ್ | ಆಲಸ್ಯಗೌರವಾಟೋಪಸಾದಾಂಶ್ಚ ಕುರುತೇಽಧಿಕಮ್ ||೪೭೪||

Adhikarana 341 (475) · Śloka 476

ತಸ್ಮಾತ್ ಸುಸಂಸ್ಕೃತಂ ಯುಕ್ತ್ಯಾ ದೋಷೈರೇತೈರ್ವಿವರ್ಜಿತಮ್ | ಯಥೋಕ್ತಗುಣಸಮ್ಪನ್ನಮುಪಸೇವೇತ ಭೋಜನಮ್ ||೪೭೫|| ವಿಭಜ್ಯ ದೋಷಕಾಲಾದೀನ್ ಕಾಲಯೋರುಭಯೋರಪಿ |೪೭೬|

Adhikarana 342 (476-477) · Śloka 478

ಅಚೋಕ್ಷಂ ದುಷ್ಟಮುತ್ಸೃಷ್ಟಂ ಪಾಷಾಣತೃಣಲೋಷ್ಟವತ್ ||೪೭೬|| ದ್ವಿಷ್ಟಂ ವ್ಯುಷಿತಮಸ್ವಾದು ಪೂತಿ ಚಾನ್ನಂ ವಿವರ್ಜಯೇತ್ | ಚಿರಸಿದ್ಧಂ ಸ್ಥಿರಂ ಶೀತಮನ್ನಮುಷ್ಣೀಕೃತಂ ಪುನಃ ||೪೭೭|| ಅಶಾನ್ತಮುಪದಗ್ಧಂ ಚ ತಥಾ ಸ್ವಾದು ನ ಲಕ್ಷ್ಯತೇ |೪೭೮|

Adhikarana 343 (478) · Śloka 478

ಯದ್ಯತ್ ಸ್ವಾದುತರಂ ತತ್ತದ್ವಿದಧ್ಯಾದುತ್ತರೋತ್ತರಮ್ ||೪೭೮||

Adhikarana 344 (479-480) · Śloka 480

ಪ್ರಕ್ಷಾಲಯೇದದ್ಭಿರಾಸ್ಯಂ ಭುಞ್ಜಾನಸ್ಯ ಮುಹುರ್ಮುಹುಃ | ವಿಶುದ್ಧೇ ರಸನೇ ತಸ್ಯ ರೋಚತೇಽನ್ನಮಪೂರ್ವವತ್ ||೪೭೯|| ಸ್ವಾದುನಾ ತಸ್ಯ ರಸನಂ ಪ್ರಥಮೇನಾತಿತರ್ಪಿತಮ್ | ನ ತಥಾ ಸ್ವಾದಯೇದನ್ಯತ್ತಸ್ಮಾತ್ ಪ್ರಕ್ಷಾಲ್ಯಮನ್ತರಾ ||೪೮೦||

Adhikarana 345 (481) · Śloka 481

ಸೌಮನಸ್ಯಂ ಬಲಂ ಪುಷ್ಟಿಮುತ್ಸಾಹಂ ಹರ್ಷಣಂ ಸುಖಮ್ | ಸ್ವಾದು ಸಞ್ಜನಯತ್ಯನ್ನಮಸ್ವಾದು ಚ ವಿಪರ್ಯಯಮ್ ||೪೮೧||

Adhikarana 346 (482) · Śloka 482

ಭುಕ್ತ್ವಾಽಪಿ ಯತ್ ಪ್ರಾರ್ಥಯತೇ ಭೂಯಸ್ತತ್ ಸ್ವಾದು ಭೋಜನಮ್ |೪೮೨|

Adhikarana 347 (482) · Śloka 482

ಅಶಿತಶ್ಚೋದಕಂ ಯುಕ್ತ್ಯಾ ಭುಞ್ಜಾನಶ್ಚಾನ್ತರಾ ಪಿಬೇತ್ ||೪೮೨||

Adhikarana 348 (483) · Śloka 483

ದನ್ತಾನ್ತರಗತಂ ಚಾನ್ನಂ ಶೋಧನೇನಾಹರೇಚ್ಛನೈಃ | ಕುರ್ಯಾದನಿರ್ಹೃತಂ ತದ್ಧಿ ಮುಖಸ್ಯಾನಿಷ್ಟಗನ್ಧತಾಮ್ ||೪೮೩||

