7. mūṣikakalpaḥ

Adhikarana 1 (1-2) · Śloka 2

ಅಥಾತೋ ಮೂಷಿಕಕಲ್ಪಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3-6) · Śloka 6

ಪೂರ್ವಂ ಶುಕ್ರವಿಷಾ ಉಕ್ತಾ ಮೂಷಿಕಾ ಯೇ ಸಮಾಸತಃ | ನಾಮಲಕ್ಷಣಭೈಷಜ್ಯೈರಷ್ಟಾದಶ ನಿಬೋಧ ಮೇ ||೩|| ಲಾಲನಃ ಪುತ್ರಕಃ ಕೃಷ್ಣೋ ಹಂಸಿರಶ್ಚಿಕ್ವಿ(ಕ್ಕಿ)ರಸ್ತಥಾ | ಛುಚ್ಛುನ್ದರೋಽಲಸಶ್ಚೈವ ಕಷಾಯದಶನೋಽಪಿ ಚ ||೪|| ಕುಲಿಙ್ಗಶ್ಚಾಜಿತಶ್ಚೈವ ಚಪಲಃ ಕಪಿಲಸ್ತಥಾ ಕೋಕಿಲೋಽರುಣಸಞ್ಜ್ಞಶ್ಚ ಮಹಾಕೃಷ್ಣಸ್ತಥೋನ್ದುರಃ ||೫|| ಶ್ವೇತೇನ ಮಹತಾ ಸಾರ್ಧಂ ಕಪಿಲೇನಾಖುನಾ ತಥಾ | ಮೂಷಿಕಶ್ಚ ಕಪೋತಾಭಸ್ತಥೈವಾಷ್ಟಾದಶ ಸ್ಮೃತಾಃ ||೬||

Adhikarana 3 (7) · Śloka 7

ಶುಕ್ರಂ ಪತತಿ ಯತ್ರೈಷಾಂ ಶುಕ್ರಸ್ಪೃಷ್ಟೈಃ ಸ್ಪೃಶನ್ತಿ ವಾ | ನಖದನ್ತಾದಿಭಿಸ್ತಸ್ಮಿನ್ ಗಾತ್ರೇ ರಕ್ತಂ ಪ್ರದುಷ್ಯತಿ ||೭||

Adhikarana 4 (8-9) · Śloka 10

ಜಾಯನ್ತೇ ಗ್ರನ್ಥಯಃ ಶೋಫಾಃ ಕರ್ಣಿಕಾ ಮಣ್ಡಲಾನಿ ಚ | ಪೀಡಕೋಪಚಯಶ್ಚೋಗ್ರೋ ವಿಸರ್ಪಾಃ ಕಿಟಿಭಾನಿ ಚ ||೮|| ಪರ್ವಭೇದೋ ರುಜಸ್ತೀವ್ರಾ ಮೂರ್ಚ್ಛಾಽಙ್ಗಸದನಂ ಜ್ವರಃ | ದೌರ್ಬಲ್ಯಮರುಚಿಃ ಶ್ವಾಸೋ ವಮಥುರ್ಲೋಮಹರ್ಷಣಮ್ ||೯|| ದಷ್ಟರೂಪಂ ಸಮಾಸೋಕ್ತಮೇತದ್ವ್ಯಾಸಮತಃ ಶೃಣು |೧೦|

Adhikarana 5 (10) · Śloka 11

ಲಾಲಾಸ್ರಾವೋ ಲಾಲನೇನ ಹಿಕ್ಕಾ ಛರ್ದಿಶ್ಚ ಜಾಯತೇ ||೧೦|| ತಣ್ಡುಲೀಯಕಕಲ್ಕಂ ತು ಲಿಹ್ಯಾತ್ತತ್ರ ಸಮಾಕ್ಷಿಕಮ್ |೧೧|

