4. prabhāṣaṇīyādhyāyaḥ

Adhikarana 1 (1-2) · Śloka 2

અથાતઃ પ્રભાષણીયમધ્યાયં વ્યાખ્યાસ્યામઃ ||૧|| યથોવાચ ભગવાન્ ધન્વન્તરિઃ ||૨||

Adhikarana 2 (3-4) · Śloka 4

અધિગતમપ્યધ્યયનમપ્રભાષિતમર્થતઃ ખરસ્ય ચન્દનભાર ઇવ કેવલં પરિશ્રમકરં ભવતિ ||૩|| ભવતિ ચાત્ર- યથા ખરશ્ચન્દનભારવાહી ભારસ્ય વેત્તા ન તુ ચન્દનસ્ય | એવં હિ શાસ્ત્રાણિ બહૂન્યધીત્ય ચાર્થેષુ મૂઢાઃ ખરવદ્વહન્તિ ||૪||

Adhikarana 3 (5) · Śloka 5

તસ્માત્ સવિંશમધ્યાયશતમનુપદપાદશ્લોકમનુવર્ણયિતવ્યમનુશ્રોતવ્યં ચ; કસ્માત્? સૂક્ષ્મા હિ દ્રવ્યરસગુણવીર્યવિપાકદોષધાતુમલાશયમર્મસિરાસ્નાયુસન્ધ્યસ્થિગર્ભસમ્ભવદ્રવ્યસમૂહવિભાગાસ્તથા પ્રનષ્ટશલ્યોદ્ધરણવ્રણવિનિશ્ચયભગ્નવિકલ્પાઃ સાધ્યયાપ્યપ્રત્યાખ્યેયતા ચ વિકારાણામેવમાદયશ્ચાન્યે વિશેષાઃ સહસ્રશો યે વિચિન્ત્યમાના વિમલવિપુલબુદ્ધેરપિ બુદ્ધિમાકુલીકુર્યુઃ કિં પુનરલ્પબુદ્ધેઃ, તસ્માદવશ્યમનુપદપાદશ્લોકમનુવર્ણયિતવ્યમનુશ્રોતવ્યં ચ ||૫||

Adhikarana 4 (6) · Śloka 6

અન્યશાસ્ત્રોપપન્નાનાં ચાર્થાનામિહોપનીતાનામર્થવશાત્તેષાં તદ્વિદ્યેભ્ય એવ વ્યાખ્યાનમનુશ્રોતવ્યં, કસ્માત્? ન હ્યેકસ્મિન્ શાસ્ત્રે શક્યઃ સર્વશાસ્ત્રાણામવરોધઃ કર્તુમ્ ||૬||

Adhikarana 5 (7) · Śloka 7

ભવન્તિ ચાત્ર- એકં શાસ્ત્રમધીયાનો ન વિદ્યાચ્છાસ્ત્રનિશ્ચયમ્ | તસ્માદ્બહુશ્રુતઃ શાસ્ત્રં વિજાનીયાચ્ચિકિત્સકઃ ||૭||

Adhikarana 6 (8) · Śloka 8

શાસ્ત્રં ગુરુમુખોદ્ગીર્ણમાદાયોપાસ્ય ચાસકૃત્ | યઃ કર્મ કુરુતે વૈદ્યઃ સ વૈદ્યોઽન્યે તુ તસ્કરાઃ ||૮||

Adhikarana 7 (9) · Śloka 9

ઔપધેનવમૌરભ્રં સૌશ્રુતં પૌષ્કલાવતમ્ | શેષાણાં શલ્યતન્ત્રાણાં મૂલાન્યેતાનિ નિર્દિશેત્ ||૯||

Adhikarana puShpikA · Śloka 4

ઇતિ સુશ્રુતસંહિતાયાં સૂત્રસ્થાને પ્રભાષણીયો નામ ચતુર્થોઽધ્યાયઃ ||૪||