Adhikarana 349 (484) · Śloka 484

ಜೀರ್ಣೇಽನ್ನೇ ವರ್ಧತೇ ವಾಯುರ್ವಿದಗ್ಧೇ ಪಿತ್ತಮೇವ ತು | ಭುಕ್ತಮಾತ್ರೇ ಕಫಶ್ಚಾಪಿ,... |೪೮೪|

Adhikarana 350 (484-486) · Śloka 486

... ತಸ್ಮಾದ್ಭುಕ್ತೇರಿತಂ ಕಫಮ್ ||೪೮೪|| ಧೂಮೇನಾಪೋಹ್ಯ ಹೃದ್ಯೈರ್ವಾ ಕಷಾಯಕಟುತಿಕ್ತಕೈಃ | ಪೂಗಕಙ್ಕೋಲಕರ್ಪೂರಲವಙ್ಗಸುಮನಃಫಲೈಃ ||೪೮೫|| ಫಲೈಃ ಕಟುಕಷಾಯೈರ್ವಾ ಮುಖವೈಶದ್ಯಕಾರಕೈಃ | ತಾಮ್ಬೂಲಪತ್ರಸಹಿತೈಃ ಸುಗನ್ಧೈರ್ವಾ ವಿಚಕ್ಷಣಃ ||೪೮೬||

Adhikarana 351 (487) · Śloka 487

ಭುಕ್ತ್ವಾ ರಾಜವದಾಸೀತ ಯಾವದನ್ನಕ್ಲಮೋ ಗತಃ | ತತಃ ಪಾದಶತಂ ಗತ್ವಾ ವಾಮಪಾರ್ಶ್ವೇನ ಸಂವಿಶೇತ್ ||೪೮೭||

Adhikarana 352 (488) · Śloka 488

ಶಬ್ದಾನ್ರೂಪಾನ್ರಸಾನ್ ಗನ್ಧಾನ್ ಸ್ಪರ್ಶಾಂಶ್ಚ ಮನಸಃ ಪ್ರಿಯಾನ್ | ಭುಕ್ತವಾನುಪಸೇವೇತ ತೇನಾನ್ನಂ ಸಾಧು ತಿಷ್ಠತಿ ||೪೮೮||

Adhikarana 353 (489) · Śloka 489

ಶಬ್ದರೂಪರಸಾ ಗನ್ಧಾಃ ಸ್ಪರ್ಶಾಶ್ಚಾಪಿ ಜುಗುಪ್ಸಿತಾಃ | ಅಶುಚ್ಯನ್ನಂ ತಥಾ ಭುಕ್ತಮತಿಹಾಸ್ಯಂ ಚ ವಾಮಯೇತ್ ||೪೮೯||

Adhikarana 354 (490-491) · Śloka 491

ಶಯನಂ ಚಾಸನಂ ವಾಽಪಿ ನೇಚ್ಛೇದ್ವಾಽಪಿ ದ್ರವೋತ್ತರಮ್ | ನಾಗ್ನ್ಯಾತಪೌ ನ ಪ್ಲವನಂ ನ ಯಾನಂ ನಾಪಿ ವಾಹನಮ್ ||೪೯೦|| ನ ಚೈಕರಸಸೇವಾಯಾಂ ಪ್ರಸಜ್ಯೇತ ಕದಾಚನ | ಶಾಕಾವರಾನ್ನಭೂಯಿಷ್ಠಮಮ್ಲಂ ಚ ನ ಸಮಾಚರೇತ್ ||೪೯೧||

Adhikarana 355 (492) · Śloka 492

ಏಕೈಕಶಃ ಸಮಸ್ತಾನ್ ವಾ ನಾಧ್ಯಶ್ನೀಯಾದ್ರಸಾನ್ ಸದಾ |೪೯೨|

Adhikarana 356 (492) · Śloka 493

ಪ್ರಾಗ್ಭುಕ್ತೇ ತ್ವವಿವಿಕ್ತೇಽಗ್ನೌ ದ್ವಿರನ್ನಂ ನ ಸಮಾಚರೇತ್ ||೪೯೨|| ಪೂರ್ವಭುಕ್ತೇ ವಿದಗ್ಧೇಽನ್ನೇ ಭುಞ್ಜಾನೋ ಹನ್ತಿ ಪಾವಕಮ್ |೪೯೩|