Adhikarana 6 (11-12) · Śloka 12

ಪುತ್ರಕೇಣಾಙ್ಗಸಾದಶ್ಚ ಪಾಣ್ಡುವರ್ಣಶ್ಚ ಜಾಯತೇ ||೧೧|| ಚೀಯತೇ ಗ್ರನ್ಥಿಭಿಶ್ಚಾಙ್ಗಮಾಖುಶಾವಕಸನ್ನಿಭೈಃ | ಶಿರೀಷೇಙ್ಗುದಕಲ್ಕಂ ತು ಲಿಹ್ಯಾತ್ತತ್ರ ಸಮಾಕ್ಷಿಕಮ್ ||೧೨||

Adhikarana 7 (13) · Śloka 13

ಕೃಷ್ಣೇನ ದಂಶೇ ಶೋಫೋಽಸೃಕ್ಛರ್ದಿಃ ಪ್ರಾಯಶ್ಚ ದುರ್ದಿನೇ | ಶಿರೀಷಫಲಕುಷ್ಠಂ ತು ಪಿಬೇತ್ ಕಿಂಶುಕಭಸ್ಮನಾ ||೧೩||

Adhikarana 8 (14) · Śloka 14

ಹಂಸಿರೇಣಾನ್ನವಿದ್ವೇಷೋ ಜೃಮ್ಭಾ ರೋಮ್ಣಾಂ ಚ ಹರ್ಷಣಮ್ | ಪಿಬೇದಾರಗ್ವಧಾದಿಂ ತು ಸುವಾನ್ತಸ್ತತ್ರ ಮಾನವಃ ||೧೪||

Adhikarana 9 (15) · Śloka 16

ಚಿಕ್ವಿ(ಕ್ಕಿ)ರೇಣ ಶಿರೋದುಃಖಂ ಶೋಫೋ ಹಿಕ್ಕಾ ವಮಿಸ್ತಥಾ | ಜಾಲಿನೀಮದನಾಙ್ಕೋಠಕಷಾಯೈರ್ವಾಮಯೇತ್ತು ತಮ್ ||೧೫|| ಯವನಾಲರ್ಷಭೀಕ್ಷಾರಂ ಬೃಹತ್ಯೋಶ್ಚಾತ್ರ ದಾಪಯೇತ್ |೧೬|

Adhikarana 10 (16-17) · Śloka 18

ಛುಚ್ಛುನ್ದರೇಣ ತೃಟ್ ಛರ್ದಿರ್ಜ್ವರೋ ದೌರ್ಬಲ್ಯಮೇವ ಚ ||೧೬|| ಗ್ರೀವಾಸ್ತಮ್ಭಃ ಪೃಷ್ಠಶೋಫೋ ಗನ್ಧಾಜ್ಞಾನಂ ವಿಸೂಚಿಕಾ | ಚವ್ಯಂ ಹರೀತಕೀ ಶುಣ್ಠೀ ವಿಡಙ್ಗಂ ಪಿಪ್ಪಲೀ ಮಧು ||೧೭|| ಅಙ್ಕೋಠಬೀಜಂ ಚ ತಥಾ ಪಿಬೇದತ್ರ ವಿಷಾಪಹಮ್ |೧೮|

Adhikarana 11 (18-20) · Śloka 21

ಗ್ರೀವಾಸ್ತಮ್ಭೋಽಲಸೇನೋರ್ಧ್ವವಾಯುರ್ದಂಶೇ ರುಜಾ ಜ್ವರಃ ||೧೮|| ಮಹಾಗದಂ ಸಸರ್ಪಿಷ್ಕಂ ಲಿಹ್ಯಾತ್ತತ್ರ ಸಮಾಕ್ಷಿಕಮ್ | ನಿದ್ರಾ ಕಷಾಯದನ್ತೇನ ಹೃಚ್ಛೋಷಃ ಕಾರ್ಶ್ಯಮೇವ ಚ ||೧೯|| ಕ್ಷೌದ್ರೋಪೇತಾಃ ಶಿರೀಷಸ್ಯ ಲಿಹ್ಯಾತ್ ಸಾರಫಲತ್ವಚಃ | ಕುಲಿಙ್ಗೇನ ರುಜಃ ಶೋಫೋ ರಾಜ್ಯಶ್ಚ ದಂಶಮಣ್ಡಲೇ ||೨೦|| ಸಹೇ ಸಸಿನ್ಧುವಾರೇ ಚ ಲಿಹ್ಯಾತ್ತತ್ರ ಸಮಾಕ್ಷಿಕೇ |೨೧|