Adhikarana 357 (493) · Śloka 493

ಮಾತ್ರಾಗುರುಂ ಪರಿಹರೇದಾಹಾರಂ ದ್ರವ್ಯತಶ್ಚ ಯಃ ||೪೯೩||

Adhikarana 358 (494) · Śloka 494

ಪಿಷ್ಟಾನ್ನಂ ನೈವ ಭುಞ್ಜೀತ ಮಾತ್ರಯಾ ವಾ ಬುಭುಕ್ಷಿತಃ | ದ್ವಿಗುಣಂ ಚ ಪಿಬೇತ್ತೋಯಂ ಸುಖಂ ಸಮ್ಯಕ್ ಪ್ರಜೀರ್ಯತಿ |೪೯೪|

Adhikarana 359 (494) · Śloka 494

ಪೇಯಲೇಹ್ಯಾದ್ಯಭಕ್ಷ್ಯಾಣಾಂ ಗುರು ವಿದ್ಯಾದ್ಯಥೋತ್ತರಮ್ ||೪೯೪||

Adhikarana 360 (495) · Śloka 495

ಗುರೂಣಾಮರ್ಧಸೌಹಿತ್ಯಂ ಲಘೂನಾಂ ತೃಪ್ತಿರಿಷ್ಯತೇ | ದ್ರವೋತ್ತರೋ ದ್ರವಶ್ಚಾಪಿ ನ ಮಾತ್ರಾಗುರುರಿಷ್ಯತೇ ||೪೯೫||

Adhikarana 361 (496) · Śloka 496

ದ್ರವಾಢ್ಯಮಪಿ ಶುಷ್ಕಂ ತು ಸಮ್ಯಗೇವೋಪಪದ್ಯತೇ |೪೯೬|

Adhikarana 362 (496) · Śloka 497

ವಿಶುಷ್ಕಮನ್ನಮಭ್ಯಸ್ತಂ ನ ಪಾಕಂ ಸಾಧು ಗಚ್ಛತಿ ||೪೯೬|| ಪಿಣ್ಡೀಕೃತಮಸಙ್ಕ್ಲಿನ್ನಂ ವಿದಾಹಮುಪಗಚ್ಛತಿ |೪೯೭|

Adhikarana 363 (497) · Śloka 498

ಸ್ರೋತಸ್ಯನ್ನವಹೇ ಪಿತ್ತಂ ಪಕ್ತೌ ವಾ ಯಸ್ಯ ತಿಷ್ಠತಿ ||೪೯೭|| ವಿದಾಹಿ ಭುಕ್ತಮನ್ಯದ್ವಾ ತಸ್ಯಾಪ್ಯನ್ನಂ ವಿದಹ್ಯತೇ |೪೯೮|

Adhikarana 364 (498) · Śloka 498

ಶುಷ್ಕಂ ವಿರುದ್ಧಂ ವಿಷ್ಟಮ್ಭಿ ವಹ್ನಿವ್ಯಾಪದಮಾವಹೇತ್ ||೪೯೮||

Adhikarana 365 (499) · Śloka 499

ಆಮಂ ವಿದಗ್ಧಂ ವಿಷ್ಟಬ್ಧಂ ಕಫಪಿತ್ತಾನಿಲೈಸ್ತ್ರಿಭಿಃ | ಅಜೀರ್ಣಂ ಕೇಚಿದಿಚ್ಛನ್ತಿ ಚತುರ್ಥಂ ರಸಶೇಷತಃ ||೪೯೯||

Adhikarana 366 (500-501) · Śloka 501

ಅತ್ಯಮ್ಬುಪಾನಾದ್ವಿಷಮಾಶನಾದ್ವಾ ಸನ್ಧಾರಣಾತ್ ಸ್ವಪ್ನವಿಪರ್ಯಯಾಚ್ಚ | ಕಾಲೇಽಪಿ ಸಾತ್ಮ್ಯಂ ಲಘು ಚಾಪಿ ಭುಕ್ತಮನ್ನಂ ನ ಪಾಕಂ ಭಜತೇ ನರಸ್ಯ ||೫೦೦|| ಈರ್ಷ್ಯಾಭಯಕ್ರೋಧಪರಿಕ್ಷತೇನ ಲುಬ್ಧೇನ ಶುಗ್ದೈನ್ಯನಿಪೀಡಿತೇನ | ಪ್ರದ್ವೇಷಯುಕ್ತೇನ ಚ ಸೇವ್ಯಮಾನಮನ್ನಂ ನ ಸಮ್ಯಕ್ ಪರಿಣಾಮಮೇತಿ ||೫೦೧||

Adhikarana 367 (502-503) · Śloka 503

ಮಾಧುರ್ಯಮನ್ನಂ ಗತಮಾಮಸಞ್ಜ್ಞಂ ವಿದಗ್ಧಸಞ್ಜ್ಞಂ ಗತಮಮ್ಲಭಾವಮ್ | ಕಿಞ್ಚಿದ್ವಿಪಕ್ವಂ, ಭೃಶತೋದಶೂಲಂ ವಿಷ್ಟಬ್ಧಮಾನದ್ಧವಿರುದ್ಧವಾತಮ್ ||೫೦೨|| ಉದ್ಗಾರಶುದ್ಧಾವಪಿ ಭಕ್ತಕಾಙ್ಕ್ಷಾ ನ ಜಾಯತೇ ಹೃದ್ಗುರುತಾ ಚ ಯಸ್ಯ | ರಸಾವಶೇಷೇಣ ತು ಸಪ್ರಸೇಕಂ ಚತುರ್ಥಮೇತತ್ ಪ್ರವದನ್ತ್ಯಜೀರ್ಣಮ್ ||೫೦೩||

Adhikarana 368 (504) · Śloka 504

ಮೂರ್ಚ್ಛಾ ಪ್ರಲಾಪೋ ವಮಥುಃ ಪ್ರಸೇಕಃ ಸದನಂ ಭ್ರಮಃ | ಉಪದ್ರವಾ ಭವನ್ತ್ಯೇತೇ ಮರಣಂ ಚಾಪ್ಯಜೀರ್ಣತಃ ||೫೦೪||

Adhikarana 369 (505-507) · Śloka 507

ತತ್ರಾಮೇ ಲಙ್ಘನಂ ಕಾರ್ಯಂ, ವಿದಗ್ಧೇ ವಮನಂ ಹಿತಮ್ | ವಿಷ್ಟಬ್ಧೇ ಸ್ವೇದನಂ ಪಥ್ಯಂ, ರಸಶೇಷೇ ಶಯೀತ ಚ ||೫೦೫|| ವಾಮಯೇದಾಶು ತಂ ತಸ್ಮಾದುಷ್ಣೇನ ಲವಣಾಮ್ಬುನಾ | ಕಾರ್ಯಂ ವಾಽನಶನಂ ತಾವದ್ಯಾವನ್ನ ಪ್ರಕೃತಿಂ ಭಜೇತ್ ||೫೦೬|| ಲಘುಕಾಯಮತಶ್ಚೈನಂ ಲಙ್ಘನೈಃ ಸಮುಪಾಚರೇತ್ | ಯಾವನ್ನ ಪ್ರಕೃತಿಸ್ಥಃ ಸ್ಯಾದ್ದೋಷತಃ ಪ್ರಾಣತಸ್ತಥಾ ||೫೦೭||

Adhikarana 370 (508-509) · Śloka 509

ಹಿತಾಹಿತೋಪಸಂಯುಕ್ತಮನ್ನಂ ಸಮಶನಂ ಸ್ಮೃತಮ್ | ಬಹು ಸ್ತೋಕಮಕಾಲೇ ವಾ ತಜ್ಜ್ಞೇಯಂ ವಿಷಮಾಶನಮ್ ||೫೦೮|| ಅಜೀರ್ಣೇ ಭುಜ್ಯತೇ ಯತ್ತು ತದಧ್ಯಶನಮುಚ್ಯತೇ | ತ್ರಯಮೇತನ್ನಿಹನ್ತ್ಯಾಶು ಬಹೂನ್ವ್ಯಾಧೀನ್ಕರೋತಿ ವಾ ||೫೦೯||