Adhikarana 12 (21) · Śloka 22

ಅಜಿತೇನಾಙ್ಗಕೃಷ್ಣತ್ವಂ ಛರ್ದಿರ್ಮೂರ್ಚ್ಛಾ ಚ ಹೃದ್ಗ್ರಹಃ ||೨೧|| ಸ್ನುಕ್ಕ್ಷೀರಪಿಷ್ಟಾಂ ಪಾಲಿನ್ದೀಂ ಮಞ್ಜಿಷ್ಠಾಂ ಮಧುನಾ ಲಿಹೇತ್ |೨೨|

Adhikarana 13 (22) · Śloka 23

ಚಪಲೇನ ಭವೇಚ್ಛರ್ದಿರ್ಮೂರ್ಚ್ಛಾ ಚ ಸಹ ತೃಷ್ಣಯಾ ||೨೨|| ಕ್ಷೌದ್ರೇಣ ತ್ರಿಫಲಾಂ ಲಿಹ್ಯಾದ್ಭದ್ರಕಾಷ್ಠಜಟಾನ್ವಿತಾಮ್ |೨೩|

Adhikarana 14 (23-24) · Śloka 25

ಕಪಿಲೇನ ವ್ರಣೇ ಕೋಥೋ ಜ್ವರೋ ಗ್ರನ್ಥ್ಯುದ್ಗಮಃ ಸತೃಟ್ ||೨೩|| ಲಿಹ್ಯಾನ್ಮಧುಯುತಾಂ ಶ್ವೇತಾಂ ಶ್ವೇತಾಂ ಚಾಪಿ ಪುನರ್ನವಾಮ್ | ಗ್ರನ್ಥಯಃ ಕೋಕಿಲೇನೋಗ್ರಾ ಜ್ವರೋ ದಾಹಶ್ಚ ದಾರುಣಃ ||೨೪|| ವರ್ಷಾಭೂನೀಲಿನೀಕ್ವಾಥಕಲ್ಕಸಿದ್ಧಂ ಘೃತಂ ಪಿಬೇತ್ |೨೫|

Adhikarana 15 (25-31) · Śloka 32

ಅರುಣೇನಾನಿಲಃ ಕ್ರುದ್ಧೋ ವಾತಜಾನ್ ಕುರುತೇ ಗದಾನ್ ||೨೫|| ಮಹಾಕೃಷ್ಣೇನ ಪಿತ್ತಂ ಚ ಶ್ವೇತೇನ ಕಫ ಏವ ಚ | ಮಹತಾ ಕಪಿಲೇನಾಸೃಕ್ ಕಪೋತೇನ ಚತುಷ್ಟಯಮ್ ||೨೬|| ಭವನ್ತಿ ಚೈಷಾಂ ದಂಶೇಷು ಗ್ರನ್ಥಿಮಣ್ಡಲಕರ್ಣಿಕಾಃ | ಪಿಡಕೋಪಚಯಶ್ಚೋಗ್ರಃ ಶೋಫಶ್ಚ ಭೃಶದಾರುಣಃ ||೨೭|| ದಧಿಕ್ಷೀರಘೃತಪ್ರಸ್ಥಾಸ್ತ್ರಯಃ ಪ್ರತ್ಯೇಕಶೋ ಮತಾಃ | ಕರಞ್ಜಾರಗ್ವಧವ್ಯೋಷಬೃಹತ್ಯಂಶುಮತೀಸ್ಥಿರಾಃ ||೨೮|| ನಿಷ್ಕ್ವಾಥ್ಯ ಚೈಷಾಂ ಕ್ವಾಥಸ್ಯ ಚತುರ್ಥೋಂಽಶಃ ಪುನರ್ಭವೇತ್ | ತ್ರಿವೃದ್ಗೋಜ್ಯಮೃತಾವಕ್ರಸರ್ಪಗನ್ಧಾಃ ಸಮೃತ್ತಿಕಾಃ ||೨೯|| ಕಪಿತ್ಥದಾಡಿಮತ್ವಕ್ ಚ ಶ್ಲಕ್ಷ್ಣಪಿಷ್ಟಾಃ ಪ್ರದಾಪಯೇತ್ | ತತ್ ಸರ್ವಮೇಕತಃ ಕೃತ್ವಾ ಶನೈರ್ಮೃದ್ವಗ್ನಿನಾ ಪಚೇತ್ ||೩೦|| ಪಞ್ಚಾನಾಮರುಣಾದೀನಾಂ ವಿಷಮೇತದ್ವ್ಯಪೋಹತಿ | ಕಾಕಾದನೀಕಾಕಮಾಚ್ಯೋಃ ಸ್ವರಸೇಷ್ವಥವಾ ಕೃತಮ್ ||೩೧|| ಸಿರಾಶ್ಚ ಸ್ರಾವಯೇತ್ ಪ್ರಾಪ್ತಾಃ ಕುರ್ಯಾತ್ ಸಂಶೋಧನಾನಿ ಚ |೩೨|