Adhikarana 371 (510) · Śloka 510

ಅನ್ನಂ ವಿದಗ್ಧಂ ಹಿ ನರಸ್ಯ ಶೀಘ್ರಂ ಶೀತಾಮ್ಬುನಾ ವೈ ಪರಿಪಾಕಮೇತಿ | ತದ್ಧ್ಯಸ್ಯ ಶೈತ್ಯೇನ ನಿಹನ್ತಿ ಪಿತ್ತಮಾಕ್ಲೇದಿಭಾವಾಚ್ಚ ನಯತ್ಯಧಸ್ತಾತ್ ||೫೧೦||

Adhikarana 372 (511) · Śloka 511

ವಿದಹ್ಯತೇ ಯಸ್ಯ ತು ಭುಕ್ತಮಾತ್ರೇ ದಹ್ಯೇತ ಹೃತ್ಕೋಷ್ಠಗಲಂ ಚ ಯಸ್ಯ | ದ್ರಾಕ್ಷಾಭಯಾಂ ಮಾಕ್ಷಿಕಸಮ್ಪ್ರಯುಕ್ತಾಂ ಲೀಢ್ವಾಽಭಯಾಂ ವಾ ಸ ಸುಖಂ ಲಭೇತ ||೫೧೧||

Adhikarana 373 (512) · Śloka 512

ಭವೇದಜೀರ್ಣಂ ಪ್ರತಿ ಯಸ್ಯ ಶಙ್ಕಾ ಸ್ನಿಗ್ಧಸ್ಯ ಜನ್ತೋರ್ಬಲಿನೋಽನ್ನಕಾಲೇ | ಪ್ರಾತಃ ಸಶುಣ್ಠೀಮಭಯಾಮಶಙ್ಕೋ ಭುಞ್ಜೀತ ಸಮ್ಪ್ರಾಶ್ಯ ಹಿತಂ ಹಿತಾರ್ಥೀ ||೫೧೨||

Adhikarana 374 (513) · Śloka 513

ಸ್ವಲ್ಪಂ ಯದಾ ದೋಷವಿಬದ್ಧಮಾಮಂ ಲೀನಂ ನ ತೇಜಃಪಥಮಾವೃಣೋತಿ | ಭವತ್ಯಜೀರ್ಣೇಽಪಿ ತದಾ ಬುಭುಕ್ಷಾ ಯಾ ಮನ್ದಬುದ್ಧಿಂ ವಿಷವನ್ನಿಹನ್ತಿ ||೫೧೩||

Adhikarana 375 (514-524) · Śloka 525

ಅತ ಉರ್ಧ್ವಂ ಪ್ರವಕ್ಷ್ಯಾಮಿ ಗುಣಾನಾಂ ಕರ್ಮವಿಸ್ತರಮ್ | ಕರ್ಮಭಿಸ್ತ್ವನುಮೀಯನ್ತೇ ನಾನಾದ್ರವ್ಯಾಶ್ರಯಾ ಗುಣಾಃ ||೫೧೪|| ಹ್ಲಾದನಃ ಸ್ತಮ್ಭನಃ ಶೀತೋ ಮೂರ್ಚ್ಛಾತೃಟ್ಸ್ವೇದದಾಹಜಿತ್ | ಉಷ್ಣಸ್ತದ್ವಿಪರೀತಃ ಸ್ಯಾತ್ಪಾಚನಶ್ಚ ವಿಶೇಷತಃ ||೫೧೫|| ಸ್ನೇಹಮಾರ್ದವಕೃತ್ ಸ್ನಿಗ್ಧೋ ಬಲವರ್ಣಕರಸ್ತಥಾ | ರೂಕ್ಷಸ್ತದ್ವಿಪರೀತಃ ಸ್ಯಾದ್ವಿಶೇಷಾತ್ ಸ್ತಮ್ಭನಃ ಖರಃ ||೫೧೬|| ಪಿಚ್ಛಿಲೋ ಜೀವನೋ ಬಲ್ಯಃ ಸನ್ಧಾನಃ ಶ್ಲೇಷ್ಮಲೋ ಗುರುಃ | ವಿಶದೋ ವಿಪರೀತೋಽಸ್ಮಾತ್ ಕ್ಲೇದಾಚೂಷಣರೋಪಣಃ ||೫೧೭|| ದಾಹಪಾಕಕರಸ್ತೀಕ್ಷ್ಣಃ ಸ್ರಾವಣೋ, ಮೃದುರನ್ಯಥಾ | ಸಾದೋಪಲೇಪಬಲಕೃದ್ಗುರುಸ್ತರ್ಪಣಬೃಂಹಣಃ ||೫೧೮|| ಲಘುಸ್ತದ್ವಿಪರೀತಃ ಸ್ಯಾಲ್ಲೇಖನೋ ರೋಪಣಸ್ತಥಾ | ದಶಾದ್ಯಾಃ ಕರ್ಮತಃ ಪ್ರೋಕ್ತಾಸ್ತೇಷಾಂ ಕರ್ಮವಿಶೇಷಣೈಃ ||೫೧೯|| ದಶೈವಾನ್ಯಾನ್ ಪ್ರವಕ್ಷ್ಯಾಮಿ ದ್ರವಾದೀಂಸ್ತಾನ್ನಿಬೋಧ ಮೇ | ದ್ರವಃ ಪ್ರಕ್ಲೇದನಃ, ಸಾನ್ದ್ರಃ ಸ್ಥೂಲಃ ಸ್ಯಾದ್ಬನ್ಧಕಾರಕಃ ||೫೨೦|| ಶ್ಲಕ್ಷ್ಣಃ ಪಿಚ್ಛಿಲವಜ್ಜ್ಞೇಯಃ ಕರ್ಕಶೋ ವಿಶದೋ ಯಥಾ | ಸುಖಾನುಬನ್ಧೀ ಸೂಕ್ಷ್ಮಶ್ಚ ಸುಗನ್ಧೋ ರೋಚನೋ ಮೃದುಃ ||೫೨೧|| ದುರ್ಗನ್ಧೋ ವಿಪರೀತೋಽಸ್ಮಾದ್ಧೃಲ್ಲಾಸಾರುಚಿಕಾರಕಃ | ಸರೋಽನುಲೋಮನಃ ಪ್ರೋಕ್ತೋ, ಮನ್ದೋ ಯಾತ್ರಾಕರಃ ಸ್ಮೃತಃ ||೫೨೨|| ವ್ಯವಾಯೀ ಚಾಖಿಲಂ ದೇಹಂ ವ್ಯಾಪ್ಯ ಪಾಕಾಯ ಕಲ್ಪತೇ | ವಿಕಾಸೀ ವಿಕಸನ್ನೇವಂ ಧಾತುಬನ್ಧಾನ್ ವಿಮೋಕ್ಷಯೇತ್ ||೫೨೩|| ಆಶುಕಾರೀ ತಥಾಽಽಶುತ್ವಾದ್ಧಾವತ್ಯಮ್ಭಸಿ ತೈಲವತ್ | ಸೂಕ್ಷ್ಮಸ್ತು ಸೌಕ್ಷ್ಮ್ಯಾತ್ ಸೂಕ್ಷ್ಮೇಷು ಸ್ರೋತಃಸ್ವನುಸರಃ ಸ್ಮೃತಃ ||೫೨೪|| ಗುಣಾ ವಿಂಶತಿರಿತ್ಯೇವಂ ಯಥಾವತ್ಪರಿಕೀರ್ತಿತಾಃ |೫೨೫|

Adhikarana 376 (525) · Śloka 525

ಸಮ್ಪ್ರವಕ್ಷ್ಯಾಮ್ಯತಶ್ಚೋರ್ಧ್ವಮಾಹಾರಗತಿನಿಶ್ಚಯಮ್ ||೫೨೫||

Adhikarana 377 (526) · Śloka 526

ಪಞ್ಚಭೂತಾತ್ಮಕೇ ದೇಹೇ ಹ್ಯಾಹಾರಃ ಪಾಞ್ಚಭೌತಿಕಃ | ವಿಪಕ್ವಃ ಪಞ್ಚಧಾ ಸಮ್ಯಗ್ಗುಣಾನ್ ಸ್ವಾನಭಿವರ್ಧಯೇತ್ ||೫೨೬||