Adhikarana 16 (32) · Śloka 32

ಸರ್ವೇಷಾಂ ಚ ವಿಧಿಃ ಕಾರ್ಯೋ ಮೂಷಿಕಾಣಾಂ ವಿಷೇಷ್ವಯಮ್ ||೩೨||

Adhikarana 17 (33) · Śloka 33

ದಗ್ಧ್ವಾ ವಿಸ್ರಾವಯೇದ್ದಂಶಂ ಪ್ರಚ್ಛಿತಂ ಚ ಪ್ರಲೇಪಯೇತ್ | ಶಿರೀಷರಜನೀಕುಷ್ಠಕುಙ್ಕುಮೈರಮೃತಾಯುತೈಃ ||೩೩||

Adhikarana 18 (34) · Śloka 34

ಛರ್ದನಂ ಜಾಲಿನೀಕ್ವಾಥೈಃ ಶುಕಾಖ್ಯಾಙ್ಕೋಠಯೋರಪಿ ||೩೪||

Adhikarana 19 (34-36) · Śloka 36

ಶುಕಾಖ್ಯಾಕೋಷವತ್ಯೋಶ್ಚ ಮೂಲಂ ಮದನ ಏವ ಚ | ದೇವದಾಲೀಫಲಂ ಚೈವ ದಧ್ನಾ ಪೀತ್ವಾ ವಿಷಂ ವಮೇತ್ | ಸರ್ವಮೂಷಿಕದಷ್ಟಾನಾಮೇಷ ಯೋಗಃ ಸುಖಾವಹಃ ||೩೫|| ಫಲಂ ವಚಾ ದೇವದಾಲೀ ಕುಷ್ಠಂ ಗೋಭೂತ್ರಪೇಷಿತಮ್ | ಪೂರ್ವಕಲ್ಪೇನ ಯೋಜ್ಯಾಃ ಸ್ಯುಃ ಸರ್ವೋನ್ದುರುವಿಷಚ್ಛಿದಃ ||೩೬||

Adhikarana 20 (37) · Śloka 37

ವಿರೇಚನೇ ತ್ರಿವೃದ್ದನ್ತೀತ್ರಿಫಲಾಕಲ್ಕ ಇಷ್ಯತೇ |೩೭|

Adhikarana 21 (37) · Śloka 38

ಶಿರೋವಿರೇಚನೇ ಸಾರಃ ಶಿರೀಷಸ್ಯ ಫಲಾನಿ ಚ ||೩೭|| ಹಿತಸ್ತ್ರಿಕಟುಕಾಢ್ಯಶ್ಚ ಗೋಮಯಸ್ವರಸೋಽಞ್ಜನೇ |೩೮|