Adhikarana 378 (527) · Śloka 527

ಅವಿದಗ್ಧಃ ಕಫಂ, ಪಿತ್ತಂ ವಿದಗ್ಧಃ, ಪವನಂ ಪುನಃ | ಸಮ್ಯಗ್ವಿಪಕ್ವೋ ನಿಃಸಾರ ಆಹಾರಃ ಪರಿಬೃಂಹಯೇತ್ ||೫೨೭||

Adhikarana 379 (528) · Śloka 528

ವಿಣ್ಮೂತ್ರಮಾಹಾರಮಲಃ ಸಾರಃ ಪ್ರಾಗೀರಿತೋ ರಸಃ |೫೨೮|

Adhikarana 380 (528) · Śloka 528

ಸ ತು ವ್ಯಾನೇನ ವಿಕ್ಷಿಪ್ತಃ ಸರ್ವಾನ್ ಧಾತೂನ್ ಪ್ರತರ್ಪಯೇತ್ ||೫೨೮||

Adhikarana 381 (529) · Śloka 529

ಕಫಃ ಪಿತ್ತಂ ಮಲಃ ಖೇಷು ಸ್ವೇದಃ ಸ್ಯಾನ್ನಖರೋಮ ಚ | ನೇತ್ರವಿಟ್ ತ್ವಕ್ಷು ಚ ಸ್ನೇಹೋ ಧಾತೂನಾಂ ಕ್ರಮಶೋ ಮಲಾಃ ||೫೨೯||

Adhikarana 382 (530-531) · Śloka 531

ದಿವಾ ವಿಬುದ್ಧೇ ಹೃದಯೇ ಜಾಗ್ರತಃ ಪುಣ್ಡರೀಕವತ್ | ಅನ್ನಮಕ್ಲಿನ್ನಧಾತುತ್ವಾದಜೀರ್ಣೇಽಪಿ ಹಿತಂ ನಿಶಿ ||೫೩೦|| ಹೃದಿ ಸಮ್ಮೀಲಿತೇ ರಾತ್ರೌ ಪ್ರಸುಪ್ತಸ್ಯ ವಿಶೇಷತಃ | ಕ್ಲಿನ್ನವಿಸ್ರಸ್ತಧಾತುತ್ವಾದಜೀರ್ಣೇ ನ ಹಿತಂ ದಿವಾ ||೫೩೧||

Adhikarana 383 (532) · Śloka 532

ಇಮಂ ವಿಧಿಂ ಯೋಽನುಮತಂ ಮಹಾಮುನೇರ್ನೃಪರ್ಷಿಮುಖ್ಯಸ್ಯ ಪಠೇದ್ಧಿ ಯತ್ನತಃ | ಸ ಭೂಮಿಪಾಲಾಯ ವಿಧಾತುಮೌಷಧಂ ಮಹಾತ್ಮನಾಂ ಚಾರ್ಹತಿ ಸೂರಿಸತ್ತಮಃ ||೫೩೨||

Adhikarana puShpikA · Śloka 46

ಇತಿ ಭಗವತಾ ಶ್ರೀಧನ್ವನ್ತರಿಣೋಪದಿಷ್ಟಾಯಾಂ ತಚ್ಛಿಷ್ಯೇಣ ಮಹರ್ಷಿಣಾ ಸುಶ್ರುತೇನ ವಿರಚಿತಾಯಾಂ ಸುಶ್ರುತಸಂಹಿತಾಯಾಂ ಸೂತ್ರಸ್ಥಾನೇ ಷಟ್ಚತ್ವಾರಿಂಶತ್ತಮೋಽಧ್ಯಾಯಃ ||೪೬|| ಇತಿ ಭಗವತಾ ಶ್ರೀಧನ್ವನ್ತರಿಣೋಪದಿಷ್ಟಾಯಾಂ ತಚ್ಛಿಷ್ಯೇಣ ಮಹರ್ಷಿಣಾ ಸುಶ್ರುತೇನ ವಿರಚಿತಾಯಾಂ ಸುಶ್ರುತಸಂಹಿತಾಯಾಂ ಪ್ರಥಮಂ ಸೂತ್ರಸ್ಥಾನಂ ಸಮಾಪ್ತಮ್ |