Adhikarana 22 (38-40) · Śloka 40

ಕಪಿತ್ಥಗೋಮಯರಸೌ ಲಿಹ್ಯಾನ್ಮಾಕ್ಷಿಕಸಂಯುತೌ ||೩೮|| ರಸಾಞ್ಜನಹರಿದ್ರೇನ್ದ್ರಯವಕಟ್ವೀಷು ವಾ ಕೃತಮ್ | ಪ್ರಾತಃ ಸಾತಿವಿಷಂ ಕಲ್ಕಂ ಲಿಹ್ಯಾನ್ಮಾಕ್ಷಿಕಸಂಯುತಮ್ ||೩೯|| ತಣ್ಡುಲೀಯಕಮೂಲೇಷು ಸರ್ಪಿಃ ಸಿದ್ಧಂ ಪಿಬೇನ್ನರಃ | ಆಸ್ಫೋತಮೂಲಸಿದ್ಧಂ ವಾ ಪಞ್ಚಕಾಪಿತ್ಥಮೇವ ವಾ ||೪೦||

Adhikarana 23 (41) · Śloka 41

ಮೂಷಿಕಾಣಾಂ ವಿಷಂ ಪ್ರಾಯಃ ಕುಪ್ಯತ್ಯಭ್ರೇಷ್ವನಿರ್ಹೃತಮ್ | ತತ್ರಾಪ್ಯೇಷ ವಿಧಿಃ ಕಾರ್ಯೋ ಯಶ್ಚ ದೂಷೀವಿಷಾಪಹಃ ||೪೧||

Adhikarana 24 (42) · Śloka 42

ಸ್ಥಿರಾಣಾಂ ರುಜತಾಂ ವಾಽಪಿ ವ್ರಣಾನಾಂ ಕರ್ಣಿಕಾಂ ಭಿಷಕ್ | ಪಾಟಯಿತ್ವಾ ಯಥಾದೋಷಂ ವ್ರಣವಚ್ಚಾಪಿ ಶೋಧಯೇತ್ ||೪೨||

Adhikarana 25 (43-45) · Śloka 46

ಶ್ವಶೃಗಾಲತರಕ್ಷ್ವೃಕ್ಷವ್ಯಾಘ್ರಾದೀನಾಂ ಯದಾಽನಿಲಃ | ಶ್ಲೇಷ್ಮಪ್ರದುಷ್ಟೋ ಮುಷ್ಣಾತಿ ಸಞ್ಜ್ಞಾಂ ಸಞ್ಜ್ಞಾವಹಾಶ್ರಿತಃ ||೪೩|| ತದಾ ಪ್ರಸ್ರಸ್ತಲಾಙ್ಗೂಲಹನುಸ್ಕನ್ಧೋಽತಿಲಾಲವಾನ್ | ಅತ್ಯರ್ಥಬಧಿರೋಽನ್ಧಶ್ಚ ಸೋಽನ್ಯೋನ್ಯಮಭಿಧಾವತಿ ||೪೪|| ತೇನೋನ್ಮತ್ತೇನ ದಷ್ಟಸ್ಯ ದಂಷ್ಟ್ರಿಣಾ ಸವಿಷೇಣ ತು | ಸುಪ್ತತಾ ಜಾಯತೇ ದಂಶೇ ಕೃಷ್ಣಂ ಚಾತಿಸ್ರವತ್ಯಸೃಕ್ ||೪೫|| ದಿಗ್ಧವಿದ್ಧಸ್ಯ ಲಿಙ್ಗೇನ ಪ್ರಾಯಶಶ್ಚೋಪಲಕ್ಷಿತಃ |೪೬|

Adhikarana 26 (46) · Śloka 47

ಯೇನ ಚಾಪಿ ಭವೇದ್ದಷ್ಟಸ್ತಸ್ಯ ಚೇಷ್ಟಾಂ ರುತಂ ನರಃ ||೪೬|| ಬಹುಶಃ ಪ್ರತಿಕುರ್ವಾಣಃ ಕ್ರಿಯಾಹೀನೋ ವಿನಶ್ಯತಿ |೪೭|

Adhikarana 27 (47) · Śloka 48

ದಂಷ್ಟ್ರಿಣಾ ಯೇನ ದಷ್ಟಶ್ಚ ತದ್ರೂಪಂ ಯಸ್ತು ಪಶ್ಯತಿ ||೪೭|| ಅಪ್ಸು ವಾ ಯದಿ ವಾಽಽದರ್ಶೇಽರಿಷ್ಟಂ ತಸ್ಯ ವಿನಿರ್ದಿಶೇತ್ |೪೮|

Adhikarana 28 (48) · Śloka 49

ತ್ರಸ್ಯತ್ಯಕಸ್ಮಾದ್ಯೋಽಭೀಕ್ಷ್ಣಂ ದೃಷ್ಟ್ವಾ ಸ್ಪೃಷ್ಟ್ವಾಽಪಿ ವಾ ಜಲಮ್ ||೪೮|| ಜಲತ್ರಾಸಂ ತು ವಿದ್ಯಾತ್ತಂ ರಿಷ್ಟಂ ತದಪಿ ಕೀರ್ತಿತಮ್ |೪೯|

Adhikarana 29 (49) · Śloka 50

ಅದಷ್ಟೋ ವಾ ಜಲತ್ರಾಸೀ ನ ಕಥಞ್ಚನ ಸಿಧ್ಯತಿ ||೪೯|| ಪ್ರಸುಪ್ತೋಽಥೋತ್ಥಿತೋ ವಾಽಪಿ ಸ್ವಸ್ಥಸ್ತ್ರಸ್ತೋ ನ ಸಿಧ್ಯತಿ |೫೦|

Adhikarana 30 (50-52) · Śloka 53

ದಂಶಂ ವಿಸ್ರಾವ್ಯ ತೈರ್ದಷ್ಟೇ ಸರ್ಪಿಷಾ ಪರಿದಾಹಿತಮ್ ||೫೦|| ಪ್ರದಿಹ್ಯಾದಗದೈಃ, ಸರ್ಪಿಃ ಪುರಾಣಂ ಪಾಯಯೇತ ಚ | ಅರ್ಕಕ್ಷೀರಯುತಂ ಹ್ಯಸ್ಯ ದದ್ಯಾಚ್ಚಾಪಿ ವಿಶೋಧನಮ್ ||೫೧|| ಶ್ವೇತಾಂ ಪುನರ್ನವಾಂ ಚಾಸ್ಯ ದದ್ಯಾದ್ಧತ್ತೂರಕಾಯುತಾಮ್ | ಪಲಲಂ ತಿಲತೈಲಂ ಚ ರೂಪಿಕಾಯಾಃ ಪಯೋ ಗುಡಃ ||೫೨|| ನಿಹನ್ತಿ ವಿಷಮಾಲರ್ಕಂ ಮೇಘವೃನ್ದಮಿವಾನಿಲಃ |೫೩|

Adhikarana 31 (53-58) · Śloka 59

ಮೂಲಸ್ಯ ಶರಪುಙ್ಖಾಯಾಃ ಕರ್ಷಂ ಧತ್ತೂರಕಾರ್ಧಿಕಮ್ ||೫೩|| ತಣ್ಡುಲೋದಕಮಾದಾಯ ಪೇಷಯೇತ್ತಣ್ಡುಲೈಃ ಸಹ | ಉನ್ಮತ್ತಕಸ್ಯ ಪತ್ರೈಸ್ತು ಸಂವೇಷ್ಟ್ಯಾಪೂಪಕಂ ಪಚೇತ್ ||೫೪|| ಖಾದೇದೌಷಧಕಾಲೇ ತಮಲರ್ಕವಿಷದೂಷಿತಃ | ಕರೋತಿ ಶ್ವವಿಕಾರಾಂಸ್ತು ತಸ್ಮಿಞ್ಜೀರ್ಯತಿ ಚೌಷಧೇ ||೫೫|| ವಿಕಾರಾಃ ಶಿಶಿರೇ ಯಾಪ್ಯಾ ಗೃಹೇ ವಾರಿವಿವರ್ಜಿತೇ | ತತಃ ಶಾನ್ತವಿಕಾರಸ್ತು ಸ್ನಾತ್ವಾ ಚೈವಾಪರೇಽಹನಿ ||೫೬|| ಶಾಲಿಷಷ್ಟಿಕಯೋರ್ಭಕ್ತಂ ಕ್ಷೀರೇಣೋಷ್ಣೇನ ಭೋಜಯೇತ್ | ದಿನತ್ರಯೇ ಪಞ್ಚಮೇ ವಾ ವಿಧಿರೇಷೋಽರ್ಧಮಾತ್ರಯಾ ||೫೭|| ಕರ್ತವ್ಯೋ ಭಿಷಜಾಽವಶ್ಯಮಲರ್ಕವಿಷನಾಶನಃ | ಕುಪ್ಯೇತ್ ಸ್ವಯಂ ವಿಷಂ ಯಸ್ಯ ನ ಸ ಜೀವತಿ ಮಾನವಃ ||೫೮|| ತಸ್ಮಾತ್ ಪ್ರಕೋಪಯೇದಾಶು ಸ್ವಯಂ ಯಾವತ್ ಪ್ರಕುಪ್ಯತಿ |೫೯|

Adhikarana 32 (59-61) · Śloka 62

ಬೀಜರತ್ನೌಷಧೀಗರ್ಭೈಃ ಕುಮ್ಭೈಃ ಶೀತಾಮ್ಬುಪೂರಿತೈಃ ||೫೯|| ಸ್ನಾಪಯೇತ್ತಂ ನದೀತೀರೇ ಸಮನ್ತ್ರೈರ್ವಾ ಚತುಷ್ಪಥೇ | ಬಲಿಂ ನಿವೇದ್ಯ ತತ್ರಾಪಿ ಪಿಣ್ಯಾಕಂ ಪಲಲಂ ದಧಿ ||೬೦|| ಮಾಲ್ಯಾನಿ ಚ ವಿಚಿತ್ರಾಣಿ ಮಾಂಸಂ ಪಕ್ವಾಮಕಂ ತಥಾ | ಅಲಕಾಧಿಪತೇ ಯಕ್ಷ ಸಾರಮೇಯಗಣಾಧಿಪ ! ||೬೧|| ಅಲರ್ಕಜುಷ್ಟಮೇತನ್ಮೇ ನಿರ್ವಿಷಂ ಕುರು ಮಾಚಿರಾತ್ |೬೨|

Adhikarana 33 (62) · Śloka 63

ದದ್ಯಾತ್ ಸಂಶೋಧನಂ ತೀಕ್ಷ್ಣಮೇವಂ ಸ್ನಾತಸ್ಯ ದೇಹಿನಃ ||೬೨|| ಅಶುದ್ಧಸ್ಯ ಸುರೂಢೇಽಪಿ ವ್ರಣೇ ಕುಪ್ಯತಿ ತದ್ವಿಷಮ್ |೬೩|

Adhikarana 34 (63-64) · Śloka 64

ಶ್ವಾದಯೋಽಭಿಹಿತಾ ವ್ಯಾಲಾ ಯೇಽತ್ರ ದಂಷ್ಟ್ರಾವಿಷಾ ಮಯಾ ||೬೩|| ಅತಃ ಕರೋತಿ ದಷ್ಟಸ್ತು ತೇಷಾಂ ಚೇಷ್ಟಾಂ ರುತಂ ನರಃ | ಬಹುಶಃ ಪ್ರತಿಕುರ್ವಾಣೋ ನ ಚಿರಾನ್ಮ್ರಿಯತೇ ಚ ಸಃ ||೬೪||

Adhikarana 35 (65) · Śloka 65

ನಖದನ್ತಕ್ಷತಂ ವ್ಯಾಲೈರ್ಯತ್ಕೃತಂ ತದ್ವಿಮರ್ದಯೇತ್ | ಸಿಞ್ಚೇತ್ತೈಲೇನ ಕೋಷ್ಣೇನ ತೇ ಹಿ ವಾತಪ್ರಕೋಪಕಾಃ ||೬೫||

Adhikarana puShpikA · Śloka 7

ಇತಿ ಸುಶ್ರುತಸಂಹಿತಾಯಾಂ ಕಲ್ಪಸ್ಥಾನೇ ಮೂಷಿಕಕಲ್ಪೋ ನಾಮ ಸಪ್ತಮೋಽಧ್ಯಾಯಃ ||೭||